Pathianah Chauh Beiseina Nghat Ang Che

"A lama rilru dik tak pûtute chunga a chakzia tilang tûrin khawvel zawng zawngah LALPA mit chu a leng ruai ruai thin a ni."(II Chronicles 16:9)

Kan beiseina hi khawiah nge kan nghah le.

Kan fateah kan nghat em, kan unauteahte, kan thianthaahte, sawrkarahte, kan nghat em.

Pathiana beiseina nghatte hian anla tisual chhin ngai lo asin.

Mihring leh thildang, Pathian ni loa, beiseina nghatte hian an tisual tlangpui thin.

Pathian a beiseina nghah a harna lai chu mita hmuhtheih loh a nihna hi a nia, mihring leh thildanga beiseina nghah a awl chhan pawh hmuhtheih an nih vang a ni bawk.

Mahse, hmutheih loh Pathian hi engkim tithei zawk chu a ni bawk si. Amah beisei a nghaktute ti thlawn duh reng reng lo, van Lal thuthlenga thu a ni chiang bawk a ni.

Juda lal pangana lal Asa kha Pathian tih em em in bul atana, a lal lai khan indona vawi hnih a hmachhawn a, pakhatnaah chuan Ethiopia hoin sipai maktaduai nen an bei a, hemi tumah hian Pathian a au a, a tawngtaina thu pawh "LALPA chauh lo chu mi chak tak laka chak lo tanpuitu an awm lo va."(II Chronicles 14:11a) tih thu kha a ni. Tichuan hnehsawh takin sipai an mahni let fea tam nei Ethiopia mite chu Lalpan a hneh sak a ni.

Tichuan, hun a kal zel a Israel lal Baasa in a rawn run leh a, Israel ten an run thum hian lal Asa chuan a hlau ta tlat mai a, Suria lal Benhadada puihna ava ngen a, Jerusalem temple a rohlu leh lal in a rohlu zawng zawng ava pe nghe nghe a ni. Pathianin a khawngaiha hemi tum hian Baasa Israel lal chuan a run chu a thulh leh hlauh a, mahse lal Asa Juda lal hi Lalpa hmaah leh amite hmaah a mualpho ta a ni. Asa pa Abija Juda lal hmasa pawhin Israelte chu chiang takin alo hneh tawh a, tinge Asa hian Israel hi a hlauh tlat mai le.

Hei hi a chhan a ni thei a ngem? Asa kha a nuamsa tawh a, Pathian ni loin a rohluah leh a hausaknaah zawk alo innghat tawh a nih a rinawm, chu mai bakah mihring finna ama finnaah pawh nasa takin a innghat tih a hriat mai awm e. Buaina a tawk chiaha, a rohlu neihte a hma chhuan a, ama rilru hmangin puitu tur rang thei ang berin a zawng ta a nih kha.

Keini pawh hian buaina kan tawhin, Lalpa au hmasain amahah kan in tichak phawt thin nge, leia kan thilneihte leh neih lohte lam kan en a chungte chu fing kan intihna rilruin hman kan tum zawk thin. Chutianga kan lo ti thin a nih chuan, insiam tha ila, Lalpa i dah hmasa ang u, Lalpaah chauh kan beiseina kan nghah hian, a hmanrua lo ngah ziate, mi a lo ngah ziate hi a lang leh thin.

Kan nuna indona leh buaina kan hmachhawn dawn apiang hian, indona Lal kan Pathian hmaah hian, thingthiin "Nang chauh hi, ka beiseina leh min chhanchhuak theitu chu i ni" ti thin ang u. 

"Hnehna chu Lalpa ta a ni si a."

Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=TLmZ0Rl_AAA

Pathianin Hun A Ruatah Beidawn Hun A Dah Lo

"Thil tha tih i ning suh ang u; kan inthlahdah loh zawngin a hun takah chuan kan seng dawn si a."(Galatia 6:9)  

Thuhriltu bung 3 ah khan engkim tan hun ruat kan hmua, pian hunte, thih hunte, phun hun leh pawi hunte pawh etc. Mahse kha thuah khan, "beidawn hun" hi zuk awm ve miah lo a, ni e kan Pathian hian beidawn hun hi a siam ve lo a niang a tiro.

Kan Pathian rorel dan mak leh deuh mai chu, a fapa Isua a rawn thirh dan hi a ni a, khawvel ngamtu tur leh thlak dang lama chhandamtu tur, a fapa rawn tirh kha a chatuan remruatna a ni a. Chutiang mi a rawn tirh dawn chuan, mi lian pui chak em em tlang pawh chawisawn thei tur khawpa chak rawn tirh awm a nia, mahse chutiang chu rawn tir loin, mihring pangngai ang taksa pu, a bul tanna pawh nausen hmeichhe chawi seilen ngai kha a rawn tir tlat mai a. Chutiang chu a remruat a nih pawhin, mihring pangngai rau rauah khan thiltithei deuh chhungkuaa rawn pian tir kha  a awm ania, chu pawh ala ni lo, chhungkaw pangngaiah hausa lo, lei thila ropui hran lo chhungkuah khan a rawn pian tir a.

Mihring ang bawka chak bikna nei lem lo ang chuan kan Lalpa Isua Krista pawh khan a khawvel hun kha a hmang zoa, mihring thah theih ni tur khan a chak lo bawk ti ila kan sawi sual thui awm loa. Mahse, a chak alawm, tihtheih loh a ti alawm, chatuan remruat anga a kal vangin, khenbeh theih alawm pawh a tih theih tho a nga.

Kan kawh chhuah duh lai tak chu, Isua kha mihring ve tho a ni, a chang chuan a chau a, a tuiin te a hal a, a rilte a tam bawk thin a nih kha. Chung zawng zawngah leh a khawvel zin kawngah khan, do rawn leh hnawl, lu nghahna hmun pawh nei lo hial ni mahse, kan Lalpa Isua Krista kha a "Beidawng ngai lo thung" a ni.

Tichuan, kan Lalpa Isua khan zirtir 12 a nei a, pakhatin a phatsan zui a, 11 te khan bul an tana, an tlem teh lul nen khawvel kha an thlak danglam a nih kha. A chhanchu an zirtir tupa thu an awi a, an beidawng duh lo a, an beih zel vang a ni.

Pathian rinchhana beidawn duh hauh loh hi, Pathian thuawina ropui tak leh lian tak a ni.

Han pakai daih ila, khawvel rawngbawltu ropui a kan chhalte pawh hian, fa sual an lo nei ve nasa khawp mai a, Bishop TD Jakes a fanu phei chu kum 13 a nihin a rai nghe nghe a, Billy Graham te leh Benny Hinn te pawh hian fa awm tha duh lo an nei ve thin, mahse an fate Pathian hnena hruai kawngah an beidawng duh loa, chung an fa sualte chu tunah chuan rawngbawltu tha ber ber an ni leh tawh a.

Kristian mihlawhtling te zingah pawh, Thomas Alva Edison te, Henry Ford te, Colonel Sanders te etc. An van hlawhchham zing tak em, mi thenkhat damchhung hlawhchham zat leh anni kum khat hlawhchham zat hi a intluk hial maithei a ni. Mi bik an ni lo, mahse an hlawhtling, an hlawhtlin chhan chu an beidawng duh loa, beidawn loh chu Pathian thu awina alo ni si nen, kan Pathian chuan a thu zawmtute chu alo malsawm duh bawk thin nen, an hlawhtling ta a ni.

Pathian kan neih avangin beidawng lo ang u. Beidawn lohna hi a thu awina a ni sia.

Ruihhlo ngai sim hleithei lo pawh kan ni thei beidawng lo ang, thawh leh ngaihna awm tawh lo tur khawpa eizawnnaa tla chhia pawh kan ni thei beidawng lo ang, fa sual nei pawh kan ni thei beidawng lo ang. 

Lalpa en chunga, beiseina nei leh tur a kan han insiam that leh hian, kan Pathian pawh hi kan chungah alawm a ni tih hi i hria ang u.

Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=TLmZ0Rl_AAA

Pathianin A Kalsan Lo Che, Ala Awmpui Che

"Tin, ngai teh u, kei kumkhuain, khawvel tawp thleng pawhin, inhnenah ka awm zel ang," a ti a."(Matthaia 28:20)

Kan nun an buai tak tak hi chuan Lalpa khawiah nge i awm le? Kan ti rum rum thin a nih hi tiraw.

A chang phei chuan, kan sual tih thin sim kan duh em em kha, tum lawk miah loh in kan han ti leh hlauh thin a. Pathian hian min kalsan tawh ang a, min ngaidam duh tawh lo a nga, te kan ti thin.

Tunlaiah phei chuan, Covid-19 avang hian kan khawvel hi Lalpan min kalsan ta emawni chu le! tih rum rum a awl maithei a ni.

Mahse, kan Pathian hian engang dinhmunah pawh ding ila, min la awmpui a ni.

Nazi hun lai khan, Correi Ten Boom'i te unau chu thi leh dam kar a awm turin, Nazi te concentration camp ah chuan, an tang hlauh mai a. Mahse, Corrie Ten Boom leh Betsie Ten Boom'i te chuan, ti hian Pathian hmangaihna thuk zia chu an puang chhuak a "Hremhmun khur thuk ber ai pawh hian, Pathian hmangaihna chu ala thuk zawk a ni, a tha ber chu ala theng dawn" tiin.

Khawvawt hnuaiah rikrapna nen nasa taka Nazi ten hnathawka an chhawr luih hnuah, chau chung chungin zana an riahna hmunah chuan an riahna hmuna riak ve te chu hoin, tawngtaina leh Pathian biakna hun an unauin an la buatsaih cheu thin a ni.

Hlau ngawih ngawih a awm hi a chauh thlak a ni, mihring hi hlau thawng a kan awm reng a nih chuan, kan taksa rihna pawh hi a thla hniam hial thei thin. Corrie'i te unau rikraptute hi mi mai mai an ni lo leh nghala, khawvel chanchin chhut pawh a, mi nunrawng Nazi hote an ni a. Kan tunlai khawvel pawh hian, Nazi ho chetdan chu a rapthlak a ti ngang ni tur a ni, Nazi zinga tel tawh phawt chu khawi ramah pawh awm se, eng emaw taka ngaihdamna an hmu lo a nih chuan, an tar viau tawh emaw an dam lo emaw pawh nise thah tur a an chungthu rel sa an ni nghal a ni.

Chutiang ang khawpa mi rawva te manna hnuiah mangang takin awm mahsela, chanchin tha an puanna tur chu, Nazi te meuh pawh chuan an dang chat zo chuang lo a ni. An unaua hlau chung leh chau tak chunga chanchin tha an puan hram hram avang khan, vanramah ka haw ve ta ti te pawh an awm a rinawm a ni.

Betsie Ten Boom'i chu a dam chhuak zo ta loa, mahse vanneih thlak takin Corrie Ten Boom'i chu a dam chhuak a, pastor ropui tak Billy Grahama te pawh khan an ngaisang ngang mai, Corrie Ten Boom'i hmu turin ava zin cheilh vang vang thin nghe nghe a. 

Ni e, Pathian chakna ringa hun harsa pal chhuaktute hi, an ngaihsan awm thin reng a ni.

Kan mizo pui zinga rawngbawltu pakhat pawhin ti hian a ti a, kal ngaihna ka hriat loh chang hian, Corrie Ten Boomi te unau chanchinte hi ka ngaihtuaha, kei chu indona hmunah ka awm hleinem, Nazi campah ka tang ve hleinem ka tih loh leh, tih theih dang nei lo mah ila, ka la tawngtai thei alawm, ka la inkhawm thei alawm, eitur kala nei alawm, mi tu emaw kala fuih phur thei alawm, tiin keimah leh keimah Lalpaah in tihchak ka tum thin a. Chutianga, Lalpaa intih chak ka tum apaing chuan, Lalpan min rawn chelh let thin a, ka tih chu beitham mahsela kal dan tur hriattirin ka awm leh thin a ti.

Kan khawvel dinhmun covid-19 vanga a danglam takah hian, mi thenkhat chu kan buai a ni, eizawnna a buaia, chhungkua awm ho hleithei lote kan awm a, kan buai hun chhung hi, a reia a thui tawh viau kan ti a ni maithei. Mahse, hei hi in hrilh ve ang u "Pathian hmangaihna a thuk zawk a, a thui zawk bawk tih hi."

Tin, kan Mizoram hian rambuai kan tawk tawh a, chu rambuai chu keini aia mawl zawk leh chak lo zawk kan nu leh pate khan an tuar chhuak tih hi, hria ila. An mahni hruaichhuaktu leh ni tha zawk hmuh tir lehtu chu Lalpa ani tih hi hre bawk ang u. Chu Pathian hnam tlemte Mizo hnam ngaihsak thintu chu ala pangngai reng a, a hnam ang leh a mimal ang pawh hian, a hming lamtute tan a rinawm a ni, tih hi i hre nawn fo ang u.

Lalpan min la awmpuia, ni tha zawk min la hmuh tir leh dawn a ni.

Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=TLmZ0Rl_AAA

Ala Bang Leh A Keh Them Chauh Pawh Kha Dam Chhuah Nan A Tawk Ang

"Mi dang chu, a then thingphek chungahte, a then lawng bungraw dang chungahte kai turin thu a pe a. Chutiang chuan an zain khawmualah him takin an kai ta vek a."(Tirhkohte 27:44)

Vawikhat chu, tirhkoh Paula te chuanna lawng kha, nasa takin a chhia a, inchhan himna lawng te an pai zawng zawng pawh a che zo vek tawh a. Mahse, chu lawnga chuangte chuan lawng keh them leh bungraw lang theite bawhin vau kam lam an hleuh a, chu lawnga chuangte chu pakhatmah an thi lo a ni.

Kan nun pawh hi en ta ila, kan inven vena te, kan chhungkuaa kan innghah vena te, kan eizawnnaa kan in ven vena te a chhe zo vek maithei a, chu bakah mihringa kan innghahna kan kawpui emaw, kan ngaihzawng emaw, kan fate leh kan thian thate, kan chan ani thei. Chutiang taka kan chan tawh a nih pawhin, Paula anga Lalpa lam kan en a nih chuan, kan neih bang leh a keh themte chu, kan inchhanhimna tur leh kan dinchhuahna atan a tawk der ang, tih hi a rinawm a ni.

Eng pawh nisela kan awmna hmun leh kan dinhmun atang hian Lalpa i au ang u.

Paula te chuan, vaukam an thlenga, chuta tang chuan lawngin Rom lam an pan leh a, chutia Rom a thlen hnu chuan nasa takin chanchin tha a puang ta a. Pathian in alo tiam ang chiahin Kaisara hnenah meuh Pathian chanchin tha chu ava puang ta a ni.

Hei hi ka sawi duh tak chu a ni, kan zin kawngah hian Lalpan kan kehsawm a phal, mahse zinkawng chhunzawm thei lo khawpa kan ral raih a phal bik lo, kehsawmna leh kan innghahna chan vekna piah chiahah chuan min dah a tumna hmuna min dah turin engkim min lo remfel sak thin alo ni. 

Lalpa vuan chungin i kal leh hret ang u.

Van Lal thutthlenga thu kan Pathian khian, ro a rel sual ngai si lo a.

Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Kan Lungawina Ai Hian Lalpa Lungawina Hi, I Dah Pawimawh Ang u

"A lawmna chu LALPA danah a ni zawk a; A dan thu chu achhun azanin a ngaihtuah thin."(Sam 1:2)  

Zep lohah chuan, "kan nuna harsatna kan tawh chhan tam tak hi chu, kan lungawina kan zawn lutuk vang a ni," ti ila kan sawi sual lo ang.

Hremhmuna tla ta te hi, eng vanga tla nge an nih tih hi chhui chiang ta ila, an lungawina an dah pawimawh ber vang a nih a rinawm bawk.

Pathian chhandamna leh khawngaihna vangin alawm vanram chu kan kai dawn kan ti thin a, a dik chiah renga. Chu chuan vanram kaina tur chu a daih zo vek bawk. Mahse chhandamna changte hian kan dam chhung zawng hian, keimahni lungawina chauh zawn ngar ngar kan tum a nih chuan, chhandamna suak bak kan la chang lo tihna a ni ang.

Chhandamna chang zirtir 11 te leh tirhkohte leh, kan mihuai kal hmasate khan tu lungawina nge an zawn, an mahni lungawina nge, Pathian lungawina tih hi han in zawt ta ila, Pathian lungawina kan ti vek ang.

Pathian lungawina zawng ngai lo mi chu, chhandamna ala chang ngai lo ti ila kan sawi sual ka ring lo.

Hawh u, vanah hmun kan chhan theihna turin leh nun tha zawk kan neih theihna turin Lalpa lungawina hi dah hmasa ila, Lalpa kan Pathian lungawina tur hi i zawng ang u.


Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Lalpa I Chelh Tlat Chuan, I Natna Zawk Khan Mi Bikah A Siam Ang Che

"Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria."(Rom 8:28)

Tumkhat chu flim pakhat, kawngpui hmun khat leh in compound pakhat chauh a an chan zawh vek Fences tih chu ka en alawm mawle!

A chang tupa chu Denzel Washington, chhungkaw rethei atanga seilian leh lehkha thiam lo bawk si, pa tel loa sei lian bawk chu a nia, mahse Denzela chuan chung zawng zawngah chuan Pathian a vuan tlata, Pastor nih chu Pathian kohna a ngai thin mi a nia, mahse flim a thu tha a sawite chuan a thlen zau theih zawk a rin avangin, flim chan chu a thlang ta zawk a ni. A flim chanin Pathian ram a khawih tel zel dawn tihna pawh a ni thei hial awm e.

A chang tunu Viola Davis phei chu mi rethei ber chhungkua atanga seilian a ni a, an naupan laiin ei tur nei loa an riltam thin avangin an unauin eitur zawngin mi blawhlawh bawmte an hai hial thin a, a seilen hnuah pawh an khaw awmnain a zir loh em avangin, hun rei tak chu engmah a ni loa, a beidawng viau hman a nih a rinawm, beiseina (dream-hope) ka la nei a ni tih chu keimah leh keimah ka inhrilh theih nan, kan khua atang hmun hla takah bus in acting class ka kal thin a ti. 

Kha flim channa hmun kha a zim teh lul nen engtin nge a hmuhnawm theih, engtin nge khawvel flim lar pakhat a nih mai bakah engtin nge Academy Award (Oscar award) te a dawn theih, chu mai pawh chu ni loin engtin nge hlawkna a hmuh theih, ka ti hial a. He flim hlawkna hmuhchhuah dan lah hi, a chiang em em a, an senso bin thawk aia tam ala hmu chhuak lehnghal a.

He flim hlawhtlinna chhanchu a changtute vang a ni, tih a chiang reng a ni. Ni e, a changtute chu harsatna hrethiam Denzel Washington leh Viola Davis te an ni tlat alawm. A changtute khan an chang tak em a ni, flim khawvelah hian a tak ang hi an dahsang thin reng a, chutih rual chuan flim nun tak tak ang Real an tihte tluk turin thawnthu tha a nei leh chuang loa, chu mai pawh ni loin 3D khawvel a, hlui atan he flim graphics hi, a ho hle bawk a ni.

Chutiang ang taka flim channa hmun leh thawnthu leh graphics ho pawh chu ni mahsela, mibik pahnih channa a nih avangin a hlawhtling ta tho tho a ni.

Engin nge Denzel Washington leh Viola Davis te hi mibik a siamtu chu, Lalpa a ni, mahse Lalpan mibika a siamna process (kawng) chu harsatna a ni! "Lalpa an chelh tlat avangin, an natna chuan mibikah a siam" a ni. Denzel a naupang rethei mihang ni bawk si kha, lehkha a thiam loh em avanga an zirtirtuten college an chawlh tir nite khan, a rilru a na ve ang, nga tinge Lalpa a awm zia ka hre lo, pawh a ti ve ang, mahse chung zawng zawngah chuan Lalpa a vuan tlat tho tho a, "Lalpa a vawn avang chuan, beiseina ala nei ngam a, chu a beiseina chu Lalpan a tihhlawhtlin saka, mibikah a siam ta a ni."

Viola Davis mihang leh rethei em em, riltam nat zia leh khaw pilril a awm nat zia hria tawh khan, hnawl nat zia a hmelhriat ala ngai cheu a, eng ang pawhin thawk rimin lemchan chu thiam mahse, mihang hmeichhia a nih avanga flim chang tura hnawl a nih thin laite chuan, rilru na takin Lalpa ava mak ve, mihang tan dinhmun tha i khar a nih chuan, tinge mihangah min siam si, te pawh a ti ve maithei. Mahse, chung zawng zawng pawh chu a chungah thleng mahsesela, "Lalpa a vawn chu a tlah duh chuang loa, a hun takah Lalpan a lemchan thiam zia chu a phawrh chhuak ta a, mibikah a siam ta a ni."

Bible ah pawh hetiang thawnthu hi chu kan hmua, Josepha thawnthute, Davida thawnthute, Paula thawnthuahte, Daniela thawnthuahte kan hmu a ni.

I thinlung leh i taksate leh inchhungkua kha eng angin nge in nat ka hre lo, mahse hei hi ka hria, i nat ber lai leh a ngaihna i hriat tawh loh laite khan, Lalpa i vuan nghet sauh sauh a nih chuan, mibikte zingah Lalpan ala tel tir ve ngei ang che.

Lalpan i harsatna zawk kha, i tan ala thawh tir zawk ang.

Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Kristaah Zawk Kan Beiseina I Nghat Ang U

                                 

"Ngai teh, LALPA mit chu amah tihtute chungah chuan a fu reng thin a, A ngilneihna beiseitute chungah chuan."(Sam 33:18)

Kan rilru a nat thin chhan ber pakhat chu, mihringah kan beiseina kan nghah thin vang hi a ni, ti ila kan sawi sual tam lo ang.

Nu leh paten an faah, unau a upa lamin naute ah, chutiang ang tho chuan faten nu leh paah, unau zinga a naupang lamain uteah, kan beiseina kan nghat thin a. Chu mai bakah kan thawhpuiahte, kan thian thaahte, rawngbawltuahte kan beiseina kan nghat fo thin a ni.

Ni e, mihringah pawh hian beiseina eng emaw chen chu kan nghah a ngai ve ang, mahse kan beiseina innghahna bulpui ber chu Isua ni rawh se. Chutiang a nih chuan, mihringa kan beiseina a hlawhchham pawhin kan beiseina tithlawm ngai lotu tur Isua kan la nei tihna a ni dawn a.

Entirnan nu leh pa in kan fate chu, kum 30 vel emaw, kum eng emaw zat an nihin emaw an puitlin tawh lo beisei ta ila, mahse lo puitling lo ta sela, Kristaa kan beiseina kan nghat a nih chuan "E, Lalpan min hruai mai ang, chawngzawng pawh a ngaihtuah hmaih ngai lo alawm mawle" kan ti thei ang.

Chutiang bawk chuan, kan thawhpuiten an chan lam ti tha ngai lo pawh nisela,"E, Lalpan min awmpui a ka la kep thei alawm mawle" kan ti thei ang.

Tin, mihring ni kher lo khawvel inher danah eng emaw hamthatna kan beisei ve kha, hunin a rawn her chhuah pui kan rin rauh rauh chu, rawn inherchhuah pui lo pawh ni sela, Kristaa kan beiseina kan nghat a nih chuan "van Lal thuthlenga thu khi, min hmangaihtu alawm mawle, fel vek lo mahsela, a tawktein anin min ngaihtuah ang" kan tih theih a rinawm a ni.

Kristaa kan beiseina kan nghah tlat chuan, khawvel chhiatna leh manganna te hian, a daih loh chhin ala thleng a nga, van malsawmna chu kan la tawngbaw ngei ang, tih hi ring ang u.


Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Eng Ang Pawhin Tisual Tawh Mahla, Isua hnenah Kir Leh Rawh, Ala Pawm Duh Che, A Sawm Reng Che

I tihsual tawhna in a tina che em? Enge i tih sual chu?

I sum lak luhna a dik lo em? Mipathmeichitana lamah ami i tih sual? Mi tam tak i bum a mi? Ruihhloah i buai ami?

Isua lam i pan a nih chuan, eng ang pawhin tisual mah la ala pawm duh che asin.

Sum lamah i tisual a nih chuan, i hausa laklawh tawh a retheih i hlau em, chu lo pawh sum lak luhnaa i tiam rual puite i hlau pawh a ni thei e. Hlau suh, retheih emaw, i intiam rual puite emaw kha hlau suh.

Isuan a relfel thei asin, dik lo taka hausak ai dik taka retheih a nawm i rin zawk daih tawh kha, ni e Lalpa nen a nih phawt chuan nuam lo reng reng a awm lo ngei alawm. Bakah Lalpa nen nasa takin i thawk a nga, a hma ai i hausa zawk thei daih a sin.

Tin, i sum lak luh dan a dik loa, black money emaw, smuggling  lamah i inhnamhnawih a nih phei chuan thawh puite an hlauhawm tih kan hre vek, chutiang pawh chu nise hlau suh. Lalpan nang leh i chhungkua a hum dawn che u alawm, nang aia smuggling khawih lian leh hmelma nei nasa Nicky Cruise'a leh midangte pawh a hum alawm. I lei taksa a hum lo a nih pawhin i van taksa a hum a nga, Lalpa vanga tuar i nih tawh dawn avangin, vanramah khian martarte awmna bik alo awm ngai a nih chuan, martarte awmna hmunah i awmna hmun tur a tel ve ava rinawm em.

Mipahmeichhiatnaah nasa takin i tisuala, mi nu emaw mi pa emaw i kawp hial tawh pawh a ni thei e, anih loh pawhin nula leh tlangval tamtak i hmansual pui tawh pawh a ni thei e, chu mai bakah mipa in mipa i kawp emaw, hmeichhiain hmeichhia i kawp pawh a ni thei e. Chutianga nasa taka ilo tisual tawh a nih chuan, Isua hnenah kir leh tlakah i inngai tawh lo hial maithei, chu mai bakah sualin bum che in Pathian hnena kir leh thei tawh lo turin a inhriat tir maithei che. Mahse hei hi ka hrilh duh che, "ila nunga, ila thaw a, kir leh tlak ila awm" tih hi.

Samri hmeichhia vawi nga lai pasal nei tawh hnua, midang hur pui tur la kawp cheu pawh kha, tuichhunchhuah bulah Isua nen an in tawnga, kha nu khan Isua vangin a nun a thlak duha, thlak thei turin Isuan a puia, chanchintha hril hmasa bertu a ni ta, ti ila kan sawi sual awm lo e. I nun i thlak theih loh tak kha, Isuan a thlak thei a, Isua chu pan ve rawh le.

Tin, tunlaia sualin mitam tak leh rawngbawltute ngei pawh min bumna chu porn (blue flim) hi a ni, a taka mihring sex kan hmanpui loh avangin sual a ni lo emaw kan ti thin, mahse Thlarau Thianghlim hnathawh a tih buai thin avangin sual a nia. Tin, mihring tak i duhna a tihniam thei bawka, chumi awmzia tak chu min ti piangsual tihna a ni. Pathianin min siam dan tih chhiatna hi sual nasa tak a ni. He porn kan en thin a hi, sim turin Isua i pan thin ang u.

Mi i bum thin a, mitha pangngai tumahin an rin loh che avangin, mi bum mai loh chu kawng dang a awm tawh lo niin i hria em. Isua nen chuan kawng dang ala awm asin, Zakaia pawh khan mi a bum thin a, a nun a thlaka, a bumte a rul leh hial a nih kha, mahse keini chuan rulh lehna tur kan nei lo pawh a ni thei e. Chu pawh chu nise a pawi chuang lo, Isua kan pana mi kan bum thin hi kan sim chuan, nun thar Lalpan min pe anga, ngaihtuahna thar tha zawk nei turin finna pawh min pe thei asin. Zakaia kha diktaka a tih hnuah a rethei ta hle tih kan hre lem lo, eng emaw chen chu i nun i thlak avangin harsatna chu i tawk mahna mahse, i retheih hlen a rinawm loh, a chhanchu i nun i thlak chhan Isua Krista chu van Lal thutthlenga thu a ni sia.

Ruihhloah i buai emaw, tual hial ilo that ani emaw, mi ilo pawngsual tawh pawh a ni thei, eng pawh tisual mah la ila dam a nih chuan, Isua hnena kir turin ila tlai lo a ni.

Krista hnenah kir leh rawh ala pawm duh che asin.

A sawm reng che.


Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

I Natna Kha, Isua Nen Chuan Chaknaah A Inthlak Thei Asin

"Vut aiah pangpâr thihrui te, lungnaih aiah hlimna hriak te, nguina thlarau aiah fakna silhfente an hnênah pekah Zion-a lungngaia awmte tan ruat tûr tein mi tir a ni: ani chu chawimawia a awmna tûrin, felna thing, LALPA phunte, tih an nih theih nân."(Isaia 61:3)

"I natna tak kha, Isua nen chuan chakna zawkah a in thlak thei asin."

Nghak rengtu nihte hi ava na em tiraw? Abrahama kan en chuan kum za dawn fa a nghak a, ava na dawn tak em. Mahse a nghah vanga a na chuan rinna kawnga chakna nasa zawk a pe a, Pathianin a fapa Isaaka hlan tura a tih khan a hlan thei a, kha tak kha Bible a midangte phak theih loh a nihna a ni ta a. Rinna pa tia koh a nih theihna pawh a ni.

Miin min en hniamte hi ava na em, Davida kha a chhungten an en hniama, chhungkaw maicham an siam dawn pawhin sawm enah an en lova, Goliatha a beih dawn pawh khan a unauten an en hniam leh a. Chutah a hming an tha ve a, mahse lal Saula khan a do leh a, mahni inah pawh a awm ngam lova, mahni ina awm ngam loha ram leh puka riah kha a nat tawk tawh awm teh lul nen ei tur ala tlachham zui a, Nabala hnena eitur ava dilte khan a lo hmusit a nih kha. Davida nun kha ava han na ngawih ngawih dawn em. Mahse khang a natna takte kha lal ropui bik nih tir tura chakna petu a ni. 

Davida kha lal rorel thiam tak a ni satliah lova, Israel economic thlaktu pawh a ni. Mi thiamte chuan Davida hi Israela Iron Age (thir hman thiamna leh ti hnianghnartu) thlentirtu a ni an ti.

Hani, fa a neih theih loh vanga naa tap thin kha, kha a fa a neih theih lohna tak kha, Pathian hnena a fa Samuela hlan thei tura chakna petu a ni.

Josepha pawh a unauten an do rawn a ava na dawn em, mahse Lalpa nen a natna a hmachhawn avangin chakna a neih phah a, ngaihdamna thiltihtheih zia entirna tha ber a ni ta a nih hi.

Mahni chung zawka awmin thil sual leh kan tih duh loh ti tura min sawm tlatte hi ava na dawn em, mahse Josepha chuan Lalpa hre chungin a tuar hram hram a chakna a neih phah a, lang loa Lalpa tana mi rinawm entawn tur tha ber a ni a.

Dawta in puh hi ava na tak em, Josepha kha a sual zawk leh tisual zawk Potifara nupuiin dawtin ala puh zui a, a tihsual vang ni miah lovin, taninah khung a la ni cheu a nih kha. Chuta a natna hmun tanin ngeiah chuan, Lalpa a pawl a, Lalpan chakna nasa tak a pe a, mumang hrilhfiah theihna leh finna a nei a, chuta tang chuan lal thutthlengah Lalpan a hlang kai ta a nih kha.

Eng natna nge i tawh ve le?

I chhungten an tina ve che em? Davida leh Josepha pawh kha an na ve asin, mahse Lalpa nen tiin an hmachhawna chakna Lalpan a pe a, an chhungte roreltu an nih bakah lal thutthlengah an thut phah a nih kha.

Ngaihzawng lamah leh nupa inkarah natna i tawk ve em le. Hani te, Abrahma te pawh khan an tawk asin, chu mai bakah kawppui zawn kawnga hnuaihnung bik nih hi a na tiro. Mahse, Ruthii kha hnuaihnung hle mahse Lalpa thu zawmin a nung tlat a, a mihring dinhmuna a phu hauh loh Bohaza a nei asin. Bohaza pawhin a hmeichhe hmangaih kha a nei thei dawn lo emaw a tia, mahse Lalpa duhdan leh an hnam dana thil dik chu hun harsaah khan a ti tang tang a, a hmangaih Ruthii chu a nei ta asin. Khing kan sawi zawng zawngte khian an hmangaihna leh an inngaihzawnna kawng chu Lalpa nen an hmachhawn avangin chakna Lalpan a pe a, hnehtu ni thei tur khawpin Lalpan chakna a pe ta asin.

Lalpa i phatsan vangin na i ti thin em le? Petera pawh khan na a ti asin, a hmaa a zirtirtu tana thi ngama in sawi thin khan a zirtirtu leh a Lalpa kha a phatsan a, mahse Isua bulah a phatsan hnu pawh khan ala awm tlat a, chu a natna ngei, phatsantu natna chu Lalpa chuan chaknaah a hlan kai saka kohhran bul tumtu ni turin chakna a pe a, martar ropui ber Krista avanga ngamtu ropui ber a nih phah ta a ni.

Inchhir avangin i na a, i thiltih tawh i thlak thei si lo em? Paula pawh kha a ni asin, Kristiante a lo tihduhdah tawh avang khan hun rei tak chu a na a ni. Mahse, chuti chung chung pawh chuan Krista a vuan tlat a, chu a Lalpa a vawn tlat chuan a tihsual vangin a kalsan lova, bible ziaktu ropui ni turin chakna a pe ta zawk asin.

I natna ngei kha, Lalpan chaknaah a thlaksak duh che a, chu chu a thlen theihnan, i natna kha Isua nen hmachawn ve rawh le.

Eng ang pawhin na la, Isua vuan tlat ang che, chakna a pe duh si che a. I natna kha chaknaah a thlak duh asin. 


Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Lalpan A Hmangaih Reng Che

"Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a.(Rom 8:38-39)

Pain a fa a hmangaih chu, tha taka enkawl a duh thin a, chu vang chuan a zia a chhui hial thin a, chuta a fa a chhuina atang chuan a fa chu tha thei ang bera enkaw a tum thin ang leh mipain a hmeichhe duh zawng tak a hmua, a thinlung a hneh theih dan tur a zawng ang hian. Kan Pathian hian, min chhuia min zir a, min hmangaihna hi min hmuh fiah tir a tum thin.

Kraws a kan Lalpa Isua Krista kan tana khenbeh kha kan en phei chuan, hmangaihtuin a hmangaih a te a chhanchhuah theih nan, a theih zawng zawng a chhuah tih hi a chiang a ni.

Mihring hi chuan midang hi kan hmangaih viau emaw kan tih pawh hian kan theih zawng zawng kan chhuah ngai loa. Thikthu chhiatna leh beisei nei rante alo ni thin a, tawp chin a nei ngei ngei bawk thin.

Kan Pathian hmangaihna erawh chu thikthu nei lo leh beisei nei lo chu a ni loa, nun tha zawk min pek duh avang leh kawng dik zawka min hruai theih nan, a thikna lang thin mahsela, kan Pathian hmangaihna chuan tawp chin a nei lo thung a ni. Vawi tam tak tlu mah ila, vahbo san mah ila, a lam hawia a hnen lam kan kir chuan, ngilnei takin min lo kuangkuah leh thin a ni.

Khawiah nge i awm, eng harsatna nge i neih, eng sual nge i tih tawh lam a ngai pawimawh lo, kan Pathian hian a hmangaih reng che. I hmangaih let ve phei chuan, a malsawmna tam tak leh chatuan nunna chu i va chang chiang dawn em.


Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Kan Lalpan Midangte A Pan Hreh Ngai Lo, A Hnung Zuituten Kan Hreh Tur A Ni Bik Lo

"Tin, Pharisaite zinga mi pakhatin a hnena chaw eiah a sawm a. Tin, Pharisai inah chuan a lut a, chaw a kil a."(Luka 7:36)

Mak ka tih deuh chu, kan Lalpa Isua Krista hi midang bula awm duh thin mi a nihna hi a ni. Chutih rual chuan amah chauha awm a, tawngtai chang pawh a nei thin bawk a ni.

Kan Lalpa Isua Krista ropui em emna chu, a pantu zawk nih engtik laimaha a hreh ngai lo hi a ni. Van Lal thutthleng thawh sanin khawvel a rawn pana, khawvela a len lai pawh khan amah mamawhtute leh thiana a neihte kha a pan thin a ni. Tin, mihring famkim a nih tichiangtu pakhat chu, thiante, unaute, rawngbawlpuite mamawh tur hiala a rawnin siamna lai hi a ni.

Mihring hi mahni chauha kan awm kan awm chuan, kan ti (tri) deuh hu thin, a nih loh pawhin kan kimki em em thin, kan thluak leh kan rilru a hrisel theih nan leh a in balance theih nan midang bula awm te hi kan mamawh theuh a ni.

Kan Lalpa Isua Krista pawh kha, mihring famkim a nih avangin midang bula awm a mamawh ve a ni thei a ngem a tih theih hiala. Midang mamawh ve ang hrimin midang bulah pawh nasa takin a awm thin a ni. Kan Lalpa Isua Krista khan midang a mawh a nih chuan nang leh kei mihring chak lo hian midang bula awm hi kan mamawh ngei ang le. Chutiang bawkin midang pawhin i bul leh ka bula awm hi an mamawh ve thei bawk a ni.

Midang kan mamawha, midangin min mamawh bawka, chutiang chu kan nih si chuan, Isuan midang a pan hreh lo ang chiah hian, a hnu zuitu leh a rawngbawltute hian midang hi kan pan (approach) duh lo emaw, kan hreh tur a ni lo. A chang chuan kan chapona alo lan palh avang hian kan mamawh ngawih ngawih leh min mamawhtute pawh hi, kan hlamchhiah lui thin a, hetiang chapona hi sual hnathawh zawk a ni tih hriain, midang i pan hreh ngai lo ang u.


Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Isua Hmaa Tlawm Taka Kut Dawh Hreh Lo Ten, An Dawh Thlawn Ngai Lo

"Tin, aw ring takin, "Isu, zirtirtu, min khawngaih rawh," an ti a."(Luka 17:13)

Isua khawvela a len lai khan, a hnena damna dilte, an chhungte ramhuai man damna dilte, sualna lak ata chhuah zalen dilte kha kan hmu a, chung mite chuan kut dawhin tlawm taka a dawh ang hian, tlawm takin an duh chu Isua hmaah an dil thin.

Kan Lalpa Isua Krista hi, Tlarauin kan hnenah a awm a, ala pangngai renga, a hnen atang hian enge kan mamawh ve le. Isua hnen atanga mamawh nei lo pakhatmah kan awm lo ang. Isua hnen atanga mamawh kan neih chu, tlawm takin a hnenah kan dil em, nge khawvelah kan rilru kan dah nasa lutuka Isua hmaah hian kan tlawm thei lo zawk.

Isua hmaa kan tlawm lo a nih chuan, khawvel buaina tuipuia len kan hmabaka, chu chu kan thlang zawk tihna a ni bawk thei ang. Mihausa pa khan, khawvel thil kha a hmu lian ngang a niang, engkim neitu Krista kha a pan ngam loa, Isua a hnawl a nih kha. A hnawl Isua kha lei leh van Lal a ni tih kha a hre lo, neih loh a nei lo tih pawh kha a hre lo. Kha mihausa pa ang khan, Isua hi kan hriat tawk loh avanga kan hnawl ve palh ava hlauhawm em.

Kan Lalpa hian, neih loh a nei lo, i sual sim theih loh ten a hliam thin che em, Isua hmaah nitin tlawm takin kutdawh ang maiin simna chu dil thin rawh, simna a nei. Hlimnate, thlamuannate, lei hausaknate, nupui pasalte, chhungkuate, thlamuannate, damnate, chaknate, kristian chhungkuate a nei fai vek a ni. Chu bakah nang leh keia mamawh hi min pek a duh a ni. Kan tih ve tur chu, kutdawh anga inngaitlawm taka a hnena kan mamawhte nitin dil hi a ni. (Kutdawh kan hmuhsitna lam a ni loa, kan sawi sawifiah nan entirna mai a ni.)

Isua hmaah tinge kan tlawm hleihtheih loh le, kan lian ve emaw kan ti ami, kan chak ve emaw kan ti a mawni le. Hawh u, Isua kan Lalpa hmaah hian i tlawm hreh lo ang u.

Isua hmaa tlawmte chuan a thu an zawm thin, mitdel kha Siloam dildah kher khan a mit sil turin a ti, ava sila a dam a ni. Pharte pawh kha, puithiamte va in entir turin a tia, an kala an dam a ni. 

Ni e, Isua hmaa tawngtaia Lalpa min pui rawh tih thlenga tlawm hi chu kan tam maithei, mahse a thu zawm tur khawpa tlawm kan ni em le?

Sim i duha, simna pawh i dila mahse kan Lalpa chuan, i sim theih nan inkhawm tam rawh, tawngtai tam la, bible chhiar tam rawh a ti che a, i tih si loh chuan a thu awitu i ni loa, kha vang tak khan i sim thei lo a ni lo maw. Kristian chhungkua i dila, Isuan i chhungte hmaah tlawm takin thiltha ti thin rawh a tiche a, chu a thu chu i zawm si loh vangin kristian chhungkua chu ala pe lo che a ni lo maw.

Nupui pasal i dila, amah dah hmasa chunga kal turin a ti che a, mahse i hmelmawinate, i thilneihte, i hriat ve nate, i feelings (ngaihzawnna) te kha i dah hmasa leh si a, kha vang khan ila nei lo a ni em. Sum i dil a, ani chuan a thuzawm leh ngil taka hna thawk turin a ti chea, mahse i fin kherek i chhuah ziah a, taimakna hi sum hmuhna emaw i ti tlata, kha vang khan i sum mamawh chu ila nei lo a ni em?

Isua atanga puihna kan duh chuan, tlawm ral em em hi alo ngai a, mahni leh mahni in cancel (in paih) hial a ngai a ni. Zeng kal thei lo kha, Isua hmaah an mut a, a ni chuan tho la i awngphah la la, kein kal rawh alo tia, kha zeng khan kal theih loh vanga rawn pan na na na che, kal rawh min tih le, ti ta sela a kal lo ang. Mahse, kha zeng khan amah leh amah kha a in cancel a, a zenna leh a kal theih lohna kha a cancel a, thoh a tuma an beih chiah khan, amahah thiltihtheihna chu a rawn thawka a kal ta a nih kha.

Mahni mawina tura kan hriatte, mahni himna tura kan hriatte, kan theih lohnate thleng pawh hi, cancel hmiah khawpin tlawm takin Isua thu zawm ila, a hnena kan dil chu kan hmu ngei ang.


Midang Share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Simna Nun Nei Tur Chuan, Kan Tun Hun Zela Hi A Pawimawh A Ni

"“Hun lawmawmah ka ngaithla che a, Chhandamna ni-ah ka tanpui che,” a ti si a. Ngai teh u, tun hi hun lawmawm chu a ni a; ngai teh u, tun hi chhandamna ni chu a ni."(II Korinth 6:2) 

Tunlai rawngbawltu tlangvalte kan buaina chu Porn (Blue Flim) hi a ni tlangpui a, mi thenkhat phei chuan a rukin mipat hmeichhiatna an hmang bawk a nga. Porn en leh a taka sex hman hi a sual dan a in ang chiah lo a nga, porn en thinin a sim duh loh chuan a man phu tawk a hmu a nga. Porn en enin a hrinchhuah chu a taka hman a nia, a taka sex hmang sim duh lo chuan a man phu tawk ala hmu khawp ang.

Chutih rual chuan, kan Pathian hi hmangaihna leh khawngaihnaa khat Pathian a ni a, misual sual lai an man ngei pawh a chhuah zalen duh a, mahse misual chhuah zalen duh lo chu kan Pathian hian a chhuah zalen ngai lem lo a ni.

Rawngbawltu naupang zawkte hian thil pakhat kan nun chhungril  tih chakna tur tih nachang hriat loh kan nei a, chu chu "Chawlh hahdam" hi a ni. Kan Lalpa Isua Krista meuh pawh kha, mihring taksa a put lai khan a chawl thin asin. Nang leh kei hi mihring mai kan ni tih hria ila, mawl mawl lo hian chawlh nachang i hria ang u.

Thlarau Thianghlimin chakna min pekte chuan, chawlh a ngai kher lo te kan tia. Nih leh Isua Krista kha Thlarau Thianghlimin chakna a pe em, pe e! ti nge a chawlh si, mihring taksa a taksa put khan chawlh a mamawh alawm mawle. Mawl mawl suh, chawl rawh.

I chawlh that loh vang tak khan alawm, nangmah i in thunun theihna a tlem thin. I hah lutuk lai a phone i hmeh i hmeh chuan, engtin tin emaw ni, porn bawk kha i hmet chhuak mai ang. Chawl hahdam loa, nangmah lo ngainatu nula bula i tawlh i tawlh chuan, nula chuan alo dut ve bawk che sia nge, tum loh deuhin in che sual mai ang.

Rawngbawltu thenkhat phei hi chu, an va han mawl uchuak lehzel em, mu tlem bawk, chawk ei lo bawk ten rawngbawl an ching a nia. Rawngbawltu pakhat chuan "kohhran upa ni ta ila, chaw ei tha lo bawk, mu tha lo bawk rawngbawltute hi chu, kan kohhranah rawng rawn bawl dawn ta sela, zan nih khat tal chawl hahdam phawt turin ka tir haw leh ang" a ti.

Chawl hahdam loa, kan beih zel vang hian alawm, Lalpaa kan nihna tak pawh hre lek loa rawng kan bawl thin. Lalpaa kan nihna hi hre reng ila chuan, tumah hi kan tlu lo ang. Hah lutuk chung chunga kan tih luih zel vang hian, vawikhat chauh tlu palh tur pawh hi, vawi tam tak kan tlua natna benvawn vei ang mai hian, a tawpah chuan kan sim hleithei lo hial thin a ni. 

Chutiang taka kan tal luh hnuah chuan, chaw nghei tawngtaiin min sim tir thei tawh loa, tlaivara tawngtai pawhin awmzia a nei thui tawh lo a ni. Chutiang huanah chuan, engang pawhin Pathian thu hre mah ila, keimah leh keimah ka in retreat a ngai a nih hi tia, thla hnih thla thum kan chawlh ngam a ngai tawh thin.

Rawngbawltu pakhat Michael Dow a chuan, kum 20 bawr vel ka nih laiin porn ka sim thei loa, tuk khat chu tap chungin ka tawngtai a. Lalpa hei hi min lak kian sak lul rawh ka ti ngawih ngawih a, ka tluk dawn apiangin nakina ka tluk loh nan keimah leh keimah porn en phalna ka in pe thina, thil hote a rawn lan zeuh pawhin ka tlu leh zel thin a ti. Chutia ka tawngtai lai chuan Pathian aw ka hre taa, in tih huaisen a hun tawh, tiin min rawn hriattir a, a ti.

Ni e, Pathian hnung kan zuinaah hian, tun hi a pawimawh. Porn nakina ka en loh nan tunah tlem ka en ang kan ti ve thin em? Kan tun nun zelah hian en lo zel ila, tin nakin pawh chu tun alo la ni dawn a, nakin chu tun a nih hunah pawh chuan en lo leh zel mai ila.

Pathian hnenah sim i dil thin a nih chuan, Pathian chuan a chhuah zalen tawh che, i sim daih tawh alawm. Sualin i buai emaw a in tihtir mai mai che a nih kha, i sim tawh avangin tunah khan en lo la, nakinah pawh en lo zel la, sual nangmah beitu che hnenah chuan Isua hmingin ka sim tawh ti ang che. Tichuan, Krista chhuah zalenna chhungah chuan ilo awm reng a ni, tih i hre tawh ang. Chutiang bawk chuan mipat hmeichhiatna khura tlute tan pawh a ni. Mipat hmeichhiatna khura tlute chu kohhrana inthunun tir hi kan zalenna atan a tha thei, chu mai bakah dan chhunga lut thei kan nih huna luh leh ngat phei chuan nasa taka siam thara kan awm theihna a ni thei.

Mi thenkhat chuan, kohhrana inthunun tirte hi lei dan kan tia, nih leh tunge dan ngai pawimawh deuh kha?..... Isua Krista a ni. A hnung zuitu kan nih a, a hnung kan zui a chu dan chunga a leng lo a nih chuan, nang leh kei hi kan leng bik chuang lo ani.

Rawngbawltu an tihsuala ka tihsual ti ngamtute chuan, an dinhmun hmasa zawk Lalpan a khum tir thin, hei hi bible'ah Petera chanchinah leh Paula chanchinah kan chhui zawn thei a nga. Tunlai rawngbawltuah pawh Benny Hinn'a chanchinah pawh kan hmufiah thei bawk ang.

Michael Dow'a Pathian aw hriat "in tih huaisen a hun tawh" tih lai a khi, simna nun tak tak kan chang dawn a nih chuan, kan zawm ve a ngai a. Engtin nge ka in tih huaisen ang, kan ti em? Kan in tih huaisen dan tur chu, Lalpaah kan chawl ang, kan tih tur zawng zawng kan dah tha a nga, keimahni tan chauh Lalpa kan pawl ang. Chu chu chawlna nun tak tak chu a ni, chutianga ti tur chuan hma chhawpte kan thlauh thla a nga, mahni leh Pathian kan inpawl theih nan chawte pawh ngaihngam takin kan nghei thei tawh ang. 

Chuta tang chuan, keimahniah mithar alo awm nawn leh a nga, thil dik ti ngam turin huaisenna kan nei tawh bawk a nga. Simna nun duhawm tak chu kan chang thei dawn a ni.

Sim kan duh a nih chuan, tun hi a pawimawh ber a, tun atang simna nun nei turin i bei ang aw!


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. https://www.youtube.com/watch?v=rufv4tagFIU

Pathian Hmangaihna Leh Duhsakna (CH)

Pathian hmangaihna chu mi lian mi te, mi fel, mi sual leh tu tan pawh a puma (100%) kan chan a ni. Kar khat chhung, Darkar sawmhnih pali (24) chhung in tluk tlang veka kan dawn a ni. Kan thawhchhuah leh kan thiltih vang a ni lo. Kan phu vang pawh a ni lova, a thlawna kan dawn liau liau a ni.( Ephsei 2:8) Chu hmangaihna chu a rinawmin a chuai ngai lo.


Pathian Duhsakna ve thung erawh chu a thlawn ni tawh lovin kan thawh chhuah leh kan inpekna a zara kan neih ve thung a ni. 

Chu duhsakna chu miin a inpekna leh thuawihna a zira lo pung zel a ni. Zawlnei Daniela ziakah Pathianin Daneila a duhsakna kan hmu a, Pathian tan a in serh thianghlimnate (Daniela 10: 2-4) Jerusalem lam hawia ni khata vawi thum a tawngtaina tlatna te ( Daniela 6:10) avangin Pathian duhsakna dawngin finna leh mumang chenin hrilhfiahna hial a nei a, Sakeibaknei puk hlauhawm tak pawh Daniel tan chuan Chawimawina (promotion) a ni zel a ni. 

Pathian hmangaihna chu kan dawng vek a, mahse Duhsakna erawhchu a thlawn a ni tawh lo, kan tih ve a ngai tawh a ni. Thiltithei tak duhsakna dawn pawh nuam kan ti a,  Pathian duhsakna phei chuan tihtheihloh a nei silova, a pung zel bawk a ni. 

Duhsakna dawng tur chuan Kan peih loh chung pawh a tawngtai tlat te, a thu chhiar te, Pathian thu in ti tura min tih ngaihpawimawh te, a chang chuan chaw nghei pawh a ngai ang. Tlawm tak leh thuhnuairawlh taka kan nun chuan Pathian duhsakna kan chang ang a, kan hun tawn, kan ruahman leh kan duhthusam te Pathianin min pe zel dawn a ni. I eizawnna, i zirna, i harsatna, in chhungkaw harsatna te pawh a tha lam zawngin a herchhuak zel dawn a ni.

Lalpa he lockdown chhung hian kan hun te tha taka ka hman theih nan min pui la, Daniela anga inserh thianghlima, i tana nung turin min pui ang che. Amen


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Midangte Mithmuha Amaha Rinna Nghatte Tan Chuan, A Thatna A Khawlkhawm Sak Thin

“Aw, I thatna, nangmah tihtute tana i khawl khawm chu, a va ropui em! Mihring fate mithmuha nangmaha rinna nghatte tana i tihsak chu.”(Sam 31:19)

Mi hmuh khawpin Lalpa kan ring em?

Kan eizawnna lamahte midang mithmuh khawpin Lalpa kan ring ngam em?

Kawppui zawngte tan pawh, midang mithmuh a lang khawpin Lalpa kan ring ngam em?

Kan Pathian thuah chuan, “mihring fate mithmuha nangmaha rinna nghatte tana, i thatna i khawlkhawm chu a va ropui em,” (sentence siam rem) a in ti hmiah mai sia.

Ni e, Lalpa rin hi midangte mawl tih hlawhnate a ni thin, mahse miin Lalpa a rin avanga mawl tih an han hlawh pawh hian, a kal a kal a Lalpan an mualpho tak tak a phal ngai hauh loa, a tawpah chuan mi awh rawnah a hlang kai leh thin a ni.

Hetiang chungchang sawi a nih hian, kan rawngbawltu hmuh phak ve chin Rev. Vanlalbela hi rilruah a lang leh thin, Pathian thu a zir dawn khan pawisa leh thil dang neih nei loin, vai ramah a chhuak ve hlawla, chutianga chhuak a nih avang chuan, a chhungte leh amah hretute tam tak mawl tih ava hlawh nasa dawn em. Tichuan, Pathian thu chu a han zira, Pathian pawlna tak tak a zawnga, a zirpuite leh an zirtirtute mawl tih a hlawh leh bawka, mithenkhat phei chuan a a ta hial emaw an ti a ni awm e. 

Mahse, hun a kala midang mithmuha Lalpa a rin avangin, Mizoram leh India ram mai ni lo, U.S leh Wales'ahte pawh rawngbawl tura sawm a ni taa. Chu bakah kohhran dang, a zawm leh a telna kohhran ni lo, kohhranhote pawhin Pu Bela thu ziah emaw, a sermon a nih chuan an hre ve duh thin, ti ila kan sawi sual awm lo e.

Kawppui zawn kawngah hian rawngbawltu Benny Hinn leh a nupui Suzanne Harthern te chanchin hi han thlir ho ta ila, Benny Hinn hi a tlangval lai daih atanga nasa taka Pathian rawngbawltu a ni tawha, Pathian hnena a thlen bak chu a hranpain nupui tur a zawng lutuk bik lo a ni maithei, a lehkhabu ziah “He touch me” tih ah chuan a thianpa Ronn Haus’an bialnu ila nei lo ami tia a fiam chungchangte a tarlang nghe nghe a.

Bennya hian a hma daih atang Pathian hnenah nupui a dil thin a, Roy Harthern’a rawngbawltu amah aia rual u zawk fanu Suzanne nen Pathian thu in share (sawi dun) a, an inkawm hnu chuan engtin emaw inpawh riauin a hriaa. Mahse, an inpawh tak tak hmain khaw danga inkhawm a ngaih avangin a kalsan a.

Bennya, a kal hnuah chuan, Suzanne’i te uanau leh a nute chu chawnghei tawngtai an neia, chutia an tawngtai lai chuan Suzanne’i chuan Bennya nen inpawhna neii riaun a inhriaa, Pathian hnenah Lalpa amah hi ka pasal tur a nih chuan, voinah min rawn phone tir rawh tiin a tawngtaia, chumi ni chuan Ronn’n Bennya a fiam avang chuan Suzanne'i chu ava call a.

Suzanne’i a hmuh leh chak avang leh a nupui tur a nih a rin vang chuan, a pa Roya hnenah chuan ka rawn tlawh leh dawn che u asin a tia, Suzanne’i a nupui tur a nih a fiahna te(small) hote chu a dik zel a, tih chian a duh taa, tlawhnaa a chuan lai chuan Pathian hnenah Lalpa ka nupui a nih tak zet chuan cheesecake ka siam sak che, min tih tir ang che a tia. An inhmuh rual rual chuan Suzanne’i chuan cheesecake alo siamsak thu chu a hrilh a ni, tiin a lehkhabu ah chuan a sawi a ni.

Midangte mit hmuha a kawppui zawn kawnga, Pathian ring tlat thin Benny Hinn’a chuan a kawppui tur awm mi tak leh a milpui em em mai Lalpan nupui a pe a ni.

Benny Hinn leh Suzanne Hinn te hi an lo inmil hle a, tawngtai mi an nih ve ve bakah tawngtaina atanga thil hre thei an ni ve ve tih chu an chanchin kan sawi tawh atang a hriat mai a nga. Chu bakhah an chanchin nuih ti za hial thei awm pakhat leh an nuna entawn tlak tak pakhat leh chu, sualin a beih vangin an nupa an inthen a, a hnuah Pathianin a khawih harh leh a, an in nei leh chungchang hi a ni. 

Innei tawh leh kohhran ho hmaa biak in a inkutsuih tawh, inthen leh an nia, hei vang hian in suih zawm leh an duh chuan inhruai ve mai awm anih nen, mahse chutiang duh tawk lo chuan innei thar leh angin biak inah an inkutsuih leh tlapa, biak ina an inkutsuih leh hma chu mut dun pawh kan mu dun lo an ti nghe nghe a ni. Hei hian inkawp tur tak leh in mil tak an nih zia a ti lang awm e.

Ni e, sual hian inhmuh thiam lohna leh inthenna a thlen thina, mahse Pathian siamtharna kan chan leh hnuah pawh kan la inthen tlang zel hi chu a dik lo a ni. Benny leh Suzanne te ang hian siam tharna kan chan chuan kan innei leh tur a ni. He tah pawh hian huaisen taka mi mithmuha Pathian rin a ngai awm e.


Rawngbawltu thenkhat hi chu kawppui kan zawnnaah hian, Pathian kan rawn hman loa, kan hmel duh zawng chu rawngbawltu ve tho an nih phei chuan kan bawh nghal ruak ruak thin a, kan tisual thin a ni. Kawppui la nei lo, rawngbawltu zawng zawng hi kan inhmil vek kher loa, innei tur kan ni vek kher lo bawk, kan rawngbawl dan tur leh min kohna milin kan milpui tur kawppui Lalpan min buatsaihsak thin a ni. Bennya ang hian miin bialnu (bialpa) ila nei na nge min tih luai luai pawhin Lalpa ngah tlat mai tur, a tlai dawn chuang lo.

Rawngbawltu kawppui zawn kawnga tih ngaihna tak hre lo, mahse Lalpa ring hmiah ti fuh tak tak Rick Warren te, Billy Graham te etc an awm nual mai. Pathianin kawppui tur a pek dan a in ang lo theuha, mahse Pathian an rin dan erawh a in ang theuh thung. Keini pawh hi, rawngbawltu dangte nuna a thawh ang thlapin Lalpa hi kan nunah a thawk lo a ni thei e, mahse amah kan ring ngama kan nghak ngam a nih chuan a hun takah min pe ang, tih hi ring ang u.


Ni e, midang mithmuha Lalpa rinna hi, amah Lalpa chawimawina a ni tlat alawm mawle, mihring zingah pawh tunge min chawimawitu leh min ring tlattu ensan duh ang. 

Tin, amah midangte mithmuha beisei awm a awm loh pawha rin ngam tlatna hi, ama kawng zirna a nia, engtin nge a kawng zir tlattute chu a ensan duh bik ang le.

Hawh u, kan eizawnna kawngahte, kan kawppui zawn kawngahte, kan fa enkawl kawngahte, kan nupa inkarahte, amah Lalpa rawng kan bawlna kawngahte hian, midang mithmuha lang khawpin Lalpa I ring ngam ang u. Tichuan, a thatna ropui tak chu min buatsaihsak hmaih hauh lo ang.


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Covid- 19 Vanga Kan Pawn Chhuah Theih Lohna Hi, Chhungkuaa Rawngbawlnan I Hmanga Tangkai Ang U

"Tin, LALPA rawngbâwl hi a tha lo awm anga in hriat chuan vawiinah hian tu rawng nge in bawl dawn thlang mai rawh u; in thlahtuten Lui rala a rawng an bawl thin pathiante kha nge, in luah ram Amor-hote pathiante kha? Kei leh ka chhûngte erawh hi zawngin LALPA rawng ania kan bawl dawn ni," a ti a."(Josua 24:15)


Coronavirus len vangin, inhumhimnan kan chhuak thei lo ta sa sa, haw u he kan chhuah theih lohna hi, kan bula awm reng leh kan hmangaih ber kan chhungte tana thiltha tihna hunah hmang ila. Kan chhungte chhungah hmangaihna lan chhuah tir ang u.

Chutianga kan tih chuan, hna kan thawh theih laia kan hmuh hman mang thin loh kan chhungte hian Lalpa neitu kan nih zia an hria a nga. Kan Pathian a rawng kan bawl sak a hi Pathian tak a nih zia pawh an hriat phah a nga, a rawng pawh an bawl chak ve thei hial a ni.

Mahni in theuhah awm tur an ti bawka, inkhawm pawh kan thei lo bawk a, hawh u kan chhungkua'in inkhawm ang u.

Hawh u, hun ren lek loin kan chhungte nen Pathian thu sawina remchangah i hmang ang u.

Chhungkua a Pathian thu puang chhuak tur hian bul tantu an awm a ngai thin a, chu bul tantu a chu nang leh kei hi nih i tum ang u. Ka pain, ka nuin, ka unautein ka pasal ka nupuiin tan rawhse ti mai loin keimah, Lalpa hmangaih fa ngei hian, kan chhungkuaah Pathian Lal zia ka puang chhuak dawn tiin bul tantu ni ang u.

Joshua khan, kei leh ka chhungte a ti, first person ah, amah kha hmasaah a indah a ni, keiman bul ka tan a nga tichuan, ka chhungte pawhin min zawm ve a nga tichuan, "kei leh ka chhungte zawngin Lalpa rawng ania kan bawl dawn ni" a ti, ti ila kan sawisual awm lo e.

Tin, Lalpa hian amah biak kawngah emaw, amah tih kawngah emaw, bul tan hmasatu hi a malsawm thin bawk a ni. Joshua leh a chhungte pawh kha Israel fate zingah "kei leh ka chhungte zawngin Lalpa rawng ania kan bawl dawn ni" ti hmasatu chhungkua an bawk a, Israel hnamte ram insemnaah khan ram tha bik Lalpan a pe a, midang chu a hnam angin Lalpan ram a pe a, Joshua te chhungkua erawh kha chu a chhungkaw bil bikin ram a pe a nih kha, Lalpan a dah pawimawh (special) khawp mai.

A mimal zawng pawhin, chhungkaw zinga Pathian biak leh tih kawnga hma la hmasatu, Abrahama te, Mosia te, Josepha te etc, heng mite hi an chhungkaw zingah upa ber an ni lo, mahse Lalpa tih kawngah hma la hmasatu an nih avangin chhungkaw roreltu leh chhungkaw zinga Lalpa khawngaihna leh malsawmna dawng nasa bikte an ni.

Keini pawh hi, Lalpa dah pawimawh bik mi kan nih duh chuan, kan chhungkaw zingah Lalpa biak kawnga hma la hmasatu i ni ve ang u.

He hun hi, a tamthei ang ber chhungkuaa Pathian biak ho nan hmang ang u, tin a bul tantu nih i tum bawk ang u. 


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.








Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A