I Kawppui Atan Eng Ang Mi Nge I Zawn? I Zawn Ang Kha I Hmu Thei

"Dil rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u."(Matthaia 7:7)

Kawppui tura kan duh hi, kan rilruah duhthu kan sam theuh awm e. Nungturin blog chhiar thin hi chu, Pathian tih mi kan nih theuh a rinawma, kan sawi hmasak ber duh chu, Pathian rawngbawltu kan ni chung hian, Pathian rawngbawltu kawppuia zawng lemlo te hi kan hnimhnai leh mai thin hi a ni. Kristian nula, kristian tlangval kawppui atana zawng lo na na na, kristian tlangval leh nula ten kan hnaih tal hi a tul em ni le!

Rawngbawltu kan nih angin, tu pawh hi Pathian lama hruai tum tur chu kan ni teh meuh mai, mahse rawngbawlna rilru nena kan hnaih leh ngaihzawnna rilru nena kan hnaih hi chu a dang a, kan inven fimkhur fo hi a pawimawh a ni.

Kan rilrua kan ngaihtuah lawk ngai loh leh hengtiang ang mi hi nei ila, kan tih ngai lem loh te nena, kan in hnimhnaih chhan ber hi chu, Pathian kan rin ngam loh vang a ni ti ila, kan sawi sual awm lo e. 

Kristian nula leh tlangval chuan, kan nupui pasal tur te hi  Pathian hnenah kan dil vek a, chutianga Pathian hnena kan dil ang ngei chu keini pawh hian i zawng ngam ang u. Chu chu Pathian nena, kawppui zawnna kawng khat pawimawh tak a ni.

Kan Pathian chuan amah ringa beisei chunga ti thinte chu, pakhatte mah ala tih thlawn ngai loh avangin, i kawppui tur Pathian hnena i dil ang ngei kha, amaha innghat chunga i zawn chuan, anin a pe ang che.

(Tawngtai Dan Tur)

Lalpa, i hnena ka dilna min tih hlawhtlinsak hi, keimah bawk hian ka ringlo leh thina, chu vang chuan kawng dangah ka peng hial thin. Nangmaha beiseina nghat chunga, ka tana i duh ang mi ngei kawppuia ka neih theihna tura, zawng turin min pui ang che, Amen. Ti ang o.

Follow tih a hnuaia inziak ah khuan click ang che.

I THIL UM ANG ANG CHU I NIHNA TUR A NI

"Nimahsela, nang, Pathian mi, chung thilte chu tlansan la, felna te, Pathian ngaihsakna te, rinna te, hmangihna te, dawhtheihna te, thuhnuairawlhna te um zel rawh. Rinna intihsiakna tha chu bei la, chatuan nunna chu vuan  rawh; chu mi chang turin koh i ni a; hretu tam takte mithmuhah tanna tha chu i tan tawh kha." (1 Timothea 6:11-12)

Khawvel mi emaw Thlarau mi emaw nih hi ama kal kalin a lo kal tawp lova, khawvel thil kan um chuan khawvel miah kan chhuak a, Thlarau thil kan um chuan Thlarau miah kan chhuak thin a ni.

Thil tha um chuan a tha a hmu thin a, thil tha lo um chuan a tha lo.

Thil tha hmu tura kan kalna kawng hi a nuam lo fo a, thil tha lo hmu tura kan kalna kawng hi a nuam angin a lang duh viau bawk.

Hrehawm tawrh hmasak chuan nawmsakna a hnuah a thlen duh chawk a, nawmsak hmasa chuan chhiatna emaw rah tha lo a hmu duh chawk a ni.

Pathian atanga chhuak hmangaihna te, dawhtheihna te, taimakna te, inngaihtlawmna te, etc heng hi um ila rah tha a chhuah ngei ang. Mahse heng kan umna kawng hi a nuam ber a ni lo fo, tlawm a ngaih tawh chinah chuan mi chapo kan hmachhawn a lo ni duh, hmangaihna kan lanchhuah tir dawn chuan hmangaih phu lo mi sual kan hmachhawn a lo ni duh em em a. Chutiang zelin heng thil tha kan um chuan keimahni lamah ral tur a awm fo a ni. Mahse a rah chhuah erawh a duhawm thin a ni. Pathian lawmzawng a nihna leh Isua mizia kan put ve theihna hrim hrim pawh hi a hlu em em a ni.

Chutiang bawkin Thlarau lampang kan chawm len zel chuan khawvel thil um ai chuan nun duhawm leh awhawm chu kan nei ngei ngei zawk a ni.

Kross put hi a rit a ni, kentel a ngah si. Insum a ngai a, in vawn a ngai a, thlauh thlak tamtak neih a ngai a, thenrual a pawl theih tak tak loh kan ti a ni maithei mahse Kross pu peih lo te hian a aia rit khawvelin a delh bet leh tho tho a ni.

Chuvangin, i nuna i um ang ang kha i nihna tur a ni tih hre rengin, a tha leh Thlarau thil chu hahthlak angin lang mahse, lo um hram hram ang che.

(Tawngtdai Dan Tur)
Lalpa, i kawng hi nuam angin a lang ngai lo a, mahse i kawng zawhtu inchhir an awm ngai lo a ni tih hre rengin, nangmah neitute tana i buatsaih nun leh lawmman chu ka um zel theihna turin min pui ang che, Amen. Ti ang o.

Follow tih a hnuaia inziakah khuan click ang che.

LAWMTHU SAWI RAWH, VANAH RIMTUI A NI SI A

"Tin, LALPA chu Abrama hnênah a inlâr a, "He ram hi i thlahte hnênah ka la pe ang," a ti a: tichuan chutah chuan a hnêna inlâr LALPA tân chuan maichâm a siam a." (Genesis 12:7)

Abrama hnena Pathian thupek lo thleng chu: "I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh"(Gen12:1) a ni a. Pathianin a ram a la entir tur pawh chu a sawi lem lova, sawti lam saw aw i kalna ram tur chu tiin Pathian khan kawk va sela chuan Abrama tan hian Pathian thupek hi zawm a nuam anga, a tunlai tawngkam takin a confi theih deuh ang.

Mahse chutiang a ni lova, Pathian RINGIN Abrama chu a chhungte leh laichinte hnen ata a chhuak ta tawp mai a ni.

Kanaan a pan a, chuta tang chuan Sekem te, More sasua thlengin a kal a, chutah chuan Pathian a rawn inlar a, "He ram hi i thlahte hnenah ka la pe ang che" a ti a, chutah vek chuan Pathian tan MAICHÂM a siam a ni.

A kal lehzelnaah pawh Pathian tan maichâm chu Ai khuaah a siam leh a, a thlen chin zelah Pathian tan maichâm a siam zel a, Pathian tan rimtui a chhuah zel a ni. 

Keini hian kan thlen chin apiangah Pathian tan rimtui kan chhuah em? Kan hnathawhna hmunah pawh Pathian duhdana kan khawsak hian a tan rimtui kan chhuah tihna a ni. Kan phone, kan computer, kan tablet etc hmangin Pathian tan rimtui kan chhuah em? Kan ngaihzawng te nena kan inhmuhin Pathian tana rimchhia nge rimtui kan chhuah le? A aia dang hretin aw.... Harsatna kan tawhna hmunah, beidawnna hmunah, kan duh anga thil a thlen loh chang pawhin rimtui kan chhuah em? Tih hi inzawh ava pawimawh tak em.

Abrama chu Pathianin ram a hmuhtir tur a hrilh lawk si lo pan turin a tia, a chhuak mawl tawp a mahse maicham ala buatsaih asin. Pathian tan rimtui ala chhuah a ni.

Hawh u, kan ke pen tinah Pathian tan rimtui i chhuah ang u. Pathian ring ila, beisei tlat ila, a lawm zawnga awm tum tlat ila. Chutah chuan Abrama pawh Abrahama tia hming ropui zawk Pathianin a phuah sak ang chiah khan kan hma hunah Pathian malsawmna luangliam zawih zawih chuan min hmuak a ni.

(Tawngtai Dan Tur)
Lalpa, kawng thui tak nangin min hruai tawha, ka awmna tur hmun leh ka nih tur tak chu kala ni rih lo maithei, mahse tuna ka awmna leh ka thlenchhin min thlen tir avang hian ka lawma, i hnenah lawmthu ka sawi tam tawk lohna ah min ngaidam la, i tana nun mawi tak ka neih theih nan min pui ang che, Amen. Ti ang o.

Follow tih a hnuaia in ziakah khuan click ang che.

I Tih Tur Tak Leh I Kalna Tur Taka, I Kala I Hlawhtlinna Turin A Thu Zawm Rawh

" Tichuan a zirtirte zinga mi pahnih a tir a, an hnenah, "Khawpuiah va lut ula, chutah chuan mipa bela tui puin a tawk ang che u a; amah chu zui ang che u. Tin, a luhna apiangah chu in neitupa hnenah chuan, ‘Zirtirtu chuan, Ka zirtirteho nen Kalhlen Kut chaw kan eina tur, ka mikhual pindan chu khawiah nge? A ti e,’ ti ang che u."(Marka 14:13-14)

Isuan kalhlenkut chaw a zirtirte nen an ei dawn khan, Jerusalem ah a zirtir pahnihte chu a tir a, tui chawiin a rawn tawk ang che u nga, tichuan zui ula amah chhawrtu in neitupa hnenah zirtirtu chuan ka zirtirteho nen kalhlen kut chaw kan eina tur, ka mikhual pindan chu khawiah nge? Ti ang che u, a tia, a zirtir pahnihte chuan Isuan a hrilh ang chuan an ti a, pindan chungnungah, zanriah hnuhnung kha an kil ta a ni.

He mi thua, pawimawh lai tak chu zirtir ten thu an awi mai lai hi a ni. Isua hi "a fing bera, thil reng reng a intan hma pawhin a tawpna tur a hre lawk tawh a ni" tih hi ringtute chuan thinlung takin kan awi vek ang, a zirtirte pawh khan, a awi a "a thu an zawm bawk a ni." Keini leh a zirtirte kha kan danglam thui lutuk loa, Isua kan ringa, anin a zirtirte a hmangaih ang chiah khan min hmangaih bawka, a zirtirte chu a kebulah a zirtir thina, keini erawh a thu "bible" atang min zirtir bakah Thlarauin min hruai a. 

Mahse, a zirtirte leh keini danglamna lian tak chu " a thuawi a ni." A zirtirte kha chuan a thu kha an awi em em a, in leh lo an kalsan chu thuhran nisela, a kip a kawi zawng zawngah khan, a thu an awi a, an awi famkim theih loh pawhin, an theih ang angin a thuawi an la tum hram hram thina, chutia a thuawi an tum em em mahse an chak loh avanga an hlawhchham chang chuan, Isuan a ngaidam thina, a hriatthiam theihna in a daih a ni.

Harsatna kan tawk em? Kan rilru a na ngawih ngawih em? Kha i harsatna leh i rilru natna a dam theih dan tur kha, Isuan a hria asin! Mahse, i damna tur a mite hmangin emaw, a thu hmangin emaw a hrilh hunah che, i zawm duh a ngem?

Sual sim hleihtheihloh neiin i in hria a ni maithei, Isuan i sual tanna ata chhuah dan tur che kha a hre hneh em em a, kan hmelmapa pawh hi a rawngbawl tura a siam a nia, chu vang chuan Setana ngaihtuah tur leh a tih tur pawh hi a hria a ni. Mahse, kha sual i tanna ata i chhuah theihna tura, i tih tur a hrilh hunah che, i ti duh a ngem le.

Kan Lalpa Isua Krista hmangaihna hi a ropui em em a, a zirtirte a hriatthiam ang chiah khan "a thu zawm kan tum ngawih ngawiha, mahse kan chak loh avanga kan tihsual palh leh hian, min hrethiam thina, min ngaidam duh reng a." 

Tisual palh hi hlawhchham an ti ngailo, zirlaite hi an testnaa an fail avangin an zirlai an hlawhchham an ti ngailo, exam pui an fail chauhin an fail kan ti thin. Chutiang bawkin, mi an inkhelh hian, an petsual vangin emaw, an pass sual vangin emaw an chaklo kan ti ngailo, hun a tawp hma chu a chak leh chaklo tur a hriat ngai loh a, inkhelh hun chhung chanve aia tam zawka goal thun thlem zawk pawh hian, an lehthal leh thei thin a ni. Mahse, chutiang a nih laia, vawikhat emaw vawikhat ai tam phaw, inkhel mi (player) chuan a pet sual avangin, kan chak dawn chuanglo tiin, a tumpui chu bei tha duhlo ta sela, an chak loh phah ngei ngei ang. 

Hetiang ang chiah hian, rorelna hmaa kan la dinhma chu, kan hun ala tawp loa, Pathian awmpuina avangin min beitu sualte hi kan la hneh thei a ni. Mahse, sual hneh tura, Pathian thu awi tum aihlo kan nih chuan, hnehna hi kan ta a ni ngai lo ang. A khawngaihna avangin sual hnehtu chuan sual a hneh thin kan ti thina, mahse chu a khawngaihna dawng tur pawhin amah kan hnaih si loh chuan a khawngaihna pawh hi a dawn hleih theih loh a ni. Fapa tlanbo khan, a pa kebul a thlen chiah khan a pa khawngaihna kha a dawng a ni, engtik lai pawhin a pa khan a fapa kha, hmangaihin khawngaih bawk mahsela, a pa a hnaih hma kha chuan a pa hmangaihna leh khawngaihna kha a ban phakah a awm lo a ni.

Hawh u, kan Pathian hmangaihna leh khawngaihna kan chan theih nan, amah hnaih ila. Kan tih tur tak leh kan kalna tur taka kan kala kan hlawhtlin theih nan, a thu i zawm ang u.

(Tawngtai Dan Tur)
Lalpa, i hmangaihna leh i khawngaihna ka chan theih nan ka hnaih tlat theihna tur chein min pui la, i puihna leh i hruaina avanga ka hlawhtlin theih nan, i thu zawm turin min pui ang che, Amen. Ti ang o.

Follow a hnuaia in ziakah khuan, click rawh le.

Pathianin A Hriattir Duh Che, I Hriat Theih Nan

"Tin, Davida chuan Abigaili hnenah chuan, "Vawiina mi lo hmuak tûra tirtu che LALPA, Israelte Pathian chu fakin awm rawh se: tin, i remhriatna chu malsawmin awm sela, tin, nang thisen chhuah thiam loh channa laka mi humtu leh keima kuta phuba la lova mi siamtu chu malsawmin awm bawk ang che." (I Samuela 25:32-33) 

Pathian hian eng emaw hi min hriattir thin a, a chang chuan keimahniah kan tih ngei tur ni riaua hriatna leh ngaipawimawhna min pe thina. A chhang chuan kan chhungte emaw kan thian ten emaw min hrilh min hrilh thina. A chang chuan bible kan chhiarin emaw, thusawi kan ngaihthlakin emaw kan hrechhuak zawk zawk thina, chutiang lo pawhin kan tih tur chu min hriattir thin bawk awm e.

Hetianga ti tura min hriattir taka hi kan chika, kan chhui chian a pawimawha, a chhanchu kan dinchhuahna tur emaw, nasa zawka kan rahchhuahna tur emaw a nih theih bakah, Pathian thu kan awi theihna tur a ni thina.

Davida khan Goliatha kha Pathian hminga a beih tur a nih leh Pathianin savawm leh sakeite a hneh tir thin ang bawkin a hneh tir dawn a ni tih kha engtin emaw tak a hriat a rinawma, a unau ten beilo tura an tih pawh khan a beia, a hneh ta a ni.

Nabala'n, Davida thildil a pek duh loh avangin leh nawmnah takin a tlangvalte alo chhan avanga, Nabala chhungkua zawng zawng Davida'n thah a tum pawh khan, Nabala nupui Abigaili'n, Davida'n Nabala a thah loh nan thilpek leh eitur a ken a, chu mai bakah zahtaka chibai buk chunga, thupha a chawi khan, Davida'n Pathianin Nabala chhungkua thatlo turin a tihnaah a ngaia, tichuan a that ta loa, Pathian zawkin a phuba a laksak a. Tichuan, nupui tha em em mai, Abigaili chu a neih phah ta a ni.

Davida hian, zawlnei atangin thu a dawng hranpa loa, Pathian aw pawh a hre chuang loa, mahse Davida chuan a thinlungin Pathian lam a hawi tlat avangin, englai pawhin Pathianin enge ti tura a duh chu a ngaihven renga, tichuan ti tura a duh chu hrethiam thei thin a, Pathianin titura a duh a hriat chu a ti bawk thin a ni.

Pathianin enge titura min tih hi kan hriat zel theih nan, engtik lai pawhin kan thinlungin Pathian lam  i hawi tlat zel ang u.

(Tawngtai Dan Tur)
Lalpa, i duh zawng ka tih hian, keimahin a hlawkna ka tel nasa ber a ni tih hriain, i duh ang leh ti tura min tihte chu ka hriat theih nan, ka thinglunga i lam ka hawi tlat theih nan min pui ang che, Amen. Ti ang o. 

Misual Ruai Thehsak Duhtu Kan Pathian

"Sebawng no thau tak kha han la ula, talh rawh u, hlim takin i ei ang u; he ka fapa hi a thi a, a lo nung leh ta a nih hi; a bo va, kan hmu leh ta a nih hi,’ a ti a. Tichuan hlim takin an awm tan ta a."(Luka 15:23-24)

Fapa tlanbo kha, a pa hnena a rawn kir khan, a pa khan a tihsual zawng zawng kha a hrelo pawh a nilo, a fapa'in a phatsana, a sum khawlo tak leh dawngdah takin a khawhrala, a hming a tichhia tih pawh a hai hauh lo, mahse a fapa a mangaih em avangin, a fapa sualna zawng zawng chuan, ngilnei taka kuangkuah lo turin a dang zo loa. A fapa a hmuh ve leh, a kuangkuah mai pawh a nilo, a fapa'in a hnen a thlen hma hmain, amah zawk chu a fapa lam panin a tlana, a fawp ngawih ngawih a ni.

Hetiang ang chiah hian, kan sualna ata leh Pathian kan vahbo sanna ata, Pathian hnena inchhira kan haw hian, Pathian chu kan lam panin a rawn tlana, min kuangkuaha, min fawp ngawih ngawiha, min hmangaih em avangin, kan sualna zawng zawngte chuan kan chunga that a chhuah lohna turin a dang zolo a ni.

Fapa tlanbo pianpui a u zawk chuan, a nau sualna chu a pa bulah a sawi zat zat mai a, mahse a pa chuan a fapa tlanbo lo haw leh chu a tan ta tlata. Hetiang ang chiah hian, kan pianpui keimahnia sual hian, min hek thina, that chak lo khawp hialin min hek mualpho a tum thin a, chutiang pawh chu ni mahsela, kan Pathian chuan "a rawn haw miaua, chu vang chuan thawmhnaw tha ber kha ha sela, ruai ka tehsak duh a ni" tiin, a hnena kan kir phawt chuan  chutiangin kan tan ro a rel thin a ni.

Kan vahbosanna hmun atang hian kan Pathian hnenah i haw hreh ngailo ang u, tichuan eng ang pawhin sual tawh mah ila, anin "a rawn haw miaua, ruai ka theh duh a ni" tiin kan chungchang min relsak duh a ni. 

(Tawngtai Dan Tur)
Lalpa, eng ang pawhin sual mah ila, i hnena haw nachang ka hriat theih nan, i rawngbawltute min tifing turin ka hnenah min tirhsak turin ka ngen a che, Amen. Ti ang o.

Follow tih a hnuaia inziakah khuan click ang che.

Pathian I Thinlung Pe La, I Bosan Ngai Lo Ang

" Ka fapa, i thinlung min pe la, Ka awm danahte hian i mit tlung rawh se."(Thufingte 23:26)


"Ani chu min chhinchhiahtu leh kan thinlunga zakhamna Thlarau min petu a ni bawk a."(II Korinth 1:22)

Pathian hian, thlarau thilpek nei rawh emaw, chanvo nei rawh emaw, thusawi thiam rawh emaw, min ti hran loa, "i thinlung min pe rawh" a ti a. Heng thlarau thilpekte, rawngbawlnaa chanvo neihte, thusawi thiamte hi Pathian avanga kan neih a pawimawh bang loa, mahse heng ai hian ama hnena kan thinlung pek hi kan Pathian hian a ngaipawimawh zawk a ni.

Pathianin a hnena kan thinglung pe tur hian, min ti satliah loa, thawn thuah a hnena thinlung pek pawimawh zia hi, a phum ru loa. Fiah takin langsar takin ring lenglawngin "Direct Command'in" a hnena kan thinlung pe turin min ti a ni.  

Thupek reng reng chuan, tiam a nei veka, he a thupek a hnena thinglung pe tura min tihna phei hi chuan, tiam tha em em, chatuang thlenga zual zel tur a neiin a hriata. A hnena thinglung petu chu, a nun kawngah buaiin peng bo hial mahsela, a thinlung neitu chu Pathian a nih tlat avangin, Pathian hnenah a kir leh zel ang tih hi a chiang ngawih ngawih a ni.

Pathian hnena kan thinlung kan pe a nih chuan, kan bosan tawh lohna turin, keimahniah thlarau min dahsak thin a.

Vanrama awm zawng zawng leh vanrama la awm tur zawng zawngte chu, Pathian hnena thinlung pe phallo tumah an awm lo ngei ang. Kan bo ngai lohna turin leh vanrama kan luh ve theihna turin, kan thinlung hi he lei mihringah emaw, khawvel thilah emaw, pe lo turin i fimkhur ila. Kan thinlung hi Pathian hnenah chauh i pe zawk ang u.

(Tawngtai Dan Tur)
Lalpa, vanrama ro tha ber min buatsaih sak chu, ka chhanve theihna turin, i hnenah ka thinglung zawng zawng ka pek theihna tur chein, min pui ang che, Amen. Ti ang o.

Follow tih a hnuaia inziakah khuan click ang che.