Kum Thar Kum Kal Liamta Aia Thain A Hmuak Che

"Mi rinawm chuan malsawmna a ngah ang a, Hausak thuai tum erawh chu hrem lohvin a chhuak lo vang."(Thufingte 28:20)

Kum thar thutiam (New Year Resolution) neihte kan riluk a rinawm a.

Ni e, new year resolution siam leh ringawt hi ka hlawkpui a ngem tia inngaihtuah mai hi a awl em em a ni.

New year resolution siam hian, January thlaah tih hlawhtlin nghal vek kan tum a nih chuan kan hlawhchham maithei a ni. A chhanchu mihring hi inthlak zawt maithei kan ni loa. Zuk leh hmuam emaw ruihhlo ti tan phei chuan sim mai a har thin.(tiang kawnga kan buai lo a nih pawhin a buaiate fuih nan hmang ila.)

Mahse, inthlak mai a har avang hian thil tha tih tum hi thulh chuan tur a ni loa, Bible chang kan tarlan ang khian kan thil tum chu kan hlawhtling nghal mai a nih loh pawhin, rinawm takin tum zel ila. Camp ah luh a ngaih pawhin thla 12 chhung camp a luhna tur hun tha kan nei tih hria ila.

Tin thiltha dang kan tum a nih pawhin thla 12 hlawhtling tura beihna hun kan nei tih hria ila, inthlahdah loin mahse ti thut thut chuang lo turin new year resolution siam ngei ila, chu chu tawngtainain Lalpa hnenah pawh hlan ila, chu kan thiltum chu kan hlawhtlin ngei theih nan bang loin Pathian hnenah a puihna dil thin bawk ila.

Chutianga than tum rana, nakum ni 365 chunga Lalpa hnena bang loa nitin kan thiltum hlawhtinna atana a puihna kan dil thin a nih ngat chuan, nakum tun ang hunah chuan mi hlawhtlin leh hmasawn kan ni ngei ang.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Nangmaha I Thei Lo A Nih Pawhin, Lalpa Nen Chuan In Thei Ang

"Mi fel chu tum angin a duah hluah hluah ang a: Lebanon tlânga sidar thing angin a thang uak uak ang."(Sam 92:12)

Kum alo thar leh dawn taa, kum thar pawh ni mahse la naktuk dang pakhat kha a ni maia, mahse Lalpa hruaina nasa tak leh, Lalpa rinawm zia ngaihtuah chuan kum khat chu sawi loh darkar tin mai hi lawmna tur alo nia.

He thu ziak chhiartu hi, kum 15 aia upa vek kan nih ka ringa, kum 15 ah chuan 5475 a awm a, ni 5475 hi a tam zia leh a rei zia kan chhut thiam mai awm e. Kum 20, 30 emaw 40 hial kan tlin tawh phei chuan Pathianin hun rei tak min hruai tawh tihna a nia, a zahngaihna leh khawngaihnain rinawm takin hun rei fe min chelh tawh tihna a ni.

Kan Pathian hian thang lo turin emaw, hmasawn tawh miah lo turin hei leh chen hi min hruai loa, kan chungah a zahngaihna a lan tir lo, kan than a duh avangin leh hma kan sawn a duh avangin zahngaihna nen hei leh chen hi min hruai zawk a ni.

Kum tharah kawng eng emaw ti zawng tala than tum ranin, kum thar hi i lut ang u. Hmasawn tum tan chuan hma hi alo sawn theih khawp maia, hmasawn leh than tum lo tan erawh hma a sawn theih reng reng loh a ni. Hote a hmasawn kan tumna a taka lo chang thin hi, a kal a kala hmasawnna lian tak rah tha tak chhuah thei a lo ni hial thin a ni.

Heng kawng teah te hian hmasawn han tum chhin ang u.

1) Tawngkam mawi zawk hman leh tawngkam fimkhur.

2) Thawh hma leh mut hma.

3) Rang zawk leh tha zawka kan thil tih apiang tih tum, entirnan chawi eite, inbual leh hmaiphihte, lehkha zirte, incheite etc.

4) Minute 5 tala engkim tiha hma tum.

5) Uluk zawk leh tha zawka tawngtai.

6) Nitin bible chang 5 tal chhiar, kan chhiar thin a nih pawhin kan chhiar chin bakah chang 5 tala tih tam.

Kan sawi tum chu kan man thiam tawh mai awm e, a tawp berah a pawimawh ber han tar lang ta ila.

7) Mi pakhat tal Pathian hnena hruai tum rawh, ni 365 chhungin mi pakhat tal piangthar lo hi nitin emaw, zantin emaw, ni khat danah emaw, karkhatah emaw tawngtaia hlan chhungin Pathian thu thawn ziah thian ta la, kum khat chhung chuan Pathian neitu tha takah a chhuah theih a rinawm.

Kum hlui leh hun kal tawha kan tih that leh kan tih chhiatte hian kan nunah pawimawhna an nei tawh loa, kan tun hun zel leh kan tih leh tur hian kan nunah pawimawhna nasa tak an nei a ni tih hriain, Lalpa nen hmabak tha i nei tih ring tlat chungin, hmalam chauh thlir ang che.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.








Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Kawng Dik Lo Kan Zawh Chang Pawha, Kawng Dika Min Khalh Let Lehtu Pathian

"LALPA chung thu-ah chuan, "Ani chu ka inhumhimna leh ka kulhpui; Ka Pathian, ka rina chu a ni," ka ti ang."(Sam 91:2)

Pathian chanchin an sawi kan hriatte, keini pawhin Pathian chanchin kan sawi hian, eng nge rilrua awm thin le.

I inhumhimna a nih ziate, malsawmna i dawn thin zawng zawng petu che a nih ziate, amah chauh chu i rinna leh i innghahna a nih ziate hi i ngaihtuah thin em.

Nge mi lianpui hmangaihna nei lem lo, i tihsual chang renga i tihsual vaih chuan hrem nghal tur che ah ilo ngai zawk. He tiang reng reng hi kan Pathian hi alo ni loa, zilhhautu leh zirtirtu chu a ni ngei a. Mahse, a hmangaihna leh a zahngaihna hian a thikthu chhiatna hi a khum daih tih hi hre tlang ila.

Pathian kan ngaihtuah hian, min hmangaihtu leh min malsawmtu leh min humhimtu, chiatna zawng zawng lak ata min vengtu a nih zia hi, hre reng ila.

Min chawi kangtu leh dinhmun tha zawk min pe duhtu leh, thutlukna dik lo kan siam vanga ngawng tha lo kan chan pawh dal thintu leh kawng dik lo kan zawh pawha kawng dika min khalh let leh thintu a nih zia te hi i hre reng ang u.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Pathian AWMA Chuan, A Awmpui Che Tih Hi, I Thinlung Kha Hrilh Thin Ang Che

"Tin, Pathianin Mosia hnênah, "AWMA KA NI," a ti a; tin, a hnênah chuan, "Nangin Israela thlahte hnênah chuan, 'AWMA chuan in hnênah mi rawn tîr a ni e,' i ti tûr a ni," a ti a." (Exodus 3:14)

Pathian khan Mosia hnenah khan, Israel sal tangte hnenah AWMA chuan in hnenah mi rawn tir a ni, ti rawh a tia. Khang sal tangte kha Pathianin hruai chhuah a duh avangin, an hnenah Mosia a tir tih kha kan hre vek tawh awm e.

Ka han sawi duh lai chu, nang leh kei pawh hi kan Pathian AWMA hian min tir ve a, keimahni leh keimahni thinlung hnenah "AWMA ka nia i sal tanna atang khan ka hruai chhuak dawn che" tia sawi turin min tir a ni.

Kan Pathian AWMA chuan a hre chiang em em che a, i pian hlima i thah hmasak berte khan alo ngaithlaa, i lungngaihna thurukte, i ei chak zawngte, i mawi tih zawngte, i hlauhna zawng zawngte pawh a hre veka.

I harsatna leh i tana atang khan chanchhuah che a duh a, "AWMA ka nia ka awmpui dawn che" tih hi i thinlung kha lo hrilh rawh a ti che.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Van Lal Khi, I Buainaah A Inrawlh Duh Asin

"Pathian Chungnungbera chu ka au vang; Pathian engkim mi tihsaktu chu."(Sam 57:2)

Pathian nihna ropui em em ngaituah chang hian, a van Lal thutthleng atang khian keini nun hniam tur zia han chhut leh zel ila, a hniam rawng rawng khawp mai.

US president hi khawvela dinhmun sang berah kan ngai thina, chu US president dinhmun chu sang hle mahse khawvela hausak berna dinhmun nen a inkawp chuang loa, midang daih hi khawvela hausa ber an ni thin thung thin a.

US president dinhmun atang chuan kan CM chu sawi loh kan prime minister dinhmun pawh hi alo hniam em em maia. Keini dinhmun phei chu a hniam ngawih ngawih a ni.

Mahse, van Lal thutthleng atang chuan US president dinhmun meuh pawh hi sawi hleihtheih loh khawpa hniam a nia. US president pawh hian khawvel buaina chu sawi loh an ram buaina chingfel tur pawh hian tih ngaihna tak hriat loh chang a ngah a ni.

Chutih lai chuan keini chu van Lal thutthlenga thu kan Pathian khian, kan engkim min refelsak turin leh engkim min tihsak turin, kan nunah a inrawlh duha, kan tana a thawhna turah hian sum leh pai leh mamawh ngaihtuahtu tur (fun raising committee) amamawh ve loa engkim a nei a, a ngah lutuk hi hmanna tur leh a hmangtu turte in a daih lo zawk hial a ni.

Chutiang khawpa Lal ropui chuan min hmangaiha, kan nunah hian Lal bera kan dah duh a nih ngat chuan, min thawhsak duh em em reng a ni.

Kan nuna a tha thei ang bera min thawhsak turin kan Pathian, engkim chunga Lal, hriatsen loh khawpa Lal ram zau nei chuan min sawm reng zawk a ni. 

Hawh u, kan Pathian hi kan nuna a duh anga a thawh theih nan, a thu zawm turin theih tawp i chhuah ang u.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Misualte Lawmna Chhan Ber Isua

"Tin, vantirhkoh chuan an hnenah, "Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu."(Luka 2:10-11)

Isua min chhandam tura alo  piang hi, tu tan nge lawmawm ber ang ka ti thin. Mi rethei em em Berampute khan a lawm phaa, hausa leh fing khawchhak mifingte lawmna ber pawh a nia.

An ni Berampu leh khawchhak mifingte kha chu mi tha an nia, chu vang chuan anni ai chuan kei misual boral mai tur hi, Isua min chhandam tura mihring anga alo kal chungchangah hian lawm tur zawk kalo ni reng mai.

Rawn kal lo vaih chu nisela, kan hringnun hman hi a hniam khawp ang le, chu mai bakah kan ram mizoram pawh hi a nep khawp ang. Kan rama awm si mahse Isua ringtu ni ve lote tlawhin home missionah vawi khat chu kan kal alawm mawle, a mak asin aw! 

Kan ram a inang chiah, kan eiin a inang chiah, kan tuiin a inang chiaha, chu mai bakah hnam upa zawk an nih avangin changkang zawk tur pawh an ni khawvel chhut dan chuan, mahse mizo ho Pathian neitu hnam hnuai daihah an awm a ni. Kan hnam hetiang ang kan nih theih chhan leh kan himna chhan ber Isua i chawimai sauh sauh ang u.

Hawh u, keini misualte hian Bethlehem lam Isua awmna lam, a kohhran ho i pan ve ang u. A kohhran ho zingah chuan Isua i lawm ve ang u.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Krismas Neitu Isua Kan Hmuh Ve Ava Pawimawh Em

"Tin, hei hi in tan chhinchhiahna tur a ni; nausen puana tuam, ran chaw pekna thlenga mu in hmu ang," a ti a."(Luka 2:12)

Krismas kan hmang zo leh dawn taa, mahse Isua kan hmu em tih hi kan ngaihtuah a ngai hle a ni.

Nuam ti em em in, chibai semin, ei tur tui hnai tak tak kan ei a nga. Mahse, a pawimawh ber leh Krismas neitu Isua kan hmu lo a nih chuan ava pawi dawn em.

Khawchhak mifingte leh berampute kha chuan Isua an hmua, kan dam chhan kan hmu ta tiin hlim leh lawm takin an nun an hman chunzawm tak a rinawm a.

Kan dam chhan ber leh he kan nuna kan hmuh theih hlu ber Isua hi kan hmuh ngei a pawimawh a, Isua hmu turin i zawng bawk ang u.


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Urlawk Zan

"Tin, heti hi a ni a, vantirhkohte chuan vana an kalsan veleh, beram vengtute chuan, "Tunah Bethlehem khaw thlengin kal ila, Lalpan thu min hrilh lo thleng chu i en ang u," an inti a."(Luka 2:15)

Hmanni chu chanchinbu ka chhiar a, khawi emaw hmunah party a awm tur thu alo in tar chhuaka, hetiang hian khawvel lama klanna law law a kan hriatte chuan an hlimna tur an zawnga.

Ka thiante hoin pawhin engtin nge i hman dawn tiin min zawt zawt bawka, ni e tlema in la fel deuhte chuan thian hoin ar an kanga, pudding an siam hoa, hlimawm thei ang berin hun an hmang thina. 

Chutiang ang chuan kan inbuatsaih tlang a nih hi, kan inbuatsaih dan theuh hi, tun kan khawvel mithmuhah phei chuan sual a nihna a awm hren loa. Han intihhlimte ve te pawh hi tih loh tawp tur a ni chuang lo, mahse a pawi thin chu hlim kan tum lutuk na lamah hian sualah kan lut thin laia hi a ni.

Mahniin hlim kan tum lutuka, zan danga rui ngai miah lo leh mipat hmeichhiatna hmang ngai miah lote pawh, kan ruia, mipat hmeichhiatna kan hman phah thin a ni.

Intifel takte pawh hi a huhoin an inkawm an inkawma, a hnuah tu tu emaw nen an kal fala, mipathmeichhiatnaa tlu tate an awm nawk thin a ni.

Ur lawk zan hman dan tha ber chu, Berampute anga kalsan nun neih hi a ni. Anni pawh khan an tana pawimawh em em leh an nunna hnar ber an kalsana, Isua lam an pan zawka. Chutiang ang chiah chuan, kan chakna leh kan duhte hi kalsan ila, Isua lam kan thinlungin i pan ang u.


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Krista Hmuh Tak Tak Nan Chan Thin Mahse, A Hmutute An Inchhir Ngai Lo

"Tin, in chhungah an va lut a, a nu Mari hnena naute chu an hmu a, an bawkkhup a, chibai an buk a; tin, an ro bawmte an hawng a, a hnenah chuan lawman – rangkachak te, beraw te, murra te – an pe a."(Matthaia 2:11)

Khawchhak mifingte kha fingin, hausa viau mahse an ropuina khan Isua hmaa an thingthit kha a dal zo chuang lo a. Tihtakzetin nausen Isua tlawm taka ran chawpekna thlenga mu hmaah khan an thihngthi a nih kha.

A chang hi chuan kan Lalpa hi a inpuang tlawm thin em em maia, tlawm ve phawt loh chuan kan nunah pawh hian a inpuang mai mai ngai lo a ni.

Khawchhak mifingte chanchina chiang deuh mai pakhat chu, an ropuina hmanga lei leh van Lal ber an zawn kha chuan an zawng hmu loa, lal Heroda inah an va zawng sual a nih kha. Ni e, an ropui thawhkhat awm hi ka ti thin, zan lamah lal Heroda inah appointment pawh lak ngai miah loa, lal Heroda an hmu thei hi. 

Mahse, chu an lei ropuina chuan an hmuh duh ber van Lal ber chu a hmuh tir loa, hruai theih an nihna zawk khan Lal Isua chu a hmuh tir a ni. 

Khawchhak mifingte fak awmna ka tih chu, Lal Isua hmuha chibai buk an duhna kha an nunah an nasat tir hi ani, chutaing taka Isua hmuh thlahlelte chu engmah hian an dang zo lo thin a ni, han tisual bap bap mahse, lal Heroda in atang khawdai lama ran chawpekna thleng lam pan kha, van Lal ber hmuhna a nih phawt chuan an hreh lo lai a hi an fakawm a ni.

Keini nun hi kan chhut ngun ava ngai em aw, anni ai hruaitu kan nei tha zawka, anni chu arsi mai kha Pathianin an mahni hruaitu atan a pe a. Keini chu ama Thlarau, Thlarau Thianghlim min hruai turin min pe a ni.

Mahse, Thlarau Thianghlim hruai nih hi a buaithlakna chu inngaihtlawm a ngai em em laia hi a ni. A chhanchu kan ngaihdan hi eng atan mah a ngai lem loa. 

Inngaihtlawm a ngaihna em em chu, thian kan ngaihdan eng atanmah ngai lo hi thianah pawh kan chhiar lo ang, chutiang khawp chuan kan inngaihtlawma Thlarau Thianghlim thu thu leh min hruaina apianga kan kal duh hi, Krista kan hmuhna tak tak atan chuan alo ngai si a ni.

Chutiang khawpa ral hnehsawh a ngai chung chung pawh hian, Krista hi a hlu chungchuang a niang, amah hmufiahtu tak tak leh ama tana chan nasa te reng reng hi inchhir zuk awm ngai miah loa.


Hawh u, rohlu ber Isua kan hmuh ve theih nan i tlawm ve ang u.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

I Natna Leh I Hreawmna Kha Thihna Tur A Ni Loa, Pathian Ropuina A Lanna Zawk Tur A Ni

"Tin, Isuan chu chu a hria a, “He na hi thihna tur a ni lo, Pathian mawi nan a ni zawk e, Pathian Fapa chu he mi avang hian a la mawina turin,” a ti a."(Johana 11:4)

I na em? I tlachham em? I dam lo em, nge in chhungkaw zing ami an na zawk? Nge i chhungkaw zing ami sualin a hliam vangin i na?

Kha i natna tawrh kha, thihna tur a ni loa, Pathian ropuina lanna tur a ni zawk.

Mari leh Marthii nuna zir tur pawimawh em em mai chu, an unaupa Lazara a naa Isua an beisei chat hi a ni. Beisei dang an nei lo, aien thiam an beisei lo, puithiam inthawi pui tur pawhin an sawm lo, Isua ani an beisei chat kha.

Isua an beisei chata an theih ang tawk tawkin an beisei a, mahse an beisei a bo taa, an theihna a zo ta. Chutah tak chuan, an theihna zawng zawnga Isua an beisei avangin an beiseina in a thlen phak tawh loh, ni li a liam hnu khan, Isua kan Lalpa amite theihna baka che thin chu, a che taa. Lazara thi chu a ti nung leh ta a ni.

Chutah tak chuan Pathian a ropui ta a ni. Ni e, kan theih ang tawka Isua kan beiseia, kan theihna in a phak tawh loh china amah a rawn chet hian, Pathian a ropui zual thin a ni.

Kan theihna baka Isua kan chet tir theihna tur chu kan theih ang tawka, amah beisei tlat mai hi a ni.

Tin, lu kan suna kan chhungte kal tawh chu Lazara angin an tho ve lo a ni maithei, mahse vanah Lazara aia dam tha zawk leh hlim zawkin an awm tih hi, kan hriat a pawimawh a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

I Tana Pathianin A Buatsaih Ram Nei Turin, Amah Nghak la, A Kawng Zawh Rawh

"LALPA chu nghak la, a kawng chu zawh rawh. Tichuan ram hi luah tûrin a chawimawi ang che."(Sam 37:34)

Ram luah kan bible'in a sawi hi awmzia hrang hrang a nei thei awm e. Ram kan hmuh theih luah a kawk thei a nga, nun kan awh thin leh kan duh em em neihna pawh a kawk thei bawk awm e.

Mizo te chuan kan hmuh theih ram chu kan luaha, Pathianin min khawngaiha keimahni ram ngei kan luaha, khawiah pawh awm ila, Mizoram tia sawi tur kan nei a.

Mahse, kan mita hmuh theih ram kan nei chung hian, he kan ram chhungah hian kan duh ang nun leh Pathianin kan tana a buatsaih nun ram erawh kan luah lo nite pawh hian a hriat a ani.

Chu nun ram chu engtin nge kan neih ang, kan neih dan tur chu Pathian remruatna nghaha, a kawng zawhin a ni.

Pawisa neih ngawt emaw, pianthar ringawt hi ram luahna chu a ni loa. Pathianin kan tana a buatsaih ram luah chu, amah kan neih avanga nitin nun thlamuang kan neihna nun hi a ni ti ila kan sawi sual awm lo e.

Chu nunah chuan, thikna a awm loa, rilru natna leh ngaihthat lohna leh hlauhthawnna a awm loa. Chu nun chu Thlarau Thianghlim chen chilh nun a ni.

Chu nun nei tur chuan leh chu ram luah tur chuan kan nitin nun hi kan vawn thianglima, Lalpa hnena kan intukluh fo a tul a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Pathianah I Beiseina I Nghah Chuan I Mualpho Lo Ang

"Jakoba Pathian tanpuitua nei chu, lawm takin a awm thin, LALPA Pathiana beiseina neitu chu."(Sam 146:5)

Pathianin a puih tawhna che han chhui kir chhin teh le, kha mi tuma i dam chhuah i rin hauh loh laia tha taka i dam chhuah leh tumte kha han thlir la. Chu bakah i harsatna i paltlang thei tawh dawn lo emaw i tih tuma engtin tin emaw i paltlang leh chungchangte kha han ngaihtuah teh.

Jacoba Pathian, Bumtua Pathian pawh nih hreh lo Pathian khan, Isua Krista tlanna zarah hming thar nang leh kei hi min  pe a, kan tluk chhiat mai a phal ngai lo a ni. Jacoba khan Pathian puihna a dil lem loa, mahse Pathianin a hmangaiha, a pui a hming thar a pe a. 

Chutiang ang bawk chuan, Pathian puihna hi kan dil emaw dil lo emaw, min hmangaih avangin min pui thin a, min kalsan mai a tum loa, amahah chuan kan beiseina a tharin han nghat leh teh ang u.

Pathianah beiseina kan nghat a nih ngat chuan, kan mualpho ngai lo ang.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Pathian Hnaih Kan Duh Nge Duh Lo, In Enfiah Ang Aw

"Tin, ani chuan a hnenah, ‘Mosia leh zawlneite thu an ngaih loh chuan mitthi zinga mi tho leh mahsela an awih chuang lo vang,’ a ti a," a ti a."(Luka 16:31)

Pathian kan ngaihven em? Kristmas a hnaia, enge i ngaihven ber le? Chutiang lo pawh chuan kan nun hrim hrimah hian enge kan ngaihven tih hi mahni leh mahni han inzawt teh ang u.

Lazara leh mihausapa chungchangah khan mihausapa khan a unaute a kalna hmun hremhmuna an rawn kal ve loh nan mi thi tawh Lazara chu tho leh sela a unaute chu Pathian thu zuk hrilh sela, tichuan Pathian lam an hawi a ringa. Mahse, Pathian chuan khawvela a tirh tawh sa, a rawngbawltute thu an zawm loh chuan mithi zinga mi tho lehin an hnenah thu sawi mahsela an awi chuang lo vang, a ti a nih kha.

Kan tunlai khawvela rawngbawltute thu ngaihvena, Pathian lam kan hawi chuang lo a nih chuan, keini pawh hi, mithi zing ata tho lehte Pathianin min rawn tirh sak mahsela Pathian lam kan hawi chuan a rinawm loh a ni.

Pathianin tunge alam min hawitir tura kan tun dinhmuna a rawn tirh, pakhatnaah chuan kohhran min pea, kohhran chhungah rawngbawltu tha tak tak min pe a, chu bakah rawngbawltu tha tak tak tihdam theihna neite min rawn tirh saka, mihausapa ang chiah khan malsawmna tha bikte min pe a, tin kan tunlai khawvelah phei chuan internet avangin zing kan thawh atanga kan mutthlengin a thu leh hla ngaihthlak tur leh chhiar tur min pe bawka. Heng Pathianin min pekte hi kan duh loa, thil dang kan thlang zawk a nih chuan, kan Pathian hi kan duh lo tawp tihna a ni a ngem le.

Ni e, harsatna ka nei alawm, ka dinhmun hrethiam an awm lo kan ti em. Chutianga kan ti a nih chuan, kan Pathianah leh a thuah hian kan harsatna atanga kan chhuahna tur hi atam khawp mai. Chu mai bakah kan Pathian thu tangkai taka kan nuna kan hman thiam theihna tura min puitu tur mi tam tak an awm bakah internet kaltlanga kan hmuh theih tur a tam em em bawk a ni.

Hawh u, Lalpa i thlang ang u. Lalpa chu khawizu thlum ber ai pawhin a thlum zawk sia, inngaihzawnnaa hmangaihna leh duhna kan hmuh theih bak hi amahah a awm sia, sum leh thilthar kan neiha kan lawmna thin aia nasa zawk lawmna hi amah a awm sia.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Pathianin A Pek Belhchhah Duh Che

"Tupawh tlemte chunga rinawm chu tam tak chungah pawh a rinawm thin; tupawh tlemte chunga rinawm lo chu tam tak chungah pawh a rinawm lo thin a ni."(Luka 16:10)

Tlemte chunga rinawm kan thlir dan thenkhat hi chuan, a awmzia a thelh emaw a tih theih a. Mi thenkhat chuan, an thilneih tha taka enkawl mai hi tlemte chunga rinawmna a niin an ngai thin, dik lohna em em a neih chuan chu a rinawm loha.

Tlemte chunga rinawm awmzia tak chu, kan neih ang ang tangkai taka kan hman zawk hi a ni. Chu chu chhiahhlawh talen, 5, 2, 1 an puin a pek chung changah khan a chiang awm e. Talen 5 leh 2 neite khan tangkai takin an neih chhun kha an hmanga, tichuan alo pung a, tlemte chunga rinawmah chhiar an nia. Talen khat neitu erawh kha chuan tha em emin a vawng thung a, mahse a hmang tangkai loa, a ti pung ta loa, tlemte chunga rinawmah chhiar a ni ta lo a ni.

Entirnan, thawmhnaw tha tlemte kan neia, hak phal loa, fai taka dah ringawt kha tlemte chunga rinawmna a ni loa, a hak huna mawi taka haka, committee'naahte, eizawnaahte haka, thawmhnaw dang tha nei thei tur khawpa hman tangkai kha tlemte chunga rinawmna a ni.

Chutiang bawkin kan pawisa neihte pawh hi a ni, ui em ema hman miah loha dahthat tlat kha tlemte chunga rinawmna a ni loa, pawisa kan nei a nih chuan sawma pakhat han pe phawt mai ila. Tichuan a bak chu, tangkai thei ang bera hmana pawisa dang neih leh theihna tura hman hi, tlemte chunga rinawmna a ni.

Tin, hetiang ang tho hian thlarau thilpek pawh hi ala nia, kan thlarau thilpek neih chhun chu tangkai taka kan hman hian alo pung thina, thuhril theihna thilpek nei pakhat pawh hi an tia lawm, a thlarau thilpek neih chu a hmang uia thute hi a sawi mai mai duh loa, tichuan thu a sawi that duh loh takah chuan tumahin thlarau thilpek thusawi theihna a nei tih an hre loa, thusawina tur a nei ta reng reng lo maia, sawi an tum ve pawhin amah aia thusawi thiam lo zawk mahse sawi tam zawkte chu miin an ring zo zawk taa, a tawpah phei chuan a thlarau thilpek neih chu a up hlum ringawt ta a ni.

Hawh u, Pathianin min pek eng pawh hi tangtai takin hmang ila, tichuan tlemte chunga rinawm kan lo ni a nga, Pathianin tlemte chunga rinawm chu a pek belhchhah zel duh avangin, Pathian min pek belhchhah zel dawn a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Kan Duhna Aia Pathian Duhna Kan Dah Hmasak Hian, Neih Zawng Zawng Kalsana A Hnungzuitu Kan Lo Ni

"Chutiang bawkin nangni zingah hian tupawh a neih zawng zawng kalsan lo apiang chu ka zirtir a ni thei lo vang."(Luka 14:33)

Neih zawng zawng kalsana Isua zui tih hi, kan sum leh pai, kan hna emaw, kan chhungte emaw kalsan a kawh rualin, mahni in kalsan a kawk chiang hle bawk a ni.

Mahni chak zawng kalsana Isua duh zawng tihte, mahni duh zawng paih thlaa Pathian duh zawng thlante, mahni hming thatna tur thup beta Pathian hnena chawimawina hlan zawkte hi a kawk hle a ni. Hei tak hi, kan tunlai dinhmun (context) a neih zawng zawng kalsana Pathian hnung kan zui theih dan ber chu a ni ti ila kan tisual awm lo e.

A chhanchu, Pathian hian min khawngaih em ema, kan neih loh hi a duh hauh loa, ama hnungzuitute phei chu a ngaihtuah zela. Neih zawng zawng kalsan tum tak zetin Pathian hnungzui tum ta ila, a buaithlak ngawt ang. 

Mahni chenna in kalsan ta ila, Pathianin chenna dang min pe leh tho anga, chu pawh chu kalsan leh ila, chenna dang min pe leh tho ang. Chhungkua kalsan ta ila, chhungkaw dang min pe leh tho ang, hming thatna tur kalsan ta ila hming thatna dang min pe leh tho ang, kan Pathian zawk hian a rawngbawltute hi an mamawh (basic needs) nei lo khawpa an retheih chuan a rawngbawl hna thawh chu thil tih hleih theih loh a ni dawn tih hi a hre daih tawh a ni. 

Hei vang hian Pathian rawngbawl hi retheihna a ni ber loa, hausakna a ni mah mah zawk a, chu tih rual chuan hausak duh avanga a rawngbawl chi erawh a ni lo thunga. Amah, Lalpa hmangaih vanga a rawngbawl tur zawk a ni. Tin, hausak kan duha hlawhtlin kan duh a nih pawhin, Pathian atanga hlawhtlin tum hi, kan tih ngei ngei tur zawk a ni.

Chuti lam chu duh tawk ta ila, kan sawi tum tak chu, neih zawng zawng kalsanin Pathian hi a pawng a taka zui ngawt tum chi a ni loa, keimahni duhna kalsan zela Pathian duhna thihhlawhtlin zel hi neih zawng zawng kan kalsanna tak tak zawk chu a ni thei ang.


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Isua Hnung Zuitu Dik Nih Dan

"Tupawh mahni kraws pua mi zui lo apiang chu ka zirtir a ni thei lo vang."(Luka 14:27)

Mahni kraws put kan tih kan tih hi, kan hrasatna emaw te kan ti a, kan chhungkaw zinga sualin a hliamte hi emaw kan ti a, mahse chungte chu an ni hran loa.

Mahni kraws put tak chu, mahni hi kan ni ti ila kan sawi sual awm lo e.

Mahni kraws put chu mahni kan tih theih chhan chu, mahni sualna leh felna hi mahniin a mawh kan phur vang a ni.

Chutiang a nih lai chuan, harsatna kan hmachhawn dante, lawmna kan dawnsawn dante, midang hruai that kan tum dante leh kan nun dan hrim hrim hian, kan kraws put dan chu a ngawng a ni.

Isuan " mahni kraws pua mi zui lo apiang chu ka zirtir a ni thei lo vang" a tia. A awmzia tak chu, he kan nun danah mawh ka phura, chu ka mawh phurna keimaha ka hlen chhuah zawh loh a hi, min hlen chhuahsak theitu Isua ka zuia, chu ka hlen chhuah zawh loh min hlenchhuahsak theitu ka zuia kawng ka zawh hian, mahni kraws pua amah zuitu chu ka lo ni dawn tihna a ni.

Kraws put laia hi kan sawi kan sawia, a pawimawh laia chu, a Isua zuitu nih laia zawk a hi a ni.

Kan awm angin, kan kraws "kan nun neih ang ang hian", a zirtir ni turin Isua i zui ang u.


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Lalpan I Hlawhtlin A Duha, Mahse I Nuna Sual Hnathawh I Thiah Zel A Ngai A Ni

"Amah tihtute duh chu a hlawhtlintir ang a; An au thawm a hria ang a, anni chu a chhandam ang."(Sam 145:19)

Pathianin kan duh zawngte hi min tihhlawhtlin sak thei a ni. A tak tak ni tur chuan a tha lutuk kan tihte hi kan  Pathian hian min pe duh a ni.

Eden huan kan en chuan, Pathianin mihring a duan danah hian, rethei tur leh tlachham turte leh hreawm tuar turin mihring hi Pathianin min duang loa. Mahse, Pathianin mihring tana a duan tha zawng zawng chu sualin a rawn tichhe taa ni.

Tunah pawh hian, kan hreawm chhante leh kan mangan chhan bulpui ber hi chhui chiang ta ila, sual hnathawh vang alo ni thin.

Hei vang hian, kan duhte leh Pathianin min ruatsak ang ngei a nun tha kan neih theihna turin sual hnathawh hi kan thiah a ngai thin a. Sual hnathawh kan thiat dawn a nih chuan, Pathian tihtu leh a duh anga nun hmangtu kan nih a ngai a ni.

Sual kalsan tum chung leh sual kalsana Pathian tih thlang chunga Pathian kan auh hian, amah tihtu chu kan lo nia, kan Pathian chuan kan authawm a ngaithla anga, a chhandamna chu min pe dawn a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Rinna Kawnga Thanna Tur Pakhat

"Ka mite an vânduai nîin an kulh kawngkaah lût suh; a ni, an vân duai nîin an tuarnate thlîr suh la, an vânduai nîin an sum leh paite chungah in kutte nghat hek suh u."(Obadia 1:13)

Rawngbawltute an chet sual palh emaw, an fate kawng dik lo lama an kal emaw hian, Pathian rawngbawltu vekte leh Pathian neitu vekte hian an chanchin hi hriat chian kan lo chak thina, chu mai bakah sawi nuam kan lo ti thin a. Sawi vak chi chu a ni loa ti chungin, kan sawi kan sawi thin lawi si a ni.

Kan bible phei chuan, Pathian neitute, Pathian mite vanduai lai en pawh en a phal loa, chutih lai chuan tawrh pui erawh a phal thunga, en loh chuan engtin nge kan tawrh pui ang kan ti mai thei. A awmzia tak chu mite puih tum loa, an chanchin chhia ngaihnawm atan ringawta ngaihven hi Pathian duh loh zawng a ni.

Rawngbawltu tam tak kan nih tur ang kan nih theih loh chhan leh kan than theih loh chhan chu, mi chungchangah kan buai lutuk vang a ni thin. Mi chhiatna leh mi mawi lohna sawi thin kan sim atang chiah hian, kan thang tak tak chauh thin a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Lalpan Thinlung Lungchhiate A Hnaih Thin

"LALPA chuan thinlung lungchhiate chu a hnaih thin a, Rilrua inchhir apiangte chu a chhandam thin."(Sam 34:18)

Kan Pathian hian min hnaih renga, min hnaih zual lai a neih chuan a rinawm loha, mahse pa in fa a ngaihtuah zual lai chu, a tah hunte a lungngaih hunte a ni thin ang hian, kan lungngaih lai leh kan tah laite leh kan lung a chhiatlaite hian kan Pathian hian min hnem turin min hnaih thin a ni.

I lungchhiat chhan leh i lungngaih chhan chu, lunsun vang emaw, natna vang emaw, tlakchham vang emaw, tihsual inchhir vang emaw a ni thei e.

Eng vang pawha lungchhia leh lungngai i nih chuan, Lalpan a ngaihtuah che a, a hnaih che tih hi hria la, Lalpa lam en la, Lalpan a ngaihtuah che avangin Lalpaah chawl ang che.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Hlau Suh, A Kohna Chhangtute Humhim A Thulh Ngai Lo

"Chutichuan tûnah mi nupui kha pe kîr leh rawh; ani chu zâwlnei a ni si a, a tawngtaisak ang chia, tin i dam dâwn nia: i pêk kîr loh zawngin i thi ngei dâwn tih hre rawh, nang leh i neih zawng zawngte nên," a ti a."(Genesis 20:7)  

Abrahama kha Abrama a nih laiin a pa Tera leh a uanute nen Ur atang, Haran ah an pem a. Haran atang chuan, Abrahama chu ram ala pek tur Kanaan rama kal turin Pathianin malsawmna tam tak tiam chungin a koh chhuak a nih kha.

Pathian koh nih inhriat kha Abrahama tan khan a nuam ngawt ang, malsawmna Pathianin a tiam chungchang hriatte kha a lawm awm lehzual ang. Mahse, Kanaan ram chu an va thleng ta chenga hnam lian pui pui an lo awma eng tin tin emaw puan inte chu an han kaih ve a, an dinhmun a tha chho dawn choh emaw tiha, Lota nen ram an insema a chanchhe zawkah a tanga, an awmnaah eitur avan avangin Gerar khuaah an va luta.

Gerar mite chu a hlauh avangin a nupui chu ka nupui pawh a ti ngam loa ka farnu a tia, Gerar lal Abimeleka chuan Sari chu Abrahama'n ka farnu a tih avangin nupui atan neih a tuma, mahse Pathianin Abimeleka hnenah Abrahma chu a nupui pe kir leh turin a ti a nih kha.

Hei hi kan sawi duh chu a ni, Pathianin min koha, min kohna zawna kan kal a nih ngat chuan malsawmna tamtak kan chang dawn tih kan hriaa, a lawmawm ngawih ngawih thin, mahse kan han kal tak taka, kan rin ai alo bumboha Pathian lahin min malsawm tak zet a duh avangin min zirtir a thlang thin bawk si nen, thil hlauhawm tak tak min hmachhawn tir a phala, min han hrual tak taka fiahna min han hmachawn tir tak tak hnuah phei chuan kan thilneih hlu berte pawh kan hum ngam lo hial thin.

Chutia beih ngaihna hre lo leh kan thil neih pawh humhim ngam lo kan nihna zawnah chiah chuan, Lalpan a rinawm zia a titlang duh thina, kan thilneihte chu kan chan alo phal aw zawng loa, kan thilneih min laksak duhtute hnenah chuan han laksak veihte ka mi a nih hi, tiin kan thlangvang min lo hauh sak thung thin a ni.

Kan Pathian hian a rinawm zia a puan duhna hmun leh hun chu, keimahniin kan phak loh chinah chiah hian alo ni thin. Ni e, a kohna chhanga, a hnungzui tura penchhuakte tan hian, kan Pathian hian a rinawm zia hi a ti lang fo thin a ni.

Midang anga ropui leh sangin Pathian kohna hi chhang vein kan inhre lo a ni maithei, mahse Pathian kohna hi kan nunah eng ti kawng zawng pawhin kan chhang a nih chuan, i hlau lo ang u, a kohna chhangtute humhim a thulh ngai si loa.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.





Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Kan Bawlhhlawh Leh Kan Harsat Lai Tak Hian, Isuan Min Khawih Duh A Ni

"Tin, a hnenah phar a lo kal a, "I duh chuan mi tithianghlim thei e," tiin a hmaah thingthiin a ngen chiam a. Tin, ani chuan a lo khawngaih em em a, a han ban a, a dek a, "Ka duh e, lo thianghlim tawh ang che," a ti a."(Marka 1:40-41)

Pharin Isua hnena a damna tur dila a thingthi a, a bawlhhlawh lai ngeia a kawiha a tih thianghlim ang hian.

Isua hnenah, kan Pathian hnenah hian thingthi leh inngaitlawm takin i duh chuan Lalpa sualna khur ata hi, min chhanchhuak theia, min ti thianghlim thei tia kan ngen hian.

Kan Pathian tha em em chuan, kan thianghlim hma, kan la bawlhhlawh lai ngei hian min khawihin, ka duh e lo thianghlim tawh rawh tiin, hmangaihnaa min kuangkuahin kan sualna ata min chanchhuak duh a ni.

Tin, harsatna khur thukah natna vei ang maiin kan awm a ni thei e, thingthia inngaitlawma Isua puihna kan dilh anih chuan, Isuan kan nat lai ngei leh kan harsat lai ngei hian min khawih duha, ka duh e harsatna ata hi lo chhuak tawh rawh lo dam tawh rawh min ti duh a ni.

Isuan phar pa kha a tih thianghlim zawh chiah khan, Isuan tih tur a hrilh thunga, Mosia dana inthian turin a hrilh ang khan. 

Keini pawh hi sual ngaihdamna leh damna kan chan zawh ve leh hian tih tur min hrilh a, chu chu ringtute leh amah hnung zuituten an tih thin ang leh an tih mek angin, inkhawm turte, tawngtai turte, bible chhiar turte, thawhlawm thawh turte in min tia, chutianga a thu zawma inthianfai turin min hrilh a ni.

Chu chu rinna a taka lan tirna pawh a ni thei bawk a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.





Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Engkima Thlamuanna Neih I Duh Chuan Lalpa Engkimah Hria Ang Che

"I kawng zawng zawngah amah hre reng la, I kawngte chu a kawhhmuh zel ang che."(Thufingte 3:6)    

Thlamuana chungchang mahnia ka chhui ka chhui hian, ka ngaihtuah thin chu Petera thi tur chanchin kha a ni. 

Petera kha a let ling zawnga krossa khenbeha tih hlum a nia, a bul lawkah a nupui pawh tih hlum mek a ni bawk tiin mi thenkhat chuan an sawi nghe nghea, dik ni maw. A dik lo a nih pawhin, Petera a thih dawn khan a thla a muang ngang maia, a bul vela Isua ring ve tute kha a thlamuan zawk hial a ni, tia an sawi hi a dik ngei a rinawm a ni.

Kha Petera kha, sangha mantu a nia, Isuan a hnungzui turin a koha, Isua hnung a zui hnuah leh Isuan ama hnungzuitute tan Thlarau Thianghlim a tirh hnuah, Thlarau Thianghlim chenchilhna changtu a nia. Chuta tang chuan, thlamuanna reh thei lo, chu alo chang ta a ni.

Petera thlamuanna neih em em a hi, a mak a ni, thi tur, rapthlak lutuk leh na lutuka thi mek in, ala dam zawkte leh na tuar lo zawkte tawng thlamuan thei khawpin thlamuanna a nei hi amak a ni. Mahse, chu a tlamuanna neih chu ngaihtuah ngaihtuah hian, ka chan phakah leh i chan phakah alo awm renga, Petera thlamuantu ngei Isua Krista chuan thlamuanna chu min pe duh renga, min pe reng bawka, chu thlamuanna kan neih theihna tur chu Krista atanga lak mai a ni.

Engtin nge chu thlamuanna chu ka lak ang i ti em, chu thlamuanna chu kan lak theih dan tur chu, kan nun zawng zawngah chu thlamuanna neitu Isua Krista hriat a ni.

Engtin nge ka nun zawng zawngah Isua Krista chu ka hriat ang kan la ti em, Isua Krista kan nun zawng zawnga kan hriat theihna tur chu, eng pawh ti dawn ila tawngtaiin Isua Krista hnena min kaihhruai tura inkawl tir thin a, a thu zawm a ni.

Tunah ngei pawh khan, i lungngai a nih chuan, Lalpa ka lungngaia i thlamuanna ka chan theihna turin, i thu zawm turin min pui ang che, kan ti thei a ni. Pathian hnena i inkawl tira, a thu i zawm chiah khan thlamuanna chu i ta alo ni dawn a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.





Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Nun Tha Zawk Neih Kan Duh Chuan, Thatna Zawng Ang u

"In nun theih nân that lohna zawng lovin, thatna zawng ula: tin in sawi angin, Lalpa sipai hote Pathian chu in hnênah a awm ang."(Amosa 5:14)

Nun tha zawk kan neih theih nan thatna hi zawn tak zet zet a ngaia, thatna kan zawng a nih pawhin Lalpaah leh Lalpa atanga kan zawn a ngai a ni. Khawvel tak pawh hian thatna chu a zawn theiha a sawtna chin pawh a awm ve tho a nga, mahse Lalpa atanga thatna zawn tluka hlawk hi a awm lo, khawvel atanga thatna zawn chu a tha tluantling thin loa, Lalpa atanga thatna zawn erawh chu, a bul atanga a tawp thlengin a sawt reng a ni.

Engtin nge thatna chu kan zawn ang?

1) Mahni ngaihtuahna kan siam tha phawt ang, Pathian duh zawng chauh ngaihtuah kan tum a nga, chutiang tur chuan Pathian thu kan ngaihthlak tama, kan chhiar tam a kan lak luh tam hrim hrim a ngaia. Thiltha lo kan rilrua a luh loh nan, thiltha lo kan en lo a nga, kan ngaithla lo bawk tur a ni.

2) Kan mut hun leh thawh hun kan siam tha anga, darkar 7 tal a loh bera mut hi a pawimawh a ni. Kan Lalpa Isua Krista ngei pawh khan, mihring hi kan mutthlem chuan kan nih tur ang kan ni phak lo thin tih kha a hre chiang em em a, a ni pawh mut hun tha a neih chuan a mu thin a ni.

Rawngbawlna vangin ka mu hma hman lo kan ti thina, mahse rawngbawlna kan chhuan lamte hi, zan dar 10 a thlen pawhin, kum khatah vawi 5 vel bak a nih a rinawm loha, kum khatah zan 365 a awma, chung zinga zan 5 vel chauh emaw, chu aia a tam pawhin zan 50 a tlin a rinawm loha, zan 50 pawh lo chuang se mut hma tum tan chuan a mut hma theih tih hi a chiang a ni.

Tin, mut hma loh chuan a thawh hma theih loh tih hi kan hre vek awm e, mut hmaa thawh hma hian kan nun eng emaw chen chu siam that a ni nghal tihna a ni.

3) That chhuahna tur zawn tur a ni, that kan chhuah kan chhuah hian, mi pawh kan chungah an tha ngei ngei thina, that kan chhuah ngai lo a nih chuan kan chunga that chhuahtute pawh an vang ang. That chhuahna tha ber chu, thatnaa min chhang let ve thei lo turte hnenah a ni bawka, chu chu Pathian lawm zawng tak a ni.

Thatnaa min chhan let theih loh avang hian Pathian hnenah an chunga that chhuahtute avangin lawmthu an sawi thina, chu tak chuan Pathian a khawih che thin a ni.

Mahnia that chhuah ngaihna kan hre lo a nih chuan, KTP, SAY, PYD, YMA, Ministry etc kaltlangin that chhuah dan tur kan zawng phawt a nga, chuta tang chuan keimahni pawhin that chhuah dan tur kan hre chho mai dawn a ni.

Tin, that chhuah hi mahni nun tih lenna (personality & self identity enlargement) a nia, ngaihtah hauh loh tur a ni. Tinge khawvel mi hlawhtlingten midang an puih an puih kan tih chuan, an personality an ti lian duh a ni.

Lalpaa innghatin heng pathumah hian thatna zawng ila, kan nun hian hma ava sawn dawn em.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.





Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

I Ding Chhuak Thei, Tha Taka I Thiltih Lai I Tih Chuan

"Kan hrilh ang ngei che u khan phili ruai lovin mahni hna theuh nei tlatin mahni kut ngei hmangin hna thawk rawh u; tichuan miten an ngaisang ang che u a, engmah tlakchham in nei lo ang."(I Thessalonika 4:11-12)

Phili ruai hi ava awl tak em, hemi hi chumite chuan an tia an ti fuh tia, midang tih ang apiang tih ve tum maite hi a awl a ni.

Kan Pathian thu chuan phili ruai loin mahni hna neih sa tha taka thawk turin min tia. Hei hi kan hlawhtlinna tur tak tak chu a ni, ti ila kan sawi sual awm lo e.

Mi thenkhat chuan kan eizawnna a chhe emai thlak loh chuan a ngaihna a awm lo ang kan ti maithei, dik pawh a dik thei e, mahse eizawnna tha zawka kan kai dawn pawh hian mahni eizawnna neih laia tha pangngai tak nih loh chuan thildanga pakai hi a fuh hleithei chuang loa, a harsa zual duh zawk fo a ni.

Chutiang bawk chuan rawngbawlna hna pawh hi a ni, kan thawh lai thawk zo loa rawngbawlna danga pakai zut zut hi rawngbawltu mumal lo nihna pakhat a ni.

Chutiang bawkin chhungkaw enkawl kawngah pawh a ni tho, chhungkuaa kan kal phung pangngai tha taka kan hlen chhuah tlan theihna atana theihtawp kan chhuaha, kan hlenchhuah loh chuan chhungkaw kalphung pangngai nei lo leh mumal lo kan ni mai thin.

Kawppui zawnnaah pawh ala ni leh zela, kan ngawihzawng nei mek emaw, kan star mekte nen emaw kan inzawm dawn emaw kan hrang dawn emaw a nih pawhin kan nih tur ang ang kan nih tak tak hmaa midanga pakai zut zut hi, mi ler nihna leh mi entleu hlawhna leh mahni in tih hniamna mai a ni thin.

Mahni hna thawh lai mek tha taka thawha, mahni hna leh thiltih laia a tha ber nih hi ni dinchhuahna leh mi ngaihsan hlawhna zawk a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.






Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A