Tlawnna Nun Chhunga Hlawkna (Tumkau Ni)

"Aw Zion fanu, nasa takin hlim la; Aw Jerusalem fanu, au chhuak rawh; Ngai rawh, i lal i hnênah a lo kal e; Mi fel a ni a, hnehtu a ni; Inngaitlâwm takin sabengtung chungah a chuang a, Sabengtung no chung ngeiah."(Zakaria 9:9)

Van Lal fapa Isua Krista chu, khawvelah tlawm takin a rawn kala. Nikhat chauh lal anga lawm ve a ni a, chu mi ni ah pawh chuan inngaitlawm takin Sabengtung chungah a chuang a ni.

Ka rilru a ka zawh zawh thin chu, tinge hetiang ang taka kan Lalpa Isua hi a inngaihtlawm kher tih hi a nia. Engkim a neia, engkim a siama, awm lo zawng zawngte pawh a awm tir theih avangin awm lo zawng zawng pawh a ta ala ni. Tinge kan Lalpa hi a inngaihtlawm khera, tinge amah zuitute pawh hi tlawm tura min tih thin le?

A chhanchu tlawmna hian, hausakna leh tharumin a lei chhuah theih loh a leichhuah theih thin vang a ni. 

Tlawmna hian mihring thinlung a hneh thin a, mihring leh mihring inkara thilawm thei hlu ber "hmangaihna" pawh hi, tlawmna hian a lei chhuak thei a ni.

Rawngbawlnaahte, hnathawhnaahte, chhungkuaahte, thiankawmnaahte, mi inngaitlawm chuan midang ngainat a hlawh bik thin a ni.

Hawh u, kan Lalpa Isua Krista hnungzuiin inngaihtlawmna hmanraw chak tak hi, hmang turin i inngaitlawm ve ang u.

(Tawngtai Dan Tur)
Lalpa, engkim neitu engkim chunga Lal i nia, mahse hetiang taka inngaihtlawm i thlang hi amak a, hei hian inngaihtlawmnaah hian thiltha tamtak a inphum a ni tih hi min hriat reng tir zel se, i hnungzuitu ka nih avang hian i tana ka inngaihtlawm ve theihna turin, min pui ang che, Amen. Ti ang aw.

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)

Tisual Tawh, Insiamthate Tan Thiltha A Ui Lo("Pattie, Change In My Life")

"Amaherawhchu mi sual chuan a thil sual tih zawng zawngte a hawisana, ka dan siamte a vawn a, dan chu zawma thil fel a tih chuan a nung ngei ang, a thi lo vang."(Ezekiela 18:21) 

Patricia Robinson'i ka nia, ka thiante leh ka chhungte chuan, Pattie tiin min koh thin a. Kristian chhungkua atanga seilian ka nia, chuvang chuan kan kohhran First Baptist Church Youth Fellowship hruaitute zingah pawh ka tel ve nghe nghe thin. Chutia kohhrana rawng kan bawl lai chuan, tlangval fel tak Marcus Wads'a nen kan in zui reng thina, fel fai takin kan inzuia, chhungkaw tha taka seilian nimahsela, kei leh ka chhungte hi min zah der thiam em em a.

Marcus'a te chhungkua hi, kan ram mite chuan American dream kan lo tih fo, changtute an ni ti ila kan sawisual lo ang. Pathian tih mi chhungkua an nia, textile industry lian tak Wads Features neitute an nia, a pu pu leh chu, kan ram U.S'a industrial revolution a awm theihna tura nasa taka beitu Smith Tim Wads a ni nghe nghe a. A hma chuan, America kohhran hmasa zawk ti mai ta ila, Presbyterian kohhran mi an nia, mahsela kan ram kohhran kalphung inthlak zelah Baptist kohhranin hma an la tha zawka an hriat avangin, a pu atang Baptist kohhran lamah an tel ta thunga.

Tunhnua ka ngaihtuah let leh hian, Marcusa te ang mitha lutuk kha, engtin nge ka lo hnawi mai le ka ti thin. Mahse, nula naupang hna thawk tan tir ka nih lai khan, "ringtu nun tlawm" (simple man) hi ka lo man pha lo a ni. Marcusa ka then phahna mipa chu, Curry Willard a nia, kan office National Inspection Department a, Junior Executive a nia, mi in phochhuak (show off) thiam tak a ni, a changin car manto em em'in office a rawn kala, chu a car pawh chu loan a alo lak a nia, kan in neih hnuah alo la rulh zawh loh avangin ka rulh pui nghe nghe a. A chang leh a inngaitlawm der kuala, Taxi leh Bus ten a rawn kan bawk thin, chutih laia kan rilru hmeichhe rilru puitling lo rilru chu hneh mai mai tak a ni. Kan office a, ka rualpui hmeichhe ho chuan kan ngaina deuh thum a ni.

Chu tih lai chuan, Curry'a aia a let za deuh thaw a hausa Marcus'a ve thung chu Ford's F150, truck ang deuha a hnunga thil purhna awm hi a khal thin a, motor thar pawh hi a lei mai mai ngai loa, motor thar a lei dawn chuan a motor hluihlawn tur chu a chei thaa, man awm miah loin mi harsa zawkte a pe thin a. Marcusa chunga ka vuina thin chu, hun min pe tam lo hi a ni, hna a thawh loh leh kohhran rawngbawlnaah a tela, chutianga a tel loh leh mi harsa zawk an tlawha, kar tawpah kan inhmu ve tawk thin. Mahse, nula naupang pasal nei lo chu ni leh ta ila, hetiang ang mi ngei a bialnu bula thu thu ringawt loa, hun tangkai taka hmang thin mi hi ka thlang tawh ang.

Currya lah hi an hman thei khawp maia, a hna a thawh nasat chang chuan, office ah darkar 14 te awm chang nei mahse, chutianga a buai loh chuan, ka bulah a awm chawt thina, a tana hun ka neih loh changin, golf a khelh loh leh a thiante nen an chhuak ho mai mai thin. Nula tha leh ta ila chuan, hetiang ang nun awmze nei lo lutuk hmang hi, ka inhnaih tir tawh loh tur chu thuhran melh pawh ka melh tawh lo ang.

Currya nen chuan kan inneia, kan inneih hnu kum hnihah chuan ka rin ang mi hi alo nilo hullual avangin kan hlim nang loa kan inthena. Mihausa inngaitlawm angin kan inngaih zawn lai khan, ka hmua, a nilo nasa maia, mahni neih baka inchei, midang tana hun siam duh lo, a nuam tihdan chauh a  nun hman tum alo nia.

Kan inthen hnuah, ka rilru mangang tawt chu, zu'ah ka tlana, rehab-ah te ka awma, rehab atanga ka chhuah hnu chuan, mipa keimah aia kum 5 vela naupang nen kan inngaizawnga, inkhawm pawh ka inkhawm ngai tawh loh avangin, ka nun uluk theihna chu nasa takin ka hlauha, sex kan hmang duna, tichuan ka rai taa. Chupa chuan ka rai tih a hriat ve leh pa nihna mawhphurna chu a hlauh avangin, min kalbosan nghala. Zu ngawl vei, zu la kalsan chiang lo leh, mipa kawp kual mai mai thin ka nih avang chuan, hna thawh tur tha pawh ka nei tawh loa, departmental store ah ka thawka, minimum wage chauh ka hlawh tawha, ka rilru a buai thin em avangin hna ka thawk tha thei loa, chuvang chuan kan puin warning min pe leh nghala, ka rilru ava buai tak em.

Kal ngaihna ka hre loa, tichuan biak in hnai ber ka zawnga, ka pan taa, ka biak in pan chu kohhran te tak te, High way (kawngpui lian) sira awm hi a nia. Biak in ka luh dawn chuan, Pathianah nasa takin ka inthiam loh avangin, ka insiam tha a nga ka kal leh zawk ang ka tih lai tak chuan, Marcus'a nupui kan kohhran thalaia ka telpui thin, Jenna'i chuan min rawn biaa. Pat, min rawn tia, Jennai a ni tih ka hriat avangin, hmanhmawh taka kal kian ka tuma, mahse Jenna'i chuan Kristian tawngkam mawi lutuk mai hian min rawn biaa "Excuse me, I'm sorry but, you look like our church sister Pattie" (min lo hre thiam lawk, kan kohhrana kan unaunu Pattie'i i ang hle mai) a rawn tia. Kan kohhran a kan unaunu, a tih tak chuan ka rilru a khawih khawp maia, ka mittui thup zawh rual lohin a sur zung zunga, ka mittui tla a hmuh chuan, Jenna'i chuan min rawn kuah vata, engkim a tha vek dawn alawm, Pathian kan nei alawm, tiin min rawn hnem nghala.

Marcusa leh a nupui Jennai te hian, khaw hrang hranga kohhran harsa zualte an lo pui thin alo nia. He biak in ka luh tumna pawh hi, an kohhran puih mek biak in alo nia. Chutia, Jennai'n min kuah mek lai chuan, ka hmeichhe rilru a chhuaka, Jennai te ang hmeichhe mawl lutuk hi engtin nge, Marcusa hian a duh theih ka tia. 

Biak in bul lawka pastor in a kan han luh chuan, pastor leh Jennai chuan min tawngtai saka, chuta Jennai a tawngtai danah chuan tawngtai mi (Prayer Warrior) a ni tih ka hrethiam taa. Kan naupang laia, kan sunday school zirtirtute chuan prayer warrior reng reng hi finna bik an nei thin an tihte chu ka hre chhuak a. Chu mai pawh chu a ni lo, tawngtai mite hian, ngaihnobeina (charms) an lo nei a ni tih hi, Jenna'i hmel leh zia ngainat awm em em atang a lang chiangin ka hriaa.

Kan tawngtai zawhah chuan, chu kohhran Bethel Methodist Church, pastor Paul Collins'a chuan, ka harsatnate min zawt a ka chanchin zawng zawng ka hrilh hnuah tihian min, fuiha (counselling) a. 

Kan Pathian hi,"kan tihsual avanga kan sual man chhiatna kan hmuhnaah hian lawmna a nei loa. " Kan sualte kan sima, a duh anga kan nuna thiltha tinreng leh a malsawmna tireng kan chan hi a duh zawk a, chutah chuan a lawm zawk a ni. Kan Pathian thu chuan tihian fiah takin alo sawi a,"Misual thihnaah hian lawmna reng ka nei êm ni? A kawngte chu a hawisana, a nunna zawk lo chu? Tih chu LALPA PATHIAN tu chhuak a ni"(Ezekiela 18:23). 

Pathian hi mitin, misual ber pawh, amaha an 'nunna (alive)' zawkah a lawm a ni.

Chutih rual chiah chuan, Pathian thuawi tak miin, sual lam kawng a hawi chuan, sual man hremna chu a dawng dawn a ni, (Ezekiela 18:24) ah chuan tihian a inziaka. "Amaherawh chu mi fel chuan a felna kawng hawisana, khawlohnate a tiha misualte tih ang zela thil tenawmte a tihin a nung dawn êm ni? A thil fel tih engmah kha hriatreng a ni tawh lo vang a, a bawhchhiatna a bawhchhiatah khan leh a sualna a tihnaah khan, chumi ngeiah chuan a thi ang," tiin, nun insiamtha leh turin min fuih sauh sauha.

Chutia kan inkawm zawhah chuan, Marcusa pawh a rawn luta, thil awmzia a hriat hnu chuan, Kristian tlangval a rilru natna tur pawh ngaihtuah miah loha, ka kalsan ngei chuan, ka mamawh engkim min ngaihtuah puia. Ka hnathawhna departmental storea kan pu pawh chu min va biak saka, min biak sak chiah pawh a ni lo, Marcusa chuan a hming ava sawia, kan pu chuan min lo hrethiam nghal em em mai a ni. Mi thiltithei tak tak chuan, inngaihtlawm an lo tum fan fan thin a ni tih hi Marcusa zia atangin ka man thiam ta bawka. Chutianga, a inngaihtlawm em em pawh chuan, a introduction ringawt pawhin thil ava tithei em, chawisan tlak hi Lalpan a chawisang pawh a ni mahna.

Marcusa leh Jennai te chu thlir rauh rauh chungin, Lalpan tha taka nung na na na te chu a kalsan lo a nih hi ka tia.

Ka rilruin ka tawngtaia, Lalpa misual ka ni, mahse misual inchhira an nun hlui kalsante tan chuan, thiltha i tiam saka, chu thiltha chu i khawngaihna avangin, ka ta a nih ve theihna turin nun dan min zirtir rawh aw! ka tia.

He ka chanchin hi, Marcusa leh Jennai te angin mi puihna turin chakna nei lo mahila, kei ang michak lo leh daisual tawhte leh nun hmang tan mekte engtin emaw taka, Lalpa hnaih thei tura ka puihna a nih takin, tiin ka pho chhuak a ni. Lalpan malsawm che rawh se.

(Tawngtai Dan Tur)
Lalpa, nangmah vuan tlattute bawk hi, nangin kawppui tha i pe thina, chu mai pawh chu ni loin nun duhawm i pe bawk thin a ni, tih hi ka chhinchhiah tlata, i tana nun nachang ka hriat theih nan min pui ang che, Amen. Ti ang aw.

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)

Hlimna Ber Chu, Pathian Chenchilhna Hi A Ni

"Tun thlengin ka hmingin engmah in la dil lo; dil rawh u, tichuan in hmu ang, in lawm a kimna turin."(Johana 16:24)

Pathianin min chenchilh chuan:

1) Kal pah pawhin Pathian nen kan inbe mawlh mawlh thin a,

2) Pathian thuin min khawih avangin kan mittui a tla hial thin,

3) Dinhmun hlauawm leh hmun hlauhawmah thlamuantu kan neih avangin kan thla a muang thin.

4) Kan tawngtaiin Pathianin a aw min hriattir a.

5) Pathian duh zawng ti turin huaisenna riau kan nei thin.

6) Kan chauh lai pawhin, engtin emaw tak chhawktu leh min tichaktu kan nei thin.

7) Thinrim ber lai pawhin, thinrimna tilang chhuak lo tura min thunun tlattu a awm thin.

8) Midang tanpui turin engin emaw min tur thin. etc.


A chang chuan, Pathian min chenchilhna chuan, channa anga lang zawk thil leh tlawm zawk ni turin min ti thina, hei vang hian mi thenkhat chuan, Pathian chenchilhna chan chu chak pawh ka chak lo an ti maithei a ni. Mahse, Pathianin min chenchilh avangin midang kan pui emaw, kan tlawm emaw a nih chuan, khawvela hlimna zawngtute ban phak loh khawpa hlimna nasain min rawn tuam zui thin a ni.

Pathian chenchilhna hi "Chhungrila Ringtute Min Tihlim Thintu A Ni A," min tichak thintu a ni bawk a ni. Petera a thih dawna a zam aih loh chhan kha, Pathianin a chenchilh vang a ni tih a chiang a nga. Johana kha, hreawm thei ang bera a thihtheihna turin Patmos thliarkarah an dah a, mahse Pathianin a chenchilh avangin, a ni chu a bui em em hran lo thunga, Johana chuan Pathian alo pawl veng veng mai a ni, tichuan Thupuan lehkhabu ropui tak hi a rawn ziak chhuak ta a ni.

Pathian chenchihna chang thintu nep tak zawng chhuak dawn ta ila, a huphurh awm ngawt ang le! a chhanchu Pathian chenchilhna chang thintute hi an nep ngai lo si loa.

Pathian chenchilhna (God Presence) hi, Isua Krista hminga dila dawng thei tura dikna kan nei theuh a ni. A chenchilhna chu, dil rawh, dil mawl mawlh rawh, vawikhat chan a tawk lo nitin chan tum rawh, tichuan mi nep lo an tihte zingah chuan han tel ve ta che. 

(Tawngtai Dan Tur)
Lalpa, i chenchilhna chang tawhte chuan, thil dang zawng aiin hlu an tia, an thlahlel em em thina, i duhzawng ti turin chakna an neih zel phah bawk thin. Kei pawhin i chenchilhna chu ka duh a, nitin i chenchilhna min chan tir turin ka ngen a che, Amen. Ti ang aw.

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)

Hma Sawn Turin Pharh Ve Rawh Le

"Chu veleh, chu mi hnenah chuan, "I kut phar rawh," a ti a. Tichuan, a phar a, a lehlam angin a dam ta viah a."(Matthaia 12:13)

Kut zeng hnenah khan, Isuan i kut phar rawh a tia, a phara a dam a ni.

Isua hi a mak i ti ve em, a kut kha phar thei sela chuan, a tihdam pawh a ngai lo ang, a phar thei loa, a kut zeng na na na kha phar rawh han tih tal chu, ka ti. Mahse, kut zeng chuan a phara a dam asin.

He thu awmzia tak hi ka ngaihtuah ka ngaihtuah hian, hei hi a awmzia chu a nih ka ring. Ka theih loh hi, Pathian ka beiseina avangin tih theih ka tuma, ka phar chuan "amah kan Pathian ka beisei avanga ka pharnaah tak khan, Lalpa chu a rawn pen lut a nga, a hmaa ka theih loh kha ka theih phah ka ring a ni."

Phar tawngkam tlukpui pakhat chu, pharh a ni ti ila kan sawi sual awm lo e.

Kan zavai mai hian han, Lalpa kan beisei avangin han in tilian deuh ila, i in pharh zau deuh teh ang u. Kan chhungkaw siam tha turin i han in pharh zau deuh teh ang u, hna kan zawnnaah i han in pharh zau leh deuh teh ang u, kawppui kan zawnnaah i han in pharh zau leh deuh teh ang u, mi kan hriatthiam kawngahte pawh i han in pharh zau leh deuh teh ang u, rawng kan bawlnaa kan than dawn phei chuan i pharh zau ava tul thin tak em.

Kha leh chen kha, than/dam ka lo tum tawh alawm, mahse ka thei hleinem i ti ve em, kut zeng pawh khan kha leh chen kha kalo zeng tawha, ka phar thei hleinem ti sela chuan, a dam hauh lo ang. Mahse, "ama thuin dam a tum loa, Lal Isua thuin dam a tum vangin a phar alawm mawle!"

Keini pawh hi, kan thu ni loin, Krista kan beiseina avang zawk hian, Krista duh dan ang ngeiin, i har pharh ve teh ang u, chu thu awinaah chuan kan Lalpa Isua chakna a rawn che a nga, nasa takin hma kan sawn a nga, kan rawngbawlna hrang hrang chhungkua, kohhran, hnaah, ngaihzawng nena kan inkarah, hma kan sawn ngei ngei dawn a ni.

Chutianga ti tur chuan Lalpa thu pawh ka dawng hleinem, ngahnge, hma ka sawnna tura amah ka beisei avang ngawta a thiltihtheihna a rawn lan ang kan ti em? Chutianga rilru i pu a nih chuan, Thiputnu khan Pathian thu a dawng bik hleinem, Isua a beisei avangin, Isua hriat loh laiin a tawka, Isua a beiseina leh a rinna avangin Isua thu nimiah loin, Isua atang thiltihtheihna a hip chhuak a nih kha.

Krista chakna chu, amah i beiseina avangin han hip chhuak ve teh leh!

(Tawngtai Dan Tur)
Lalpa, nangmah beiseina avanga i thu anga than tum leh dam tumte thiltih hi, athlawn i phal ngai loa, i hlawhtlin tir thin a ni, beiseina Pathian i ni miau sia. Hei hi keipawh hian ka hriat renga, nang ka beisei che avangin i thu anga nasa zawka ka in pharh zau zel theih nan min pui ang che, Amen. Ti ang aw.

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)

MITDEL PAKHAT LEH MITTHI PAHNIH

Chanchin Tha Johana ziak ka chhiar zo chiah a, Thlarau Thianghlim hian he thu hi ka thinlungah a rawn dah lian hle niin ka hria: He ka nun hi Keimah lampang leh ka Hlimna lampang a ni lo! Pathian ropuina puan chhuah hi ka nun chhan zawk niin ka hria—Pathian, min thlangtu, min hmangaihtu leh ka thih ai thi a, sual atanga min chhuah zalentu ropuina puan chhuah hi. 

Chumi hre fiah tur chuan kum2000 kalta vela mi pathumte chanchin kha ngaihtuah ho lawk teh ang. 

1: Piantirh atanga Mitdel. 

Tin, Isuan a kal pahin a pian tirh ata mitdel pakhat a hmu a.
Tin, a zirtirten a hnenah, “Rabbi, mitdel saa a pian hi tuin nge thil tisual, he mi hian nge a nu leh a pain?” an ti a, an zawt a.
Isuan, “He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi.(Johana 9:1-3)

Aw, Isuan mitdel a tihdam kan hmu a ni(khawvel pian tirh ata a vawikhatna atan), mahse tihdam a niha, amaha Pathian ropuina puanchhuaha a awm hmain kum eng emaw zat hrehawm a lo tuar a ni. Chumai a ni lo tihdam a nih dawn pawhin a hmanrua kha a tlawm a, hlum a mitah bel a ngai (v. 6), tin, a hmuh theih hnu lawkah a nun chu a hma aiin a buai mai niin a lang—a chhan chu damna a chan chungchangah intihbuaina a chhuak tlat.(vv. 13–34). 

2: Isua thian, Lazara

Tin, mi pakhat, Mari leh a laizawn Marthi awmna khua Bethani-a mi, Lazara, damlo a awm a.
Tin, a farnuten Isua hnenah, “Lalpa, ngai teh, i hmangaih kha a dam lo ve,” tiin mi an tir a.
Tin, Isuan chu chu a hria a, “He na hi thihna tur a ni lo, Pathian mawi nan a ni zawk e, Pathian Fapa chu he mi avang hian a la mawina turin,” a ti a. (Johana 11: 1 , 3-4)

Isua'n thihna tur a ni lo, Pathian mawina tur a tih zawh lawkah Lazara a thi ta si. Mahse," Isua chuan a tir atangin a tawp dan tur a hre sa vek a ni." Nili laia a rawn tlai chhep chhep hnuah chuan Lazara chu a rawn kaitho ta mai a, heta an han intawk khawm leh an hlimdan tur zia hi i suangtuah chhin ngai em? Mahse Lazara hian hlim takin a nun a hmang chho zel em? Teuh lo mai! A hnu lawkah chuan Lazara tihlum turin puithiam lalte an inrawn a nih kha, a chhan pawh, "Amah avanga Judate tam takin an pakaisan a, Isua an rin thin avangin"(Johana 12:11). Thihna ata kaihthawhin a awm chauhva, thihna bawk a hmachhawn leh dawn a ni. 

3: Isua zirtir, Petera

Tin, a vawi thumnaah chuan a hnenah, “Simon, Johana fapa, nangin kei mi ngaina em? a ti a. Tin, a vawi thumnaah, “Nangin mi ngaina em?” a hnena a tih avang chuan Petera a lungngai a, a hnenah, “Lalpa, engkim i hria a, ka ngaina che tih i hria e,” a ti a. Isuan a hnenah, “Ka beramte chawm rawh.
Tih tak meuhvin, tih tak meuhvin ka hrilh a che, i naupan lai khan i taiah i inhreng a, i duhna apiangah i kal thin a; nimahsela i upat hunah i kutte i phar ang a, mi dangin an hrensak ang chia, i duh lohna lamah an kai ang che,” a ti a.
(Chung thu chu engtiziaa thiin nge Pathian a chawimawi ang tih hriattir nan a sawi a ni.) Tin, chu chu a sawi zawhin, a hnenah, “Mi zui rawh,” a ti a. (Johana 21:17-19)

Petera chu kum 3 lai mai Isua kiangah hun a hmang a! Kohhran than nana hmanraw tangkai tak a ni bawk. Mahse Kross-ah a letlinga khenbehin a thi a, a martar a nih kha!

A bengkhawn thlak in ti ve em?

Heng mi pathum te hi zingkarah thovin, "Khawnge vawiin chu Chutiang Khatiang chu tiin Pathian chawimawi nan kan hmang teh ang." an ti em?

Vawikhat mah an ti lo. Pathian chuan engtiangin amah an chawimawi ang tih chu a lo ruat lawk sa emaw ruahmanna a lo nei lawk sa vek a ni—a tlangpuiin thihna hmangin a ni zui, tisaa(physically) thihna emaw thinlung chhungrila(emotionally) thihna, leh an suangtuahnate pawh a thi tel zel. 

Nang leh keipawh hemi kawng zawh tur hian hnehban kan ni bik lo. Isua hnungzuitu i nih chuan, hetiang hi thil nihdan tur chu a ni: 

Tih tak meuhvin, tih tak meuhvin ka hrilh a che u, buh fang leia a tlak loh va, a thih loh chuan a mal chauhvin a awm reng thin; a thih erawh chuan tam takin a rah thin. Tupawh a nun thlahlel chuan a hloh thin; tupawh he khawvelah hian a nun ngaitlawm chuan chatuana nunna tur a vawng reng ang. (Johana 12:24-25)

Le... Pathian ropuina atana i nun kawng tur chu i chhut thiam ta em? Thawnthu bu ngaihnawm tak ang maia nun duhawm i thlakhleh leh sungtuah chu kalsan a, I tana thihsak tu che Isua tana nun chu i huam ve dawn em? I nun thlakhleh kalsan a, Isua ropuina puanchhuah nan chauhva i nun hlan turin i inpeih ve tawh em? Chutiang nun chauh nei tura Pathian hnena dil kawngah hian min lo zawm ve ta che aw? 

He ka nun hi, ka tan hmang tawh loin, Krista tan chauh ka hmang tawh ang. "This life really isn't about us. It's all about Him!"

(Tawngtai Dan Tur)
Lalpa, ka ta i nun zawng zawng i hlan rala, van hmunahte khian, i kianga ka rawn haw theihna turin, tunthlengin ro i rel a hma min laksak a ni tih hi ka theihnghilh loha, ka tana nung loin, i tan chauha ka nun theih tawh zawkna turin min pui ang che, Amen. Ti ang aw.

Follow tih a hnuaia inziakah khuan i click dawn nia.

Min Thlirtu Kan Pathian leh Kan Hmelma Setana Hmaah, Lalpa Tan Hnehtu I Ni Ang U

"Chutichuan, chhumpui nasa tak ang thlirtuten min hual vel avng hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u."(Hebrai 12:1)

Boxing emaw, M.M.A kan en chuan inkhelte hian an tumate hi hneh duh chhan an nei thin:

1) An hmahni thlirtu leh khawvelin chak zawk leh thiam zawk a ni tih hria se an duh vang a ni a.

2) Chak zawk an nih chuan, lawmman tha tak leh hlawh tam tak an dawng dawn tih an hriat vang a ni thin.

Hetiang chiah hei keini pawhin min beitu sual hi hneh i duh ve ang u. Sual nen kan inbeih lai hian "Pathian leh van mipuite leh kan hmelma min beitu Setana leh a ho ten min thlir a ni.

Setana leh a hoten min thlir reng laiin, an lakah kan tlawm duh dawn em ni? Setana leh a hoten min thlir reng laiin, kan sual tih chak chu hneh loin an hmaah chuan kan khup zul duh dawn em ni? Setana leh a hoten min thlir reng laiin ruihhlo kan ti nawn leh duh dawn em ni? Hnehna chu tlawm ngamna zawk a ni tih hre rengin kan tlawm ngam dawn lo em ni? 

Hnehna chu beidawn loh a ni tih hre rengin kan beidawng dawn em ni? Hnehna chu beih leh hram hram a ni tih hre rengin kan bei leh ngam dawn lo em ni? Setana leh a pawl ten awle awle, Pathian thisen kai a tlawm leh dawn e, tia min auh elh lai hian, an lawmna kan siam sak dawn em ni?

Chutia hmelma ten min auh el lai mek chuan, kan Pathian leh van mipuite chuan, "Ka hmangaih ka fa bei rawh bei rawh, i hneh thei, i thisenah khan ka thisen champion thisen ka dah, ka thisen kai i ni, chu mai pawh chu a ni lo, nangmahah khan ka thaw ka thaw lut a ni, tlawm suh, min au rawh, puihna min dil rawh, ka pui ang che, hnehna turin finna thar ka pe ang che min ti reng asin.

Chung min tantu kan Pathian leh van mipuiten min thlir lai mek chuan, ka hneh lo tiin, min tantute hmel kan ti bal dawn em ni?

Kan Pathian chuan, bei rawh bei rawh, i chak chuan lawmman ka pe ang che. Ka lawmman pek tur che hi leiin a hlutna an hrefiah phak lo, leiin ka lawmman pek tur che tluk a hlu hi an nei loa, an pe thei bawk lo che, bei rawh tichuan lawmman ka pek tur che hi i ta a ni dawn asin. Tiin, tan em emin min thlir reng a, min au a sin.

Hawh u, kan Pathian leh van mipuite leh sual Setana leh a hote min thlirtu zawng zawng hmaah hian, kan Lalpa hming ti mawi turin chak ang u, chak turin bei ang u, chak turin i bei leh hram hram ang u. Kan Lalpan lawmman min pek a duh sia.

(Tawngtai Dan Tur)
Lalpa, i hminga hnehtu ka nih theihna turin keimahah hian, i thisen leh i thaw a awm a ni tih hriain, i hming timawi tur leh lawmman min pek tur chu, chang thei turin theih tawp chhuaha sual do turin min pui ang che, Amen. Ti ang aw.

Follow tih a hnuaia inzakah khuan i click dawn nia.

An Hlawhchham A Phal Lo, A Hminga An Beih Avangin

"Kei LALPA in Pathian hian "Hlau suh u, ka tanpui dawn a che u," tiin, in kut ding lam chu ka chelh dawn si a."(Isaia 41:13)

Lalpa vangin i nun a tha zawngin thlak i duh em?

Thlak i duh a nih chuan, thlak turin i ke han pen ta che, i nun Pathian tana a tha zawka thlak i tum tak zet zet a, hma i la ngei dawn a nih chuan, i chet hma hauh leh ke i pen hma hauh pawhin i kut ding lama vuan tlat chein a awmpui ang che.

A hmaa i tum ngam ngai hauh loh, hna zawnte, hlemhletna kalsana dikna kawng engkima zawnte, eizawnna thar tihte, ngaizawng nena thianghlim taka nunte, chhungte leh midang hmaa tlawm zawka nunte, lehkha tha zawka zirte.etc, hengte hi Pathian nena in pawhna thar i neih avanga i tum ngam thara, tih hlawhtlin ngei i tum a nih chuan,"Hlau suh ang che" a thu zawm tura i rilru i siam fel chiah khan, kan Lalpa chuan a awmpui tawh che, a thu i nuna tih hlawhtlin duh bertu chu kan Pathian hi a ni a sin.

Chu vangin, i chaknaa i theih loh ngei kha, Lalpa hmingin han tum zawk ta che. Davida khan ava tisual lo em tiro! a chaknaa a hneh loh tur ngei kha Lalpa hmingin a beia, kan Lalpa chuan a hming hmachhuana chona hmachhawntu chu an hlawhchham a phal ngai si loa, Goliatha a chak loh zawk mai a ngai ta a ni. Davida, amah rinchhantu, a hminga a hneh loh tur ngei beitu chu, a chak a nih chuan, a hming Pathian hming chu chawimawi a ni dawn sia.

Pathian hmachhuan zawkin, i hmelhriat thate, i thiamnate, i hmelthatnate, nangma lam zawng zawng dah thain, Pathian amah chauh chu hmachhuanin han ti teh leh, chutianga i tih chuan Pathianin a kutin a vaun tlat che a nga, i nun a hlawhchhamna palian kha, a chak loh zawk a ngai ve ang. Tichuan, Lalpa hming chu chawimawiin a awm dawn a ni.

(Tawngtai Dan Tur)
Lalpa, i thu anga bei thintute leh, i hminga an nun hmachhawn thintute chu, i awmpui thina, an nuna an beih apiang i hminga an beih thin avangin an chak loh i phal ngai lo a ni tih hi theihnghilh loin, i hminga ka nun hi bei ve turin min pui ang che, Amen. Ti ang aw.

Follow tih a hnuaia inziakah khuan i click dawn nia.