Kawppui Tur Atana Duhthusam Tak Neih Dan Tur (Kari Jobe & Cody Carnes)

"Mi suaksual chu, a hlauh ang ngeiin a chungah a lo thleng ang: Mi fel duhthusam chu pêk a ni ang."(Thufingte 10:24)  

Inrinni hian he blog ah hian, kawppui neih leh zawn lampang tar lan a ni thin a. Inrinni kalta pahnih ah khan, "kawppui atana Duhthusam tak nei thintu te chu, Pathian thu awi te an ni thin" kan ti tawh a.

Pathian hian, a thuawiah leh mifela min chhiarna tur chu,  amah kan rinna hi ani, Abrahama chuan Pathian a ringa chu rinna chu a felnaah ruat a ni" (Jakoba 2:23) ah chuan alo in ti a. Pathian kan rinna hi, a lan theihna chu, a logic tawh loh (nih phung pangngai a ni tawh lo) miin min tih thleng pawha Pathian kan rinna avanga amah kan la nghah cheuna hi a ni.

Kari Jobe worshiper (fakna hmanga Pathian be tu) zaithiam em em leh hmeltha tak hi, kum 35 a nihin pasal a nei chauh a ni. American's ho khu an ram a that avangin, nupui pasal an nei hma hret, te pawhin a hriat a, chutih lai chuan, Karii hmeichhe hmeltha em em leh model ni thei tur khawpa tlawntlai tha em em (5.8 vel a sang a ni) chuan kum 35 a nih in pasal a nei chauh a ni. Mizo zingah pawh hetiang ang kuma pasal nei chu, senior kan ti viau tawh a nga, a nei har mah mah kan ti bawk awm e.

A pasal nen an in neih hmaa an in haul lai bawrvel hian restaurant ah kan chawl duna a ti, a pasal chu "Cody Carnes a ni a, Cody ti nge i mit rawng chu ka ti a, a mit chu ka en chiang leh zuala, a mit rawng chu alo hringa (green), Codya chuan ni enga ka awm nasat avangin ka mit rawng hi a in thlaka a ti a, Codya chuan tinge ka mit rawng pawh chu i buaipui viau a, a ti a. Karii chuan, Pathian hnenah ka pasal mit rawng atan a hring (green) ni rawh se, tiin ka dil thin a, a ti a ni." 

Kan Pathian thu neihna zawng zawng chunga thu neitu hian, a thu zawm hmasa tu te chu an duhthusam alo pe thin a ni. Kari Jobe ngaihzawng pawh nei ngai lo khawpa, Pathian rawngbawlna  ngaipawimawhtu, Pathian dahhmasa tlattu chu, Pathianin pasal a neih a hun tawh a tih ah chuan, a fanu duhzawng ngei chu pek a hmaihlo a ni. Keini pawh hian, kawppui atan duhthusam neih kan duh a nih chuan, Pathian rawngbawl hi, kan ngaihzawng te, kan star rukte, leh kan nuna thil dang zawng zawng ai kan dah pawimawh hmasa tur a ni. 

Pathian rawngbawlna erawh kan hriatthiam a pawimawh awm e, chhungkuaah, khawtlangah, kan nitin thiltih leh kan hnaah te Pathian rawngbawlna a awm vek a. Kan balance thiam fo te pawh a tul ang, heng zawng zawnga Pathian rawng kan bawlna ai hian, ngaipawimawh zawk leh dahhmasak zawk, kan nei a nih vaih chuan, kan duhloh leh kan hlauh ang ngei te chu, kan chungah a thleng ang.

Kawppui zawnna ah pawh hian a ni chhiah a ni, nu leh pa thuawi hi rawng kan bawlna hmasa ber a ni a, nu leh pa ten kha kha chu a that hmel loh an ti chung chung, nei lui te, ala hun lo e an tih lai a tilui te hi, inchhir lo leh an hlauh ang ngei an chunga thleng lo an van viau a rinawm a ni.

Kari Jobe te ang hian Pathianin kohna bik min nei a ni thei e, Pathian min kohna pawh hi nasa takin a hrang thei a, a then missionary, a then hla hruaitu, a then pastor, a then chhungkawnu, a then eizawna lamah, a then zirna lamah te pawh a ni thei e, chung min kohna chu ngai nepin, ngaihzawng kan thlahlel lutuk a nih chuan, kan hlauh ang ngei ngeiin kan chungah thil thalo a thleng thei a ni.

 Kan tisual palh tawh a ni thei e, Pathian duhdan niloin, nupui pasal kan nei a, hreawm kan ti viau pawh a ni thei, chutiang a nih chuan Pathian duh anga nungturin bul tanna hun a tlai loa, nupa inthen tawh pawh kan nitheia chutiang a nih pawhin Lalpa duh anga nun hmana kawppui zawn leh kan duh a nih chuan a tlai chuanglo. Tin nasa takin, mipat hmeichhiatna kan hmang khawlo tawh a ni thei, chung pawh chu nise Lalpan min la ngaidam duha, kan tana a nun buatsaih nun duhawm em em chu min pek ala duh a ni. Chungchu kan neih theih nan Lalpa hnenah kan kir a ngai a ni, kir leh te chu ngaihdam an ni thin a, kir lo te chuan hremna an tawk thin a ni.

Pathian thu kan zawma, amah kan rin avangin a hnathawh leh a hun ruat kan nghak a nih chuan, kawppui tur atana kan duhthusam chu min pek ngei a rinawm a ni.

Tisual tawh tan te pawh, Krista min chhandamna avangin hei tho hi kan chanvo leh kan chan tur a ni. Lalpa hnena kira, a thu zawmna phenah chuan malsawmna a awm a ni.

(Tawngtai Dan Tur)

Lalpa, duh tak ka neih theihna tur chu, nangmah atangin a ni a, hausakna te, larna te, hmelthatna te hi, duhthusam neih theihna a ni lo tih hi hria in, i thu zawm a, i kawnga kal tlat hi duhthusam neih theihna zawk chu a ni tih hriain, i duh anga ka nun tlat theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Harsa Ti Chunga, Pathian Rawng I Bawl Tlatna Kha, Thlarau Thianghlim Chen Chilhna I Nei Ngei Ti Fiah Tu A Ni Zawk Ang

"Ka Pa, rem i tih chuan he no hi ka hnen ata la sawn rawh; nimahse keia thu ni lovin, nangma thu thu ni zawk rawh se, a ti a."(Luka 22:42)

"Tin, a thlaphang em em a, thahnemngai lehzualin a tawngtai a; a thlan chu thi far lian tak angin leiah a far a."(Luka 22:44) 

Isua Krista, hi ringtu te chuan kan hre vek ang, Isua Krista ringtu kan nih avangin ringtu tih kan ni. Kan Lalpa Isua Krista khan, min chhandam turin mihringa a rawn chan avangin, mihringah chhiar tel ta ila. 

Mihring piang tawh zawng zawngah chuan, Isua Krista tluka Thlarau Thianghlim chenchilhna chang thuk leh thilmak (miracles) ropui tithei an awm lo ang. Gethsemani huanah khan tawngtai har a ti ve ngang a ni, sawi tur pawh a hre tamlo "Ka Pa, rem i tih chuan he no hi ka hnen ata la sawn rawh; nimahse keia thu ni lovin, nangma thu thu ni zawk rawh se, a ti a." Chu mai bakah a lungngaihna a nasa lutuka, a thlan pawh thisen ang hialin a far a nih kha, hetiang taka tawngtai harsa a tih pawh hian, Isua chu ala tawngtai tho tho a ni.

Mi thenkhat chuan, tawngtai a nuam emai, Thlarau Thianghlimin min chenchilh a nih hi an ti thin a, dik pawh a dik ang, chutih rual chuan hei hi a pawimawh zawk chu a ni, harsa leh tuina awm miah loa tawngtai fan fan tute hi, Thlarau Thianghlimin a chenchilh nasat lehzual, a rinawm zawk a ni.

Pathian rawngbawlna dangah pawh a ni tho a, Thlarau Thianghlimin min awmpui nasa bawka, kan hnatlan, kan work camp, kan hla zir chu a nuam khawp mai, kan ti thin, a nih ngei pawh a rinawm. Mahse, rawngbawl a harsat ber laia, rawngbawl tlat theitu te hi, Thlarau Thianghlim chenchilhna chang chiang ber ber te an ni zawk thin a ni.   

Kawng rual rem takah chuan, motor nem leh a khawl pan ber ber te chu an chak ber emaw tih turin, motor khauh leh khawl chhah ber ber te chu an leh pel zut zut thin a. Mahse, kawng bum bauhah leh rit phur a alo tul meuh chuan, motor khauh leh khawl chhah te chu an lo chak zawk zia a lang leh thin a ni.

Harsa ti em em leh tuina pakhat mah awm lo a, i tawngtai luihna te, kan rawngbawlna hi Pathianin min hriatpui tawhlo emaw tih tur khawpa, phur awm loh leh alo reh huna, Pathian rawng ila bawl luih tlatna te kha. Khawlpui (Engine) Thlarau Thianghlim i neih zia tilangtu a ni.

Hawh u i kal zel ang u, kan dai kai dawn dawn ta.

(Tawngtai Dan Tur)

Lalpa, nuam ka tih lai chauha i hnena tawngtai thin leh i rawngbawl thin kalo nih chuan min ngaidam la, a harsa ka tih hunah pawh i hnena ka tawngtai tlata, i rawng ka bawl tlat theih nan min pui la, chu chuan i fa ka nih zia leh i chenchilh ka nih zia a lan tir bawk ang tih hriain, thahnem ngai sauh sauh turin min pui ang che, Amen. Ti ang o.     

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Miin Pathian Hnenah Nangmah Vangin, Lawmthu Sawi Ta Se, I Chungah Pathian A Lawm A Rinawm

"He chhawmdawlna rawngbawlna hian mi thianghlimte tlakchhamnate chu a phuhruksak chauh pawh a ni si lo va, Pathian hnena lawmthu sawina tam taka changing a luang liam bawk a ni."(II Korinth 9:12)

Sangi hi a awm a, an chhungkua pawh an pangngai viau mai a, Sangi pawh chu hnathawk rula kum 27 vel a ni tawh a, hna pangngai tak a nei nghe nghe a. An thenawm khaw veng te chuan, a hmelthat avangin tu tak pasalah nei ang mo, an ti thin  a ni.

A hnathawhnaah chuan, an hotupa chuan, nitin cheng 50 hi eiin manah a pe thin a, eiin man chu pelo mahse an hlawh a that pangngai avang chuan, buai tur chu an ni chuang loa, mahse Sangi hian hna a thiam bik avangin, an pu chuan riltamin hna an thawh a hlauh avang zawkin nitin cheng 50 chu a pe thin a ni.

Tichuan, an hnathawhna bulah hian, putar kum 62 mi vel hian, a remchang chang chu a zuar ve thin a. Vawikhat chu, ruah nasatakin a sur a, chu putar chuan engmah a hralh thei silo a, chhun thingpui pawh a in ngam loa, Sangi chuan a chanchin a hriat chuan, khua a tha emaw a chhia emaw, chu putar chu cheng 10 man biscuite leh cheng 10 man thingpui emaw intur emaw nitin a pe thin ta a.

Tukkhat chu, Sangi te pu chu, an hnathawhnaah chuan tih fel tur a tam avangin a kal hmaa, chu putar chuan Sangi te pu a ni tih a hriat ve leh, ka pu in naute zingah hian tu emawin, ka harsa a ni tih hriain thingpui leh chhang nitin min pe thin a, in chungah hian, ka lawm takzet a ni, alo ti a. Sangi te pu chu, a lawm hle mai a, chutianga putar lo puitu chu, zawn chhuaha lawmman pek a tum ta a. Mahse, lawmman pek a tum tih a sawi chuan, midangin lawmman beiseiin chu putar emaw midang an hnathawhna bul amite amaw chu, an lo pui der ve ang tih a hlau si a, tihdan a ngihtuh chhuak ta a, ni rei lote he putar eitur lo pe thintu hi, a eiin man ka pek thin chu pe loin putar a lo puih vang chuan ka hrem der a nga, chu mi hnuah ah a hlawh ka pun a nga, a hna pawh ka kaisan tir vat ang a ti rilru ta a.

Tihian Sangi pu chuan, notice alo tar a, "kan hriatpuina tel loin, kan zinga mi pakhat chuan nitin midang eitur alo pek thin avangin, a lunch bonus (thingpuiin man) a dawn thin chu a dawng tawh dawn loa, midang eitur lo pe thintu hian, voin ni ral hma ngeiin, ka office ah min rawn hmu rawh se a ti a." 

Sangi chuan an hnathawhna hmun a thlen ve leh a thinnu pakhat chuan, Sang notice khi han chhiar chhin teh alo ti a, a chhiar zawh chuan, nitin a tih angin Sangi chuan hna atan hmain bible tawite a chhiar a, a tawngtaina bawk a. Tichuan, a thiannu bawk chuan, i thil tih kha a that teh lul nen, beisei loh angin thil a inher ta sia alo ti a. Sangi chuan, a pawilo, ka theih ang tawka mi ka puih ve na kha lawmman a ni daih tawh alawm, lunch bonus pawh dawng tawh lo mah ila, ka la pe zel tho dawn a ti a. A thiannu chuan, chutianga mi puih hi alo nuam a nih chuan, ka bonus hi mi puih nan kan hmang dun a nga, bakah kan hlawh a tha pangngai a, kan buai phah lo ang alo ti ve bawka.

Sangi chu, an pu office chhungah ava lut a, an pu chuan putar hi ilo pui thin tiro a ti a. Sangi chuan aw, an harsat em avangin, chhunah engmah ei loh chang a neih avangin, ka bonus dawn atang nitin 20 man huin a eitur ka leisak thin a, ka lo rawn hmasa lo che a min ngaidam dawn nia  a ti a. An pu chuan, ngaihdam dilna tur i nei hleinem, branch thar kan hawn turah, mi ilo puih thin avang hian, branch head tur tha tak ka hmuchhuak che in kalo hria a. Branch head chu i ni duh a ngem, i hlawh pawh branch head i nih chuan 20% a tih pun a tha in kalo hriaa, a ti a. Sangi chuan, min warning zawk dawn emaw kalo ti a, notice ah lah khan bonus kha cut tur i ti bawk si a, a ti a. An pu chuan midangin chawimawi beiseiin, mi an puih ve loh nan khatiang khan notice ka rawn tar a nih kha. Ni e, branch thara i insawn hma te chu, bonus i dawnglo rih a nga, mahse branch thar a i awm hunah chuan, tha i tih anga mi i puihna turin fund kan siam dawn nia a ti ta a ni.

Sangi ang hian, kan sum senga mi kan puih hian, harsat phah zawk te in hun eng emaw chen chu kan lang thin. Thinglung dika mi puitu leh chawmawi phut leh thinlung diklo a, midang puitu te hi Lalpan min thliar hran a duh avangin, heng harsatna te hi kan tawrh a phal a ni mahna! Mahse, kan puih a ten Lalpa hnena, kan puihna avanga leh keimahni avanga lawmthu an sawi hian, Lalpan dinhmun tha zawk min pek a duh thin a, keimahni vanga lawmthu sawina Lalpan a dawng a nih ngat chuan, Lalpan dinhmun tha zawk min pek a hmaih a rinawm loh a ni.

He leiah hian chung, chawisanna chu midang kan puihna avangin dawnglo mah ila, keini vanga midangin Lalpa hnena lawmthu sawina an thawn chho a nih phawt chuan, vanramah kan lawmman chu, Lalpan min pek hmaih a rinawm loh a ni.

Hawh u! Kan phak loh ni loin, Kan phaktawkin, Lalpan a rawngbawl min phalsak bawka, kan theihna beitham tak hi up bo lo ila, i khawhral lo bawk ang u. Tu emaw chuan, vanram kawtchhuahah, i phaktawka Lalpa rawng ilo bawl thin avangin, vanin ah hian ka lawi ve dawn ta, min lo ti maithei asin.

(Tawngtai Dan Tur)
Lalpa, i rolrelna hi a fel em avang leh a ropui em avang hian, i tana thiltha ka tih rual hian, lawmman ka hmu lo a ni mahna, mahse i hminga ka tihte ka tih theihna hrim hrim hi lawmman tling a ni tih hriain, ka theih tawka, i rawng ka bawlna ah hian ka in thlahdah ngai lohna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Ngaihsakna leh Hmangaihna Hote I Lantir Khan, Nasa Takin Hna A Thawk Thei

"Chu mite pathum zingah chuan suamhmangho tawka vengte chu tu ber nge nia i rin? a ti a.  Tin, ani chuan, "A khawngaihtu chu," a ti a. Tin, Isuan a hnenah, "Nang pawh chu ang bawk chuan va ti ve rawh," a ti a." (Luka 10:36-37)


"Tin, thilphalna tinreng, keimahni avanga Pathian hnena lawmthu sawina siamtu chu nei tura engkima tihhausaka awmin, thehtu hnena chi petu leh ei atan chhang petu chuan in theh tur chi chu a pe che uin a tihpunsak ang che u a, in felna rahte chu a tihhlawksak bawk ang che u."(II Korinth 9:10-11)

Rawngbawltu pakhat hian, mi bike a tlu hi a tun puia, chutih lai chuan, inkhawm pawh inkhawm ngailo mipakhat hian an mahni pui ve turin, a rawn tlan ve bawk a, bike a tlukna hmun chu a chhuk deuhhlek bawk a, mipakhat tan mai chuan bike chu tun a har deuh avangin puih ve a rawn tum a ni. 

Bike an han tun zawh chuan, inkhawm pawh inkhawm ngailo bike tung tura an mahni rawn puitu chuan, rawngbawltu chuan engmah a sawi hmain, ka rawn inkhawm ve tawh ang, a ti a ni.

Sap thufing nge, eng thufing ber emaw chuan, "Action Speaks Louder Then Words"(Nungphunga thatna lantir hi, thu tha tawngkama sawi mai ai chuan, a ri a ring zawk) alo ti a. Mi thenkhat chuan, thu tha hi an sawi an sawi a, an sawi zawh chiah ah, tlemte, hote a puih ngai pawh awm se an pel nghauh nghauh mai thin a, an thusawite chu a thi thin a ni, a chhanchu a sawitu ngeiin a chetzia in, a thu tha sawi ngei chu a vuak hlum thin vang a ni.

Hawh u keini ringtute hian, kan vengte (kan bul ami te) hnenah hian, huntha (chance) a awm a, kan theih zawng a nih phawt chuan thatna hi i chhuah hrehlo ang u. Bus leh taxi chuanna ah emaw, damdawi leina leh restaurant ah te, pawisa nawi neih remchan loh avangin a buai theih a, chutiang hunah chuan, pawisa nawi nei remchanglo chu, a thlawna pek mai te hi i hreh lo ang u.

Tin, miin puih min dilin, kan theih tawk, kan phal tawk talin i pui thin ang u, tumahin i neih zawng zawngin min pui rawh an ti ngai lo bawk a, kan cheng 10 atanga kan cheng 100 te hi, midangin Pathian hnena lawmthu an lo sawi phahna (II Korinth 9:10b) a ni thei tihhi hriain mamawh an awm a, kan pe thei a nih chuan i ui lo ang u. 

Tin, mahni motorin kan chhuak a ni thei e, chuanna tur nei mai lo te, kan hmuh remchana kan motor leh two wheeler ah te an chuanna a len chuan phur tel i hreh lo ang u. Hei pawh hian, Pathian hnenah lawmthu sawina thlen thei a ni.

Mi thenkhat chuan, kutdawh ai eng emaw ka rawn zuar ve a an ti thin a, hengte pawh hi tlema zawng tal lei sak tum ila, an thil zawrh kan duh ngang loh pawhin kan cheng 20 leh 50 te hian kalo pui ve reng reng ang che, i ti hreh lo ang u, kan thei a nih chuan. Chutiang kan theilo a nih pawhin, thu chawl ta che, tui kalo suah ang che emaw, thingpui kalo lum ang che i ti thin ang u. Kan thingpui an in anih phei chuan Pathian thu emaw, an mahni fuhna tur thu emaw hrilhna hun tha lutuk a ni thei dawn a ni, chu chuan Pathian hnenah lawmthu sawina a thlen ngei a beisei awm a ni.

Pathian hian, kan tih theihte ti turin min ti a, kan tih theih loh te chu, tih tum phet turin min ti lo a, kan tih theih a tam loh tehreng nen a, kan phak tawk leh tihtheih tawka, Lal Ropui Ber kan Pathian rawng a bawl theih a nih chuan, kan tih theih tawka Pathian rawngbawlna tur hi a zawna zawng zawk tur hi kan ni a ni.

(Tawngtai Dan Tur)
Lalpa, nangin min khawngaiha, ka tha leh zung leh i malsawmna ka dawn atangin, eng emaw i tana tih ve theihna min pek hi, up hlum lo turin leh khawhral mai lo turin finna min pe la, i rawng ka bawlna tur chu ka vengte, midangte hi an ni tih hriaa, theih tawpa theihna min pekte hmang hian, i rawng ka bawl theih nan min pui ang che, Amen. Ti ang o. 

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

ISUA THUNEITU LU BER

Amahah chuan in famkim ta bawk a; ani chu lalna leh thuneihna zawng zawng lu a ni. (Kolossa 2:10)

Kristian tha tak chuan a zui Krista THU hi a awih ngei thin a, a nuna thuneitu berah a dah a, Luah Krista chu a hmang thin a ni. Lu a Krista hman tih awmzia chu hetiang hian sawifiah dawn ila:

I lu ah chuan i thluak, i ngaihtuahna a awm a, chu chu Kristan a luahkhat tur a ni.

Tin, i ngaihtuahnaa awm angin i taksa a chetchhuah thin avangin i ngaihtuahna Kristan a luahkhah chuan Pathian duhzawngin i nung chhuak ngei ang. Pathian ngaihsak tlat mi chuan Pathian thu pawh a awih fo thin reng a ni.

I luah chuan i mit a awm a, chu chuan Krista a en a ngai a, a thlir tlat tur a ni. Pathian nilovin Khawvel zawk kan thlir hian kan nun a buai thin, Petera pawhin Isua thlir lova tuifawn a thlir kha chuan, a pil mai ta ang khan.

I luah chuan i beng a awm a, a entir chu Pathian Thu chu i hriain, Pathian aw i ngaithla thin tur a ni. Pathian aw hre tur chuan amah kan auh tam a ngai. A aw hre tur chuan hun kan pek ve a ngai. A hring a hranin a rawn tawng kher lo maithei, mahse kan thinlungah emaw thil dang kaltlangin chiang takin min rawn be thei thin a ni.

I ka a awm a, chu chuan Pathian Thu i ngaihtuah te, i hriatte chu a puang chhuak bawk tur a ni. 

(Tawngtai Dan Tur)
Lalpa, ka nun ah hian lu bera ka dah theihna tur chein min pui la, nangmah thlirtu, i aw ngaithlatu, i thu puangchhuaktu, i fa leh i bawi rinawm ka nih theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

LALPA KRISTA RAWNGBAWL

A rulhna ro luah tûr chu Lalpa hnên ata in hmu dâwn tih hriain, in tih apiang chu mihring tân anga ti lovin, Lalpa tân anga ti zâwkin, châk takin ti rawh u; Lalpa Krista rawng in bâwl a nih hi. (Kolossa 3:23‭-‬24)

Kolosa 3:18-25 chhungah hian nun thara nungte khawsak dan tur; mihring inlaichinna kawngpui deuh deuh chi thum kan hmu, chungte chu - Nupa inkar te, nu leh pa leh fate inkar te, bawih leh a pu inkar te a ni.  
   
Heng zingah hian bawih leh a pu inkara bawihin a pu rawng a bawl dan tur leh lukhâwng tur hi kan zir deuh bik tur chu a ni.

A rulhna roluah tur:
Bawihte chu tisaa an hotute thu chu engkimah zawm tur an nih leh, mihring mit hmuha an pute tihlawm tum mai ni lo va, thinlung taka Pathian ṭih chungin thu an zawm zâwk tur a ni a. An hotute hnen aṭangin lawmman dawnglo mah se, ro luah tur lawmman (reward of the inheritance) chu Lalpa hnen ata an la hmu dawn a, chu chu 'a rulhna ro luah tur' tiin Paulan a sawi a ni.

Châk taka tih tur:
An ni tin hna chu Lalpa tân anga ti a, châk tak leh phûr taka tih tur a ni. Chutianga an tih chuan Lalpa Krista rawngbawl an ni mai tiin Paulan Kolosa mite hi a hrilh a ni.

Lalpa Krista rawngbawl:
Kan mihringpuite tâna thil ṭha kan tih sakin, Pathian kan tih vangin, hreh tak chung leh mi tihlawm tumna rilru pawnlawi tak pu chung ni lovin, thinlung tak leh châk taka tih hi Lalpa Krista rawngbawlna a ni.

Nupui leh pasal pawh inhmangaiha thu inawih tawnin, nu leh paten fate ti thinur lova Lalpa lama enkawl a, naupangten Lalpa thuah nu leh pa thu awih te, bawihin a pu duh zawng Lalpa thlir chungin châk taka a tihte hi Lalpa Krista rawngbawl nihna a lo ni. 

Rawngbawltu kan ni thei vek:   
Kohhranah chanvo neiha rawngbawltu tih hming put kher hi rawngbawltu nihna a ni chuang lo va; heng kan sawi tâk ang mihring inkara kan inlaichinnaa kan tih tur tih te, nitin hnàa kan hotute thu thinlung taka awiha tih tur phur taka titute hi Lalpa Krista rawngbawltu an ni a, a rulhna roluah tur (reward of inheritance) chu Lalpan a pe mai zawk dawn a lo ni.
    
Mihring lama ṭhat leh ṭhat inlawm tawnna hi ro a tling lo va, kan beisei tur pawh a ni lo. Kan mihringpuite laka kan thiltih lawmman chu Lalpa hnen ata kan la hmu zawk dawn a ni.
    
Mi dang lakah hian vui mai a va awl em! Miin min ngaihsak lo mahse, Lalpan min hre reng tih hriain, a lawmman min pek tur chu chhel takin i nghak reng zawk ang u. Lalpa Krista rawng kan bawl a nih hi.

Hrehawm mahse thawk zĕl ta che,
Ṭawngṭai engahmah theihnghilh lovin;
I chawlhna ni a lo hnai e,
Nghâk hrâm la, phunnawi lo vang che.

(Tawngtai Dan Tur)
Lalpa, i duh dan dah hmasa zel chunga, engkim ka tih theih nan min pui la, i duh anga engkim tih hi i rawngbawlna tlingah i pawm a ni, tih hi hre tlat chungin, i duh angin nu leh pa thu ka zawma, hruaitu leh hotu te thu pawh ka zawm bawka, ka nitin thiltihte i duh anga ka tiha, keimah ai a nau zawkte i duh anga ka enkawl bawk theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

I Hlutna Leh I Nihna Tak Chu, Kristaah Hmu Turin Zawng Ang Che

"A khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin."(Ephesi 1:5) 


I.A.S pakhat principle secretary hna hial chelh chuan, pangngai takin min kawm ve duha, chu pa hlutna chu hna ropui em em thawk thei tura thiamna a neihna chu a ni a, a nihna chu India rama office line a sangber leh hlawh tha ber I.A.S a ni. Tlemin a rual u deuh tawh avangin, a inchei dan te leh a tawngkam te chu a nuihzathlak lek lek a.


Vawikhat chu airport ah kal thut a ngai a, kekawr bul hain leh sneakers chhunga muza sei zet bun chung leh kawr nghawng nei ha in zuk kal tlat peka, thilte hi a hre hmanlai ve em em mai a. Mahse, kan zah loh phah chuang loa amah pawh a inhmuh hniam phah chuanglo, a chhanchu I.A.S a ni tlat a.


Vawikhat chu, Aizawl atang Delhi kan chhuk tumin, a ni election duty tur nen kan intawka, min rawn kuah thuak thuak a, mizo I.A.S dangte an duty ve em tih ka zawt a, aw duty e, mizo I.A.S zinga junior zawk pakhat chu alo phone nghe nghe a, in pu ten an rag (ti nawmnah) che u em ka ti a, an lo rag che u chuan min lo hrilh rawh u, ka ti a, a ti ta nghe nghe in ka hria.


Chutiang khawpa, I.A.S theuh theuh zingah pawh chal lang a nih theihna chhan leh a huaisen theih chhanchu I.A.S a nihna angin a hna a thawh that em vang a ni. 


Keini pawh hi, Isua Krista thisena tlan kan nih avangin Pathian fa kan ni a, van lal fanu leh fapa te kan ni tihna a nih chu. Kekawrbul tet kan ha emaw, kan lungngai emaw, pawisa kan nei lo a nih pawhin, van Lal fa kan nihna a bo chuanglo a ni. Mahse, hei hi kan hriat loh chu a ni, lei lal fa chu lal fa an nih angin, an retheih ber lai chu sawi loh thah an nih dawn thlengin lal fa awmin an awm thin a, keini erawh hi chuan engtik lai mah hian, van Lal fa kan nih hi kan hre ngai lo a.


Lei lal fate chuan, lal hausakna leh lal ram hausakna an duh angin hman nachang an hria a, an hmang thin bawk a ni. Kei ni erawh chuan, Lal fa kan ni tih hi kan hriat thin loh avangin, Lal hausakna leh Lal ram hausakna (kingdom) chu hman nachang kan hre thin lo a ni.


Lei lal fa te chuan, tawngdan bik leh midang thu han pek dan bikte an hre thin a, chungte chu an hriat theih nan leh an ram kalphung (kingdom culture) chu an hriat theih nan nasa takin an zir thin a, tichuan thuneihna nen an nung thin a ni. 
Kei ni hian, engtin nge van Lal ram hausakna chu kan, hman ve ang le? Kan ti maithei, lei lal fa ten an lal rama thuneitu ten  thu an hman dan an zira tichuan thu neihna hman dan an zirthiam a, chu chu an hmang thin ang hian, keini pawhin van thuneihna hmang turin kan inzir a ngai a, chu kan inzirna tur chu Bible ah a inziak veka, kan hai chhuaha kan zir thin a pawimawh a ni. Isua chhandamna changtute chu damlo tih damtheihnate, ramhuai hnawhchhuah theihna te peksa vek kan ni tih hi kan hriat reng a pawimawh awm e.


Lei lal fa te chu, an pa (lal) nen chuan an in be pawha inzawmna (connection) thuk tak an nei thin a, an rama thu ber chu an pa a ni a, chu an pa nen chuan an in pawh that phei chuan an lal ramah chuan nasa takin thu an nei thei thin a ni. Keini pawh hi, kan Lal leh kan Pa Pathian nen hian inpawhna thuk kan neih theih nan, nasa takin a hnenah tawngtai thin ila, kan Pathian nen inpawhna thuk kan neih chuan, khawiah pawh thu kan nei dawn a ni (Pathian Lal ram chuan bithliah chin a nei si lo a).


Kan nihna chu, Isua Krista min tlan avangin Pathian Fa tak kan ni a. Kan hlutna chu Pathianin a hna thawk theitu leh a hna thawktua min pawm vang a ni. I.A.S kan sawi khian a nihna a hre chianga hna tha takin a thawka, I.A.S dang lakah pawh thil a tithei bik a ni. A thu an zawm lo emaw, miin a pawi an khawih a nih chuan, a chhawrtu sorkar tan hna a thawh that em avangin, a pawi khawihtu chuan sokar pawi an khawih tihna a ni a nga. Sokar chuan, chu a pawikhawihtu chungah chuan ro a rel ang.



Hengtiang chiah hian, Pathian fa kan nihna hi hriain, a hna tha takin thawk ila, thiltihtheihna pawh kan nei thei hial dawn a ni. Chutiang taka Lalpa tana kan thawk a nih chuan, sokarin I.A.S pa thlavang a hauh aia nasa zawk mahin kan thlavang a hauh a nga, "Nangni khawihtu chuan a mit naute a khawih a ni mai."(Zakaria 2:8) Min khawihtu chu Lalpa mitnote khawih ang a ni ang a ti.



Sualin min bum avang hian hlulote hian kan inhre thina, kan tan van Lal Fapa a rawn thih duh chuan kan hlu tawk a ni tih hi hria ila, Isua min chhandamna avang chuan nihna ropui tak fak tak nihna kan nei a ni.



Krista vanga kan nihna tak leh kan hlutzia hre chungin, kan nitin nun hi Lalpa tan thianghlim takin hmang ila, tichuan harsatna leh hun khirh paltlang tur alo awmin Lalpa'n a chak zia kan tan a rawn lantir ngei ang.

  

(Tawngtai Dan Tur)
Lalpa, i fapa Isua Krista min tlanna avangin i fa ah min pawm a, chu chu ka nihna a ni a, i hna thawktu leh i hna thawk theitua nangin min pawm avangin ka hlu bawk a ni, ka nihna leh ka hlutna hriain, i duh anga i tana nung turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.