Pathian Hnenah Haw Rawh, Pawm Che Chakin, A Hena I Hawn Hun A Nghak Reng Asin

"Tichuan a tho va, a pa hnenah a kal ta a. Chutichuan hla taka a la awm laiin a pain a lo hmu a, a khawngaih em em a, a tlan a, a ir a chuktuah a, a fawp ngawih ngawih a."(Luka 15:20)

Fapa tlanbo kha, a pa hnena a hawn khan, mihring nih phungah chuan, a pa khan lo hauh hrep awm a ni. A pa kha mihring ngilnei tak lo ni hlauh pawh ni sela, i chhan ai ka pe tawh che a, chu vang chuan hna i thawk a nga, i eiin man i hlawh chhuak a nga, hna i thawh thata i u in rem a tih chuan i in tur leh i nupui tur kan la ngaihtuah ang, a tih hi a awm tawk vel a ni.

Mahse, he tehkhin thu hi, kan Lalpa Isua Krista sawi a ni a, heta Pa a sawi hi, mihring fa nei pa a sawina a ni lo, vana Pa Pathian hmangaihna a sawina zawk a ni a.

Sual nih inhriaa, engmah nei tawh loa, Pa Pathian hnena a fate  kan kir hian, mihring ang maiin i sual a nih kha min ti ve ngailo, a hnen kan thlen ve leh kan tihsual tawh te alo buk ve ngailo bawka. 

A hnen kan thlen ve leh minlo kuangkuaha, kan luah leh kan biangah te min lo fawp thin a, kan thawmhnaw tet kan hak te chu kan hak a phallo a, thawmhnaw tharin min lo thuam zawka, a hnena kan haw chu minlo lawm nan ruai min lo thehsak zawk thin a ni.

Fapa tlanbo pa khan, engtin nge ral hla taka a fapa rawn kal kha alo hmuh chat theih le? Tiin i in zawt ve em? Hei hi a chhan a nih a rinawm, a fapa lo kir hun kha, nghakhlel em em in, ni tin, tuk tin, tlai lam leh zan a mut dawn thlengin alo thlir thin a nih a rinawm.

Hetiang ang chiah hian, kan Pa Pathian hian, a hnena kan kir hun hi nghakhlel em emin, tuk tin, zan tin, kan hawnnaa kalkawng Krista Chhandamna chu thlirin, chu kawng chu zawha a hnen lam kan pan hun chu, alo nghak reng thin a ni. 

Chu khawngah chuan a hnenlam pana kan kal tih alo hmuh ve leh, a hnen kan thlen hma hmain a ni chu, kan lam panin a rawn tlan thin a, ka nghahhlelh em em ka fa chu alo hawng ta, tiin min fawp ngawih ngawih duh hial thin a ni.

Tichuan, silhfen tharin min lo thuam thin a, ka pe teuh tawh che a i khawhral a nih kha min ti ngailo. A chhanchu kan Pa vana mi khi, a hausa em em a, a hausakna hi chenzawh chi pawh a ni loa, khawhral sen pawh a nilo. Kan dawn sen loh hi min pek tur a nei renga, min pe duh zawk em em bawka, min pek tur te chu kan dawlzawh theih nan min zirtir zawk hial thin a ni.

Kir leh rawh! Pa Pathian khi a hausa lutuka, a hausakna pek tur a zawng reng zawk asin.

Fapa tlanbo anga ‘Ka pa, vana mi chungah leh nangma mithmuhin thil ka tisual e; i fapaa vuah tlak ka ni ta lo ve,"(Luka 15:21) tia a hnena lungchir tak zet zet a kir te chu, Pa Pathian chuan a rohlu tha ber ber a pe thin a ni.

(Tawngtai Dan Tur)
Lalpa, i hmangaihna hi alo tawp theilo a ni, tih ka hriat avangin ka lawm e, i hmangaihna chuan thlen phak lohna a nei a, a thlen phak lohna chu i hmangaihna a tawp thlenga hnawltu te an ni, tih hriain i hmangaihna hi ka hnawl ngai reng reng lohna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

  

LALPA REMRUATNA CHU, A THLENG TUR A THLEN KIM HUNAH ALO LANG FIAH THIN A NI

"Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria."(Rom 8:28)  

Indian, kristian tlangval pakhat chu ei zawng tanin, a eizawnna thilah a zina, indian middle class pangngai te angin, an chhungkua chuan lehkha zir an ngaipawimawh hle a, lehkha pawh a thiam pangngai hle a.

A zinna atanga, Pathianin amite tana remrautna tha tak, a neih zia a hmuhchhuah tak dan chanchin hi, i hlawkpui theih nan tawngtai chungin han chhiar ve teh le.

Vawikhat chu Delhi atang Kolkata a zin ka ngai a, tichuan train ticket lakna chu ka pan a, Pathian hnenah chuan "Lalpa side birth hnuai lam ka duha, a theih chuan min pe ang che" ka ti a. Mahse, ticket chu kan han la dawn a, system in ka duhna lai tak chu a reject zel a, vawi 2 kan lak fuh theih loh hnuah chuan, duty hnenah chuan lak tum tawh lo mai rawh ka ti a, ka rilruah chuan Pathianin ka duhna ah, min thut tir ngun tawh alawm, Lalpa'n remruat dang pawh a nei thei a, ka ti a. Duhna ber ni lo deuhah pawh thut hun a awm ve ang chu tiin 2nd class a/c upper birth chu ka la ta a.

Ka chuanna tur hi Duronto express a ni a, khawpui lian tak tak (Metropolitan) bikah chauh a kala, eng seat mah hi a hreawm em em hran loh a.

Delhi atang Kolkata pan tura train ka han chuan dawn chuan,  ka ticket a seat number inziak lam chu kava pan a, mahse mipa khat hian, ka seat alawm hei chu, i seat an upgrade anih kha alo ti a. Chu pa chu a fel em em a, kar tin company tana zina, eizawng a ni nghe nghe a, a zin ngun avang chuan train kalphung a hle leh zel a. Ka inkhai bawr deuh avangin, min buaipui a, ka seat te chu min zawn hmuh sak ta a.

Ka seat tur kava thlen chuan, Pathian hnen a kalo dil ang chhiah side lower birth chu alo ni a, mahse ka seat dil nen a danglamna chu ka ticket man aia to 1st class ah a ni thung. Chawi belh pawh a ngai tawh chuang lo a ni. Chawibelh a ngaih tawh loh rual chuan, 1st class treatment, 1st class ticket la te ang thoin ka dawng thei a, ka duh hunah thingpui ka lam theia, ka mutna tur te pawh ka phah tir thei bawka. Hetianga, 2nd class atanga 1st class a insawn theina dan hi sorkarin alo siam hrim hrim a, ringlo mi tamtak pawhin, hetiang ham thatna hi anchan tawh ka ringa, mahse keiin ka chhan theihna chhanchu Lalpa hnathawh a nih ka chiang a, Pathian hnena ka dil chiah chiah seat chu ka changa, chu chuan hai rual lohin Lalpa hnathawh a nih chian zia a ti lang a.

Ka rilrua lo lang chu, Lalpa chuan ka tawngtai a ngaithla a. Tihian min chhangin ka hria a,"ka fa duat lai! 2nd class kha i chan phak tawhah i ngai a, min dila, i tana ka ruat sak zawk che chu, kan pe ang che, kha le 1st class" min ti a ni ber hian ka hria a. 

Ka train chuanna hi, tha pangngai tak ani a, 2nd class a ka seat duh lutuk loh pawh kha hreawm ka ti dawn lo tih a hria a, mahse ami te tan "Hun A Tihah Chuan, A Tha Ber Alo Buatsaih Sak Chu, Pek A Duh Zawk Thin A Lo Ni." 

Train a, ka zin chungchang chauh i ngaihtuah a nih chuan, Lalpa neitu pakhat, traina a zinna ah, Lalpan a awmpuia, a beisei aia thutna thaah Lalpan a thut tir, tih hi i hriat tur chu a  ni mai a.

Mahse, i nun thlir nan, i hmang a nih chuan, hei hi i hrethiam thei ang.

Ticket ka lak lai khan, Lalpan a duhthu ngeiin ka tawngtaina a chhanglo, a chhan loh chhanchu, engkim alo hmuh tlang vek tawh vang a ni a, min hmangaih avang zawkin kan tawngtaina te hi a chang chuan kan duh hun leh kan duh danin min chhanglo thin a, "hun tha berah leh a tha thei ang ber zawkin, a hun ruatah chuan min chhang zawk thin alo ni." Ka tawngtaina chhan hun leh chhan loh hun hi Lalpan a hre zawk a, a hun a tih takah ka tawngtaina chu a chhanga, pawisa seng tlem siin, hmun nuam zawk leh sang zawkah ni daih siin, ticket ka lak laia, ka dilna chu min chhan sak thung ta a ni. 

He ka zin kawng hian, ringtu nuna thil pawimawh em em min hriatthiam tirin ka hria a, chu chu hei hi a ni. Lalpan a hun a tih takah, kan tha leh kan neihte pawhin a phu phak tawh loh khawpa thain kan dilna chu min tihhlawhtlin sak a thlang zawk thin a ni, tih hi. 


Ticket ka lak ni khan ka dilna kha min tih hlawhtlin sak ta se, tlemte chawiin ka tana a ruat seat tha takah khan ka thu lo ang. Ka seat thutna lah kha lei dawn ta ila a to dawn bawk si nen.

Chungte chu a thlen zawh vek hnuah chuan, Lalpa hian  ka hriat thiam loh leh ka duh aia tha zawk daih zelin, ka tan rem a ruat a ni, ka ti ta a.

"Kan hrethiamlo, mahse A Hun A Tih A, A Thlen Kim Tir Hunah Chuan, A Fiah Thin Si A NIh Hi".

Pathian remruatna hi chu, a zaua, a thuka, ngaihtuah chhuah zawh phak rual a nilo a ni.

(Tawngtai Dan Tur)
Lalpa, ka tawngtaina zawng zawng min chhan sak loh avangin ka lawm e, Lalpa ka tawngtaina te ka duh huna min chhansak loh avang pawhin ka lawm e, hei hi ka lawm lehzualna chu a ni, a hun i tih taka ka tawngtaina, i duh ang ngeia min chhansak thin hi! I remruatna chu ka remruatna ai a tha a ni, tih hriain i hnena, a zawng zawnga innghatthei turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

  

Pathian Fa I Nihna Kha, Pathian Rawngbawl Tura Koh I Nihna A Ni Nghal A Ni

Khawvel zawng zawngah kal ula, thilsiam zawng zawng hnenah chuan Chanchin Tha hi hril rawh u. (Marka 16:15)

Kan nihna(identity) chu Pathian Fa a ni a, mahse min kohna (calling) erawh rawngbawl a ni. Kan nihna leh koh kan nihna hi a kalhrang thei lova, lak hran theih a ni lova, Pathian fa kan nih chuan a rawngbawl tur kan ni bawk. Mahse Pathian tan tunge kan nih tih leh Pathianin min kohna hi hriat hran erawh a tul a ni. 

Min kohna (calling) a, a rawng kan bawlna kan hlen zawh loh emaw, kan tih chingpen hian kan identification (A fa kan nihna) a bo ta thinah kan ngai a.

Kan hnaih ngam ta lo thin a ni.

Fapa tlanbo leh Pa kha keini leh Pathian inkar entirna a ni a. Kan bosan pawh hian kan inchhir a, a hnen kan pan chuan kan nihna ngai (Fa nihna) ah chiah khan min dah lehnghal thin a ni.

Identity leh calling a chiang lo chu a calling a hlen loh changin (famkim lo Mihring chuan kan hlen lo fo) a identity (a fa nihna) a hloh emaw a ti a. A rawngbawlna kha emaw, pa nena an inzawmna siamtu a ti ta thin a ni. PATHIAN nena kan inzawmna chu Isua kal tlangin a ni. Isua chu a fa a ni a, kan dinhmun (misual) turah dingin anin a dinhmun (fa nihna) min pe si a.

Chuvangin Kan nunah hian tihsual chang emaw tih dik loh chang emaw Pathianin kan tihtur (assignment) a ruat hlenchhuah loh chang kan nei fo maithei. Mahse chu chuan Pathian fa kan nihna a ti tawp lo a ni. A hnenah intulut leh vat ila. Tichuan, min lo pawm leh thin a ni.

(Tawngtai Dan Tur)
Lalpa, i fa ka nih zia hi, ka in pawm thuk poh leh, min koh chhan i rawng bawlna chu, ka ti hlawhtling zawk thei dawn a ni, tih hi ka inhriata, ka tisual palh emaw, i kawng ka pensan emaw, i fa ka ni tlat tho tho tih hi ka inhriat renga, i hnenah ka kir theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

  

Kawppui I Zawnna Ah I Nun Fimkhur Hmasa Ang Che, I Tuh Rah Bawk Ila Seng Dawn Si A.

"Bumin awm suh u; Pathian chu hmuhsit zia a ni lo ve; miin a theh apiang, chu mi vek chu a seng bawk dawn si a."(Galatia 6:7)

1. Ngaihzawng atana i duh tur tak ang mi kha nih i tum dawn nia. 

Rinawm tak i duh chuan rinawmna i vawng tlat dawn nia. 

Puitling tak i duh chuan nang pawhin puitlinna kawng i zawh a ngai dawn a ni. 

Mi tha i tawn duh chuan nangmah kha mi tha i nih a ngai, mi tha nih a  harsat hunah tak khan mitha i nih tlang theih chuan Pathianin mi tha kawp tlakah a ngai ang che. Ti chuan mitha chu i nunah a lo lang ngei ang.

2. Kawppui tur atan Pathian hmangaih lo tu thlang suh.

Pathian hmangaih lo tu chuan hmangaih che a thiam lovang. Hmangaihna kan teh dan a inang hauh lova, a then chuan kan tana engkim huam hi min hmangaih tuah kan ngai a. Thenkhat chuan kan tana pawisa seng tam huam hi min hmangaihtu berah kan ngai bawk a. Mahse hmangaihna dik tak chu mihring hian Pathian kan neih loh chuan kan zir thiam thei hauh lo a. Pathian kan hmangaih loh chuan hmangaihna awmzia kan hrethiam tak tak lo thin a ni. 

Keimahni duhdan leh tha kan tihdan leh inpe bera kan inhriatdan kha emaw hmangaihna kan ti a, mahse chungtiang hmangaihna chu a tling tawk lo fo a. Hmangaihna dik hre tur chuan min hmangaih tluantlingtu Pathian hi kan hmangaih let a, a hnen atang hmangaihna pek chhuah dan kan zir a ngai a ni. Pathian hmangaihlo tu chuan hmangaih a tum nasat poh che leh i nun a chep zel ang. A chhan chu hmangaihna a pek chhuah rual che in, a phutlet zel ang.

Pathian hmangaihna a ropui bik em em na chu, ZALENNA a awm tel hi a ni. Pathian hmangaihna i dawnga Pathian i hmangaih let ve a nih chuan, i duh tawkin flim i en thei, i duh leh lehkha i zir vak thei, i duh leh puan i thui thei, i duh leh gym ah pawh i kal thei. Chutih rual chuan, Pathian hmangaihna chhunga kan awm hian, tih theihloh a awm a, chu chu "A Hmangaihna Hnawl A Ni," Pathian hmangaihna tem tawhin, a hmangaihna chu i hnawl a nih vaih chuan, sualin nasa takin a bei nghal ang che. Chung hunah pawh chuan, Pathian hnena kan kir leh theih nan, Pathian hmangaihna chu kan tan alo la awm reng thin a ni. Pathian hmangaihna hi chu a ropui tak zet zet a ni.

"Aw, hmangaihna a va mak em! Ka chhandamtu'n min hmangaih." 

Pathian hmangaihtu i kawppui atan i thlan theih dan tur chu, I Theih Tawpin Pathian Hmangaih La, Pathian Hmangaihtu Nen Inin Hip Tawn Ngei Ang.

(Tawngtai Dan Tur)
Lalpa, a tha thei ang bera nun kawng zawh dan chu, nangmaha awm hi a ni tih hi ka hriat renga, nangmah ah awm hmasain,  kawppui ka zawn theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

  

I Sualna Te Kha, Pathian Khawngaihna Chuan A Kuhbo Pha Vek Asin

"Tin, ani chuan ka hnenah, “Ka khawngaihna i tan a tawk e; ka thiltihtheihna hi chak lohnaah asin tihfamkimin a awm ni,” a ti ta a. Chutichuan Krista thiltihtheihna chu ka chunga a awm theih nan lawm em emin ka chak lohnate hi ka chhuang tawh zawk ang."(II Korinth 12:9)  

Paula thuziak hi, thuziak zir hlawh em em a ni a, revival ang zawng te, a scholar ang zawngte a zir a hlawh vel vek mai a. Mi tamtak chuan, mithiam a nih vang a ni ang an ti thla ngawt thin a. A thuziak hi, sam (Pslam) nen hian zir a hlawh nasat bik chhanchu, Lalpa khawngaihna puanchhuah a nih, nasat vang zawk a ni, ti ta ila kan sawi sual lutuk a rinawm loh a.

Paula hian, khawvel taka a thiamna hi a chhuanglo a ni mai lo a, Lalpa tana a tawrhna te pawh hi hnawmhneah a ngai a ni ber ti ila, kan sawi dik a rinawm. Chanchintha a puan vanga, lunga an dente, an vuak te, tuifinriata lawng a chhiat vanga tuia eng eng emaw bawhin a tlaivar te, tanina a tanna te, a khawsak a harsatna te, a mut tlem thinna te leh a thawhrim avanga a hah thina te chu, chhuan tlakah a ngai loa, Krista kross lo chu chhuan tur a neih loh zia a sawi a ni. (Galatia 6:14)

Krista kross chu tinge a chhuan em em mai le? A chhanchu kha kross ah khan, Isuan misual zawng zawng hi min tlan vang a ni. Isua Krista min tlanna chauh hi vanram chabi awm chhun chu a ni a, misual malsawm tlak loh te pawh hi malsawm tlak kan nihna te, faa vuah kan nih theihna chhanchu, Isuan kan sual tlan a, kan aia krossa a in hlanralna chauh hi a ni.

Tichuan, Paula hian hei hi a hriaa, a thil tih that zawng zawng pawh chu hnawmhneah a ngai taa, mahse a harsatna hling anga a sawia hi, Pathian tanaa a nun tak takna tur a tibuai niin a hriaa, Lalpa he hling hi min laksak teh tiin vawithum a tawngtaia, Lalpa chuan Paula hnenah "ka thiltihtheihna hi chak lohnaah asin tihfamkimin a awm ni" a ti ta thunga, Lalpa chuan, i chak lohna zawng zawng nen khan ka ropuina tur atan ka hmang duh che a. Ka khawngaihna hi, i chak lohna te, avanga hnawl tur che a tlem a ni loa, ka khawngaihna hian i chak lohna te kha a kuh pha veka, ka khawngaihna hi i tan a "Tawk" a ni a ti. 

He ta a 'tawk' tih lai hi King James ah chuan 'Sufficient' tih a ni a, a awmzia chu "Daihzo zan" tihna a ni a, a Greek tawngah chuan 'Arkeo' a ni a, Matthaia 25:9 a, nula fing ten, " Keini leh nangni tan a 'daih' lo vang e" an tih a DAIH an tih nen te, Johana 6:7 a, mipui sanga hrai chung changa, Philipan "Duli zahnih man chhangin a daih lo vang" a tih a DAIH a tih nen te,  Johana 14:8 a, "Lalpa, Pa chu keini min hmuhtir ta che, chutichuan kan tan a tawk ang" a tih lai a TAWK a ti lai nen te hian, a Greek tawngah (Thuthlungthar ziahna tawng) chuan a hmanna a in ang a.

Hei hi kan hriat a pawimawh lai chu a ni, chak lo chung leh tihsual palh nei chung pawhin, Lalpa hnung i zui hreh lo ang u, kan chak lohna te leh kan tih sualna te, min ngaidama a khawngaihna a min khuh turin, Lalpa khawngaihna hi 'A Tawka', a 'Daihzo Zan' bawk a ni.

Lalpa thiltihtheihna chu, chak lohna ah tih famkimin a awm a, mi chaklo kan nih zia kan inhriata, theih tawpa Lalpa kan belh lai hi kan chak lai ber zawk a ni thin a. Thei ve, ni ve, ti tha em em a kan inhriat lai te hian, Lalpa khawngaihna chhuang loin, mahni kan lo inchhuang zawk hi alo ni thin.

Kan duh ang takin chak ni ila, tidik vek thei ni bawk ila, a pawimawh ber Isua Krista kross a min chhandamna hi, chhuan nachang kan hre lo ang. Krista min chhandamna hian, zalen taka sual kan tihtheihna turin, phalna min pe lo a, sual ngaihdamna min pe zawk a ni.

Paula chuan, ka chak lohna ka chhuang tawh zawk ang a ti a, Pathian khawngaihnaa innghatin kan chak lohna zawk kan chhuan hian, midang chhanchhuak leh midang damna petu alo ni thin. Kei pawh ka rui thin a, mahse Lalpan min hmangaih reng tih ka hriat avangin ka sim ta a, nang pawhin i sim ve thei Pathianin a hmangaih che, tih tawngkam te hian, chhanchhuah ngai te a chhanchhuak thei thin a. Kan tuma, tum ve ula emaw, i tumlo hrim hrim a nih kha, tih thu te hi chuan chhanchhuah a neih a rinawm loh a ni.

Heng kan chak lohna tak te hi, Lalpa khawngaihna nena, kan  thawh dun tir phawt chuan, Lalpa hmanraw hrim ber a ni thei thin a ni.

Lalpa khawngaihna hnuaiah, i chak lohna chu han chhuang ve teh le.

(Tawngtai Dan Tur)
Lalpa, i khawngaihna chauh chhuan nachang ka hriat theih nan min pui la, ka tihsual te hi i khawngaihna ai hian chak zawka ka lo ruat thin avangin min ngaidam la, eng sual mahin i lak ata min then hrang theilo a ni, tih hriain, i lam ka pan tlat theihna turin leh nangmahah ka awm tlat theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

  

I Tihsual Lai Pawh Khan, Isua Kut Chuan A Chelh Reng Che

"An hnenah chatuana nunna ka pe a; kumkhuain an boral lo vang a, tuman ka kut ata mi chhuhsak hek lo vang."(Johana 10:28)  

Kan tihsual lai pawh hian, Isuan min chelh reng duh hi, amak a, awi pawh a awi awm em em tawh loh a. A thu kan zawm laiin min chelh reng sela chu a awm mahse, a thu kan awi loh lai pawhin min chelh reng duh hi, chhandam fate kan vanneihna ti nasa zualtu ava ni em. 

Kan Lalpa Isuan kan tihsual lai reng a, a kutin min vuan tih hi, ilo awi lo ve em, nungturin.blogspot ho Pathian thu lak dan hi, a diklo, engtin nge misual leh mifel dinhmun a hran theih ang? Engtin nge, Pathian thuawi man a awm theih ang? Ilo ti em? Ni e, Pathian hmangaihna zozai hi chu a nih pawh hi a ni em em tawh lo, a mah mah lam chu a ni hret a ni. He thu hi a dik zia mai chu, khi bible chang kan tarlan ah khian a in ziak tlat mai bawk si a.

Ti hian han chhui leh lawk teh ang, Pathianin mihring min hmangaihna chhanchu, a hmasa berah Pathian hi hmangaihna a ni a, a nih phung chu hmangaihtu a ni. Tin, mihring te hi ama an puiin min siam a, duh thlang theiin min siam bawk a.

A pawimawh ta chu, a hmangaihna kan pawma a hnena kan in tukluh (submit) hi a ni. Chutianga, a hmangaihna kan pawma kan intuk luh chuan, sual kan tih thin te chu kan lo sim thei zawk dawn a ni. 

A dinglama an khenbeh pawh kha, hun tlemte ala neih chhunah khan, a hmangaihna ah a in tuluta, "I ram i thlen hunah min hre reng ang che" a ti a, kha misual a dinglama an khenbeh kha, e nge ni a, a inhriat le! Lo fel deuh se chuan i ram i thlen hunah min hre reng ang che ti se a awm a, mahse a fel bawk si lo a. Fel bawk silo khan, a hmangaihna leh a khawngaihna ah khan a innghat zawk a, chu tak chu Pathian lawm zawng tak chu alo ni a.

Mihring zawng zawng te hi pakhat mah Pathian hmangaihna phuzo, kan awm loa,"Tumah mi fel tak reng an awm lo Pakhat mah an awm hauh lo," (Rom 3:10) Joba pawh kha Pathian hmaah chuan a tling zo chuang lo a ni. Tumah mahni felna leh mahni thatnaa, innghata Pathianin i fel em mai, ka mi thianghlimte zingah ka chhiar a che a tih tur khawpa, mi fel leh tha mihring zingah kan awm lo. Hei vang hian, Pathian felna leh a hmangaihna ah innghat tur kan ni zawk a ni. A dinglama an khenbeh khan a tidik chiah reng a, misual a ni tih a in hriaa, chu tah tak chuan Isua khawngaihna leh a hmangaihna ah a innghata a, paradise ah a luh phah ta a ni. 

Tisual nasa tawh hle in kan in hria emaw, sual kan ti mek emaw pawh ni sela, Pathian kutin min la vuan reng a ni tih hriain, Pathian hmangaihnaah chuan i in tulut ang u. 

Fapa tlanbo kha, inchhira a pa in lam a pan khan, a pain a hmuh ve leh, a vaw lo, a beng lo, keimah ai khawvel nawm sip bawlna i thlanga a ti lo, a pain a hmuh ve leh a fapa lam chu, a pa khan a pan zawka, a ir chuktuahin a fawpa, a pain a fapa lo haw leh chu a lawm em em a, thawmhnaw tha tha pawh a bel nghal a nih kha.

Keini pawh hi!

Ka fa lo haw rawh, ka nghak reng a che, tiin kan tihsual lai reng pawh hian min sawm reng asin.

(Tawngtai Dan Tur)
Lalpa, misual hetiang taka min hmangaih avang hian ka lawm e, ka thatna, ka felna, ka tihdikna nilovin. I felna, i thatna, i hmangaihna, i khawngaihna zawkah hian lo innghat tur ka ni tih hi ka hriat renga, nangmahah ka intukluh theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

  

Lalpa Thuawina Nena, Hreawm I Tawrh Hram Hramna Khan, Mi Hlu Bikah Ala Siam Ang Che

"Tichuan, anni chuan chûng kum that kum lo thleng tûra buh zawng zawng chu lâwr khâwmin Pharaoa hnuaia awm tûrin khuaahte la ei atân buh chhûng khâwm sela, vawng tlat rawh se. Tichuan, tâm avânga ram hi a boral loh nân buh chu tâm kum, kum sarih Aigupta rama lo thleng tûr atân chuan he ram atân hian inrinlâwkna tûr a ni ang," a ti a."(Genesis 41:35-36)  

Josephan Pharaoa mumang a hrilh fih theihna chhan chu, Pathianin Josepha finna a pek vang a ni. 

Pathianin engtin nge Josepha finna a pek kan tih chuan, fiahna tam tak leh hreawmna tam tak hmangin a ni. Josepha kha, a naupan lai daih tawh atangin, Pathianin dahna hmun tur (Destination) a relfel sak tawh a, a mumangah pawh a hmuh tira. A mumanga a hmuh atang khan, a zin kawng chu a intan ta a ni.

A mumang chu, a pa leh a u te a hrilh a, a u te an thinrima, salah an hralh a, Potifara in ah a awm a, dawta puh a nih avangin tanin (Jail or Dungeon) ah tan tir a ni a. Heng a hreawmna zawng zawng hi Lalpa kawng chu a ni, Josepha chuan Lalpan zirlai a zirtir a ni tih pawh hre loin Lalpa thu a awi mawlh mawlh a, Lalpan a fapa duat Josepha chu hreawm a tawrh lai zawng zawng pawh chuan a kutin a chelh renga, miin an hmuhsit lutuk leh a hreawm lutuk chu a phal chuang loa, Potifara in hotu a nih tir a, tanin hotu a nih tir leh a, a tawpah phei chuan Aigupta hotu a ni ta a ni.

"Vawiina kan topic chu, ava tui theih ve leh! Lalpa kawng hi chu a ngaihnawm tak zet a ni."

Topic ah let leh ang o! 

Josepha ang hian, Lalpan i naupan laiin, suangtuahna (Dream) a pek ve tawh che a rinawm a ni. Chu i suangtuahna chu i sawi chhuah hmasak ber tum pawhin, in chhungkaw zinga Pathian be pawp ber chuan, thu takah a lak pui nghal maithei che, Josepha pawh a pa Jacoban thutakah a laksak nghala, a awmzia pawh alo hre nghal a ni. Chu i dream chu, Lalpan a hmuh tir vawikhatna ah che chuan a hnai riauin i hre maithei a, mahse chu dream chu thlenga, chu dreamah chuan tha taka Lalpa duh anga nung tur chuan zir tur tam tak a awm thina, chu vang tak chuan a kawng pawh a thui thin a ni.

Josepha kha, vawi tam tak a tah zawih zawih hi a rinawm a, Pathian hnenah a vui  pawh a rinawm a ni, mi tamtak chu Pathian hnena vui loh hi in sawithei nan an hmang thin hiala, Pathian hian a hnena kan rilru zawng zawng kan phawrh chhuaha kan vui hi pawi a ti lem loa, a thu kan awi loh hi pawi a ti zawk thin a, a awmzia tak chu "vui a pawi hran loa, thuawi loh erawh nasa takin a pawi thung a ni. Pa tha chuan naupang schoola a hruaiin, a fa tan ala tha dawn tih a hriat avangin, a fa chu a tap emaw, a fa chuan "Apa ka peih lo e, min duat tawh lo a nih hi, i sual si, school a hreawm si, miin min hau nasa thei si" a tih pawhin, pa tha chuan, school a kal luih tir tho tho thin. Chu fa, pa tha enkawl chu, alo seilen hunah chuan, kapa min zirtir tlat avang khan ka lawm e, a ti let tawh thin a ni.

Hetiang ang chiah hian kan Pathian hian a fa duh laite hi, kan duh emaw kan duhlo emaw, kan tap emaw, kan vui emaw, min zirtir a duh chu min zirtir thin a. Fa thuawi chuan, chung zirtirna te chu hreawm ti chung chung leh tap chung pawhin, an zir chhuak thina, nasa takin hlimna leh lawmnain a hual vel thin a, fa thuawi lo chuan a zir duhlo a, a tawpah chuan nasa takin a tawrh phah thin a ni.

Josepha pawh kha Pathianin a zirtir ta a, a mumanga amah chibai lo buka a hmuh te, a u te ngei khan, an man a, khuarkhurumah an thlaka, salah an hralh a nih kha. A dream nen a va in persan dawn tak em! Hei tak hi kan hriat a pawimawh lai tak chu a ni, "kan dream leh kan zirna kawng hi nasa lutuk a in persan thei thin" tih hi! I dreamah chuan, midang pui thei khawpin i dinhmun alo tha a, mahse tunah i dinhmun a chhe si, i dreamah chuan pastor i ni a, mahse tunah i chhungkua a buai si, i dream ah chuan Lalpa hmel tilang leh chawimawi chungin Doctor emaw, I.A.S emaw, Sumdawng lian emaw, Professor emaw ilo ni a, tunah lah a thiam theilo pawl ila ni bawk si.

Josepha dream leh a dinhmun a inpersan chhanchu, a destination (Pathianin a dahna hmun tur) a thlen hunah, a chhanchhuah tura te dinhmun leh rilru put hmang, Pathian duh ang taka zawl dawh takaa hriatthiama a puih theihna tur a ni. Midang puitu nih i dreama, i puih tura te dinhmun i hriatthiam pui a ngai alawm, Pastor i nih huna i puih tul ber tura te, chhungkaw dinhmun i hriat a ngai alawm, Doctor, I.A.S, Sumdawng lian leh Professor nih hunah hriatna a hniam zawk leh chaklo zawk te dinhmun i hriat thiam hmasak a ngai alawm.

Tichuan, Lalpan Josepha leh keini hote hi min zirtir ta a ni, Josepha chuan Potifara in a, a zirtur leh thlemna te chu a paltlanga (pass), chu vang tak chuan Potifara in aia hreawm taninah a luh phaha, tanin ah chuan a zirlai a pass leh avangin, Pharaoa ram hotu a ni ta a ni.

Potifara in te hi kan pass ve em le, tanin te hi kan pass thei a ngem le, taninah khan e nge a pass kan ti maithei a, taninah khan mumang a hrilh fiah tih kan hriaa, mumang hrilhfiah theihna a dawnna kha Pathian atang a ni a, taninah chuan  Lalpaa awm tlatna a pass a ni. Hei hi Josepha tan pass a har tur zia kan hrelo maithei, Pathian thu a awi vangin dawtin hek a ni a, chuti pawh chuan Lalpan tanina, lut lo turin a pui loa. Chutia a puilo chung pawh chuan, Lalpaah ala awm zela, chutah tak chuan Lalpan finna nasa lutuk a pe ta a, a naupan lai chuan ama mumang awmzia pawh a hreloa, tanin a pass hnu hi chuan mumang awmzia a hre ta a, chu chuan a Destination Breaking Point (a tana Pathian dinhmun ruat tak thleng tura, a tawn tlang ngai) a tawn tlang theih tir ta a ni.

Josepha khan, Pharaoa mumang a hrilh fiah zawh chiah khan, tam lo thleng tur, paltlang dan (solution) a sawi nghala, tichuan, Pharaoan Josepha hlut zia kha a hmu ta a. Aigupta zirna sang em em, tun thlenga khawvelin an pyramid siam dan a la, chui luih luih khawpa zirnaa sang leh finna nasa tak lo hmang tawh ho, Aigupta ram mifing leh an officer leh an professor leh an scientist te zingah chuan, "Pathian schoola kal chhuak, Josepha tluk phak reng reng an awm lo, tih hi Pharaoa hian a hmua."

" Tichuan, "Hetiang, Pathian thlarau awmna mi hi kan hmu zo dâwn em ni?"(Genesis 41:38) a tih hnuah a hming nemna zungbun a pe a, Aigupta ram hotu lu berah a ruat ta a, pyramid siam tupa te, 2018 ah pawh an ruang thawih rallo tur khawpa damdawi thima te khan, Pharaoa hming nemna zungbun kha an dawng pha ve lo. Mahse, Lalpa schoola kal, Lalpa zirtirna thuawi taka zir tlattu Josepha chuan a dawng pha tlat a ni. Lalpa school, Lalpa zirtirna kha zir tha rawh, ngai ho reng reng suh ang che! Tumahin an tluk lohna tur che a, siamtu tur che a nih kha.

Bishop T.D Jake a chuan " Pharaoh did not know how to struggle, so he hire a professional struggler" a ti. Pharaoa chuan, harsatna hmuna awm dan a thiam loa, chuvang chuan harsatna hmuna awm dan thiam Josepha a chhawr a ni, a ti. Josepha hi, Pathianin a zirtir avangin dinhmun harsaah a awm fo thin a, chu chuan dinhmun harsa a awm dan a thiam tira, chu chuan mi hlu bikah Joseph hi a siam a. Keini pawh, Pathianin min zirtir a duh avangin, dinhmun harsaah kan awm thin a, heng dinhmun harsa hi mi hlu bika min siamna kal kawng a ni thin. Chuvangin, Lalpan zir tura min tih te hi, thuawi takin zir ila, i pass chhuak ang u.

(Tawngtai Dan Tur)
Lalpa, i zirtirna hi, uluk takin i thu zawm tlat zelin, ka zir theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

  

Midang Hruaitu Kan Nih Dawn Chuan, An Mahni Kan Zir A Ngai Thin (Leadership)

"Tichuan, Judate ka lak luh theihna turin Judate hnenah Juda mi angin ka awm thin; Dan hnuaia awmte ka lak luh theihna turin Dan hnuaia awmte hnenah Dan hnuaia awm angin ka awm thin, Dan hnuaia awm si lovin."(I Korinth 9:20)  

Paula hian administration (inrelbawlna) hi a sawi nasa hle a, administration tha hi, a Pathian thu a ni tih pawh hi kan pawma kan hriata, administration tha hi kan zir reng a pawimawh bawk a ni.

Paula chuan, a chanchin tha hrilna hmun tura mite hi an mizia a zir chiang thin a ni. Atheni khuaa chanchintha ava puan tum pawh khan ti hian Pathian thu chu a hril tan a "Hriat Loh Pathian tan’ tia ziak ka hmu a ni. Chutichuan hre lova chibai in buk thina kha, chu mia thu chu ka hrilh che u a nih hi."(Tirhkohte 17:23 )

Tihian, Paula hian, chanchintha a hrilh tura te, rilru put hmangte an hun kal tawh (background) te chu a lo chhui thin a, tichuan an mahni rilru khawih thei tur leh an mamawhna zawn takah chuan Pathian thu chu an mahniah chuan a thun lut thin a ni.

Rawngbawl tura a hruai leh a zirtir te pawh hetiang tho hian a hreching hmasa phawt bawk thin a,  Timothea hnenah ti hian a ti "Rinna taktak nangmaha awm chu ka hre reng si a, chu rinna chu atirin i pi Loisii-ah chuan a awm a, i nu Euniki-ah chuan a awm bawk a, nangmahah pawh a awm tih dik takin ka hria."(II Timothea 1:5) 

He tiang khawp hian Timothea ni mai lo, an chhungkua chungchang thlengin Paula hian a hriat bakah, a rawngbawl pui dang leh a hruai dangte chanchin chu chiang takin a hre hmasa thina, tichuan an mamawhna zawnah leh an mahni milpui tur takin Pathian thu a zirtira, kawng dikah chuan a hruai bawk thin a ni.

Keini pawh kan rawngbawlna kawng hrang hrangah, midang hruaitu kan ni mek tawh maithei a, kan la nih loh pawhin Pathian rawng kan bawl zel dawn a nih chuan, midangte hruaitu kan la nih hun ala thleng ang. Chung hunah chuan, kan rawngbawlna a chak zawk theih nan, kan hruai a te chu an mizia leh an rilru put hmang uluk taka kan zir chiana kan chhut chian a ngai a ni.

Chutianga kan hruaia te kan hriat chian chuan, an chakna zawnah nasa zawkin nawr nachang kan hre thei a nga, an chak lohna zawnah tanpui nachang leh dimna chang kan hre bawk a nga. Chak leh chak lo in ti nung tawn tur te in kan thawh ho tir thei bawk dawn a ni.

(Tawngtai Dan Tur)
Lalpa, midang hruaitu a nangin min ruat a nih chuan, hmangaihna nena hruai turin min pui la, kan hmangaihte chungchang kan zir fo thin ang bawk hian, ka hruai a te chungchang ka zir fo thin theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Dinhmun Derthawnga I Awmin Enge I Thlir Ve?

"Tichuan Mosia hmaah Kaleban mipuichu a tingawi thuap a,"I han thawk thuai ang u khai, i han la ang u, kan ngam ngei ngei ang," a ti a."(Numbers 13:30)  

Kaleba chuan, Kanaan mite kha han beih thuai thuai a, han lak a chak a ni. A chhanchu Pathianah a innghata, an hmelmate han beih huntur chu a nghakhlel hial zawk a ni. An mahni chaknaa an hneh theih loh tur mi lian em em, hnam lian tak tak te chu, Lalpan a hnehsak zia chu midang hnena sawi a chak tawh hial pawh a ni mahna.

Enthlatu dangte chuan an chaknaa beih an tuma, an hlau a, an ni lakah chuan, (khaukhuap ang lek kan ni an ti a) "Khau ang lekin kan inhmu a, anni pawhin khau ang lekin min hmu a ni" (Numbers 13:33). An hlau a, an zam a ni, heng mite hian an enthlak dan rilru ang chiah hian hneh pawh nise, Pathian niloin an mahni bawk an inchawimawi a rinawm a ni.

Hei hi zir chhuak ang u, kan harsatna te, kan manganna te leh dinhmun derthawnga kan awm hunah hian, kan theihnaa kan tih theih ngai loh tur chu Lalpan min tihsak dawn avangin, Lalpa kut chak chhanchhuahna changa Lalpa nasa zawka chawimawi chu kava chak tawh em! Tiin kan thinlung i siamtha sauh sauh ang u.

Keimahni chauh nilo, kan chhehvel amite pawh hian kan manganna te leh kan harsatna te hi keimahni chakna in kan daikai thei loa, Lalpa zawkin min hruai kai a ni tih hi an hriatna tur  khawpin, kan buaina lakah chuan kan theihna hi te ngawih ngawiha a lan fiah hi, Lalpan a phal a ni. 

Tah chiah chuan, Lalpaa a zawng zawnga kan innghah chuan Lalpan min chhanchhuak a nga, kan chhehvela mite, kan buaina leh kan harsatna hre ve te pawh chuan Lalpa chu innghahna tlak a nih zia, an lo hret ve phah thei bawk dawn a ni.

Kan manganna ah hian, tu ah nge kan innghaha, tu hi nge kan dinhmun a that hunah, kan chawimawi dawn? Tih hi, han in zawt chiang ve teh le.

(Tawngtai Dan Tur)
Lalpa, ka chakna bei tham em em leh ka mihringpui (hausa leh lian pawh nise) chakna nep taka innghat loin, i chaknaah chuan a zawng zawnga ka innghah zawk theih nan, min pui turin ka ngen a che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

CHHUNGKUAA NGAIHSAN TUR DIK HRIAT

"Zawlnei Hosea chuan, "LALPA hriatna chu i um zêl ang u khai, i hria ang u" a ti."(Hosea 6:3).

Mahni chhungkua țheuh inenfiah ta ila, eng nge kan ngaihsan mek?

Zaithiam ngaisang chhungkua te, modelling lam ngaisang te, sports lam ngaisang chhungkuate a awm theih; sual a ni hran lo.

Mahse chung thilte chu chhungkaw nuna pawimawh pahnihna a ni a; ngaih pawimawh bera neih chi chu a ni lo.

Hausa hrim hrim ngaisang kan tam avangin hausak thut châkin mi tam takin sum thianghlim lo an chhek khawl a, kan chhiatpui bawk. Khawvela mi ropui leh hlawhtlingte ngaisanga an style ringawt pawh entawn chhungkua a awm theih bawk. Zui tlak an ni meuh em tih chu thu hran ni se.

Halverson-a chu thil chhe siam țhin a ni a. Nuam ti takin hna a thawk kauh kauh a. Chutih lai chuan a fateho chu țhenawm naupang dangte nen an infiam nak nak a.

Nakinah chuan an zinga pakhat chuan, "Ka pa chuan America President a hria asin" a ti a. Pakhat chuan khawvela tennis star ropui tak chu a pain a hriat thu a sawi a.

Pakhat leh an State Governor nena a pa an inhriat thu leh chaw te an ei dun țhin thu a sawi leh a. Tlêm chuan boruak a reh deuh a. Nakinah chuan a aw hriat țhan êm êm chuan dang âwk angreng takin, "Ih ih ih... ka pa chuan Pathian a hria," a ti ta khauh mai a.

Halverson-a chu làwm avangin a biangah mittui a luang zawih zawih a. A fapain "Ka pa chuan Pathian a hria" a tih zêl theih nân țhingțhiin a țawngțai ta mawlh mawlh a.

Chhungkua hian khawvel thil, reilotea chuai leh mai țhin hi nge kan ngaihsan, Lalpa hriatna? Pathian, Jehova hriat hi inchhuanna thamah kan ngai em? Eng nge in chhungkuain in ngaisan ber ni ve le?

Pathian Isua, a hming ka hria,
A hming chauh ka ring a;
Ama'n min timualpho lo vang,
Ka beisei thlawn lo vang.

(Tawngtai Dan Tur)
Lalpa, nangmah ai ngaihsan leh ka rilrua dah tam ka lo nei a nih chuan min ngaidam la, nangmah tluka dahsan tur leh rilru luahkhat tir tura duhawm tumah an awm lo a ni tih hi ka hriat  a, i kawnga ka zawha, i thu ka zawma, ka chanchin miin an sawi hunah nangmah tih mi tia, sawi ka nih theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.