Khawlum Rilru Buai (Engkimah Pathian Thu Hi Rawn A Pawimawh A Ni)

"Thla khatna, ni sâwm leh ni li ni tlai lam chu LALPA Kalhlen Kût a ni."(Leviticus 23:5)

"Pian hun a awm a, thih hun a awm: Phun hun a awm a, thil phun phawi hun a awm."(Thuhriltu 3:2)

Nimin lam chhuakah khan, khawlum lai hian mihring ngaihtuahna hi a fim tawk loa. Hei vang hian thutlukna liantham siam loh a tha tihte kan tar lang tawha.

U.S a, hriselna endiktu department "National Center for Health Statistics" chuan, America a mahni leh mahni intihhlum tam ber lai chu, khawlum lai a ni tih an hmu chhuak a. Mithiam thenkhat chuan khawlum lai hian kan marphu pawh hi a let thawkin a rang thin tiin an sawi nghe nghe a ni.

Tunlai hian khua a lum avangin, kan inenkawl uluk hle a pawimawh anga, tin ruihhlo ngaite leh damlo chaklo zawkte kan ngaihtuah a pawimawh bawk a nga. Chumai bakah rilru lama harsatna nei kan hria a nih phei chuan, ngeihven that an pawimawh hle a ni.

Bible lamah lut ta ila, Israelte Aigupta atanga Lalpan a hruai chhuah hun kha, an thla chhiar dan a thla khatna a nia, chu chu tunlaia kan April nen a inrual vel mithiamte chuan an ringa. Israel rama thlasik hun chu October atanga March thla lai hawl vel a nia. 

Aigupta ram kha April vela an chhuahsan a nih chuan, khawlum lutuk lo leh vawt lutuk si lo, ruah a sur hma si a ni dawn tihna a nia. Chutiang a nih chuan, boruak nuam tak hnuaiah, an rilru leh taksa pawh a hrisela achak that lai takin Israel mipuite khan an zin kawng an zawh tihna a ni. Hei hian kan bible lo ngaihtuah thuk zia leh bible hi Pathian thawkkhum a nih zia a tilang hial awm e.

Kan bible hi kan nun enfiah nan leh, thutlukna kan siam dawnahte kan rawn fo a pawimawh a. Kan nuna hun kan tehna hmanruaah pawh kan hman thin a tul hial bawk ang.

Chutiang taka bible kan hmang dawn a nih chuan, nitin chik taka kan chhiar thin a ngai dawn a ni.

(Tawngtai Dan Tur)
Lalpa, bible hi i thu a ni tih ka hriat renga, bible thu ka hriat chuan i thu ka hriat a ni tih hi ka pawm thiam theihna tur leh, bible thu hi ka nun engkim teh nan leh enfiah nan ka hman chuan, i thuin ka nun ka enfiaha ka teh thin a ni tih hi ka hriat thiam a, bible chhiar leh zir chhian hi ka ngaih pawmawh tlat theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Lalpa Kutah Engkim A Awm Avangin Chawl Rawh

"Ka hunte chu i kutah a awm a: Mi dotute kut ata leh, mi tiduhdahtute lakah hian mi chhanhim ang che."(Sam 31:15)

Kumin hi Mizoramah ruah a sur tlema, khua a lum zual a. khaw lum lai hian, lungphu a rang a, a chang phei chuan kan taksain lum a dawn nasat lutuk chuan kan marphu hi a let li laiin a pung thei thin.

Hei vang hian kan taksa a chau a, a bik takin tun ang khaw lumah hian thutlukna lian tham siam loh a tha, a bik takin midang nen kan inkarah thu tlukna siam zung zung loh a tha awm e.

Pathian kutah engkim nghat hmak ila, engkim Pathian kuta nghah hi, eng hunah pawh a fuh ber zel bawk a.

Kan thil duhte, kan hmasawnna tur atana kan duhte hi, kan nei mai lo a nih pawhin, Lalpa i kutah ka awm alawm ti ila, chawlh hmak i zir ang u.

Lalpan hun ruat a sual dawn si loa.

(Tawngtau Dan Tur)
Lalpa, ka nun zawng zawng hi engtik lai pawhin i kutah zawk a awm a ni, tih hi ka hriat renga, i kuta enkim nghat thiam thei turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Hei Hi Damna Kalkawng Chu!

"Tin, naupang kut chu a chelh a, a hnenah chuan, "Talitha Kumi!" a ti a, (chu chu "Chemte, tho rawh, ka ti a che," tihna a ni.) Tin, hmeichhe naupang chu a lo tho va, a kal thei ta nghal a; amah chu kum sawm leh kum hnih mi a ni tawh reng a. Tin, anni chuan mak tih namenin mak an ti lo va."(Marka 5:41-42)

Isuan Jaira fanu a tihdamna kawng kha ava thui tak em?

Kha Jairaa kha, a tawrh a chhel a ni.

A fanu a thi tawh dawna, mahse a beisei innghahna Lalpa chu a buai si. Theih tawp chhuaha, Isua kebul ava thlen pawhin, rawngbawlna tam takin, Isua chu a tibuai zel nen. Mahse, vanneih thlak takin a fanu tidam tur chuan, Lalpa chu a in lam pan zai a rel ta a.

Jaira chu a phur ngawt ang, tih a hriat mai awm e. Keini pawh kan han bei fat fata, danglamna tlem kan hmuh hian kan phur em em thin anih hi tiro. Chutih lai chuan, bul kan tan chauh alo ni si thin.

An in lam a pan lai chuan, Lalpa chu hmeichhe kum sawmphanih lai thiput reh theih loin alo dek a, hmeichhia chu a dam ta. Chutih lai chuan, Jaira kha a hman hmawh tawh hle a rinawm a, a rilruah "kan ina a kal hnuah dam ve mai sela aw" a ti maithei a ni. Mahse, kha hmeichhe thiput damna kha, Lalpan a fanu pawh a tidam ngei dawn a ni, tih finna tha tak a ni. Tin, chu tidamtua ngei chuan an in a pan zel bawka.

Keini pawh hi kan chhungkua kan dam thei a ni ti fiahna tha ber chu, midang leh chhungkaw dang lo dam tawhte hi an nia. Chu tidamtu Krista chuan kan chhungkua pawh min pan ve mek zel a ni.

Isua chuan, Jaira in a hnaih tawlh tawlha, Jaira tan beitu an tam tawlh tawlh bawka, "I fanu a thi ta, engah nge zirtirtu hi ila tihhah cheu dawn?" tih thawmte chu a hre taa. Chutiang taka beihna chu Jaira rinna chuan tawng mahse, rin tlat ala thlanga. A rin tlat avang chuan leh tidamtu chu an ina kal tura a sawm tlat avang chuan, Lalpa zawk chu a tawng chhuak taa Jaira hnenah"Hlau suh ring mai rawh" a ti a ni.

Chutah pawh chuan, beihna ala tawp chuang lo, mahse chu inbeihna chu Lalpan Jaira kha a beih sak ta zawka. Isua khan amah zui tur pawhin, Petera, Jakoba leh Johana chauh a duh taa, ina lo awm rinnaa kalte lo nuihsantute pawh Lalpan a chhuah tir veka, tichuan Jaira fanu chu a tidam ta a ni.

Hetiang ang chiah hian, kan damna tur kan hnaih zawh pauh aleh beihna a na thin, mahse chung huna Lalpa rin tlat kan thlan zel chuan, amah zawkin kan indona chu min beihsak thin a. Kan damna hmun kan hnaih tak zet tawh phei chuan, kan bula awmte leh kan thu ngaihthlak leh hriatte thlenga kan fimkhur a tul thina. Amah rin lohna thawm reng reng kan hriat hi Lalpan a duh lo a ni. 

Midang dah chhuahin amah ringtute, Jairate nupa leh zirtir pathumte chauh chu, tihdamna hmuna awm ve turin a duh ang hian, min tihdamna hmun turah chuan, amah Lalpa min rinpui vetute ni lo, midang zawng zawng chu kan dah chhuah a, rinnaa kan thawhpuite nen a kan thawhho a tul thin a ni.

Jaira anga, kan ring takzet a nih chuan, ngahnge kan chhungkua a dam loh ang, ngahnge kan hna duh tak kan neih loh bik ang, ngahnge kawppui tur kan hmuh loh bik ang le. A titheitu chu nang leh kei kan ni loa, Lalpa a ni tih hi hre tlat ang u.

(Tawngtai Dan Tur)
Lalpa, Jaira anga buaina leh beihna zawng zawng kara nangmah chauh ka rin tlat theihna tur che in min pui la, chu chu min tihdamna kal kawng a ni tih hi hre renga, ngai pawimawh fo turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

I Chauh Lai Ngei Khan, Lalpan A Tinghet Zawk Thin Che Asin

"Aw Pathian, nang chuan ruah tam tak i surtir a, I rochan chu, a chauh lai khan, i tinghet a."(Sam 68:9)

Kan Pathian hian, a rochana a thlante hi min hrechiang em em a. Kan tluk hma pawh hian tlu thei kan ni tihte, harsatna kan tawh hma pawh hian harsatna tawk thei kan ni tihte, kan ngaihtuah phak tawk zawng zawng nen hian min hre vek a ni. Sam 139:2b ah phei chuan "Ka ngaihtuahna hi hla tak atang pawhin i hre thiam thin" a lo in ti hial a ni.

Israelte kha a rochanah a thlanga, an tluk san hma khan tlu thei an ni tih a hriaa, chuvang chuan an tluk pawha, alama an kir theihna turin, thil tam tak alo rel lawk saka. Tichuan, a lama an kir lawk loh phei chuan salahte a man tir hiala, harsatna a tawh tir thin.

Harsatna kan tawh hian, kan sual vang kher a ni lo a nga, mahse Lalpa kan hmuhfiah zualna tur a ni fo thin. Kan Pathian hian harsatna kan tawh a phalna phenah hian, kan zir tur leh malsawmna a dah thin.

Chuvang tak chuan Sam ziaktu pawh hian, i rochan chu a chauh lai khan, i tinghet thin alo ti a ni. Malsawmna a dawn laiin a ti lo, tlang sang taka a din laiin a ti lo, a chauh laiin a ti zawk a ni. 

Harsatna rei lote kan tawh hian kan chau ngai loa, harsatna hun eng emaw tichen kan tawh chauhin kan chau thin, chutianga kan chauh lai ngei chuan kan Pathian hian min lo tinghet zawk thin a ni. Chutiang chu a nih thin avangin, a remruatnaa innghat ringtu tan chuan vuina tur a awm loa, harsatna pawh malsawmna tam ber dawnna kal kawng alo ni zawk thin si a.

I dam lo em? A ti nghet mek che.

Sumah harsatna i tawk em? Lalpan a tinghet mek che.

Hnawlin i awm em? Lalpan a tinghet mek che.

Zam suh ang che, Lalpa en tlat zawk mai rawh le.

(Tawngtai Dan Tur)
Lalpa, ka chauh lai ngei leh harsatna ka tawh lai ngei hian, nang chuan min lo tihngheh thin avangin, chauhnaah pawh lawm tur ka ni. Nangmahah hian lawm zel theih turin leh min zirtir i tumte zir thiam zel thei turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Pathian Hnena Midang Kan Hruai Theihna Tur Hian Tlawm Ngam Ava Tul Tak Em

"Tuma bawih ni mah suh ila, mi tam lehzual ka lak luh theihna turin mi zawng zawng bawihah ka insiam ta. Tichuan, Judate ka lak luh theihna turin Judate hnenah Juda mi angin ka awm thin; Dan hnuaia awmte ka lak luh theihna turin Dan hnuaia awmte hnenah Dan hnuaia awm angin ka awm thin, Dan hnuaia awm si lovin."(I Korinth 9:19-20)

Paula chuan, Pathian hnena mi tam thei ang ber a hruai theihna turin, a hruai turate (midang) milin a insiam rem thin a ni. Midang mila a insiam rem chuan, midang thu ang zawkin a awm tihna a ni, a hun laia ram ropui ber Rom khua leh tui nihna nei hial thei, mi ropui a nia. Chutiang mi pawh chu nimahsela, Pathian hnena midang a hruai theihnan, amah aia mawl leh amah aia nep zawkte mil turin a insiam rem thei a ni. 

Keini rawngbawltu intite hian Paula tih ang hian, kan ti ve thei renga, mahse kan ti duh lo a ni. Kan zir sanna silh fente, kan chanvo sang silh fente, kan nihna sang silh fente hi kan hlip phal lo a nih chuan, Pathian hnenah midang hruai hi beisei lo law law zawk ila kan tisual lo ang.

Rawngbawltu thenkhat chu, keimahni leh keimahni kan inhmuhniam avangin, kan inveng thina. Midangin min ngainep ang tih hlau reng rengin kan buai thin a. Midang lakah that chhuah ai chuan, midangin engtin nge min ensan ve ang, ti reng rengin kan buai thin a, hei hi sual min bumna a ni tih hi kan hriat ava pawimawh tak em.

Tlawmna silhfen nen lo chuan thlaraubo a chhanchhuah theih loh avang alawm.

Paula aia a let chhiar sen loh tam taka ropui, kan Lalpa Isua Krista ngei pawh kha, Rom ni mai lo van atang, van khau leh tui ni mai lo, van Lal thutthleng atang, min chhandam turin tlawm taka a rawn kal ni. A hnung zuitute hi, kan thutna leh kan nihna atang hian kan chhuk thlak hi a ngai ve a ni.

Tichuan, lungngaite hnenah lungngai angin, ruihhlo ngaite hnenah an kawm phak tawkin, harsate hnenah harsa angin, lehkha thiamte hnenah lehkha thiam angin, lehkha thiam lote hnenah lehkha thiam lo angin, hausate hnenah hausa angin, fingte hnenah fing angin, mawlte hnenah mawl angin, mipat hmeichhiatnaa harsatna tawkte hnenah an kawm theih tura inphah hnuaiin, kan awm thei ang.

Chu nun ngeiah chuan, kan pastor emaw, kan leader emaw, kan upa emaw, kan chief minister emaw, kan hnathawhnaa kan pu emaw te aia a let tam taka ropui kan Pathian a lawm tawh ang. Amah ti lawmtute chawi sang thin Pathian a ni tih hi i theih nghilh lo bawk ang u.

(Tawngtai Dan Tur)
Lalpa, midangte i lama ka hruai theih nan, an ke vuan chunga tawngtai thei tur khawpa inngaihthlawm turin leh, i lama ka hruai theihna tura chakna leh finna min pe turin thinlung leh tihtak zetin ka ngen a che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

I Tawngtaina Lalpan A Chhang Duh A, I Dil Bak Pawh A Pe Duh Che, Amah I Dah Hmasak Thung A Ngai A Ni

"Hei hi ama chunga kan huaina chu a ni, engpawh a duhzawng anga kan dil chuan anin min ngaihthlaksak thin hi."(I Johana 5:14)

Pathian hian tawngtaina zawng zawng hi a hre veka, thawm ri chhuak hrim hrim leh ngaihtuahna thuk ber thleng pawh a hre vek a ni.

Ka tawngtaina hi Lalpan a hriat chuan, tinge a chhan loh tiin mahni leh mahni kan inzawt fo thin tiro.

Pathian hian, thil tamtak min pek a duh, mahse min malsawm leh kan duhna min tihhlawhtlin sak aia ngaih pawimawh a nei a, chu chu "amah kan dah hmasak ber hi a ni."

"Pathian dah hmasa ber lo ila chuan hman lo chung chungin ka inkhawm dawn mi? Pawisa nei lo chung chungin thawhlawm ka thawh dawn mi? Kan ti maithei a, tin zing kan tawh ve leh a, kan tih hmasak ber pawh, tawngtai leh bible chhiar a ni maithei, chu chu Pathian kan dah hmasa ber tihna a ni chuang lo a ni.

Pathian kan dah hmasak ber chuan "zing kan thawh ve leh Pathian kan ngaihtuah hmasa ber ang, kan mut dawnah pawh Pathian ngaihtuahin kan muhil ang." He nun kan neih hi kan Pathian hian a duh a ni, a chhanchu chutiang taka amah kan dah hmasa anih chuan, sualah tlumah ila kan tho leh thei a nga, chu nun ngei mai chu a malsawmna dawng zo nun chu alo ni thin a ni. 

Kan Pathian hian, amah kan dah hmasak ber a duh chhanchu nang leh kei hi mal min sawma, midang hnenah pawh a that zia lan tir hi a ni. Hei hi, Deuteronomy-ah khan a chiang awm e, Israelte khan a thu awi sela a ti em ema, tichuan nasa takin a malsawm thei a nga, khawvel hmuha mawi khawp hialin  malsawm a duh a. Tah chuan anni chu Pathian nung bia an nih zia khawvelin a hria a nga, tichuan khawvel hnam tinin Pathian taka chu an zawng dawn a ni.

Pathian kan dah hmasak bera, malsawmna kan dawn apiangin a hmel midangte hmuha kan tih mawi dawn phawt chuan, kan tawngtaina hi a hun takah min chhansak em em ang. Tin, aman hun a tih hun, lungawi tak leh enghelh miah loa kan nghah theihna hi, amah kan dah hmasak zia lan chhuahna pakhat leh kan tawngtaina min chhansak dawn zia tilangtu a ni.

(Tawngtai Dan Tur)
Lalpa, ka nunna ai pawh hian nangmah ka dahhmasak loh che chuan, nun nei tlak pawh ka ni dawn em ni? Mahse chutiang chuan ti thin mah ila, sualin min beia ka phatsan leh mai thin che a, ka chak lo a ni, keimah mai chuan nangmah dah hmasak dan tur che pawh hi ka hre lo a, khawngaihin ka nun zawng zawnga nangmah ka dah hmasak theihna tur che in min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Lalpa I Beiseina Avangin, I Bengin Thawm A Hriat Miah Loh, Thawm Hre Khawpin Beisei Rawh Le

"Tichuan Elijan Ahaba hnênah, "Han cho ta langin, eiin han in tawh rawh; ruahpui sur tûr thâwm a awm a nia," a ti a."(I Lalte 18:41)  

Israel ramah chuan kum thum ngawt ruah a sur tawh loa. Chutih lai chuan, Pathianin zawlnei Elija hnenah chuan " va kal la, Ahaba hnenah va inlan rawh; tichuan lei chungah hian ruah ka rawn surtir dawn e,"(I Lalte 18:1) a tia. 

Chu mi hnu eng emaw chen chu ruah ala sur chuang loa, sur tur pawhin a lang lo. Mahse, Elija chuan Pathian aw a hriaa, ruah sur thawm chu sawi loh chhum chhete aih pawh a lan loh lai chuan lal Ahaba hnenah "ruahpui sur tur thawm a awm a nia" a ti.

Tichuan, Elija chu nasa takin a tawngtai a, a chhiahhlawh hnenah chuan tuifinriat lam han thlir rawh a tia, a chhiahhlawh chuan, engmah ka hmu lo a tia. Elija chuan, a chhiahhlawh chu vawisarih lai kala, en nawn turin a tira, vawisarih a ennawnnaah chuan a chhiahhlawh chuan, kuttum tiat lek chhum a hmua. Kut tum tiat lek chhum chuan engtham mah ruah a pai lo ang tih hi, Elija hian a hre ve reng ang, mahse a Pathian a rin em avangin, lal Ahaba hnenah chuan "chhuak tawh rawh, ruahin a dang dah ang che" a tia.

Pathian tan pawh hian, hetiang em ema amah ringtu tan hi chuan, chet loh chi pawh a ni lo ang. Chumi hnu hun rei loteah, chhun Lalpa a rawn che taa, van chu thli leh chhumin a rawn khah tir a, a duk khuih taa, ruahpui vanawn a lo sur ta a ni.

Nang leh kei pawh hi, kan dinhmun inthlak tura a lan miah loh lai ngei hian, Lalpa aw kan lo hriat tawh avang leh Lalpa kan beisei avangin, "ka dinhmun a tha zawnga inthlak thawm ka hria a nia" kan ti ve ngam em?

Chutianga kan tih hnuah pawh chuan, engmah lang lo mahsela "tawngtai bang duh hauh loin, vawisarih beisei nawn kan thlang ve tal duh a ngem?"

Vawisarih kan beisei nawn hnuah pawh "malsawmna chhum chhete chauh lo lang mahsela, malsawmna tam tak dawng turin, Lalpa kan rinna avangin inbuatsaih kan thlang ve a ngem?"

A taka, chhum lo chat loa, amah rin tlat thlangtute tan hian, amaka maka nasain Lalpa hi a che thin  ani.

Kan zinkawng hi a thui tawha, kan natna pawh a tam tawha, mahse Lalpa kan rinna hi bang lo ang u. A hnena kan duh kan thlenna "tawngtai" hi, bang chuang lo ang u. Amah kan beiseina tawngka kan chhahchhuahte leh amah kan beiseina avanga kan chetzia kan tih danglam thin pawh hi, amah beisei bang chetziain thlak lo ang u.

Tichuan, a hun takah Lal engkim titheia chuan, a chak zia kan tan a tilang ngei dawn a ni.

(Tawngtai Dan Tur)
Lalpa, beisei awm tur reng reng a lan loh lai pawha, nangmah beisei tlattute tan, nasa takin i thawk thin a ni, tih hi ka hriat renga, eng lai maha nangmah ka beiseina hi ka thlah ngai lohna turin min pui ang che, Amen. Ti ang aw. 

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Krista Hmangaihna Leithaah I Thang Ang U

"Tin, a then lei thaah a tla a, thenkhat a leh za te, thenkhat a leh sawmruk te, thenkhat a leh sawmthum tein a lo rah ta a."(Matthaia 13:8)

Mihringa nihnaa pawimawh ber chu, hmel a ni loa, hausakna a ni loa, hriselna a ni loa, "Thinlung" a ni.

Thlai chinnaa pawimawh ber chu, thlai chi pawimawh viau mahse a pawimawh ber a ni loa, a enkawltu a pawh a ni lo, "a tona lei" a ni. A chhanchu, rose par mawi ber chi, to tha leh si lo ai chuan, antam hring duah tha tak a hlu zawk a ni. Teak thing lei chhiaa to, kawi ngilngel ai chuan, Thingdawl lei thaa to, ngil leh hraw tha tak chu a tha daih zawk a ni.

Eng thlai pawh hi, a to that phawt chuan a tangkai ang chiah hian, mihring hi eng ang hmel pawh pu ila, khawi khawchhuak pawh ni ila, hang emaw ngo emaw pawh ni ila, kan rethei emaw kan hausa emaw, kan thinlung a that phawt chuan mi tha leh mi tangkai leh mi rintlak kan lo ni thin.

Chutih rual chuan, eng ang pawhin hmeltha ila, hausa ila, lehkha thiam ila, lal thlah pawh ni mah ila, kan thinlung a that loh chuan mi rintlak loh leh tangkai lo kan ni thin a ni.

Mi rintlak loh, tangkaina nei hauh lo leh ngainat awmna nei lo chu, tu man kan bul hnaia awmah kan duh lo ang. Mahse, chu an bulah pawh kan awm peih miah tur mizia chu keimahni zawk hian kan lo pu thin a.

Thlai hi, thlai tha a nih theihna  atan lei tha a pawimawh ang hian, kan thinlung hi, thinlung tha a nih theihnan to chhuahna hmun tha a mamawh a. Krista lei thaah kan thinlung hi a to a ngai a ni, khawi laiah nge Krista lei tha chu a awm, kan tih chuan:-

1) A thu, bible thuahte,

2) Amah tawngtaia biaknaahte

3) A kohhranhoahte,

4) A hnathawhnaahte,

Heng point paliah hian kan toa kan thang a nih chuan, thinlung dik neitu, mi tangkai, mi ngainat leh mi thlakhleh kan lo ni dawn a ni.

(Tawngtai Dan Tur)

Lalpa, i hmangaihna leithaah chuan, ka thinlung hi than dan zirtir ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Kan Hriat Loh Palh Avangin, Kawppui Kan Zawnnaa Kan Mamawh Ber Krista Hi Kan Lo Hnawl Palh Thin

"Chutichuan,nangni a awihte tan chuan hlu tak a ni,a awih lote tan erawh chuan, “In satuten lung an duh loh kha, Chu ngei chu a kila lung tangkai ber a lo ni ta."(I Petera 2:7)

Mipa hian hmeichhia an hmuh chiah hian an tehna hmasa ber chu na lan dan a ni thin a, a dawtah an zia, a dawtah kawm a nuam em tihte leh kan in pawh leh pawh lohte a ni duh thin.

Hmeichhiain mipa an hmuh chiah hian mipate ang thoin an tehna hmasa ber chu a lan dan a ni thin a, mahse hmeichhia chuan hmel landan bakah hlutna an entel tlangpui, a dawtah an in pawh leh pawh loh a ni nghal thunga, chu mipa chuan a ti hlim em tihte a ni duh thin. 

Mipa ai hmeichhiate hian, in pawhna an dah hmasak avang hian, an hmel duha chu pawh an tum thin a, chu vang chuan mipain hmeichhe hnenah eng nge i duh ang? Tia, a zawhna reng reng chu, hmeichhia chuan "i thu thu a ni mai emaw, i tih dan dan a ni mai" tiin a chhang thin.

Mipa ve thung chu, a hmeichhe tawn thar chuan a ngaihsaka, nalh taka a inthuam chuan a lawm tawk em em mai thin a ni.

Mahse, hun a kal rei a, an inkarah beisei (expectation) a sang chho zel a, mipa'in hmeichhia chuan aduhte sawi ve bawrh bawrh se a ti a, mahse hmeichhia chuan aduh a sawi ve bawrh bawrh chuan, mipa'in a hnial thina, hmeichhe thu zawm a ngaih phei chuan a duhdan a ni leh lo thung lawi sia. Tin, hmeichhia ve thung chuan, mipa'in a hriat thiam ve tawh a ring thina, mahse mipa chuan a hrethiam hleithei thin lo a, mipa'in a hriatthiam theihna turin "mipa pawm thiam theih turin, a duh zawng leh a duh dante chu a sawi thiam bawk lo thin" a ni.

Khawtlang leh midang hmaizah vang leh mal bik hlauh avangte hian, thinlung inhmu miah loin, a inneih ve chawt theih a. Chutianga inneite chu, an in then leh chawt bawk thin a ni.

Mihring thisen inzawm lo leh seilenna inang miah lo hi, kan in pawh mai mai a rinawm loh a, vaihote ang khuan hmeichhia'in mipate hi pathian biak deuh tawhin be ve sela chuan, engtin tin emaw in kungkaihna hrisel chu a awm mahna, mahse chutiang chu kan ni si loa. Hei vang hian, inthen loh pawhin "thinlung inthen," kan tam a nih hi.

Mihring hi kan inpawh dawn tak tak chuan, kan duhna kan paih thlak ngam ve ve a ngai thin. Tin nupaa kan insiam hnuaa kan tanrual theihna tur pawhin, kan duh loh deuh pawh nisela a tha tur a nih avangin, theih tawpa ka ngaihdan ni chiah lo pawh chu kan thlawp a tul thin. He nun, mahni inphat nun leh duh loh zawng pawh tha taka ti thei nun hi kan nei tak zet dawn a nih chuan "a kila lung pawimawh Krista hi kan mamawh ber chu a ni."

Isua puihna tel loin, rei lote chu a inphahhnuai theih, mahse inphahhnuaina nun pui tak tak dawn chuan Isua tel loin a theih loh a nih hi.

Tin, ngaizawng kan zawn tan tirh laia, Isua kan dah hmasa bera, tawngtaina nen kan kal a nih chuan, mit leh beng maia hriatna ni loin, "thinlunga hriatna" kan hmang thiam thin a. Tunge kan tana tha tur, tunge kan tana tha lo tur tih hi ka hrethiam thei thin a ni. Isua Krista atanga thinlung dik neitute chuan, thinlung dik neitu vek zawn nachang an hre thina, a rei tual tual a an lang mawi tulh tulh a, an awh awm tulh tulh bawk thin a ni.

Pathian duh anga nunnaah hian, kan duh dan paih thlak a ngaih fo avangin, mi tamtak chuan ngaihzawng kan zawnin emaw kan neihte hian, hnawk hi kan ti thei em em a, hnawk kan tih kan duh tawh loh, Isua hi nun tha kan neihna tura kan mamawh ber a ni sia. Isua kan hnawl hian, nun tha kan hnawl tel tihna a lo ni thin.

A hmaa kan sawi ang hian, inpawh lo chungin rei tak ngaihzawng nghet i nei emaw, rei tak in nupa indan tlatna neiin in lo awm tawh a nih pawhin ala tlai lo. Nangmah zawk kha Krista avangin, han tlawm phawt mai la, tih dan tur tawngtaiin zawng zel la, chutianga i beih tlata a tawp thleng i tan ngam chuan, i ngaihzawng emaw, i kawppui chu nangmah ai ai i lakah ala inngaitlawm zawk ang.

(Tawngtai Dan Tur)
Lalpa, i tel lo chuan engmah ka ni lo a ni tih hi ka hriat renga, i tel lohna inngaihzawnna leh inkungkaihnate hi tihchhiatin a awm thin a ni tih hi hre reng chungin, i Lalna leh i telna inngaihzawnna leh inkungkaihna ka neih theihna turin min pui ang che. Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.








Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

I Zin Kawng Thui Mahse, Lalpaah Chuan A Thui Thlawn Lo Ang

"Naupang ka lo ni tawh a, tunah tar ka lo ni ta a, Nimahsela mi fel chu kalsana a awm ka hmu ngai lo va, A thlahte chaw khawn pawh ka hmu ngai hek lo."(Sam 37:25)

Kan thian hnai vaite an hlawhtlinga, kan lawmpui beiseiin leh kan lawmpui ve ngei ringin:

1) Hna thar ka nei asin,

2) In thar ka sa asin,

3) Sumdawnna ka zauh asin,

4) Nupui/pasal ka nei dawn asin,

5) Fa kan nei asin,

tia, hriattirna kan dawng thin a ni tiro. Keini lah, Lalpa rawngbawlin thlantui leh mittui nen kan kal hram hram a, eng thar mah kan nei ve si lo, a nih hi tiro.

Mahse, lungngai lo ang u, Lalpan min dahna hmun leh nun leh min pianchhuah tirna chhungkua leh dinhmun hi keimah ni ai a hre chiang zawk a. Amah chu i ring mai ang u, "dinhmun hreawm bera kan awm lai pawhin, mal taka kan kal a phal ngai loa, min pui turin a hnai reng a, he thu ziak i chhiar chhan pawh hi a hnaih vang che a ni thei."

Israelte zin kawng kha ava bumboh mai mai tak em, a bumboh lutuka sualin sala an tan laite a ngaih tir hial a nih kha. Mahse, vui chung chung khan Mosia hruaina hnuaiah Lalpa kawng kha an zawh zela, Lalpan a thunun nawn awn awn bawka, Israel mite kha nghet lo mahsela an mahni hruaitu Lalpa zawk kha "a ngheh em avangin" tun thlengin Israel hnam an la awm a ni. Kha mi hun laia hnam chak zawk, Aiguptate, Moabte, Babulon hote kha an ral vek tawh laiin, hnam pakhat sal atanga chhuak ve mai Israel hnamte erawh kha chu kum singkhat hnuah pawh an la awm reng a. Tunlai khawvel thiamnaah pawh a hma hruaitu an la ni tlat zel a nih hi.

Kan Pathian thu chuan "mi fel chu kalsana a awm ka hmu ngai lo va, A thlahte chaw khawn pawh ka hmu ngai hek lo" alo tia. Eng ang mi pawh ni mah ila, chak lo chung leh tisual chung pawha, Krista chhandamna vuana Pathian kawnga kan kal tlatna hi mifel kan nihna chu a ni mai a nga. 

Min pawm duhtuin a khawngaihna avanga, mifela min pawm avang hian, Israelte angin kan thlahte thlenga awm reng tur leh a malsawmna dawngtua min duh avang hian alawm "midang kawng mama an kal mai laiin, Lalpan min zirtir duh avangin, kawng bumbohah min dah ni."

Hawh u, lawm takin Lalpa min dahna kawng bumboh hi i zawh ang u. A nin min theihnghilh ngai si loa.

(Tawngtai Dan Tur)
Lalpa, nun dan min zirtir duh avangin kawng bumboha min dah hi, ka lawm e. He kawng zawhtute hi mifelah i khawngaihna avangin i chhiar thina, an thlahte thlengin malsawmna i buatsaihsak thin a. He kawng bumboh a min dah avang hian lawm tur ka lo ni, lawm chunga he kawng hi zawh turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Thlemna Bei Let Hram Hramtute Tan Malsawmna A Buatsaih Thin

"Chu mi hnuah chuan diabola chuan a kalsan ta a. Tin, ngai teh, vantirhkohten a rawng an rawn bawlsak ta a."(Matthaia 4:11)

Thlemna hnehtu chu vantirhkohten a rawng an bawl sak thin a.

Isua, ang chuan kan indah ngam lo a nga, mahse kan Lalpa Isua ni lo rawngbawltu dangte pawh thlemna an hneh hnuah Pathian hnathawh an chungah a lang thin a ni. 

Pathian hna hi, a langa thawk thintute chu mihringte hi kan nia, a lang loa thawk thintute chu van mi, vantirhkohte an ni.

Paula leh Sila tanin hreawm bera an tan lai khan, Pathian laka vui duhna thinlung pawh an put ve a rinawm, chutiang an nih loh vek pawhin, rawngbawl ava har tak em tiin lungaihna sualin a beih ve a rinawma. Mahse, an vui loa, vui tura thlemna leh lungngai tura thlemna chu an hneha, Pathian an fak ta zawka, tichuan van lam hnathawh chu a rawn lang taa, an kawlbunte leh tan in khawngkharte chu a rawn inhawng ta a ni.

Thlemna kan hneh zawha, mal min sawm leh min thawhsak hi, Pathian rorel dan leh a duh zawng a nih avang hian, thlemna kan tawh apiang hian " Lalpa malsawmna dawnna remchang a awm leh ta" tiin thlemna hi thlir zawk thin ila chuan, thlemna hneh tura chakna leh Lalpaa lawmna nasa tak kan neih phah dawn a ni.

Thlemna phena malsawmna chu kan dawn theih nan, thlemna chu hneh i tum zel ang u.

Tin, thlemna kan tawh rual rual hian, tlan chhuahna pawh a awm a, chumai bakah Pathian atang puihna pawh a awm a ni. Chu puihna chu kan chan theihnan kan theih tawka tlemna kan lo do ve a tul a ni.

(Tawngtai Dan Tur)
Lalpa, thlemna tuar hram hrama hnehtute tan i vantirhkohte an rawng bawlsak turin i tir thina, chu mai bakah i malsawmna i buatsaihsaka chu i pe thin a ni tih hriain, theih tawpa thlemna hi i chakna rinchhana ka beih let zel theih nan min pui ang che, Amen, Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Misual Thlavang Hauhtu Isua

"Nang ka auh che nîah khan i lo hnai a, " hlau suh u," i ti a. Aw LALPA, ka thiamna thu mi sawisak a, ka nunna i tlan a."(Tah Hla 3:57-58)

"Lalpa misual ka ni" tia Isua hmaa i kun a nih chuan, a tan ang che. Inngaitlawm taka a hmaa kunte chu, thiam an chan theihna turin "an thiamna thu a sawisak thin a," an thiam thu sawi tur a awm loh pawhin, thiam an channa tur a zawn sak thin a ni. 

Danin misualte a tihhlumna tur lak ata, misualte chhanchhuak turin, a man zawng zawng a pe ngam a, a nuna hial a hlan rala, dan rorelna lakah misual himna a zawn sak mai ni loin, a dan pumpui chawpin a thiat a ni.

Kan awm ang ang hian, Isua hi pan mai ila chuan chhanchhuah ka ni mai tur.

Bible kan en chuan, amah pantu leh a hmaa kun misualte reng reng an thlavang hauh loh reng a nei lo. Zakaia thlavang a hauha, Uirenu phei kha chu a thlavang hauh tur pawhin thiamna a nei tawh si loa, kha nu khan chance ala hmuh nan, amah denhlum tumtute kha Isuan a bei let a nih kha.

Hriaka amah chulhtu hmeichhe nun thalo thlavang a hauha chanchintha an hrilhna apiangah he hmeichhe thiltih pawh hi amah hriat rengna turin an sawi ve zel ang (Mat 26:13) a ti nghe nghe a. Samari hmeichhe khawlo zet, mi zinga tui pawh chawi ngam tawh lo pawh kha a rawngbawltuah a hmanga, phatsantu leh tlanchhiatsantu Petera leh zirtir dangte kha an bo lohna turin a umzuia Pathian ramah an chanvo chu an chan theihna turin a zirtir zel a nih kha.

Keini misualte hi Pathian ramah chanvo min pe ve a, chu kan chanvo chu kan chan theihnan "Isu ka Lalpa, misual i ngaihdam ngai leh i puih ngai ka ni" ti ang u. Tichuan, kan thlavang hauh chungin, min hruai dawn sia.

(Tawngtai Dan Tur)
Lalpa, kei misual hian thiam ka chan theihna turin nang chuan, i nunna i chana, eng ang pawhin sual mah ila, i lam ka pan phawt chuan nangin thiam ka chan theihna tur min zawn sak zel a ni tih hi hre reng chungin, i hnen ka pan tlat zel theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Hlawhtling Tur Chuan Insenso A Ngai Thin

"Mi a puan kang lovin mei a pawm thei êm ni?"(Thufingte 6:27)  

"Nimahsela nangni zawng chak takin awm ula, inthlahdah su u, in thiltih man chu in hmu dâwn a ni," a ti a."(II Chronicles 15:7)

Hlawhtling tur chuan, nat te, hah te, beidawng chung chunga beih leh zel te a tul thin a. Chutiang ti tlatte chuan hlawhtlinna an chang thin a ni.

Mizoram chhung, home mission ni lem lo, mizo khaw pangngaia ringtute hi kan inthlahdah deuh tlangpuia, chutih rual chuan theihtawpa Pathian rawngbawl an awma, chung theihtawp chhuah tlemte zarah chuan nghet takin kan la kal a nih a rinawm.

Thufing chuan "puan kang lovin mei a pawm theih em ni" alo ti a, hetiang ang chiah hian "hah lo leh chan loin rawngbawlna thiltithei a neih theih loh a ni." Khawvel rawngbawltu thawh hlawk leh hlawhtling John Hagee te, Maldonado te, Charles Stanley te chuan, midang an tawngtai peih loh pawhin an tawngtai tlata, midangin an chak zawng an tih huai huai laiin an ni chuan Bible an chhiar tlata, midang an inkhawm peih loh pawhin an inkhawm tlat thin.

Tichuan hun alo kala, rawngbawltu an nia, hun rei tak an mahni leh an mahni an inhneh tawh avangin, midang an beidawn hnuah pawh an beidawng ve duh loa, chhel takin an bei zel thei thina, khawvel deng chhuak thei rawngbawltute zingah an tel ta a ni.

Kan sawi tel duh chu, tihtak zeta tawngtai tur leh bible chhiar tur hian insen tam ava ngai thin tak em, tawngtaia bethel tak tak tur chuan khaw pawn deuh emaw kal alo ngai a, biak ina kan tawngtai dawn pawhin zan rei deuh emaw, mi awm loh hun chan alo ngai a. Chutiang a nih loh vek pawhin chhungte thawh hma emaw, chhungte muthnu te alo ngai a.

Tin, mahni insengso lo chuan rawngbawlin a chhuah theih loh a, midang Pathian hnena hruai tur pawhin insenso tho a ngai a, Pathian hminga chanhaite puih dawn pawhin insenso tho a ngai a ni.

Rawngbawlna thiltithei kan neih dawn chuan, thlantui leh mittui fara, kan thawh chhuah kan sum leh pai te, leh kan hun leh kan tha te hi kan sen a ngaia. Hun rei lote emaw chauh kan insenso ngam chuan, kan rawngbawlna chuan a nih tur ang a nih phak loh theih avangin, insenso ngar ngara beih fat fat a tul bawk thin a. Mahse, chung kan insensona phenah chuan, Lalpan malsawmna a dah lo ngai lo thung a ni.

Tihtak zeta, Pathian rawngbawlna luhchilha, insenso ngam tlemte te zingah hian, telve ta che. Hei hi ka tiam a che "Pathian vanga i insengso takzet ngam a nih phawt chuan, Lalpan lawmman leh hlimna a pek hmaih lo ang che." Pathian tana insengso ngam apiang te hi Pathian atanga lawmna leh hlawkna dawng nasa te an ni thin.

(Tawngtai Dan Tur)
Lalpa, i rawngbawlnaa insengso thei tura, thil neih ka nei ve hi lawm zawk em em tur ka nia, engkim ka neih hi nangma min pek a ni tih hi hre reng chungin, i rawngbawl nan ka tha, ka sum leh ka hun engtik laimaha ui ngai lo turin min pui la, i rawngbawlna atana ka insen phawt chuan nangin min ngaihtuah zel ang tih hi ka hriat reng theih nan min pui bawk ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.



Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Min Kohna Zawna Kan Awm Hian, Kan Thawh Hlawk Ber

"Priskilli leh Akuila, Krista Isuaa ka hnathawhpui, ka nun chhanhim nana nghawng dawhte kha chibai mi buksak ang che u; kei chang ni lovin, Jentail kohhranho pawl zawng zawngin anni hnenah chuan lawmthu an sawi a ni."(Rom 16:3-4)

Priskili leh Akuila te nupa, hi puanin siama eizawng an nia, chanchintha hriltu an nih rualin Paula te anga zin  chhuak meuha chanchintha hril thin mi erawh an ni loa.

Mahse, Pathianin adahna zawnah leh hmunah chuan rinawm takin rawng an bawla, Paula hi tiang ang taka rawngbawltu ropui a nih theih chhan pakhat chu Priskili leh Akuila support'na (puihna) vang a nia. Tin, Priskili leh Akuila te chuan rawngbawltu namai lo tak, Appollova pawh Pathian thu an hrilh a nih kha. (Tirhkohte 18:26)

Chhuak a Pathian thu hril loah chuan an va thawhhlawk teh lul em, an thawh hlawk chhanchu Pathianin a dahna hmunah tak rinawm takin, thinlung dik tak puin an awm vang a ni. Appollova ai Pathian thu an hre hmasa, Paula tluk deuh thaw pawhin an hriat a rinawm, mahse thu ka hril dawn an ti kher lo, Appollova mai mai chu kan zirtir a nih kha an ti lo, tumah an thik loa, intih ropui an tum hran loa, an rawngbawlna zawnah an kal mai a, chu chu tak chu Pathian ram din kawnga milian (Giants) an nih phah ta a ni.

Keini pawh hi, midang rawngbawlna chhutin kan te viau a ni thei e, midangte chu rawngbawlin an chhuaka keini chu thawhlawm thawh mai bak tihtheih nei loin kan inhria pawh a ni thei e. 

Mi chuan nasa takin rawng an bawla mahni fate hnenah chauh rawng kan bawl pawh a ni thei e. Kan eizawnna leh kan awmna hmun a fuh tawk loh avangin, kan che chhuak ve thei lo pawh a ni thei e.

Chutiang dinhmuna kan ding a nih pawhin, Pathian min dahna zawnah rinawm takin Pathian rawngbawl ila, kan rawngbawlna chu mipakhat chauh pawh a ni thei. Mahse, chu mipakhat rawng kan bawlsaka chu, mi sang chuang Pathian hnena hruaitu ala ni thei tih hriain rinawm tak Pathianin min dahna zawnah hian a rawng rinawm takin i bawl ang u.

Tin, kan ban phak tlemte chunga kan rinawm chuan, Lalpan tamtak chungah pawh min la dah thei bawk a ni.

(Tawngtai Dan Tur)
Lalpa, min dahna zawna theih tawp chhuaha i rawng ka bawl theihna turin, mahni insitna sual te, thikna sual te, mahni in hmuh lenna sual te leh mahni i khawngaihna sual te hi ka hnenh theihna turin min tichak ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.





Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Chhungkua Leh Rawng Kan Bawlhonnaa Kan Chakna Tur

"Ngaihtuah hmunkhatin awm tawn theuh rawh u. Inngaihtuah sang lutuk suh ula, mi tete pawl zawk rawh u. Intifing suh u."(Rom 12:16)

He bible thu, Pathian thu hi a zir chhian tham khawp mai. Chhungkua angte, pawl angte, leh rawngbawlhonaah hian:-

1) Ngaihtuahna dang put bik tlat hi a tha thei ngai lo a, thilthlir zau emaw, thil hriatfiah tuma chik chu a thaa, mahse ngaihtuahna dang bik put hian, thawh hona a tichhe fo thin a. Hei vang hian ngaihtuahna hmunkhat, kan bula mite ngaihtuahna ang put thiam hi a pawimawh a ni.

2) Min dang aia sanga inngaihtlat hi, thawhhona tichhetu a nih bakah sual hnathawhna hmanrua a ni thin. Hei vang hian midang ai ka sang loa, midang ai ka hniam loa, midang nen kan intluk chiah a ni tiin, kan thinlung kan siam a tul a ni.

3) Chhungkaw zingah emaw, rawngbawl honaah emaw, kan zingah hian tunge "mite" tih hi kan zawng tur a ni a, mite chu khawsak harsa ngawih ngawih midang phak loa inngaite an ni theia, tlangnei hleithei lo emaw, zirnaah leh hmelahte leh incheinaah tleng pawh midang phak loa inhriate an ni thei.

Chung mitete tan chuan, an harsatna leh an lawmna ngaithla thei tura kan awm a tul a. Heng mite hi an inpek vek vek chuan, kan chhungkua emaw, kan pawl emaw, kan rawngbawlhona  chakna hnar anni thin a ni.

4) Tumahin mi intifing lutuk hi kawm kan peih loa, an bula awm nuam kan tilo bawk thin, hei vang hian keini ngei pawh hi miin kan bula awm nuam an tih theihna turin, kan intifin loh a pawimawha, midang ngaihdan leh midang thlir dan kan ngaihchan foa, kan nghaihthlak thin a pawimawh a ni.

(Tawngtai Dan Tur)
Lalpa, i thuah hian kan chhungkua leh i rawng midang nena kan bawl honaa kan chak ngei ngeina tur a awm a ni tih hriain, i thu ngaipawimawh tlat tur leh zawm turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Khawppui Zawn Kawnga Rilru Nghet Tak Put Hi, Pathian Malsawmna Dawnna A Ni

"Chuvangin ka unau duh takte u, nghet takin, tihchet rual lohvin Lalpa hna thahnemngai taka thawk fovin awm rawh u, in thawhrimna chu Lalpaah chuan a thlawn ngai lo tih in hre si a."(I Korinth 15:58)

Pathian ringa kawppui kan zawng anih chuan, kan ngheh hi a ngai a ni. Pathian hnenah ringtu zawng zawng deuh thaw hian kawppui tur kan dil a rinawm a. Kan dil chuan, Pathian pawh hian min kawhhmuh ngei ngei tih hi hriat a pawimawh awm e.

Pathianin min kawhhmuh sia tinge ka la neih loha, tinge ka la hmuh loh kan ti maithei a. Ni e, kan rin aia hma pawh hian Pathian hian min kawhhmuh daih tawh maithei a ni.

Kan hmuh lo a kan inhriat chhan leh Pathianin min la hriattir lo a kan hriat chhan chu, kan ngheh loh vang a ni thei a. Kan dila, kan dil hnu hun rei loteah, mitha tu emaw engtin tin emaw hriatna riau kan nei thin tiro. Chu mitha kan hriata chu kan buk kan buk a, "ka duh mahse ka duh leh lo" kan ti kan ti thin.

Pathianin min kawhhmuh a chu, a thatna tak tak pawh kan hriat hmain midang kan rilruah kan dah leha, midang pawh chu kan buk leh a, kan duh leh lo thin a, kan confuse (dik ber hre lo) thin a ni.

Hengtiang hi kan nih thin avang hian, Pathianin kan hmaa a mi rawn dah chu a thatna tak tak hre chiang turin thla hnih thla thumte chu, ngaihzawn kan tum hmain ngaihthlak phawtte hi a pawimawh thin awm e.

Chutih rual chuan mi thenkhat chuan, miin an mit an lak rual rualin, an theihna zawng zawngin ngaihzawn an tum mai thina, tunge a mit latu chu a nih, enge a huat  zawng, enge a ngainat zawng, Pathian neitu tak a ni em tih pawh chhut loin an zuan chawt mai thin bawk.

Pathianin min pek ngei ngei pawh hi, zankhat thilthuah emaw, zuan nghal bur chi a ni chuang lo a nga. Tawngtai chung leh Pathian nghak chunga, nghet taka rinnaa ding chungin, Pathianin kan hmaa a mi dahte hi thlir phawt chi a ni.

Josepha pawh khan Mari kha, a nei nghal thut thut loa, then a duh pawh khan a then thut thut lo a nih kha. An inkarah Lalpa remruat alo awma, van lamin hna an rawn thawk mai a nih kha.

Hetiang ang chiah hian keini pawh hi, Pathianin kan hmaa a mi dahte nena kan inkarah hian "nei turin emaw then turin emaw ti thut thut lo ang u, Lalpan kan inkarah remruatna alo neih chuan, Lalpa a rawn che mai ang tih hi ring ila" nget takin Lalpa hna thawh i nghak zawk thin ang u.

Eng thilah pawh Pathian duh ang taka ti tura, Lalpa nghah hi Lalpaa thawhrimna pakhat a nia, Lalpaa chhelna pawh a ni bawk a ni. Khawppui zawn kawnga Pathian duh ang taka nun hi rawngbawlna chu a tih chi em lo a nga, mahse Lalpa thuawi nunna leh thu awina nun tak zet zet a ni, chuvang chuan hemi kawnga Lalpa thu awinaah hian, i inthlahdah hauh lo ang u.

(Tawngtai Dan Tur)
Lalpa, chhel taka nget taka i thu zawmtute hi i ngaihthah ngai lo a, an nun kawng engkimah i remruatna mawi tak chu i dahsak thin a ni tih hi ka hriat renga, kawppui ka zawn kawngah hian i thu zawm turin, nget taka ka din theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.





Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

I Inngaihdam Theih Loh Hnuah Pawh, Ala Ngaidam Duh Che. Lalpa Pan Hreh Suh

"Chutichuan, zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u."(Hebrai 4:16)

Nu leh pa ten an fa lehkha thiam theilo tak leh zirtha peih lo takte pawh hi, lehkha zir turin an thlem hram hram thin a. 

Mihring nu leh pa aia nasa zawkin, kan Pathian hi a dawhtheia a hmangaihna pawh a nasa zawk a,"a duh anga nun kawngah, kan fail (hlawhchham) a nih pawhin, a ni chuan min hrem mai loin, ngilnei takin bei leh hram hram turin min ti zawk thin."

Lehkha thiam lo leh zir tha duh lo, vawi tamtak fail leh kum eng emaw zat hlauh hial tawhte pawh hi, an nu leh pa te chuan lehkha an thiam loh chu ngaingam loin, zirturin an la ngen lawm lawm zawk thin. A nihna takah chuan, an fa chu an chawmhlawm a ni, a lehkha zirna tur pawh an tum sak veka, an insuk saka, a pheikhawkte an nawhfai saka, chutiang tak chuan an fa lehkha zirnaah chuan theih tawp an chhuah a ni, chutiang chung pawha an fa chuan lehkha ala zir tha duh lo a nih pawhin, an fa chu an hrem loa, an tuithlar loa, "Bawihte zir hram hram rawh Aw! an ti zawk thin. A chhanchu an fa an hmangaih tlata, a tana tha tur chu lehkha thiam a ni tih an hriat vang a ni.

Kan Pathian hmangaihna leh dawhtheihna hi hei ai hian a nasa zawk a, a fapa meuh kan tan min pe a, chu mi hnua a thu kan zawm hleihtheih loha, kan phatsana, a hming kan tichhia a nih pawhin, "ka Fa, bei leh hram hram rawh aw! keiin sim turin ka pui ang che, ka hnenah lo kal la chakna ka pe ang che" tiin min sawm thin zawk a ni.

Mi thenkhat Pathian thu sawidan hi a dik lo hulhual! han ti ve ngawt ila. Ka tih chhanchu Pathian hi an sawi thikthuchhe thei lutuk a, Pathian hi kan sual chhut ngeuh ngeuh thin leh kan sual a hmuh ve leh a min hem leng lawp thintu ang maiin an sawi hial thin. 

Pathian thikthuchhe taka lantir thinte hian tan chhan pawh an nei ve thina, Sodom leh Gomora te, Davida uire te, Juda Babulon sala hruai te etc. Sodom leh Gomora hi chu kan Pathian hian a hremna ngang mai, a chhanchu ramhuai an biaa, an hur bawka, zaah za deuh thaw in Pathian lam an hawi loa. Eng sual pawh sual a niha, kan sualna pawh hi nep bik lo mahse, nang leh kei suala kan tluk hi chuan, Lalpan min la ngaidam duh a ngem le tiin, kan la inngaihtuah thin tiro, hei hi ka sawi duh "Lalpan min la ngaidam duh" tih hi.

Tin, Davida leh Juda leh Israelte a hrem dan kan en chuan, hmangaihna nena hremna a ni tih kan hmu ang, Pathianin Davida thlahte, Juda thlahte, Israel thlahte an ral a phal loh danah hian, hmangaihna dah hmasa chungin a hrem tih a chiang a ni. Lalpa lama an kir leh veleh nasa takin lawmman a pe thin tih pawh kan hmu awm e. Keini pawh "Lalpan min la ngaidam duha, a hnena kan kir a nih phawt chuan lawmman min pe duh zawk hial a ni."

Chutiang takin kan Pathian hi, tha mahsela hei hi kan hriat ve a ngai thung, "Kan dam chhung, kan la thawk theih chhung hi chuan Lalpa hnena kir lehna hun tha kan nei a ni, mahse kan thih hunah chuan kir lehna hun a awm tawh dawn lo thunga, hei hi a lawmawm viau rualin, nan leh kei hian kan thih hun tur hi kan hre tlat lo laia hi a buaithlak lai chu a ni. Naktukah, nakumah, kum 50 ka tlin hunah Pathian hnung ka zui ang a tih ngawt theih loh, zanin ah kan thi thut thei asin."

Chutih rual chuan, a lungaih thlak lohna lai chu, engtik lai pawhin, tunah ngei leh tuna i awm ang khan, kan Pathian hi a  pan theih asin. 

"Ka Lalpa Isua Krista min chhandamna avangin, eng ang pawhin tisual tawh mah ila, chhandamna chu ka ta a ni, chatuan nunna leh leia i malsawmna pawh hi ka chan tur a ni, Lalpa min pui ang che" tiin huaisen takin, van Lal thutlenga thu kan Pathian khi kan be thei asin.

(Tawngtai Dan Tur)
Lalpa, i hmangaihna chuan mi tin chhandama an awm i duha, chu mi tin zingah chuan kei pawh hi min telve avangin ka lawm e, i chhandam fate chan tur, chatuana nunna leh lei malsawmna pawh ka chan theihna turin, nangmaha ka awm tlata i thu ka zawm theih nan min pui ang che, Amen. Ti ang aw. 

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.




Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Kan Mil Lohte, Malsawmtu Nihnaah Hian Lalpan Hlawkna A Dah

"A tiduhdahtu che u chu malsawmsak ula; malsawm ula, anchhia chu lawh suh u."(Rom 12:14)

Pathian hminga thiltha tih kan tum apianga min tibuai fo thintu chu, thu inhmu fuh lo leh ngaihdan inang lo hi a ni thin. A bik takin Pathian rawng kan bawlhonaah hian hetiang hi a ni duh thina. 

A chhanchu, thukhat vuana inlungrual taka Pathian rawng kan bawl chuan, kan thawkhlawk lutuk dawna, chu chu kan hmelma hian a hlau a ni, chu vang chuan eng emawni hlek a kan thawhhona tihchhiatin, rawngbawlho reng sia, hlawk lutuk lo, a hminga Pathian rawngbawltu min nih tir hi a tum thin a ni. 

Chu vang chuan, kan rawngbawlpuite nena kan inhmuh thiam loh changte leh rawngbawlnaa senior zawk ten thu dawng chiang mang loa thiam loh min chantir ve ngawt changte hian, bei let loin "malsawm zawk ang u". Engtin nge kan malsawm ang, an dik lohnaah pawh kan tan tlat dawn tihna em ni? A tih theih a, mahse chutianga malsawm chu a tihin a tih chi loh a.

Kan malsawm dan tur tha ber chu, "Pathian hnena tawngtai sak a ni." Kan tawngtai sak a nga, Pathian awmpuina leh thinlung dik kan dilsak a nga, an chhungkua khawsakah malsawmna an chan theihna tur tante, an eizawnna tante, an hriselna tante kan dilsak a pawimawh a ni. 

Thlarau lam leh thinlung lam atana indilsak a pawimawh tluk zet hian, hriselna, chhungkua leh eizawnna indilsak hi a pawimawha, a chhanchu rawngbawltu Pathian hnaih em em thinte, min tichau fotu leh kan ngaihtuahna tifim lotu chu, hriselna tlak hniam vangte, chhungkua inhmuh thiam loh vangte leh eizawnnaa harsatna vangte hi a ni thin a ni.

Tin, miin min hauh ngawt emaw, kan chunga an thin a ram viau te hian, an mahni zawk chu dinhmun harsa taka an lo din lai a ni thina, hei vang hian min hautute ngei hi kan tawngtai sak thin a ngai a ni. Chutianga kan tawngtai sak a nih chuan, Lalpa a thawk thina, an mahni zawk hi, min rem duhtu leh kan lungtihawi chak em em tute an nih leh fo thin.

Chu bakah, Pathian rawng kan bawlnaah leh thiltha zawk tih nana kan association dina kan fehchhuahnaah hian, thawhhona tha a awm dawn chuan tlawmzawk kan awm a ngai thin, chuvang chuan thiltha zawk leh thawhhona tha kan neih dawn chuan tlawmzawk nih hi i hreh lo ang u. Tlawmzawk nih hreh lotute hi hun a kal a kala, hruaitu tha bera sawi an ni fo thin a ni.

(Tawngtai Dan Tur)
Lalpa, min mil lotute leh min tiduhdahtute malsawmsak hi, ka hlawkna tur awm miah lo mahsela, i thu a nih avangin ti tur ka nia, mahse ringtute vanneihna chu i thuzawmna phenah hian hlawkna i dah zel hi a nia, a thu a nih vang leh i thu zawmna chuan hlawkna a chhawm thin avangin, min tiduhdahtute malsawm tlat zel turin min tichak ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.




Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)