Ropui Taka Din I Ni

"I hnênah lawm thu ka hrilh ang che; hlauhawm tak leh mak taka siam ka ni si a: I thiltihte hi mak tak a ni a; Chu chu ka nunna hian a hre chiang hle a ni."(Sam 139:14)

Hma thar lak dawn emaw, nidanga kan la tih ngai loh thil kan tih dawnin emaw, kan la tawn ngai loh kan tawng emaw pawh a ni thei e, heng hunah hian zam mai hi a awl em em thina. 

Chu kan zamna chu sualin a rawn hmu chat thina. Beidawnnaah min hruai lut thina, chutianga beidawnnaa min hruai lut lo a nih pawhin thil dik lo ti turin, min bei thin a ni.

Kan nunah hian, eng thil pawh hmachhawn dawn ila,  van Lal Pathianin "Hlauhawm tak leh mak taka a siam kan ni" ti ila, Lalpa hmachhuanin i kal thin ang u.

Davida khan amah aia let tam taka lian Goliatha a beih dawn khan, Goliatha chak ziate, vawi engzat nge indonna alo hmachhawn tawh tihte, a palen zawngte kha a chhut reng reng lo. Pathian lam chiah a en a, huaisen takin a beia a hneh a nih kha. Davida Pathian kha kan Pathian tho hi a nia, keini pawhin engkimah hian a harsat zia te leh chhiatna lo awm theite hi en en loin, kan Pathian chauh zawk hi i en thin ang u.

(Tawngtai Dan Tur)

Lalpa, nangin hlauhawm tak leh mak takin i kut ngeiin min siam a, chu mai pawh chu ala ni lo i thaw ngei chu keimahah hian i thaw lut a ni. Chutiang taka min duan avang hian lawm thu ka hrilh che a, nangmaha ka inngah chhung chu eng hmaah mah zam tur ka ni lo a ni, tih hi hre reng chungin, nangmah en tlat chunga engkim ka hmachhawn theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Kawppui Zawnnaa Harsatna I Tawh Avang Tak Khan Lawm Lalpa A Chet Dawn Ni

"Chau hnênahte chuan thiltihtheihna a pe thin a; chakna reng nei lote chu a tichak thin."(Isaia 40:29)

Kan thupuia kan luh hmain hei hi i han hre tlang teh ang u! Kan Pathian hi "harsatnaa che thin Pathian a nih zia leh, thim zinga eng lantir thintu Pathian a ni" tih hi. Israelte mipuite kha, tuipui sen an thlen khan, harsatna tawk lo sela, rang takin Aigupta sipai ho khawih phak lohin, tuipui sn kha hleuh kai thei vek sela Lalpan thil mak a rawn ti lo a nga, tupui sen kha a rawn thentir hauh lo ang.

Tin, thlalerah khan eitur ngah em em sela, mana kha a surtir bawk lo ang. Thilmak (miracles) leh kawngaihna leh malsawmna duhawm berte hi, mamawhtuin a mamawhna a sen nasat viau hunah alo thleng thin a ni.

Ruthii khan, pasal tha em em nei sela chuan, amah tlan turin Bohaza a mamawh lo a nga, Bohaza nen an in nei hauh lo ang le!

Josepha khan, Mari dinhmun kha hre thiam sela, "E! ngang berin chhandamtu i pai loh chuan tuin nge pai ang" ti sela chuan, Josepha leh Mari inkarah khan vanram ho an inrawlh hauh lo ang le!

I kawppui zawnnaah khan, harsatna i tawh nasat pauh leh Pathian tan thiltha thlentirna chhan (chance) a tha a ni. Mahse maw, hei hi kan hriat ve thung a ngai a, 'an nuna Lalpan thilmak (miracles) leh malsawmna tha bik a thlen tira te hi,' chhunzan zawma, Lalpa au thintute leh "Lalpa i tel lo chuan ka thei lo" ti ngawih ngawih thintute an ni. Lalpa tihtute vek an ni, ti ila hriatfiah a awlsam mai awm e.

Nang pawh i kawppui zawnnaah khan, Lalpa malsawmna chu i mamawha, chu malsawmna dawng tur pawhin i dinhmun chu a chhe thawkhat em? Mahse, Lalpa malsawmna chu ila dawng bawk si lo em? Ka care viau a nga a rilru ka hneh hrim hrim ang emaw, ka inchei reng a nga min rawn be hrim hrim ang emaw, hausak hmel tawkin ka lang a nga min be chhe lo hrim hrim ang emaw, i thiante bulah min lo zawn pui i tih i tih chhung chu, Lalpa a che lo maithei a ni.

Hengte hi kan ti renga, kan la buai zel bawk sia, chuvang chuan he tihian i han ti zawk tawh teh ang u "Lalpa, ka kawppui tur chu i thu ni rawh se, a hun i tihah min pe la, a hun i tihah che turin min duh chuan ka chet thiam theih nan min pui la, keimah mai chuan ka thei lo a ni" i ti tawh zawk teng u. Lalpa van Lal thutthlenga thu khian, i hmel huat zawng em em leh i ten zawng tak kha, a pe chut lo ang che, engkim hre bertu a ni. 

Kan Pathian Hi I Ring Ngam Ang U.

(Tawngtai Dan Tur)
Lalpa, keimah mai chuan kawppui ka zawng thiam lo, ka na tam tawha, a ngaihna ka hre lo, i hnenah ka rawn tlu tlut a ni, kawngaihin rem min ruatsak la, i kutah ka inkawl tir e, Amen. Ti ang aw.

Follow tih a hnuaia inziakah khuan i click dawn nia.   

Tlanbosantute Pawma, Hmang Leh Thintu Pathian

"Tin, mipuite chu a hnena an rawn inkhawm laiin Isuan, "Tun lai chhuante hi chhuan sual an ni; chhinchhiahna an zawng a; nimahsela Jona chhinchhiahna chauh lo chu an hnenah chinchhiahna reng reng pek a ni lo vang."(Luka 11:29)

"I rawng bâwl duh lo hnam leh ram chu a boral dawn si a; a ni, chung hnamte chu tihchhiat hlauhvin an awm ang."(Isaia 60:12)  

Pathian rawng kan bawl duh loh avangin emaw, Pathian rawng kan bawkna tur lak ata kan tlanbo hian, a rawngbawl duh lotute leh a tlanboate hian kan tawrh phah thin. Ringtute hi rawngbawl tura koh vek kan nia, a then kohhranahte, mission field ah te, ministry ah te, chhungkuaahte, eizawnna ah te etc. Chung kan rawngbawlna chu thawk duh loa kan tlansan chu sawi loh, kan thawk meka kan inthlahdah hlek a nih pawhin, sualin rawngbawltute hi min beih reng avang hian, kan tawrh phah thin a ni.

Jona pawh kha, Pathianin Ninevi ah a tira, kal duh lo chuan Tarsis lam pan tumin lawngah a chuanga, thlipui nasa tak a tleh avangin a lawng chuanna chu a keh dawna, bungrua an paih hnu pawhin, a pil dawn dawn ta a nih kha. Jona hi a mangang ve ngawt ang, rawngbawlna a tlansan avangin a bul amite nunna pawh dinhmun hlauhawmah a awm phah tih a hria a nga. Tu vang nge tih hre tura thum an vawr khan, Jona chungah a tlaa, lawng atang chuan an thehchhuak taa. Nghapui a dawlha, nghapui kawchhung hi a hreawm tur zia kan ngaihtuah thiam mai awm e, nghapui hi pangti lum nei lo a nia a kawchhung kha a vawt viau ang, a thang hle a nge, a thimin a thim mup ang. Jona hian Lalpa kohna hi tlanbo san lo sela chuan heng zawng zawng hi a tawk lo ni mai tur a.

Kei ni pawh hi Lalpa rawngbawlna ni khat lek leh zan khat lek kan tlanbo san pawh hian kan tuar thin a nih hi. Rawngbawlna dang vang emaw, hna leh chhungkua harsatna avangte a, rawngbawlna kan thulh hi chu thu hran a ni, Pathian humhimna huam chhungah kan la awm a rinawma. Mahse, kan hman reng leh kan theih reng pawha, thatchhiat vang hrim hrim leh thil dang vanga rawngbawlna kan thulh hi chuan, kan tawrh pha nge nge thin a ni.

Rawngbawltu ni thin ruihhloa buai ta te, sawn thlak tate, naupai tate, leh kawng dang a tal buai tate hi, rawngbawlna vawi khat an tlan bo sanna atangin heng dinhmunah hian an lo ding thin a ni. Vawi khatin vawi hnih a hringa, tichuan a kal a kal a, hna tlangte leh inkhawmte pawh enge an nih bik, tihna rilru an put tawh phei chuan an hla tawh em em thin a ni. (duhtawk ta ila)

Ka zawh duh che chu, "rawngbawlna i tlan bosan tawh em" tih hi a ni. I tlan bosan zeuh zeuh tawha, mahse i nunah alangin chhiatna em em ala thleng lo a nih chuan, chhiatna lian tham a thlen nghak suh, theih tawpin Lalpa rawngbawl leh rawh.

I tlan bosan rei tawh a, i nunah pawh chhiatna nasa tak alo thleng tawha, awmzia a awm tawh lo a nih nih ka ni tawh mai ang i ti em? Chutiang dinhmuna i ding a nih chuan, Pathian hnenah thupha chawi la, Pathian rawngbawl turin a hnenah kir leh rawh. Jona'n nghapui kawchhung atanga Pathian hnena thupha a chawia, Pathianin Jona kha alo la ngaihdam duh leh a rawngbawlna tur atana a ruatsakah ngei ala tir leh duh ang khan. Pathianin a ngaidam duh che a, i rawngbawlna tur atana a ruatsak ngei che kha, pek leh che a duh a ni.

Jona awm tawh loh hnu kum 1000 velah chuan, Pathianin a fapa Isua Krista chu a rawn tira, a chinchiahna ropui ber thihna atanga a thawh lehna chu Jona nghapui kawchhunga ni 3 leh zan 3 a awm kha, entir nana hmangin "Jona chhinchhiahna chauh lo chu an hnenah chinchhiahna reng reng pek a ni lo vang," tiin a sawi nghe nghe a. Isuan a thia a thawh lehna tur chhinchiahna kha, ka chhinchhiahna ti zawk awm tak a nia mahse "Jona chhinchhiahna" tih a thlang zawk a. Hei hian, tisual tawh leh rawngbawlna tlan bo san tawh a hnena kir lehte ala pawm theih zia leh ala hman duh zia a tilang fiah chiang awm e.

Ala Hmang Duh Che, Lalpaah Kir Leh Rawh.

(Tawngtai Dan Tur)
Lalpa, vahbosan thin che mah ila, nangin min la pawm zel duh avangin ka lawm e, eng anga rei pawh vahbosan che mah ila, min lo la pawm dawn a ni tih hi hre reng chungin i hnenah ka rawn kir e, Amen. Ti ang aw.

Follow tih a hnuaia inziakah khuan i click dawn nia.

Tih Dan Tur Lalpan A Hria

"I thu hi ka ke atante hian khawnvar ani a, ka kawng atan eng a ni."(Sam 119:105)

1) I nuna thutlukna siam har i tih changin engtin nge i thih le?
I chhungte leh i thiante i rawn a, nangmah ai an lo hre lo zawk bawk si thin tiraw!
A chang hi chuan a buaithlak ani, thulukna siam dan hrelo mah ila kan siam a ngai tho tho thin si a. Chutiang hunah chuan, Pathian hnenah thutlukna dik kan siam theihna turin tawngtaiin dil ila, Bible'ah kan hun tawn ang chi tawng an awm leh an awm loh ngaihtuah ila. Tichuan, Pathian duh dan ni bera kan hriat angin thutlukna i siam thin ang u. Chutiang taka kan thutlukna siam kawnga, Pathian kan dah hmasa a nih chuan, thutlukna siam sual pawh loni ta ila, kawng dang min hawn sak leh dawn a ni.

2) Kal ngaihna hre loin i awm em?

Pathian rawng i bawlnaah emaw, lehkha i zirnaah emaw, eizawnna hrang hrangah emaw kal ngaihna i hre lo em?
Kal ngaihna eng kawngah pawh i hre lo a nih chuan, a ngaihna hria Pathian kan nei tih hi i hria ang u. Kan sawi tawh angin, chutianga kal ngaihna kan hre lo a nih chuan, tawngtaiin Pathian hnenah kal leh dan tur dil ila, bibleah kan hun tawn ang chi a awm em tih chhut bawk ila, tichuan Pathian duh dan ni bera kan hriat angin kal leh i tum ang. Tin, kal ngaihna kan hre ngang lo a nih chuan Lalpa i nghak mai hreh lo ang u.

Eng pawh nise, kan Pathian hi kan kawng zawng zawng tieng theitu leh dinhmun tha bera min hlangkai theitu a ni tih hi theihnghilh ngai lo ang u. Eng pawh ti dawn ila, kan Pathian thuin engtin nge a tih tih hi, chhut fo thin bawk ang u. 

(Tawngtai Dan Tur)
Lalpa, kawng dik bera min hruai theitu leh thutlukna tha ber min siamtir  theitu i ni tih hi ka theihnghilh ngai lohna turin min pui la, engpawh ti dawn ila nangmah rawn nachang ka hriat zel theihnan min pui ang che, Amen. Ti ang aw.

Follow ti a hnuaia inziakah khuan i click dawn nia.

A Harsat Vang Tak Hian Lawm Lalpa A Chet Thin

"Ka thi lo vang, ka dam ang a, LALPA thiltihte chu ka hrattir zawk ang"(Sam 118:17)  

Hmeichhe thiput kha, kum 12 lai dam thei loin a thi chu put lo sela chuan, damna beiseiin Isua a khawih lo a nga, damna a chang lo ang, Isua kha chhandamtuah a pawm lo a nga, vawiin niah a chanchin pawh kan hre lo ang. Mahse, a thi a puta a dam thei loa, a thi a put miau avangin leh midang bula awm ve tlak loha an ngaih avang tak chuan a rukin Isua a khawih taa, a dam a, chhandamtu Krista chu a neih phah ta bawka, vawiin ni thlengin rinna chungchang kan zir dawn a nih chuan, hmeichhe thiput chanchin kha kan sawi tel loh chuan a kim thei ta lo a nih hi.

Midel Bartimaia kha a mitdel lo sela chuan, "Isu Davida fapa min khawngaih rawh" tiin a au a au lo a nga, Isuan a mit khawihin a tih var sak lo bawk a nga. Mahse, a mit a del miaua, a mit a del avang tak chuan Isua a au a, Isuan a tidam taa, Bartimaia hmuh hmasak ber chu a Lal leh a Chhandamtu Krista Isua a ni taa. Pathian koh (auh)  chungchang kan sawi apiangin Bartimaia chanchin hi kan sawi thin phah ta a nih hi.

Thipuit lo na na na chu a thiput tih dam sak a ngai lo, mitdel lo na na na chu a mit tih varsak a ngai loa. Nang pawh, dam la, tha la, tluang vel vek la chuan i nunah Pathian hnathawh lanna tur a awm lo ang. I harsat avangte, i natna avangte leh buaina i tawh avangte khan, Pathianin i nunah thawh a duh a, a hna tawh pawh chu i nunah hmuh theihin a lang chiang dawn bawk a ni.

1) Hna i mamawh a hmelhriat tha i nei si loa tiro! Khatiang dinhmunah tak khan lawm le, Lalpa a chet duh thin ni, ti hian han ti ta che "Lalpa nen hna tha ber ka hmu thei a ni" ti la, hmelhriat tha nei zawng zawng kum turin, nasa takin bei la, midik lote dan phak loh khawpa, thiam ni turin han bei ta che. Pathian i rina, bul i tan a nih phawt chuan, Lalpa i nunah a thawk a nga, i tum ram chu i thleng ang. Tichuan, miten Lalpa a nunah a chet avangin kan tluk phak lohah a ding ta a nih saw, an la ti ang che.

2) I dam loa, doctor te an beidawng tan ta em? A chang chuan Pathian hnathawh ropui zawk a lanna turin, doctorte an beidawn alo ngai ve thin asin. Lalpa neitu i nih chuan, thiltha pahnih i chungah a thleng thei, pakhatnaah chuan Pathianin a tidam thei chea, pahnihnaah chuan Pathianin natna awm tawh lohna hmunah a hruai haw thei bawk che. Pathian neitu tan tawpna chhia a awm tak tak thei lo.

3) I fa emaw, i unau emaw, i nu leh pa emaw, ruihhlo bawiah an tanga, an sim thei ngang lo em? Hetiang mite nunah hian alawm Lalpan a khawingaihna a lantir duh thin ni. Ruihhloa Buaia leh Buaii te kha, ruihhlo ti ve ngai lote nuna a tih ve theih loh Pathian vanga ruihhlo Sima leh Simi te nih tir a duh a ni. Chutiang mite, awm mai mai pawh hi, ruihhlo ti lo mite ai mah hian, mit a la zawk thei thin a ni.

4) Sumdawng buaina thuk taka tang, kal ngaihna hre tawh lo i ni em? Chutiang i nih chuan, i nunah Pathianin a ropuina puanchhuahna tur ava ngah dawn em, i chetsual leh i buai avang tak khan a pui duh dawn che. Chesual lo leh buai lote chu puih theih pawh an ni lo, midang thurawn pawh an la thei lo. Chesual ngei leh buai ngei kha, Lalpan a pui duh che a ni, Lalpa lam en chungin, i insiam thatna tur apaingah insiam tha rawh le.

5) I chhungkua a buai nuai em? In chhungkua a buai nuai avang tak khan a lawm, nang pawhin kristian chhungkua neih i chak ni. Kristian chhungkua neih i duha, Pathian hnena i dil thin avang khan, Lalpa chu inchhungkuaah a thawk mek a ni tih hre reng ang che.

Eng ang pawhin, harsatnaah tang thuk mah la "Ka thi lo vang, ka dam ang a, LALPA thiltihte chu ka hrattir zawk ang" han ti ve teh leh. Lalpa en chungin bei zel la, tichuan hmeichhe thiput kha Isua a deh avangin a dam kan tih ang leh Bartimaia pawh Isuan a mit a tih var avangin alawm a mit avar an tih ang chiah hian. Miten, Lalpa a nuna a thawh avangin alawm, a dinchhuah, Lalpa a fapa, a pa, a nu, a uanu nuna a thawh avangin alawm ruihhlo a sim, Lalpa a nuna a thawh avangin alawm a dam tak ni an la tih dawn ni.

(Tawngtai Dan Tur)

Lalpa, harsatna ka tawh i phal avangin ka lawm e, he harsatna avang hian ka nunah i in puan mek avangin leh i inpuan zel dawn avangin lawm thu ka hrilh a che, i that zia ka nunin a puan chhuah ve theihna turin eng harsatna pawh tawk ila nangmah ka en tlat theihna tur chein min pui ang che, Amen. Ti ang aw.

Follow tih a hnuaia inziakah khuan i click dawn nia.

Mi Liante Rin Ai Chuan Lalpa Ring Zawk Ang Aw!

"Mi liante rin ai chuan LALPA-a rinna nghah hi a tha zawk a ni."(Sam 118:9)

Mi liante, thil titheite, mi hausate, mi fingte a, rinna nghah mai hi a awlsam khawp mai, mi liante a innghah mai hi mihring pangngai ngaihtuah phak tawk vel a ni awm e. A chhanchu, mi lian tilungawitu leh tilawmtu chuan  mi lian hnen atang thil an dawng thin a ni. Hei vang hian mi liante tih lawma, an lak atang thil dawn mai hi awl pawh a awl viau hmel zawk awm e.

Hman ni deuh khan, C.M'in kan pawlin mamawh kan neihte a hnena kan thlen theih nan, amah hmu turin min hrilh zawk tuah atang hlauh maia, kan C.M zawkin min hmuh duh chuan chu mi darkarah chuan hmuh theihin ka awm dawn a nia aw! tia min hrawn hrilh chhan hi, Pathian hnena kan mamawhte kan thlen thin vang leh a tul a tih chuan C.M pawh min hmuh tir tura Pathian hnena kan dil thin vang a niin ka hriaa. Tichuan, kei pawh kava kal ve nghe nghe a, C.M hmu tura intlar an lo tam khawp mai, chutih lai chuan biak in pa 5 vel kan kalh pelhahte chuan tawngtai thawm emaw, Pathian be thawm emaw hriat tur a awm lo thunga. 

Ni e, kan nun zawng zawng hi tawngtai nan a hmang zo vek turin Pathianin min ti loa, hna thawh hun leh mi pawimawh leh mi liante biak hun pawh a awm ang. Pathianin ami thenkhatte chu lal be turte, leh rolreltu ni turte in a koh bawk thina, mahse kan Pathian hian hnaah emaw, roreltuah emaw, mi lianah emaw, kan chhungteah pawh innghat turin min ti loa, amahah chauh innghat turin min ti a ni.

World War 2 lai vela, Juda ho an suat tak tak lai khan, Juda hnam khawih tumtu sipai hotu pakhat mumangah chuan ka mite hi khawih tawh suh tia hrilhtu a neia, Juda ho awmna lam pawh a pan chhunzawm ngam ta lo a ni. Nebukadnezzara a hun laia khawvel zawng zawng deuhthaw awptu pawh kha, Pathian thuhnuaiah alo awm chai chai khawp mai, a chungah Pathian a lung ni loa, kum 7 chhung ramsa ang chiahin ramah a awma, hnim hring a ei thin bawk a nih kha. 

Chutiang tho chuan kan Pathian hi tunlaia kan ram lalte leh mi liante chungah hian ro a rel chiang hle a, ram khata roreltu emaw, ram pakhat lal emaw amah do zawnga chete chu an thlahte thlengin an chawrchhuak tawh ngai lo a ni.

Kan Pathian hi he khawvel zawng zawnga mi liante leh ram hruaitute leh lal zawng zawngte siamtu a ni tih hria ila, a siam mihringah innghat loin, a siamtu zawk kan Pathianah hian i innghat zawk ang u.

(Tawngtai Dan Tur)
Lalpa, mitin chungah leh engkim chunga Lal leh thuneitu i ni tih hi ka hriat reng theih nan min pui la, nangmah lo mihring leh thil dang reng rengah innghat lo turin leh engkimah nangmahah chauh ka inngah theihna turin min pui ang che, Amen. Ti ang aw.

Follow tih a hnuaia inziakah khuan i click dawn nia.

Pathian Puihna

"Ka manganna atangin LALPA chu ka ko va: LALPA chuan mi chhâng a, hmun thlawl takah mi awmtir ta a."(Sam 118:5)  

Kan mangan a, Lalpa kan auh hian, mihring angin eiah! ka rawn pui ang che, tiin kan beng hriatah min rawn chhang let lem loa. Mahse, mihringin kan koha, min chhan let aia rang leh nasa zawkin min chhang thin a ni.

Pathian aw thinlunga hre thinte chuan, Pathian aw a rawn thlena, a ran zia pawh kan hre theuh awm e, a rang lutuk hi mihring ngaihtuahna chak ber pawh hian a ngaihtuah phak lo ang. Chutiang ang chiah chuan, Pathian puihna pawh hi a ran a rinawm a ni, chutih rual chuan Pathian puihna kan dawn hian, kan duh angin min pui kher lo thina, hei vang tak hian Pathian nen a inpawhna tak tak kan neih loh chuan Pathianin min pui a ni tih pawh hi kan hrethiam lo thin a ni.

Entirnan Pathian hnenah pawisa lo dil ta ila, Pathian chuan pawisa tak chu min pe loin, pawisa thawh chhuah theihna remchangte min pe zawk theia, chu mai bakah min duhsaktute pawh min pe zawk thin a ni. Pathianin a hnena puihna diltu apiangte hi, misual an ni emaw, mifel an ni emaw a pui thin a, a hnena puihna diltute dil dan ang ni loin, an duh dan ang zawkin a pui thin a ni. Chutianga, Pathianin a puihna diltute a puih thinna chu, puihna tha ber a ni a, a chhanchu mihring duhna leh remruatnate ai chuan Pathian remruatna leh duhnate chu a tha zawk zel si a.

Pathian puihna hi kan ban phakah a awm veka, a puihna tak dawn dawn erawh chuan, a thu awi a ngai thung a ni. Mitdel khan, mit varna Isua hnenah a dila, Isua chuan a mitah chirh a tat a, Silom luiah sil turin a tia, tichuan a sila a dam ta a. Pharte khan Isua an tawka, dam an dila, Isua chuan puithiam in entir turin a ti, a thu awia puithiam in entir tura an pen chiah khan an dam ta a ni. Hmeithai pakhatin, Pathian zawlnei Elisa henah an ba a pek theih loh avangin puihna a dila, Elisa chuan bur a hmuh theih apiang la khawm turin leh chung burah chuan a hriak bur khat neih chhun chu, chhung zel turin a hrilh a tichuan, chung hriakte chu hralha, hriak man chuan an bate chu tlak turin a ti a ni.

Kan bible chang tar lan, Sam 118 ziaktu ang chiahin Pathian fa i nia, Pathianin amah a ngaihsak ang chiahin a ngaihsak bawk che. Mahse, Sam 118 ziaktu nena kan danglamna chu, "Pathian thu awi kawngah" a ni a ngem le! 

Hawh u, Pathianin min puih hian, min puihna atan kan tih tur min siamsak thin a ni tih hriain, ti tura min tihte chu hre chhuak turin, tawngtai leh a thu a in chhiahin zawng ila, chung titura min tihte chu i ti ang u. Tichuan, Sam 118 ziaktu ang chiah hian, "Hmun thawl takah" chawlna hmunah chuan kan Pathian hian min dah ve ngei ang.

(Tawngtai Dan Tur)
Lalpa, puih ka ngaih zia i hriaa min kalsan ngai loa, min pui zel thin a ni tih hi ka hriat renga, i puihnaah chuan tih tur min siamsak ve thin a ni tih hre chhungin, i thu zawmin titura min tih chu ka tih theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Dingchhuak Turin, Inngaihtlawm La Thurawn Dawng Thei Mi Ni Rawh

"Inngaihtlâwmna leh LALPA tih man chu Sum te, chawimawina te, nunna te a ni."(Thufingte 22:4)

Kan Pathian hian, inngaihtlâwmna hi a ngai pawimawh hle a, mi inngaitlawmte tan malsawmna tamtak a dah a, Lalpa tihtu ni a inngaitlawm bawkte tan phei chuan, sum te, chawimawina te, nunna te a dah a ni.

Thufing ziaktu hian thil pathum ngaih pawimawh deuh deuh a nei a, chungte chu Finna te, Pathian Tihna te leh Inngaihtlâwmna te a nia. Intluk tlang takin a ngaihpawimawh zia a sawi hlawm a ni. Keini chuan Pathian tihna hi kan ngaih pawimawh ber a rinawma, pawimawh pawh a pawimawh ber awm e, mahse tinge Thufing ziaktu hian Finna leh inngaihtlâwmna leh Pathian tih hi intluk tlang anga a sawi chhan tih hi chhui chian chuan, Pathian tih lohin a fin tak tak theih loh a, a inngaitlawm tak tak theih loh bawk tih hi a hriat chian vang a nih a rinawm.

Thufing ziaktu Solomona pawh a fin chhanchu Pathian a tih vang a nia. Lal a nih theih chhan pawh Pathian thlan a nih rualin a inngaihtlawm vang a ni ti ila kan sawi sual awm lo e. Lal Davida fapa thiltithei deuh chuan an pa kha an cho zel maia, mahsela chhui mite tar lan dan chuan an zinga chak filawr ber nia an hriat Solomona hian a pa thu hi a kip a kawiin a awi duh tlat a ni.

Solomona hian a pa thu a ngaithla duha, a pa thurawn a la duh bawka, chu mai bakah a nu pawh a zah tel a rinawm. Chu mai pawh chu ala ni lo, lal fapa rintlak ber a nih hnuah leh lal a nih hnuah pawh midang dangte atang thurawn a la thei thin a ni.

Kan tunlai khawvelah hian chhui lut ta ila:-

Thurawn dawng thei mi leh ngai pawimawh mi kan ni em tih hi kan chhut chian a pawimawh a. Thurawn dawng thei mi chu:-

1) Lalpa tihtu a ni thina,

2) Mi inngaihtlâwm a ni a, a dinhmun tha viau mahsela, ve tawk a in ti ngai lo.

3) Thurawn a ngaihtlak theih avangin, finna chuan amah chu a umin a um zawka, a din chhuah pha nge nge thin.

Dinchhuah i duh em?

Eng kawngah pawh, Pathian rawngbawlnaah emaw, eizawnnaah emaw, zirnaah emaw, kawppui zawnnaah pawh, tluan kan duha dinchhuah kan duh chuan, ve tawk kan in tihna hi kan dah thata, thurawn dawng thei tura kan inngaihtlawm a ngai a ni.

Chu nun chu kan neih theihna turin, Pathian kan tih a ngai a ni.

(Tawngtai Dan Tur)
Lalpa, nangmah tihnaah hian kawng engkima tluanna tur leh dinchhuahna tur, ze pawimawh inngaihtlawmna leh finna neihna tura thurawn dawn theihnate chu, a awm a ni tih hriain, ka theihna zawng zawnga nangmah tihtu ka nih theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Lalpa Neitu Ni La, Lalpa Neitu Zawng Rawh

"Chaw dangral mai umin phe phe suh u, chatuana nun thlenga awm reng tur chaw, Mihring Fapain a pek tur che u chu, umin phe zawk rawh u; Pa Pathian chuan ani chu a chhinchhiah tawh si a,” a ti a, a chhang a."(Johana 6:27)

Mi thenkhat hi tinge kawppui an thlan fuh loh thin le? Tiin i in zawt ve thin em?

He zawhna hi chhang dawn ta ila, chhandan tur tamtak a awm ang. Thenkhat chuan tihian an chhan a rinawm:

1) A nu leh pa thu a awi loa,

2) Hmel a en lutuk a,

3) Sum a en lutuk a,

4) A in dah hniam lutuk a,

5) A hmanhmawh lutuk a. etc,
an tih a rinawm a. Hengte hi miin kawppui a thlansualna chhanah chuan, dik pawh a dik viau ang. 

Kawppui emaw, nun kawng emaw kan thlan sual chhan ber chu, "rei lote, chhung choa hlimna kan thlakhlel lutuk vang" a ni ti ila kan sawi sual lo ang.

Kan Pathian thu chuan tihian alo sawi a,"Chaw dangral mai umin phe phe suh u" a ti. Hei hi a awmzia tak chu, ei ral theih thil mai mai um suh u a tihna a ni, tihian han sawi zau leh ta ila, khawvel hausaknate, nawmsaknate, mawinate umin phe phe suh u, a tihna a ni ti ila kan sawi sual awm lo e.

Kan Pathian thu chuan "Chatuana nun thlenga awm reng tur chaw, Mihring Fapain a pek tur che u chu, umin phe zawk rawh u; Pa Pathian chuan ani chu a chhinchhiah tawh si a,” a lo tia. A awmzia chu, chhandamna Isua Krista atang lo chhuak, nun chu um zawk rawh, chutianga chatuan nunna zawng thintute chu, Pa Pathianin a chhinchiah tawh a ni, tihna a ni ti ila kan sawi sual awm lo e. Hei tak hi ngai pawimawh ila, nun kawng hi kan dai sual lo a nga kawppui pawh kan thlan sual a rinawm loh bawk a ni.

Chatuan nun ngai pawimawhtu chuan, chu chatuan nunna chu Isua Krista atang chauha neih theih chi a ni tih a hriaa, Isua Krista chu a zawng thin bakah Isua Krista duh ang a nun chu a thlang bawk thin a ni. Chu chu, a nunin a thlan avang chuan, Pathianin a ni chu a chhinchiaha, a venga kawppui a thlansual dawn apiangin, a dang thina, tichuan a hun takah, a tana tha tur ngei leh Isua Krista atanga chatuan nunna nei mi ngei chu, chhungkua a dinpui atan a pe thin a ni. 

Mi tamtak chuan, nun nuam deuha hman ka duha, mi piangthar tha leh Pathian neitute hi an hausa kher si loa emaw an hmeltha kher si loa kan ti maithei a, dik pawh a dika. Mahse, Pathian neitu chu a thinlung a dik thina, thinlung dik neitute hi an rethei reng ngai lem loa, a chhanchu thinlung dik neitute hi a tirah an eizawnnaah emaw, an thiltihah tluang nghal mai lo mahsela, chhel takin an kal ngar ngar thei thin a hlawhchhamna in a danchah zawh loh hun a awm thina. Chutiang a nih lai chuan, thinlung dik lo neitute erawh hniam lam an pan thung thin a. Tin, Pathian neitute hi a tlangpuiin mahni an inthunun thei thin a, chu chu an hrisel phah thin a ni. An taksa a hrisel vangin an that hun chhung a rei thin bawk a ni.

Chu mai bakah chuan, Pathian neitu chuan, Kristian chhungkaw din a ngai pawimawh thin a, Pathian neitu chhungkua chu an hausa lem lo emaw, thil dangah an lang mawi lem lo a nih pawhin, an chhungkuaah chuan Pathian a chen thin avangin an chhungkua chu a hahdam a, in hauh leh invin thawm a awm loa, chhungkua an nuitlang thei thina, thlamuang takin an mua, an thoa, chaw an kil tlang thina. Chu an chhungkaw nun chu, khawvel mi hausa leh larte neih phak loh, Pathian atang chauha neih chi a ni, ti ila kan sawi sual awm lo e.

Duh kan la thlang thei alawm tiro! ”Chatuan nunna neitu kan nih theih nan, Krista hnung zuitu ni ila, chatuan nunna neitu kawppui atan i thlang bawk ang u.”

(Tawngtai Dan Tur)
Lalpa, he lei thil zawng zawng hi chu, kum 100 lai pawh dam ila, ka hman tangkai theih hun chhung hi a rei lo a ni tih hi ka hriat reng theihna turin leh, tun dam chhung leh chatuan thlenga ka hausakna tur, nangmah atanga chhuak nunna chu ka neih theihna turin min pui la, chu nun neitu ngei chu ka kawppui atan min pe turin ka ngen a che, Amen. Ti ang aw!

Follow tih a hnuaia inziakah khuan i click dawn nia  

Lalpan A Tinung Chea, Ani Chu Fak Ta Che

"Mitthite chuan LALPA chu an fak lo va, Hmun reh taka chhukte rêng rêng chuan an fak hek lo."(Sam 115:17)

Pathian nei lotu mithite hian, Pathian an fak thei loa, an taksa nung mahsela Lalpaa an thih miau avangin an fak thei lo a ni. Chung Lalpa nei lotute chu mithite hmun reh, thlan khur chhunga awm tawh ang mai hi an nia, Lalpa an hmuh loh phei chuan Seola kal tur anni.

I thinlunga Lalpa ngaih veng vengna i neih chhante, Lalpa fak hla sak chaka i lung a len thin chhante, Lalpa tana thiltha tih i chak chhante, Lalpa tana i nun siamthat i duh chhante kha, Lalpan a tih nun tawh vang che a nih khaw!

Mi nung che che! ringawt ai chuan, mi nung takzet leh mi hrisel, tlan a zuang thei, thawkthei, a taka che thei, a taka Lalpa fak tak taktu i ni ang u.

In siamthat ka ngai a ni! tiin i inngaihtuah fo em? Chutianga insiamthat duhna i nei a nih chuan, a takin ti rawh. Ni e, vawi lehkhatah tumahin mile 10 an kal nghal thei loa, pen tin an pen a mile 10 mai ni loin mile 100 pawh an kal thei thin ang hian. Insiamthat i duh chuan, thil pakhat leh kawng pakhatah insiamthat chu han tan teh le!

Tin, Lalpa fak i duha, i nuna thiltha tih i duh a ni tiraw. Duhna mai emaw, ngaituah thin mai emaw hi, thiltha tih a ni lo, thiltha ti tur chuan a tak taka tih a ngai a ni. A hmaa kan sawi ang chiah khan, vawi lehkhatah thiltha a tih vak theih loh, pakhat  tih atang thiltha tih hi bul tan chi a ni.

Engkawng zawng pawhin, fak hla sak zawngte, nuna thiltha tih zawngte, mahni nun insiam that zawngte'in Lalpa fak kan duh a nih chuan, bul i tan ang u, bul tanna a awm loh chuan engmah tihlawhtlin a ni ngai lo.

Hawh u, Lalpan min tinung ta sa sa, mi nung Lalpa tana nung tak zet zet mi nih i tum ila, chutiang mi chu kan nih theihna turin, bul i tang ang u.

(Tawngtai Dan Tur)

Lalpa, min tih nun avangin ka lawm e, nung satliah leh nung che che mai ni loin, i tana nung tak zet zet, mi hrisel hna thawka hlawhtling thin ang hiang, i tana thiltha tia, nangmah fak thei tur chein min pui ang che, Amen. Ti ang aw.

Follow tih a hnuaia inziakah khuan i click dawn nia.

I Nuna Chhumpui Kha, Tu Tihsual Vang Mah A Ni Lo, Lalpa Kawleng Mawi Tak A Lanna Tur A Nih Vang Zawk A Ni. (Part 2)

"Isuan, "He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi."(Johanna 9:3)

Enge i chungah thleng tawh? Kei chuan ka hre lo, mahse kan Pathian hmangaihnaa khat khi chuan, engtik lai mahin ala ensan lo chea, a ngaihtuahna atang vawikhatmah ala dahbo ngai lo che a, a kiansan ngai hauh lo che asin!

Pawngsual tawh i ni em?

Nawr kual leh tih duhdah i ni em?

Nu leh Pa ruihhlo tithin emaw, unau ruihhloa buai i nei em?

Nu leh Pa innei lo kara sei lian i ni em?

I naupan laiin, i nu emaw i pa in emaw a thih san che em?

I pian phungah harsatna i nei em?

Midang hriat lohin rilru lama harsatna i nei em?

Natna khirh tak i vei em?

Heng bakah hian, harsatna dang pawh i nei thei e, chung i harsatna leh i tawrhna te chu, i tihsual vang a ni lo, inchhungkua ami tihsual vang pawh a ni lo "Pathian hnathawh i chunga a lanna tur zawk a nih kha." 

Josepha kha, Aigupta hotu lian ber a nih dawn khan, a dinhmun chelh tur nena in hlat lutuk, taninah a awm a ni. Tanin atang, Pathianin lal inah a transfer a nih kha, hetiang hi Lalpa remruat duh dan a ni thina. Keini remruatte chu nisela, Josepha kha lal inkawt velah tal kan awm tir maithei a, a nih loh vek pawhin lal in phiatfaituah talahte kan awm tir maithei a ni. Mahse, kan Pathian hi chuan, a thu zawmtute a chawisan dawn hi chuan, "a hna tawh a ni tih a lan chian ngei theihna turin dinhmun inpersan lutukah a dah thin" a lo ni.

Nangpawh i dinhmun kha, a hreawm viau a ni tiro, kha dinhmun hniam ngei kha kan Pathian chuan a hnathawh tih lan chian zual nan a hmang duh a ni. Dinhmun tha, tuna i dinhmun nena inpersan mah mah khawpa dinhmun thaah chuan kan Pathian hian a dah duh che a ni. Pathianin dinhmun tha pek che a tum chu "Isua Krista hmingin ka ta a ni ti la, chu dinhmun chu i neih ngei theihna turin, Josepha te leh Pathian mi bible'a kan hmuhte angin, Pathian thu i theihna zawng zawngin han zawm teh le."

Pathian duh anga, nun i thlan phawt chuan, nangmah pui tur chein, Thlarau Thianghlim chu a in peih renga, a kaihruai duh che a ni. Tichuan, Lalpan pek che a nghahhlelh em em dinhmun tha i tana a buatsaih sa diam chu, pe tur chein i tan kawleng mawi tak chu a rawn lan chhuah tir ngei ang.

(Tawngtai Dan Tur)
Lalpa, i tana nun hlantute nunah chuan nasa takin i thawk thina, an dinhmun hniam em emte chu an nuna i thawh zia lanchhuah chian leh zual nan i hmang tangkai thina, a hun takah dinhmun tha an tana i buatsaihsak chu i pe thin a ni. Lalpa, heng i mite zingah hian telve ka duha, ka dinhmun hniam pawh hi i ropuina tilang fiahtu ni ve sela ka duh a ni. Chungte chu ka nuna a thlen theihna turin, i thu ka zawm theih nan, min pui ang che. Amen. Ti ang aw.

Follow tih a hnuaia inziakah khuan i click dawn nia.

Nimin lamah khan, he thu part 1 kan tichhuak tawha, ila chhiar lo a nih chuan, hei a link (http://nungturin.blogspot.com/2019/03/i-nuna-chhumpui-kha-tu-tihsual-vang-mah.html)  

I Nuna Chhumpui Kha, Tu Tihsual Vang Mah A Ni Lo, Lalpa Kawleng Mawi Tak A Lanna Tur A Nih Vang Zawk A Ni. (Part 1)

"Isuan, "He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi."(Johanna 9:3)


He thu hi han ngaihtuah chiang chhin teh le! i vanduaina leh i dinhmun a chhiatna tak kha, "Pathian hnathawh i chunga a lanna tur zawk a ni thei asin."


He thu hi, pian tirh ata mitdel chungchanga Isua tawngkam a nia, a zirtirte chuan tu tihsual vangin nge, a mit hi a del ni ang le! tiin an inzawt liam liam a, Isua chuan tu tihsual mah a ni lo "Pathian hnathawh a chunga a lanna tur a nih zawk hi" tiin a chhang a nih kha.


En teh maw!


I dinhmun chhia kha, tu tihsual mah a ni lo! I pa tihsual a ni lo, nangma sual vang pawh a ni lo, Pathian hnathawh i nuna a lanna zawk tur a nih kha. Tunlai khawvelah han lut ta ila:-


Corrie Ten Boom'i te chu Nazi concenration camp ah Juda ho an hum avangin an tang a, Juda ho an hum chhan pawh Kristian an nia, Pathian tana thiltha tih an duh vang a ni. Nazi ho man reng rengte hian an dam chhuah an ring tawh ngai lo a, Corrie'i te pawh hian Pathianin min hrem an ti thei mahse, chutianga ti lo chuan "With Jesus, The Best Is Yet To Be" a mizo chuan "Isua nen thil tha zawk chu a in herchhuak dawn a ni" tih tawngkam hi concenration camp-ah chuan an zuk chhar chhuak zawk taa. Vanneih thlak takin, Corrie'i a dam chhuak hlauha, rawng a bawl taa, a tawngkam "The Best Is Yet To Come" tih chuan, khawvel a deng chhuak ta a ni.


Corrie ang hian, i buaina kha Lalpa inpuanna zawk tur a ni tih hre chungin,"Isua nen thil tha zawk chu a in herchhuak dawn a ni" ti ve ta che!


Denzel Washington lehkha zir lama hlawh chham leh lemchan lama hlawhchham thin kha, a bei zela, flim lama chawimawina sang zawng zawngte chu a dawng kim ti ila kan sawi sual lo ang. A hlawh chhamnaah chuan a zir tur chu a zir chhuaka, fiamthu anga an hman thin tawngkam pakhat "If you hangout at the barber shop long enough you will get a hair cut" a mizo tawng chuan "lumehna dawra i awm i awm chuan, i lu i met ang" tih tawngkam chu, khawvel thufing zingah a dah hial ti ila kan sawi sual awm lo e. He thu hi midang a fuihnaah a hmang thina, tihian a sawia "vawi tamtak flim chang tura hnawl ka nia, mahse ka bei zela, lumehna dawra i awm i awm chuan, i lu i met ang an tih ang hian, i beih i beih chuan i hlawhtling ang" tiin bei zel tura midang a fuihnaah a hmanga.


Kan sawi tawh angin, vawi tamtak a hlawhchhama mahse a bei zela, lemchhang tura an hnawlna hmun ngei, a interview (audition) na hmun Cort Theatre ngeiah chuan, ama produce Fences chu tih chhuah a ni. A hlawhchhamna chuan "tunge a nih" tih hi a in hmuchhuah tir ta a ni. Kei ni pawh hi kan hlawhchhamna atang hian kan Pathian hian "tunge kan nih" tih leh "engah hian nge mibik ka nihna" tih hi hmuchhuak turin min duh thin a ni.


Rawnbawlnaa hlawhtling leh khawvela hlawhtling zawng zawngte pawh hi tluchhe lo an awm lo, mahse an tlukna atang an in zir chho leha an ding leha an tlan ta thin a ni.


Pian tirh ata mitdel kha, Isuan mitdel tana tih theih si mahsela, mitdel tana beih ve viau ngai tur thil a tih tir a, chu chu Isuan a mita chirh a tah kah Siloam luia sil tura a tih kha a ni. Tichuan, piantirh ata mitdel chu, Siloam luiah chuan ava kala, amit chu ava sil taa, tichuana mit chu alo var ta a ni.


Hei ang chiah hian, kan Lalpa hi kan nunah a thawh reng reng hian, tih tur kan nei ve thin. A chang chuan:


1) Inngaihtlawmte, 

2) Dawt sawi bansante, 

3) Zaidamte, 

4) Thawhhmate, 

5) Taimak leh zualte, 

6) Chik taka ngaihtuahna hmante,

7) Midang ngaihdamte, .etc,


a ni thei, mitdel tan khan Siloam lui kha hah lo chuan a thlen theih loh a nga, mahse Siloam lui kha mitdel kalphak tawka hnai a ni. Keini pawh Pathianin kan hmasawnna tura kan tih tur min ruatsakte hi, kan tha leh zung kan sen ngei a ngaihna tur thilte a ni thina, mahse kan ban phak tura hnai leh kan tih theih tawk tura kan theihnain a khuh phak a ni thin.


I harsatna leh i buaina kha, "Pathianin i nuna a ropuina a puan chhuahna tur zawk a nia" chutianga Pathianin i nuna a ropuina a puan theihna turin, ti tura Pathianin a tih che chu, thu awi taka i tih ve thung a ngai a ni.


(Tawngtai Dan Tur)

Lalpa, ka nuna chhumpui lo thlengte hi, ka tihsual vang lam a ni loa, ka nuna i kawleng mawi tak chu, a hun taka i chhuah tirna tur zawk a ni tih hre chung leh, ka nuna i thawh theihna tur chuan, i khawngaihna chang thei tura i thu ka zawm a ngai a ni tih hriain i thu ka zawm theihna turin min pui ang che, Amen. Ti ang aw.



{He thu hi, tuna kan sawi ang deuh chiah hian kan rawngbawlpuiin he blog ah hian a ziak tawh nghe nghe a i la chhiar loh chuan a link kan dah e (http://nungturin.blogspot.com/2018/08/pathian-chuan-harsatna-hmangin-kan-tana.html)}



Follow tih a hnuaia inziawkah khuan i click dawn nia.

A Veng Che A, I Tan Hmabak Tha A Dah Bawk

"LALPA chu ka lungpui leh, ka kulhpui leh, mi chhanhimtu a ni; Ka Pathian, ka lungpui nghet tak a ni a, amahah chuan rinna ka nghat ang; Ka phawt leh, ka chhandamna ki leh ka kulhbing sâng a ni."(Sam 18:2)

Ila tluk chhiat loh chhan kha, Lalpan a ven vang che a nih i ring em. Lalpan a ven chu, tumahin an khawih fuh hleithei lo thin a ni.

Saula kawchhunga ramhuai a luh apiangin Davida chuan tingtang a tuma, tichuan Saula kawchhunga ramhuai awm chuan Saula a chhuahsan thin a ni (I Samuela 16:14-23). A chang chuan Saula hian Davida chu feiin a khawha, mahse Davida chu a khawh fuh thei ngai lo a ni. A chhanchu Pathianin Davida a ven vang a ni, Davida hi Pathianin Saula fei lakah chauh a veng mai pawh a ni lo, Philistia te lakah pawh a veng bawk thin a ni.

Pathian kutin a ven tlat chu, feiin a khawhfuh thei loa, ngunhnamin a sat fuh theih loh bawk a ni. Saula indo mite ang hi chuan an tum an thelh ngai lo a, a fei khawh pawh a na em em a, bangah a bur vu thin nghe nghe a ni.

Hei chiah hi kan sawi tum chu a ni," Pathianin a ven miau chuan, Saula khan midang khawh thelh ngai lo mahsela, Davida chu a khawh fuh thei lo ang chiah hian, Pathianin a ven che avangin midangte an tluk chhiat laiin, nang chu i him tlat zel a em?" 

I sumdawnna ah ba i ngah em em a engtikah nge ka tluk chhiat ang i tia, mahse tichhe tur chein tumahin an rawn hnaih loh che kha! Lalpan a hum che a ni. I lehkha zirpuite an dinchhuah loh laia tluk chhiat theihna thang vawi tamtak pum pelha hma i sawn zel chhan kha Lalpan a ven vang che a ni.

Ngaihzawng vangte, eizawnnaahte, ruihhloahte.etc, midang an tlukchhiat laia ila him chhan kha Lalpan a ven vang che a ni. Rawngbawlna chelhtu i nih phei chuan, Pathian khawngaihna i chang nasa hle tihna a ni, a chhanchu rawngbawltu ni thin tlu leh ta hi an tam em ema, Lalpan a hum vang chein ila kal a ni.

Davida kha Pathianin a hum chhanchu, Pathian kawngah a nun a dah vang a ni. Chutianga, a nun Pathian duh anga a hman avang chuan, Pathianin Davida tan khan hmabak tha a dahsak tlat bawka, chu a hmabak tha a dahsak chu Lalpan chantir ngei a duh bawk a ni. 

Keini pawh hi, Lalpa kawngah kan nun kan dah tlat a nih chuan, Lalpan chhiatna thleng thei lakah min veng a nga, chu mai bakah chuan hmabak eng tak min ruatsak a nga, chung min ruatsakte chu kan chan ngei theihna turin, min pui dawn bawk a ni.

(Tawngtai Dan Tur)
Lalpa, i khawngaihna avangin ka nun hi a tluk chhiat mai i phal loa, min ven sak tlat avang hian ka lawm e. I duh anga nun hmangte tan chuan, hmabak eng tak i buatsaih sak a ni tih hriain, i duh anga ka nun theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.

Amah Avangin I Dik Ngam A Nih Chuan, A Tih Tur A Rawn Ti Ve Ang

"Mi dik tan chuan thimah chuan eng a lo chhuak thin a: Ani chu mi khawngaih thei tak, lainatnaa khat, fel tak a ni."(Sam 112:4)

Ni khat chu ka office ah hian, kan thianpa lehkha ka zirpui thin hi alo leng a, a ni hi department pakhatah technical lama an hotupa ber a nia. A rawn leng hman pawh chu mak ka lo ti khawp maia, a rawn thut ve leh chuan ka thil tar "Sam 112:4" chu enge a awmzia tiin min rawn zawta. Kei chuan he thu hi, ka innghahna pakhat a nih thu leh Pathianin amah avanga dik taka ti hram hramtute tan malsawmna a dah lawksa zia, min hriat nawn tirtu a nih vangin leh dik lo taka ti tura thlemna ka tawn chang pawha dik taka ti thei tura min pui thintu thu a nih ziate chu kalo hrilh mawlh mawlh a.

Ka sawi tui lutuk chu, ka tawng lai  chuan a ni chuan, "i va tawng thei ta ve, rilru tawt laia pan chi i ni ta lo tawp maia" min tia. Kan nui dun haka! kei chuan, ka awl deuh bawka, kan titi reng dawn nia, thingpui kan lam a nge ka tia. Tichuan uluk tak maiin, a nun chu min hrilh taa, a hna thawhnaah chuan, dinhmun sang tak chelh mahsela nawr kual a nih thin ziate leh min awh thin ziate chu a sawia.

Tihian a sawia " Zama, technical officer writen kan tlin chhoh lai  vela, hmelhriat i hmang duh miah lo kha, a (stupid) ka lo ti khawp mai chea, writen ah kha chuan ti tha zawk mah ila, interview ah khan ka tluk phak che hi ka ring lo hrim hrima, bakah thil reng reng hi a taka tihah hian ka tluk ngai lo hrim hrim chea, lehkha kan zirlai pawh khan vai ho takngialte phawh khan practical ah an tluk ngai lo che a nih kha. Mahse, hmelhriat tha ni mai lo, i patea tak ngial pawh i in puih tir duh loh avang khan, midangin hmelhriat an hmang nasa sia, i vanduai ta a nih kha. Kan interview tlaia, i tlin ve loh avanga i chhungte hmuh i hreh zia te kha kala mithla reng thina. Kha mi tlaia, i kal liam tur ka thlir pah che khan, tihian ka ngaihtuaha 'ka tluk loh val saw! dikna avangin a tuar ta a nih saw' ka tia.

Nang chu i dik ngam avangin, tunah chuan nangma ta ngeiah a hotupa ber i nia, keini erawh miin duh duh a an tih kawi turin, hotu hming kan pu ve a nih hi" a tia. Kei chuan "Thianpa kha interview ah kha chuan, ka zep lo a dik thei ang berin engkim ka tia, chutianga tih ka thlan chhanchu, kan chhungkua hi dik lo taka tih hreh lo chhungkua kan nih thin vang a ni, dik lo taka thil kan tih thin avang hian, kan hlim ve dawn ta emaw ka tih pawh hai, kan tih dik loh pui ten min tibuai reng thina, kha nun kha ka hne ta em a ni, dik lo taka tiha dinhmun tah chan ai chuan nitin eichawp zawng ila nun a nuam zawk ang ka tia, kan Pathian hi dikna Pathian a nih zia ka hriat chian phei hi chuan dik turin huaisenna ka nei nasa a sin"

"Nangpawh ala tlai hleinem, tun atang dik takin thawk la, Lalpan a awm pui em em ang che" ka tia. Nidanga in hmuh leh tura intiam chungin a chhuak taa. Ka thianpa Tluanga te ang hna thawh ve chaka ka rilru sen nasat thin ziate leh ka mittui hialte pawh a tlak thin laite kha ka ngaihtuah leta, chutih rual chuan Lalpa rinawm zia, ka hre chiang tan chauh hian ka hriaa. "A tana kan dik ngam a nih phawt chuan, kan Pathian hian a tih tur a rawn tih hmaih ngai lo" tih hi hrehfiah chhoh riauin ka in hriaa.

Hna ka hmuh ve tak loh hnuah khan, kan thian then khatin, an sumdawnna tuna kan sum zawsumdawnna hi zawm ve turin min sawma, tih tur mai ka hre lo nen, Pathian rawn chungin ka zawm ve ta kha a nia. An sumdawnna a hautak berah 'sales and marketing' ah khan bul min tan tira, tumahin an thawh rei peih loh avangin "i theih ber kan ringa" min tia. Tichuan, kei lah chuan "mi hnena kan thil neih chungchang tha taka hrilh leh an duh leh an duh loh zawh kha a ni mai a" tiin phur takin ka thawk ve mawlh mawlh a. Ka chhungte lahin, ka tawng tlem nen, eng ka nih an rin loh avangin, hna exam leh turin min hrilh reng thin bawka, mahse ka in ti paukhauh luia, "ka hlawhchham chuan, midangin ka hlawhchham tih chu min hrilh a ngai lo'ang keimahin ka hre chiang ber ang ka tia," tawngtaina nen theihtawp ka chhuah thin kha a nia.

Hautak pawh alo hautak takzet mai, mi 100 ka biakah mi pa 2 chauh hnenah ka inhralha, miin 'ka duh lo mai ang" an tih hi ka tawng hnem lutuka ka engah mah a thawk loa. Tihian ka chhut thina, nikhatah mi 20 henah kan thil chu ka zuar hmana, kumkhatah ni 330 vel hna a thawh theiha, kumkhatah chuan mi 6600 vel hnenah kan thil chu ka zuar thei dawna, mi 100 zela pa 2 in an duh pawhin kumkhatah mi 132 hnenah ka inhralh dawna ka tia. Tichuan, ka ti ka tia, a thlahnihnaah chuan ka inzuar thiam ta viau nge pawh ka hre lo, mi 100 mi 6 hnenah kan thil zawrh chu ka hralha, a hnuah mi 100 zelah 10 a hnuah 15, a hnuah 20, tichuan kan sumdawnna te pawh chu alo lar zela mi 100 zelah 40 laiin an lei deuh tlangpui taa. Tichuan kumkhatah chuan, mi 2260 hnenah chuan kan thil zawrh chu ka hralh taa. Financial year zawha, ka hlawh kimchang ka lak tlai chuan, bang hauh loa, min lo tawngtaisak thintu kan venga kawng sira chawhhmeh zuar thin pi Kungi chu, a tupa suite tur ka leisaka. Ka phur ve viau a niang, kha mi tlaia, a thil zawrh zawng zawng kha, ka lei zawh sak vek peka. Kan chhungkuain kan eiseng leh dawn silo kan tia, zan lamah ka naute nen kan venga harsa deuhte hnenah semin kan buai leh chuk chuk nghe nghe a.

Tichuan, ka thiante chuan, an hnena kumkhat chauh ka telve hnuah chuan, i enkawlna hnuaiah hian, kan chak ber ang, kan hotupa berah tang ta che min ti taa. Kei pawh chuan, chuti na na na chu ka tia, "mahnia building nei thak khawpin tang ang u aw" tih pah chuan, hotupa ber dinhmun chu ka la taa. Lalpa hian, amah avanga dikte tan chuan, khua hi alo ti eng tak zet mai, ka ti dawn nge, misual hi min khawngaih a ni ka ti zawk dawn. Thla 6 lek, Chief Of Operation hna ka chelh hnu chuan, office thar kan neih ngei ngei ngai khawpin kan in hralh nasa taa. Mi in sak sa, kan leia kan office tharah chuan kan lut ve taa.

Kan building thara kan luh ni a, ka pa tawngkam kha kala hre reng, zingah chhung inkhawm kan hmanga tah chuan ka pa chuan "ka fa Lalrinzama, Mama chuan 'Lalpa vangin dik takin a hlawhtlin theih' a tia, a hna zawnnaa department secretary a patea puihna takngial pawh lak a duh loa, a tla reng bawka, mahse Lalpan kapa hi a ensan loa, kan chhungkaw zinga tluantling taka dik taka ti ngam awm chhun a nia, kan chhungkaw zinga mahnia office building nei hmasa ber pawh a ni bawk, tun atang chuan kan chhungkua reng rengin eng kawngah mah hian, Pathian bak hmelhriat tha kan zawng tawh lo a nga, kan hmelhriat tha ber leh min hre chiang bertu Pathian duh ang chauhin kan ti tawh ang" a tia. Chung thute chu ka pa, a sawitu leh kan chhung inkhawm hmangtuin hnuk ulh zawih zawihin a sawi bawk, kan chhungkua chu kan hnuk a ulh veka, Thlarau Thianghlim'in kan chhungkua chu min rawn uap hlup hlup mai hian ka hria, a lum deuh bawk si, a dai seng seng deuh bawk si hi a ni, berin ka hria. 

Kan chhungkua Lalpa mithmuha dik taka ke kan han pen thawn chu a mawi asin, chungtianga inchhungkua pawhin ke in pen ve theih nan bul tantu in awm a ngai a, nangmah khan bul han tan ta che.

Ka thian duh tak,"a tana ka phak ang tawk tawka, dik taka ka tih vangin Lalpan hetiang taka, ka kawng a ti eng a nih chuan, i tan pawh a ti ve duh ngei ang, a chanchu kan Pathian hian "Mi dik tan chuan thimah chuan eng a lo chhuah tir thin" vangin.

(Tawngtai Dan Tur)
Lalpa, mi dik tan chuan thimah eng i chhuah tir thina, harsa pawh nisela dik taka ti tlat chungin, thil tha tizel thei turin min pui ang che, Amen. Ti ang aw.

Follow tih a hnuia inziakah khuan i click dawn nia.

A Kotute Chungah A Ngilneihna A Lantir Thin

"LALPA, nang chu i tha a, ngaihdam i peih a, A kotu apiang che chungah ngilneihna i ngah si thin a."(Sam 86:5)

Lalpa koh thintu i ni em?

Lalpa koh thintu i nih chuan, i zam emaw, i hlauh emaw a ngai lo, amah kohtute chunga ngilneihna lantir thin Pathian a ni sia.

Mahse, Lalpa i koh ngai lo a, i tawngtai pawhin i ti vel ve mai mai a nih chuan, i buai ve deuh mai thei. Zing thawha tawngtai puat, zan mut dawna tawngtai puat mite nun hi Lalpan a khawih em em thin pawhin a hriat loh a. 

Chutih lai chuan, theih tawpa amah au thintute a ngaihsak ngai lo tia sawi tur a awm ngai lo bawk. Pathian nena inkungkaihna tak tak nei tura bei thinte bawk hian, Pathian nen inkungkaihna an nei nge nge thina.

Pathian nena inkungkaihna neih tum lem lo, na na na te chuan Pathian nen inkungkaihna an nei tha ngai lem lo. Kan Pathian hi amah ngaihsaktute vek, ngaihsak let thintu Pathian a ni ti ila kan sawi sual awm lo e.

Pathian nena kan in pawhna a thuk emaw, a pawnlawi emaw a nih chuan, keimah ni vek hian Pathian nena kan in pawh dan chin chu kan hre chiang ber thin a. Pathian kan hnaih a nih chuan a ngilneihna leh thatna dawng tur khawpin hnaih zual zel ang u, Pathian kan hlat a nih chuan i hnaih ang u.

Hawh u, kan Pathian ngilneihna tha bik tak chu, chang thei tur hial khawpin, kan Pathian hi nasa takin au ila, tih tak zet zetin i au thin ang u.

(Tawngtai Dan Tur)
Lalpa, nangmah hnaihtute leh nangmah au thintute chunga, ngilneihna nasa tak lantir thintu i nih zia hi ka hriat renga, theih tawpa bang loa, ka auh thin theihna tur che in min pui ang che, Amen. Ti ang aw.

Follow tih a hnuaia inziakah khuan i click dawn nia.

Lalpaa Rinna Nghat Tlatin Kawppui Tur Zawng Ang Che

"Aw LALPA, Israel nghahfak, Nangmah kalsantu zawng zawng chu an mualpo vang; Kei mi hawisantute chu lei vaivuta ziak ang lek an ni ang, LALPA, nunna tuikhur chu, an kalsan ta si a."(Jeremia 17:13)

"Nimahsela, rinna lovin ama lawmzawng mi nih rual a ni lo; Pathian hnena lo kal chuanin, ani chu a awm tih leh zawngtute hnena lawmman pek hmang a ni tih rin tur a ni."(Hebrai 11:6)

Pathian ringtu, Isua Krista Lal leh chhandamtua pawmtu, inkhawm thin, thawhlawm thawh thin i ni a. Mahse, i nun enge mawni laiteah khan, Lalpa kalsanna bik i nei em? I nun eng emaw laiteah khan, Lalpaa i rinna i hman duh lohna lai bik i nei em? Chutianga, i nun engemaw bik lai taka Lalpa dahbo thinna bik i nei a nih chuan, lang nghal mai lo mahsela, i nun uai bet turin ala lang chhuak ang.

Davida nun kan en chuan, ral a beih dawn leh Saul'n a beihte khan Lalpa lam a en thin, a dam chhung khan eng sipai mahin an ngam ngai lo. Mahse, a nupui neih kawngah khan Lalpa a rawn tih hi bible-ah kan hmu lo a ni. Khatiang taka Lalpa nen a in hnaih kha chuan a rawn ve tho chu a rinawm, mahse a rawn tam lote pawh a ni ang, bible-ah kan hmu lo tlat a. Mikal'i Saula fanu kha, Philistia serh vun 100 chu a manah Saul'n a pawmsaka Mikal'i chu a nei taa. Saula nen an inhmelmak hnuah Saula chuan Mikali chu midang alo neih tira, a hnuah Mikali pasal mithmuh hma ngeiah, a ui chung chung chu Davida'n ka nupui a ni tiin a chhiahhlawhte ava hruai tira. Chu bakah, Nabala nupui Abigali chu a pasal a thih hnuin, a nupui ni turin a chhiahhlawhte a hruai tir leh a ni.

Hun a kal zela, Davida pawh lal ropui tak a ni taa, nupui a neih kawngah hian Lalpa lam a hawi tawk loh avangin, hemi kawngah hian a nun chu alo thlahdah taa, Uria nupui Bethsebii chu alo uire ta a, a uire khuh nan hian a pasal pawh a thih ngei theihna turin ral hma tawngah a daha Uria pawh a thi taa. He a thil tih avang hian, Davida chhungkua chu khandaihin a chhuahsan ta lo a ni. Chutiang a nih lai chuan, a thihsual vangin, Lalpa hnenah nasa takin a in tihnuaia, Lalpa a hnaiah, Bethsebii chuan lal ropui tak Solomona a hrin sak thung a ni.

Kan sawi tum tak chu, eng anga Lalpa hnaihtu leh a rawngbawltu pawh ni mah ila, kan nun eng emaw bik laia Lalpa hlatsanna emaw, Lalpa rawn ngai lohna thin leh Lalpaa kan rinna kan hman duh lohna bik kan nei a nih chuan, a lang ngei ngei dawn a, chu chuan nasa takin min la tichhe thei a ni. Kan Pathian hi amaha rinna kan nghahna nun atanga lawm thin a nih rual hian, amaha rinna kan nghah thuk ngam dan ang zela thawk thin a ni bawka. Hei vang hian, kan nun engkim hi Lalpa pe ila, kawppui kan zawnnaah ngat phei chuan nasa takin Lalpa rawn ila, i thlen bang lo ang u.

Mi thenkhat chuan, kan kawppui (nupui leh pasal) te hian, kan nu leh pa leh kan unaute ai mah hian kan nunah nghawng an nei nasa thei thin an tia, dik pawh a dik viau ang. A chanchu, kan nun leh kan fate leh kan in leh kan pindan (room) min tawmpuitute an ni a. Tin, mihring nuna hlu ber tia an sawi hial thin pakhat chu, fate an nia. Kan kawppuite hi, kan hmangaih ber kan fate nu emaw, pa emaw an ni thin, kan kawppuite hi kan fate nuna nghawng nei nasa ber turte an ni bawk a ni.

Pathian hian, kan nuna amah kan hnaihna chhan atana kan hman nasat apiangah hian, amah pawh a inpuang thina, Davida Bethsebii a uire vanga inchhira Lalpa a hnaiha Lalpan fapa duhawm tak Solomona a chetsualna nu  Bethsebii ngei nen a pek ang chiah hian, kan nuna Lalpa kan hnaihna hmun bik, kan eizawnna pawh a ni thei, kan hriselna pawh a ni thei, Lalpan a malsawm thin a ni.

Kan nuna amah kan hnaihna hmun apiang Lalpan a malsawm duh thin avangin, kawppui kan zawnna leh kan neihna kawngah hian Lalpa malsawmna kan chan theihna turin, Lalpa hnenah kan kawppui tur chungchang hi bang loin i hlan thin ang u.

(Tawngtai Dan Tur)
Lalpa, ka nun zawng zawng hi, luah khat vek la, ka nun peng tin hi i lakah thupin awm lo sela, ka nun peng tinah hian thawk fai vek la, kawppui ka zawnna nun bik pawh hi i lakah lang sela, kawppui ka zawnna a i duh loh zawng ka tih tawhnaah min ngaidam la, i duh ang chauhin kawppui ka zawna ka neih theihna turin leh nangmah rinchhan chunga kawppui ka zawn theih nan, min pui ang che, Amen. Ti ang aw.

Follow tih a hnuaia inziakah khuan i click dawn nia.

Thutlukna Dik Siam La, A Takin Thawk Bawk Ta Che

"Chutiang bawkin Rahabi nawhchizuar pawh khan tirhkohte kha a lo lawm a, kawng danga a hawntir lai khan thiltih avangin thiam a chang a ni lawm ni?"(Jakoba 2:25)

I thinlung i thlak em?

I thinlung Lalpa lama i thlak a nih chuan, a takin chet chhuah pui ta la! Chu chuan i nun a tha zawngin a siam thei dawn a ni.

Rahabi nawhchizuar kha, nawhchizuar a ni, nang leh kei a dinhmun hi a dinhmun khan a pha loa, nang leh kei hi nawhchizuar lo hian eizawnna kan neia, chhungkua leh thiantha rintur kan nei bawka. Mahse, kan thinlung hi a tha zawngin kan thlak ve em? A tha zawngin kan thinlung kan thlaka a takin kan chet chhuah pui ve em? Rahabi nawhchizuar kha chuan a tha zawngin a thinlung a thlaka a takin a ti bawka, chu chu amah leh a chhungkua ten an dinchhuah pui ta a nih kha.

Hmanlai nawhchizuar ho kha, an sual vang a ni hran loa, an dinhmun chhe tawh lutuk kal ngaihna hret tawh loh vang tein nawhchi chu an zuar thin a ni ti ila kan sawi sual awm lo e. An hun lai khan, khawvel hi mipa kutah a awm em em a, chhungkuaa mipa an chak tawk loh chuan, chu chhungkaw dinhmun chu a chhe lo thei lo a. Rahabi nawhchizuar hian chhungte a neia, mahse an chhungkuaa mipa te kha an sual vang kher pawh ni lo ang, an nep hlea an chak tawk lo a nih pawh a rinawm, an chhungkua chu engdin hmunah pawh ding sela, eng vang pawhin dinhmun chu chhia sela. An chhungkaw zing ami, hmeichhia lehnghal, hmeichhiaah pawh nawhchizuar lehnghal chuan, thutlukna dik a siama, a takin a ti taa, an chhungkua an him phah taa, chu mai pawh chu ni loin ram tiamah chuan chan tur an nei ve ta a ni.

Rahabi nawhchizuar khan, thutlukna dik a siam avangin leh a taka thil tha chu a tih avangin, Israel ten Kanaan ram ropui takte, Philistia ram chak takte an hneh apiang khan, Israel hnam zinga telve an nih avangin, Rahabi nawhchizuar chhungkuate khan, "kan hneh ta" tih ve theihna dikna an nei a ni.

I chhungte chu, engtin pawhin awm sela, nangmah khan thutlukna dik chu han siam ta che.

Nangmah khan, thutlukna dik i siam chu a takin han tihlawhtling ta che.

Rahabi'i ang chiah hian, in chhungkua dinchhuah theihna kawng chu i ni ve thei asin. Rahabi'i ang chiah hian, i chhungkuate kha van Lal fate zingah i tel tir ve thei asin, Rahabi'i ang chiah hian i chhungkuate kha ram tiam lama hruai luhna kawng hawnsaktu i ni ve thei asin. A chhanchu, Lalpan amah avanga miin an thinlung an thlaka, amah avanga a taka an tih hian, kalsan a duh ngai loa, nasa takin thawhsak a duh zawk thin a ni.

(Tawngtai Dan Tur)
Lalpa, i duh angin, thutlukna dik siamtu ka nih theihna turin leh, thutlukna siam chauhchu duh tawk loa, chu thutlukna atanga thiltha ka hriat chhuah ngei chu, a taka tih nachang ka hriata, a taka ka tih ngei theihna turin min pui turin ka ngen a che, Amen. Ti ang aw!

Follow tih a hnuaia inziakah khuan i click dawn nia.

Chhel Takin Bei La, Pathianin I Tana A Ruat Lawksak Che Chu Nei Rawh Le

"Pathian duhzawng in tih hnuin thiltiam chu in hmuh theih nan chhelna in ngai asin."(Hebrai 10:36)

Pathian duh zawng hi vawi hnih khat, a tih mai theih a, tih reng erawh a har thin.

Pathian duh zawng a nih avanga, zaidamte, dikna nen a engkim tihte, ruihhlo ngheite, ler lohte etc. Hun rei lote chhung, a ni hnih khat emaw, thla hnih khat thleng pawh a tih ve theih mai, mahse thil tha lo sim hlen emaw, thil tha tih hlen emaw hi har tak a ni.

A har vang tak hian, mi nazawngin an thei loa, chhel taka bei tang tang ten nun duhawm bik an neih thin ni. Ni e, Pathian vanga thil tha ti fat fattu, nain hreawmin, lungchhiat thlak hial mahsela chhel taka bei zeltute chuan nun duhawm leh nun hlawhtling an nei thina. Mi pangngaite hian, saw mihlawhtling saw, tiin kan kawk leh nge nge thin a nih hi!

Lalpa en tlatna chuan, chhelna nasa tak min pe theia. Hei vang hian, keini pawhin Lalpa en tlat chungin engkim i ti ang u. Tichuan, miten "saw mihlawhtling saw" tiin min la kawk ve dawn a nia.

(Tawngtai Dan Tur)
Lalpa, mihring nun i buatsaih lai khan, thilchhia zawng zawngte hi ka chan tur atan i rel tel loa. Thiltha hlir chu ka chan atan i ruat zawk a ni, sualin min beih thin avang hian kan ta tur nun thatna zawng zawng hi kan nei pha lo thina. Mahse, chung thiltha ka tana i buatsaih lawka chu ka chan tur a ni tih hi hre reng chungin, nangmah en tlat chunga chhel taka bei tang tang turin min pui ang che, Amen. Ti ang aw.

Follow tih a hnuaia inziakah khuan i click dawn nia.

Ala Tlai Lo (Pathianin A Saim Chhan Che Tihlawhtling Turin Ala Tlai Lo)

"Tin, Samsona chuan LALPA a au va, "Aw LALPA pathian, khawngaih takin mi han hre reng langin, khawngaih takin tun tumah chauh hian mi han tichak la, aw Pathian, ka mit khinghnih phuba hi Philistia-hote chungah hian ka han la thuai teh ang," a ti a."(Roreltute 16:28)  

Tlangval leh Nula senior i ni tawh emaw, putar leh pitar kum 70 mi i nih tawh pawhin ila tlai lo. I la tlai loh zia a lanna chu, ila dam kha a ni.

Nimin piaha chhuak http://nungturin.blogspot.com/2019/03/enge-i-dam-chhan-khawvelah-hian-eng-ti.html leh nimin a chhuak http://nungturin.blogspot.com/2019/03/enge-i-dam-chhan-khawvelah-hian-eng-ti_12.html ah khan Pathianin min siam chhan (purpose) kan sawi tawh a, ila chhiar lo a nih chuan ilo chhiar dawn nia. 

Samsona dam chhan chu, Pathian neitu a nih avangin Pathian rawngbawl a nia, a rawngbawlna tur chu hmelmate laka Israel fate humhim turin a ni. Chu chu a tih theihna turin Pathianin chakna a pe a, mihring pangngai aiin chakna a nei nasa zawk a ni. Chu a chakna chu, thuawina nen a hman theihna turin, thu pek hnuaiah a hung saka, a sam a tan tur a nilo a ni.

Samsona chuan thu a awi ta loa, a chakna a hlauh taa, a mitmu kher chhuahsak a nia, dinhmun chhe berah a ding ta a ni. Hun rei tak chakna a nei tawh loa, a samte chu a rawn sei leha mahse Lalpa chinchhiahna kai sam a ni ta lo.

Chutiang tak chuan a dinhmun chu chhe tawh mahsela, Lalpa lam a ena, a thinlung a siamthaa.  A thinlung zawng zawngin Lalpa a au taa, Lalpa chuan a fa hmangaih ban ngai loh Samsona chu a thlir reng a, a beng pawh Samsona ke pen thawm pawh ni mai lo, a tawng thawm pawh ni mai lo, a thinlung inthlak thawm hre thei tur khawpin Samsona tan a chhi reng a nih a rinawm. A thinlung a inthlak tih a hriata, amah a auh khan, a chakna kha a pe leh a, a siam chhan tihlawhtling turin a chenchilh leh ta a ni.

Hetiang, ang chiah hian kan ke pen thawm leh kan au aw pawh ni mai lo, kan thinlung inthlak thawm hian, Lalpa beng verh thei tur khawpin Lalpa hian kan tan hian a beng a chhia, chutiang tak chuan min hnaih reng a ni.

Tlai tawh emaw i ti elo! Samsona tan ala tlai lo ang chiah khan, i 
tan pawh ala tlai lo, mahse Samsona anga i thinlung i thlaka, Lalpa i auh ve thung a ngai a ni. Chutianga Lalpa lam hawia i thinlung i thlaka, Lalpa i auh chuan a siam chhan che tihlawhtlin sak tur chein, a chenchilh che a nga nangmahah nasa takin a thawk dawn a ni.

Lalpa siam chhan che chu a rawngbawl turin a ni a, chu chu i awmna apiangah i tih tur a nia. I chhungkaw siam that nan ala tlai loa, kawppui zawn nan ala tlai loa, hna zawn nan ala tlai lo bawk, i awmna hmun leh i hun tawn apianga Lalpa hmel ti lang  thintu tur i ni. Chungte chu ti turin ila tlai lo, Lalpa au mai ta che.

(Tawngtai Dan Tur)
Lalpa, min siam chhan tihlawhtling tur hian ala tlai lo a ni tih hriain, thinlung thlaka i khawngaihna dil turin au nachang che ka hriat theihna turin keimahah thawk ang che, Amen. Ti ang aw.

Follow tih a hnuaia inziakah khuan i click dawn nia.