Sual Tlansana Hnunglam Pawh Enloh A Tul A Ni.

"Tin, heti hi a ni a, pâwna an hruai chhuah hnu chuan, "I nunna tûrin tlân chhuak rawh; i hnung lam hawi suh la,  Phaizâwl rêng rêngah hian ding hek suh; tlângah sâwn tlân rawh, chutilochuan i boral dah ang e," a ti a."(Genesis 19:17)

Sual sim tura pawimawh te :

1. Sual hi a tlana kan tlan chhiatsan hi alo ngai tak zet zet a ni, kan tlanchhiatsan loh a, a bula kan awm a, kan inhnaih tira kan zut kan zut chuan, kan tlu leh nge nge thin a ni. Chu vang chuan, sual kan sim theih lohte hi kan sim theihna tur chuan, a tlana kan tlanchhiatsan a tul a ni.

2. Chutianga kan tlanchhiatsan a, kan kalbosan pawh chu ala tawk lo cheu, kan hawikir loh ala ngai leh zel a ni. Sual kan tih lai leh, min bumna thlumte chuan, kan lung a len thin avangin, ngaihtuah pawh ngaituah duh loh tur a ni. Kan va hawi kan va hawi chuan, kan lung a len a, min chhaitlu leh nge nge thin a ni, chu vang chuan, kan lehhawi tawh miah loh hi a pawimawh em em a ni.

3. Chutianga kan tlansana, kan lehhawi tawh miah loh pawhin, kan chawl mai tur a ni lo va, kan hmalam panin kan kal ngar ngar tur a ni, kan chawlh vaih chuan, keimahni anga sual hliam tawh ten, sualin an lung a len zia te min hrilh a nga, kan lung an tileng ve theia, chu chuan min hawi kirtir a nga, min titlu leh thei a ni.

4. Kan thlenna tur hmun, "tlang lam" chu kan pan ngar ngar bakah kan rilruah kan dah tlat tur a ni. Chutiang nilo a, thil dang kan rilru kan dah chuan, chungte chu a kal a kal a, sualah bawk min hnuk lut leh thei a ni, sual sim kan tum hian, kan ngaihtuahna thleng kan veng fimkhur tur a ni.

Hengte hi huaisen tak leh chak taka kan tih theih nan, kan tawngtai fo va, kan inkhawm fo va, bible kan chhiar fo a tul bak a, kan taksa kan uluk a ngai a, a hunah kan chawlh thiam a pawimawh bawk ang.

Chu bakah rawngbawlna a kal thin tawh te kan zui a tul a, chutianga kan zui a tul rual chuan, an tih ang zawng zawng kan ti ve thei mai rih lo a nga, an tih ang zawng zawng tih kan tum nghal mai chuan, rawngbawl harsa kan ti mai a nga, chu chuan rilru natna leh lungngaihna min thlen theia, kan lungaih chuan sualin min beihna remchangah a hmang thei a ni. Hei vang hian, kan phak tawk a kan kal theihna turin kan phak tawk kan hriat hi a tul a ni.

(Tawngtai Dan Tur)
Lalpa, sual ka simtheihna turin, sual chu tlanchhiatsana, ngaihtuah pawh ngaihtuah tawh lo turin leh ka tum ram lam ka pan tlata, ka rilru pawh ka tum ram lam a ka dah tlat theih nan min pui la, kal dan ka thiam theih nan min pui bawk turin ka ngen a  che, Amen. Ti ang o.

Rev. Shane Stanford H.I.V Vei Chu, Kawppui Tha Tak Lalpa'n A Pe, "KAN NUN DAN MILIN KAWPPUI TUR MIN PE"

"LALPA chungah chuan lawm bawk rawh; Tichuan i thinlung duzawng chu a pe ang che. I awm dan tur chu LALPA chungah nghat la; Amah chu ring la, aman a ti vek ang."(Sam 37:4,5)

Shane Stanford'a chanchin kan rawn tarlang tawha, (la chhiar lo tan link ah hian a chhiar theih http://nungturin.blogspot.com/2018/10/hiv-vei-chunga-rawngbawltu-tha-rev.html) a pian tirh atangin thisen chhuak reh theih mailo (Hemophilia) a nei a, an hunlai hian hetiang natna hi enkawl dan an la thiamlo em em a, a damdawi Factor chu thisen atanga siam chhuah a ni a, chutiang damdawi atang chuan, H.I.V chu a kai ta a. A dinhmun hi, ringtu nihna atanga han thlir pawh hian a tuar nasa mah mah lo maw tiha, Pathian hnena complain han teh luh sak mai te hi rilruah a lang hial thei awm e, a chhanchu chutiang natna a vei hnuah chuan Hepatitis C ala vei leh zela, chu mai pawh chu ala nilo, amah enkawltu tur bera a ngaih a nu leh pa an la in then leh zel nen, a tan khua avar ve dawnlo emaw tih mai tur a ni.

Chutianga, a chanchin ziahna bu phek lehlam han keu chuan, Lalpan a tha zawngin rem a ruatsakna phek chu alo thleng ta a. A nu leh pa an inthen avangin, a pu ringtu tha em em chuan a engkawl turin a la taa. Chuta tang chuan, Lalpa nena kal dan a thiam ta a. Thih mai tum tawh Shane'a chuan Pathian atang beiseina thar an nei leh tak tak a, mi hrisel ber ber te hi min khum leh vek ta a ni.

Vawikhat chu, an school bus ah a chuanga, tichuan an schoola hmeichhe hmeiltha ber tih tur awm a hmeltha hi, bus a chep em avang chuan, Shane'a chu nekchhuah tum awm takin a mal chungah a thu ringawt mai a, Shane'a chuan tho rawh ka thutna a nih hi alo tia, chu nu chu an school ah cheer leader ah te a tel a, a lar tih a inhre rana, chu vang chuan a tho duh bik hauh loa, Shane'a lah chuan a kian duh bik loa, Shane'a malchunga thu chung chuan school chu an chuang thleng thak a. Chu nu chu, Pokey'i a ni a, zahtheihloh hmel deuh ni mahsela kristian tha deuh mai alo nia, Shane'a pawh kristian tha a nih avang chuan, an han inhrechiang chho a, an inkawm ngaih ta em em mai a, an inngaizawng ta a.

Tichuan, Shane'a chuan Pokey'i hnenah chuan, inzep theiin a inhre taloa, Pokey'i chuan a then ngei pawh a ringa, a then a nih chuan midang tha zawk, hlim taka a nun pui theih tur a hmu a nga tiin, H.I.V leh natna dang dang a vei thute chu a hrilh a, Pokey'i chuan Shane'a natna a hriat chuan, Shane'a chuan a dampui rei loh a hlauh avangin, then a hnekin inneih vat vat chu a rawt taa, kum 19 lek an nih chuan an in nei taa, hetiang taka Shane'a hi a hmangaih chhanchu Pokey'i hi rilru lama hliam nasa taka tuar a nih vangin, Shane'a bulah a ngaih a ngam ber vang a nih a rinawm. Tichuan, lehkha tha takin an zir dun zel a Shane'a hi Pastor a ni taa, Pokey'i hi Associate Professor niin Education subject a zirtir thin a ni.

Shane'a hian nupui chu sawi loh, ngaihzawng pawh a neih a inring ngailoa, mahse Lalpa a dah hmasa tlata, tichuan Pathianin a mamawh tak leh amah mamawhtu chu a pe a, chutiang bawk chuan Pokey'i pawh hi a seilenna hmunin a zir loh avangin rilru lam natna a nei a, mahse Pathian a tih tlat avangin, mi nun dam em em Shane'a Lalpan a pe ta a ni. Tunah chuan, fanu pathum lai an nei a, an fa te hian H.I.V an nei lo hi mi mak tih a hlawh hle thin a ni.

Pathian remruat thima chuan, Shane'a leh Pokey'i chu an nun dan milin an mamawh tak kawppui a pe tawn ta a ni.

Kan nun dan mila Pathianin kawppui min pek hi, a biblical em le? Kan ti maithei a, tawi tein han sawi ta ila:

1. A chhe lampang hi kan sawi duhlo thina, mahse han sawi ve ta ila, thuawilo Samsona chu, a nun dan milin amah bum hlumtu tur Delili'i a tawng a ni, Pathianin Samsona hi a sual bawka, amah bum turin Delili'i hi kan pe teh ang, a tilo a nga, mahse sual chu tha ai a thlan avangin, sual vek chuan a man a pe ta zawk a ni. 

2. A tha lampang ve thungah chuan, mi dik leh rinawm, miin sual an tih pawha tihmualpho duhlo Josepha chuan, khawvel hmeichhe thianghlim ber a sawi theih Mari chu, a enkawl turin a nun dan nena nun inmil em em chu, Pathianin a pe a ni.

3. Hmaingaihna avanga kum 14 in hlawh hrehlo leh inchhira thupha chawi duhtu Jocoba chu, a nun dan milin Pathianin amah hmangaih em em tu Rakili a pe a, chu mai bakah a fapa pahnih Josepha leh Benjamina te nun that zia en hian, Rakili hi, nu ngilnei leh ngaihdamna nghah mi a ni tih a hriat theih awm e.

Shane a te nupaah han lut leh ta ila, kan bible thu tarlanah khian, "LALPA chungah chuan lawm bawk rawh; Tichuan i thinlung duzawng chu a pe ang che," a ti a, Shane'a chu natna tamtak vei mahse, Lalpaah a lawm cheu a, chutiang bawkin Pokeyi pawh a seilenna zir loh avangin a rilruah hliam na tak tuar mahse Lalpaah ala lawm cheu a, tichuan Lalpaa lawm ve ve leh an awmdan tur Lalpa chunga nghattu te pahnih chu, Lalpan an thinlung duhzawng pein, engkim a  tihsak vek ta a ni.

(Tawngtai Dan Tur)

Lalpa, i ngilneih em avangin suala ka tlukin min hrem mai ngai loa, mahse nangmah ai suala nun chu a thlana ka thlan chuan sual zawkin a chhiatna chu min pe dawn a ni tih leh, i duh anga ka nun phawt chuan, nangin kawppui tur thatak min pe dawn a ni tih hre renga, i duh anga ka nun theih nan min pui ang che, Amen. Ti ang o.

Midangte An Nihna Anga Pawm Thiam

"Nimahsela kal ula, a zirtirte leh Petera hnenah chuan, ‘Galili ramah in hmaah a kal dawn a; in hnena a sawi ang ngei khan chutah chuan in hmu ang,’ tiin hrilh rawh u," a ti a."(Marka 16:7)

Midangte pawm thiam, lama kan luh hmain min pawm thiamtu te lampang han sawi phawt ila, tihian rawngbawltu hlawhtling thenkhat te chuan an sawi thin "i kiang a mihring awm chu, Pathianin i nuna i kalpui tur atana a ruat sak che a nih chuan, eng dinhmunah pawh dingla a kalsan duhlo ang che" an ti thin. Kal pui han tihah hian, kan rawngbawl pui tur emaw, kan thian tur emaw, kan kawppui tur emaw a ni thei vek awm e.

Vawikhat chu, ka thianpa keimah aia upa zawk, eizawnnaah pawh keimah aia sang zawk chutiang bawkin zirna lamah pawh zir chhuak hmasa zawk nen chuan kan inkawm a, a hnenah chuan zaidam ka ngai a ni, ka tawngte hi a vin mah mah a ni ka ti a, a ni chuan "i nihna a nih kha, i sim thei chuanglo ang" min tia. 

Ka han chhut chian chuan, ka nihna ang angin min lo pawm em em a ni tih chu ka hre thiam taa, keimah aia u daih chu ka vin deuh pawhin ka thiantha ber ala ni tho, ka ngaihsak loh pawhin ka thin ala ni tho, ka retheih deuh leh ka tawp deuh pawhin ka thian ala ni tho tho a, chutiang taka ka nihna ang anga min pawmtu ka thin hnenah chuan engtik lai pawhin bat ka nei nghala, a dam loh emaw, harsatna a thawhin emaw ka theih ang tawka buaipui chu min tum tir lo theilo a ni.

Ka thianpa hian, ka dinhmun a san lai chauhin emaw, mawi hnai taka ka kawm thin lai chauhin emaw, min hnaih duh ta ni ang sela, a chungah bat pakhat mah neiin ka inhre ngailo ang. Ka nihna ang anga, min pawm avang chuan ka thian nitura ka tana Pathian ruat a ni a, kan inthian thatnaah chuan amah chu a chak (powerful) zawk a nih phah bawk a ni.

Hei tiang taka midang pawm hi, rawngbawltu tan hian ava pawimawh em, rawngbawltu kan nih chuan kan bula mite hi mitha zawkah chhuakse kan duh theuh thina, mahse an chhiatna lai leh an chak lohna lai chu kan pawm hlei theilo thina, chu chuan an mahni min hlat tir thin a ni. Kan siamthat tura te leh, kan puih tura te kan hlatsan hian, engti kawng zawng mahin kan siamtha thei ngai dawnlo a, kan pui thei dawn bawk lo a ni.

Kan bula mihring awm te hi, ruih hloa buai an nih chuan "i kiangah ka awm reng dawna, i sim theih hun ka nghakhlel khawp mai" tiin kan hnaih sauh sauh a pawimawh a nga.
Suma an buai a nih pawhin hnem an ngaihna zawna hnem chung leh thlamuan chungin an insiam that theihna tura kan phak ang tawka pui chunga kan hnaih hian, anlo chak phah zawk a nga. 

Kawppui chungchanga an buai a nih pawhin a rilru natna zawng zawng, kan kianga a leih buak theihna turin, a tana kan inhawn chuan kan tichak thei zawk dawn a ni. Tin, kan hriat tura pawimawh chu, kan theih bakin tumah hi, puih kan ba loa, kan theih ang tawka thiltha ti turin leh a rawngbawl turin kan Pathian pawh hian min phut a ni.

Bible chang kan tarlan khi, a sawitu chu tlangval pakhat Isua thlan chhunga lo awm a ni a, khi thu khi Mari Magdalini, Mari Jakoba nu leh Salomi te hnena a sawi a ni a (Marka 16:5). Midang zawng chu zirtirte a tia, Isua phatsantu Petera chauh chu a hmingin a lambik (address) a ni. He thu atang hian, Petera zirtir thuawi leh inpe kha, phatsantu a nih pawhin Isuan a nih ang angin ala pawm a ni tih hi alang awm e. Chu phatsantu chu, a Lal leh a Chhandamtuin a pawm tlat avang chuan, a Lal tana a nun hlan ral chu a ba taa. A nih ang anga pawmtu pawmna avanga tihchaka a awm tawh avangin, dawizepna leh phatsanna te chuan, amahah thil an ti thei tawhlo a ni.

Keini pawh hian, kan phatsan tawh a ni thei e, kan tlanbosan tawh a ni thei e, chung zawng zawng leh kan sualna zawng zawng nen chuan kan Lalpa Isua Krista hian, min pawm a. Misual leh chaklo te hian, van lawmman kan chan tura min ruatsak chu kan hlauh bik a duhloa, kan hming ngeiin min ko bik a ni. "Nangnin mi thlanglo, keiman ka thlang zawk chu u" (Johana 15:16a) tiin, kan thlan loh lai pawhin a ni chuan min thlang a ni.

Chutiang taka hmangaihnaa khat Pathian hnung zuitute hian, midangte hi an nihna angin kan pawm ve tur a ni.

(Tawngtai Dan Tur)
Lalpa, vawi tamtak i mithmuh hma ngeiah, phatsan chein sual thin mah ila, i hmangaihna chuan minla thlan cheu avangin ka lawm e, kei pawhin midangte an chak lohna leh an buaina te nena pawma, pui tur ka ni tih hriain, midangte an nih ang anga pawma tichaktu ka nih theih nan min pui ang che, Amen. Ti ang o.

"Ka Fimkhur Nge, Ka Dawizep," Inchhut Ang U

"Tupawh a dil apiang chuan an hmu thin a; tupawh a zawng chuan an hmu thin a; tupawh a kik chu an hawnsak dawn a ni."(Matthaia 7:8)

Mi fimkhur chuan, thiltha tih tur a hmuh chuan, ngun takin a ngaihtuah phawt thin a:

1. Tih chi a nih leh nih lohte a chhut chianga.

2. Ti ta ila eng chhiatna nge awm palh thei tih leh tu nge a nghawng theih tih te, engtin nge a nghawng dan turte chu chik takin a ngaihtuah a.

3. Tilo ta ila, eng thil tha nge ka chan theih tih te, chu a thlir lawka.

4. A thil tih tum chu, harsatna tel loin tih theih dan tur, nasa takin a zawng thin a.

5. Mahni in, ti theiloa a inhriat chuan, amah puitu tur te chu a zawng chhuaka, an thawhho dan tur a rem khawm a.

6. A thawh puite nen, in kungkaihna fel tak an neih theih nan, a thawh puite zia chu a chik thin a.

7. A tawpah chuan, a thiltha tih tur hriat chu a tithei thin a, chu a thiltih chuan, chhiatna nghawngchhuah a nei a nih pawhin, siamthat dan tur alo ngaihtuah lawk diam thin.

Mi dawizep ve thung chuan, tih tur tha chu a hmuh ve leh, a chhiatna ken tel theihte chu a chhut a chhut a, thiltha tam zawk a hrin chhuah tura chu hmuh hmaih khawpin a inchhut hlau taa, engmah tiloin a awm leh phah ta thin a ni. Tichuan, engkim a chan fai veka, a hlauh em em thin engmah nilo mi ah a chhuak ta mai thin a ni.

Heng zia pahnih kan hmuh ah hiang a eng zawk zia nge kan put tih hi kan inchhut chian theuh a tha awm e.

A bik takin, Pathian rawng kan bawlnaah hian mi fimkhur ni ang u, kan hnaah te, leh chhungkua kan enkawlna ah te leh kawppui kan zawnna ah te pawh mi fimkhur kan nih hi a pawimawh viau a nga, a bik takin rawng kan bawlnaah hian mi fimkhur kan nih hi a pawimawh zual a ni.

Pathian hnena kan dila, a duh anga fimkhur taka kan zawna, kan kik bawk chuan, kan rawngbawlnaah kan thawh hlawk a nga, kan thil tumte pawh kan nei thei bawk dawn a ni.

(Tawngtai Dan Tur)
Lalpa, mi fimkhur leh thawhhlawk tak mi, ka nih theihna tur kawng hmasa ber chu, ka thiltih tum apiangte i hnena rawn thlen hmasak zel hi a ni tih hriain, i hnena dil chung leh, tha i tih anga zawnga, kik bawk turin min pui ang che, Amen. Ti ang o.

Sualin Eng Zawnah Nge A Beih Thin Che?

"Sual dovin thisen chhuak khawpin in la tang lo va: 
fuihna thu, fate zilh anga zilna che u kha, in lo theihnghilh ta e. “Ka fa, Lalpa thununna chu ngainep suh la, A zilhhauva i awmin inthlahdah hek suh."(Hebrai 12:4-5)

Sual hian kan chakna zawnah min bei ngailoa. A kuma kum inkhawm thin kan nih chuan inkhawm lo tura beihna kan tawh a rinawm loh a. Zu in ngai miahlo kan nih chuan zu in turin min bei lemlo ang.

Hetih rual hian mihring zawng zawng kan zavaia min beih  vekna a awm a, thinrimna te, inthlahdahna te, tisachakna (sex) te, mahni hmasialna te, hmingthat duhna te, hlauhna te pawhin a ni thei awm e.

Sual hian eng berah nge min beih tih hi kan hriat chian a pawimawh a ni. Inkhawm te, Bible chhiar te, tawngtai te hi a pawimawh ber a nih rualin, beih kan tawhna bik laiah chuan  hneh tura kan beih let loh chuan kan chak hleithei ngai dawnlo a ni.

Ram pakhat pawh hi, an khua chu hmun pawimawh pathumah an thena, eitur thar chhuahna hmun, tui hnar leh rorelna ah teh then a ni a. Ralin an tui hnar tih chhiat tumin bei ta sela, an tui hnar lamah indonna chu an va bei a ngai ang, chutiang niloa tui hnar lama beihna tawk siin, eitur lamah leh rorelna lama theih tawp lo chhuah chu an ram him nan a tangkai lo ang.

Heitiang ang chiah hian beihna kan tawhna hmunah hian, hnehna chang turin theihtawp i chhuah ang u. Hengtiang hian min beihna zawnah chuan i han bei let ang u hmiang:

1. Fuihna dawn kan ngai anih chuan min fuihtu tur zawng ang u. Mi tha chuan fuihna a dawng thiam thina, mi tha ber leh fing ber erawh chuan, fuihtu tur a zawnin a zawng zawk thin a, mitha ber kan nih ve theih nan min fuihtu tur chu a zawnin i zawng ve ang u.

2. Ze thalo chin dawklak sim ngai nei kan nih chuan, chung kan thil chin chu kan sim theih nan, tlan chhiatsan dan i zawng ang u, thildang nuam kan tihte  pawh kan thilchin dawklak thalo te chu tiloa kan pumpelh theihna tura min la peng turin tih mai te pawh a tha awm e.

3. Kan chak lohna zawna min pui thei tu tur, lehkhabu emaw, sermon emaw zawng ila, a takin nun pui bawk i tum ang u.

4. Sualin min beih thin hun tak hria ila, chu mi hunah tak chuan fimkhur ila, thil dang tih ngei ngei tur insiam te pawh hi a tha bawk awm e.

Kan Lalpa Isua Krista kan tana a inhlanna thuk zia hre rengin, atana nasa zawka kan thawh theih nan, kan chak lohna te hi hneh turin theih tawp i chhuah ang u.

(Tawngtai Dan Tur)
Lalpa, i tana mi tangkai zawk ka nih theihna turin, ka chak lohna te hi hneh turin theihtawp ka chhuah theih nan min pui la, ka theihna in a daih loh hunah nangin min pui dawn a ni tih hi ka hriat reng theihna turin min pui bawk ang che, Amen. Ti ang o.

HIV Vei Chunga Rawngbawltu Tha Rev. Shane Stanford

"Tih tak meuhvin, tih tak meuhvin ka hrilh a che u, nangni in mittui a tla ang a, in tap vak bawk ang a, khawvel erawh chu an lawm ang; nangni in lungngai ang a, nimahsela in lungngaih chu lawmah a chang ang." (Johana 16:20)

Ringtute hian harsatna hi kan tawk nasa bik emaw tihtur a ni a. Mahse Pathian min awmpuina avangin kan chhel a, khawvel kan thlir thiam a, kan harsatna te pawh hi khawvel mite aiin kan hmachhawn thiam zawk niin a lang. Tin, harsatna avanga hringnuna zirlai hlu tak kan zirchhuah hi a ropui thin a ni.

Harsatna kaltlanga khawvel dengchhuak khawpa lehkhabu tha ziaktu, pastor ni bawk, pasal tha tak leh naupang duhawm tak tak pathumte pa ni mek Rev. Shane Stanford-a chanchin hi han en teh ang:

Hemophilia natna vei sa in Shane-a hi a piang a, he natna hi a lar lo hle a vei pawh an tlem. An thisenah thi ti khar tu emaw ti khal tu a awm loh avangin an intih pilh palh chuan a thi a tawp hlei thei ta lo thin a ni. Kum 16 chauh a nihin HIV a vei tih an hmuchhuak leh a. A hemophilia damdawi leh a HIV treatment lak chu ala inhal ta zui a. Vanduaina a thuah hnih hle a ni.

Khatih hunlai khan hemophilia te, HIV te hi hmelhriat ala hlawh lo hle a, a vei an hriat chuan hmun thenkhatah chuan vengchhungah an thinhrik thin a, Shane'a pawh hian an school atanga an hnawhchhuah mai a hlauh avangin a natna hi a thup a ni.

Chutih hunlai chuan hmeichhe pakhat hi a ngaizawng ve thin a, chunu chu a natna thuruk chu a hrilh ta a, a hrilh rual ruala a kiansan mai pawh a ring a ni. Mahse chutiang chu a ni hauh lova, chu nu chuan Shane-a chu a hmangaih tlat a, a bulah a awm tlat a, tichuan college ah kal dunin, Sakhaw thu zirna hmunah (seminary) an kal dun leh a, an innei ta a ni.

Pastor atana an nemngheh dawn hian HIV a vei tih chu a inpuang ta a, an seminary chuan nemngheh harsa a ti hle mai. Mahse Pathianin thu neitute thinlungah thawkin an nemnghet ta a. Mahse pastor anga a thawhna hmasa ber tur kohhranin a natna avangin an hnawl leh a. Chuta tang chuan hlauhna leh mahni insitna nasa tak a nei a. Mahse Pathianin a hriat loh hlanin amah tantu leh duhsaktu tamtak a lo siam sak a. Hattiesburg, Mississippi-a United Methodist Church pakhatah hian associate pastor turin an lo pawm ta a, chumai ni lovin an senso tul zawng zawng chu amah duhsaktu nu pakhatin ala tumsak ta deuh deuh a ni. Chutah chuan pastor a nih chhunzawm ta zel a ni.

Nitin insulin-a a inchiu thin loh chuan a dam rei dawn lo a. Chuta karah Hepatitis-C a vei tel bawk tih chu hmuhchhuah a ni. 

Hemophilia, HIV/AIDS leh Hepatitis-C vei ve ta ila, Pathian lakah kan vui mai lo maw?

Rev. Shane Stanford chuan heng natna te hi kum16 a nih atang a hmelhriat hlei hlui tawh a, mahse tun thlengin Pathian hmangaihna leh a thatna nasat zia ala puangdarh ta zel a ni.

A natnain a kalsan a ni lova, a natna nena nundan chu a zir zawk a ni.

Chhungril leh pawn lama langthei natna thenkhat hi chu thlankhur thlenga kan luhpui tur a awm ang. Damna kan tih hi natna tel lova nun a ni lova, natna nena nundan thiamna zawk mai hi alawm a lo nih.

Harsatna hi kan tihsual avang te, Setana hnathawh avang emaw Pathian remruatna avang tein a lo thleng thei a. Engvang pawhin harsatna leh natna tawk ila, a pawimawh ber zawk chu kan lo hmachhawn dan hi a ni.

Hun a kal a, engvanga chung vanduaina chu tawk nge kan nih tih chu kan hre veleh mai. Mahse a tuarlai tak hian hmachhawn thiam a ngai em em lawi si a.

Shane-a nun hi a turu a ni. 

A natna Pathian nen a hmachhawn avanga, a tawrh thiam vang te mai hian, khawvel a deng chhuak a ni.

Keini pawh hian Lalpa vangin kan natna hi tuar thiam ila, tuar thiam mai ni lovin chaknaah chantir ila. Champion pui zawk ila ava tha dawn em.

(Tawngtai Dan Tur)
Lalpa, natna kan hriatthiam loh te, kan tihsual vang liau liau a rilru leh taksa natna kan tawh te, eng vang pawha natna kan tawh te hi, nangmah nen chuan natna nei lote aia chak zawk kan nih pui dan a awm a ni tih hi, hre reng turin min pui la, eng vang pawhin, eng ang pawhin na mah ila, nangmah ka chelh tlat theihna tur che in min pui ang che, Amen. Ti ang o. 

(Natna tamtak vei mahse, Lalpa a tih avangin Shane'a chauh nilo an chhungkaw pumpui hi, an hmeltha em em a, ngaihno beina riau an nei awm e, nimin lama thu chhuak (http://nungturin.blogspot.com/2018/10/lalpa-tih-man-hmela-lang.html) nen pawh a inhmeh hle awm e, a chunga an thlalak atang hian an hmelthat zia pawh a hriat mai awm e)

Lalpa Tih Man Hmela Lang

"Amah an en a, tin, an lo eng ta a: An hmelte chu engtikah mah a zak lo vang."(Sam 34:5)

Pathian tih man hi hmelah alang chhuaklo emaw kan ti maitheia, he bible thu hian hmelah pawh alo lan chhuah zia a ti chiang awm e.

Sam 34 hi Lalpa fakna leh beiseina thu a ni a, Abimeleka'n a hnawh chhuah hnua, Davida'n Lalpa ala fak cheuna thu a ni.

Davida chuan, Lalpa a faka, tichuan a mi te pawhin Pathian chu an en ve taa, chutia Pathian an han en chuan, hnawhchhuah ni mahse Lalpan an thinlungah beiseina a dah saka, an hmelte chu a eng sawt sawtin a hriat ni awm tak a ni.

Chu mai bakah, hnawhchhuah ni mahse, Lalpa an en tlat avangin, zak pawh an zak loa zam pawh an zam bawk heklo a ni.

Hetiang ang chiah hian, Lalpa en tlata, amah tihtu te chu, Lalpan an thinlungah beiseina nung a dah avangin, an hmelte chu a eng thin a, chu mai bakah inchhuang ni siloin, an zam ngailoa, chu chuan an hmel lan dan chu a ti mawi em em bawk thin a ni.

Hei hi kan hriat theuh a rinawm, Pathian tihtu te hi hmeltha ber nilo mahse, engtin emaw taka ngainat awmna leh an hmelhuat lohna kan nei tlangpui thin tih hi.

Hetianga, hmel mawina hi kan duh a nih chuan, kan ban phakah a awm theuha, Davida ang hian eng dinhmunah pawh awm ila, Lalpa fak tlat ila, amah en chungin i beisei tlat ang u. Tichuan, miin a ni chu a ngainat awm, engtin emaw tak thana riau a nei, tiin  min sawi ve ngei ang.

Lalpa tih vanga, hmeltha tih hlawh hi, ava hlu dawn em!

(Tawngtai Dan Tur)
Lalpa, nangmah faka beisei tlat thintu che chu, hmel mawi tak leh ngainat awm tak i pe thin a ni tih hriain, engah pawh nangmah beiseia en tlat thei tur che in min pui ang che, Amen. Ti ang o.