I Chau Emaw I Tih Lai Khan Lalpa'n A Tinget Zawk Che Ani.

"Aw Pathian, nang chuan ruah tam tak i surtir a, I rochan chu, a chauh lai khan, i tinghet a."(Sam 68:9)  

Kan chauh lai hian Pathianin min hlat emaw keimah niin kan hlat emaw kan ti thin a. Mahse, Pathianin min lo tinget zawk ani thin.

Joba kha a chau ani, mahse khang a harsat lai leh a chauh ngawih ngawih lai khan zirtur pawimawh em em a zir chhuak a. Engmah anih loh zia leh Lalpa khawngaihna avang chauh a nung mai ani tih, a hmu chhuak ta a. Chutianga alo NGHEH hnuah chuan, Lalpa'n nasa zawk a malsawm tlak ani tih a hria a, a malsawm ta ani.

Lalpa min tih nghetna atang chuan, chakna thar kan chhar chhuak thin alo ni.

Lalpa, harsatna hmunah chau thin mah ila, min tinget ani tih hre tlat a, i thu chauh ka zawm theih nan min pui ang che. Ti ang o.

Lalpa'n a Amah tihtu te nun chu a Remfel sak thin ani.

"LALPA chuan an kalna turah a hruai thin a, A duhzawng titute chu a veng thin."(Sam 37:23)


Sam 37:23 na hi saptawng Bible KJV ah chuan "The steps of a good man are ordered by the Lord, And He delights in his way." Saptawng a, anihna ang tak chuan hetiang hi ani ang, "Mi fel kalna tur chu , Lalpa'n a ruat sak thin a, A kawngah chuan a lawm a." Kan mizo Bible ami nen hian a kawh chu a in ang reng tih a hriat awm e.


Mi fel a tih awmzia hi "amah ringtu leh tihtute" an ni a, tunlai angah chuan "Isua chhandamna pawmtu leh a thu zawmtu te, an tihsual palh pawh a Isua khawngaihna ring a, insiamtha leh thin te hi, mi fel bible'in a tih te chu, an ni ang.


Lalpa chuan mifel, amah tihtute chu "an kalna tur a ruat sak tak tak a, an kalna turah a hruai thin tak zet  bawk ani.



Lalpa, i mithmuh a mi fel ka nih theih nan min pui la, ka nun hruaitu lo ni ang che. Ti ang o. 

Patian atanga Malsawmna dawn dan chu Sawmapakhat a hnen a pek ani.

"Ka inah eitûr a awm theih nân sâwma pakhat zawng zawng chu thawhlawm inah rawn la rawh u,Vân tukverhte chu hawnsak che uin Malsawmna dawn sên loh khawp hial ka vûr dawn che u nge dawn lo, mi han fiah teh rêng u, Sipaihote LALPA chuan a ti."(Malakia 3:10)

Sawma pakhat hi ti nge Lalpa'n min phut le? Lalpa'n Bible hun lai khan, an Thlai leh Ran te kha a mamawh em ni? Tunlaiah pawh kan sum hi Lalpa'n a mamawh em ni? Pathianin kan thil neih engmah hi a mamawh lo a, ama din vek zawk leh amah ngei chu min petu ani zawk a.

Nih leh, tinge sawma pakhat pe tura min phut si?

A chhanchu, "Kan Thawhchhuah Te'in Amah Kan Biak A Duh Ani." Sawma pakhat kan pek apiang hian, kan neih te hmangin Pathian kan bia tihna ani a. Chutianga amah kan biak chuan min petu chu Lalpa ani tih min hriat reng tir a, chu chuan Chapona te, Inchhuanna te, Duhamna te leh Thinlung dik lo kan put theihna lakah kawng tam takin min veng thin ani.

Eng ang zawng pawhin, Pathian kan biak chuan kan "THLARAUAH" hlawkna kan nei thin a, kan Thlarau a hlawkna kan neih chuan, Tisa lamah pawh chu hlawkna chu alo lang chhuak thin ani. 

"AMAH CHU MALSAWMNA HNAR ANI TIH HRE RENG A, AMAH KAN BIAKNA TURIN LEH CHU KAN BIAKNA ATANG CHUAN MALSAWMNA MIN PEK A DUH AVANGIN, SAWMA PAKHAT HI LALPA'N A HNENA PE TURIN MIN DUH ANI."

Lalpa, i duh ang ngeiin, Sawma Pakhat i hnen a ka hlan zel theih nan min pui ang che. Ti ang o.

Isua Kan Neih Hi Ava Pawimawh Em

"Isuan a hnenah, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo."(Johana 14:6)

Isua nihna hi kan hriat chian ava ngai tak em.

Isua tello chuan Pa hnen kan thleng lo ang, chu mai chu ala ni lo a, Isua tello chuan Thlarauthianghlim chenchilhna a chan theih loh ani.

Isua kan neih loh chuan, vanram a kai theih loh a, Isua tello chuan Thiltihtheihna pawh a neih theih loh bawk ani.

Khawvelah hian, mihring nih chhunga theihna leh thatna Pathianin a ruatsa te chu, Isua nei lo pawhin a chan theih a. Mahse, Isua kan nei lo anih chuan "VANRAM ERAWH KAN CHANG DAWN LO."

Isua kan nei em?

Isua i nei lo anih chuan! Isu ka duh che a, ka neih theih na tur che in min pui ang che. Ti ang o!

I Rin Loh Chu I Nghak Ngai Lo, Lalpa Nghaktu Chu Lalpa Ringtu Ani.

"LALPA chu nghak reng rawh; Chak takin awm la, i thinlung chu intihuai rawh se; A ni, LALPA chu nghak reng rawh."(Sam 27:14)

Kan Bible hian, Lalpa nghak tur hian min ti tam khawp mai a, Lalpa hian amah beisei a nghah hi a duh anih hi a rinawm a.

Lalpa kan nghah chuan, Lalpa kan ring tihna ani a. Kan rin loh hi kan nghak ngai lo bawk a. Lalpa ring a, amah nghaktu chu Lalpa'n a "TITHLAWN NGAI LO ANI".

Abrahama chuan Lalpa a nghak a, mahse a nghak tluantling zo lo a. A tisual a, mahse a insiam tha leh a, a nghak leh a, Lalpa'n a THINLUNG DUH TAK fapa Isaaca a pe ta anih kha.

Lalpa hi kan nghak zolo palh anih pawhin, kan insiam tha leh thei a, kan nghak nawn leh thei a, chu kan nghah nawn lehna pawh chu Lalpa'n min la pawm sak leh duh ani. Chutiang taka Pathian ngilneihna a khat kan nei ani.

Lalpa, nangmah ring tlat a nghaktu che ka nih theih nan min pui ang che. Ti ang o.

Lalpa'n Engkim A Rel Fel Thin A, Amah A Lawm Fo Hi Kan Tih Tur Ani.

Lalpaah chuan lawm fo rawh u, ka ti leh pek thin ang lawm rawh u."(Philippi4:4)

Mihring chuan duhdan te remruat dan te leh keimah niin nuam kan  tih theih dan tur ber a awm kan duh thin. Mahse heng zawng zawng hi kan tan alo tha vek kher lova. 

Kan Pathian chuan, kan tan a tha ber turin, rem min ruatsakin, ro min rel sak a. A chang phei chuan hreawm tih ngawih ngawih changte, zah ngawih ngawih changte, Pathian meuh pawh ngawi vung vung ang mai a hriat changte pawh kan nei thin. Hun alo kal zel a, kan tan a tha ber turin rem min lo ruatsak reng alo ni zawk thin a. 

Chuvang chuan, Pathianin kan tan a tha thei ang berin, min thawh sak thin ani tih ring chungin, Lalpa hnen a lawmthu sawi tlat hi kan tih reng tur ani.

Lalpa, ka chunga thleng tawh te leh thleng mek te hi, ka hrethiam lo, mahse ka tana tha turin engkim i rel tih ka hriat avangin, lawmthu ka hrilh a che. Ti ang o.

Thlemna hi Fiahna ani a, a Paltlang te chu Pathianin lawmman a pe thin.

"Thlemna tuar hram hramtu chu a eng a thawl e; fiaha a awm hnuin nunna lallukhum, Lalpa'n amah hmangaihtute hnena a tiam chu a hmu dawn si a." (Jakoba 1:12)

Sualin min Thlemna hi Pathian lam atang chuan Fiahna ani zel thin a. Joba kha Fiah anih hnu khan, Lalpa'n a ai nasa zawkin a malsawm a, Josepha pawh hreawm tam tak a fiah a nih hnuin Pathianin dinhmun sang tak a pe bawk ani.

Pawimawh em em pakhat chu, mihring chaklo kan nih vang hian thlemna kan paltlang theilo pawh ani thei e. Chung hun ah chuan "INCHHIR A LALPA HMA A KUN" a pawimawh ani. Davida pawh khan, thlemna a paltlang zo lo a, a tihsual a hriat ve leh Pathian Hmaah Inchhirin Vaivutah Saiip Sinin A Kun A, Lalpa'n a ngaidam anih kha.

Lalpa, keimah mai chuan Thlemna ka paltlang zo lo a, nangin min pui tlat la, ka tihsualna ah min ngaidam turin ka ngen a che. Ti ang o.

Isua, Tanpui Vartu Hnai Reng.

"Pathian chu kan inhumhimhna leh kan chakna, Mangan laia tanpui vartu hnai reng a ni."(Sam 46:1)

Kan mangan hian kan rilru chhung ril hi a buai thin a. Tih dan tur kan ngaihtuah a, Pathian rin ai chuan, hmuh theih mai kan mihring puite rin mai a awl thin a, Pathian hnen a kan buaina thlen miah lo a, kan mihring puite kan rinna chuan harsatna nasa zawk a thlen fo thin ani.

Lalpa chu, mihring ai hian min pui turin a hnai reng zawk a, Lalpa puihna hi danglam takin Bible a inziak ang te hian a thlen kan beisei thin a, chutiang pawh chuan ala thleng reng a. Mahse, min puih nan hian kan mihring pui te hi a rawn tir fo thin a, uluk takin kan harsatna Rilru chhung lam leh pawn lam ani emaw, Lalpa hnenah thlen ila, min chhanna pawh engkim thlirin chik takin ngeihven ang u.

Lalpa, min tanpuitu hnai reng i ni tih hi ka hriat reng theih nan, min pui ang che. Ti ang o.

Isua Hma Chhuana Tum Leh Hmathlir Neih.

"I thinlung duhzawng chu pe phal che sela, I remruat zawng zawng chu hlawhtlintir che rawh se."(Sam 20:4)


He thu hi Davida'n a fapa Solomona a malsawmna tawngkam ani a.


Tum bik leh Remruatna (Goals leh Plans) kan neih hi, a pawimawh zia a lang ani. Tum bik leh Remruatna neih a pawimawh tluk chiah hian Pathian hnenah chungte chu kan hlan a pawimawh bawk ani.



Solomona chuan Goals leh Plants a nei a, tichuan a pa "Pathian ang thinlung pu mi" Davida'n Pathian hnenah a thlen sak ani. Tum bik leh Remruatna i neih loh chuan hlawhtlinna tur i nei lo ang, i nei a Pathian hnen a i thlen thin loh chuan i hlawhtlinna chu harsatna thlentu ala ni ang. Goals leh Plans   kan neih loh chuan Pathian hnenah kan dil thei a, kan neih tawh chuan Pathian kan kawl tir tur ani.


Lalpa, Tum bik leh Remruatna tha i duh angin min pe la, chungte chu i ropuina turin tha i tih angin ti tlawhting ang che. Ti ang o.

Amah Beiseitu Isuan A Ti Thlawn Ngai Lo.

"Tin, Isaian, “Jesaia zungzam chu a awm ang a, Jentailte lala awm turin A lo chhuak tur chu a awm bawk ang; Ani chu Jentailte chuan an beisei chhan ang,” a ti leh bawk a."(Rom 15:12 )

Ka thian hnaivai, keruh tliak vawi tamtak an zai tawh dam har em em a awm a, harsatna tam tak a tawk bawk a. Mahse, dam ala tum tlat, Pathian hnenah lawmthu ala sawi thei ani. 

Khawvel harsatna leh sual te chuan, a neihte leh a hriselna laksak mahse, Krista a, a BEISEINA AN LAK SAK THEI LO A, CHU BEISEINA CHU KHAWVEL CHHIATNA HIAN A NGAM THEI NGAI LOH VANGIN, a chak zawk Isua chuan a ai nasa in malsawmnain a vur let leh ang.

Ni hnih ni thum emaw, kum nga kum sawm chhung emaw chauh Isua hi beisei lo ila, kan dam chhung hian beisei ang u. Min ti thlawn dawn silo.

Isua nangmah a ka beiseina hi, damchhung pawh a, a nun reng theih nan, ka beiseina che hi min tih ngheh sak zel ang che. Ti Ang O.

Din Hmun Tha Zawk Lalpa'n Min Pek Dawn Hian Kan Dinhmun Ngai Kalsan Turin Min Ti Thin.

"Tin, LALPAN Abrama hnenah chuan, "I khaw lam ata leh i laichinteho zing ata leh i pa in ata chhuak la, ram ka la entir tur che lamah kal rawh: tichuan chi ropui takah ka siam ang chia, mal pawh ka sawm ang chia, i hming ka tiropui bawk ang; tin, nang malsâwmna ni ang che."(Genesis 12:1-2 )

Pathianin Abrahama chi Ropui taka a siam dawn leh malsawmna tam taka a vur dawn khan, a chhungte kalsan turin thu a pe a nih kha, Abrahama tan thil huphurh awm tak a ni. Mahse Pathian thu angin a awm a, a rinna chu Pathianin felnaah a ruatsak a nih kha. Tichuan, Lalpa chu Abrahama nun ah A THA ZAWNGIN A CHE TA ANI.

Abrahama ang hian kan nunnah Pathianin Dinhmun tha zawk leh malsawmna nasa zawk a min vur dawn chuan, kan awmna leh kan dinhmun ngai chhuahsan turin min ti thin. Huphurh awm hle mahse, Abrahama angin keini pawh kan nuam tihna hmun(comfort zone) Lalpa thu zawmin kan kalsan ngam anih phawt chuan, Lalpa thiltihtheihna leh malsawmna nasa tak kan dawng dawn a lo ni. 

Lalpa, i thu zawmin, min la hruaina tur pan turin, ka nuam tihna hmun hi ka kalsan theih nan min pui ang che. Ti ang o.

Chd

Vawinah.. Paradis ah I Chawl Ve Ang, A Tih Chhan

"Tin, "Isu, i ram i thlen hunah mi hre reng ang che," a ti a. Tin, ani chuan a hnenah, "Tih tak meuhvin ka hrilh a che, vawinah hian ka hnenah Paradis-ah i awm ve ang," a ti a."(Luka 23:42-43)

A dinglama an khenbeh kha, Isuan "vawinah hian ka hnenah Paradis ah i chawl ve ang" a tih chhan tak chu thil dang niloin, Isua Chandamtua a pawm vang ani. A pawm zia kan hriat theihna tur chu "I ram i thlenhunah min hre reng ang che" a ti a. Isua'n lal ram a nei a, khawvel chhandam turin a lal ram chhuahsanin kross ah misual tlan nan a inhlan ani tih hi a pawm tawh ani. Isua hi kan Chandamtuah kan pawm ve tak tak em.

Isu ka Chhandamtu ah ka pawm a che, I ram i thlen hunah kei misual hi min hre reng la, i ram ah chuan min hruai ve ang che. Ti ang o.

Thil Hlu Ber I Pe Chhuak Thei A, Chu chu Isua Chanchhintha Ani.

"Khawvel zawng zawngah kal ula, thil siam zawng zawng hnenah Chanchin Tha hi hril rawh u."(Marka 16:15)

Khawvel mitin hi, kan duh leh mamawh zawngte in ang vek lo mahse, kan mamawh ber theuh chu Chanchin Tha hi ani. Mi fing leh fing lo, mithiam leh thiam lo, mi remhria leh hrelo, mi hausa leh rethei, mitin hnen a chanchin tha hril hi, khawvel hmun tin a ringtu ten kan tih  mak mawh ani.

Kan duhsak zawngte, kan ngainat zawngte, mi hausa chauh emaw mi rethei chauh emaw hnen a hril turin min tilo a, mitin hnenah Chanchintha hril turin min ti zawk ani. Khawvel hnena thil hlu ber pe chhuak thei dinhmun a kan ding hi chanvo ropui tak kan chang ani.

Lalpa, i chanchhintha hi, hril thei turin min pui ang che. Ti ang o.

Kan hun kal tawh Theihnghilh a, a tangkai te erawh Hriat reng.

"Tun hma thilte chu hre reng suh ula, hmasang thilte chu ngaihtuah hek suh u."(Isaia 43:18)

Kan hun kal tawh a, kan chetsualna leh kan tihsualte hian kan inrintawkna min tihhniam sak thin avangin theihngilh a tha a. Tin, kan chet thatna pawh hian chapona min siamsak thin a, chu chuan kan nih tur ang min nih phak loh tir thin avangin, theihnghil theih loh pawhin ngaihtuah loh luih a pawimawh awm e. Kan hun kal tawh chhe lam emaw, a tha lam emaw kan hman tangkai hun erawh a awm fo bawk.

Lalpa, i duh angin ka hun kaltawh ka theihnghilh theih nan leh hman tangkai a hun a, ka hman tangkai theih nan min pui ang che . Ti ang o.

Fuihna Tha Pek Chhuah Leh Dawn

"Chuvangin, infuih tawnin, intisawt tawn theuh rawh u, in tih reng thin ang hian."(I-Thessalonika 5:11)

Midang fuih thin hi a Pathian thu a, thil tha ti tura midang fuih thintu chuan Pathian duh zawng a ti ani. Kan thiante, kan Lehkha zirpuite, Kan nu leh pa te, Kan Unaute, Kan Rawngbawlpui te leh kan fuih theih theih fuih tum ila, keini pawh fuihna dawng thiam mi nih tum tlat ang u.

Lalpa, i duh ang a midang fuihtu leh midang fuihna dawng thiam mi ka nih theih nan min pui ang che. Ti ang o.

Thiam Min Chan Tirtu Rawngbawl Turin Tho Leh Ang U

"Nimahsela ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a:kan thlamuanna tûra thununna chu a chungah a tla a; a vuakna vualtea tihdamin kan awm ta."(Isaia 53:5)

Kan han tisual palh leh thin a tiro, kan hre reng, tih pawh kan duh miah lo, mahse kan inrin chian hmain, Dawt kan sawi a, mi kan Hau a, tih loh tur a kan duh em em te kan ti palh mai thin. Khang zawng zawng man kha, kan Lalpa Isua'n kross ah a nunna hlanin min tlak sak tawh ani. Tisual thinmah ila, Isua vangin thiam chang kan ni, thiam min chan tirtu rawngbawl turin "Kan Tisual Anih Pawhin Tho Leh Vat Ang U."  

Ka Sual man min tlaksak a, thiam min chantir avangin "Isu ka lawm e, i rawngbawl turin min pui ang che." Ti ang O.

Lalpa'n A Lungtiawitu Chu, A Awmpui Thin

"Tin, LALPA vântirhkoh chu a hnênah a rawn inlâr a, a hnênah, "Nang mi chak huaisen, LALPA chu I hnênah a awm e," a ti a."(Roreltute 6:12)

Gideona chungah khan "Lalpa lung a awi" anih a rinawm, hlau em em a, mi hmuh loh a grep sawrna khur a buh a vuak pawh khan. Vantirhkoh chuan"Nang mi chak huaisen, LALPA chu I hnênah a awm e," a ti a. Lalpa a hnenah a awm miau chuan "Tunge Huaisen Lo A Nga, Tu Nge Chak Lo Ang?" 

Lalpa kan hneh a, a awm theih nan, "A Lung Ti Awi Tu Kan Nih A Ngai Ani." Lalpa "Ti Lungawitu che, ka nih theih nan min zirtir ang che, ti ang o.

Kan Chak Lo, Min Tichak Turin Lalpa A Hnai Reng

"Ka auh ni che khan nangin mi chhâng a, Ka nunna tichakin mi fuih a."(Sam 138:3)

Chak lohna nei mihring vek kan ni a, Lalpa hnenah kan chak lohna te thlen a, min pui tura kan auh chuan "Min Tichak Turin Lalpa A Hnai Reng Asin."

Lalpa i thu zawm a, ka nun theih nan min tichak ang che. Ti ang u!

Isua Deh Tuma Ban Tu'n A Ban Thlawn Lo

"Chu mi chu a hnungah a lo kal a, a puan hmawr a dek a; chawplehchilhin a thi put chu a lo reh ta nghal a."(Luka 8:44)

Hmeichhe thiput nu khan, Isua'n a khawih a, dam rawh a tih pawh a nghak lo. Amah zawkin Isua a ban a, a khawih a, Isua a damna awm a kha, Isua a deh atangin alo chhuak a, a dam phah ta ani.

Keini pawhin, Isua Ban Ang U, Awm mai mai lo ang u. Isua ban a khawihtur awm lo mahse, kan Tawngtaina in Isua ban a, khawihtu ni ang u.

Thinlung Ven That

"Chutichuan Davida chuan Philistia mi chu virvawm leh lungin a ngam a, Philistia mi chu a vawm a, a that ta a; Davida chuan khandaih a keng hauh lo va."(1 Samuela 17:50)

Davida khan Goliatha kha a naupang hmanrua virvawm mai khan, Lalpa puihna hmangin awlsam takin a hneh a. Mahse, a thinlung chhunga beihna Tisachakna leh Chapona erawh hneh har a ti em em ani.

Thinlung chhunga beihna hi hneh a har a, chuvang chuan kan thinlung kan ven fimkhur reng a ngai ani. Lalpa ka Thinlung min ven sak ang che! Ti thin ang u.

Hun Tawn Engkim a Lalpa Fak

"Tin, a rai leh a, fapa a hring leh a: "Tûn tumah hi chuan LALPA ka fak ang," a ti a: chuvângin a hmingah chuan Juda a sa a."(Genesis 29:35)

Eng vang ber nge Juda hi hnam thlan anih? Tiin an zawt fo thin. Liai'n a fapa hrin chu Lalpa fak nan Juda kan sa a nge tiin Lalpa fak nan a fa hring chu a hman vang ani e, ti a chhanna chu a tha ber ah an ngai ani.

Kan nun engkimah Lalpa fak zel ta ila, Lalpa'n thil tha ava thlen tir nasa dawn em. Engkimah, "Lalpa ka fak a che"ti tlat thiang ang hmiang!!!!

Kan Hna thawh te, Lalpa kutah dah.

"I hnate chu LALPA kawltir rawh. Tichuan i thil ruahmante chu tihnghehin a awm ang."(Thufingte 16:3)

Pathian hnenah Lalpa ka Hnathawh/Lehkha zir hi i duh ang a ti turin minpui la, ka hlawhtlin theihna tur chu nangmah chauh i ni a, ka hlawhtlin theih nan min pui ang che. Amen

He tiang a tawngtai thei tura Lalpa duhdan kan dah hmasak tlat a, Lalpa beisei tlat chung a kan beih tau tau chuan, kan hlawhchham kava ring lo em.

Lalpa'n a rel fel ang.

"LALPA rorêlnate chu a tak a, a fel vêl vek a ni."(Sam 19:9)

Thinrimna, Lungngaihna, Manganna leh Natna a lo thlen hian a chhan lian ber ṭhin chu Pathian hnathawh aia kan duhdan a len zawk lai a lo ni fo, Pathian dah hmasa zel ila, a lo fel vel vek mai ṭhin.

Lalpa ka nun ah hian eng nge ka tawn mek leh ka tawn dawn ka hre lo a. I kut ah ka innghat e, ti ang u.

LHTA

Lalpa'n kan Hmangaihna dawn a duh

"Lalpa I Pathian chu I thinlung zawng zawngin, I thlarau zawng zawngin, I rilru zawng zawngin, I chakna zawng zawngin I hmangaih tur ani."(Marka 12:30) Kan Pathian hian a chang zeuh in min hmangaih rawh u min ti lova. Kan theih na zawng zawng hi a phut tlat a. Kan zawng zawng amah hmangaih nan kan hman chuan Lalpa'n min puih let ve hi a chak zawk ani.

Tihtak zet a amah kan hmangaih chuan midang tlin loh na te, an that loh na te, an fel lohna te hian keimah ni ah hmunsang chang lovin midang hriatthiam na te, inngaihtlawmna te, dawhtheina te, midang nen a kan nun ho na ah chenpui nawm na te kan lo nunpui zawk dawn ani. Lalpa ka hmangaih theih nan che leh ka hmangaih zual zel theih nan che min pui ang che, ti ang u.

Thinrimna hian kan nih tur min nih phak loh tir thin.

"Thinur hi bansan la, thinrim hi sim rawh. Intilungngai duh suh - thil tihsualah a lo tlak mai thin a ni."(Sam 37:8)

Thinrim that lohna hi kan Bible hian a sawi tam hle a, Pathian in, kan chhiatpui thei viau ani tih a hriat vangin, Bible ah a chuang tam anih a rinawm. Mihring thinrim theilo kan awm lo a, kan thinrim anih pawhin a rang thei ang ber a, kan rilru atang paih chhuah zel a pawimawh ani.

Thinrimna kan pai rei chuan, sual kan tih phah thin ani. Lalpa Thinrimna Ka Hneh Theih Nan Min Pui Ang Che Ti Thin Ang Che.  

Lalpa hi kan Beiseina Innghahna ani em?

"Thima ka thut pawhin Lalpa chu ka tan eng a ni ang." (Mika 7:8)

Harsatna tawp khawk, beisei tur leh beisei ngaihna a awm tawh lo emaw kan tihna dinhmun ah pawh hian dingin in hre thin mah ila. "Arsi kan lei let maktaduai tel a lian, thluklehdingawn ai a tam chhiar sen loh siamtu " kan Lalpa kan Pathian tan chuan, kan harsatna te hi mit khap kar lehka siamthat maitheih ani si a.

Lalpa ka eng i ni, ka harsatna phena ka zirtur atan i dah chu, ka zir thiam theih nan min pui ang che, ti thin ang u.

Pathian hnen a lawm thu sawi.

"Aw, LALPA hnênah lawm thu hril rawh u; ani chu a tha si a: A ngilneihna pawh kumkhuain a awm dawn si a." (Sam 118:1)

Vawin ni a, kan vanneih zia hi han chhui ve teh! Darkar khat tal natna neilo ila o, ti ngawih ngawih damlo an awm laiin kan dam tha a. Kan chhungkua chhiat kan tawk lo bawk a, Lehkha kan zir thei a, hna kan thawk thei a, kut ke kim kan la nei bawk a, ei tur tha nen. A pawimawh ber "LALPA HMANGAINA" kan dawng bawk a, kan awm mai mai hi, mi ni hlawh kan ni reng ani.

Kan awmna apiangah, he thu kan hmuh rual hian, "Lalpa ka lawm e" ti theuh ang O!

LALPA VUAN TLAT LA, ALA CHAWIMAWI ANG CHE

"Mi dotute mit hmuhah ka hmaah hian dawhkan i buatsaih thin a: Ka lu hi hriak i thih tawh a, ka novah hian a liam reng a."(Sam-23:5)

Harsatna emaw, Lehkha zirna a i Fail'na emaw, i Chak lohna emaw, Sualin a beihna tak che emaw kha, Lalpa'n i chakna atan leh malsawmna a pek tur che a pek tan nan che, kuai herin a hmang thei ani.

Harsa mahse Lalpa vuan tlat la, khang Harsatna mithmuh hma ngeiah khan, ala chawimawi ang che.