I Duh Tak Kha I Nei Thei, Nghah Leh Hret A Ngai Thung Ang.

""He mia ni sarih tlingtla rih la, tichuan kum sarih dang ka rawng i bawl leh tur aiah chuan mi dang pawh chu kan pe ang che," a ti a. Tichuan Jakoba chuan chutiangin a ti a, ni sarih chu a tlingtla a, tichuan a fanu Rakili chu a nupuiah a pe ta a."(Genesis - 29:27,28)

Engkimah hian kan duh hi chu neih thuai thuai kan duh tlangpui thin a, a bik takin ngaihzawnga kan duhte phei chu inngaihzawn pui thuai thuai kan duh thin a. Ngaihzawng a kan duh takte kan neih fuh phei chuan nupui/pasala neih thuai thuai kan duh thin a ni. 

Hei hi mihring zia a ni a, mi pangngai phalo chuan an duh te hi neih hma an tum lutukna lamah, nasa takin an thlentur an thleng loh phah thin a. Mi pangngai chuan, thil a kaltluan pangngai a, harsatna lutuk a thlen dawn loh chuan an thil duh chu an nei thin a, mi pangngai tak an ni cho thin. Mi bik leh mi  ensan bik te chuan, engkim a kal pangngai bakah, a hun tawn chu a tha zawka la her dan a awm em, tih a ngaihtuah phawt a, a tha zawka engemaw tala la kal leh theihna a zawng a, a hmu bawk thin a, chumi hnuah chuan a duh chu neih a tum thin, hei vang hian mi bik leh mi ensan a ni chho zel thin.

Jakoba khan Labana rawng kha kum sarih a bawl a ngai a, tichuan Labana'n a fanu Rakili Jacoba'n a hmangaih em em chu pek a tiam a, mahse an ramdanah chuan fa u zawk hmain a naupang zawkin pasal an lo nei ngailo a, chuvang chuan Leaii chu kum sarih, Labana rawng a bawl hlawh ah chuan, Labana'n Jacoba chu a pe ta zawk a. Jacoba chu a lung nilo em em a, Labana chuan ni sarih tlingtla la, tichuan Rakili chu ka pe che a nga, tichuan Rakili man ah kum sarih dang ka rawng i bawl leh a nga, chutianga ka rawngbawl leh chu i duh chuan Rakili chu i nei dawn nia a ti a, Jacoba chuan Rakili chu a hmangaih em avangin, ni sarih chu a tlingtla a Rakili chu a nei a, a man atan Labana rawng chu kum sarih dan a bawl leh ta a ni. 

Jacoba hian Nghak leh Hret duh tawh lo sela chuan, Rakili a hmangaih em em hi a chan ang, mahse a nghah leh hret theih avangin Rakili chu a neih theih phah ta a ni.

Jacoba hi Nghak leh Hret thei mi leh Tuar hram hram thei mi a nih avang hian, Lalpan nasa takin a malsawm a nih te pawh a rinawm a. A u Esauva nen phei chuan, an ran neih a nasa lutuk a, ram khatah pawh an awm dun thei lo nghe nghe a ni. (Genesis - 36:7) Jacoba hian a nghah leh hret lai hian, Lalpan thil tamtak a zirtir a ni tih pawh a hriat theih awm e.

Keini pawh hian kawppui chungchangah leh kawppui chungchang kher lo ah pawh hian nghah leh hret thei mi i ni ang u.

Mipa ten an duh ber chu, hmeichhe dawhthei a ni, lungawi lutuk lo pawhin, "ni e, hetiang hi chu awm palh thei a ni a, fimkhur nan hmang ila"(mipa in a lersan emaw chungchang lam niloin, thil dang tihsual palh lamah) ti thei zel mai hmeichhia chuan, mipa a tih hmasawn theih bakah, mipuitling zawk a nih tir thei a ni. Hetianga, a tihsualna ah a dawh tlat chuan, mipa bat chu insiam that a ni zel dawn a ni.

Hmeichhia pawhin an duh ber chu, mipa dawhthei a ni. Hmeichhia chu an inchei chhungte, an thiltih fai chhungte, hmeichhe fing an nih phei chuan an rilru siamrem chhung pawh a rei bawk thin a. An duh em em pawh, chik takin an hmahun an thlir thin avangin duhlo angin emaw an lang thin a, a nih loh pawhin ka hrethiam rih lo, kala inngaihtuah hman lo an ti thin. Heng hunah hian, hmeichhe tha deuh nei mai tur te pawhin an nghak zolo a, an tawn theih tura mi tha ber an chan phah thin a ni.

Nghah leh hram theihna hi, mihringah hian a tam lo em em mai a, Pathian pawlna atanga neih chi a ni a. Hei vang hian, kawppui kan zawng a nih chuan, Nghah a ngaih huna kan Nghah thiam nan leh, Chet a ngaih huna kan chet thiam nan, theih tawpin Lalpa pawl tam ila, a hnenah kan mi duh nen a kan inkar dinhmun te leh kan duhna te i thlen tlat zel ang u.

Jokoba pawh hi, Pathian pawl thin mi a nih vangin a nghak leh hram thei a ni tih hi kan hriat a pawimawh a nga. Chu mai bakah, kan bible chuan "Lalpa tih hi finna bul a ni"(Thufingte 1:7) alo tih angin, Lalpa a tih avangin, nghah nachang hre turin Lalpan a tifing tih hi kan hriat a pawimawh awm e. 

An san zawng, an mit rawng engkim an kawppui atan an duh tak neithei thin mite chu Lalpa thuzawmtu te an ni thin.

I Duh Tak Chu I Nei Thei, mahse Lalpa Remruatna Leh Lalpa Duhzawng Chu I Duh Zawng A Nih Hmasak A Ngai Thung A Ni. Lalpa Thu Zawmtu I Nih Hmasak A Ngai Tihna A Ni.

(Tawngtai Dan Tur)

Lalpa, ka duh zawng tak engkim hi ka neih i phallo tih hi bible ah hmuhtur pakhat mah a awm lo a, chuvang chuan ka duh zawng ka neih i phal a ni tih hi ka hriat tlat a, chumi atan chuan i thu ka zawm a, i duh zawng chu ka duh zawng a nih hmasak a tul a ni tih hi ka hriat reng a, kawppui ka zawnna ah hian, ka kawppui tur ai pawhin nangmah ka ngaipawimawh zawk zel theihna tur chein min pui ang che, Amen. Ti ang o. 

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Lalpan Hriak A Thihna Che Kha, Thiltihtheihna Ah I Chantir Theih Nan, Inthlahdah Ngai Suh

"Chutichuan Davida chuan Philistia mi hnênah chuan, "Nang zawng khandaih te, fei te, feite te kengin i lo thawk a; kei zawng sipaite LALPA, Israel sipaite Pathian i chova hmingin ka lo thawk zawk a ni."(I Samuela 17:45)

Pathianin hriak a thih che a, chu a hriakthihna che chu, i inthlahdah san chuan, chu hriakthihna phena thiltihtheihna chu, i hmangthei chuang lo ang. Chu hriakthihna chu, beih tang tang nan leh tih hram hram phah nan i hman chuan, hriakthihtu Lalpan, i ral mai a phallo a nga, a tungding leh zel ang che.

Chhuak hmasa lama kan sawi tawh angin, harsatna ilo tawk a ni thei e, engmah i nei tawh lo emaw i in ti a ni maithei. Chung hunah chuan, Lalpan hriak a thih tawhna che kha, i thawh chhuah puina turin a tawk reng a ni.

Mahse, ila inthlahdah cheu a, engmah tih ila tum chuanglo a nih chuan Lalpa hriakthihna che kha, a hriakthihtu che Lalpa thiam loh vang niloin, a hriakthihna dawngtu thiam loh avang zawkin, hriakthihna thlawn leh awmze nei lo a ni ang.

Mosia kha Pathianin hriak a thih a, tuipuisen vua la a inthen ang a ti a, Mosia khan vaw miah lo se a inthen lo ang, tuipui sen kha a vuaa a in then a ni. Hriakthihna reng reng hian Mawhphurna a keng tel thin a, mawhphurna chu a tih a tih tur a ni thin.

Mosia chu Pathianin a tih dan tur tak a hrilh a, kei chu min hrilh ve siloa, i ti em?  Ni e, a chhang hi chuan Lalpan kan tih tur hi min hriattir a, a chhang hi chuan kan rinna a kan kal a ngai thin, Lalpa hming ropuina tur atan kan thiltih te hi kan tih phawt chuan, kan thiltihah chuan Lalpa zawk a rawn che dawn a ni.

Thirhkohte 23:11 ah khan Pathianin Paula hnenah “Thlamuang takin awm rawh, Jerusalem khuaa ka thu i hriattir ang bawk hian Rom khuaah pawh i hriattir tur a ni,” a rawn ti a. Paula hnenah Pathianin ka thu va hril rawh a tilo, mahse Paula chuan Pathian thu a hrila, Lalpan Jerusalemah Paula an lo thah a phal awzawng lo. Paula'n a rinna avanga a thiltihah chuan, Lalpa a lawm a, tichuan Lalpan Paula chu a hun laia khaw ropui ber Rom khua chu, a chanchinthaa (Isua Chanchintha) hnenh turin a pe ta a ni.

Chu mai bakah Lalpa hriakthih Davida pawh khan, Goliatha a beih dawn khan Pathianin i hneh ngei ngei ang a ti lem lo, mahse Lalpa hming ropui nan leh Lalpa chawimawi chungin ava beia Lalpan a hneh tir a nih kha. 

Rawngbawlna hna kan thawh hian, Lalpa tan nge keimahni tan kan tih, tih te pawh hi kan inchhut chian fo a pawimawh awm e.

Kan nuna harsatna lo kalte hi Lalpa hming ropuina tur leh Lalpa chawimawi chungin bei let ang u. Chu kan beihnaah leh kan beih lai mek chuan Paula nuna Lalpa a rawn che ang khan, kan nun ah pawh Lalpa hi a rawn che ve ngei ang. Amaherawh chu, Paula leh Davida hi nasa taka tawngtai thin mi an ni a, an thiltih tur Lalpa hriattir hmasa loin engmah an tih a rinawm loh a, keini pawh kan che dawn anih chuan Lalpa hnenah tawngtaiin i thlen phawt zel bawk ang u.

(Tawngtai Dan Tur)
Lalpa, ka nun a ka thiltih engkim hi, i hming ropuina tur atan ka tih theihna turin leh ka nun zawng zawngah hian ka inthlahdah ngai lohna turin, thahnemngaihna nangmah atanga chhuak chu min pe la, hriak min thiha, i fapa Isua Krista atang min thlan avangin ka lawm e, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

I MAMAWH ZAWNG CHU SAHRIAK UM KHAT A NI

Tin, Elisan a hnênah, "Engnge i neih?" a ti a. Tin, ani chuan, "I bawihnu hian sahriak um khat chauh lo chu inah engmah ka nei lo," a ti a. (2Lalte 4:2)

Heta Elisan hmeithai pakhat a tanpui danah hian Pathian thu ropui tak a inphumin a hriat a, chu chu kan sawi dawn a ni. 

Hmeithai pakhat a pasal sun hlim chuan Elisa hnenah a pasal leibatna ten an rawn thing a, pek tur reng a nei si lova, a mangang chuan tanpuina a dil a ni. 

Tanpui ava dil na na na, Elisa hian enge inah i neih tiin a lo zawt let a. Chu hmeithai chuan thil hlu reng a nei si lo. Nimahsela sahriak um khat a la neih thu a sawi a ni. Sawi lan tlakah pawh a ngaih hmelloh zia chu 2Lalte 4:2 ah hian kan hmu thei ang. Sahriak um khat chauh lo chu engmah ka nei lo a tih awmzia tak chu. Engmah ka nei lo, thil hlu ka nei tawh lo, ba han rulhna tlak engmah ka kawl lo, mahse sawi lan loh aiah enge inah i neih min tih tak siah chuan sahriak um khat ka la nei ve e, a tihna mai a ni. 

Chutah Elisa chuan sahriak bur ruak an thenawm khawveng te hnen atanga hawh turin a ti a, tamtak hawh turin a ti a ni. Chutah chuan an sahriak um khat chu bur ruakah chuan chhung turin a ti a, a pung ta zel mai a. An um ruak lakkhawm zawng zawngah chuan a khat ta vek mai a, chumi an hralhna chuan ba chu rul turin Elisan a ti ta a ni. 

I nuna sawi lan tlak pawha i ngaih loh tak kha Pathian chuan kaltlangin thilmak leh ropui tih hi a duh a ni. 

Hun kal tawh sawilan tlak i nei lo a ni thei e, Pathian rawngbawl tur hian talent nei tha tawkin i inhrelo a ni thei. I chhungkua siamthat nan theihna nei tawk lovin i inhria pawh a ni maithei nimahsela Pathian chuan sawilan tlak pawha i ngaih loh hmang khan thilmak a ti duh a ni. 

Chuta i hriat tur chu hei hi a ni, sahriak kha amah a pung hluaiin um atang khan a rawn baw liam ta zawih zawih reng reng lo. Bur danga an leih apiang khan a pung zel zawk a ni. I theihna neih ang ang te chu Pathian rinchhanin hmang la, i mamawh ang tawk zelin anin a tih punsak dawn che alawm. 

Sahriak hian entir pawimawh tak a nei bawk a ni. Bible ah rere sahriak chuan a entir chu Pathian chenchilhna emaw a chhinchhiah bikna, a hualhimna leh a dang te. Lal an thlan dawn pawhin Pathian chhinchhiah leh chenchilh an ni tih entir nan zawlnei te kaltlangin Pathianin hriak a thih thin a nih kha. 

Tichuan heta hmeithai hian engmah nei tawh lo mahse sahriak um khat a la nei ve tlat a ni. Tuman a sahriak hi chu an laksak thei lo a ni. Nangpawh he khawvel hausakna te, hlimna te etc chan vek mah la. Tuman Pathian hriak thihna che leh a chenchilhna che leh a awmpuina che hi an laksak thei lo che. Pathian chuan dinhmun hniam bera i awm pawhin a chenchilh tlat duh che. 

Chu a chenchilhna, a hriakthihna chu i harsatna hneh let vek turin a lo tawk reng zuk nia. 

Pathian awmpuina che hi tuman an laksak thei ngai lovang che. Chuvangin zam reng reng suh. Lalpa'n a awmpui tlat che a ni.

(Tawngtai Dan Tur)
Lalpa, i hriak thih ka ni tih pawh hi ka inhriat loh laiin nang chuan, hriak thiha min thlan chu i bang duh chuang loh avang hian ka lawm e, he hriak min thihna ka neih a hlu ber hi ka neih chhun pawh alo ni thei e, hei ngei hi ka harsatna hnenh nan a tawk a ni tih hriain, i hminga indona hi bei tlat turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

ZAWLNEITE THUCHAH LAIMU KHA

"Thu hrillâwk rêng rêng hi mihring thua chhuak a ni ngai lo va, miten Thlarau Thianghlim tirhin Pathian hnên ata an sawi zâwk țhin." (2 Petera - 1:21)

Zawlnei an tih chu Pathian thuchah puang chhuaktu (Forth teller) an ni a. Pathian thu kan âwih chuan malsâwmna kan dawn tûr leh, kan âwih loh chuan tuarna râpthlâk thleng tûr an sawi tel țhin avângin, hrilh lâwktu (Fore teller) an ti ve bawk țhin. Pathian hnên ata thu an dawn chu a mite hnênah, Pathian tirhin, Pathian aiawhin an puang chhuak țhin a ni. A tlangpui thuin Zawlneite thuchah (prophetic message) chu a kal hmang a inang deuh pût a. Ram hruaitute bawhchhiatna leh Ram mipuite bawhchhiatna thu an au pui a, Sima Lalpa kawng zawh fuh leh tûrin an sâwm a, an sim loh chuan hremna râptlâk tak lo thleng tûr an sawi leh a, hremna râpthlâk lo thlen hnuah a la awm chhunte tundinlehna tûr an sawi thleng țhin a ni. Heta an thuchah laimu ber chu Sima, Lalpa kawng zawh fuh leh tûra sâwmna hi a ni zêl mai. 

Zoram tâna Pathian mi hman,  Pastor Chhâwna te, Pu Saikhuma te, Pu Chawngkhupa te khân, Zoram sualna lo pung zêl tûr hi an hmu a, Sima Lalpa kawng kan ramin a zawh fuh leh hi an duh ber a, chu chu an dam chhûnga an thuchah laimu ber pawh kha a ni. Lalpa kawng kan zawh fuh chuan Malsawm ram kan nih tur thu leh, Lalpa kawng kan zawh fuh loh erawh chuan hremna, hrîkna râpthlâk tak thleng tûr an sawi a, hrîkna piahah a la dam chhunte talin ram an luah leh tûr thu an sawi thleng bawk. An thusawi kha paih tûr a awm lem lo.  Zawlnei hmasate lo tlangau țhin dan tho kha a ni a. Zawlnei hmasate ang thovin an thuchah laimu ber erawh chu, Sim tûr leh Lalpa kawng zawh fuh leh tûra sâwmna tho kha a ni tih hi kan hriat a țha a ni. Hei hi chu Pathian thu zirtîrna dik pangngai reng a ni.

Mahse,  mi țhenkhat chuan, Pastor Chhâwna te, Pu Saikhuma te thuchah laimu ber, Simna thu tuipui si lo hian, kan sim lohva thil thleng thei an sawi tel ve tho, Chhiatna râpthlâk, Thim thuahhnihna an tih chu an tuipui ber ta zâwk a. Thim thuahhnihna chu thlasik anga khêl lova lo thleng ngei ngei tûrin an sawi a. Thim thuahhnihna lo thleng tûr laka him nan Pathian duhzâwnga nun a țul an ti a. Pathian duh zâwnga nun an tih pawh chuan sual sim lam a kawk teh chiam lo va, Kohhran chhuahsan te, UID tih loh leh Adhaar Card neih loh ngam te, hming ziahna reng renga tel ve loh te, Khawimaw lai khuaa pem khâwm te a ni a. Chutiang mite chu thim thuahhnihna laka him tûrah inngaiin, thimna reh huna Zoram thar luahtu tûrah an inngai a ni. 

He zirtirna pawmtute hian Pastor Chhâwna te, Pu Saikhuma te thuchah laimu tak Simna thu kha kalsanin, min vaukhânna hmanrua zâwk, Thim kha, thuchah laimu berah an hmang ta zâwk a ni. Chuvângin an zirtîrna hi a him zik tluak thei ta lo a ni. Thim chu an nghâk a, Zoram hi kan siam țhat tûrah an ngai lo va, a hun taka Lalpa lo chetna tûrah an dah a ni. Zoram thar an beisei dân chu a pialral ram ruih mai a, kan tih ve pawh ngai lova, Lalpan thim piaha a rawn hûn chhuah tûrah an ngai a, chu hun chu Zoram khawvâr hun tiin an nghâk a ni.

Pastor Chhawna te, Pu Saikhuma te thuchah laimu ber, Simna thu kha kan ngaihpawimawh ber tûr chu a ni zâwk a ni. Kan sualte sim ila, Pathian duh zâwngin kan ram hi herdik leh tum ila, Pathian duh zâwng ram hruaitu țha neih tum ila, Pathian duh zâwngin sawrkâr hna thawk ila, taima takin mahni hna țheuh thawkin, intodelh tum ila, tichuan, kan ram chu kan siam țha zêl a ni mai. Zoram thar dinna kawng kan zawh zêl dawn a ni. Zoram thar (Zoram Tha Zawk) din  tûrin, sim chuang si lovin Pathian nghâk tawh suh, a chakna ringa, sualte sima, a duh zawng ti chung zela, Zoram thar din tûrin Pathianin a nghak tawh zawk che.

(Tawngtai Dan Tur)
Lalpa, sual sim ngai lo mihring kan awm lo a ni tih hi ka hriat a, he lei kan chenna ram chu eng pawh nise, vanrama i kianga kalo haw ve theih nan, ka sualte ka sim theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Dawhtheih leh Nghahtheih (Part 2)

"LALPA i thununa i dan i zirtirte chu an nihlawh e, Mi sualte tlak nân hum laih zawh hma chu, Mangan niah i hahchawlhtir dâwn si a."(Sam 94:12-13) 

Jeriko Israel ten an hneh tum khan, rallak la lo turin Lalpan a ti a, mahse Akana khan puan te, tangka te, rangkachakte alo la a, chuvang chuan Ai khaw tereuhte an hnenh theih loh phah a ni. Akana hi mirethei bik pawh a ni hranlo, Juda thlah ami a ni, Aigupta atang an chhuah pawh khan, Israel mipui zawng zawng kha Pathianin Aigupta ho a khawngaih tira, ro eng emaw zah, Israel mi zawng zawngte kha a pek tir vek a ni, Midang neih ang bawk chu a nei ve a, ran te pawh ran chithum bawngpa, sabengtung, beram te a neithei a, nei pangngai tak a ni. 

Mahse, mi baka hausak a duh a, neih thuai thuai a duha, chu chuan midang bakin a duham tira, rallak a lak phah ta a ni. A tawpah pheichuan, Israel hoin Akana leh a chhungkua leh a ran zawng zawng thlengin, lungin an denga an hal bawk a nih kha.

Israel te kha Lalpan Kanaan rama a hruai luh hunah nasa taka malsawm a tum a, chu chu a thu tiam a ni. Chutianga a malsawm tlak an lo nih theihna turin, kalkawngah chuan:
1. Amah chauh chu Pathian a nih zia te, 
2. Amah lo chu innghahna tlak a awm loh zia leh, amah chauhah innghat tur an nih zia te ,
3. An mahni enkawltu a nih zia te, 
4. Amah chu tih chunga a rawngbawl tur an nih zia te,
 chu hriat fiah tir a tum a, an nunah nghet taka tuh a tum bawk a ni.

 Lalpan ami Israel te kha, a malsawm reng zawk theih nan a zirtir a, an zirthiam hun a nghak zawk a ni. Chutih lai chuan, Israel te chuan Kanaan rama Lalpan a hruai luh hun chu an nghakhlel ve em em thunga, an hriat loh chu Lalpan an tana malsawmna leh thlamuanna pek a tum chu a peih diam tawh a, an mahni zawk chu chung malsawmna dawng tlak ni turin a zirtira, an zirthiam hun a nghak tih hi a ni.

Israel te Aigupta atang a hruai chhuah ho te chuan an tlinlo veka. Thlaler, Lalpan a zirtirna hmunah chuan, an zirlai zir chhuak zo loin an thi vek a nih kha. Akana phei chu, Jordan an kai hnua Lalpa zirtirna nghak hman lo hmasa ber leh milem be ho malsawmna awt hmasa ber tu a ni awm e. 

Keini pawh hi Akana ang hian, dik lo taka neinung ho neih te hi, awtin kan lo tluk chhiat phah ve lek lek tawh em. Akana leh Israel hnamte kha, Lalpan a rinawm zia a hmuhtir nasa tawh a nia o! Tuipui sen a kan tir chu sawi loh, Aigupta ramah pawh khan thil mak a ti nasa tawh a ni, Lalpa thikthu a chia pawh hi a awm hliah hliah a ni. A chhan chu, Aigupta ah thilmak nasa tak a hmuh tir a, Tuipui sen an hmaah a in then tir tawh bawk a, kulh ropui tak nei khaw lian tak Jeriko kulh a au chim tira, awlsam takin a hnen tir bawk a ni.

Keini pawh hian," Lalpan vawi tamtak thil ropui tak tiin min chhanchhuah tawh zia te, kan tana Lalpa khawngaihna a nasat zia leh kan chunga a rinawm zia te hi kan chhui kir foa, Lalpaa huaisen taka innghatin hmalam kan pan a pawimawh a ni."

Hei hi kan hriat a ngai," Lalpan min malsawm ngei ngei dawn a, min pe ngei ngei dawn a, mahse chung malsawmna min pek tur te chu dawng tlak kan nih theih nan min zirtir a ni tih hi." 

Kan inchhir loh nan,"Lalpa min zirtirna te chu, thuawi takin zir ila, Lalpaah chauh kan beiseina nghat ila, Lalpa i Nghak tlat ang u." Israel te kha thu a tiam angin Kanaan ramah chuan a hruai lut ngei a, mahse a zirtirna ngaipawimawh lo tu te erawh an thi thung a. Lalpan a thutiam chu a ti ngei dawn a, a zirtirna zir duhlo te chuan, a thutiam a tih puitlin ni chu, an hmu dawn lo thung a ni.

Lalpan kan chunga a thutiam chu a tih puitlin hun kan hmu duh a nih chuan, Dawhthei takin Lalpa i Nghak zel ang u.

(Tawngtai Dan Tur)
Lalpa, i thu tiam i hlen ngei ngei a, chu i thu tiam i tih hlawhtlin hunah chuan, i malsawmna ka dawn tur te chu, ka tan tur leh nangmah min hlat tirtu a nih loh nan, min zirtir thin a ni tih ka hriat a, nangmah nghak chung zel a, zirtur min pek te chu ka zirthiam theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Dawhtheih leh Nghahtheih (Part 1)

"A ni aw LALPA, i rorêlna kawngah chuan kan nghak reng chia; kan nunna duhzawng chu i hming lam leh nangmah hriat rengna lam hi a ni."(Isaia 26:8)  

Vawikhat chu, lift ah hian kan chuang alawm mawle, ka thiannu, ka thian tha tak nupui nen kan ni a, an fanu a damlo bawk si nen ka hmanhmawh pui ang reng a, chuvang chuan lift kha kal chak tir ka tum a. Kan chungchiah floor mai a cho tum kan ni a, tichuan kan han chuangchiah chu, a hnuai lamah kan chhuk leh a, chu ai a hnuai leh ah kan lawn tanna atang vawihnih kan chhuk leh ta a. A chhanchu, a chung atang lift kha a rawn chhuka, chho tur zawng zawng phur chhoh vek a, a chung bera dah chu a tum a ni.

Floor tina mi rawn lut tur an awm loh chuan, block ka lo tum a, auto close chu kalo hmet zel a, mahse chuang duh an lo awm zel a, auto open hmeh leh zel a ngai a. Tichuan, kan luh tanna floor chiah chu kan thleng leh ta a, tah chuan kan thianpa hi rawn luh a tum a, auto close kalo hmet hman tawh a, auto open ka hmeh leh a ngai a, tichuan alo lut chiah chu, lift a inkhar thei tawh lo a, kan thianpa chu ilo luh vang a nih kha ka ti fiamthu a, chutih lai chuan kan hnunga chuang hmeichhe pakhat chuan i hmet nasa lutuka a jam a nih khah tih pahin a chhuaka. Auto close chu kan hmet leh thin, mahse a inkhar thei tawh lo a, kan chuan tanna atang chuan, kein kan chungchiah floor ah chuan kan kalh a ngaih phah ta a.

Tihian ka ngaihtuah ta a, lift kha a kal pangngai khan kal tir mai mai ila, auto open leh close kha floor tinah hmet lo ta ila, floor tinah khan a kal chak zawk phah a nga. Kan kal tumna floor chu, rang zawkin kan thlen phah thei dawn a ni.

Hetiang ang chiah hian, Lalpan a hun taka min pek a tum rengte, min tihsak a tum reng te hi, Lalpa hnathawh pangngai taka kan nghah peih loh avangin, thlen tir thuai thuai kan tumna lamah hian, kan nun chhawngtinah kan phi chung a, keimahni hnathawh chuan min ti muang hret hret a, tichuan a tawpah phei chuan kan bul tanna ngaiah chiah kan let leh thei tawk thin a. Chutah pawh chuan, Lalpa min pek tur kan neih theihna turin, hahthlak tak leh harsa taka beih alo ngaih phah tawh thin a ni. 

Kan muanna chhanah chuan, kan chhungte, kan seilenna te, ramhruaitute puh kan tum thin, mahse keimahni thiamloh a ni tlangpui thin. Kan buai viau hnuah Lalpa lam hawinachhang kan hriat chuan, engmah a pawina em em a awm lo a, Lalpan "Inchhirte Beisei Chhan" a nih zia a ti lang duh thin a, mahse Lalpa lam kan hawilo a nih chuan, nun chhe berah kan luh phah thin a ni.

Kan rawngbawlpui pakhat chuan" A rang thei ang bera ka hlawhtlin theih dan tur chu, Lalpa duh anga engkim tih hi a ni" a ti a, a dik viau awm e. Lalpa duh anga thil tih dawn chuan, nghah tur tamtak a awm a ni tih kan hriat a pawimawh tel awm e.

Kan tum ram leh kan duh te, a rang thei ang bera kan neih theihna turin Lalpa duh angin engkim i ti ang u. Tichuan, Lalpa duh loh zawng anga ti te leh, Lalpa ai a khawvel hlawhtlinna dah hmasa zawk te chu, a hun takah Lalpan min lehpelh tir leh vek dawn a ni. 

Mesak, Sadrak, Abetnago te kha meipuia paih luh an nih khan, second khat pawh a ralhmain, an mahni awmpui turin vantirkoh kha Lalpan a rawn thlen tir a nih kha, Lalpa hi a muang lo a. Kan Nghah Lai Hian Zirtir Duh Min Nei Zawk Thin A Ni.

(Tawngtai Dan Tur)

Lalpa, min hruai dan tluka tha hi a awm lo a, ka ke pen intahtawla i nghah dan tluka ke pen nghahna fuh leh tha a awm lo bawk a, hei vang hian kal rawh i tih hunah i hruaina a ka kala, nghah rawh i tih huna ka nghah theih nan che min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

SAWIPUITU (ADVOCATE)

"Ka naute u, thil in tihsual loh nân hêng thu hi in hnênah ka ziak a nih hi. Tin, tu pawhin thil a tihsual chuan, Pa hnêna min sawipuitu Isua Krista, mi fel chu kan nei e; ani chu kan sualte thupha chawina a ni; keimahni sual chauh ni lovin, khawvêl zawng zawng sual thupha chawina pawh a ni." (1 Johana 2:1‭-‬2)

Miin thil a tisual emaw, thil sual tia puh anih a, case siam sak a nih chuan rorelru (Magistrate) hmaah thiamthu sawi a ngai ṭhin. Thil tisuala min puhna let thlaa thiamthu sawi tur chuan dàn hremi rawih a ngai ṭhin.

Advocate (Ukil):

Thil tisualtu emaw, mi thil tisuala puha a awma police-ten an man chuan thubuai (case) an siam sak a,  an thubuai a fel hma chuan  jaila tântir emaw, baila chhuah rih emaw, tâng kher lo pawh (Civil Law suit?) Court hmaa insawi fel ngai chi-ah hian, dân hremi pawisa chawia rawih tur an awm ṭhin a, chungchu Advocate (vaiṭawngin Ukil) an ti. Court hmaa kan din ai min dinsak avangin pawisa kan pek ve a ngai thung. A thubuai azirin Sawipuitu (Ukil) rawihtur nei lo chu sorkarin a rawihsak bawk ṭhin; chutianga rawihtur Ukil chu sorkarin a nei a.

Thil tisual leh thilsual ti

Tihpalh thil leh hriat loh avanga pawikhawih hi thil tisual an ni a. Tihluih thil leh hre reng chunga pawi khawih leh dân bawhchhiat hi thil sual ti an ni.
Kan thlahtute aṭangin thil kan tihsual avangin Pathian hmaa sawisaktu mamawh kan ni.

Johana hian thil tihsual a pawi lo ti zâwngin a sawi lo va, thil kan tihsual loh nan kan sual min tlenfaisaktu kan neih thu a ziak zawk a ni. Kan lo tisual leh palh a nih pawhin kan sualte thupha min chawisaktu 'Advocate Lal Isua' kan nei tiin a sawi a ni.

Sawipuitu Isua Krista:

Leilam Ukilte chuan nupui fanau chawm nân leh an inenkawl ve nân sum tam tak hlawhin mi thubuai an sawisak ṭhin.
Khawvel sual chu, Pa Pathian hnena sawisaktu Lal Isua erawh chuan hlawh phût chu sawi loh, a nun chânin, a sawisakte dâna thiamna nei lo kan nih avangin kan tuar ai min tuar sak ta zawk a; chu chu thiam kan chan ve dân kawng chu a ni.

Khawvel Ukilte chuan thiamna lam min zawn sak a; Lal Isua erawh chuan sual man min tlaksak thung.

Thil kan tisual leh a nih pawhin Pa hnena min sawipuitu Isua Krista, mi fel kan nei a, amah hi kan sual thupha chawina a ni tiin min hrilh a nih hi.

Thupha chawi:

"Kan sualte thupha kan chawi chuan, kan sualte ngaidam tur leh kan fel lohna zawng zawng tlèng fai turin, amah chu a rinawmin a fel a ni,"  tiin 1 Johana 1:9-ah a sawi ang hian, Ringtute chuan thil kan tihsual pawhin Pathian hnenah thinlung taka sim duha thuphâ kan chawi/ṭawngṭai chuan, kan tihsualte ngaidam tur leh, kan fel lohna zawng zawng tlèng fai turin amah chu a rinawmin a fel a ni.

Tihsual avangin i hlau thawng thin em? Thupha kan chawi chuan, zam lo ang u, a chhanchu Advocate (Ukil) ropui ber leh thiltithei ber, van leh lei chunga rolreltu, van lal thutthlenga thu a thuneihna zawng zawng neitu, kan nei si a. A ni chuan, sim tur pawhin min pui duh a, a pawimawh ber chu kan awm anga pan mai hi a ni.

(Tawngtai Dan Tur)
Lalpa, misualte thlang tlat duhtu i ni hi, hriatthiam ava har zawk em kei misual tan a lawmawm lutuk hi! Misual chuan i hmaah inchhira thupha a rawn chawi chuan, i ngaihdam hmaih ngai lo a ni, tih hi ka hriat a, i hnena kir loh leh thupha chawi loh zawk hi a pawi ber a ni tih hi ka chhinchhiah tlat bawk a, ka tisual a nih chuan, i hnenah thupha ka chawi a, i hnena ka rawn kir zel theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Tunlai Kawppui Zawng Mekte Rilru Put Hmang

"I thiltihziate ka hria, i vawh hek loh va, i lum hek loh hi; i vawh emaw i lum emaw ka duh a ni. Chutichuan, lum si lova, vawt si lova, i lum chang chang avangin ka ka ata ka chhak chhuak dawn a che."(Thupuan 3:15-16)  

Tunlai A Ringtute (Contemporary Christian): Contemporary hi music genre sawina a ni deuh ber a, mahse a dangah pawh nasa takin kan hmang tawh a, chuvang chuan ti zawnga rawn sawi hian a fiah ka beisei a. Temporary a tawp a, a awm avang hian a nghet lo emaw a dal emaw tihna a ni lo a, tunlai hun sawina mai a ni. Tunlai kan biak in zawng zawng a thusawi zawng zawng pawh hi contemporary huna thusawi vek a ni tihna a nih chu, tunlai hun a ringtu nun sawina a ni mai a ni. (Literature leh History ah te chuan an hman dan a dang awm e.) 

Tichuan, kan point ah lut ang, tunlai hun a kawppui zawng mek ringtu tha te:

Ringtu Mipa Ho Rilru: Hmel chu en ve tho mahse, an dah pawimawh lutuk lo a, thinlung an en zawk a, SAY, KTP, TKP leh Ministry ah te rawngbawl an nih tlangpui avangin, nakin thlenga an rawngbawl pui theih an zawng tlangpui a. Lehkha thiam an duh rualin, an duh ber chu thil hrethiam leh man thiam a ni ber a, bible chhiar thin, inkhawm ngaina, tawngtai tam lutuk lo pawh ni se tawngtai tha pangngai, chhuah nikhua pawha lai chui chui lo te an nise an ti thin. 

Tin, hnathawk chung emaw, lehkha zirchung emaw a, theih tawpa rawngbawl an nih avang hian hun an nei tlem a, ngaihdan sawi tlang ve mai thin hmeichhia an duh tlangpui a, thinrim a nih pawhin thinrim chhan sawi ve mai, hman lo a nih pawhin ka hman lo ti ve mai, duhlo a nih pawhin ka duhlo ti ve mai thin mi an duh a. 

An rawngbawlna an la serious hle a, an rawngbawlna zahsaktu leh pawmsak tu an duh ber ang. Mipa hrim hrim te hi, an hringtu nu an hmangaih em em a, an hna leh an nun dan sawisel la an thinrim kher lo ang. Mahse, an nu leh an rawngbawlna a chhe zawnga i sawi a nih chuan, an rilru atang i pawimawhna a tlahniam ngei ngei ang. 

Amah i hriat ve hmain rei deuh a chhui tawh ngei ngei ang che, a chhanchu nupui tur zawng a ni vangin, nangpawh a nupui atan a duh che tihna a ni ang. Tawngtai dun fo ula, in inkar ah Pathian thatna leh khawngaihna a awm ngei ngei ang.

Ringtu Hmeichhe Ho Rilru: Mi nghet leh mi tha an zawng tlangpuia, an mahni enkawl theitu tur an duh a. SAY, KTP, TKP leh Ministry ah te rawngbawl an nih avangin an rawngbawlna hrethiamtu an duh a, mipa rawngbawltute ai mahin an telna chin an rawngbawlna hlutsak thiamtu an lawm thin a ni.

Mi bik an nih loh chuan, hmeichhia an nih avangin an ngaihtuahna a tawi a, rawngbawltu ni lemlo, tawngtai tha lem lo bible chhiar ngai lem lo, mahse fel pangngai an nih chuan an duh thei mai a. Mahse, Pathian nena inpawhna tak tak nei, hmeichhia an nih chuan Pathian nena inpawhna nei lo mipa te hian an hip mai mai thei lo a ni.

Sum nei leh nei lo an ngai pawimawh ber lo a, mahse hnathawk thiam leh mipa intodelh erawh an ngaipawimawh hle thung. An thil hriat loh dawhthei taka hrilh fiahtu an duh a an dahsang hle bawk a, mizaidam an ngaina tlangpui bawk a ni.

An incheina, an pangpar khawi, an dawhkan hun, an no leh thleng te fak an lawm hle a, an theihnghilh mai mai lo bawk a. Mi khirhkhiap lutuk leh inhmuamup lutuk te bulah nuam an ti lo a, thutak huna thutak thei, nuih huna nuih pui maithei an ngaina thin a. An lungngaihna leh harsatna dawh thei taka ngaihthlaksaka tawngtainaah kan hria a nga a, tha mai ang emaw, Pathianin a relfel mai ang ti a, thlamuan thintu an zawng thin a, an mi ngainat ber thinte pawh an ni.




Rawngbawl ni lemlo, tunlai a kawppui zawng te mizia ve thung:

Mipa: Zirna ngaisang an nih lem loh chuan, an ngaih a sam em em a, mipat hmeichhiatna hman mai an awlsama, an hmeichhe duh zawng ber pawh an hre lo a, tum em em pawh an neih hran loh avangin nupui neih a huna an hriat chuan a remchang chang an nei mai thin.

Lehkha zirsang an nih chuan, hmeichhe langsar deuh hlek mi hriat hlawh an zawng thin a, lehkha an zir loh lai leh hna an thawh loh laiin engmah tih tur an neih loh avangin, an hman em em a, chuvangin an mahni kawm ve hman rengtu an duh tlangpui a, an thianho chaw eikhawmna ah emaw, thil tih khawmna ah emaw nalh taka inchhei chunga an mahni zui duh thintu an duh tlangpui bawk a ni.

Zu emaw, beer emaw in ve tho mahse thla 2 pawh inloin an awm thei a, mahse an intum chuan rui miahlo a, tlema zawng in ve mai duh bulah nuam an ti zawk a. Thil an hre tlangpuia, tlema insawimawi an thiam em em a, an insawi mawina leh an titi changkang zawm ve theitu te chu an ngaina thin hle a ni. Motor an neih phei chuan, tullo ah leh hekthlak zawkah pawh chelek ngei ngei an duh thin a, chung huna lungawi taka an phur theih chu an duh bawk thin a ni.

Kohhran inkhawm leh rawngbawlna te chu, hnawk an ti hle a, mahse rawngbawltu erawh an ngaisang thiam em em thunga, Pathian thu pawh an hre ve viau thin. Mitin tan kawm an nuam em em a, an neih te pawh an ui lo a, lawm taka an thil hlui (offer) dawng thintu te chu an ngaina thin hle a ni.

Hmeichhia: Zirna ngaisang an nih loh chuan, an mawl tlangpui thin a, chuvang chuan an mahni ngaihsak peih apiang an ngaina maithin a. Chu bakah, an thian ten tha an tih apiangte chu an duh ve maithei thin bawka, chaw eikhawm leh chhuah khawm nuam an tih avangin, chung huna an mahni telpui ve theitu te chu, ruihhlo ti an ni emaw tilo an ni emaw an ngaina mai thin a. Sawn an pai loh vek pawhin naupang takin pasal an nei thin a ni.

Zirna lama sang an nih chuan, miin engtin nge an hmuh ang tih hi an ngaihtuah ran thin a, chu vang chuan a ruk deuhhlekin chaw eikhawmna ah leh thil tihkhawmna ah te an kal thin a, chunghuna lo phurpui thiamtu te chu an ngaina mai thin a ni. Tlema thil ti thei leh sum nei an zawng rilru fo thin a, pasal a an duh ber te pawh a ni awm e.

Miin an hriat dawn loh chuan, zu leh beer in te leh mipat hmeichhiatna hman mai chu an thei ve mai a, an ngainat zawng an tawn fuh phawt chuan mipat hmeichhiatna hmanpui an hreh lo a, mahse an fin avangin invenna hman nachang an hre thung thin.

An titi te pawh a changkang a, chung an titi ngaithla peih leh tawmpui thiamte chu an ngaina hle thin a, an inchheina hriat saktu (notice) leh fak sak thintu te chuan an ti lawm thei hle thin. Mi mitmei an ven thiam em avangin, mi nazawng an in nel tir ngai lo a, mi thil ti thei leh sum nei mi te an hriatfuh chuan hip an tum ran a, pan hmasa zawk nih pawh an duh  thin.

An chhungkua ai an mahni, inhmangaih zawk thin mahse, an chhungkaw ngainat te chu an ngaina ve fo thin a. Rawngbawltute pawh an chhungkua in an ngainat tlat chuan, kawp mai pawh pawi an ti chuang lo a ni.

He mi lam hi chu duh tawk ta ila.

Tunlai kan ringtu nuna pawi ta ber chu, heng nun pahnih hi kan chawh pawlh thin hi a ni.

Rawngbawltu nisi thiltithei leh sum nei deuh, Pathian lam hawi miah lo kawp duh mai te, rawngbawltu nisi a langlo a chaw eikhawm nikhua a, zu in ve leh mai thei te, mipat hmeichhiatna hmang ru ve leh maitheite kan awm thin hi a ni.

Rawngbawltu kan nih vang ringawt hian, hrem lohin kan awm dawn tihna a nilo a, rawngbawltu nilo te ai Nun Kan Chawhpawlh A Nih Ngat Chuan, Hremna Kan Tawh Tur A Rit Daih Zawk Ang. A chhanchu, Pathian rawngbawlna hmel kan tih balh vang leh tibal phaka kan awm vang a ni.

Amaherawh chu, kan Pathian hi, Hremtu Pathian a nih ai mah hian, HMANGAIHTU Pathian a ni zawk a, Kan Tihsualte Kan Sima, A Lam Kan Hawi Anih Phawt Chuan, Min Ngaidam Mai Niloin, A Malsawmna Tha Ber Pawhin Min Vur Duh A, Min Vur Chak Zawk A Ni. 

Hawh u, i inngaihtuah chiang ang u.

Ngaihzawng kan nei em? Kan ngaihzawng neihdan hi Lalpa duh dan a ni em? Kan ngaihzawng neihdan hi Rawngbawltu, Pathian represent tu, ngaihzawng neih dan atan a mawi em? Anih leh kan ngaihzawng chuan min duh em avangin, a chungah advantage kan la em? Inngaihtuah chiang theuh ang u.

Kan Pathian Hnenah Hian I Kir Ang U. 
Min Pawm Duh Si A.

(Tawngtai Dan Tur)
Lalpa, hmangaihna a khat Pathian i nih vangin, inchhira simte chu i ngaidam zel thin a ni tih hriain, ka tihsual te i laka thup loa, i hmaa puang zawk zel turin min pui la. I duh ang taka nun thianghlim ka neih a, kristian chhungkaw dinpui tur, kawppui tha ka neih theih nan min pui ang che, Amen. Ti ang o. 

(Article hmasa pahnihte kha chhiar rawh o.)

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Retheite Chawikangtu Lalpa "Rawngbawltu, Harsatna leh Sawichhiatna Paltlangtu John Gray (Part 2)"

"Chuvangin ka ti a che u, engkim in tawngtaia in dil apiang chu hmu tawhah inngai ula, tichuan in hmu ang."(Marka 11:24)  

Vawikhat chu, eitur kan nei miah lo a, ka pi chuan thleng ruak chu dawhkanah dah tur a ti a. Dawhkanah chuan, kan chhungkua chu chaw eitur angin, thlengruak kilin kan thukhawm a. Chaw thleng ruak chu kan hma theuhah kan chhawp a, chawhmeh suahna thlengte pawh chu a ruakin dawhkanah chuan chhawp a ni bawk a. Kan chhuar zawng zawngah chuan ei tur pakhat mah a awm si lo a, engtin tak ei tur nei ang i mo, ka ti a.

Tichuan, ka pi chuan tawngtai ang u a ti a, a tawngtaina ah chuan " Lalpa Eitur Min Pek Avangin Kan Lawm E," a ti a. Kan amen zo deuh chiah emaw ah chuan, kan kawngkhar an rawn kik a, tu tih hriat lohin eitur min rawn pe ringawt mai a ni. Tiin, John Gray chuan an chhungkaw harsat zia leh Pathian chu an chunga a that si zia a sawi a ni, John Gray hi Cincinnati Ohio ah apianga, chhungkaw harsa tak atanga lo chhawr chhuak a ni a.

A pa hi a hrelo hrim hrim a, a naupan laiin a chhuah san avangin, a nu enkawl seilen a ni a, an naupan laiin foil (tiffin vawikhat hman hnu a paih chi) te hi, ka nu'in  hawn leh turin min ti thin a, a silfaia kan hmang nawn thin a ti.

Pathian a neih avang hian harsa hle mahse, a duhte chu "A Tih Theih" a ring tlat zel a, a naupan lai atang zaipawl hruaitu a ni thin a. College a zawh hnuah phei chuan Grammy Award dawng tawh Kirk Franklin nen an tour dun nghe nghe a ni.

A sermon " I Am Number 8" chuan khawvel hriat a hlawh a, lehkhabu eng emaw zah a tichhuak tawh bawk a ni. Thu a sawi hian Pathian thu nung karah, a zai thin a, fiamthu a thawh tel bawk thin a, hei vang hian thalai ngainat a hlawh em em a ni.

Thu a sawiin, inthliar hranna tha a tih loh zia leh, Isua Krista ah chuan hnam zawng zawng hi, inangkhat vek kan ni a, eng rawng mah hi a pawimawh lo a, rawng pawimawh ber chu a sen hi a ni a, chu chu Krista tisen rawng a nih vang a ni, a ti thin.

John Gray hi kan hriatna tur chu, Lake Wood church ah Joel Osteen hnuaiah Associate pastor a ni thin a, kumin khan Redemtion Church Carolina dintu Pastor Ron Carpenter chuan Jubilee Christian Center, San Jose, California ah Pastor ni turin kohna a dawn avangin, Redemtion Church chu John Graya kutah a dah ta a ni. 

Kohhran din kan tih hian, kan rama mi thenkat te kohhran din ang a ni lo a, Europe atanga kohhran kal zel, kohhran upa tak tak Baptist kohhran te, Presbyterian kohhran te, Lutheran kohhran te, kalphung ang khan mumal takin an kal thin a. First Baptish/Presbyterian church tih te a ni thin a,  inkhawmpui nei ve mahse keini ang erawh chuan an nei ve ngai lo thung a ni.

John Gray hian, Joel Osteen hnenah Redemtion Church ah kohna a dawn thu leh kal a tum thu, a hrilh tum chuan, Pastor chhel em em Joel Osteen'a pawh chu a insum zoloa a tap zawih zawih a " John, ka va ui che em, kan hnenah hian kum 50 tal awm la kava ti em, mahse ka duhna ti hlawhtling lo la, Lalpa kohna che chu, ti hlawhtling zawk ang che" a ti a.

Joel Osteen chuan a sawi zela," kan kohhrana i rawn tel tirh khan, mi chaklo (weaklings) ka ni ang i ti a, mahse vawikhatmah mi chaklo i ni ngai lo" a ti a. In kuah chungin an tap dun zawih zawih nghe nghe a ni.

John Gray hian, mihang a nih vangin hmuhsitna a dawng thin a, a thusawi dan kalphung avang te hian sawiselna nasa tak a tawk bawka mahse, Pathianin min siam dan a ni a, min kohna a ni bawka, tiin nghet takin rawnga bawl zel a, Lalpa'n a awmpui tlat a ni.

(Tawngtai Dan Tur)
Lalpa, mi retheite chawikang thintu i nih avangin ka fak a che, nangmaha innghat tlat te chu i ngaihsak hmaih ngailo a, i ngaihsak bang ngailo bawk a ni tih hi ka hriat tlat a, nangmahah ka innghah tlat theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Rawngbawltu, Harsatna leh Sawichhiatna Paltlangtu T.D Jake (Part 1)

"LALPA nghaktute erawh chuan an chakna chu an siam tha leh ang a; mupuite angin thlain an thlawk chho vang a; hah lovin an tlan ang a; chau lovin kein an kal ang."(Isaia 40:31)  

Thomas Dexter Jakes (T.D Jake) chuan ti hian a chanchin a sawi:

Pastor ka nih tantirh chuan, kan kohhranah mi 7 chiah an lawi a, ka harsa em em a, ka inah electric a awm lo a, tui a awm lo a, ka tui hman tur ka nu in atang ka la thin a. Kum 7 chhung zet chu ka kohhran enkawl ah chuan mi 7 chiah an lawi a ni, kum 7 hnuah chuan mi 4000 kan ni dawn a hriatna ka nei a, chumi kum ah chuan mi 7 atang mi 40 kan kohhran ah chuan an rawn lawi ta a, ka lo hriat thiam loh chu, chung mi 7 chu mi 40 chi an ni a, chung mi 40 te chu mi 4000 chi an ni, a ti. (Wikipedia nen a in anglo hret a nga, source ah a sermon hman a nih vangin)

Nupui ka nei a, kohhran enkawl chungin hna ka thawh tel a ngai a, Union Carbide ah ka thawk a, ka hna atang min bana, awm ngaihna ka hre lo chu, hmun pakhatah ka kal a, tah chuan ka tap a. Engtin nge, ka nupui leh ka fa pahnih te chu ka chawm ang ka ti a, mahse Lalpan zirtir duh min lo nei zawk a ni, chung harsatna atang chuan "Muin a fate, tlawh a zirtirin, a bu atang a nawr chhuah loh leh a bu a thiat thin ang hian, kei pawh Lalpan ka chak nan min lo nawr chhuak a, nuam ka tihna hmun chu min thiah sak a ni tih ka hria a" a ti.

Harsa takin rawng ka bawl zel a, suite hak tur pawh ka nei lo a, tichuan lehkhabu ziah tul tihna ka nei tlat mai a, a chhanchu " Kan kohhrana hmeichhia pawngsualna tawk te leh rilru hliamte hi, bible thu atang an hliam tihdam dan tur a awm ka ringa, sunday school ah ka thu ziah te chu ka sawi thin a, tichuan ka thu sawi rawn ngaithla duh te chu an pung ta deuh deuh a. Kan biak in chu pawn lam thlengin mi 100 bawrvel lekin an tikhat thin a, kan biakin hi ka thirsakawr (bicycle) siamna worshop hlui a ni a.

 Ka lehkhabu ziah chu, ka zo ve ta a, mahse tumahin an tichhuak duh lo a, lehkhabu publisher pakhat chuan dollar 15000 (singkhat sangnga) min pe ula ka lo tichhuak ang, a ti a. Ka nupui nen rei tak in kan leina turin, pawisa kan khawl a, chu kan pawisa khawl zawng zawng chu singkhat sangnga chiah chiah a ni a, ka nupui ka rawn a, lehkhabu chu tichuak rawh min ti a. Tichuan, 15000 chu lehkhabu tichhuaktu te hnenah chuan ka pe a, copy 50000 (singnga) min print saka, kar hnih chhungin kan hralh zo vek a. Suite lei ka chak tawh hle a mahse, lehkhabu atanga pawisa ka hmuh zawng zawng chu, a print nan kan hmang leh a, a tawpah phei chuan 5000000 (maktaduai nga) chuang lai kan hralh ta a ni. 

Tichuan, kalo lar ta a, miin nasa takin min sawi sela, vawikhat chu miin min sawi chhe nasa lutuk chu, hotel a ka room ah chuan rilru na takin ka thu a, lar ka dillo a, tha taka rawngbawl ka duh mai a, tiin ka ngaihtuah a. Mi min sawiselna te hi, ka chhang let thei silo, chung min sawiselna chu ka chhungte, ka fa la naupang tak tak te chu ka hrilhfiah leh a ngai thin a, chu chu hreawm ka ti em em thin.

 Chutia ka thut lai chuan, hmeichhe pakhat hi ka hotel thlenna ah chuan min hmuturin a rawn kal a, hotel hnathawk te chuan min rawn koh a, hotel lobby (innghahna leh chawlh lailawkna) ah chuan ka zuk hmu a, tihian alo sawi a" ka pu, ka chi kawngah nau ka pai a, ka naupai chu, ka chikawngah chuan a thi a, naute chu a tawih a, thih ngam khawpin ka na a, mahse i thu sawi ka ngaihthlak hian, ka lo chak phah thin a, chuvang chuan kala dam a ni. Ka pu, i thusawite hi keimah ni ang tan alawm," a ti a. Tichuan, ka tah chhuak lutuk chu ka tawng thei lo a, chunu hming pawh chu ka zawt lo a, ka carah ka tlan lut a ka tap a, chu nu chu kum eng emaw zat hnuah, book signing ka neihna ah ka hmu leh a, alo thau tawh a, ka lo hre miah lo a, tichuan a in sawi a, amah a ni tih ka hriat ve leh ka book signing lai chu ka dah a, kan in kuah a kan tap duh zawih zawih a ni.

T.D Jakes hi, Blacks Billy Graham ti a, sawi te pawh a ni thin a, kum 61 mi lai a ni tawh a, tunlai a rawngbawltu la service ah chuan a upa ber pawl a ni tawh awm e. Potter House kohhran pastor a ni mek a, an kohhranah hi Dallas, Texas a awm a ni a, kar tin mi 17000 an inkhawm ziah thin a ngaih theih a ni. T.D Jake hi "Heaven Is for Real leh Miracles from Heaven" flim producer a ni a, "Intimacy With God, Loved by, Naked And Not Ashamed?" lehkhabu te ziaktu a ni bawk a ni. Lehkhabu 30 chuang a chhuah tawh a, flim pawh 10'na tur a siam mek bawk a ni.

Kohhran a enkawl bakah hian, rawngbawlin ala chhuak reng thin a, kar khatah an in a darkar 24 pawh awm miah loh chang a nei thin a "Tupawh tam tak an peka hnenah chuan tam tak an phut ang"(Luka 12:48b) tiin kan bible chuan a ziak a, kei pawh rawngbawlna tur tamtak ka nei a nih hi a ti.

Lalpa chuan, min tichak turin, muin a fate thlawh a zirtir a, a bu atang a nam chhuak ang mai hian min nam chhuakin ka hria a, muin a fa chu ala thlawk thei lo tih a hmuh chuan lei an thlen hmain a zuk man leh ang hian, Lalpan min tihchak a tum lai hian, min zirtirna chu ka dawl zawh leh zawh loh thlirin min ngaihsak reng thin a ti.

Rawngbawltu kan nih vangin harsatna kan tawk dawn lo a nilo, harsatna kan tawk dawn a ni. Chung harsatna te chu, kan chakna atan T.D Jake ang hian hman kan tum tur a ni. Kan harsat ber lai, miin dawtin min puh huai huai emaw, ei leh bar kawngah harsatna nasa tak kan tawk a, a ngaihna kan hre tawh lo te pawh a ni thei e, eng harsatna pawh tawk ila, "Lalpa nghaktu ni tlat ang u". Tichuan, Lalpan kan chakna te chu min siam that sak leh dawn a ni.

(Tawngtai Dan Tur)
Lalpa, i rawng bawltu ka nih vangin, harsatna min lakkian sak dawn lo a, harsatna hneh thei turin chakna min pe zawk dawn a ni, tih hi ka hriat reng a. Engtiklai pawh a, nangmah nghaktu leh nangmah thlir tlattu ka nih theih nan min pui ang che, Amen. Ti ang o.  

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.