Pathianin Min Awmpui

"A ni, thihna hlim kawr ruam zawh mah ila, thil tha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan thin a ni."(Sam 23:4)

Hei hi ringtu zawng zawngte hian, kan nun eng emaw hun laiah kan in zawt thin. Chu kan inzawh thin chu "Lalpa'n min awmpui tak tak em le?" tih hi a ni.

Davida chuan "Thihna hlim kawr ruam zawh mah ila, thil tha lo reng reng ka hlau lo vang; nang ka hnenah i awm si a," alo ti a. Davida hian Pathianin a nun zawng zawngah a awmpui a ni tih hi a chiang a ni.

Kan nuna thil tha a thlen lai hi chuan, Lalpa'n min awmpui vang alawm, tiin midangte kan hrilh thei mai thin a, mahse chhiatna tawp khawk a rawn thlenga, chhungte an thi emaw, kan tih duh hauh loh sual kan han tih palh changte hian, "Lalpa'n min awmpui tak zet em le?" tiin kan in zawt ru fo thin.

Heng hun zawng zawngah hian, Lalpa'n min awmpui thin zia tilangtu chu "Thiltha engtin emaw tak, herchhuak tura beisei chunga nun kan hmang leh theih thinna hi a ni."

Mihring lama kan innghahna ve ngawih ngawih kan nu leh pate emaw, tupawh ni ta sela, min han thihsan hian, Pathianin min awmpui a nga, kan awm thei mai ang tiin mahni leh mahni kan inhrilh thin a. Chu bakah, nu leh pa in an la dampui laia, puitling hleitheilo te pawh hi, an nu emaw an pa emaw an chan hnua, puitling ta zawk te pawh an awm thin, hei hi Lalpa min awmpui zia tilangtu a ni.

Mi thenkhatte pawh hi, an chhungkua an han tla bal tak taka, chuta tang chuan innghahna tur an neih loh zia an han hriaa, Lalpaa innghat chungin theih tawp an chhuaha, mi hlawhtling ber te an rawn ni chho leh thei thin a. Hei hi Lalpa'n min awmpui zia alanna chu a ni.

Tin, hun tawnin a zir loh avanga, suala tlute leh sualin thuk taka a hliamte pawh hi, sualah hlimna a awm loh zia an han hre chhuaka, theih tawpin Lalpa lam an han hawia, midangte chhanchhuaktu tha tak an ni leh thei hial thin, hei hi Lalpa'n min awmpui zia a lanna chu a ni.

Mi tha zawk ni tura chakna kan nei tih pawh kan in hriat ngai reng reng loh lai hian, Lalpa kutin min vawn tlat avangin, chakna nasa tak, Lalpaa chakna chu, anin min awmpui reng thin avang hian, kan lo nei reng thin a lo ni.

Kan nun kawi tinah hian, chhut chiang thin ila chuan, "Lalpa Ka Lawm E, Min Awmpui Avangin" kan tihna tur khawpa Lalpa thatna hmuh tur a awm reng a ni.

(Tawngtai Dan Tur)
Lalpa, min awmpui a ni tih hi, ka hria emaw ka hrelo emaw, nangin min awmpui reng tlat avangin ka lawm e, i awmpuina ka chan avang hian mi tha zawk ka ni theia, mi tha zawk ka nih theihna turin min pui zel ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

A Hmasa Berah Pathian Dah Ang Che (Put God First) Denzel Washington Motivational (Part 3)

"Thil tha ti atan Krista Isuaah chuan siama awmin ama kut chhuak kan ni si a;chu thil tha tih chu kan awmna turin Pathianin a buatsaih lawk a ni."(Ephesi 2:10)

U.S ah khuan mi hlawhtling bik leh mi entawn tlak nia an hriat te chu, university graduation day ah thusawi turin (commencement speech) an sawm thin a.

Denzel Washington pawh mi entawntlak (influencial person) a nih avangin, 2015 ah Dillard University graduation day a commencement speech nei turin an sawma, tah chuan Pathianin a nun a hruai nasat zia te leh hlawhtlinna kawnga nun dan pawimawh  bika a hriatte a sawi a ni.

A thupui chu "Put God First" tih a ni a, thupui pathumin a sawi a, thupui pakhatna leh pahnihna kan tichhuak tawha, kan la chhiar lo a nih chuan, chhiar ngei kan tum dawn nia.

A thusawi hi, tawngtaina zawh chiahah a link kan dah bawk e.

Pakhatnahttp://nungturin.blogspot.com/2018/08/a-hmasa-berah-pathian-dah-
ang-che-pu.html
Pahnihnahttp://nungturin.blogspot.com/2018/08/a-hmasa-berah-pathian-dah-ang-che-put.html?m=1

Thupui pathumaah hian Pathiana alo innghah zia alang ti ila kan sawi sual awm lo e.

Pathumna

Ruang Phurna Motor'in, Bungraw Dahna A Hnuk Tel Ngai Lo (you will never see a u-haul behind a hearse).

Kuang hnuhnaah bungraw dahna a tel ve ngai lo, eng ang pawhin kan dam lai hian, sum thawk chhuak tam mah ila, kan thih hnuah kan chhawm theilo a. A pawimawh ber chu, "i neih tam leh i neih tlem lam a ni lova, i neih kha engtin nge i hman tih hi a pawimawh zawk a ni."

Mi thenkhat chu, doctor te, ukil te, zirtirtu te, nurse te, scientist te, Pathian rawngbawltu te in la ni ang, eng mi pawh ni ula, "he khawvela mahni hma kan sial theih dan ber chu midang puih hi a ni" tih hi inhriat hmaih ka duhlo. Midang puih chu, e nge mahni hmasial a nih theihna kan ti a ni maithei e, ni e midang kan puih chiah hian kan thinlungah hlim veng vengna leh ngaih thatna a rawn thleng thin a, midang kan puihna atanga hlimna kan dawn let hi, rangkachak leh tlereuh te, motor man to leh in lian ten hlimna min pek aia, nasa zawk hlimna min pe thin. Chuvang chuan, midang puihna ah hian, hlawhtlinna tak tak alo awm  zawk a ni, hei vang hian mahni hma kan sial theihna nasa ber chu midang puih hi a ni.

A tawp ber ah chuan, hei hi ka ngen duh che u a, i mut dawnin in sleeper chu, in khumhnuai in ban phak chang chang khawpa thukah chuan dah ula, tichuan zing in tawh huna in lak leh dawn hunah chuan, i sleeper awmna chu a thuk em avangin in thingthit a ngai a nga, chutianga in thingthit lai chuan," Pathian hnenah a khawngaihna avangte, a zahngaihna avangte, zawl dawh taka a hriatthiam che u avangte, a finna a pek che u avangte, enkawltu a pek che u avangte, a hmangaihna avangte, a dawhtheihna avangte, inngaihthlawm theihna a pek che u avangte, a thlamuanna avangte, hmuingilna a pek che u avangte, lawmthu in sawi dawn a nia.

Tin, Pathianin ala tihsak tur che u avangin lawmthu sawi lawk thin ang che u, a tihsak tur che u chu in ta a nih tawh avangin. Chu chu ka nun ka hman dan pawh a ni, chu chu tuna ka nihte ka nih theih chhan a ni, lawmthu sawi rawh u, in ta tur a ni si a. 

Thiltha thleng tura, duhna i thinlunga awm kha, Lalpa  remruatna a, i ta tura ruatlawk a nih zia tichiangtu a ni

Thil tha i duh kha, Lalpa hnenah lawmthu sawiin ka ta a ni ti la, i duh chu nei turin nasa takin thawk la, i neih hunah chuan chaklo zawkte ban la, an duhte chu an neih ve theih nan pui la, zirtir ang che.

Mahni nun dan tur chauh ngaihtuah thin mi ni suh ang che u, a tha zawnga danglamna thlentu nih tum tlat zawk ang che u.(Don't just aspire to make a living, aspire to make a difference).

(Tawngtai Dan Tur)
Lalpa, i thisena i lei ka ni a, i thisena i leite chu nangin theihna nasa tak i pe thin a ni tih hriaa ringin, kan chhungkua te, kan khawtlan te, kan thawhna hmunte leh ka awmna hmun apiang a tha zawnga thlak danglamtu ka nih theihna turin min pui ang che, Amen. Ti ang o.

Denzel Washington commencement speech link https://youtu.be/BxY_eJLBflk

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

A Hmasa Berah Pathian Dah Ang Che (Put God First) Denzel Washington Motivational (Part 2)

"Rilru lo ruahman lawkna chu mihring chan a ni a, Lei chhanna erawh chu LALPA atangin a ni."(Thufingte 16:1)


"Remruat lawk lova thil tih a hlawhtling duh lo. Remhria an tam chuan a hlawhtling thin."(Thufingte 15:22)

Dezel Washington hi mihlawhtling a nih bakah mi entawn tlak a nih avangin 2015 ah Dillard University graduation day a commencement speech nei turin sawm a ni a, a thupui chu "Put God First" tih a ni a. Nimin lamah khan, thupui pakhatna kan rawn tarlang tawha, kan la chhiarlo a nih chuan, kan chhiar ngei a tha awm e (http://nungturin.blogspot.com/2018/08/a-hmasa-berah-pathian-dah-ang-che-pu.html). Vawiin ah hian thupui pahnihna kan rawn tar lang thung a ni.

Pahnihna 

Thil Lianthamah Ngei Hlawhchham Rawh U.

Vawiin hi, i nun lo la awm zel tur bul intanna a ni a, in hma hun in thlir chuan a hlauh awm viau maithei a, khawvel thar a intana, khawvel nun harsa tak pawn lamah sawn a awm a. Mahse, vawikhat chauh kan dam dawna, chuvang chuan” in tih duh ber leh tih i phur reng theih tur chauh ti ang che u.” Thil in tih duh chu, a fuh dawn leh fuh dawn loh” tichhin rawh u, thiam bik ni turin (take chances, profestionaly),” hlawhchham hlau suh u.

Hman lai IQ test (mihring rilru chak zawng tehna) ah chuan, killi neiin chhut han pakua (nine dot’s in square) a awm a, chhut han zawng zawng pen lakang loa, thai zawm theih dan awm chhun chu, a killi atang a rin chhuah a ni. He tiang ang deuh hian, midang lo tih tawh thin bak tih tuma ngaihtuah hlau suh u (think outside the box). "Thil liantham tih tum vanga hlawhchham hlau suh u, thil lian tham ngaihtuah hlau suh ang che u."

Tin, pawimawh leh deuh kan hriat tur chu, "tum bik telloa suangtuahna ringawt chu, suangtuahna ringawt a ni thin (dreams without goal are just dreams)," chu chuan, hnualna nasa tak a thlen thin a ni. Chuvang chuan, suangtuahna (dreams) i neih rualin tum bik (goal) nei ang che, dam chhung atana tum bikte, kum khat chhunga atana tum bikte, thla khat chhung atana tum bik te, ni khat chhung atana tum bikte, kan neih thin a pawimawh a ni. Ni tinin, ni khat atana tih tum bik ka insiam thin a, a chang chuan ni khat atana ka thil tih tum chu, midang kal bo tir te a ni thin, kan tum bik chu a te tham pawh a ni thei a, mahse tum bik (goal) kan neih tlat a pawimawh a ni.

Tichuan, nuna kan thil tumte hi, kan hlawhtlin theihna turin, mahni invawn (discipline) leh beih tang tangna (consistency) kan neih a ngai a ni. Hlawhtling tur chuan  nitin mahni kan invawn tlata, kan tih tur kan tih tang tang a ngai a ni, ni khat atan ni mai loin ni tinin, kan in vawna, kan tih tang tang a ngai a, chutiang a ti tur chuan, a zira kan zir pawh a ngai hial ang.


Chu bakah, nitin ruahmanna mumal (plan) kan siam a ngai a ni. Tihian, an sawi thin, hlawhchhamna alo awm chhan ber chu "ruahmanna lawkna a hlawhchham vang a ni loa, ruahman lawkna neih loh vangin a ni zawk (we don't plan to fail, we fail to plan)."

Dik reng tur pakhat chu, "Thawh rimna hi, hlawhtlinna a ni" tih hi, nasa taka thawh rim hi, mi hlawhtlingte thil tih thin a ni. Mahse, kan khawvel awmna mekah hian,"thil i tih tam vang ringawtin, i tifel tam chuang lo thei, i thawh tam vang ringawtin i hlawhtling chuang miah lo thei," thawh tam leh hmasawn hi, hriat pawlh loh tur a ni a, ka nu chuan "i tlan kual theih vangin, i tlan kual nasa thin bawka, khawi hmun mah i thleng thei lo a nih hi" min ti thin a.

Chuvang chuan,"beih ngar ngarte, tum bik neih tlatte, hmasawn zelte" hi hlawhtlina tur chuan a pawimawh a ni. 

Ruahman lawkna eng ang pawh lo siam ila, a hlawhtlinna chu Pathian kutah a awm a, mahse ruahman lawkna kan siam loh chuan, kan Pathian tan pawh hian, min hlawhtlin tir dan tur a vang maithei a ni. Kan Pathian chuan, kan hlawhtlinna ai leh kan hausakna ai chuan, nungchang (character) tha kan neih a ngai pawimawha, mahse mumal taka ruahmanna (plan) nei ngai lo chuan, a tihsual leh a tihthat a hriat theihna turin ruahmanna a neih miau loh avangin, character (nungchang) tha neih kawngah pawh hma a sawn hleithei ngailo a ni. 

Ruahman lawkna (plan) kan siam a pawimawh a, mahse chutah chuan, a tawk mai loa, Lalpa duh anga ruahman lawkna kan siama, a taka chantir turin Lalpaa innghat chunga theih tawp, kan chhuah a ngai bawk a ni.  

(Tawngtai Dan Tur)
Lalpa, i rawngbawlnaah hma ka sawn theih nan, ruahman lawkna ka neih a tula, ka nuna ka tumte ka thlen theih nan ruahman lawkna ka neih a ngai bawka, hei vang hian, engmah ka tih hma hauh atang hian, i duh anga ruahman lawkna ka siam theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

A Hmasa Berah Pathian Dah Ang Che (Put God First) Denzel Washington Motivational (Part 1)

“Amah tihtute duh chu a hlawhtlintir ang a; An au thawm a hria ang a, anni chu a chhandam ang.” (Sam 145:19) 

Flim en thin pangngai chuan Denzel Washington hi kan hre theuh awm e, kristian tha tak a ni a, pastor ni turin Pathianin a koh ni in a in hriaa, mahse flim ka channaa Pathian zirtirna ka pho lan hian, pastor ka nih aiin, mi tam zawk hnenah Pathian thu ka thlen theih ka ring zawka, chuvang chuan flim ka chang zel mai a nge, tiin a sawi thin a ni.

Mi hlawhtling bik leh entawn tlak te hi, America ah khuan, University graduation day ah, commencement speech nei turin an sawm thin a, University thenkhat chuan Billy Graham te leh Bill Gates te pawh an lo sawm thaw nghe nghe a ni.

Dezel Washington hi 2015 ah Dillard University graduation day ah commencement speech nei turin sawm a ni a, a thupui chu "Put God First" tih a ni, media then khat chuan in fuihna thu pangngai sawi tur a nih laiin, rinna thu a sawi a, tiin amah dem zawngin thu an chhuah nghe nghe a.

 A ni lah hian, amah chawisangtu chu a hai loa, zah pawh a zah pui lo tak zet a ni. A thusawi hunlai hian, U.S president kha Obama a ni a, a liberal zia pawh kan hre theuh awm e. Tin, eng university ah pawh president hian thu neihna sangtak an nei thin a. Chung tiang pawh chu lo ni sek sek, hemi tuma Denzel'n thu a sawi hian, introduction tawite a nei a, thu tak tak a sawi dawn ta a, mipui an reh thuapa, a thusawi ngaithlatu naupangte duhsak takin leh a Pathian zah pui eih lovin, a tir phat atang "Put God First" a ti nghal hmiah a ni.

Pakhatna:-

A Hmasa Berah Pathian Dah Ang Che

In thil tih engkimah Pathian dah hmasa rawh u, keimaha inhmuh leh inhriat zawng zawng te, ka thlen tawh chin zawng zawngte, ka neih zawng zawng nei tam em em lo mah ila, heng zawng zawng ka neih chhan chu, Pathian min khawngaihna avang a ni.

Kum 40 kalta 1975 ah khan, college ka kal a, ka thiam lo khawp mai a, 1.7 GPA chauh ka nei a, college ka chhuahsana, kan college bang chu, ka nu Beauty Paloor ah ka kal a, dar thlalang hmaah chuan ka thu a, ka hnung atang hian nu pakhat hian min lo en renga, ka hawi kuala, min lo la en zel a, ka lu ka kuna kan hawi chho leh pawhin min lo la en reng a. Tichuan, min rawn pan pahin, tu emawni in pen leh paper min han pe teh u, hrilh lawkna puan chhuah tur ka nei a ti a. 

Tihian ka henah chuan a rawn sawi ta a, bawiha, khawvel ila fang a nga, mi makaduai chuang hnenah thu ila sawi dawn a ni, tiin min hrilh a. Kha mi hun lai khan ka tih tur ber pawh ka hre tawh lo a, sipai ka tang mai dawn mawni le te ka ti a. Tunah erawh chuan, Pathian min khawngaihna avangin, khawvel hmun hrang hrangah ka kal kual tawha, mi maktaduai chuang fe hnenah thu ka sawi tawh bawk a, kha nu thu min hrilh kha kala theihnghilh ngai lo a ni.

Khawvel ka zin kual leh mi maktaduai hmaa thu ka sawi te chu, ka nun a thil thleng pawimawh ber a ni loa, a pawimawh zawk chu " Venhim ka ni a, ka kalna tur  kawhhmuh ka ni a, ka tih dik loh hrilhfiaha zirtir ka nih hi a ni (I've been protected, I've been directed, I've been corrected)."

Pathian hi, ka nunah ka awm tir renga, tichuan a nin "tlawm taka nun hman thiamna min pe a, a hnena ka awm loh chang pawhin, a ni chu ka hnenah a awm reng thin si a." Hei vang tak hian alawm "Lalpa ah awm reng rawh u, in thil tih engkimah a hnenah awm reng ang che u." Ka tih ang hi tih in duh chuan, ka tih ang hi ti ve rawh u, Pathianah awm tlat rawh u.

(Tawngtai Dan Tur)

Lalpa, ka nun engkimah hian nangmah ka dah hmasak ber theihna turin che in leh, nangmaha ka awm tlat theihna turin, min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

ISUA TIH ZAWH SA RIN A TAWK MAI LO

"Fapa meuh pawh ni mah sela, a thil tuarahte chuan thu âwih a zir ta a ni. Chutichuan, tihțhat famkima lo awmin, a thu âwih zawng zawngte tân chatuana chhandamna bulpui a lo ni ta." (Hebrai 5:9)
        
Charles Finney-a chu a hun lai chuan America rama thuhriltu ropui berah an sawi hial thin a. A thu zirtir chu a belhchian dawl em em tlat a ni. Evangelistic Campaign / Crusade a neih reng rengin, inhlân tûra sâwmna a siam thuai thuai ngai lo. Thlakhat chhûng vel zan tin thu a sawi char char thin a, Isua an zui hmain an zui hnua an nih dân tûr leh an tih tûrte kimchang takin a hrilh dap phawt thin. Min chhandamtu Lal Isua chu rin a pawimawhna te, Lal atâna neih ngei a pawimawh thute, a thupêkte zawm a pawimawhna te a sawi hmasa vek a, a tawpah inhlân tura sâwmna a siam chauh țhin a ni. Tichuan, a rawngbâwlnaa inhlante chu zaa 85 atanga 90 vel chu Lal Isua zuitu țha tak an ni zui țhin a ni. Chung lai chuan an ram ringtu nun chu a la duhawm em em a ni.
        
Charles Finney-a hnuah thusawi thiam zawk tak tak an lo chhuak zel a. Mahse, chumite chuan Pathian thu tak an sawi tluantling țha ta mang lo tlat a. A awlsam zawngin an sawi ta ber a. Chu chu Lal Isuan chhandamna hna kraws-a min thawh zawh sak tawh rin mai kha chhandamna atân a tâwk a ni tih an rawn sawi uar ta em em a. Chutianga Isua tih zawh sa ringa inhlân thei apiangte chu chhandam an nih tawh thu an puan sak thin a ni. Isua chu ring a, amah chu Lal atân neih a, a thupêkte zawm a țulna an sawi thleng ta țhin lo va. Sawi thlen a hnekin thil țul lem lovah an sawi zâwk mah a ni. Chuvângin, America rama țhalai piang tharte chu Isua tih zawh sa ringa inhlan thar an ni ta ber a. Isua chu Lala neih leh a thupêk zawmte chu thil țha tiha chhandam nih tumna mai mai angah ngaiin, țul an ti lem ta lova. Mahse, a rah chu a lo chhe ta em em si a ni. Țhalai tam ber chu piang thar țhin, da leh țhin an ni ta ringawt a, an ram Kristianna chu a lo dal ta tial tial a, an nun pawh a lo tla chhe ta tial tial a ni.
       
Mizoramah pawh hian kan Pathian thu inzirtir dan hi kan ennawn a ngai ta. Change (inthlakthleng) a awm a ngai. Camping kan va lut nasa tawh tak em! Isua zuitu nghet tak ni zui thei kan va tlem țhin si em! Lal Isuan kraws-a min tih zawh sak tawh rin mai hi chhandamnaah kan inzirtir a, chu chu a tâwk kan ti ve ta tlat mai a. Chuvângin, Isua tih zawh sa ring a, amah Lala nei si lo leh a thupêkte zawm țul ti lo kan tam avângin kan kristian nun hi a dik thei ta reng reng lo a ni ber mai. Min thawh saktu Isua zâwk kha rin a, amah chu Lalah neih a, a thupêkte zawm hi chhandamna a ni tih kan inzirtir a ngai a ni. Evangelist-te pawhin kan Pathian thu sawi dânah Change (inthlakthleng) kan siam a ngai ta. Lal Isua chu, a thu âwih zawng zawngte tan chatuana chhandamna bulpui a lo ni si a (Heb.5:9).

(Tawngtai Dan Tur)
Lalpa, nangmaha nun nei tur chuan, Lal leh Chhandamtua ka pawm che a, ka Lal i nih anga i thu ka zawm hi a ngai a ni tih hriain, ka rin che a, ka rinna che chu thiltiha ka tih puitlin theina turin min pui ang che, Amen. Ti ang o. 

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Khawngaihna Mak Mawi Leh Duhawm (Amazing Grace How Sweet The Sound)

"Tuin nge thiam loh chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni."(Rom 8:34) 

"Khawngaihna mak mawi leh duhawm" hla hi kan hre vek a nga, a sap tawng chuan "Amazing Grace How Sweet The Sound" a mizo tawngin a nihna ngau ngauin han dah ta ila, "Khawngaihna Ropui, A Thawm Ringawt Pawh Ava Mawi Em" tih a nih a rinawm.

He hla phuahtu hi John Newton a ni a, sala sumdawng tiin mi tamtak chuan an sawi thin a. Sal phur lawng a thawk a ni zawka, a thawh rei hnuah sal phur lawngah chuan captain a ni ta a. Amah hi nun buai tak nei, mahni in thah hial te pawh lo tum tawh a ni a. Chu mai bakah sal phur lawngah hun rei tak a thawh avangin, mi tamtak rawva takin a sawisak tawh a rinawma, mi tamtak an chhungte hriat loha rukbo pui tu a nih tawh a rinawm bawk a.

Chu John Newton'a chuan, Isuan a hmangaiha, a tihsual tawh zawng zawngte nen ala pawm duh a ni tih a han hriat chuan "Lal Isua Khawngaihna Ropui, A Thawm Ringawt Pawh Hi Ava Mawi Tak Em,"chu khawngaihna chuan a chhandam a ni tih chu tihian a sawi a "That saved wretch like me," a nihna ngau ngauin han dah leh ta ila "Kei Ang Mi Sual Hnawmhnawk Min La, Chhanchhuak Duh hi," alo ti hial a ni.

Pathian hmangaihna leh khawngaihna hi, amaka a mawi bawka, a thawm ringawt pawh hi a mawi ngawih ngawiha, he hmangaihna leh khawngaihna hian, mi tamtak lawm avangin an biangah an mittui, alo dan zawh tir hlei theilo fo tawh thin a. John Newton'a te ang, tui finriat tuifawn hmaa zam ngailo leh, English sipai huaisen leh rawva ber ber te, hotupa ni thei tur khawpa rawva leh huaisen pawh hi, alo tui ral tir thei teh meuh mai a. Pathian khawngaihna hi chu A Amazing (A Ropui) tak zet zet a ni.

He Pathian Hmangaihna leh Khawngaihna hi, kan tihsual tawhte hmaah hian a chau ve mai mai loa, a zam chhe ve mai mai lo bawk a, "I sual ang ang khan, min rawn pan rawh kalo tuam dam ang che a nga, mi tharah kalo siam bawk ang che" tiin min sawm reng zawk a ni.

Ni e, Lal Isua Krista khawngaihna hi alo nasa em a ni. Tunah nang leh kei hi, van rolrelna hmunah chuan min tanin min dinsaka, kan tihsual lai te hian, tihian min lo tan ka ring thin, "Tihsual chu a tisual ngei a, mahse a sual man khu keiman kross ah, tiril khur zawih zawih khawpa na tuarin ka tlak sak tawha, chu vang chuan hmangaih tlak a ni a, chu vang chuan khawngaih tlak a ni" tiin van rorelna hmunah chuan kan Lalpa Isua Krista hian, min tan reng hi ka ring thin.

Nasa taka tisual tawh a, tluchhe tawhte pawh min tuam damin, a hmanraw hriam berah min la hmang duh thin hi, a khawngaihna hi a nasa lutuk a, a mak tih mai loh chu sawidan tur pawh a awm lo a ni ber e.

Hmangaihna leh khawngaihna avangin he leiah kan Lalpa Isua Krista chu, van Lal thutthleng kalsanin a rawn kala, kross ah thihna rapthlak tak tuarin min chhandam a. Tunah van rorelna hmunah chuan, min la tan leh zel hi, a hmangaihna leh khawngaihna hi, a nasa tak zet zet a ni.

(Tawngtai Dan Tur)
Lalpa, ka sual lai pawh hian, i hmangaihna leh khawngaihna kut chuan min vuat tlat a ni tih hre rengin, ka tisual a nih pawhin i lamah ka kir zel theihna turin min pui ang che, Amen. Ti ang o.

LEHKHATHAWN (Love Story)

"Ka Pa,rem i tih chuan he no hi ka hnen ata la sawn rawh; nimahse keia thu ni lovin, nangma thu thu ni zawk rawh se, a ti a."(Luka 22:42)

Kum eng emaw zah, Pathian min kohna a ni a ringin, mi fuih (counseling) hna chu ka thawk ve zela. Nikhat chu tlangval pakhat, lehkha hi ka dawng hlawl mai a, lehkhathawn ah chuan Mark Johnson, Tenise Vill, tih hi a in ziak a.

Mark-a lehkha thawn chu ka han hawnga, hetiang hian:

Mark-a:
             "Kum 4 lai kal taah khan duhthusama nalh Kristian nula Priscilla-i ka tawng hlauh mai a. Hun a liam zel a, amah ka hmangaihna pawh chu a thanglian chho zel a. Thil tamtak kan han sawi dun thin hian a mamawh ka hriat tluk zet hian ka mamawh pawh hi a hre em em a. Kan chhungkaw nun hi a chhiat dun em avang leh a Kristian nun loh lutuk avang hian chaw ngheiin kan tawngtai dun fo thin. Amah avang hian Pathian hnenah thingthiin lawmthu ka sawi chamchi thin.

Nimin khan biak in pana kan kal dun laiin hun tha niin ka hria a, ka hmangaih zia leh neih ka duh thu ka hrilh a. Ka thusawi chu a ngaithla a, mahse engmah a sawi lem lo. Tukinah, 'Khawngaih takin hmangaihna thu chu min hrilh tawh lo hram rawh. Midang pasala nei turin ka tiam daih tawh alawm,' tia phone a mi han hrilh chu! ka phu zawk mai. Aw, min va khawihna tehlul em!

Ka thinlung zawng zawngin ka la hmangaih reng mai si a, midang pasala a neih hi ka phal ngang lo. Tlang takin min hrilh mahse Pathianah rinna ka nghat tlat a, Pathian hian midang neih a rem ti lo tih ka hria, amah hi Pathian thil thlawn min pek liau liau a nih avangin.

Vawiin chuan amah hian min nei ngei ang tih Pathianah rinna ka nghah tlat thu ka hrilh a. Pathiana rinna nghattute chu an hlawhchham ngai lo tih ka hria a ni.

Tichuan, Marka chu tawngtaina nena Pathian ka rawn hnuah tihian ka chhang let ta a ni:

Duhtak (Dear) Mark-a,
            Eng tiangin nge Josepha chu Aigupta-ah bawih atan hralh a nih Bible-in min hrilh (Gen 39:1-21). A bei a dawng em? Tehreng mai! Mahse kum tamtak hnuah a unaute hnenah nangni chuan ka chungah thilsual tih in rilruk a, nimahsela Pathian chuan vawiin ang hian mi tamtak nung dama chhanhimna tura thil tha chantir a rilruk zawk a lo ni si a. Tunah kan chhungkaw dam khawchhuah nan Aiguptaah hian ka enkawl thei che u a ni (Gen 50:20) a ti a ni.

Mark, ngun takin ngaihtuah teh. Josepha ang hian Pathian i rin a ngai a ni. I damchhung nun atan ruahmanna tha tak a nei tih hi ring ang che. Priscilla-i hian midang a va nei pawh a ni mai thei. Chutiang a nih chuan i bei pawh a dawng hle ang. Tichuan eng nge i tih theih tak ang? Pathian hian i kawppui tur leh i nun pumpui atan thil ruahman tha chungnung a nei tih i ring tlat thei a ni. 'Min nei ngei ang tih Pathianah rinna ka nghat tlat' i ti a, Mark-a, hetia i sawi hian Pathianah rinna i nghat miah lo, nangmahah a ni rinna i nghah zawk ni. 'Eng ruahmanna hi nge ka tan tha ber ang tih ka hria a, Lalpa, ka duh ang hi min tihsak ang che' i tihna a ni. Lalpa chuan :

Nangni lama ka thil ruahman chu ka hre si a, nangmahni ti chhe tur che u ni lovin tanpui tur zawk che uin... Hun hnuhnunga beiseina pe tur che uin, a ti a. (Jeremia 29:11)

Lal Isua chuan heti hian tawngtai dan min zirtir: Ka thu ni lovin, i thu ni zawk rawh se. (Lk 22:24)

Mark-a, Kristian tha tak i ni a, Pathian pawh i ring e. Mahse tun aia thuk lehzuala i rin hi a ngai a ni. Nangmah i inrin ai khan Lalpa chu i rin a ngai a, hetianga tawngtai thin hi i mamawh a ni:

(Tawngtaina Dan Tur)
Lalpa, midang a neih chuan ka bei a dawng hle ang. Mahse ka nun atan ruahmanna tha chungchuang i nei tih hi ka thinlung hian a hre reng ang. Chuvangin ka fakin ka chawimawi ang che a nga, i rawng pawh ka bawl zel ang. Nangmaha innghah tlat hi ka thlang e. Ka thu ni lovin nangma thu ni zawk rawh se. Amen.

(Note : a chunga hming te khi hming tak thup sakin hming lem hman a ni e.)

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

HMANGAIHNA (Part 4)

"Hmana ka hnena lo lang Lalpa chuan, "Hmangaih tawp lovin ka hmangaih che a, ngilnei takin ka hruai zel ang che," a ti a."(Jeremia 31:3)

Pathian chuan kan nihna angin min  hmangaiha a chhanchu Hmangaihna Pathian(1 Johana 4:8) a nih vang a ni. A hmangaih lo thei lo che a, a chhanchu hmangaihna chu a nihphung a ni a, a nihphung pelin a che thei lo a ni. 

Shay-a chu thinur takin an inchhungah chuan a lut a, kawngkhar a khar bur a. A chhungten a chhan an zawh pawhin vin takin lo buai lo turin a hrilh a, room-a a luh chhoh pah chuan a nau thil ei lai chu a tihbuak sak bawk a. A room-ah chuan nilengin a tawm a, a thinrim em avangin bang a hnek a. A rilruah chuan thil chhe pui pui tih duhna a rawn lang zut zut mai a ni. Rei vak lovah chuan a thinrim chhan chu a ngaihtuah chiang a, khati taka a chhungte vin a, a nau chunga sualna tur khawp em chu niin a hre lova, a inthiam lo hnuhnawh leh hle a. Tichuan, nilengin a thinur lai pawhin Pathian chuan a car khalh lai te leh a chet velnaah a lo veng reng tih a ngaihtuahna chhuak a. A tisual chung pawhin Pathian chuan a hmangaih reng tih chu a ngaihtuah neuh neuh ta a ni. 

Hetiang hian i ngaihtuah ve ngai em? Thil i tibuai chingchi vet vek a, mahse Pathian chuan a lo la hmangaih reng bawk si che a. A hmangaih chhan che chu a thil siam i nih vang a ni. 

Nupa thenkhat chu fa an han nei a, lawm em em leh khawvela hmuh tha ber hmu ang maiin an naute chu enin an mitmengah chuan hmangaihna a zam vel a. Mahse nau piang hlim thenkhat hi chu an duhawm hran lova, chutiang ema han en ngawih ngawih tlak an tam lo hle. Mahse naute nu leh pa te tan erawh chutiang a ni ngai hauh lo thung. An naute chu eng anga tha lo pawh nise an tan chuan khawvela duhawm ber a ni tlat. Enga ti nge? A chhan chu an fa, an rila rah a nih tlat vang a ni. Chutiang chiah chuan Pathian siam, a fa i ni a, i duhawm loh leh i sual lai ber pawhin a hmangaih tlat che a ni.

Engtin nge thil i tihsual zawh chiah pawha Pathian hian ala hmangaih reng theih che tih i ngaihtuah ve ngai em? Thil sual kan ti zo chiah pawh hi Pathian chuan min hmangaih loh sawt phah chuang lo a ni. Min hmangaih lutuk a, kan sualna te pawh thai bo vek turin kan tan a thi a ni. "Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a" (Sam 103:12). 

Pathian min hmangaihna chu a nep thei em? Teuh lo mai. Rom 5:8-ah hian engtiang takin nge min hmangaih han chhiar teh le: "Nimahsela Pathian chuan a mi hmangaihna chu fak tlakin a lantir a, mi sualte kan la nih laia Krista kan aia a thih avang khan." Pathian chuan kan sual lai pawhin min hmangaih em em a, a fapa meuh kan tan a rawn thi a ni. Rom 8:38-39-ah chuan Pathian hmangaihna hian eng lak atang maha min then theih loh thu a sawi a ni:" Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a."

Hei hi vawng reng rawh: Pathian hmangaihna che chu a chuai thei lo, mahse Lal leh chhandamtua pawm duh lovin i tlanchhiat san erawh chuan i thih hnuah hremna chu i tawk ngei ang. Mahse i sualna avangin Pathian hmangaihna che a nep phah ngai lovang, a hmangaihna zawk chu i tlanchhiat san chuan chatuan hremna i hmachhawn mai zawk dawn a ni.

(Tawngtai Dan Tur)
Lalpa, i hmangaihna hi a hlawhchham theiloa, i hmangaihna pawm tute, hlimna leh thlamuana i pek thin chu pek min duh a, eng ang pawhin vahbosan thin che mah ila, i hmangaihna chuan min umzui zel thin a. I hmangaihna ka pawm a, i duh anga ka nun chu, ka tan bawk hian a tha a ni tih hriain, i hmangaihna chu ka pawm a, i duh ang a ka nun theih nan min  pui turin ka ngen a che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

HMANGAIHNA (Part3)

Part 1 leh 2-ah te khan Hmangaihna chu thildang ber aia a pawimawhna kan sawi tawh a, Pathian hmangaihna leh mihring hmangaihna pawh a in ang lo kan tih tawh kha.

Chuti taka pawimawh Pathian hmangaihna chu eng ang nge a nih tih hi kan sawi leh dawn a ni.

Pathian hmangaihna sawifiah ber chang Bible a kan hmuh chu 1korinth 13:4-8 hi a ni. Chang 4-na leh chang7-na hi han sawi zau ila. 

Chang 4-na - "Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va."

Hmangaihna chu a dawhthei a, a ngil neih bawk thu kan hmu a ni. Han ngaihtuah chiang ila, mi tamtak hi chu hmangaihna kan lanchhuah tir danah hian hmangaihna tluan tling Pathian atanga chhuak a ni zo lo fo. Kan dawhthei a, mahse kan dawh reng laiin kan ngilnei tel lo thin fo mai. 

Entir nan : hmeichhia in a pasal zurui chu a dawh teh meuh, mahse a dawh a ni tih chu a pasal a hriattir mawlh mawlh a, a ngil nei tel ta thin lo a ni. Mipa pawhin a nupui chu a tlinglo chung chungin a dawh fo a mahse a dawh a ni tih chu a nupuiin hre ve kher sela tiin a nupui rilru chu khei deuh zak tur tawngkam hmanchhuah chang a nei thin fo a. Hei hi ngilneihna a ni lova. Pathian atanga hmangaihna chhuak pawh a ni thei lova, tumah a siamtha tluantling thei lo fo bawk a ni.

Chang 7-na - "engkim a tuar hram hram a, engkim a ring a, engkim a beisei a, engkim a tuar chhuak thin." 

Mihring hmangaihna chuan tawrh theih loh chin a nei, mahse Pathian hmangaihna chuan engkim a tuar chhuak thei thung a ni. A chang chuan Pathian hnenah kan chenpuite emaw kan hnathawhpuite pawh a ni ang kan chunga an that loh em avanga tawrh peih tawh lohna thu kan thlen chang a tam ang. Mahse, chutiang hunah tak chuan a ni Pathian hmangaihna chuan min rawn chhunkhah a, dawh hram hram theihna leh kawng dik zawh theihna min rawn pe thin a ni.

Hetiang chiah hian chang dangah pawh hmangaihna tluantling a inziak a. Kan hmangaihna hi Pathian hmangaihna ang a nih leh nih loh chhut fo a tul a ni.

(Tawngtai Dan Tur)
Lalpa, ka kalbosan thin che a, i thu ka zawm lo bawk thin a, mahse nangin min hmangaih avangin, min vuan tlat a. Kei misual hi, insiam thatna hun tha min pek avang te, ka thatna tura min hruai thin avang te hian ka lawm e. Van Lal thutthlenga thu, Lalber khi, min hmangaihtu ka Lalpa nangmah i nih avang hian, ka thla ava muang tak em. Min hmangaih avang hian Lalpa, ka lawm e, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

HMANGAIHNA (Part2)

"Chutichuan, heng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni."(1 Korinth 13:13)

Bible chuan Pathian chu Hmangaihna a ni a ti a (1 Johana4:8). Tin, Hmangaihna chu rinna leh beiseina te aiin a ropui zawk thu a sawi bawk a ni.

Engvangin nge rinna leh beiseina te aia Hmangaihna chu a ropui zawk?

A hmasa berah chuan rinna hi Hmangaihna tel lo chuan a thawk thei lo a ni. Galatia 5:6 chuan, "Krista Isuaah chuan serh tan engmah a sawt lo, serh tan loh pawh engmah a sawt hek lo; rinna, hmangaihnaa thawh erawh chu a sawt a ni." a ti a. Helai hi Sap Bible-ah chuan "...but faith which worketh by love." a ti a ni. He lai chang hian a sawi tum chu : rinna chu hmangaihnaa tihnun a ni, tih hi a ni. Hei hian rinna aiin hmangaihna a ropui zawk tih a entir a ni.

A pahnihnaah chuan rinna chu beiseina tello chuan a thawk theilo a ni. Hebrai 11:1 chuan," Tin,rinna hi thil beiseite awm ngeia hriatna,thil hmuh lohte hriatfiahna a ni." a ti a. Sap Bible : The New English Translation chuan, " Faith gives substance to our hope" a ti bawk a ni. Hemi awmzia chu kan rinna hi a taka a channa (substance) kan hmuh hmain beiseina fel tak, kawh bik fak eng emaw kan nei hmasa tur tihna a ni. Pathian hnena thil beisei fak i neih loh chuan i rinna chuan awmzia a nei lovang. Entirnan : I chhungte zu in thin khan nghei se i duh a, i beisei tlat a, i dil a, i nghak a, chutichuan Pathian rinna chu i nei thei dawn chauh a ni. Thil eng emaw han beisei felfai tak i neih loh chuan rinna han hmanna (apply-na) tur i nei lo tihna pawh a ni thei ang.

I hmuthiam tan em? Rinna leh beiseina chu a kal kawp tlat a, an pawimawh veve a, an inring tawn a nih ber chu. Tin, rinna beiseinaa tihnun chu hmangaihna tel lova a thawh theih bawk si loh chuan, rinna leh beiseina te aiin hmangaihna chu a ropui zawk tihna a ni.

1 Corinthians 13:1-3 ah chuan "Mihring tawngte leh vantirhkoh tawngtein thu sawi mah ila, Hmangaihna ka neih si loh chuan dar ri mai mai emaw, dar benthek ri mai mai emaw ka lo ni ang.

Tin, thu hrilh theihna neiin, thuruk zawng zawng leh hriatna zawng zawng hre vek mah ila, tlang sawn theihna khawp hial rinna famkim nei mah ila, Hmangaihna ka neih si loh chuan engmah ka ni lo vang.

Tin, mi retheite chawm nan ka sum zawng zawng pe vek mah ila, ka taksa pawh kang turin inpe mah ila, Hmangaihna ka neih si loh chuan ka tan engmah a sawt lo vang.

Helai chang a kan hmuh ang hian Thlarau thilpek ropui tak tak te chu keimahni kaltlanga tihlanin awm mahsela Hmangaihna kan neih chuan si loh chuan kan tan sawtna a awm hauh dawn lo a ni.

Thu ril tak tak leh hriatna chhah tak nei pawh ni ila hmangaihna kan neih loh chuan kan tan awmzia a awm lo a ni. 

Mi rethei te pawh han tanpui viau mah ila, hmangaihna atanga thawh chhuah a nih si loh chuan kan tan sawtna a awm dawn chuang hauh lo tihna a ni.

Chutiang taka pawimawh Hmangaihna chu zirchhuak theuh turin i inbuatsaih ang u.

(Tawngtai Dan Tur)
Lalpa, khawvel i ngam theih chhan chu, i hmangaihnaa khawvel sual i beih vang a ni tih hriain, i hmanraw hriam ber hmangaihna hi, ka chhungkaw dam nan leh i ram ka zauh ve theih nan, ka hman theihna turin i hmangaihna chu min pe turin ka ngen a che. Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Hmangaihna (Part 1)

"Eng dang zawng aiin inhmangaih tawn uar rawh u; hmangaihnain sual tam tak a khuh si thin a."(1 Peter 4:8) 

Pathian hmangaihna leh mihring hmangaihna hi a in ang lova. Mihring hmangaihna chu zankhat thil thuah pawh huatnaah a chang thei a, Pathian min hmangaihna erawh chatuan daih a ni.

Pathian chuan a hmangaihna chu khawi hmunah nge a lanchhuah tir tia kan zawh chuan : Khawvel hmun bawlhhlawhah a ni. Vanramah chauh a hmangaihna lanchhuah tir chu a duh tawk lova, khawvelah misualte hnenah a hmangaihna a rawn lanchhuah tir a ni. Chuvangin Pathian hmangaihna chuan sual hmun thim ber pawh a thleng zo a ni.

Pathian hmangaihna (God-kind of love) ang hian Mihring te pawh kan inhmangaih tur a ni. 1 Petera 4:8b ah chuan "hmangaihnain sual tam tak a khuh si thin a." a ti a ni. Pathian chuan misualte min hmangaih ang chiah hian. Mihring leh mihring te pawh kan inhmangaihna hian sual a thaibo thei a ni. Mi fel leh mi tha hmangaih chu tupawhin an theiin a rinawm a, mahse misualte zawk hi hmangaihna mamawh hlei hlei an ni.

Kan chenpuite awmdanah te kan rawngbawl pui emaw kan hnathawpui te kan thiante pawh an nun danah kan duhkhawp lohna a tam thin ang. Mahse chu tak chu kan hmangaihna an mamawh hun leh, hmangaihna kan lanchhuahtirna tur zawk a ni. 

Hmangaihna nei lo chuan Pathian a hre lo; Pathian chu hmangaihna a ni si a (1Johana 4:8). Pathian chu hmangaihna a nih avangin Pathian neitu chuan hmangaihna a nei ngei tur a ni. Hmangaihna kan nei em tiin inzawt fiah ila. Midang hmangaih kan harsat viau chuan Pathian hi kan lo la nei tawk lo pawh a ni thei a ni.

Pathian chuan misualte kan nih lai pawhin min hmangaih a, a hmangaihna avangin kan sualte thai bova a awm angin, keini pawh kan Mihring puite an sualna thaibo turin (an sualte an sim theih nan) kan hmangaih ve a ngai a ni.

(Tawngtai Dan Tur)
Lalpa, misual tak hi, ka sual chung chung hian i faa vuah ka nih a, i thatna zawng zawng ka dawn theihna turin, van Lal ber khan i lal thutthleng i kalsana, kross ah ka sual man i rawn pe a, ka thiltih vang ni reng reng loin, min chhandamna avang chauh chuan, vanramah ka rawn la haw ve dawn a ni. Kei misual hian, i hmangaihna a thlawna ka dawn vang liau liauin i faah vuh ka nia, midangte pawh keimah ang bawka i hmangaih ve avangin, kei pawhin midangte hmangaih hi abat a ka bat a ni tih hi hriain, midangte ka hmangaih ve theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.