Enge I Dam Chhan? Khawvelah Hian Eng Ti Turin Nge I Awm? (Part 2)

"Hlau suh u, kei in hnenah ka awm si a; mangang suh u, kei in Pathian ka ni si a: ka tichak ang che u a; a ni, ka tanpui ang che u; a ni, ka felna kut ding lamin ka chelh reng ang che u."(Isaia 41:10)

Nimin lama chhuakah khan, ringtute chu kan dam chhanah kan buai a ngai lo a Krista hnathawh hi kan dam chhan chu a ni tihte leh, kan awmna chhungkuate, kan thian kawmte, leh hna kan thawhnate hi kan dam chhan a ni loa, kan dam chhan  Pathian hnathawh chu, a taka kan tihna hmun tur zawk a ni tihte leh, engpawh Pathian vanga a duh zawnga kan tih chu rawngbawlna a ni tihte leh ringlo mite hian an dam chhan an hre mumal hleithei lo tihte, kan sawi tawha, ila chhiar lo a nih chuan ilo chhiar dawn a nia.  http://nungturin.blogspot.com/2019/03/enge-i-dam-chhan-khawvelah-hian-eng-ti.html

Pathianin a siam chhan che chu, a hnathawk turin a nia, chu a siam chan che chu i tih tlat chuan a humhim zel ang che.

Missionary i ni lo, Pastor i ni lo, Evangelist pawh i ni lo, Upa pawh i ni lo, mahse i hnathawhna hmunah te, thian i kawmnaah te, i lehkha zirna hmunahte, khawtlang tana i chet chhuahna hmunahte, Pathian hmel ti langtu i nih chuan, Pathian rawngbawl i nia, Pathian rawng i bawl chuan a siam chhan che chu i ti, tihna a nia. Chu vang chuan, Pathianin a hum him tlat zel ang che. 

Thiam ber emaw, tha ber emaw, i ni lo a nih pawhin, i awmna hmunah Pathian tana i nung tlat a nih chuan Pathianin a awmpui zel che a nga, a humhim zel ang che.

Abrahama te, Isaaka te, Jacoba te, Josepha te, Davida te, Josuah te leh midang dangte pawh kha, zawlnei an ni loa, puithiam pawh an ni loa, Levia chi pawh an ni lo. Mahse, an nun zawng zawng leh an awmna apiangah khan Pathian duh angin nun an tum thina, Pathian duh angin an tia, Pathian nasa takin an be bawka, Pathian aw hre turin an ngaithla bawka, Pathian siam chhan tihlawhtling ber ber tute an nia, an dam chhan leh khawvela an pian chhan ti hlawhtling ber tute an ni bawk a ni.

Tin, Pathianin a siam chhan an tih hlawhtlin hma chu an nunna a zuah saka, an chhungkuate pawh a ven sak bawk thin a. Josuah leh Davida phei hi chu, vawi tamtak indonaah an awm a, a chang phei chuan a chak lo zawk lamah an tang ve bawk thin, mahse Pathianin an nun a humhim sak zel a ni. Abrahama, Isaaka, Jacoba te pawh hi indonaah tel tam lo mahsela, nun indona erawh nasa takin an hmachhawn thunga, an hun lai khan tam a tlaa, tui in tur avan na hmunahte pawh an awm thin bawka, awmna tur mumal nei loin hnamdang leh midang an belh a ngai hial bawk thin. Chung zawng zawngah chuan Pathianin a humhim tlat thina, Pathianin a siam chhanchu tih hlawhtlin an tuma, Pathian pawhin a siam chhan an tihhlawhtlin theih nan a pui bawka. Chu chu an tih hlawhtlin hma chu, an tluk sawp emaw, an chhiat der emaw, an thih emaw a phal lo a ni.

Pathian humhimnate, a hruainate leh a enkawlnate hi kan ban phakah engtik lai pawhin a awm renga, chu chu nei turin kan awmna apiangah leh kan thiltih engkimah min siam chhan, a hna thawh leh atana nun chu, kan ngaih pawimawha, a taka kan tih a ngai a ni.

Pathian tana nun hi khawvela kan awm chhan chu a ni, i ngaihthah lo ang u.

(Tawngtai Dan Tur)
Lalpa, min khawngaihna avangin, min siam chhan chu keimahah tihhlawhtlin i duha, chu vang chuan kan chhungkaw chak lo tak ila din tir tlata, eizawnna min pe zela, zirna kawng min la zawh tir zel bawka, ka nun tluk chhiat phal lovin ila hruai zel a ni tih hi hre reng chungin, khawi hmunah pawh englai pawhin i duh anga ka nun zel theihna turin min pui ang che, Amen. Ti ang aw. 

Follow tih a hnuaia inziakah khuan i click dawn nia.

Enge I Dam Chhan? Khawvelah Hian Eng Ti Turin Nge I Awm?

"Nimahsela, thim ata chhuaka, a eng mak taka lut tura kotu che u thatna chu in entir theih nan nangni zawng chi thlan, lal puithiamho, hnam thianghlim, Pathian mite ngei in ni si a."(I Petera 2:9)

Ringtute chuan "Pathianin khawvela min dah chhanchu, ama rawngbawl tur leh chawimawi tur leh midangte hnena a thu puangchhuak turin min dah a ni" kan ti theuh ang.

Hei hi a dik a ni.

A nih leh Pathian rawng chu i bawl em? Bawl ve e, mahse duh angin Pathian rawng hi ka bawl tam thei loa, hna thawhte a ngaia emaw, lehkha zirte a ngaia emaw, ka fate enkawl a ngai emaw, in a ka awm thin a ngai emaw kan ti em? 

Nih leh eng hi nge Pathian rawngbawlna kan tih tak chu?

Kohhran hna thawhte, thalai pawla telte, ministry a telte, nei lo thil pekte, mi tawngtai sakte, inkhawmte etc, kan ti ang tiraw. Dik pawh a dik renga, chu bakah rawngbawltu kan tih hian kan han mitthla chu, Pastor te, Missionary te, kohhran leh ministry a hruaitu leh chanvo neite an ni ang, hei pawh hi a dik lohna a awm lo, mahse chutiang choa kan thlir mai anih chuan, khawvelah hian rawngbawltu kan tlem ve khawp ang.

Hetianga kan thlir a, Pathian rawngbawl hi Pathian min siam chhan kan tih si chuan, kan va bawl tlem awm ve! Chu mai bakah ringtu dang dangte pawh hian an va bawl tlem awm ve! 

A nih leh eng hi nge Pathian rawngbawlna chu?

Pathian rawngbawlna chu, "Pathian vanga i tih apiang kha Pathian rawngbawlna chu a ni" hei hi zaah zain a dik tih hi kan pawm a pawimawh awm e. Pathian thu a nih avangin,  thinrim i insum tawh em? Pathian duh zawng a nih avangin zing i tho hma tawh em? Pathian duh zawng a nih avangin thil dik i ti lui hram hram tawh em? Pathian duh zawng a nih vangin i chhungkua i enkawl tawh em? etc. Pathian vangin hengte leh thil dangte hi ilo ti tawh reng a nih chuan Pathian rawng ilo bawl reng tawh a ni tihna a nih bakah, Pathian rawngbawltu chu ilo ni reng tihna a ni.

Purpose (dam chhan) kan sawi hian mi tamtak chuan, kohhran zirtirna kalh thil kan sawiah an ngai thin. Apostle te khan Thlarau Thianghlim chenchilhna nen, tuna kohhranin kan la tih chhunzawm reng leh kan tih tam ber kohhranho inpawlkhawmte, thil pekte hi a pawimawh zia an sawi thina. Chungte chu an sawi uar ang bawkin ringtu nun dan turte an zirtir bawk thin, chungte chu hnathawh dan turte, hotu ten an hnuaia mi chunga an awm dan turte, mi hnuaia thawk hotu neite pawhin an hotute tana an nun (serve) dan tur te, nupui leh pasal chungchangte, naupangin nu leh pa an zah dan turte, hmeithaite bula awm dan turte etc, nasa takin an zirtir thin a ni.

Mi thenkhat chuan an dam chhanchu, Officer nihte, Pastor nihte, Missionary nihte, Minister nihte, Entertainer nihte, Sumdawna lian neihte, Company hotu nihte leh an nun in a duh neihte emaw hi an ti thin. Chutiang chu ni ta sela, officer emaw, Pastor emaw, Missionary emaw, sumdawng emaw ni ta la i pension (retire) hun leh i thawh theih loh hun a thleng dawn a ni, chutia i pension hunah chuan damchhan i nei tawh dawn lo tihna a ni mai dawn a ni. 

Ringtu kan nih chuan, kan dam chhan zawng hian kan buai thehchiam a ngai lo, Pathianin min pe saa, chu chu, "A tana nun" a ni. Khawiah pawh, eng thilah pawh, kum engzatah pawh Pathian tana kan nung zel a nih chuan, rah tha kan chhuah zel ang. A fiah zual nan, putar che hleithei tawh lo te pawh hi, Pathian tana an nung a nih chuan rah tha ber an chhuah thin bakah, thalai zawkte cho thotu tha tak an ni thin.

Ringlo mite erawh hi chuan, hei hi ka dam chhan alawm han tih chat tur hi an hre mai lo thin. Ringlo mi zinga dam chhan (purose) thlang fuh em em Mahatma Gandhi te hial pawh hian, kan Lalpa Isua Krista atang an dam chhanchu an chhar chhuaka, mahse vanduai thlak takin Krista chu a innghahna bulpuiah a hman loh avangin, British in India a awpna atang zalenna sual chhuak mahsela, zalenna sual chhuah a tum dangte a sual chhuak hman loa, sakhua leh sakua inkar khi atanga zalennate, a tawi zawngin sawi ta ila hnam sang leh hnam hniam inkar zau lutuk laka zalenna te etc. A tum bulpui ber India mihring chi hrang hrang intluktlang taka an awmna India chu a sual chhuak hman ta lo a. Kan Lalpa Isua Krista angin, a awm loh hnua a hnathawh ti puitlingtu tur, kohhran ho leh zuitu nget a nei ve ta si lo bawk nen, a damchhan tak (life purpose) chu a hlen chhuak hleithei ta lo a ni, ti ila kan sawi sual lo ang.

Mahatma Gandhi te ang ni ve lo, ringlo mite hi chu, an dam chhan hi an hmu chhuak mai mai loa, an dam chhan chu an chhungkaw chawi len emaw an ti thina, chutianga tih an tum lai chuan fa awm tha duh lo te an nei a, chu bakah an chhungkuate an in tithiam lo bawk thina, an damchhan tura pawh hi an thlang fuh hlei thei lo a ni.

Nang leh kei hi chu, Krista hnungzuitu kan nih avangin a hna thawh tih puitlin hi kan dam chhan a nia. Chu vang chuan, kan dam chhung pawhin thawhpui tur tha tam tak kan neia, kan thih hnuah pawh thawk chhunzawmtu tur tam tak kan nei bawk a ni.

I awmna hmun apiang leh i hna leh i nihna te kha chu i dam chhan ni loin, Krista tana i nunna tur hmun a ni. I awmna hmun apiang, chhungkuaah emaw, thian i kawmnaah emaw, khawtlang tan i thawhnaah emaw, eng ang hna pawh thawk la i hna thawhna hmunah Pathian tana engkim i tih chuan, Pathianin a siam chhan che "i dam chhanchu" i tipuitling zel tihna a ni dawn a ni.

(Tawngtai Dan Tur)
Lalpa, ka dam chhanchu engkima i rawngbawl hi a ni tih hi ka hriat tlata, engkimah leh khawiah pawh, i duh anga engkim ka tiha, i duh ang a ka nun bawk theihna turin min pui ang che, Amen. Ti ang aw.

Follow tih a hnuia inziakah khuan i click dawn nia.

Rah Chhuah Thintute

"Mi suaksualte chuan mi tha lote len an duh a, Mi felte bul erawh chuan rah an chhuah thin."(Thufingte 12:12)

Misual ka ni em? Misual i ni em? He zawhna hi han inzawt chhin teh.

Mizo ringtu tlangpui chuan he zawhna hi, ti hian kan chhan ka ring-"Misual ka nih avangin Isua chhandam ngai alawm ka nih, mi hring zawng zawng hi chutiang vek chu kan ni alawm, sual in ti bik tur pawh kan awm lo, in teh in teh ila chuan kan in teh tling lo vek ang" tiin kan chhan a rinawm.

Mahse, Thufing chuan "Mi suaksualte chuan mi tha lote len an duh a" a tia. Mi tha lo tih kan hriat reng, mahse an zar kan zo theih turte len duh mi, engzat nge kan awm ang le. Politic's lam kan sawi lo, nitin nun phungah pawh hian mi tha lo zar kan zawh theihte an len hi kan lo duh mai thinin a hriat a.

Kan thawhna company emaw department emaw mimal pawh nise, an dik lo a nih chuan, ban theihna hun tha kan hmuh ve leh bang hmak ta ila a tha zawk ang. A tirah harsa mahse, kum 20 hnu velah chuan, kan din hmun a tha zawk a ngem tih hi kan chhut thin a pawimawh awm e.

Thufing chuan, "Mi felte bul erawh chuan rah an chhuah thin" a tia. He thu hi a un deuh hleka, a sawi tum chu "mi felte chuan rah an chhuah thin" a tihna a ni. Mi felte bul chu mi felte thlahtu an ni a, mi felte bul rah chu mi felte an nia. Mi felte bawkin mi felte an thlah thin a ni. Chung mi felte thlahte chuan thil tha an ti thina, rah tha an chhuah bawk thina, Pathian pawhin mal a sawm bawk thin a ni.

Kan chhungkua leh kei mahni hun kal tawh chu eng pawh nisela, mi felte zinga kan tel theihna turin hun ala awm a. Misuaksual leh mi fel kan ni ve ve thei e, a eng a zawk nge nih kan thlan dawn le?

(Tawngtai Dan Tur)
Lalpa, kei leh kan chhungkaw kal zelte hian, i tana rah tha kan chhuah ve thei nan, i duh ang a kan nun tlat theihna turin mi pui ang che, Amen. Ti ang aw.

Follow tih a hnuaia inziakah khuan i click dawn nia.

Kawppui Atan Eng Ang Mi Nge I Zawn? I Zawnah Chuan I Chiang Em?

"I chhiahhlawhte fate chu an awm reng ang a, An thlahte chu i hmaah tihnghehin an awm ang."(Sam 102:28) 

California State University-ah chuan, Mass Communication ka zir vea, kan college-ah chuan function a awm dawn a, kal ka tuma ka insiam vek tawh a, function tan hmain thil ei lawk teh ang ka tia. Ka thil ei chu ka hmuan tun laiin, kan college a kal ve tho Trina'i chu a rawn lut vea, Trina'i hi a hmeltha khawp maia, functionah keimah chauhin ka kal dawn a, amah chauin a ni ve tho bawka, kal puiah kan sawm teh ang ka tia. Bakah tumahin hian eng teh hehuah min ngai loh, avangin date kalpui tur pawh ka nei lo reng a. Trina'n min kalpui duh loh leh kalpui tur nei lo kha kala ni maia, min kalpui ve duh tak leh kalpui tur ka nei ve tihna a ni mai a, ka tia. Tichuan kava sawm taa, mak tak maiin kaldun chu pawi alo ti loa, function awmna kan va thlen chuan ka thian ten Trina'i nen kan kal tih an han hmuh chuan mak an ti hle maia, ka thian pa Dericka phei chuan a rukin min rawn biaa, "a hre lo che a mi? Engtin nge i sawm chhuaha" a rawn ti nghe nghe a.

Function a tawp dawnah chuan, lam hun a nia, a kalpui ka nih miau avangin kan lam dun taa. Chutia kan lam lai chuan, ka huaisenna ka sawm khawm nge, ka atna ka tizual zel pawh ka hre lo, a phone number chu ka dila. A ni pawh chuan, min hrilh ve maia, mahse a phone number tak tak min hrilh pawh ka ring lem loa, a chhanchu hmeichhia dang hnenah an phone number kalo dil tawh thina, a thenin min pe duh loa, min pe duhte pawhin an phone number tak tak min pe ngai loa. Tichuan, a tukah chuan ka phone chhin taa, a phone number tak tak chu min lo hrilh hi alo nia. Ka lawm ve viau a niang, ka biak lai lai chuan ka te teng tunga, a ni chuan ti nge ti nge? A tia. Kei chuan thil nihna tak tak chu ka hrilh a, a nuih a tiza hle mai a. Tichuan, inhmuh puiah ka sawma, a hman hunte ka zawta, alo rem ti ve maia, chu mi hnuah chuan kan inhmu kan inhmua, kan inngaizawng nget ta hle mai a.

Trina Williams'i te chhungkua hi chhungkaw pangngai tak an nia, keini chhungkua lah kan harsa ve em em a, ka pa hi cook mai a nia. Zing dar 3:30 ah hna thawk turin a kal thin a, mahse ka pa chu pa ropui tak a niin ka hre thin a, a ni chuan Pathian biak dan turte min zirtir thin a, mi ngaihah chuan ka pa chu pa mawlte pawl 3 pawh zirzo lo ni mahsela, ka mihring hriata fing ber a nia. Ka pa chuan tihian min zilh thin:

1) Mi hi thiam loh chantir ngawt ngai suh 
2) Engpawh ti la, a hma pawl ni zel la, hma takah tan thin rawh 
3) Ngilneihna lan tir bang ngai suh
4) Thil tha i ti em tih hi, nangmah infiah thin rawh 
5) Engkim dik takin ti thin rawh
6) Mi dang nun a tha zawnga thlak danglamtu nih tum rawh,
tiin min zilh thin.

Eng pawh ti ila, ka pa min zilhna hi ka hre reng thina, chuvang chuan Trina'i nen kan inngaihzawn lai pawh hian, a tana mi tha ber nih ka tuma, nasa takin kan nui dun bawk bawk thina, kan tawngtai dun thina, college chapel-ah kan inkhawm dun bawk thin. Kan zirlaite kan zir zawh hnuah pawh chuan kan la in zui zel a.

Kan in kungkaihna a thuk tak zelah chuan, kan chhungkaw chanchin dik takte chu ka hrilha, mak tak maiin kan chhungkuaa tel ve a chak thu chu min hrilh a. Tichuan, zungbun man tur ka neih ve leh inneih puiah ka sawma, kan innei taa. Ka pa chuan monu thar a nei a ni lo, a rila rah ngei fanu thar a nei zawk a ni ber hian ka hre thin nghe nghe a ni.

He chanchin hi, Dr. Rick Ribsby a chanchin a nia, amah hi tunah chuan R.R.C company-ah C.E.O hna a chelha, thu thiam tak a nih avangin Pathian thu sawia sawm thin a nih bakah motivational speaker a ni bawk a ni. 

Trina'i nen an in neih chhoh danah hian, Rick'a hi chuan thutlukna tha a siam dawn tih hi a rin theih maia, a chhanchu eng ang pawhin harsa mahse, an chhungkua hi mipa diktak rorelna chhungkua, an chhungkaw lu ber atan Krista thlangtute chhungkua an nih avang leh, a pa hian a fate hi nasa takin a zirtir thin vangin. Ricka hian Trina'i hi nupuiah nei lo mahsela, nupui tha tak a neih tho tho a rinawm a.

An inkatah hian, Trina'i zawk hian hmuh theih loh chu hmu theitu zawkah a tang ni ber hian a hriata. A chhanchu, Ricka hi sport thei emaw, lehkha thiam bik emaw, mi hmeltha emaw a ni lem lo tih a hriata, chu vang tak chuan an function ah pawh Ricka hian hmeichhe kalpui tur a nei lo a ni. Ricka'n kalpuia a sawma, function'a hun rei lote an inkawm chhung hian, Trina'i hian a mi zawn "mi tha" a hmuin a in hriat der tawh a nih a rinawm. Trina'i hi a zawnah a chiang a ni, "mi tha a zawnga hmeltha a zawng ber lo, mi tha a zawnga sport thei a zawng lo, mi tha a zawnga hausa a zawng lo" a zawnah a chiang a ni. 

Mi tamtak chu, mi tha Pathian neitu zawng inti reng chung hian, hmelthate, hausate, larte hi kan melh tel nasa lutuka, kan mit alo vai thin a ni. Tin, mi hrim hrim hi, an bula darkar hnih khat vel kan awm hian, mi eng ang nge an ni tih hi kan chik chuan a hriat nghal deuh duak thina. Kan in tawn tirha, ti deuh haw haw chu, kum 10 hnuah pawh tih deuh haw hawna an nei tho ang, kan in tawn tirha mahni nih baka insawithei vakte chu kum tam tak liam mahse an nih baka lan duh mi an ni tho thin. Tin kan hmuh tirha mi tha chu, kum kal viau mahse an tha tho thin, chutih rual chuan mi'insiamtha emaw, mitha chhiat lam panta emaw chu an awm tho, mahse mi'inthlak chhiatna atanga thatna lam pan emaw, thatna atanga chhiat lam pan ta te hi mihringah hian an tam lo zawk a ni.

Naupang kum 10 mi vel hi chu, an sei lenna zirin an nihna letthawk pawhin an inthlak thei thina, kum 20 hnuai lamte pawh an awmna hmun a zirin inthlak theihna an la neitha thina. Mahse, puitling pangngai ni tawhte hi chu, inthlak thei tho thin mahsela, naupang leh tleirawlte angin an in thlak zung zung thei tawh lo thin, ti ila kan sawisual awm lo e.

Tin, mi tha Pathian neitute hi an lo that bikna chu, eng ang pawhin rethei mahsela, personality tha an neih vangin an dingchhuak leh tho tho thin. Chu bakah, mi hausa chhungkua atanga chhuak pawh nisela, mi tha Pathian neitu chu, an buai ngai chuang lo, mi tha an ni tho tho thin. Kan sawi belh duh lawk chu, mi rethei humhalh zawng ringawt hian, mi tam takin thu an ziaka, an sawi bawk thina. Mi hausa tam zawk hi chu mi tha an ni, ka ti ngam, a chhanchu an hausak hmain mi rethei an ni thina, an thlahtu an pute emaw, an pa te emawin, retheina an lo paltlang tawh avanga hausa an ni thina. Mi tha Pathian neitu chu, eng ang pawhin hausa sela, mi tha a nih chhunzawm zel thei thin, tunlai khawvelin mi tha tia a sawi nasat em em Billy Graham te chhungkua pawh hi, millionaire mai pawh an ni lo, muli-millionaire hial an ni. An hausak hnuah an buai teh chiam hran lo, Pathian tan an nun chhunzawm zela, Pathian pawh hian hausakna pek tlaka a ngaih vang hian, a malsawm a ni, ti ila kan sawi sual awm lo e. 

Trina'i leh Ricka te chanchinah let leh ta ila, Trina'i chuan mi tha a zawn chu, eng ang pawhin mit la lo mahse, eng ang pawhin chhungkaw harsatna'in a mawina chu khuh thuk mahse, mi tha chauh a zawn avangin, Rick'a mawi lohna zawng zawng chu hmuh kanin, Ricka kristian tlangval, pa'in tha taka a zirtir thin, tlangval thatna chu a hmua, a tlanga a tisual ta lo hle a ni. Pathian tihnghahna changtu, chu Rick Ribsby'a,  chhungkaw harsa tak atanga chhuak chu Rick Ribsby millionaire a ni taa, Rick Ribsby lehkha thiam hran loa kha Professor Dr Rick'a tih alo ni taa, Rick Ribsby tu mit mah la ngai loa kha C.E.O Rick Ribsby a nih hnuah zet chuan mit ala ta hle ni tur a ni, tu hriat mah a hlawh hleihtheih lohna hmun, hmeichhiate pawhin an phone number an pek duh loh thinna hmun ngei an college hluiah chuan, commencement speech pe turin sawm a ni ta a ni.

Kei ni pawh hi, kan zawnah i chiang ang u. Lalpa tihnghehna changtu, mi tha zawng ila, chutiang mi chu nih i tum bawk ang u.

(Tawngtai Dan Tur)
Lalpa, duh thlan theihna min pek avang hian ka lawm e, he duhthlan theihna min pek hmang ngei hian, i rawng ka bawlpui thei ngei tur, kawppui atan ka thlan theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Rick Ribsby Commencement Speech (https://www.youtube.com/watch?v=6Wp1mRgMWEg)

A Chelh Reng Che, Tho Leh Rawh

"An hnenah chatuana nunna ka pe a; kumkhuain an boral lo vang a, tuman ka kut ata mi chhuhsak hek lo vang."(Johana 10:28)

Naupang bawkvak thei lo hi, a himna hmun tura kan dah chuan ngaihven em em a ngai loa.

Naupang bawkvak thei tawh chu, ven a ngai thina, a hma aia ngaihsak ngun deuh a ngai thin.

Naupang kai thei tawh chu, ngaihven mai ni loin, ngaihsak a ngai tawha, a tlu a tlu bawk thin.

Kan tluk kan tluk chhan hi kan thang tihna a ni zawk lo maw! Naupang bawkvak thei chauh hi a tlu ngai lo hrim hrim, ala tlu pha lo a chhanchu ala ding thei loa, keiin ala kal theih loh vang a ni. Kan tluk kan tluk hian, kan ding thei tawha kein kal kan zir tan tihna zawk a ni lo maw!

Chutianga, kan tlu kan tlu a nih chuan, naupang kal tir nu leh pain an ngaihsak ang chiah hian, kan Pathian hian min ngaihsaka, min kaitho thin a ni.

Hawh u, kal thei mai ni loin, tlan thei chak taka tlan thei ni turin, than i tum ang u. Pa tha ber van Pathian kan nei si a, chu kan Pathian chuan, tlu mah ila min chelhna kut chu a tlah dawn si loa.

(Tawngtai Dan Tur)
Lalpa, ka tlu thin, ka tluk hma pawhin tlu thei ka ni tih i hre tawha, chuvang chuan ka tluk apaing hian min kaitho turin i hnai renga, min ngaihsak reng a ni tih hi ka hriat renga, i rawngbawltu tha ka nih theihna turin, kal thei mai ni loin, a tlana tlan thei ka nih theih hialna turin min pui ang che, Amen. Ti ang aw.

Follow tih a hnuaia inziakah khuan i click dawn nia.

Savate Chuan, Thing Tliakin An Bu An Siam Thin

"Ka chungchang thu an sawi a, "Pathianin a pui lo vang" an ti a. (Selah) Nimahsela, aw LALPA, nang chu ka velin ka phaw i ni a; Ka ropuina leh ka lu dawm kangtu i ni e."(Sam 3:2-3)

In chhungkua enge in dinhmun?
In ni deuh nuai em? In ni deuh nuai a nih pawhin a pawi lo, Pathian hian amah tel loa, fel fai thlupte ai chuan, chhungkua ni nei nuai Lalpa nen kan la tha dawn ti thintute chungah a lawm zawk a ni. A lawm mai a ni lo an dilnate a tih hlawhtin sak thin bawk a ni.

Sava te hian, hmawlh bungin leh thinghnah tlatawhte, thil chhiain an in/an bute chu an siam thin a. An in chu phui tha takin an siama, hmun thukruah an in chu an siam thin, hlauhawm an tawh apiangin an buah chuan an thlawk lut thina, hlauhawm laka an in thuhrukna chu an in/an bu chu a ni thin a, an bu a an tlawh luh tawh chuan an him tih an hre thin.

Chutiang chuan, sava te tan chuan an bu chu chawlhna hmun leh in humhimna hmun a nih laiin, keini mihringte hi kan inah kan hahdam loa, kan ina kan awmin him veng vengin kan in hre lo thin em? Hei hi enge a chhan kan tih chuan "sava te angin, thilchhia rem taka charhkhawmin, chhungkaw tha a siam thin tih hi kan hriat loh vang a ni."

Kan chhungte thilchhia, an nun tha lo leh kan chhiatna theuhte hi rem takin charhkhawm nachang chu hre ve ta ila chhungkaw him tha kan nei mai tur hi a nia. 

Mahse, keini chuan thilthain kan chhungkua hi siam kan tum zawk thina, kan buai thin a ni. Chhungkaw zinga rawngbawltu emaw, eizawngtu ten, an chhungkaw zinga suala tal buaite chu, in siamtha turin an hrilha, an haua, tawngkam na tak tak ten an tawngkhuma, a then phei chu kut an thlak bawk thin. Hetianga ti lo hian, "kan hmangaih chea, i in siamthata, i nih theih tha ber i nih a ngai a, pui tur chein kan awm reng a nia," ti zawk thin ta sela chuan, chhungkua a dam zawk ava rinawm em.

Chhungkua ti buaitu a kan hriatte hi, an that lohna ngar ngar kan sawi chhuah thin avang hian, rawngbawltu kan ni emaw, eizawngtu kan ni emaw kan chhiatna lai an sawi chhuak ve  phah thina. Kan chhungkaw pum pui chuan, thatna tam tak in  sawi chhuahsak tur kan ngah teh lul nen, kan that lohna theuh kan in pho chhuah sak thin avangin, kan chhungkua chu a natin a na ta thin a ni.

Hetiang a nih avang hian, kan chhungkaw zing amite thatna turin, tawngkam dam tak pawhin hrilh thin mah ila, thu kan hrilh a te ngei chuan kan that lohna in min chhan let thin avangin thu pawh kan in hrilh hlei thei lo thin a ni. Kan chhungkaw zing ami tlin lohna kan phawrh chhuah sak thin a nih chuan chutiang bawk chuan kan chungah an ti ve thina. An thatna kan pawrh chhuah sak tlat chuan chutiang chuan kan chungah an ti thin ve tho bawk.

Hei vang hian, kan chhungkaw zinga mi tu pawh hi, an that lohna phawrh sak loin an that lohna nena hmangaih zawkin, an thatna zawk i tarlan sak zel ang u. Chutianga kan tih chuan, thatna leh hmangaihna kan in thleng tawn a nga, kehsawn nawi te te te chu, nghet takin kan lo in zawm dawn  a ni.

Tin, chhungkua a tha zawnga thlak kan tum hian, kan hmelma sual chuan i thei lo ang, Pathianin a pui lo ang che min ti maitheia. Mahse, Lalpa thu awina vanga kan chhungkua siam that kan tum a nih chuan, Pathian chu kan pawh leh kan lu min dawm kan saktu a ni a nga, chhungkaw tha tak min pe dawn a ni.

He leia i rohlu ber, i chhungkaw tan khan bei rawh le.

(Tawngtai Dan Tur)
Lalpa, chhungkua min pek avangin ka lawm e, chhungkua sual vanga hreawm ngawih ngawih tur i siam loa, heng sualin kan chhungkua min phuarna hi phelh turin theih tawp ka chhuah theih nan min pui ang che, Amen. Ti ang aw.


Follow tih a hnuaia inziakah khuan i click dawn nia.

TUCHHUAN MALSAWMNA

"LALPA in Pathian chu Pathian a ni tih hre rawh u; Pathian rinawm, amah hmangaiha a thu zawmtu chunga chhuan sang thlenga thuthlung leh khawngaihna nghat reng a."(Deuteronomy 7:8,9) 

Chhungkaw thenkhat kan en a, Pathian hian mal a sawm bik riau niin kan hria a, a lo ni reng bawk a ni. An thlahtute atanga hmuingil thei tak niin an lang bawk a. Malsawmna an dawn chu kan chhui a mahse an dawn dan kan chhui thleng ngai lo. Thlahtute zingah Pathian thuawih tak an lo awm avanga malsawmna dawng bik an ni duh fo a ni.

Abrahama, Isaka leh Jacoba te chhungkua atang khan han chhui ta ila:

Abrahama chuan Pathian kohna a chhang a, Pathian a rin em avangin rinna pa tih a ni hial a ni. Rinna pa a nih tehna chu a fapa hlan tura Pathianin a tih atang pawh kan hmu a ni.

Tin, Isaka pawh a pa hnung zuiin Pathian thu a awih em em a ni.

Mahse Isaka hian Fa sual ve tak, mahni pa leh U te bum mai duh mi Jacoba a nei ta tlat mai. Pathian chuan Jacoba chu a thunun nasa em em a, a fapa Josefa a laksak a, thildang tamtak pawh a hmachhawn a ni. Mahse Jacoba chu a pa leh a puten Pathian thu an lo awih tawhna chu Pathianin amahah a chhui zel ni tur a ni. Jacoba hian inbumna hmangin fa u zawk nihna chang mahse Pathian chuan a thlahte a malsawm ta tho a ni. Hei hi a pate leh a pute thuawihna rah a seng a ni chek ang.

Israela tihin a hming thlak a ni ta a, Israel hnam thalhtu a lo ni a, Pathian hnam thlan leh Isua pianna thlahtu hnam a lo ni ta a ni.

Jacoba thawnthu intanna chu ngaihnawm lo viauin Pathian pawn an thunun malh malh thin mahse amah thlahtute avangin a malsawm a ni tih a hriat a ni.

Tin, Jacoba pawh a pu leh a pate chanchin a ngaihtuah chang leh an sulhnu a chhui changin an tupa hian Pathian thu ka awih ve ngei tur a ni tiin a in ngaihtuah thin pawh a rinawm a ni.

Tuna kan chhungkaw neih mek chu a lo la felfai lo deuh pawh nise kei chuan thu ka awih tlat ang a, keimah atanga ka thlah kal zel tur chu a felfaiin Pathian kuta intulut chhungkua ka din tawh ang tih kan tum theuh tur a ni.

(Tawngtai Dan Tur)
Lalpa, thatna leh chhiatna kan chhungkaw kalzelin kan in chhawm chawng a ni thei e. Thatna kan loin chhawm chawngte chu ka chhunzawm zel theih nan leh chhiatna kan lo inchhawm chhawngte chu, Krista tisenin chhutchhiat theihna dan ka nei a ni tih hi ka hriat renga, thatna zawkin chhiatna chu ka thiah theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.