Ka New Year Resolution Chu Pathian Thuawi A Ni

"Kei i hmaah ka kal ang a, a bumboh laite chu ka tirual ang: dar kawngkhârte chu ka tichhe rem rum ang a, a kalhna thir tlawnte chu ka tibung ang."(Isaia 45:2)

2018 kumah leh i nun kal tawhah e nge i buaina? Eizawnna ah i buai emaw, ruihhloah i buai em, ngaihzawngah i buai em, in nupa kar a buai em, chu bakah i chhungkua zing amite leh i lam hnaite an buaia in in hnaih em avangin, i buai tel ve em. Eng kawngah pawh buai la, nakum chu chutiang chuan ka ti a nga a fel ang i tih vang ringawt khan a fel mai dawn lo. Naktuk in her chho- zel hi nakum kan tih hi a ni maia, zanina i buaina kha naktukah a kiang duak mai dawn lo tih hi i hre sa ang. Mahse, kan nuna buaina lo kalte hi, an awm reng ngai lo tih erawh kan hriat a pawimawh awm e.

Ni e, nakum a nih vang ringawt hian, thil a fel duak dawn loa, kan nuna buaina te hi, kan tih kian dawn chuan kan beih a, kan tiha, kan thawh (process) a ngai a ni. Chu kan buaina leh harsatna kan beih (process) dawn a nih chuan, hneh ngei ngei tura beih dan kawng a awm a, chu chu Pathian thu awi hi a ni.

Hetiang a nih avang hian, i kum thar thutiam chu ruihhlo sim, thinrim tlem, hun vawn dik etc, a nih ringawt chuan i chhungrila i harsatna takte kha, siam that a ni chuang lo a nga, i buaina ngaiah bawk i buai leh theia, i buaina ngaiah i buai a nih loh pawhin thil dangah i buai tho tho ang. Chu vang chuan, chhungril atanga i buaina kha i hneh theihna turin, "ka tum hmasak ber chu Pathian thuawi a ni a, hei vang hian ka kumthar thutiam chu Pathian thu awi a ni ti ang che."

Tin, Pathian thu kan awi dawn chuan, amah kan hriat a ngai a, amah kan hriat theih nan, a thu kan hriat a ngai a, amah kan biak a ngaia, amite nen a hminga inpawl khawnna kan neih thin a pawimawh bawk a ni. Chungte chu kan tih theihna tur chuan, hun hran bik siamin bible kan chhiar a ngaia, tawngtai hun siamin kan tawngtai a ngaia, heng hun kan siamah te hian thil dang engmah tih loh kan tum a pawimawh bawk awm e. Kan Pathian hi a lian em ema, a thu hi mi pakhatin kan hre kim zolo tih hi kan hriat renga, kohhran inkhawmah nasa taka kan tel a pawimawh bawk a ni.

Hetianga, Pathian thu kan zawm chuan, a nin kan indonna chu min hnehsak dawn a ni. 

2019 ah hian, i indona kha nangmahin beih tum tawh lo la, engkim tithei, indonna zawng zawng hnehtu Lalpa beih tir tawh zawk ang che, chutianga Lalpan i indona a beihsak chea, a hnehsak theihna tur chein, "i theih tawpin Pathian thu zawm turin inbuatsaih rawh le."

(Tawngtai Dan Tur)
Lalpa, i mite buaina chu ka buaina i tia, mite indonna chu ka indonna i ti a, mite chu an buaina zawng zawng atang i chhanchhuak thina, an indonna zawng zawng i hnehsak bawk thin a ni. Keipawh kumthar 2019 ah hian, i mi ka niha, i thu nasa zawka ka zawm theihna turin min pui ang che, Amen. Ti ang aw. 

Follow tih a hnuaia inziakah khuan i click dawn nia.

Lalpan A Kalsan Dawn Lo Che

"Tichuan, vante khian a felna chu a tlangaupui ang, Amah Pathian ngei chu rorêltu a ni si a."(Sam 50:6)

Pathian hian tumah hi alo kalsan ngai loa. Israelte kha a hnam thlante an ni a, a kalsan ngai loa chu chu a awm pawh a awm a. Mahse, Aigupta te, Suria te, Philistia te, Babulon hote kha ringlo hnam ni mahsela a kalsan chuang lo, an chungah ro a rel zui zel a ni. 

Pathian hian a thu zawm leh zawm lote hi khawngaihna nen a en renga, an chungah ro a rel thin a ni. Kan thiltha tih emaw, kan sual tih emaw te hian rah chhuah a nei thina, a rah chhuah dawn hmaih an awm ngai lo a ni.

Hetianga Pathianin ro a rel hi mi tam tak chuan, e nge a ngilneihna teh vak chuang an ti thin. Kan Pathian ngilneih zia leh that zia chu, vawi engzat pawh tisual mah ila min la pawm duh zel lai tak hi a ni. Chu mai pawh chu a nilo, eng anga misual pawh hi, inchhira a hnen an pan chuan hmabak thar tha em em a pe zel thin a ni. Mihring zawng zawng hian kan chunga vawi sang tamtak tisual tawhte hi, an nun inthlak mahsela kan ngaihdam fithlak thak theih a rinawm loha, lo ngaidam ta pawh ni ila thatna kan lan tir lehzel theih a rinawm tawh lo a ni. Hei tak hi kan Pathian chuan a tih hmaih ngailo thung a.

Tisual inchhira a hnen lam pante chu a ta an nih tawh avangin, kan Pathian hian nun thar a pe thina. Mahse, tisual a hnen lam pan lote chu an sual man sualin a pek a phal thina, a ta an nih loh miau avangin.

Hei vang tak hian, kum thar kan lawmna turah pawh hian fimkhur ila, tin Lalpa fak leh a hnena tawngtai chunga kum 2019 bul tan tluka tha a awm lo ang.

(Tawngtai Dan Tur)
Lalpa, sual man tel ai chuan i thuawina rah dawn hi a tha zawk a ni tih hre renga i thu zawm chunga 2019 bul ka tan theih nan min pui ang che, Amen. Ti ang o.

Follow tih a hruaia inziakah khuan i click dawn nia.

I Kawppui Zawnnaah Khan, Lalpa Rinawm Zia I Theihnghilh Ta Em Ni

"Pathian chu dawt hmang mihring maia ni lo, Lamlet hmang hringfa a ni hek lo. A sawi tawh chu a ti lo vang em ni? A lo sawi tawh chu a tipuitling lo vang em ni?"(Numbers 23:19)

Hei hi han inzawt teh le, "Hei leh chen hruaitu che leh kawng zawng zawnga hruaitu che kan Pathian hian, i kawppui zawnnaah pawh a hruai loh che i ring ta em ni." 

Nu pumchhunga a awm lai atang ka enkawla, ka enkawlna hnuaiah a seiliana, a lehkha zirna/hna a thawhnaah pawh ka hruai zela, mahse a kawppui zawnnaah hi chuan ka hlamchhiah dawn, a tih mai che i ring em ni.

A dika mahse, ka na tam tawh em mai, ka tawngsual nasa tawh lutuk a, rin ngaihna ka hre tawh loa, kal ngaihna ka hre thawh lo i ti em? Heng zawng zawngte hi Lalpa nghak hman la chuan i tawng lo tur a ni, mahse i thiam loh a ni ber lo a nia o!

I thiam loh a nih ber loh chhan chu, kan hmelmapa hian maw! Lalpan engkim a pek ang che bawk hian, kristian chhungkua tha em em a pe tawh chea, chu mi chu Lalpan a pek che avangin i ta ngei tur a ni tih a hriaa, chu chhungkua to chhuak tur chu a duh loa, chu chhungkua chu a indin tawh chuan beih a har dawn a ni tih a hriaa, chu vang chuan kristian chhungkua i dinna tur kawngah khan a rawn tibuai che a nih kha!

A tir berah chuan, ka hmanhmawh lo ang i ti thin tiro, Lalpan a thlen tir duh hun tak chu ka nghak mai ang i ti thin tiro. Mahse, engtin tin emaw hmelmain a bei che a, a hmanhmawh tir ta chea, Pathian rawn chu sawi loh nangmah ngei pawhin chik takin i ngaihtuah hman loa i tisual ta a ni em. I thiante leh i bul hnai a miten an neih avangin neih hmanhmawh turin a tur thin che tiro, i thinte kawng leh i kawng kha a inanglo tih hre rengin, hmelmain a beih che avangin i hmanhmawh taa i buai a ni em? 

I buaia, i naa, i thinlung a thlera, kal ngaihna i hre tawh lo a nih chuan, kal leh dan tur ala awm tih hi lo hre rawh. Chu i kal leh dan tur chu "Lalpa ka ring che, kei chu a hnungah nang ka hmaah, min hruai dan danin ka kal ang" tihna nunah chuan lut la, Lalpa hruaina hnuaiah chaktakin tlan rawh le. Lalpa thuawi chu nghah theih a ngai e, hun a duh rei e te kan ti thin, mahse Lalpa nghaktute hi an nghak mai mai emaw, engmah tiloin an awm emaw kan tih lai hian, Lalpan a tlan pui thin a ni.

He tianga an nghah lai hian, midangin kum 10 kawppui an neih hnua an man thiam chauh turte chu, Lalpan a man thiam tir thina, fa tleirawl leh fa puitling enkawl dan tur thlengte chu alo zirtir thin a ni. Hei hi hria la, Lalpa thu i zawm khan i tlan a ni, i tlan.

I kawppui zawn kawnga nangmah ti hreawmtu, ti beidawngtu che i hmelma sual hi i bei let dawn em? Beih let i duh chuan, Lalpa thu zawm tlat la, i bei let a ni mai. Hei hi hria ang che "Lalpa, thutiam hi a lan mai loh pawhin a thleng tho tho thin a, nghak leh rawh le."

(Tawngtai Dan Tur)
Lalpa, kristian chhungkaw duhawm tak min tiam chu a hun taka min pek dawn avangin ka lawm e, chu chhungkua chu ka neih theih nan, chu chhungkua neihna kawnga min hruai lai hian ka pensan lohna turin min pui ang che, Amen. Ti ang aw.

Follow tih a hruaia inziakah khuan i click dawn nia.

TICHUAN AN KAL THUAI THUAI A

               
 
"Tin, heti hi a ni a, vantirhkoh chuan vâna a kalsan ve leh beram vengtute chuan, "Tunah Bethlehem khaw thlengin kal ila, Lalpan thu min hrilh lo thleng chu i en ang u," an ti a. Tichuan, an kal thuai thuai a, Mari nên Josefa nên, ran chaw pêkna thlenga nausen mu nên chuan an hmu a (Lk.2:15)."

Lal Isua pian thu vantirhkohvin Berampute kher kher a hrilh hmasa ber kha a mak ka ti a. Jerusalemah pawh khân, mi lian zâwk te, mi hausa leh thunei zâwkte pawh an tam awm vei nên, tin, sakhaw mi țha zâwk te pawh tam tak an awm a, chûngte chu hrilh hmasa se lukhawng a neih zâwk a rinawm vei nên,  mahse, mi chhe zâwk, beram venga inhlawhfa mai mai a hrilh hmasa ber kha a mak khawp mai. Mahse, vantirhkoh chuan a thusawi hlawkpui thei nghal mai tur mi a hrilh hmasa duh tlat a ni.
        
Vantirhkohvin Berampute chu Chhandamtu pian thu a hrilh zawhah vânah a kal san leh a. Vantirkohvin a kalsan ve leh chuan berampute chuan, "Tunah Bethlehemah chuan kal ila, vantirhkoh min hrilh kha i en ang u," an ti a. Engmah daltu leh laklawh pawh insiam lovin, an kal nghal ta mai a, an kal thuai thuai a, Bethlehem chu an thleng thuai a, nausen chu an va hmu a, chibai an bûk a, nun thar neiin Pathian fak leh chawimawi chung zelin an kir leh a nih kha. 

Sakhaw mi țha te, khawpuia mi ropui zâwk te leh thuneitute kha hrilh hmasa se chuan, vantirhkoh hrilh angin an ti ve nghal mai lo tawp ang. Chhuan lam an siam ang a, laklawh an nei ang a, kalsan phal loh tam tak an nei ang a, Bethlehem ran ina nausen piang hmu turin tê tâwkin an inhre lo mai thei bawk. Mahse, Berampute erawh chuan engmah kalsan tûr uihawm an nei lo mi beram an ven hlawhsakte kha bo vek sela chuan, an buai ve viau ang mahse berampu nih aia dinhmun hniam kha a awm hranpa tawh loa an beram bo ai an thain an rul leh mai dawna, berampu tho an ni leh dawn tihna a ni. 

Chu vang chuan lak lawh pawh an nei lo, chhandamtu mamawh ngawih ngawih khawpa dinhmun hnuai hnung an ni a, a lo piang tih hriattir an nih chuan châk takin, hmu turin an pan nghal thei mai a ni. 
       
Kan ramah pawh hian Pathianin thlarau pawlna thara a thu a hriattirte chu, zâwm nghal mai thei tûr a duh thawh tawh ber a. Uire suh tih a hriat ruala uire tawh lo mai tur mi, hlep ru suh tih a hriattir ruala hlepru tawh lo mai tur mi, ru suh tih a hriattir ruala ru tawh lo mai tur mi Lalpan thlarauva a pawl thar tur chu a zawng ta ber a ni. 

In sa sang laklawh, hlepruk leh deuh la ngai ang chi te, dawt sawi leh ziaha sum pai hmuh belh tur hre laklawh te, sum hmanga mi rethei vote lei dan thiam laklawh tawh lal la tum mêk tan te, ngaihzawng nêna nawm chen thlang laklawh te, zu zawrh hlawkna hmu laklawh te leh zu ruih nawmna tem laklawh tawhte tan chuan, tun țum Krismas-ah pawh hian, Bethlehem khaw thlenga kal thuai thuai a, nausen chibai buk a, nun thar nêna hlim taka Pathian fak leh chawimawi chu a harsa ngawt ang. 

Pathian pawhin hrilh hmasak chi turah a ruat  rinawm loh. Chutiang mite chuan a thu chu hre mahse an mahniah laklawh rih a tam țhin em avângin an zâwm nghal thei mai ngai lo va, nakin deuhva la zawm atan an dah țha ang a, țhen khat chuan zoram thar thlen huna la zawm tur emaw an tih chauh hmel.
         
Nang leh kei erawh chu kan va vannei em!  Pathian thlarau hriattirna azarah engmah hi nausen Isua kan hmuhna tur daltuah kan hmang phal lo thung a. Khawvel ropuina leh lalna te, hausakna leh nawm chenna te chu Lal Isua aiin kan ngaihlu lo zawk daih thei hi kan vannei hle mai. Berampute ang khân tun țum Krismas-ah pawh khan Bethlehem khaw thlenga kalin, nausen Isua chu chibai kan buk a rinawm a. Thlarau pawlna thar kan chan takte kha theihnghilh mai lovin zawmzel i tum ang u.  

(Tawngtai Dan Tur)
Lalpa, i thu ka hriat ruala laklawh awm loa zawm nghaltu ka nih theih nan min pui ang che, Amen. Ti ang aw.

Follow tih a hruaia inziakah khuan i click dawn nia.

HMUA LÂWM APIANG MI VANNEI BER

"Ani chuan a lo kuang kuah a, Pathian a fak a, ....I chhandamna mi tin hmuha i siam kha ka mitin a hmu ta e."(Lk.2:30)
       
Krismas hlimawm tak kan lo hmangzo leh ta. A țha zawnga hmangtu mi tam tak kan awm rualin, a țha lem lo zawnga hmangtu pawh tam tak kan awm ngei ang. He hunpui hi, Zu nen, drugs nen, hmeichhiat mipatna nena hmang liam ve leh ringawt mi tam tak an awm a rinawma. Mi tam tak chuan thil țha aiin thil țha lo an paw chhuak leh ngei bawk ang.
       
Kan ramah hian Hiv a pung tulh tulh a, kan Krismas hman hun chhûngte hian Hiv chuan nuam a lo ti ve ngawt ang chu. In thlah punna hunpui an hmang ve a ni ngawt mai dawn si a. Kan ramah hian Sorkar phalnaa Zu dawr a awm chhung khan Sorkar phal loh Zu zawrhna pawh a tlangnel zo vek a. Țhalai zu in țhin ten lungmuang takin zu an in a, in ngai lo tam takin an in thar phah bawk a. Țhalai thihna a nasa hle bawk a. Țhalai kum 20 - 40 inkar, 40 chuang deuh te pawh, 'Thin țha lo' vangin kan vui liam zung zung a. Kan țhat lai hun hi kan hrisel ber hun tur zawk a nih reng laiin, thin țha lova thi tam ber hun lai a ni ta sia. 

Sorkar zu zawrh lai khan, Zu manah hian nitin nuaih 60 vel hmang ang kan lo ni daih mai. Ni khatah nuai 60 a nih chuan, thla khatah nuaih 1800 a tling a, kum khatah chuan nuaih 20600 a ni ta daih mai. A lo râpthlâk em a ni. 

Hetiang a nih chuan Mizoram pawisa hi Vai zu lei nan kum khatah kan lo va thawn liam tam em! Tin, chutiang man zo zai kan in ral a nih chuan, thihna a thlen nasa lo thei lo va. Zu zungzamin kan țhalaite a ei chhe zui zel ang tih a hlauhawm hle. Hiv/aids in min ei hlum tam tulh tulh dawn a, Zu ei hlum kan tam tulh tulh bawk dawn. Thim thuah hnihna dang lo thlen vak pawh a ngai tawh lo. Zu leh Drugs, Aids-ten kan ram chu kum sawmhnih/ sawmthum lek chhungin min suat thawl hawk dawn a ang hle.
     
Hetiang hun a nih lai mêk hian, kei leh nang erawh chuan Krismas hlim taka hmangin, nausen Isua chibai buka, thlarau lam nun hlâwk nan he hunpui kan lo la hmang thei bik hi kan va vannei tak em!

Putar Sumeona pawh khân nausen Isua a hmuh khân, a kuangkuah a, a lawm em em mai a. "I chhandamna mi tin hmuha i siam kha ka mitin a hmu ta e," tiin Pathian a fak a nih kha. Putar vannei ber a lo ni ta ang khân,  keini pawh Krismas hmangtu tak takte zinga kan tel phâk hi kan va vannei em! 

Lal Isua hmua lâwm apiangte chu mi vannei ber kan lo ni.

(Tawngtai Dan Tur)
Lalpa, ka tih niloin nangma thatna vangin krismas tak tak nangma Lalna krismas min hman tir avangin ka lawm e. Nitin a nangmah lawmtu ka nih theihna turin min pui ang che, Amen. Ti ang aw.

Follow tih a hnuaia inziakah khuan i click dawn nia.

Mi Tin Beiseina Ni Tura A Rawnkalna Champha Chu Krismas Hi A Ni

"Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zelin, mitthi zing ata Isua Krista thawhlehna avangin beiseina nung hmu turin min hring leh a."(I Petera 1:3)

Mi tin, tih awm zia chu mi zawng zawng tihna a ni a. Mi tin kan tih hian, mifelte, misualte, mi lungngaite, tual thatte, hurna sual a tlute, mi bum hmangte, mi hausa leh retheite etc, kan kim vek a ni. 

Tu pawhin engpawh lo ti tawh mah ila, eng dinhmunah pawh ding mah ila, kan chunga thiltha zawk thleng turin kan beisei thei theuha.

Chu kan beisei theih chhanchu Isua Krista hi a ni. Chu beiseina a lut tur chuan, amahah kan awm a ngai bawk a ni.

Tho ila, Kristaah kan beiseina i siam thar ang u.

(Tawngtai Dan Tur)
Lalpa, nangmahah ka beiseina nghah nachang ka hriat theih nan min ti fing la, mihringah beiseina nghat loa nangmahah chauh beiseina ka nghah theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Krismas Hmang Nuam Berte

"Tin, beram vengtute chuan vantirhkoh hrilh ang ngeia engkim an hmuha an hriat avangin, Pathian chawimawi leh fak chung zelin an kir leh ta a."(Luka 2:20)

Isua pian hun kha Krismas hmasa ber a ni a, Krismas hmasa ber nuam taka hmangtute chu:

1. Mari leh Josepha, Isua nu leh pa ni turin mawhphurhna an nei a, midang zawng aia neitu nihna an changin a hriat awm e, vawin ni thleng hian Pathian rawngbawltu, a rawngbawlnaa mawhphurhna neite hian midang aiin Isua an hnaih thin a ni.

2. Retheiin hnuaihnung em em mahsela, Pathian an beiseina bansan duh ngailo beram pute khan, Krismas hmasa ber kha an hmang nuam a ni, ei tur tha tha emaw, khawvel nawmchenna hmangin emaw an inti nuamsa phalo, chu aia nawmsakna sang zawk, van thlarauin a chen chilha, nuam ti em em in kha hun kha an hmang ta a ni.

3. Dinhmun sang takah ding mahsela, inngaitlawm em ema an Lalpa hmaa thingthit thlangtu khawchhak mifingte pawh kha an lawm a ni, heng mifingte hian thutiam (prophecy) hun rei tak an nghah tawh a rinawm, chu thutiam fa Lal Isua Krista hmutua an han tang kha an lawm em em a ni. Tun thleng hian, Isua hmutu lawm lo an la awm ngai lo bawk a ni.    

Krismas hman nawm tum si hmang num hleitheilo tam tak hi hmuhte pawh ka hmu ve ta in ka hria, Pathian telna ni hauh loa hlim kan han tum hi chuan, hlimna hi kan ban phakah reng reng a awm thei ngailo a nih hi. 

Krismas chauh loah pawh kan nun pum puiah hian, Isua hmanrua nih tum ila, nun hi harsa thin mahse amahah beiseina nghat tlat ila. Tin, kan dinhmun a hnim emaw a sang emaw, kan Pathian hmaah thingthit hreh ngai lo bawk ila, nitin hi Krismas tluk zetin kan hmang nuam dawn a ni.

(Tawngtai Dan Tur)
Lalpa, nangmahah hlimna ka hmuh theih nan, engtik lai pawha i hamrua ka nih theihna turin leh ka beiseina i hnena ka nghah zel theihna turin leh i hmaa kun a thingthi tlat zel thei turin min pui ang che, Amen. Ti ang aw.

Follow a hnuaia inziakah khuan i click dawn nia

Krismas Awmzia Leh I Lawm Dan Tur (Part 2)

"Tin, in chhungah an va lut a, a nu Mari hnena naute chu an hmu a, an bawkkhup a, chibai an buk a; tin, an ro bawmte an hawng a, a hnenah chuan lawman – rangkachak te, beraw te, murra te – an pe a."(Matthaia 2:11)

Krismas awmzia dik taka hmanga ka hriat leh an inpekna ropui ka tih em em chu, tudang ni lovin chanchin tha min rawn hrilhtu missionary te kha an ni. 1890 bawr vel khan min rawn chenchilh tana kha mi hun lai khan an ram lam chu nasa takin hma an sawn tawh a, tunlaia mizo te kan khawsak ai mah pawh hian an khawsak kha a sang tawh a ni. Industrial Revolution a nasatna hmun chu Europe a ni a, kan missionary te hi an rawn kal lai hian an ram Wales chu Europe ah pawh a hmasawn chak (advance) pawl an ni. Mizo ramah erawh industrial revolution hi thlen pawh ala thleng lova, keimahni ai an dinhmun a sang fe tawh zawk tih a hriat mai awm e.

Kan dinhmun inthlauh zia hi kan thianpa pakhat sawi chu ni se, "kawr hak nachang kan hriat hma daihin, Krismas tree an lo chei lauh lauh tawh" a tih ka ring.

Chutiang khawp a dinhmun sangte chuan keini mizo hnam mawlte bulah khan. chanchin tha avangin Krismas an hmang thin a , Lal Isua hi an lo lawm (celebrate) hle a ni. Ka ngaihtuah chian hian, Krista vang nilo se, Mizo hnam bal lutuk zingah khan Krismas hman kha an duh bik a rinawm loh a, Krismas cake leh pudding siam chu sawi loh, Krismas chibai tih awmzia pawh kha Mizo te khan kan hre awm der si lova.

An ni Krista pasaltha (chanchintha min hrilhtu missionary) te hian, Krismas dik tak Isua lalna Krismas hi lo hmang lo sela chuan, keini mizo te hi tuna kan dinhmun kan thlen phak a rinawm loh a ni. 

Khawchhak mifingte kha, Maggie an tia, chu chu lal tihna a ni mi thenkhat chuan an ti a. Chung lal pathum te chuan, engkim zawng zawng chunga Lal, van Lal thutthlenga thua rorel thintu Lal Isua Krista chu, mihringte a hmangaih avanga, tlawm taka ran thlenga a mu chu an rawn hmuh khan, an finna leh an lalna zawng zawng an theihnghilha. Tin, an hunlai khan lal te hi an mahni in an zin ngai lova, sipai eng emaw zah an hruai a rinawm a, lal Heroda pawh khan tha takin a bia tih pawh kan hriat kha!

An sipaite hmaah khan, an sipai ten mawl an tih pawh an hlau lo, van Lal tlawm taka ranthlenga rawn mu kha an ni ai a ropui a ni tih an hria a, an hmaah thingthi lo thei lovin an inhriaa, thingthiin chibai an buk a nih kha.

Keini pawh hi, he hunah hian, Krismas neitu kan Lalpa Isua Krista hmaah hian, i thingthi ve ang u.

(Tawngtai Dan Tur)
Lalpa, krismas dik tak ka hman theihna turin, i hmaah thinlung inngaitlawmin, ka rawn thingthi e. Amen. Ti ang aw.

Follow tih a hnuaia inziakah khuan i click dawn nia.

Krismas Awmzia Leh I Lawm Dan Tur (Part I)

"Fapa a hring anga a hmingah ISUA i sa ang: ani chuan a mite an thil tihsual lakah a chhandam dawn si a," a ti a."(Matthaia 1:21)

Krismas awmzia hi, rui theh a niloa, kawrthar neih a niloa, chhungkua inngaihtaka hlim taka awm lam a niloa, midang hnena duhsakna leh chibai sem a niloa, ei tur tuihnai ber ber ei lam a niloa, mahni in leh hmun dang (public place) chei lam a niloa, ngaihzawng neih lam a ni bawk hek lo. 

Hengte hi kan lawm dan tlang lawn chu a ni a, bible thu nena inkalh a kan nung te a nih loh chuan eng ang pawhin lawm ila kan tisual chuang pawhin a lang loa. A chhanchu Remna Lal (King of peace) pianchhampha a ni miau a, chu Remna Lal chuan he Kristmas hunah hian, hlimna min pe (offer) tel ve hrim hrim alawm ti ila kan sawi sual chuang lo ang.

Mahse, a awmzia tak tak hreloa, a lawm loh lam tur zawk lam kan lawm chuan, eng ang pawhin hlim tehchai mah ila Kristmas awmzie nei lo kan hmang tho tho dawn a ni.

Krismas awmzia tak chu, van Lal fapa, van Lal thutthlenga thu, van angil leh vantirhkohho ten an fak nin loh leh an ui ngawih ngawih kan Lalpa Isua Krista chu, he leia misualte min chhanchhuak turin. A Lal thuthleng atang thoa, he leiah nangma tan ngei, a ropuina zawng zawng kalsana hnuaihnung taka mihring anga a rawn pianna champha a ni.

Chu Lal Krista chu, Krismas a awm chhan a ni a, he Krismas hi ama ta a ni. Krismas neitu Lalpa Isua Krista hi, he hunah hian kan lawm (celebrate) a nih chuan Krismas dik tak kan hmang a ni ang.

(Tawngtai Dan Tur)
Lalpa, Krismas dik tak ka hman theih nan, Krismas neitu nangmah ngei ka lawm theihna tur che in leh thinlung inngaitlawma chibai ka buk theihna tur che in min pui ang che. Amen. Ti ang o.

Follow tih a hnuaia inziakah khuan i click dawn nia.

Kawppui Tha I Duh Chuan, Ruahman Lawkna Nei Ang Che

"In hnena kan awm lai pawh khan he thu hi kan pek che u kha, “Tupawhin hna a thawh duh loh chuan ei pawh ei suh se,” tih hi."(II Thessalonika 3:10)

Mi thenkhat chuan, kawppui an zawnin an hmuh hmasak sak an pawm ve mai thina, an tisual chawk thin a. Chu mai pawh chu a niloa, kawppui an zawnna chungchangah ruahman lawkna leh ngaihtuahna an sen loh lutuk avangin, an nghet thei ngai lo bawk thin a ni. An ngheh loh avang chuan, ngaihzawng pakhat aia tam an nei thin a, mitha chuan chutiang anga nun mai mai chu an duh loh thin avangin a tawpah chuan, mi pangngai vak lo nen an in kutsuih leh nge nge thin. Kan bible chuan “Tupawhin hna a thawh duh loh chuan ei pawh ei suh se,” alo ti a, hetiang ang chiah hian, kawppui neih chungchanga ruahman lawkna (plan) nei lo chu tluan pawh an tluang mawh hle a ni.

Tin, mi thenkhat chuan, ruahman lawkna pakhat chauh an nei thina, eizawnna lam chauh emaw, mihring thatna chauh emaw, rawngbawlnaah chanvo an neih leh neih loh emaw, mi hmingtha an nih leh nih loh emaw chauh an ngaihtuah thin a. An duh ang kawng khat, an kawppui tura an thlan chuan a neih chuan an lungawi maia, tichuan ruahman lawkna dang em em pawh an nei leh hran loh thin avangin an buai leh tho tho thin a ni.

Ni e, mihring pakhatah hian thiltha hi a kim dawn lo hrim hrim a, hei vang tak hian Pathianin nupaa insiam turin min ruat a nih pawh a rinawm a. Tihian, ruahmanna han siam chin teh ang, kan kawppui tur chu eizawnna la na mi a nih chuan, chhungkua enkawl lamah kei chu tan lak ka ngai a ni emaw, kan kawppui chu rawngbawlna a buai thin mi a nih chuan eizawnna leh chhungkaw enkawlah tan ka lak a ngai emaw, kan kawppui chu mi tha em em a nih chuan keiman thutlukna ka siam a ngai emaw, kan tih a ngai a ni.

Hetiang hian, ruahhmanna tha tak, mihring takin a siam theih a, siam pawh kan siam ngei tur pawh a ni. Mahse, heng ruahmanna chungah hian Lalpa kan dah lal ber lo a nih chuan, kan buai leh tho tho ang. A chhan chu, thawkchhuaktuin ka thawh chhuah a ti chhen theia, rawngbawltuin rawng a in tibawl mah mah theia, mi hmingthain a intithei viau thei bawk. Hei vang hian, kan ruahmanna lu berah chuan Lalpa kan dah hmasak ngei ngei a pawimawh a ni.

Pathian nena inkungkaihna neitu nge nge te hi an inzir thei thina, Pathian nena inkungkaihna neitu chu a retheih pawhin a buai chungloa, a hausak pawhin chutiang tho, a thawh nasatin a phun chhiar kher loa, a tihsual palh pawhin ngaihdam dil a hreh ngai lo bawka. Hei vang hian, Pathian nena inkungkaihna nei mi hi kawppuia kan zawn a pawimawha, keini pawh hi Pathian nena inkungkaihna kan neih a pawimawh bawk a ni.

(Tawngtai Dan Tur)
Lalpa, kawppui ka zawnnaah hian ruahmanna tha siam nachang ka hriat theihna turin min puila, chu ka ruahhmanna siam luber leh bulpui berah chuan nang ka thlang chea, nangin min hruai ang che, Amen. Ti ang o.

Follow a hnuaia inziakah khuan i click dawn nia.

MI NAWLPUI KAL BAK KAL RAWH

"Tin, Isuan a zirtirte hnenah, "Tupawhinmi zui a duh chuan mahni hreawm pawisa lovin, a kraws puin mi zui rawh se."(Matthaia 16:24)

Lal Isua hi a mai maia zuitu te hnenah a inpuang ngai lo.

Tihdam rawngbawlna a neih avangin Matthaia 4:25 ah chuan khawpui hrang hrang atang mipui tamtakin Isua an rawn pan kan hmu a, mahse 5:1 ah khan chung mipuite chu a hmuhin tlangah a lawn san ta daih a ni. Isua hian lo tih dam diak diak awm ka tia mahse tlang lamah a chhoh hian chhan tha tak a nei a ni.

Chuti chuan a zirtirten an rawn zui a chutah chuan a zirtir ta chauh a ni.

Ka sawi tum chu hei hi a ni Mipui nawlpui baka pantute hi alawm Isua'n thu te a zirtir a, a pawl fo thin ni. 

Tin, matthaia 9:27-30 a mitdel pahnih a tihdam te pawh kha an intawn rual rualin a ti dam lo. Lal Isua chu an zui zel phawt a, chutah pawh, "Ka tih dam theih che u in ring em" anla ti tete a, ringlo sela kha chen chen an zui dawn loh tehreng nen.

Chuvang chuan dan narana Lalpa zuitu ni lovin, tih takzeta a hnung zui hi avan pawimawh em. Mi nawlpui pan baka amah pantute hnenah a inpuang thin a ni.

Mi nawlpui kal bak i kal chuan mi nawlpui hnena a inpuan bakin i hnenah a inpuang ang.

Tlangah a lawn chhoh kha. Tlang kawng chu a khawkrawk a, lung pawh a tam anga, a chho bawk a, a hahthlak ve hle maithei. Mahse tha thlah lova pan zel a ngai thin a ni. Chumi hmun ngeiah chuan amah hre thawi tu mai ni lovin amah hre chiang tu, leh a thiltihtheihna hmufiah takzettu (experience tu) kan lo ni dawn a ni.

(Tawngtai Dan Tur)
Lalpa, ka hriat chian tak zet theihna tur chein, tha thlah loa engtik lai pawha, ka zui zel theihna tur chein min pui la, chu mai bakah ka nuna nasa taka i thawh hnuah pawh, hriat chian lehzual che hi kava duh em tia, i hnena thingthia tawngtai fo turin, nangmah hrechiang leh zel tura ka tuihal theih nan min puila, ka nunah chutiang chuan thawk bawk ang che, Amen. Ti ang o.

Follow tih a hnuaia inziakah khuan i click dawn nia.

TUNGE ROPUI BER? (Kingdom of Heaven)

"Tihtakmeuhvin ka ti a che u, in lamleta, naupang te ang in lo nih loh chuan vanramah(kingdom of heaven) in lut tawp lo vang."(Matthaia 18:3-4)

Chutichuan, tu pawh he naupang te anga inngaitlawm apiang, chu mi chu vanramah (Kingdom of heaven) chuan a ropui ber ang.

Lalpa ringtu te hi hming mawi tak tak leh duhawm tak tak a koh kan ni thin a, beram tih ten etc. Mahse, naupang (Children) tih a koh hi kan nih tamna ber a ni. (Pathian fate) "Children of God, children of the Lord, children of the promise etc." 

Tichuan he thudik avang hian kan lawm a kan hlimpui em em thin: 'a fate kan ni' tih hi. Ani chu kan Pa a ni a, keini a chhungte kan ni. Avan lawmawm em. Mahse children anga min sawi hian chhan dang ala nei a ni. 

Naupang chu a chak lova, a fing tawk lova, theihna a nei tlem a, a tling lo em em. Pathian kan mamawh zia a ti lang a ni.

Naupang chu zirtir a nuam a, hria a inti lova, kaihhruai a theih a, duh duhin a tihkual theih a ni. 

Hetianga naupang ang chiaha kan inngaitlawm lo a nih chuan LALPA Van Lalram (kingdom of heaven) ah hian kan ropui ngai lo ang a, rawngbawlna ah kan effective ngai lo bawk dawn a ni. 

Thuthlung tharah chuan chapo hi thil hlauhawm ber pawl a ni. Thil tihsual chu Pathianin a ngaidam thei a mahse chapote chu Pathian hian a dodal hmiah mai a ni.

Naupang ang maia Pathianin a duh duh a, a hruai kual theih nih thar hi kan duh ava pawimawh em.  

Lalpa mit hmuhin inngaitlawm rawh u; tichuan, a chawimawi ang che u. (Jakoba 4:10)

(Tawngtai Dan Tur)
Lalpa, thinglung tlawm i duh anga i hruai theih, thinglung chu ka mamawha, chu thinlung tlawm chu kawngaihin kei misual hi min pe ang che, Amen. Ti ang o.

Follow tih a hnuaia inziakah khuan i click dawn nia.

A Koh Chhan Che, I Tih Theih Nan A Veng Him Zel Ang Che

"A ni, thihna hlim kawr ruam zawh mah ila, thil tha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan thin a ni."(Sam 23:4)

Zanin chu, inkhawm ka duh avangin hman hmawh takin bike'in ka tlan haw a, kawngkual un em em chhuk bawk si ah hian, hmun min kian mahna ka tia, ka hmaa truck full load chu lehpelh ka tuma, mahse vanduai thlak takin, ka bike ke chu nasa takin a slip a, truck pawh chuan two wheeler a ni bawka kan side a nge min ti chuang bawk si loa. Ka hlau lutuk chu, awrawl chhuah meuhin ka au a, tah tak chuan mak deuh maiin track hnung lamah chuan ka kual hlawl maia. A mak zualna lai chu, truck chanve deuh thawh chu ka thleng tawh sia, engtin nge a hnungah chuan ka insawn maitheih lai tak chu a ni. 

Pathian kawngaihna avangin him takin biak in chu ka thleng taa, biak in a thu chungchuan hei hi ka ngaihtuah chuaka "Pathian hian min hman duhna a neih vangin, hei leh chen hi min hum a ni," ka ti taa. "Jesus take the wheel" Carrie Underwood'i hla te pawh min ti hre chhuak nghe nghe a.

Bible kan en pawh hian, Mosia khan tual a thata, a hmelhriat tumah awm lohna ramah ava tlana, mahse Lalpan hman duhna a neih avangin a nun a venghim a, chutiang bawkin Josepha te, Jacoba te, chu mai bakah Israel hnam pumpui te pawh hi tunthlengin an la awma, an hunlaia an mahni aia hnam lian zawk, Aigupta te, Philistia te, an ral vek tawh laiin an ni chu an la awm reng a.

Nang pawh, ila awm rengna chhanchu Lalpan hman duhna che ala nei a ni. I inchhir ngai lohna turin Lalpa kawngah kal rawh o!

(Tawngtai Dan Tur)
Lalpa, kei misual hi min la hman duh avanga, tun thlenga ka chunga zah i ngaih avanga min humhim thin hi, ka lawm a, lawmthu ka hrilh a che. Ti tura min tih chu, ka hriat theihna tur leh ka tih hlawhtlin theih nan i kawng zawh tlat thei turin min pui ang che, Amen. Ti ang o.

Follow, a hnuaia inziakah khuan click rawh o.

I Awmna Tur Taka I Awm Thin Chuan Ila Dingchhuak Ang

"I biak in hung chhûng kawtlaia ni khat awm hi, ni sângkhat aiin a ṭha zâwk si a. Suahsualna puan intea awm ai chuan, Kan Pathian ina kawngkhâr vêngtu nih pawh ka duh zâwk a ni."(Sam 84:10)

Awm lohna tura awm palh pawi zia kan sawi chamchi thina, awmna tura awm pawimawh zia erawh kan sawi thlenglo fo thin. Tunlaia a tu atan pawha awmna tha ber chu, kan kohhran biak in a nia, a dawtah chuan keimahni in theuh hi a ni ti ila kan sawi sual awm lo e.

Bible lamah han lut ila, Josua kha Mosia bulah a awm thin a, Mosia Pathian hman em em tan khan rawng a bawl thin a ni. Mosia bula a awm vang khan Mosia hriak thihna kha a dawng lam a ni hran loa, Mosia bula a awm avangin Pathian duh zawng a hriat phaha, chu Pathian duh zawng a hriata chu, a zawm thin a, chuvang chuan Pathianin Mosia aiawhtuah a ruat a ni, ti ila kan sawi sual lo ang. 

Josua kha Mosia bulah awm tlat lo ta sela, Pathian duhzawng kha a hre hauhlo a nga, Israel mite dang angin Pathian lakah a vui a vui ve maithei a ni. Mahse, Josua chu awmna tur dik takah Pathian biak reng Mosia bulah a awma, chu vang chuan Pathian duh zawng pawh engtik lai pawhin a hre theia, Pathian duhzawng a hriat ringawt pawh chu a duh tawk loa a zawm bawk a ni.

Hetiang ang chiah hian, thu tha zawng zawng kan hriat theihna hmun chu kan kohhran biak in leh kan chhungkua hi a ni a, chung thu tha kan hriatte chu, hriat ringawta duh tawk mai loa, kan zawm zel chuan, Pathian hmanraw hriam tak leh mi bika chhiar tur chu kan lo nih phah thei dawn a ni.

Josua khan khawiah nge a thinlung a daha, a thinlung kha khawiah nge a awm kan tih chuan, Mosia ah a ni loa, amahah leh Israelte ah a ni bawk hek lo, Lalpaah a ni a thinlungkha a awm. 

Keini pawhin, Josua anga awmna tur dika kan awm chuan Pathian thu tha leh dik kan hria a nga, chu Pathian thu kan hriata chu kan zawm chuan Pathianah kan thinlung alo awm a nga, chu chu kan thawh chhuah phah thei dawn a ni.

Hawh u, awmna tur hmun dikah i awm ang u.

(Tawngtai Dan Tur)
Lalpa, awmna tur hmun dik tak i thu tha tinreng ka hriat theihna tur hmuna awm tlat fo thei turin min pui ang che, Amen. Ti ang o.

Follow a hnuaia inziakah khuan click rawh o.

Kross Bawk Hi, Ka Thlir Ning Theilo

"Pathian hnena min hruai theih nan Krista chuan sualte avangin vawi khat a tuar bawk si a, mi fel chuan mi fel lo aiin a tuar a, tisaah chuan tihthihin a awm a, thlarauvah erawh chuan tihnunin a awm ta a."(I Petera 3:18)

Pathian thawh duh dana, mak leh sawifiah har si chu hei hi a ni. "Pathian chakber, ngam loh nei lo, el phaktu reng awm lo, hi, hmangaihna nem ber chu hmanruah a hmang tlat duh hi a ni." Pathian chak zia hi, kan hre theuh awm e, thuthlunghlui hunah nasa takin a lang tawh bawka, a duh leh ni a chelh rei a, a duh hun hunah chhum a awm tira, tuipui a thentira a infintir leh bawk a. Arsi kan lei let vaibelchhe tela liante pawh khi, thim rawh a tih chuan athim ang, eng rawh a tih pawhin a eng leh ang, a tu thu a ni.

Mahse, chutiang taka, Pathian chak leh thiltithei chuan, keini misualte hi a hmangaihna avangin min tichhe theilo a ni. An sualna anga an chunga ka tih ai chuan, an sual ai ka tuar zawk a nge, a ti a. Kan tawrh ai krossah tawrh chu a thlang ta zawka, keini mihringah hian, eng thilmah hlu a awm loh teh lul nen. Mihringte hi kan Pathian engkimtitheia'n min hmangaiha min ngaihhlut vang hian, kan hlu ve mai chauh a ni si a.

Kan Pathian hi kan hmangaih letna a dawnglo a nih pawhin, min hmangaih a ban chuan ngai lohna tak hi, a ropuina tizualtu ava ni tak em. A hmangaihna chuan, hmangaih tlak leh hmangaih thlak loh a buk ve ngailoa, suala kan tluk lai ngei pawhin min hmangaih a bang loa, a hnungzui turin min kai tho leh thin a ni.

I Pathian, hmangaihna famkima hmangaihtu che chu, hmangaihnain chhang let ang che.

(Tawngtai Dan Tur)
Lalpa, min hmangaih avang hian ka lawm e, khawvel hian min hmangaihna hi a hliah ka phal ngai lohna turin min pui la, engtik lai pawha i hmangaihna ka inhrilh nawn fo theih nan, i kross thlir turin min pui ang che, Amen. Ti ang o.

Follow tih a hnuaia inziakah khuan, click rawh o.

Hlawhtlin Ngei Theihna Tur Thuruk

"Pathian i zawn ngat ngat a, Engkimtitheia hnêna i dil ngat ngat chuan, Thianghlim leh ngil i nih chuan I tan bengvar a thawh ngei ang a, Dinhmun dik a pe ang che. I bul lamah tê mah la, I tawp lamah i lian ang."(Joba 8:5-7)

Jacoba kha a bul lamah kha chuan Labana beram vengtu mai a ni a, engmah a nei lo a tih theih hial awm e. Labana beram kha rinawm takin a venga, a fanute a ven hlawh a, Labana hnen atang kal chhuah a tum khan, Labana'n chan a sem ve taa, tichuan alo lian chho zel ta a ni. 

Hun a kal zela, Israel thlahtu bul 12 a hringa, a unaupa nen an neih kha a nasa lutuka hmun khatah pawh an awm hleithei loa, a u Esauva zawk kha ram dangah a pem ta hial a ni.

Kan sawi tum tak chu, Pathian rawng kan bawl dawn emaw, kan eizawnna lamah emaw, a tir atang parh nghal pawp pawp hi Pathianin amite a hruai dan a ni lo a ni. Pathian ring chungin harsa takin kan kal tang tanga, rinawm takin kan thawk tang tang a nih chuan Pathianin amite a hruai thin dan kawngah chuan kan awm ve zawk a ni tih hi kan hriat a pawimawh awm e.

Pastor ropui tak pakhat pawh hi, Pathianin a ko tih a hriaa, bul tan dan tur a hre mai siloa, hall lian tak pakhat hi a hire (hawh) ta hmiah maia, tichuan thusawi a tum taa. A theih ang tawk tawkin, a thusawi ngaithla turin mi a sawm taa, an inkhawm hun tur alo thlen chuan a phur em em a, a tang hle bawka.

Mahse, tumahin an lo bengkawn lemlo nitur a ni, tumah an rawn kal ta loa, thusawi tan hun a ni tawh bawk si nen. Tihian, a ngaihtuah taa, ka inbuatsaih nasa tawha, chuvang chuan tumah awm lo mahsela, thu ka sawi tho ang a tia. Tichuan, hall chu mipuia khat vek niawm anga, phurin thu chu a sawi taa, theih tawp a chhuaha, a thusawi tawpah chuan hall chu ruak vek mahsela, sawmna te a siam a, chutia sawmna a siam lai chuan, hall phiat faitu chu, a hnen lam a rawn pana, a hnen a rawn thlen chuan, a sawmna chu chhangin Pathian hnenah a nun a pe alo ni renga. Lalpa'n atana a insensona chu a thlawn alo phal hauh lo tih a lang ta a ni.

Tichuan, chupa chu a kal zela, a beizela, tunah chuan pastor tha em em, kohhran lian tak enkawltu alo nita a ni.

Eng kawngah pawh hian, Pathian duh anga kan kal tang tang chuan, a tirin te eng ang mah ila, a tawpah chuan, Lalpan a that zia a tilang thina, mi lianah min hlangkai duh thin a ni. A pawimawh ber erawh, mi lian leh hlawhtling nih chu a niloa, Lapa mithmuha engkim a duh anga tih tlat chu a ni.

(Tawngtai Dan Tur)
Lalpa, hlawhtlinna hi i mite hnenah i pe ngailo ni awm ang hialin khawvel hian a sawi thina, mahse nang chuan khawvel pek theih bak hlawhtlinna hi i mite hnenah i pe thin a, chu hlawhtlinna i hnen atanga chhuak chu ka chhan ve theih nan, ka thinlungah nangmah ka dah hmasak ber theihna tur che in leh i duh anga engkim ka tih theih nan, min pui ang che, Amen. Ti ang o.

Follow tih a hnuaia inziakah khuan i click dawn nia.

I Kawppui Tura Tha Chuan Nangmah Nen Engemaw Inzawmna A Neih A Rinawm

"Tin, chu chauh chu ni lovin, mitthi chu a hming dai lova ro luahtu siamsak tûr leh mitthi chu a unaute zingah leh a awmna hmun kulh kawngkaa a hming a bo loh nan, Moab hmeichhia Ruthi, Mahlona nupui chu ka nupui atân ka lei a; chu chu vawiinah hian nangniho hi a hretute in ni e," a tia."(Ruthi 4:10)

Kan thupui khi khawvelin a chhui danah chuan zia emaw, tui zawng emawa, inhmu (connect) te an inkawp rem thin niin a sawi thina. Mahse, bible a kan hmuh danah chuan, an nuna Pathianin a tum (purpose) an panna lama, an zinkawng intawh vanga inkawp remchho an ni thin. 

Ruthi leh Bohaza kha, nunin a hruai danah khan an intawn ngei ngei a ngai a, Ruthii kha Bohaza roluah phak (cousin) nupui thihsan a nia, an hun lai angah chuan Bohaza hian, chi a thlahsak tur a ni a. Chu mai pawh chu niloin, Ruthii khan Bohaza loah an buh chhar bang ava zawnga, kha kha ava tih awm reng a ni bawk a ni.

Khi thu khi, hnial theihna tur anga lang mahse, kawp dik zawk bawksi chu, Isaaka leh Rebeki te kha an ni a, tum ngar ngar vangin, Abrahama chhiahhlawh khan Isaaka nupui tur kha ava zawng a ni, a tih theih a nga, tum ngar ngar lampang kha a lak vung theih viau awm e. Mahse, an hunlaia an kalphung leh  Pathian duhdan chu ringlo mi nupui pasala neih loh kha a ni. Rebeki hi Abrahama unaupa Bethuela fanu a ni a, Bethuela te pawh hian, Abrahama Pathian hi an Pathianah an pawm a ni. 

Hei vang hian, Pathian thu an awi dawn chuan, Rebeki hi Isaaka nupuiah an va biak a ngai ngei a, mahse Pathianin innei ngei ngei turin a ruat lawk lampang a ni hran loa, Rebeki hian an sawmna hi a hnawl thei renga, mahse hnawl loin a ni pawhin Pathian thuawi a duh ve ni tho tur a ni, Isaaka chu la hmu miahlo mahse a nupui nih chu a thlang ta ni.

Ruthii te, Bohaza te, Abrahama fapa Isaaka te, Rebeki te hian Pathian thuawi an dah hmasa bera, tichuan Pathian thuawi thlang ve tho an kawppui tur chu an hmu taa. An inzawmna bulpui ber chu Pathian a nia, an inzawm dan ber chu Pathian thuawiin a ni. Keini pawh hian, Pathian thuawi hi dah hmasaber ila, tichuan Pathian thuawi dah hmasa bertu te nen, a loh theih lohin kan lo inzawm sa nghal mai dawn alo ni.

(Tawngtai Dan Tur)
Lalpa, nangma thuawina atanga inzawmna thuk leh thianghlim an awm lo a ni tih hriain, i thuzawmtu kawppuia ka neih theih nan i thu zawm turin min pui ang che, Amen. Ti ang o.

Follow a hnuaia inziakah khuan click rawh le.

RING NGHET CHUNGA DIABOLA DO

"Ngaihven ula, fimkhur rawh u; in khingpui Diabola chu sakeibaknei rûm ṭhîn angin, a ei theih tûr zawngin a phi ruai ṭhîn; in unau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u." (1 Petera 5:8‭-‬9) (whom resist stedfast in the faith).

Sakeibaknei riltamin ei tur (seh tur) zawngin a phi ruai ṭhin a, a rum vak vak ṭhin ang hian, ringtute hi kan lei do Diabola hian min tihchhiat tumin min veh reng a, min bei reng a ni tih Petera hian a sawi.

Diabola tactics:
Indonaa pawimawh em em pakhat chu ral beih dan tactic hi a ni. Diabola hian ringtute min beih nan hian tactic chi hrang hrang a hmang ṭhin. Hengte hi a langsar zualte an ni awm e:
1. Chapona
2. Hausakna thlakhlelna
3. Nawm chenna
4. Mahni thiam inchantirna
5. Ropui leh hotu nih duhna
7. Thinurna
8. Mahni inhmangaihna
9. Châkna sual
10. Tihduhdah leh a dangte.

Ring nghet chunga do: (Whom resist stedfast in the faith)
Kan taksa hi chhung lam leh pawn lamah natna hrik chi hrang hrangin chhiat theihna chi hrang hrangin a bei reng a,  chung lo doa lo tihlum tur chuan kan thisenah thisen sipai (white blood) a awm a,  chu chuan natna hrik chu a lo bei (resist) ṭhin a. Thisen var kan tlakchham chuan hritlâng satliah pawh hi thihpui mai theih a ni.
     
Indonaa chak zawk ni tur chuan kulhpui nghet tak, a hungna pawh pawn lam aṭanga tihchhiat mai mai theih loh neih a ngai a, leidote hnehna tur leh an kulhpui ṭhiat theihna leh an ralthuam lo do zo tur ralthuam ṭha neih a ngai bawk.

   Diabola hian kan rinna kulh ṭhiat turin a râlthuam ṭhaber ber hmangin chawl miah lovin a tactic chi hrang hrang hmangin kan pànna lai lai aṭangin min rawn bei ṭhin. Sakeibaknei rilṭam ang maiin hăhum chunga min beih châng pawh a ngah mai.
   
Chuvangin, keimahniah Pathianin lo do let theihna (resistant) min pek Pathian ralthuam famkim (Eph 6:13-18) hmangin, Krista kan rinna lungpuiah chuan ding nghet chungin lo do ve tur kan ni e.

Tisaah awm mah ila,
Tisa indo angin kan indo lo va;
Keini inralthuamnate chu tisa a mi a ni si lo va,
Kulhpui nghet takte ṭhiatna tura
Pathian zara thil ti thei tak a ni zawk.
Hnialnate leh thil sâng tinrĕng
Pathian hriatna dâl tura sâng taka siamte chu ṭhiatin,
Ngaituahna tinrĕng Krista thuawihna salah kan hruaia a (2 Kor 9:3-5). 

(Tawngtai Dan Tur)
Lalpa, sual min beitute hi ka hnehna turin, nangmahah ka awm tlat theih nan min pui ang che, Amen. Ti ang o.

Follow tih a hnuaia inziakah khuan click ve rawh o.

KRISTAAH ȚHANG LIAN RAWH

"Hmangaiha thu dik tak sawiin, engkimah amahah kan țhang lian thei zâwk ang, Amah chu Lu a ni, Krista chu." (Ephe.4:14)
         
Piangthar tawhte hi Pathian chuan thlarau lam nuna țhang lian zêl tûrin min duh a. Thlarau lam nun puitling tak kan neih thlenga min țhantir hi a duhdân leh a thil tum a ni. Kristian tam tak chu kum lamah upa tak thlengin kristian țha angin kan nung a, mahse thlarau lamah kan țhang hauh si lo. A chhan chu țhan kan tum tlat loh vâng a ni ber mai. 

Thlarau lam nunah chuan nausên kan ni kumkhua reng mai a, diaper la inhrêng reng ang chauh kan ni. Thlarau lam nuna țhanna hi amaha lo awm ngawt a ni lo va, kei mahniin kan zir a ngai a. Țhan zêl tumna tak tak nêna Pathian hnêna intukluh tak takna (intentional commitment) neih a ngai a ni.

Khai le, thlarau lam nunah chuan țhanlen zel i duh em le? I duh tak tak a nih chuan, a hmasa berin i rilru lo châwl rei tawh leh lo muthlu rei tawh chu tihharh/kaihthawh hmasak phawt a ngai a ni. Țhan tumin thutlukna (decision) siam fel hmasa rawh le. Pathian nghâk mai lovin nangmah ngeiin țhang zel turin tumna tak tak insiam la (make an effort to grow), tha leh zung sen inhuamin taimâk chhuah ang che. 

Pathian hnênah țawngțai la, Pathian thu chhiar la, i rilru khawih zâwngte ziak zel la, tichuan, i rilru rei tak lo chawl tawh leh lo muthlu tawh chu tihharhin a lo awm leh țan ang. I nun a lo tuihal țan ang a, hriat belh zel i lo châk ang a, chhiar tur leh ngaihthlâk tur i dap ruai tawh mai ang. Mi thusawi i ngaihthlâkin chhinchhiah tur lai i lo châng rân tawh ang a, an thusawi laiin i muthlu reng tawh bik lo vang. Tichuan, i rilru khawih i ziah apiang chuan i nun a khawih nghâl zel ang a, a taka zawm duhnaah a hruai lût nghâl zêl ang che. 

Pathian thu thiltihtheihna i chhar thar ang a, i thil sim theih loh sim nân i lo hmang tawh ang a, i thil paih phal loh paih theih nân i lo hmang tawh bawk ang. I nun leh Pathian thu chu a lo inzawm nghet tulh tulh tawh ang a, nitinin thlarau lamah chuan i lo țhang lian zêl ang a, thuah leh thlarauvah chuan i lo hausa tulh tulh mai dâwn a ni. Tichuan, nitinin thlarau lamah chuan i lo țhang lian zel ang a, Isua duhzâwng tih puitlin chu i châk tulh tulh tawh mai ang. 

Nangmahah Krista a lo nung ang a, nangmaha nung Krista ringin i lo nung tawh zâwk ang a. Pathian thu leh i nun chu a lo inzawm tlat tawh avângin Pathian thu i sawiin i chanchin ațangin i sawi fo tawh ang a, i chanchin i sawi pawhin nangmaha Pathian thu i sawi a lo ni zel tawh mai ang. Lal Isua Krista chu lu a ni a, amah chu kan nun luahtu a nih miau tawh chuan, amahah chuan kan țhang lian lo thei tawh lo a ni (Ephe.4:14).

(Tawngtai Dan Tur)
Lalpa, i hnungzui tur hian thut hmuna hriatsa chauh buaipui hi a tawk lo a ni tih min hriattir avangin ka lawma, nangmaha thang lian turin tha leh zung ka sen ve a ngai a ni tih hriain, taimak ka chhuah zel theih nan min pui ang che, Amen. Ti ang o.

Follow tih a hnuaia inziakah khuan click rawh o.

Amite Chu An Mamawh A Pe Thina, An Kawng A Remsaka, A Veng Bawk Thin

"Ka mi, ka thlante, mi fakna tilangtu tûra ka tana ka mi siamte chu, in tûr ka pêk theih nân, thlalêrah chuan tuite ka awmtir avâng leh, ram rovah chuan luite ka awmtir avângin ram sate pawhin mi chawimawi ang, sihalte, sava nghawngseite lamin."(Isaia 43:20-21)

Pathian hian, ka mi a tihte tan hi chuan ui ava nei lo tak em, Thuthlung hlui hun laiah te chuan, amite tan tui awm lohnaah tui a awm tir hmiah duha, hausak tir a duh lahin nasa takin a malsawma, ven him a duh lahin, vantirhkohte a ven tir bawk thin a ni.

Kan Pathian hi, a tir atang vawiin ni thlengin ala ngai renga, amite tan hian nasa takin ala thawk duh zel thin a. A pawimawh ta chu, nang leh kei hi amite kan ni ve em tih lai hi a ni. Amite chuan, Lalpa an nghak thin a, an chunga harsatna thleng chu a awmzia an hriat loh pawhin Lalpa tan an rinawm tlat thin a ni.

Hawh u, Lalpa mite kan nih theihna turin, Kristaah kan beiseina nghat ila, Lalpa kan Pathian tan kawng engkimah i rinawm tlat ang u.

(Tawngtai Dan Tur)
Lalpa, i mite chu nasa takin an thlavang i hauhsak thina, an manganna ata i chhanchhuak thina, an kawngte i rem felsak thina, kei pawhin chutianga ka nuna i chet chu ka duh a, ka ngen che a, chutianga ka nuna i chet vena turin leh i mi ka nih ve theih nan, i tana ka rinawm tlat theih nan min pui ang che, Amen. Ti ang o.

Follow tih a hnuaia inziakah khuan click ang che

Tawngtaina'in Ram Mipuite Hian, Zoram I Siam Tha Ang U

"Tin, ani chuan an hnenah, "Hetiang hi tawngtai chauh lo chuan engtin mah a chhuak thei lo," a ti a."(Marka 9:29)  

Vani Marshall hindu kulmuk em em leh, hindu puithiam chhungkua atanga sei lian chu, Pathianin a nun a thlaksaka, a chhungten tuithlar mahsela, Krista chu zui tlat a tum ta a. Ringtute tawngtaina hnathawh nasat theih zia ti hian a sawi,"kan kohhranah chuan, pitar vak de de thin mahse, tawngtai sipai ropui (prayer worrier) an awma, a chang chuan ka rap deuh rauh thin, a chhanchu an han tawngtai tak tak hi chuan, Thil Nasat Takin An Thlak Danglam Thin Vang A Ni," a ti.

A pa, hindu kulmuk rapthlak tak, pawh chu an tawngtai sak an tawngtai sak hnuah chuan, Kristianah a in pe ve ta a ni.

Kei ni, mizo kristiante hi, nu leh pa malchung atang, bible chang kan thiam a, "lo cheng ve la kan run chhungah" tih hla ropui em em te chu, kan hla thiam hmasak ber a ni a. Khawvel pastor ropui bik lo chuan a awmzia an sawi chhuah hleih thei loh bible thu "Lalpa chu min vengtu a ni a, ka tlachham lo ang"(Sam 23:1) tih te chu kan thu thiam hmasak pawl a ni a. Mahse, tawngtai thiltihtheih zia hi, kan chianglo ta em ni? Nge, tawngtaina thiltihtheih zia hi kan hre lutuka, kan inthlahdah zawk le!

Tawngtai kawngah hian, ringtu naupang zawk ten tinge min lehpelh min lehpelh le! Hawh u, i tawngtai thar leh ang u hmiang, zing tawh leh mutdawn leh chawi ei dawnah chuan kan tawngtai alawm, mahse kan nuna hna pakhat angin tawngtai hi ngaihpawimawh nachang kan hrelo hi a pawi a ni.

Kan ram damna tur pawh hi, keini ringtute tawngtaina atang a ni, ram hruaitu kan thlang zo a, thlan tlin pawh kan nei ngei a ni tih pawh kan hre chiang taa, heng kan ram hrauitute hian Lalpa duh anga, keini Zoram mipuite hi min hruai theih nan bang loin i tawngtai ang u.

Vani Marshall chuan a pa hindu kulmuk tak chu, Pathian thu pawh hrilh hran loin, bang hauh loin a tawngtai saka, kristian tha takah a inthlak tir a. Keini pawh hian, kan ram hrauitu kristian nisa rengte hi, Pathian duh angin, tha tak leh dik taka ro an rel theihna turin i dilsak mawlh mawlh ang u, kan tawngtai kawnga kan inthahdah loh chuan, ramhrauitu tha ber ber, Zoram nasa taka hmasawnnaa hruai lut thei tur, kan dil chhuak ngei ang.

Zirtirte khan, ramhuai an hnawhchhuah theih loh tum khan, Isua hnenah an hnawhchhuah theih loh chhan an zawt a, a ni chuan, 'tawngtaina atang chauhin' a tih theihthu a hril a, he thu atang pawh hian, tawngtaina chak zia kan hre thei awm e. Kan Lalpa Isua Krista, thiltih ang chiah chiah thil pakhat hi nitin kan titheia, chu chu tawngtai hi a ni.

(Tawngtai Dan Tur)
Lalpa, tawngtai kawnga ka inthlahdahnaah min ngaidam la, tawngtaina chuan engkimtithei lei leh van zawng zawnga roreltu chu a chet tir thin che avangin, i hnena tawngtai kawnga ka inthlahdah ngai lohna turin min pui ang che, Amen. Ti ang o.

Follow tih a hnuaia inziakah khuan click ang che.

"Lalpa'n Tanpui Lo Che Sela, I Tlu Tawh Ang" I Hma Hunah Pawh Kalsan Che A Tum Ngai Lo

"LALPA chu mi tanpuitu ni suh sela chuan, Ka nunna hi rang takin hmun rehah a awm tawh tûr a ni."(Sam 94:17)

Kan ngaihtuah chiang lo mai thin pawha, Pathian hian engkimah hian min awmpui thin tih hi! 

Min puih danah hian, kan tih ve tur awm thin avang hian, min awmpui zia leh, a tello chuan kan kal theilo tih hi, kan hre fuh hleithei thin lo a ni. 

Davida kha Pathianin Goliatha hnenh tur khan a puia, mahse Goliatha beihnaah khan Davida a tel ve a ngai a, virvawm a vawm ve a ngai a, hetiang ang chiah hian, Pathianin min thawhsak dawn pawh nise, keimahnin kan thawh ve a ngai tlat thin.

Ni e, rinna hi a taka kan chet chhuah pui chiah hian rinna tak tak alo ni chauh thin a ni. Kan hun kal tawh te chhui kir ila, kan chang tarlan khi, kan nunah a thlen viau theuh tawh a rinawm a. A pawimawh lai tak chu, kan Pathian hi a tha em em a, min pui a ni tih kan hriat loh lai pawh hian, min puih leh min awmpui hi bansan a tum chuang lo a. Kan hun awm leh zel turah pawh Lalpan, min puih hi a tum lo ngai loa, min kalsan a rilruk ngai lo bawk a ni.

Kan Pathian hian min pui tawha, min puih leh zel pawh a tum a ni tih hi, ring ila, chu kan rinna chu a takin lan tir bawk ila, Lalpa thatna i beisei bang lo ang u.

(Tawngtai Dan Tur)
Lalpa, min puitu nilo la chuan, nasa takin ka tlu sawp tawh ngei ang, chutiang taka min puih pawh chuan, min puihna leh min awmpuina hi kalo hre thin loa, min ngaidam la, min kalsan dawn lo a ni tih hre rengin, nangmahah ka beiseina zawng zawng ka nghah theih nan, min pui ang che, Amen, Ti ang o.

Follow a hnuaia inziakah khuan click ang che. 

Beihna I Tawhna Hmun Ngei Kha, Hman A Tumna Hmun Che A Ni Thei

"Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e."(Ephesi 6:12)

Pathianin thusawi lama a hmante hian, zai lamah beihna an tawk daih ngai loa, thusawi lawmah beihna an tawk zawk thin a, an thusawi sawiseltu tamtak an awm thina, beidawng tura titu an chhungte atangte leh an thinlung chhunga hriatna atang pawhin an dawng bawk thin a. Tin, fiahna na ber leh hreawm ber pakhat daikai an ngai thin a, chu chu eng kawng pawha rawngbawltu zawng zawngte pawhin an paltlang a ngai thin reng a ni. Chu fiahna chu 'Nghah' a ni, Pathian tan ka tangkai ve tak tak em tih chauh hre tur pawh hian, Lalpan min nghah tir thin sia. 

Rawngbawltu thenkhat phei chuan, an rawngbawlna chu Pathianin a kohna zawn a nih leh nih loh hi, a kum a kum fe an hre fiah hleitheilo thina, an nghaka an zawng tang tang thin bawk a ni.

Rawng bawlnaa kan tangkaina tur tak, zailam a ni emaw, thilpek lam a ni emaw, mi fuih (cousiling) lam a ni emaw, kuta hna thawh lam a ni emaw engpawh lo ni ta sela, kan tangkaina tur takah ngei hian beihna kan tawk nasa thin a, beihna chu keimahni leh keimahni kan inbeihna a nasa ber duh thin nghe nghe a, midang atanga beihna hi chu ben per maitheih a ni thin thung. Hei vang tak hian, mahni leh mahni inbih chiang chungin, eng berin nge min tichaklo, tih hi kan hriat chian a ngai a, min beitu chu beidawng loa kan beih tal tal a ngai a ni.

Paula pawh kha, mihring chhungril lampangah nasa takin Pathianin a hmanga, ama chhungril kha nasa takin a bei a. Tin, Jentailte hnenah nasa takin Pathianin a hmang bawka, a hun tawp lamah phei chuan Kaisara chhungte (a chhawrte) thu neitu lian pui puite pawh ringtu an lo ni hial a ni. Heng Jentailte atang hian beihna nasa tak a tawk thin bawk a ni.

Hawh u, kan buante hi tisa leh thisen an nilo tih hre rengin, Pathian tan theih tawp chhuahin, i bei zel ang u.

(Tawngtai Dan Tur)
Lalpa, awlsam taka neih theih reng reng engmah hi a hlu ngailo a ni tih hriain, rawngbawlna hlawk nei tur pawh hian nasa taka beih a ngai a ni tih hre rengin, theih tawp i tana ka chhuah theihna turin min pui ang che, Amen. Ti ang o.

Follow tih a hnuaia inziakah khuan click ang che.