I Tluk Lai Pawhin, Kaitho Tur Che'in A Hnai Reng

"Mi fel chu vawi sarih tlu mah sela, A tho leh zêl ṭhîn; Mi suaksual erawh chu chhiatnain a tiboral ṭhîn."(Thufingte 24:16)

Naupang hi kal a zirlai chuan, a tlu a tlu thin a ni, chutia a tluk chuan a bulah a nu leh a pa an lo ding thina, a tluk apiang chuan an kai thoa, kal leh rawh bawihte kal leh rawh an ti thin. Chutiang ang chiah chuan kan tluk hian, kan Pathian hian min kaithoa, kal leh rawh min thin a. Pa hian a fa kal zirtir chu, a tluk apiangin, a kawnghrenin a vaw nghal ngai lo, a kai tho zawk thin a ni. Keini pawh hi, kal kan zira kan lo tluk palh hian, kan Pathian hian min vaw ngai loa min kaitho leh thin zawk a ni.

Ke a kala, tlu leh thil tha tih duha suala tluk hi thil hran daih a nia, entirnan kan hmang nasa lutuka, kan sawi pawlh lo chauh tawh te hian a hriata. Chutih rual chuan, Lalpaa a thinlung dah thintu chu, kea mi a tlua atho leh thei thin ang hian, sualah tlu palh mahsela a tho leh thei thin a ni. A thawhtheih chhanchu, a thinlungah Lalpa a dah vang a ni. Chutianga an thinlunga amah dah tlattute chu, Lalpan ka mifel te a ti thin a ni. "Mifel chu vawi 7 tlu mahsela a tho leh zel thin," kan bible chuan alo ti hial a ni.

Ni e, sualah kan tlu Pathian pawh kan ngaihtuaha, nitin kan tawngtai thina, mahse kan sual tih thin kan la sim thei lo em? Entirnan thei rah hmawlhin hawlhtla dawn ta ila, hmawlh tawi thei rah hawlh phak loin thei rah chu eng ang pawhin hawlh hawlh mah ila, thei rah chu kan hawlh tla chuang lo ang. Chutianga kan hawlh phak loh chuan, kan hmawlh hman chu thei hawlh phak ngeiin zawm sei ta ila emaw, hmawl sei zawk hmang ta ila, thei chu kan hawlh pha a nga, kan hawlh tla thei ang.

Chutiang ang deuh chuan, Pathian chu kan duh, biak pawh kan bia, mahse kan sual kan sim theihna khawpin Pathian thu chu kan in chhiah hneh tir lo thin a, hei vang hian Pathian be reng chung pawhin kan la tisual fo thin a ni. Hetiang dinhmunah hian i dinga, i sual tih thin chu sim i duh tak zet zet a nih chuan, nasa zawkin Pathian bia la, a thuah han inchiah tak tak teh, tihian bul han tan chhin teh le! In khohhran inkhawm tinah khan han inkhawm kim chhin teh, in kohhran inkhawm tina kum 2 vel i inkhawm kim thap thap chuan, i sual tih thin kha i hneh let theih a rinawm a ni.

Rawngbawltu i nia, sual langsar lo, thinchhiatna te, chapona te, tisa chakna te, insit ngawih ngawihna te'in a tibuai che a nih chuan, midang tawngtai sakna tawngtai hmang loin, mahni tana tawngtaina hun, nitin minute 15 chauh tal han hmang chhin teh, chutianga i tih chuan, i chak phah ngei ngei ang.

Pathian hian tlu thei kan nih hi a hresaa, mahse a chakna ringa tho leh hi chu, mihring duhthlanna ah a dah a ni. Kan thuin sual bawi ata kan chhuak thei lo tih hi kan hre vek ang,  chuvang chuan sual bawi ata kan chhuah theihna turin Pathian chakna kan rin a ngaia, a chakna kan rin dawn chuan kan hnaih a ngai a ni. Pathian hnaih hi, ruah a rawn sura kan do ngei ngei a ngai thin ang hi a ni loa, tui kan mamawh avanga duhthu ngei leh keimahni in nawr lui hial pawha, kan chawi tau tau thin ang zawk hi a ni.

Pathian hnaih hi, amaha thleng tawp thei a nilo, a hnaih duhtu in hnaih a tuma, a hnaih theihna tura theih tawp a chhuah thinna nun a ni zawk. Pathian hnaihtute chu, vawi tamtak tlu mahsela, Pathianin a kaitho leh thin a ni.

(Tawngtai Dan Tur)
Lalpa, suala tlu thei ka nih zia hi i hre lawka, chuvang chuan thawh leh theihna nangmah hnaihtute tan i buatsaih lawk tawha, chu thawh leh theihna chu engtik lai pawha kan neih theihna turin nangmah hnaih tlat zel thei turin min pui ang che, Amen. Ti ang aw.

Follow, tih a hnuaia inziakah khuan i click dawn nia. 

A Beramten A Aw An Hre Thin (Pathian aw hriat i duh em?)

"Ka beramten ka aw an hre thin, kei pawhin anni chu ka hria, anni chuan mi zui thin."(Johana - 10:27)

Pathian aw kan hriatna tur min dang (block) -tu ber chu, kan ngaihtuahna kan hnawh khah lutuk thinna hi a nia. Entirnan bazarah i kal leh i kal loh tur chungchangah Pathian lo rawn ta la, Tluangi te, Sanga te pawh an kala, secondhand an thing a nga, chow an ei a nga, kei pawh ka kal ve chuan chawhmeh ka lei a nga, tih vel i ngaihtuah vak vak chuan Pathian aw i hre thei lo vang. Bazara i kal tur leh kal loh tur chungchanga Pathian i rawn duh a nih chuan, "Lalpa bazara kal tha i ti em" ti la, a aw nghak rawh le, i rilru zawng zawng dah ruak la, Pathian lamah chauh i rilru dah ang che. 

Beram te pawh hian Beram-vengtu aw an hriat theih chhanchu, Beram-vengtu lamah an beng an chhit reng vang leh thil dang zawng zawng ai Beram-vengtu aw an ngaihthlak thin vang a ni. Beramte hi chaw an ei lai pawh nise, Beram-vengtu'in a koh a nih chuan, an chaw ei lai bansanin a kohna lamah an kal thin a ni.

Entirna lamah kir leh ta ila, Pathian hnenah bazar i kal leh i kal loh tur chungchang i rawna, Pathianin kal tha a tih chuan, i thinlungah tawngka in a rawn tawng theia, chutiang a nih loh pawhin, bazara kal tha a tihzia thlamuanna hmangin a rawn hriattir thei bawk che a ni. He entirna hi a mawlmang khawp mai, mahse kan nun zawng zawnga thutlukna kan siamna kawngah hian hetiang hi a ni thin a, hna kan zawnna ah te, kawppui kan zawnna ah te, kan zintur leh zin loh tur chungchangahte pawh hetiang ang tho hian, Pathianin min be thin a, beram ten an mahni vengtu aw an ngaihthlak angin, Pathian aw i ngaihthlak chuan, a aw chu i hria ang.  

Pathian aw, Thlarau aw hi a ti/a inthlahrung an ti thin, mahse chutiang anga ti a ni hran loa, biak tur a zawng reng zawka. Amaherawhchu, a aw hriat duha, thil dang zawng zawng dah thaa a aw chauh nghaktu kan tam lo zawk thin a ni. Pathian aw, Thlarau aw a ti kan tih chhanchu, a aw kan hriatna tur keimahni in kan dan (block) thin vang zawk hi a nia. Entirna han pe leh ta ila, hriak (tel) hi burah thun dawn ta ila, mahse bur chhinna hawng chuang si lo ila, hriak chu burah chuan kan thun thei dawn miah lo tihna a ni. Hetiang ang chiah hian, Pathian chuan a aw in bur keimahni hi, min leih renga, chu bur kharna hawngtu apiangte chuan a aw an hre thin a ni.

Pathian aw hre turin, thildang zawng zawng dah tha la, a aw chu nghak rawh le.

(Tawngtai Dan Tur)
Lalpa, i aw min hriattir duh a ni tih hi hre reng chunga, i aw hre tura ka tih tur apaing chu, thildang dah thain tih nachang ka hriat theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Dil Rawh A Hun Takah A Pe Ang Che

"Tûn thlengin ka hmingin engmah in la dîl lo; dîl rawh u, tichuan in hmu ang, in lâwm a kimna tûrin." (Johana 16:24)

Pu Marvina kum 90 mi chuan a testimony a sawi a. A testimony chu:

Pathian hnenah hian dil ang u, dil mawlh mawlh ang. Ka naupan lai hian, kapa nen washington ah kan kala, Georgetown kan tlawha, tah chuan in lian var mawi tak mai hi ka hmua.

Kapa hnenah chuan hetiang in hi kan nei ve thei a ngem le, ka ti a. Ka pa chuan nei ve thei teh lul e, zanin ah Pathian hnenah kan dil dawn nia a tia. Zan alo nih chuan ka pa nen chuan kan mut dawnin kan tawngtai a, "Lalpa voin a inlian var mawi tak mai kha min pe rawh, Isua hmingin kan dil e. Amen" kan tia.

Kum 20 vel a liam hnu chuan, Indopui 2na in min nanga, indona a ka kal ve a ngai ta tlat mai. Indona atang chuan medal of honor, vanneih thlak takin ka dawng ve hlauh maia, kan dawn chhan pawh hmelmate Tank dawtah tak grenate ka vawm luh hlauh vang a ni. Tichuan, medal of honor dawngtu reng reng chu Rocafeler bank in Dollar sangkhat min pea, tichuan D.C mayor'in lawmman atan D.C khaw hmawrah in min pe hlauh bawka.

Tichuan, D.C'a in min pekah pawh chuan awm ka tum lem loa, mahse kum alo vei zel chuan ka fa ten college tha zawkah lehkha an la zir duh ang tih ka rin avangin, pem kan rilruka. Rockefeller 'in lawmman min pek chu an bank account ah kum 10 ngawt mai lak chhuah loha, ka dah avangin dollar 1000 kha dollar 1500 ah alo pung taa.

Hnathawh mai tur D.C a kan hmuh loh avang chuan, kan draw chhuaka, sumdawnna te kan siam vea. 1975 velah chuan dollar 1500 chu tam tham ve viau mahse, kan sumdawnna a phuhru zo loa, bank-ah chuan loan dil kan tuma, loan kan dil tum chuan medal of honor dawngtute chu loan pungtlem tak kan pe thei e, an lo ti hlauh bawka, dollar 2000 loan kan la bawka.

Kan sum in a tlin tawk a ni tiin, puan thuina kan hawnga, kan puan thuina chu, miin min hriat ve berna a ni bawka, tiin Medal of Honor tih kan vuaha, tichuan miin min lo duhsak phah vea. Kan sumdawnna a lian chho zela, ram lian zawk kan leia, kan ram leiah chuan sumdawng thenkhatin dawrte hawn min  dila, Pathian malsawmna kan dawn tho alawm ngahnge kan ui ang kan tia. Dawr chu kan hawn tira, tichuan midangin dawr hawn min rawn dil belh zela, tichuan dawr 20 lai chu kan ramah chuan a awm taa.

Real estate sumdawnna insiam chhoh lai a ni bawka, kan ram thenkhat chu yarth 10 vel lek lek chu, nakina ato zawka hralh theih miin an inbeisei avangin, man tha tak takin miin min leisaka. Midangin an lo hre darha leiah min rawn dil chho zela, kum 5 hnuah chuan kan ramah dawr 50 lai a awm tawha, building laihawl chhawng 5 a sang pawh 20 lai a awm tawha.

Pathian malsawmna azarah kan sumdawnna a tha chho zela kan hmun miin min luahsak man kan dawng bawk nen, kumkhata kan chhungkaw lakluh chu dollar maktaduai khat nuai thum (1.3 million) lai a ni chhoa. Kan dawr neihna ah kan cheng nghala, chu kan chennaah chuan dawr alo pung zelaa, a bengchheng ta hle maia, chu vang chuan, kan awmna chu dawr atan choh hmana, hmun danga chen kan rilruka.

In kan han zawn chuan, mak deuh mai chu Georgetown a Pathian hnena ka indil kha zawrh lai alo nia. Maktak maiin chu in chu kan lei phak tawk vel alo ni nghe nghea, a rang a rangin kan lei ta a.

Pathianin a hun a tih tak, kum 37 hnuah chuan, ka tawngtaina chu min chhansak ta a ni.

Chu ina, zana kan mut changte hian ka ngaihtuah thin. Pathianin ka dil rual khan min pe theia, tinge min pek nghal loh ka tia. Mahse, kan Pathian lian leh chaktak ( our great big God)  hian in mai chu min pek a duh loa, nungchang tha leh fa lehkha thiam leh eizawnna tha min pek tel alo duh avangin kum 37 min hruai kual a ni, tiin keimah leh keimah ka inchhang thin a ni.

( Tawngtai Dan Tur)
Lalpa, i hminga dil thintute chu a hun i tih takah an dilna chu i chhansak thina, chu mai chu niloin an mamawh dangte pawh i ngaihtuahsak bawk thin a ni tih hriain i hnenah engkim dil thin turin ka thinlung hi tiharh ang che, Amen. Ti ang aw.

Follow tih a hnuaia inziakah khuan i click dawn nia.

Damna I Zawnga I Hmulo A Nih Chuan, "Krista Ser" En Ve Rawn Le

"Nimahsela ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a:kan thlamuanna tûr thununna chu a chungah a tla a; a vuakna vualtea tihdamin kan awm ta."(Isaia 53:5)

Miten dawtin an phuh chea, thiamthu i sawi thei si lo em,

I dikna zawkah dik lo zawk ang maia thuphachawi i ngai em,

Hah taka i beih hnuah hlut loh leh hmuhhmaih i ni em,

Isua Krista ser kha han en chhin teh, tah chuan damna i va hmu ang, damna i hmuh chhan tur chu maw, "A tihsual ni miah loah, kei ni misualte avangin,
1) Dawta phuh a ni a, a thiamthu a sawi thei lo, a thiamthu sawi sela chuan, nang leh kei hian thiam kan chang dawn si lo, tawngkam khata khawvel siam chhuaktu kha, nang leh kei tan hian a ka a ang ngam lo, a thiam chhan theihna tura ang ngam lo a ni lo, nang leh keiin thiam kan channa tur zawkin a ni a an ngam loh ni, a tlawm ta a ni, a tlawm a ni.
2) Nasa taka vuak a nia, 
2) Hling lukhum a khuma, 
3) Kross-ah mualpho takin khenbeh a nia, a nun zawng zawng a hlan ral a nih kha."

I chakzawng kalsan a ngai em,

Hah ngawih ngawihin mawhphurna lak i ngai em, 

Thinlung thler chunga kal i ngai em,

Krista ser chu en rawh le, damna i hmu ang.

(Tawngati Dan Tur)
Lalpa, thiltha avanga ka tawrh ve a tul hian a na ka tih theih em avangin awm ngaihna ka hre ngai loa, mahse nangin thiltha vangin nasa takin ilo tuar tawha, i hniakhnung ka zui ve mai alo ni, lawm tur kava ni em, heng ka tawrhna te hi a na ka tih apiangin, i ser kha en fo nanchang ka hriat theih nan, min pui ang che, Amen. Ti ang aw.

Follow tih a hnuaia inziakah khuan i click dawn nia.

I INPEIH TAWH EM? (In tlânsiaknaa tel tûrin.)

Rev. Nithanga
             
         Tin, intihsiaknaahte chuan a bei țâlh țâlh apiangte chu engkimah an insûm țhin a ni (1Kor.9:25).

       1Kor.9:24 ațanga kan chhiar chuan Tirhkoh Paulan ringtute chu intlânsiakhote nên a khaikhin a. Lallukhum chhe thei hmu tûr maha tlânhote pawh taima taka an tlân țâlh țâlh thu leh engkimah an insûm țhin ziate a sawi a. Keini Lallukhum chhe thei lo hmu tur tân phei chuan kan beih nasat a țul lehzual thu leh engkimah kan insûm lehzual a țul thu min zirtîr nghâl a ni.

        Ringtu nuna intlânsiaknaa lo tel ve tûr chuan i pianthar phawt a ngai. I la piangthar lo a nih chuan ringtu nuna intlansiaknaah hian lo tel ve tûrin i la qualified ve lo. I piang thar tawh a nih erawh chuan intlânsiaknaah hian i lo tel ve thei tawh a, lo tel ve rawh. Olympic-ah te, Asian games-ah te intlânsiak kan hmu țhin a. Heng intlânsiaknaa tel tûr pawh hian an inbuatsaih fe a ngai a, exercise an lâk peih a ngai a, mi che vêl peih nih a ngai a ni. Thil țha lo leh ruihtheih thil lakahte insûm chungin intlânsiaknaa lâwmman hmu tûrin an beih țalh țalh a ngai a ni.

        Keini pawh hi piangthar kan nih tawh avângin, ringtu nuna intlânsiaknaah hian Lallukhum chhe thei lo hmu tûrin kan tlân mêk a ni a. Min tichaklo thei thil sual chi hrang hrang leh ruihtheih thilah te, zûk leh hmuam te thlengin kan insûm a. Kan taksa ngei hmangin Pathian duh zâwng thil țha kan ti sauh sauh zêl tur a ni a. Kan che vé reng a, tiam chin lam panin kan tlân ngat ngat mai a nih hi. Borûak mai hnek lovin mahni ngei kan inhnek a, kan taksa kan ti chhel a, kan thu hnuaiah kan taksa chu kan dah thiam tawh a ni. Kan thusâwi te chuan borûak maia thãm ral lovin, keimahni min hneh hmasa a, chu ngei chuan kan taksa thunun theihna min siam sak a ni. Keimahni leh keimahni kan inthunun thei tawh a ni. Rinnaa intihsiakna țha chu kan hlen ve ngei ang a, lawmman kan la hmu ve ngei ang.

        Mi tam tak chu, piangthar tawh in ti ve siin rinnaa intlânsiaknaah hian an tel ve peih țhin lo va. Chhandam tawh ka ni ti reng chung siin, Zû leh ruihtheih thil dangah te, zûk leh hmuamah te, hleprûk leh inngaihna sual thlengin an insûm peih lo va, chu chuan an taksa leh an thlarau lam nun thlengin a khawih chhia a, an mahni leh an chhûngte, an fate leh an tûte thlengin an tuar phah țhin. Thil țha an ti peih lo va, tih ngaiin an hre lo hial țhin a.  Inthlahdah takin an nung a, an inkhâwm țha peih lo va, an țawngțai peih lo va, an chhiar peih lo va, an inzîr zêl peih hek lo va. Mite aiin hre ril leh hre thûk zâwkin inngai mahse, min engahmah an ngai lem lo va, an mahni pawh an inngai nêp tawlh tawlh țhin. A tâwpah chuan an mahni an intipâwn lâng țhin a ni.

         Hmun hrang hrangah hian Crusade leh Camping ka nei ve tam tawh viau. Camper-te zingah hian hmâna Evangelist lo ni tawh, tuna suala lo tlu pil leh tawh an lo tel ve fo. Chûngte chu piangthar inti siin, Ringtu nuna intlânsiaknaah an tel ve peih lo va. Zûk leh hmuam, ruihtheih thil leh hmeichhiat mipatnate an tlânsan phal lo va. Thil țha tih an peih tak tak lo fo, a thatchhe tâwk chauhvin Krista tih zawhsa an ring a, Krista rinnain thil țha lo sim tûr leh thil țha ti zêl tûrin intlânsiaknaah an tel peih lo va, an taksa an thunun hneh lo va, an rilruin duh lo mahse an taksain sual dâi a châk tlat zêl a, an chelh ngang ta țhin lo a ni. Sualah an tlu sawp leh mai  țhin a ni. Chutiang nun chu a ni, tirhkoh Paulan, "Mi dangte hnêna ka tlangaupui hnu pawhin, engemaw tiin keimah ngei pawh hi paihthlâkin ka awm dah ang e (1Kor.9:27)," a tih kha.

        Tichuan, nang chu i piangthar tawh i nih a, khawvêl thil sualte i thlah phal tawh a nih a, thil țha ti tûra chhandam i nih tawh chuan, intlânsiaknaa tel tûrin i qualified tawh tihna a ni. Ringtununa intlânsiaknaah hian lo tel ve rawh le. Tichuan, sualin a ûm phâk lo tulh tulh ang che ang a, i thil țha tihten malsâwmna an thlen sak tam tulh tulh thung ang che.

(Tawngtai Dan Tur)
Lalpa, nangin min thlan avangin ka lawm e, ni e min thlang intlansiakna tha bei turin, chu intlansiakna hlentu apiangte chu vanah lawmman duhawm tak i pe thina, he intlaksiakna hi ka hlen chhuah theihna turin min tanpui ang che, Amen. Ti ang aw.

Follow tih a hnuaia inziakah khuan i click dawn nia.

A Tana Nun Thlangtute Chu, Engkim A Relfel Sak Thin ("Duncan's Car" Love Story)

"Chutichuan, in ei pawhin, in in pawhin, in tih apiangah pawh, Pathian ropuina tur hlirin ti rawh u."(I Korinth 10:31)

Priscilla'i chu chhungkaw tha tak atanga seilian a nih avangin, an college ah chuan amah ang bawka mi ensante ho bulah chuan a awm thina, amah tak phei hi chuan mi zawng zawng hi angkhat vekin a thlira, mahse a hmelthat vangte pawh a niang, midang hian kawm phakah an entlat loa, an bula tel a tum pawhin biak chu be tho thin mahsela an pawh hleihtheih tlat loh avangin, amah ang bawka hausa te bulah chuan atal thin a ni.

Zirtawp tlaia, class an ban chuan a thiante nen bazar an tuma, an bazar zawhah Oak Hills an khawbul lawka tlangah chuan han hawi khawthawn an tum bawka. A thiante nen hmanhmawh takin an chhuaka, mahse an chuanna car'in an college campus an pelh dawn chuan, an hmaa car tlan pakhat chu a thi thuta a tlan thei ta reng reng lo maia, a chuan puite chuan an au el tuar tuar a. Chutih lai tak chuan, sports car hlui tak atangin Duncana a rawn chhuaka, Priscilla'i te thianho hnenah chuan iva nawr pui ang u a tia. Duncana hi a pa len avangin leh a hmel atang reng reng pawhin mi huaisen a nih anih chu a hriat avangin, Priscilla'i te thianho pawh chu, chapo hlawm viau mahse, a rawn biak lai chuan an ngawi thapa.

Mahse, a kal sawn chauh emaw tihah chuan, Duncana au el pahin an hmaa car thi chu an au leh tuar tuara, horn an hmet ri tuar tuar bawka. Chutih lai tak chuan, Priscilla'i chuan hmeichhia ka ni e tilo chuan, an hmaa car thi chu nawrsawn pui turin, car atang chuan ava chhuaka, ava nawr sawn puia. Duncana zaidamna leh a hmel mipa hmel tak mai chuan a hip a ni tih hriat rengin Duncana chu a en vang vanga, mahse Duncana chuan chu nula chu hmeltha ti eng ang mahsela, biak ngaihna reng reng a hre loa, bakah Priscilla'i te ang mi lian fa'in car a rawn nawr ve duh ang tih ngaihna reng reng a hre loa, a ngawi vung vunga, tichuan tawngkam khatmahin biak ngaihna a hriat loh avang chuan Priscilla'i pawh chu an car lamah chuan a kir leh taa.

Duncana chuan an hmaa car chu a siam puia, a ni hi car siama inhlawh thin a ni reng renga. Ni e, an chhungkua hi broken mai pawh niloin an bawraw em avangin, an in atang a chhuaka. An khuaa pa pakhat Pu Hartmana'n a inah a awm tira, Pu Hartmana'n a lehkha zirman zawng zawng tumsak hrehlo mahsela, Duncana hian a duh loa, a nitin mamawh leh a lehkha zirna man chu amaha thawhchhuah ve a duh avangin, car hi a siam thin a ni. A thiante car a siam lai thlalak chu, an college kalpuite chuan instagram-ah an post a, an college hashtag ah an dah ve avangin, Priscilla'i pawh chuan alo hmua.

Thawhtan alo nih chuan, an college ban velh, Priscilla'i chuan Duncana hmuh tur ngeiin, a motor chu a nungthei lo a tih theihna turin a car battery alo phawia, Ducana chuan ava hmu ta ngeia, tichuan ava pui taa. A rang a rangin, Priscilla'i car battery chu a vuaha, a vuah zawhah chuan, Priscilla'i hnenah chuan ka thian ten hmanniah khan, min biak i duh hmel an tiche a min biak i duh a mi a tia. Priscilla'i chuan, hmeichhe kawm dan thlawt a hrelo tih chu a hrethiam nghal mai, tihian a chhang taa. Biak che ka duh maitheia, naktuk tlaiah Street light cafe ah dar 5 ah lo kal la i hre maial ang, ilo kal hmain min chhandan tur lo ngaihtuah lawk ang che a tia.

Tichuan, Street light cafe ah chuan an inhmu taa, Duncana chuan sawi tur a hrelo em em a, a tawng chut chuta, chu chuan mak tak maiin Priscilla'i chu a tihlim phiana, thil an han eidawn chuan, Duncana chu a maimit chhing zuka. Priscilla i chuan enge i tiha tia a han zawh chuan,"Duncana chuan Pu Hartman'n thil eidawn reng rengin tawngtai tur a tia, ka tawngtai alawm maw le" a tia. Priscilla'i chuan tunge Pu Hartmana chu tiin a zawt a, tichuan Duncana chuan an chhungkaw chanchin leh Pu Hartmana ina a chendan zawng zawng chu a sawi taa. Priscilla'i chuan Pu Hartmana chu ka van hmu ve duh a tia. Duncana chuan inrinni hian, Pu Hartmana nen a Lake house bulah pangpar huan kan tifai thina, ilo kal ve duh chuan, Pu Hartmana kalo hrilh a nga, a rem tih chuan ilo kal ve dawn nia a tia.

Duncana chuan Pu Hartmana hnenah chuan, Priscilla'i chungchang chu hrilh duh viau mahsela, a hrilh ngam ta ngang loa, chenna tur neilo a enkawl mai a nih avang chuan ngaihzawng a neih thute chu a hrilh ngam loa. Inrinni alo thlen chuan, Duncana'n engmah a rawn hriattir leh tak loh avang chuan, Priscilla'i chu a thinrim em em maia, Pu Hartmana Lake house awmna chu a zawt chhuaka, ava kal taa. An chhungkaw dinhmun avangte pawh a niang, a duhnaah chuan Priscilla'i hi a zak ngai loa. Lake house bula, Duncana hnathawk lai chu, ava pan hnaia, "ka ti ang i tih chu, tinge i tih leh loh" tiin Duncana chu ava hau bawrh bawrha. Pu Hartmana chuan, nula'in chuti taka Duncana a rawn hau a hmuh chuan, ngaihzawng a nei tih chu a hrethiam ta maia. Engtin mah a inrawlh duh loa, chhun thingpui in hun alo nih chuan, Pu Hartmana chuan Duncana chu a au a, i thinnu pawh kha rawn sawm ve ang che a tia.

Duncana chuan, Priscilla'i hnenah chuan kal turin a hrilh a, mahse Priscilla'i chuan min sawm alawm a ti tlata, thingpui in tur chuan Duncana chu a zui lui taa. Pu Hartmana bulah chuan, a hmingte leh an awmna te chu a hrilha, Pu Hartmana chuan lawm takin alo dawngsawnga, chhung thingpui an in ho lai chuan, Duncana leh Priscilla'i chu thu tha a hrilh mawlh mawlh taa.

Tihian a hrilha, "Bibleah chuan, inngaizawng (lovers) pahnih Josepha leh Maryi an awma, an pahnih chuan Pathian duh angin an nung tlat thina, an mahni duhna ai Pathian duh dan an dah hmasa thin bawka. Maryi chu Thlarau Thianghlim'in a rai tira, chu chu Josepha chuan a hrethiam loa, timualpho loin then a tuma. Chutia then a tum lai chuan, vantirhkohin then lo turin a hrilha, Mary nau pai chu Pathian fa Isua Krista khawvel chhandamtu tur a nih thu chu a hrilh a ni. Nangni pahnih pawh hi, in mimal nunah Pathian in dah hmasak ber chuan, in tan a tha zawngin a thawhsak ang che u a nga, eng harsatna mahin a then lo ang che u a tia." 

Pu Hartmana chuan a nupui Josephine'i nena an chhanchin chu a hrilh chhunzawma " 1971 Nam (Vietnam lam tawi) indo tawp lamah khan, kan ramin sipai an mamawha, inremna siam a ni tawh mai dawn alawm tiin kei pawh ka kal ve a, mahse inremna siam mai ala har deuh avangin kum 4 lai chu indona hmunah chuan ka awma, Jose'i hmelhmuh ka chak em em thina, a hmel ka hmuh pawh ka ring tawh ngai lo. Chutia beidawng taka ka awm lai chuan, bible-ah Josepha leh Maryi chanchin chu ka chhiara, Pathian hnenah Josepha angin i duh zawnga nung thei turin min pui ang che ka tia, chutih hunah tak chuan Jose'i pawh chuan Jospha leh Maryi chanchin chu alo chhiar ve a, alo in hlan ve bawka. Kum 4 tal tawp kan inhmuh loh hnuah chuan, kan inhmu leh ta a, hlim takin kan in nei ta a ni, a tia.

Duncana leh Priscilla'i chu hlim takin an inzui zela, Pu Hartmana te nupa pawh an tihlim thei em em a, kum khat dawn an inzui hnuah chuan, prom a kal dun turin an inbuatsaiha, hlim takin an kal dun taa. Prom-ah chuan hlim taka hun an hman lai chuan, college student thengkhat chu college kawtah an lo insuala, naupang pakhat chuan silai a lek chhuaka, chutih veleh Duncana chuan silai kengtu chu ava bawhtlua, a silai chu laksak a tuma, chutia sial an inchuh lai chuan an hmet puak palha, an bula student pakhat chu an kaphlum ta hlauh maia.

Duncana chuan, thiam chang zawk mahsela, silai hmetpuaktu kut a vawn ve avangin kum-5 lungin tang tura tih a ni. A tan tur thu chu Priscilla'i leh Pu Hartmana te nupa'in an hriat chuan, an tap zawih zawiha, Jail a luh hma chuan in hmuhna hun tawite an neithei hlauha, Priscilla'i leh Pi Jose'i chu an tawng hlei thei loa, Pu Hartmana chuan Duncana chu nghet takin a kuaha, "kan nuna i rawn luh atang khan mi tha i ni tih kan hriaa, kan ring ngam em em che a, ka fapa i nih hi theihnghilh suh ang che" a tia. Pu Hartmana chu a ngawi vang vanga, thawk a la hrawka "Pathianin engkim a relfel ang, i awmna tur hi Jail nimahse, i nih theih thaber ni ang che" a tia. An vaiin an inkuaha, an tawngtai a, Duncana chu Jail-ah chuan atang taa.

Inkan theihni hmasa ber alo thlen chuan, Priscilla'i chuan ava tlawha, Duncan'n alo lawm viau dawn emaw a tih lai chuan Duncana chuan " Pris, ka hmangaih che, ka damchhung zawngin ka hmangaih bang lo ang che, mahse i nuna kum 5 hi ka laksak thei lo che a ni, vawiin bak hi min rawn tlawh tawh lo ang che" a tia. Priscilla'in tawngkam khat pawh a sawi hma chuan inkanna hmun atang chuan a kalsawn nghala, Priscilla'i thinlung chu a na em em a, mahse Duncana chuan a hmangaih vangin chu thutlukna chu a siam a ni tih a hrebawk si, chu chuan a thinlung a tina zual bawka.

Priscilla'i chu a beidawng mai duh loa, thla ruk chhung teh meuh mai chu, Duncana hmuh tumin kartin Jailah chuan ava kal thina, mahse alo hmu duh ngai lo a ni. Jail a tlawh tawp niah chuan, a beidawng lutuk leh a thinlungna chu awm ngaihna a hre loa Pu Hartmana te inah ava kal ta ringawta. Pu Hartmana chu ava kuaha, a tap zawih zawiha, Hartmana chuan Pathian tana i nun theih dan tha berin nungla, Lalpan engkim a relfel mai ang a tia. Priscilla'i chuan ka ngaihdam theih ka ring tawh lo a tia.

Duncana chu, nitin Pathian hnenah a tawngtaia, a duh anga a nun a hman theihna turin a dil thina. Pathian chuan Jail chhungah pawh chuan a malsawmna a hmuh tira, Auto-mobiles Engineering  zirthei tlemte te zingah chuan a telve hlauh maia, Jail chhungah chuan lehkha chu a zir leh a, kum li atan hnuah chuan Engineering pawh chu tha takin a pass chhuaka, Jail atang chuan Auto company ho chu, lehkha a thawn thina, mahse tumahin hna an pe duh loa, a beidawng hle tawha. Thla 2 lek Jail-ah chuan hun a nei tawh emaw tihah chuan, Inter-Core Auto neitupa fapa awm tha duhlo, Pippera chu a Jail awmna ah chuan alo tang vea, Auto company neitu anih hrehran lo chuan, a nun theih dana tha bera Pathian tana nun a tum vangin, Pippera chu Pathian thu hrilh aduh vangin, a kawm thina. A biak tirah phei chuan, Pippera chuan a chapona a pho chhuaka, tumahin be duh lo mahsela, tu biak mah ka mamawh bik lo, tiin alo be tha duh loa. Mahse, nikhat chu Pippera gang  thenkhatin kut thlak an tum lai chu a hmua a chhan taa, chuta tang chuan Pippera chuan a be ve duh taa.

An han inhriat chhoh chuan, Pippera chuan misual i nih loh hi, eng vanga jail tang nge i nih a tia, Duncana chuan a jail tan chhanchu a hrilha, Pippera chuan local news ah engtin nge i chanchin an ziah tih hi hriat chhuah tum chhin ila, Auto-mobiles engineer i nih chuan kapa in hna a pek theih che kava ring em! a tia. Duncana chuan tunge i pa, a tia Marphy Huston a tia, Duncana chuan Cowboy Marphy maw a tia, a tih chhanchu  Pu Marphya hian car showah Cowboy Marphy tiin a in vuah vang a ni. Pippera chuan, kapa Marketing (infakna) hming hi chu alo lar ve hle mai, kapa hi alo a lo a nih hi, mi tha i nih zia pawh a hrethiam ngei ngei ang. Kar lehah hian, min bail chhuak dawna, i chanchin kalo hrilh a nga, i chhuah veleh min rawn tlawh dawn nia a tia. Duncana Jail tan hun pawh chu a zo taa, Pu Hartmana hming ka tichhe tawh bawk sia, Pippera te zawk kava bel mai teh ang a tia.

Pippera pawh chuan, tha takin alo dawngsawnga, a pa chu a hmuh pui bawka, mahse Pu Marphya chuan chutiang maiin hna alo pe phal mai loa, Pippera chuan kapa i companyah i thawh tir dawn loh chuan, charity kan pahniha kan tihna tur min sponsor rawh a tia. Pu Marphya chuan kan company charity a awm sa reng alawm tel dun ula, minimum wage kalo pe ang a tia. Duncana chu Pathian tan mitha ber nih a tum bawka charitya a tel pah chuan, Pathian thu tawite inziahna lehkha them hi a sem tel thin a Pippera pawh chuan a sem pui ve a. Ni khat chu, nu  pakhatin Pippera hnenah an lehkha sema thu inziak awmzia chu alo zawta, Pippera chuan Duncana chhantir a tuma mahse Duncana a hmu mai bawk si loa, tichuan a theih ang angin Johana 3:16 chu a sawifiah taa. Chu thu lo zawttu chu an company share holder lian ber Pi Dorothyi alo nia, Pi Dorothyi hian Pippera hi alo hre ru renga, tichuan Pu Marphya hnenah chuan a fapa chanchin chu a hrilha. Pi Dorothyi chuan i fapa nun dan kan hre veka, hetianga a nun thlak theitu hi, i companya i la lut dawnlo a nih chuan, ka hnuaih hna ka pe duh alo tia.

Chutiang thu Pu Murphya'n an hriat chuan, Duncana chu a rang a rangin, line engineer hna a pe nghala. Tin, Pippera hi Marketing lam thiam a nih avangin, an car show ah pawh Duncana leh Pippera chu mawhphurtuah a siama, Duncana hnenah chuan i car design chu pakhatna a nih chuan i nei dawn nia a tia. Tichuan car show ah chuan an tela, pakhatna an nia. Pakhatna an ni chu Pippera leh a pa an lawm lutuka, awm ngaihna an hre lo a ni ber mai, an car Duncana deisgn chu an company office hmaah dawhsanah an dah a, a number plate ah chuan Duncan's Car tih hi an chhu a. Thlakhat vel dawn lai an office kawta an dah hnuah chuan, Duncana hnenah chuan i duh ang angin hmang rawh an tia.

Duncana chuan chu car chu alaa, an naupan lai atanga home awm tawh, an khaw hmawr lama home ah chuan chu car chu an hralh turin leh an hralhna man chu an duh anga an hman turin ava pe a. Chutia ava pek na ah chuan Priscilla'i chu ava hmua, Priscilla'i pawh hi a theih ang tawkin Pathian tan nun tha ber neih alo tuma, chuvang chuan chu home ah chuan alo thawka, an hotute zing ami a ni  nghe nghe a. An home office a thawk ten Priscilla'i hnenah Duncan's car tu emawin a rawn donate tih an hrilh chuan, Priscilla'i chuan kan pawm thei lo ang tih hrilh rawh u alo tia. Duncana hnenah an pawm theih loh tur thu an hrilh hnuah chuan, Duncana chuan Priscilla'i a thawk tih a hrethiam nghala, hmu turin a officeah ava kala. 

Priscilla'i a thawh ring mahse a hmuh tak tak a ring loa, ava hmu hlawl chu mak a ti hle a, Priscilla'i lahin Duncana'n a chunga a thiltih avang chuan a thinrim tawp thei loa. Duncana'n engmah a sawi hma chuan Priscilla'i chuan tunge nia i inhriata, i thilpek kan hnawl a nihte chuan kal mai ta che a tia. Duncana chuan Priscilla'in ala theihnghilh lo tih chu a hrethiam maia, a huaisen a chhuaha "Dinner min eipui la, dinner kan eizawhah car chu i pawm thei lo anih chuan, ka la let ang a tia." Priscilla'i a tawng hma chuan office a chhuahsan nghala, an chhawr pakhat hnenah chuan in pi hnenah sawn dar 7ah Street ligt cafe (an in date hmasakna ber) ah lo kal ang che a ti lo ti rawh a tia.

Dinner an eina hmun tur, Priscilla'in a thlen chuan Duncana thutna dawhkan pawh chu a pan duh loa, lehkhaah "car kan la dawn lo" tih chu a ziaka, waiter a pek tira. Priscilla'i chu a kal chhuak leh nghala, Duncana chuan lehkha a hmuh ve leh Priscilla'i alo kala, a chhuak leh nghal tih chu a man thiam maia, tichuan ava uma, restaurant kawtah chuan ava um phaa.

Duncana chuan "Pris homeah i thawk tih ka hre loa, ka chunga i thinrim a nih pawhin, ka donation hi lo pawm mai ta che, home puih bak engmah ka tum lo" a tia. Priscilla'i chuan " chutiang a nih chuan, helai hmuna min kal hah tir hi, i zak lo ami" a tia. Duncana chuan "car i pawm duh siloa, chu bakah Pathianin min intawn tir leh a nih ka ringa" a tia. Priscilla'i chuan engmah a sawi tawh loa, a car chhungah chuan rang takin a thu luta a tlan nghala. Duncana chuan a umzui nghala, Priscilla'i chuan a rawn um tih a hriat chuan, kawng rem laiah a car a tidinga, "min kal tir rawh" a tia. Duncana chuan "ka kal tir ang che, mahse ka sawi duh hi min sawi zawh tir la" a tia. Duncana chuan "min ngaidam rawh, ka hmuh duh loh avang che khan, Pathianin min intawntir leh anih ka ringa mahse kan inhmangaih thei tawh dawn lo a nih pawhin, thiltha tih ka tum hi tih min phalsak la, khawngaihin ka car kha min pawmsak rawh" a tia.

Priscilla'i chuan,"Duncan hmangaih che hi kala ban hma hauhin engtin nge ka hmangaih nawn leh ang che, mahse nangmah hmu tur che'in thla khat chhung nitin ka rawn kala, thla ruk chhung kartin ka rawn kala, min hmu duh lo a nih kha, engtin nge ka rin theih ang che" a tia. Duncana chuan "i hun khawhralsak che ka hlauh vang a ni" a ti, Priscilla'i chuan "chu chu keima thutlukna siam tur a ni, min siamsak i tum ringawta" a tia. Duncana chuan sawi ngaihna a hre tawh loa," ka tih palh a ni, mahse ka car hi min lak sak rawh" a tia.

Priscilla'i chuan "kum 5 chhung min hmuh duh loh hnuah tawngkam na tlem i dawnga beidawn i tum nghal a mi, engtik laimahin nangin min um ngai lo" a tia. Duncana chuan "min hmangaihna hi ka phu ngai reng reng loa, chhungkua pawh nei mumal lo hi hmangaihna hlu ber min pea, ka nuna rei lote i rawn luh avang khan, Pathian hnenah lawm thu ka sawi thin, ka phu loh i hmangaihna ka neih let leh theih na tur a nih phawt chuan um a ngaih chhung chu ka um ang" a tia.

Tichuan, Pathian duh zawnga nun tum tlattu pahnih  Duncana leh Priscilla'i chu  Pathianin a tana nungturin theih tawp an chhuah zia chu a theihnghilh loa, Pathianin a in tawn tir leh hnuah chuan  hlim takin an awm ta a ni. 

Nangpawh, Pathian tan atha thei ang bera nun tum tlat ang che.

(Tawngtai Dan Tur)
Lalpa, i tan hian a langah leh a lang loah pawh a tha thei ang bera ka nun theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Hma Hun Eng I Neih Vangin Lawm, A Harsat Zawk

" Tahna hi riak tûrin tlai lamah a lo lut thei a, Zingah erawh chuan hlimna a lo thleng thin."(Sam 30:5)

Khawvar a hnaih lai ber hian, zan hi a thim zual thin a ni, tih hi kan hriata, Lalpa hnena tawngtai chungin mahni leh mahni kan intihchak a pawimawh thin. Mi tamtak chuan, a harsa emai kan dingchhuak ve dawn lo a nih hi emaw, hmuh a har emawi ka hmu ve dawn lo a nih hi emaw, kan dinhmun a fuh lo emai kan kang dawn lo a nih hi, te an ti thin a. Mahse, a letling thawk hi a ni duh zawk asin.

Mihlawhtling leh dingchhuakte chanchin kan hriatte hi a hmaa ei tur nei mang lote, a hmaa pheikhawk nei phalote, mahni nun lak duh hial khawpa nun beidawngte, lehkha pawh zir mumal thei lote an ni thin. Ni e, an nite pawh hi hma hun eng an neih vang zawkin lawm hun harsaah an awm, chu hun harsa leh thim daikaitu te chuan dinhmun tha chu an lo chang thin a ni.

Josepha tanina a tan khan beidawng se, Pathian a biak thin kha bang sela chuan, Aigputa hotu lian kha a ni lo ang. Tanin a tan kha Josepha nunah chuan a hun thim ber vawrtawp a ni, tichuan tanin atang khan Lalpan Aigupta lal inah a transfer ta a nih kha. Tanin kha Josepha tan a thim em em chhanchhu, tanin atang lal inah a luh dawn vang a ni.

Tuna i hun tawn kha a thima a hreawm viau a nih pawhin Lalpa hnena tawngtaia inkawl tir bang ngai suh ang che, a chhanchu kha hun thim leh hreawm dawt chiahah khan, dinhmun tha berah a transfer thei che a ni.

(Tawngtai Dan Tur)
Lalpa, he hun thimah hian, min kalsan lo, heng hi ka paltlang i duha a hma aia nasa zawkin min awmpui a ni, tih hi ka hre reng chungin, he hun harsa hi ka paltlang theih nan i lam ka hawi tlat theihna turin min pui ang che, Amen. Ti ang aw!

Follow tih a hnuaia inziakah khuan i click dawn nia.

Nangmah Beitu Che Khan, A Hlau Che

"Mi dotute mit hmuhah ka hmaah hian dawhkan i buatsaih thin a: Ka lu hi hriak i thih tawh a, ka novah hian a liam reng a."(Sam 23:5)

Israel fate kha Kanaan ram an luh dawn khan an va enthlaa, Josua leh Kaleba tih loh kha chuan an hlauh em em a ni. Kanaan va enthlatute khan, anni lakah chuan khau ang lekin kan inhmu a, an ni pawhin khau ang lekin min hmu an ti a. Kaleba erawh chuan, "i han thawk thuai ang u khai, i han la ang u, kan ngam ngei ngei ang," a ti a. 

Mipuite chuan, enthlatute thusawi an han hriat chuan an mangang nasa maia, an tapa,  "Aigupta ramah khan Pathianin min tihlum ta then sela aw! A nih loh leh thlalerah hian min tihlum then sela aw!" te kha an tia. Tichuan " Hotu i siam ang u khai, Aigupta ramah i kir leh ang u," te an ti hial a ni. Chutiang chuan an hmelma Lalpan anni hnena pek atiam sa te chu an hlauh avangin Pathian pawi an sawi taa, kanaan ramah chuan an lut ta lo a ni. Kha mi hunlaia awm ve ah chuan, Pathian ringtu pahnih Joshua leh Kaleba te chauhin Kanaan ram chu an lut a ni. 

Josua hruaina hnuaiah, Lalpan an kawng a sial zela, kanaan ram an han thlen hnaih hnuah phei chuan, kha rama cheng zawng zawngte khan an lo hlau em em a "Amor-ho lal zawng zawngte leh tuifinriat kama awm kanaan ram lal zawng zawngte chuan an kai hma loh chuan LALPAN Jordan tuite chu Israela thlahte hmaah chuan a tikang chat tih an lo hriatin, Israela thlahte avang chuan an thinlungte chu a lo tui zo va, zam lo reng reng an awm hek lo"tiin (Josua -5:1) ah chuan a inziak hial a ni.

Lalpa thutiam i ringa, i chaknaa i hneh theih loh pawh, Kaleba angin Lalpa nen chuan kan hneh ang i ti a nih chuan," nangmah beitu che khan a hlau ang che." Ni e, nangmah beitu mahni inhmuh hniamna te, ka thei lo ang i tihnate, hei hi chu a lian emai ka tih theih ka ring lo i tihna te, ka hmuzo lo ang i tihna te, ka rul thei lo ang i tihna te, ka dawh theilo i tihna te" khan a hlau ang che, Lalpa thawh pui i tum vanga tawngtaia, Lalpa lam i hawi sauh sauh lai, i hmelma ten an han hmuh phei chuan a tuiin an tui ral tawh thin asin. 

Chutih rual chuan, Lalpa lam i hawi loh a, ka thei ve lo ang, Pathian Pathian tih ringawt pawh a nilo, mahni a pawimawh vea, chuvang chuan ka theih ka ring lo i tih khan, i hmelmate chu an intilian tual tuala, an dawlh theih hun tur che an nghakhlel tawh hle thin a ni.

Chu vang chuan, kan manganna te leh kan beidawnna te hi, zalen takin i awm tir lo ang u, Lalpa thu hmangin i beilet sauh sauh zawk ang u. Kan Pathian hi rinna a thawk thin a nia, Lalpaa kan rinna hi a chak pauh leh kan tan Lalpa hi a thawk nasa mai dawn a ni.

Hawh u, Lalpaa kan rinna hi tichak turin theih tawp i chhuah ang u, kan dinchhuahna tur bulpui a ni sia.

(Tawngtai Dan Tur)
Lalpa, nangmah nen kan nih phawt chuan, ka hmelma beidawnna leh mangannate hian min hlau zawk a ni, tih hi ka hriat renga, i hnena ka awm reng theih nana nangmaha ka rinna tichak turin theihtawp ka chhuah theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Lungngai Suh, Sang Takah Thlawk Mai Rawh

"Tlâng lamahte khian ka mit ka len chho vang: Khawi lama mi nge mi tanpuina tûr lo thleng ang? Mi tanpuina tûr chu LALPA Lei leh van siamtu hnêna mi a lo thleng ang."(Sam 121:1-2)

Pilot huaisen tak mai, tlawhna khalh thiam em em bawk si hi, an rama mi pawimawh bik phur turin tih a nia. Ringtu tha tak a nih avangin, thlawhna a khalh chet hma chuan, a co-pilot (a tha chhangdawltu) chu a tawngtai puia, a zam ve deuh ni tur a ni Philipi 4:13 "Mi tichaktuah chuan engkim ka ti thei a ni" tih thu chu a hriat tawk leka sawiin, a phun malh malh renga.

Tun tuma an thlawh ni hi, a fuh em em a, khua pawh a thaa, thlawhna tha taka check a nih bakah bungrua an phur tam loa. Chutiang pawh chu nilo mahsela, he pilot hi, khawchhe berah pawh a buai ngai lo a ni. Ni e, chhumpui leh thlipui karah pawh him taka a mihring phurhte a tum pui theih chhanchu engkim atana a inbuatsaih thin vang ni ten an sawi thin nghe nghe a.

Thawlna chu, a thlawk chhuak tan taa, van zawl fit singthum an thlenhnuah chuan, passenger ho pawhin an seat belt te an phelh a, zalen takin an awm a. Air hostess ho pawhin ei tur an sem nak naka, pilot hnenah ei tur an han pek zawh chiahah chuan, cockpit (thlawhna controlna pui ber) bawr velah chuan ri rek rek an hre taa. An han ngaihthlak chian chuan, Highlander Rat (tlang sanga awm chi sazu) a niin an hre taa, tlangsanga awm thin sazu a nih vang chuan fit singthumah pawh ala thi lo a nih an ringa, fit singthum chu Mount Everest ai pawhin a sang tawha, boruak pawh a tlem tawh nen, mahse sazu mamawh tawk boruak cham bang ala awm ni tur a ni, sazu a nung thei tlat hi.

Lei lamah chuan awm sela, sazu mai mai a ni, hlauhna tur pakhatmah a awm lo, mahse cockpit-ah a awm a wire pakhat pawh a seh chat emaw, a nih dan tur pangngai ang niloa a siam a nih vaih chuan thlawhna a chetsual tir theih avangin pilot huaisen tak pawh chu a ti zam ta hle a ni.

Sazu chu a tal a tal leh nghala, pilot leh co-pilot chu an thlan fim a chhuak zawih zawih mai a. Cockpit chhungchu khawl pawimawha khat a nih avangin, han hawlh nawk nawk che a ni bawk si lo, chutia mangang taka an awm lai chuan, pilot chuan tih dan a ngaihtuah chhuaka, passenger ho chu an thutnaa thu tur leh an seat belt hreng turin a hrilh a. Thlawhna chu a sang thei ang berah thlawh tir a tum ta a ni.

Fit singthum vela la harh tha viau cockpita sazu awm chu, fit singthum sangriat (38000) ah a thlawh chho puia, a che pawh a muang raih tawha, mahse a la chet tak fo avang chuan pilot chuan air hostess zawng zawngte chu thu turin a hrilh sauh sauhva, tichuan fit singnga bawr velah chuan a thlawk chho taa, chu tah zet chuan sazu thawm pawh a reh hmak taa, tluang takin an tum thei ta a ni.

Sazu ang chiah hian, kan lungaihnate hi hmun sang, Lalpa bulah chuan a nung thei lo asin. I lungngai a nih chuan Lalpa hnaih turin nasa takin han thlawk sang teh, darkar 3 thingthia tawngtai a ngai a nih pawhin ti mai rawh, chutianga hmun sang Lalpa hnen i han thlen chuan, i lungngaihna te chuan awm ngaihna an hre tawh lo a nga, an thi ang.

(Tawngtai Dan Tur)
Lalpa, i kiangah chuan lungngaihna hi awm ngaihna a hreloa a thi thin a ni tih hria in, ka lungngaihna hneh turin i kianga awm nachang ka hriat theihna turin min pui ang che. Amen. Ti ang aw.

Follow tih a hnuaia inziakah khuan i click dawn nia.

A Duh Zawng Ti A, Tuar Hram Hramtute A Lawm Thin

"In sual a, kut thlak in tuarin chhel takin tuar mah ula, fakna engnge in hlawh thin? Amaherawhchu thil in tihthat a, in tuarin chhel taka in tuar chuan chu chu Pathian lawmzawng a ni."(I Petera 2:20)

Thil tha Pathian duh zawng ngei, hreawm ti chung chungin i ti em?

Rawng i bawla, rawngbawlna chuan i nun a phuara, hun thawl pawh i nei hleithei lo em?

Pathian duh zawng a nih avangin i inngai tlawma, chu vang chuan mi ngaihnep i hlawh em?

Pathian duh zawng tih i hriat avangin, dik taka nun i tuma, i bul ami zawng zawng an dinchhuah laiin ila tlu sawp viau em?

Lungngai suh ang che, vanah chhinchhiah a ni. Kan Pathian hi, Pathian dik a nia, amah tihtute lawmman pek hmang leh, lawmman pek theihnghilh ngai lo tu a nia. Bei fat fat la, a hun takah Lalpan dinhmun tha a pe ngei ngei ang che.

(Tawngtai Dan Tur)
Lalpa, hreawm mahsela i duh zawng a nih vanga harsatna tuar hram hramtu te chu nangin i lawma. A hun takah lawmman duhawm tak i pe thin a ni tih hi ka hriat renga, engpawh lo thleng sela, i duh anga ka nun tlat theih nan min pui ang che. Amen, Ti ang aw.

Follow tih a hnuaia inziakah khuan i click dawn nia.

Mahnia Lalpaa Intihchak

"Aw ka nunna, engah nge i kun reng? Engah nge ka chhûngah hian i buai ni? Pathian beisei rawh: a hmêla damna avângin Amah chu ka la fak dawn si a."(Sam 42:5 )

Bible chang tarlan khi, Davida sawi niin hriat a ni a.

Bible-ah hian Pathian mi tamtak chanchin kan hmu thei a nga, mahse Davida ang renga Pathian hnaih tum mi hi an vang viau awm e. A tihsual pawhin, Lalpa lakah a tisual a ni tih a hriaa Lalpa hmaah thupha chawiin a kun vat thina, a lawm lahin Lalpan lawmna a pe a ni tih a hriaa, Lalpa hmaa kun a thulh chuang loa.

A nun a hniama, a lungngaihin Lalpa atanga chakna dawn tumin Lalpa hmaah a kun tlat bawk thin a. Israel lal dangte leh khawvela lal dangte chu, an lungngaihin mahni intihhlim an tuma, khawvel ennawmte an zawng thina, zu leh sa ah te hlimna an zawnga, mipat hmeichhiatnaahte lawm an tum bawk thin a ni. Chungahte chuan reilote chu hlimna an hmu ve mahna, mahse Lalpaah an hlimna leh lawmna chu a innghah loh avangin, nun ruak leh khawhar takin an nun an hmang ral thin a ni.

Keini pawh hi, kan nun a nguia, kan nun a khawhar a nih chuan, khawvel ennawmah te, nulat tlangvalnaah te, ruihhloah te hlimna zawng mai lovin. Lalpa hmaa kunin, hlimna leh lawmna te, chakna leh thiltihtheihna te i zawng zawk ang u.

Haw u, kan nun a hlim loha, a chauh apiangin Lalpa hmaah kun ila "Aw ka nunna, engah nge i kun reng? Engah nge ka chhûngah hian i buai ni? Pathian beisei rawh: a hmêla damna avângin Amah chu ka la fak dawn si a."(Sam 42:5 ) I ti ve ang u.

(Tawngtai Dan Tur)
Lalpa, ka nun a nguai changte hian, khawvel thila intihhlim tum loa, nangmahah hlimna leh chakna ka zawn zawk tlat theihna turin min pui ang che, Amen. Ti ang aw.

Follow tih a hnuaia inziakah khuan i click dawn nia.

Johana Bung 3 Chang 16

"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."(Johana 3:16)

He chang hian chhandamna lo awmdan hi, a sawifiah deuh vek mai a! Ti ila kan sawi sual awm lo e, he chang atang hian lehkhabu eng emaw zah a ziah theih hial a nga, mahse tawi tein sawi fiah han tum ta ila.

1) "Pathianin khawvel a hmangaih em em a"

Pathianin khawvel kha, a nih ang angin a hmangaih a, khawvel leh a chhunga mihringte hi kan sual ang ang hian, min hmangaih hle a.

2) "Chutichuanh a Fapa mal neih chhun a pe a"

Pathianin khawvel sual tak mai chu, a hmangaih tlat mai sia, khawvel chuan a dan bawhchhiain boralna lam chu a thlang zawka, a boral ngei dawn bawka. Chu khawvel suala tlu boral tur chu, Pathianin a hmangaih tlat si avang chuan, a boral a phal loa, khawvel chhandam tur chuan"A Fapa mal neih chhun a pe a". Chu a Fapa kan Lalpa Isua Krista chuan khawvel sual zawng zawng chu a phur a, krossah chuan khawvel sual chu a thih pui ta a ni. 

3) "Amah chu tupawh a ring apiang an boral loh va, chatuana nunna an neih zawk nan"

Amah, Isua Krista krossa, a thihna leh a thawh lehna chu, "ka chhandamna a ni, sual leh boralna lak ata ka chhanchhuahna a ni" tih ringtu zawng zawngte chu an boral lovang, a chhanchu Isua Krista misual aia a thihna kha, Pa Pathian chuan misualte tihsual man rulhna tlingah a pawm a ni.

Mahse, chu chhandamna chu dan pakhatin ala hunga ti ila kan sawi sual awm love. Chu dana chu, Rinna Dan a ni a, chu chhandamna chang tur chuan Isua Krista chu Lal leh Chhandamtua rinnaa pawm a ngai a ni.

Isua Krista Lal leh Chhandamtua pawmtute chu, Pa Pathianin an sualte a hmu tawh loa, a fapa tlanna thisena chauh chu, an hmaniah a hmu ta zawk a ni. 

He rinna dana hi khawngaihna dan a tih theih bawk awm e, a chhanchu Pa Pathian chuan mihring a Fapa'in a tlan hma hauha alo hmangaih tawhte chuan, a Fapa Isua Krista chu Lal leh Chhandamtua an pawm rualin, eng ang pawhin lo tisual tawh mahsela, a hmangaihna leh khawngaihna avang chuan mithianghlimah pawmin, nunna buah an hming a ziah saka, nunna bua an hming chuang tawhte chu a nawhreh theih tawh loh a, Krista chhandamna changtute chu, Pathian hawisan mahsela a lama hnuk hnai turin, nasa takin an nunah a thawk thin a ni.

Nunna bua hming chuangte chuan, chatuan nunna chu an nei thin a ni.

(Tawngtai Dan Tur)
Lalpa, misual ka nih lai pawha min hmangaih avangin ka lawm e, misual boral mai tur hi nangmah leh nangmah insengsovin, i Fapa mal neihchhun min chhandam tura min pek avang hian ka lawm e. Keima tih pakhatmah awm hauh lovin, i chhandamna min buatsaihsak chu ka changa, nunna buah ka hming a chuanga, vanmi ka ni bawka, ka va phulo teh lul em. Ka lawm zia entir nan, he leia ka dam chhung zawng hian, i rawngbawltu rinawm nih ka duha, nangin min pui ang che, Amen. Ti ang aw.

Follow tih a hnuaia inziakah khuan i click dawn nia.

Kawppui Zawn Kawnga Fuihna

"Thununna pawm chu nunna kawngah a awm a, Zilhhauna hawisantu erawh chuan a tisual thin."(Thufingte 10:17)

Rev Smith Gerfield'a leh Pi Dorothy Gerfield'i te chuan an tupa James'a leh an tunu Martha'i te chuan, an zirlai an zirchhuakta ve ve bawka tiin, an hmakhua ngaihtuahin nupui leh pasal an zawna an neih dan tur chungchanga fuih an duh avangin leng turin an sawma. An chhungkua hi rawngbawltu chhungkua an nia, Jamesa leh Marthai te pa erawh pastor a niloa, company lian Nexzola hotu Chief Of Operation a ni thunga, mahse rawngbawltu rilrua thawk tlat thin a ni thunga, hei vang hian a dinhmun chelh pawh hi a chelh thei reng a ni.

An tupa chu an fuih hmasaa, Bawiha James, Pastor nih tumin Doctorate of Divinity i zir chhuaka, bible college-ah I thawk emaw, kohhran i enkawl emaw, pastor rawngbawl hna i thawk tihna a ni ve ve dawn a, hei vang hian Pathian duh dana kawppui i zawn a tul a ni, an ti a, tichuan an fuih mawlh mawlh a: 

1) Dawhthei la, nghakthei bawk ang che: Mi chikmi i nia, i date (i ngaihzawng tur) i thlan hmain an background zawng zawng hriat hmasak vek nachang i hresa dawn tih ka hriaa, chutah tak chuan hmeichhe tha hi an fimkhura an tit deuh thin avangin, in in pawh hma chu a chungchang i hria tih hriattir ngai suh ang che. Bar vela nula i chhar mai theihte chuan an chanchin i hria tih hria se, an lawm mahna, mahse hmeichhe tha pangngai chu a lawm kher lo ang, a chhanchu a fimkhur avangin amah i hriat dan ang chin zela i hnaih chhoh zel a duh zawk ang.

A rin hma che chuan, a hna thawh emaw a rawngbawlna emaw chu a hrilh mai lo hial ang che. A rin hun chea a hrilh tur che kha ilo hriat lawk vek chuan, a ngaih i ti tha lo thei zawk dawn a ni.

2) Tawngtai pui la, rawngbawltu i ni tih hriattir ang che: In innela, in in rin tawn hnuah chuan, tawngtai pui fo la, rawngbawltu i nia, ila ni zel dawna, Pathian rawngbawlna hna chu, i hawina lam a ni zel dawn a ni tih hi hriat chian tir la. Nangmah a neih dawn che chuan, rawngbawltu i nihna leh rawngbawlna hnain a kentel thatna leh harsatnate a pawm tel a ngai a ni tih chu hriattir ang che. Hengte hi in in hauh lai leh in in hlat laiin hrilh lo la, in in hnaih lai tak leh in hlim dun lai takin hrilh zawk thin ang che.

3) Hun zalen neih tir fo la, rawngbawltu hausakna hriatthiam tir bawk ang che: Hmeichhe ngaihtuahna fim nei thin te chuan, eng ang pawhin an pasal tura chu hmangaih mahsela, an inneih hmain inngaihtuahna hun tha an duh thina. Tin, in inneih hnuah pawh, i nun mila insiam remtur zawk anih avangin inngaihtuahna hun a mamawh fo ang, chu vang chuan hun zalen neih tir thin ang che.

Tin, rawngbawltu hi mihring kawsak kawngah hian, a rethei ber emaw, a hausa ber emaw kan ni ngai loa, harsat hunlai erawh a awm teh meuh mai, chu bakah vanneih kaltluan lai pawh a awm. Mahse, rawngbawltu hausakna chu sum leh pai lam a niloa, a rawng kan bawlsak Lalpa zawk a nia, Lalpa chuan a rawngbawltute chu an mamawh ang zelin engkim a pe thina. Chu mai bakah an neih ang angte, a vawn thatsak thina, eiraltu lakah a venhim sak bawk thin a ni, tih hriatthiam tir ang che.

Hei hi rawngbawltu tamtak chuan an nupui fanaute an hriatthiam tir thin loa, rawngbawltu an nih avanga rethei ta viauah an inngai thin. I pa pawh hi kan hriatthiam tir lo nge o, hun pumpuia rawngbawltu nih aia, hna dang thawh a thlang hi. Eng pawh nise, a pawimawh ber Krista nena inkungkaina erawh a nei thunga.

I pa hian rawngbawltu hausakna a hmuh thiam loh chhan a ka rin chu, i pi hun awl ka pek hleihtheih loh vang a niin ka hriaa. Hmeichhia hian, an benga an hriat rual rualin emaw, an mita an hmuh rual rual hian emaw, thil hi an hrethiam nghal mai thin loa, an mahniin hun thawla an ngaihtuah let leh a, an hritthiam hi a ngai thin, chu an thil hriata chu an fate an zirtir leh thin hi alo ni.

Martha'i hi, lehkhabu chhiar hlawhtak, New York Times best seller thla thum chhung ni thei "Paralyzed Society" ziaktu leh tichhuaktu a nia. History leh Sociology ah te Master Degree a nei ve ve a, a lehkhabu tih chhuah pawh hi, Novel category a dah tur nisi, Research leh Conspiracy (miin thilsual a ruahman) thleng tak tak leh ni thei awma, langte a tar lan tam em avangin, lehkhabu tichhuak thintu (publisher) te chuan hralh a kal an rin loh avangin an tih chhuahsak duh loa. Mahse, Martha'i hian loan a laa, independent'in a lehkhabu hi a tichhuaka, Novel zingah chuan a danglam em avangin ngainat a hlawh phah ta phian zawka, tichuan a thuziak chu a danglam avang leh beng a verh avangin, senate 10 leh governor 12 in an thusawi tur ziahsak turin an sawm ta nghe nghe a ni.

Marthai chu tihian a pi leh pu chuan an zilha, 
1) Hlu ber chu Pathian a nia, hlim ber te chu Pathian neitute an ni: Martha hmeichhe chak leh huaisen i nia, mahse hmeichhia i ni miaua i huaisen ber lai pawhin i tap thina, thutlukna tha ber i siam lai pawhin ngaih that lohna i nei thin ang. Puitu leh fuihtu che i mamawha, a hun taka pasal i neih a pawimawh a ni, nang anga hmeichhe chakte chuan pasal an nei duh loa, mahse kawppui an nei leh tho thin sia, chu chuan an zahawmna zawng zawng a tibo thin.

Engkim zawng zawng aia hlu ber chu kan Pathian hi a nia, kan Pathian neitute hi hlim ber angin an lang ngai hran loa, mahse Pathianin engkima thlamuana a pek thin avangin, chu thinlung thlamuanna atang chuan hlimna an hmu leh thina, hei vang hian Pathian neitu te hi an hlimber thin a ni. Hei vang hian pasal i zawnin milian leh hausa chauh en lo la, chutiang a nih rualin mi laihawl leh retheite an tha zawk e ka tihna a niloa. Pathian neitu zawng la, a hausa emaw, a rethei emaw, mi thiltithei a ni emaw, mi naran a ni emaw, Pathian a nei a nih chuan, mi tha a ni tih hria la, chance pe ang che.

2) A thu hnuaiah intulut hreh suh: Pathian neitu i tawng a nih chuan, a thu hnuaiah indah hreh suh, i thatna tur chauh a ngaihtuah sak dawn che sia. 

3) Fuih hreh suh: Mi puitling tak i neia, engkimah i ring em em a nih pawhin mihring mai a ni tih hria la, fuih a tul chuan fuih thin ang che, chu chu nupui tha i nihna tak chu a ni ang, chu mai bakah in pahnih chauha in awmin tawngtaina hun hmangtuah tang hreh loa, chhung inkhawmna ngai pawimawh ber nih hreh suh ang che.

Hetiang ang a in nunpui theih tur hi James, Martha in zawng tur a ni an tia.

(Tawngtai Dan Tur)
Lalpa, i hlut ber avangin, mihringah pawh hian, nangmah neitute hi an hlu ber a ni tih hriain, nangmah neitu ka neih theihna turin, nangmaha ka awm tlat theih nan min pui ang che, Amen. Ti ang o.

Follow tih a hnuaia inziakah khuan i click dawn nia.

Chhuan, Lalpa Biak Dah Hmasatute (Worship Generation)

"LALPAN in buh in chungah te, in kutkawih zawng zawng chungahte malsawmna chu thu a pe ang a; LALPA in Pathianin ram a pêk che uah chuan mal a sawm ang che u. In hnena chhia a lo chham tawh angin LALPA chuan ama tana hnam thianghlimah a tinghet ang che u, LALPA in Pathian thupêkte in zawm a, a kawngte in zawh phawt chuan."(Deuteronomy 28:8-9)

Bible kan en chuan, Israelte chhuan (generation) ah, Lalpa biak ngai pawimawha dah hmasa thintu an awma, chung chhuante avang chuan Lalpan a thatna a lantira an hnam tan thutiam tamtak a neia, chungte avang chuan an hnam chu tuna an nih ang hi an nih theih phah a ni. Tun thleng hian, khawvel chawimawina sang ber Nobel Prize dawngtute zingah hian Israel tlah an intlar put thinna chhante, Forbes'in billionair a thlana Israel tlah an intlar put thin chante, khawvel rawngbawltu ropui bik an sawia Israel tlah an awm put thinna chhan hi heng worship generation ho'in nasa taka Lalpa an lo biak thin vang a ni, ti ila kan sawisual awm lo e.

Israel tlah kal zelah khan vawi eng emaw zat chu, a hnam pum anga Pathian biak an ngaih pawimawha, Pathian an dah hmasak hun a awm thin a. A hmasa berah chuan, an hnam intan hun Abrahama, Isaaka, Jacoba leh a fate hun kha a ni a. Mosia awm hma kum 10 velah khan an awm a rinawm bawka, mahse hemi hunlai hian bible'in a tarlang loa, chumi hnuah Mosia hun tawp lam leh Joshua hun bawrah khan an awm bawka, roreltute hun laiahte, a bik takin Davida lal hunlai hian an be nasaa an hnam pawh hi an kang dawrin a hriat theih awm e.

Tunlai khawvelah han lut leh ta ila, Juda ho ten amah Pathian an biak danah a lawm loa, chatuan awm hmaa alo ruat tawh, khawvel chhandamtu a fapa Isua Krista chu kawvelah a rawn tir taa. Krista'n chhandamna a thawh zawh hnuah chuan vananah a chho leh a, a hnung zuitu Isua Krista rinna atanga chhandamna hmutute chu Kristian tih an lo ni taa.

Kristianna a intana, vawi tamtak siam that a nia chumi lam chu sawi thui lo mai ila, kan sawi duh zawk chu, Kristianna a tlak thatna hmun apiang chu ram dingchhuak hmasa an lo ni thin. Tuna, Germany te khu 1945 world war II hnua an dinthat leh kha a nia, Pathian bia generation ho vangin khutiang khu an rawn ni leh theia, tuna U.S te khu civil war leh great depression'in nasa taka a tih chhiat hnuah worship gerneration vangin Lalpan a chawi kang leh a, tunah pawh khuan worship generation thar a in irhchhuak leh dawnin a hriat awm e. Chutiang bawkin Australia te, Itally te, South Korea te, Croatia te, Greenland etc te khu worship generation an awm avangin tun dinhmunah an din theih phah a ni.

Pawi ta em em mai chu, Europe ram thenkhatte khu Pathian an ngaihsak thin angin an ngaihsak tak loh avangin, khawvel ram dinhmun tha bik zingah la tel tho mahsela, a filawr ber ber an nih thin angin an ni talo. Kan bible ah pawh "I rawng bâwl duh lo hnam leh ram chu a boral dawn si a; a ni, chung hnamte chu tihchhiat hlauhvin an awm ang."(Isaia 60:12) tiin alo inziak a ni.

Kan mizoram pawh hian worship generation a nei thina, hei vang hian state te leh chaklo tak ni mah ila, Pathianin min awmpuina avangin hma kan la sawn zela. 

Kan bible han chhui hian, Israel hnamah chuan, worship generation awm thar turte chuan an hmaa worship generation lo awm tawhte thawh tawhsa chu an chhunzawm thina. Tin, worship generation a awm dawnin a bul tantu an awm bawk thin a ni. Keini pawh hi, kan hmaa worship generation te chuan an thawh zawhsa chhunzawm tur tamtak min hnut chhiaha, chung an thawh zawhsa chhunzawm tur chuan worship generation a awm leh a ngai a, worship generation a awm theihna tur chuan bul tantu kan awm a ngai bawk a ni.

Kan mizoramah hian, worship generation "Pathian betu chhuan" a awm leh theihna turin, kan zoram hian bul tantu a mamawha, "a bul tan tur chuan nang leh kei hi kan awm a ni lawm ni!"

Mizoramah hian, Pathian biak dah hmasa thintu chhuan (worship generation) chu, tuna kan hunah hian thleng sela, chu chhuan a chu, kan chhuan (generation) hi ni rawhse. Amen.

(Tawngtai Dan Tur)
Lalpa, kan hmaa mi huai kaltate chuan, an thawh zawhsa kan chhunzawm tur min hnutchhiaha, chungte chu kan chhunzawm theihna turin, he kan chhuan hi nangmah dah hmasatu chhuan a nih theihna turin ro min rel sak la, he kan chhuan hian i lam a hawi theihna turin, kei hi hma hruaitu ka nih theihna turin min pui ang che, Amen. Ti ang aw!

Follow tih a hnuaia inziakah khuan i click dawn nia.

Valentine's Special (Tawngtaia Diltute Chuan An Tawngtai Chhanna An Hmu Thin

Link ah hian lut rawh

https://youtu.be/C5g5fDo4BvI

Pathian Hnena Ka Zawh Chak Pakhat

"Hmangaihnain a dawhthei a, ngil a nei bawk thin."(I Korinth 13:4a)

Pathian hnena ka zawh chak em em chu "Misual i hmelma ka ni sia, tinge min chhanchhuak turin, i theihna zawng zawng i hman" tih hi.

Ka zawhna hi mak tive leh chhawng kan awm takin kan sawi fiah a nge. Sual hrim hrim hi, Pathian hmelma a ni a, Adama leh Evi an bawhchhiat pawh khan, kan Pathian hian sual hi a haw ngang maia, a rang a rangin a hnawt chhuak a ni. Mahse, mihring fate chu a hmangaih sia, chuvang chuan thinlung na chungin a hmangaih tlat si avang chuan, Adama leh Evi pawh a ngaihtuah chhunzawm zel a.

Chutiang ang chiah chuan, Pathian hian min hmangaih si, mahse a hmelma kan ni bawksi, tah chuan a theihtawp a rawn chhuah taa, min tlan turin a fapa mal neihchhun, van mipui zawng zawng zinga engkima tha ber chu a rawn tir ta a ni. Chu a fapa mal neihchhun chuan, a tir atang engmah tihsual nei lo mahsela, misual Pathian hmelmate tan chuan na tak leh mualpho takin kross ah a thi a ni.

Chung zawng zawng chu kan Pathian hian a hlenchhuah vek hnuah, amah chu kan la hnawla, sual lam kan la pan zawk tang tang thina. Chutiang pawh nisela, kan Pathian hian, ka fapa mal neihchhun meuh pawh ka pe chea, engtin nge min la hnawl theih, i nih nih nirawh, min ti awm tak hi a nia.

Mahse, kan Pathian chuan chutianga min ti lo chuan, ka fapa meuh i sual ngaihdam a nih  theihna turin a thi a, chuvang chuan eng ang pawhin sual mahla mithar leh mithianghlimah ka la pawm thei che asin, tiin min sawm reng zawk a ni.

Super hero flimah, a changtupa chuan sual nasa takin a doa, sual chu tih chhiata tih sawm vek pawh a duh thin, mahse sual ti thin misualte chu thi loa nun an neih a duh tlat ang mai hian, kan Pathian hian sual kan tih chu a phallo, a huatin a hua, mahse kan boral a duh si lo.

Han ngaihtuah chian chang phei hi chuan, vawi engzat nge ka hnawl tawh, vawi engzat nge a duh zawng kalsana ka chak zawng ka tih tawh, vawi engzat nge min hmangaih tih hre reng leh a duh anga ka nun chu ka tan a tha ber a ni tih hre reng chunga sual ka pal luih tawh hi, a tam mah maha ka hre seng lo hial ang. Mahse, chung zawng zawngah chuan, kan Pathian hian min hmangaih avangin, min sawm zela, a tir ang chiahin min hmangaihna chu min hriatfiah thar tir leh thin.

A chang chuan, ka tluksan tam tawh lutuk hi, min kalsan tawh maisela ka ti hial thin, a chhanchu misualin a phu loh hmangaihna a dawn reng chhan tur ka hrelo, mahse chu misual chu "a faa a vuah ka ni tlat bawksi". Tichuan, misual chuan sawmtu aw nem chu kan han dawng leh thin a. A chang leh ka tihsual tam tawh zia ka hriaa, a lakah ka inthlahrunga, chung hunah chuan "ka fa'a i nih kha, fa awmin awm ta che" min ti hian ka hre thin.

Kei misual hian, natna ka tawh changte hian tah ka tumlo ka phu ve reng alawm ka tih loh pawhin khawvel ken tel alawm ka tia, ka inseh ruha ka tal ka tal thin. 

Mahse maw! kan Lalpa hmangaihna hian nausen ang maiin min vel thin zawng a nih hi. Ni e, misual hi tap rawhse, a hmangaihtu hmangaihna hi a phulo emai!

(Tawngtai Dan Tur)

Lalpa, sawi tur ka hrelo, min hmangaihna avangin ka lawm e. Amen, Ti ang aw.

Follow tih a hnuaia inziakah khuan i click dawn nia.

Pawi i tih loh chuan, Pathian hnena i zawh duh, comment section'ah khuan ilo tarlang ve dawn a nia.

ENGKIMAH I TANA THA TURIN A RELFEL ZEL THIN

"Ka ngaihtuahte hi i ngaihtuahte a ni si lo va, i awm dante chu ka awm dan a ni hek lo, LALPAN a ti." (Isaia 55:8)

Pathian hi a mak em em a, a hmanrua pawh a mak a, a chetdan a mak a, hriatthiam a har thin. Zawhna tamtak zawh chak hi a mimal tak pawhin ka van ngah tak em. Engvangin nge ka chungah hengte hi i thlen tir tia han list thlak teuh mai hi ka chak thin a ni.

Ka phu reng reng loh malsawmna min pek chang a tam a. Ka phu ve nia ka hriat min pek miah loh chang pawh a tam.

A chang chuan ka hlawhchham ngei dawn a nih hi ka ti a, hlawhtlinna min pe lawi si a. A changin ka hlawhtling ngei dawn e ka ti a, mahse hlawhchhamin ka awm leh si thin. Engkim mai hi Pathian remruatna a nih si chuan kan Pathian hi a mood fuh leh fuh loh a zirin kan chungah ro a rel ta mai emaw tih a awl hle a ni.

Mahse Isaia bung 55:8 ah hian Pathian kawng hi a mak a ni tih a inziak a, kan kawngte hi Pathian kawng a ni lo. Hlawhchham nia kan inhriatte hi hlawhtlinna dang tha zawk min pek dawn vanga min lo tihlawhchham hmasa tete a ni fo a. Tin, a hun tak ala nih loh avang pawhin min ti hlawhchham a ni thei, a hun hmaa kan hlawhtlin chuan rah tha a chhuah rei dawn chuang lo te pawh a ni ang. A chang chuan amah kan hlat hi a hlau em a, min ti hlawhchham fo bawk. Amah hlata hlawhtlinna chuan beidawnnaah min hruai fo a ni.

A chang chuan a khawngaihna nasat zia zir tura min duh avangin kan phu loh dinhmunah min dah te a ni thin. A chang ve thung chuan a tel lo va eng kan nih loh zia kan hriat nan khutah hniam takah min dah ve fo thin bawk.

Engpawh nise Pathian khawngaihna tlemte hi kan buaina zawng zawng lakkian nan a tawk a ni. Pathian khawngaihna chuan kan chhehvela buaina a sut kian loh vek pawhin kan chhehvel buai karah pawh buai ve lo thinlung thlamuang tak min pe thei a ni.

I hlawhchham pawhin, i hlawhtlin pawhin, i phu emaw i phu lo emaw i chunga Pathian rorelna chu a mak i tih pawhin, leh zawhna tamtak nei chung pawhin Pathian chuan i tana tha turin hna a thawk a ni tih ring tlat ang che.

(Tawngtai Dan Tur)
Lalpa, nun hi ka hrethiam loa, ka hrethiam famkim vek dawn hek lo, ka hriatthiam vek pawh a tul loa, mahse engkimah ka hrethiam emaw hrethiam lo emaw, i kutah ka awm a ni tih hi ka rin a pawimawh bera, chutianga engkimah nangmah a ka chawlh theih nan min pui ang che, Amen. Ti ang aw.

Follow tih a hnuaia inizakah khuan click rawh o.

Kross Tel Lovin, Lal Lukhum A Khum Theih Si Loh A (No Cross, No Crown)

"Tin, Isuan a zirtîrte hnênah, “Tu pawhin mi zui a duh chuan, mahni hrehawm pawisa lovin, a kraws puin mi zui rawh se."(Matthaia 16:24)

Isua khan, a tir pang atangin “Tu pawhin mi zui a duh chuan, mahni hrehawm pawisa lovin, a kraws puin mi zui rawh se," a tia. Pathian hnung zui hi a hreawm char char leh bet chawt chawtna a ni loa, mahse kan zui a nih chuan kan na ve dawn a ni.

Van Lal fapa, Isua Krista ngei pawh khan a tuar nasa emai, Lal thutthleng atang ran thlengah transfer a ni, mahsela a kal a kal a, kross atang van Lal thutlengah a thu leh a ni. He kawng hi zawh ve turin min ti bawk a ni.

Kross chu e nge kan tih chuan, "ralna hmun a ni", thuthlunghlui huna puithiamin halral thilhlan a hlan kha a kawk a ni. Chu halral thil hlanah chuan mahni inhlan ral turin min ti tihna a ni chu. Chu inhlanralnaah chuan, i chak zawk kalsanin i chak loh zawk tih a tul ang, i hlawkna tur ai i channa tur zawk i thlan pawh a ngai ang. Mahse maw, a duh anga nung thin leh ama tana inhlante lawmman pek hmang kan Pathian hian, atan i in hlan ral a nih phawt chuan, lawmman a pe ngei ngei ang che. 

Chu lawmman chu i damlai ngei ngei pawhin i dawng mahna, i damlaia i dawnglo a nih pawhin vanah i dawng ngei ang. Chutih rual chuan, he leiah hi chuan ringtute hi miin min fak ve viau mahsela, van ala nih miau loh avang hian, kross kan la put zel a ngai thin a, vanah chauh chawlhna tak chu a awm tih kan hriat a pawimawh awm e.

Kross pu nun neitute chuan, an thiamthu an sawi an sawi tawh loa, thinrimna thinrimin an chhang let tawh loa, an chak zawngte an hnawla Pathian duh zawng an ti zawka, harsatna Lalpa nen an pal an pala an paltlang thina, "Vana Lawmman Thlirin An Nuna Thulukna Pawimawh An Siam Thin" a ni.

(Tawngtai Dan Tur)
Lalpa, ka kross pua i hnung zui tura duhsak taka min sawm avangin ka lawm e, kross kawng zawh tluantlingtute zingah inchhir reng an awm ngailo a ni tih hriain. I kawng, kross kawng chu, ka kross pu chunga zawh zel thei turin min pui ang che, Amen. Ti ang aw.

Follow tih a hnuaia inziakah khuan i chick dawn nia.