Zam Suh Pathian Fa I Nih Kha, I Tih Tur I Hriat Nan, A Aw Ngaithla La, Zawm Ang Che

"Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a."(Genesis 2:7)

Gary Vee business coach pakhat chu, eizawnnaa chhiat rupna chungchang an zawt a, ani chuan "eng thil tha lo nge thleng thei vak chuang ang, chhiat rupna hi ka hlau hran loa, a chhanchu chhiat rupnaah hian nidanga ka ngaihtuah theih bak ka ngaihtuah chhuah theih thin vang a ni" a ti a. 

Keini phei chu ringtu Pathianin amaha nunna thaw a thawk luh ngei leh a chhandamna changtute kan ni a. Eng ang pawhin kan nunah hian harsatna thleng mahse zam mai tur kan ni lo. Neih nei lo ber leh engkim chan veka kan inhriat lai pawh hian, lei leh van siamtu kan Pathian hi kan lo la nei zel a, min pui turin a ni chu a hnai reng a ni.

Rawngbawltu pakhat pawh hi a zam em em maia, a hun kal tawha a hlawhchhamnate a ngaihtuah chhuaka, hlau thawng em emin a rilruin a tawngtaia, Pathianin "ka awm pui che" a rawn tia, chu rawngbawltu chu a zam ngang a niang, Pathianin ka awmpui che a tih pawh chuan, min awmpuina chu ka hrethiam lo a tia. Chutah zet chuan Pathianin "ka fa i nih kha, lei leh van siamtu i Pain ka awm pui che ka tih chu, khawvel mite ang maiin hlau deidui suh" a rawn ti leh a, chutah zet chuan chu rawngbawltu chu a harhchhuaka, lei leh van Lal leh a siamtuin min awmpui miau chuan enge kal dik lo thei vak ang le a ti taa. Lawm chungin mittu tla zawih zawihin, Pathian hnenah lawmthu a sawi ta a ni.

Keini pawh hi, Pathian fa kan ni, a fa kan nih dan pawh hi, kei nin a fa nih kan dil pawh ni lovin, anin min hmangaih em avangin, keini sual a tlu tawhte a fa kan nih theihna turin kawng a rawn hawng zawk hial a nih kha. Faa min pawmtu kan Pathian hian min awmpui a, zamna tur a awm lo. Kan chakna leh kan theihnaahte kan beidawng tawh a nih pawhin, chakna leh theihna nasa tak tawp chin nei lo innghahna tur kan la nei a, chu chu Lalpa chakna leh theihna a ni.

Rawngbawltu chanchin kan tarlan pawh khi, a vanneihna leh ringtu tamtakte laka hamthatna (advantage) a neih chu Pathian aw a hriat theihna a ni. Pathian puihna kan dawnna tur hian a aw kan hriat theih a tul thin a. A chhanchu keini pawhin hmun eng emaw a tang mangang pui dawn ta ila, kan puih tuma nen kan inbiak pawh (communicate) theih loh chuan puih a har ngawt ang. Tin, kan aw an hre theia kan thu an zawm duh loh pawhin puih an har viau bawk ang.

Hei vang hian, Pathian atang puihna keini pawh hian kan dawng duh a nih chuan a aw kan hriat theih a, a aw atanga a thu lo chhuak chu kan zawm bawk a ngai a ni. Tin, Pathian aw hre thintute hian Pathian aw an ngaithla thin a, Pathian aw ngaithla ngai miah loten a aw an hriat theih a rinawm loh a, Pathian aw kan hriat theih nan a aw ngaithlaa kan nghah thin a ngai a ni. Mite hian Pathian aw hlut zia hi an lo hriaa, Beny Hinn'a phei chuan "Pathian chenchilhna ka chan leh a aw ka hriat theih nan darkar 5 pawh thingthi a tawngtai a nghah ngai mahse ka nghak ang" a ti. 

Keini pawh hian, Pathian aw kan hriat theih nan kan nghah peih a tul thin a. Thutlukna dik lo siamthat lehna tur hian, a thla a thla fete, a kum a kum fete a daih thina, hei vang tak hian thutlukna tha ber kan siamna tura Pathian aw nghaka darkar 5 emaw, darkar 10 kan hmang emaw a nih pawhin, a manhla zawk tho tho a ni. Kan Pathian chuan thutulkna a siam sual ngai si loa.

Lal Davida nun kan en chuan, a dam chhung zawnga indonna a hmachhawn hneh vektu a ni, a chhanchu indonnaa a luh hmain Pathian aw a ngaithlaa, Pathian hnenah ka han bei a ngem, min pe (heh tir) a ngem a ti thina. Tichuan, Pathian aw a hriat chu a zawma, a chak phah bawk thin a ni. Pathian aw ngaihthlak thin i tum ve ang u.

Hei hi ka hrilh duh che chu a ni, "zam mai suh Pathian fa i ni. I tih tur tak i tih theih nan, a aw i hriat theih hma chu amah ngaithla la, a aw i hriat chu zawm bawk la, bei leh rawh le.

Lalpan chhanchhuah che a, nun tha ber pek che hi a duh asin."

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Lalpa Mi Hmante Hi Thil Lian Tak Ti Thinte An Ni Lem Loa, Thilte A Rinawmte An Ni Fo Zawk

"LALPA, i puan inah chuan tunge lo miikhual ang? I tlâng thianghlimah chuan tunge lo awm ang? Dik taka awm a, fel taka tia, A rilrua thutak sawi mi chu."(Sam 15:1-2)

I rin aiin Lalpa vanga dikna i thlannate leh ngilneihna hote i lantirnate khan chanchin tha a hril ring ang.

Vawikhat chu kan Mizoram officer pakhat, MCS pakhat vuinaah ka kal alawm mawle. A ni kha pastor fapa a ni naa, mahse Pathian thu han sawi hluah chi chu a ni lem loa, inkhawm leh thawhlawm pekte erawh a ngai pawimawh viau thung chuan ka hria a. A pa in a zirtir tha viaute pawh a nih a rinawm, an pafa chanchin an saw dan ka hriat pakhatah phei chuan chu MCS chu junior te a nih laiin zan khat chu a pa ava phone a, ka pa hei pawisa a bang nual mai a, ka lo hawn ve mai dawn mi a ti a ni awm e. A pa chuan engmah dang sawi set set loin a hmingpumin a koha "bang mai rawh" a ti a ni awm e.

Chuta tang chuan dik em em in, sorkara a hna thawhpuite zah kai khawpin a nung chho taa, office a tlai ngai loa, a stuff te leh a thawh puite dik tak leh tha takin a enkawl a, a thawhpui a, lehkha chhuak tur a ti tlai ngai lo bawk a.

A thihniah chuan rawngbawltu ropui tak pakhat thlah liam ang mai hian, rawngbawltu an kat nawk a, officer hote leh sorkar hna thawk ho tam takin, Krista pasal tha kan hmaa entawn tur tam tak hnutchhiahtu kan thlah ta, tih rilru pu niawm takin an thlah a, ka hriat sual loh chuan a kuang pawh MCS tih coata chuang ha ho ngatin an zawn ni ta in ka hria.

Chu lo pawh chu pa pakhat sumdawng dik deuh mai hi ka hria alawm mawle, a tax pek kha a tam em em mai a, a fapa upa ber ngaihdan a ni lo hial nghe nghe a, ka pa in dik taka tih a vei tlat pek alawm mawle a ti nuah nuah a, cheng nuai fe chu sorkarah an chhung thin a.

Mahse hun a kal a kal a, a fate officer an ni thuai a, a sumdawnna chu mak tak maiin a thang zel a, an mahni dawr duhtu a tlarin an in tlar hial thin ani.

Kan sawi duh tak chu, kan nun hi Lalpa chanchin tha mila kan nun ngam chuan, Lalpa hian mak tak maiin min chawimawi ngama, nasa takin mal min sawm ngam bawk a ni, tih lai hi a ni.

Lalpa puanin a mikhual turin, dik tak leh fel takin kan nun hi hmang ila, thil i ti thin ang u.

Min Awmpui Lohna Tur Hmunah Min Dah Ngai Lo, Lalpa I Rinawm A Ni

"A thar zêl thin tûk tinin, i rinawmna a ropui e."(Tah Hla 3:23)

Kan Pathian rinawm zia hi chu aw, sawi ngaihna pawh hi a awm lo a ni ber.

Chutih rual chuan, tiang hian i nunah i inzawt ve thin em, chutiang taka Pathian rinawm leh hmangaihnaa khat chu, ngatinga ka mangan lai hian a rawn chet mai loh tiin.

Ni e, kan mangan ber lai hian a chang chuan reh hmak mai hi a thlang zawk emaw tih mai tur a ni, a chhanchu a kal kawngah, kan zin kawngah zawk hian zirtir duh min lo neih thin vang alo ni.

Abrahmana nun kan en chuan fa a tiam a, hun rei tak a nghah tir a, Pathian an nghak zo loa, bawihnu nen fa an lo nei a, mahse a hun takah Lalpan a tiam fa chu a neih tira. 

Abrahama'n a fa neih tur Isaaka a nghah lai khan, Lalpa zahngaihna nasat zia te leh tisual mahsela a ni chuan a thu tiam chu a hlen zel dawn tih hi a tih chian bakah, vana arsi zat thlah ala nei dawn tih thutiam kha a ti nghet a, chu chu a takin a thleng mek zela.

Abrahama hi Israel te thlahtu a nih rual hian, rinna pa a nih avangin rinnaa kristiante thlahtu a ni a. Israel piang tawh zawng zawng leh Kristian piang tawh zawng zawng chhut hian arsi zat thlah a nei tawh hial ang tih a rin theih awm e.

Abrahama hnenah Isaaka hlan rawh a tih khan, Lalpa rinawm zia alo lang fiah leh zuala, a fa tiam a hming chhawm chhotu tur kha hlan turin a ti tlat maia, Abrahama chuan thuawi takin hlan tak tak a tuma, mahse Lalpna Isaaka a hlan a Abrahama hnena a thu tiam a chhiat kha alo phal awzawng loa, hlan turin beram a pe ta zawk a. 

He tah hian Lalpan enge Abrahama zirtir a tum tak ang. A harsat ber lai leh hmangaihtu Pathian a nih zia a rinhlel awm rum rum lai leh min hruaina chu hmangaihna vang a ni tih reng reng a an loh hnuah pawh, Lalpa chu rintlak a nih zia leh anin a hun ruatah min zirtir duhte min zirtir hnuah, a thu zawmtute leh a kawnga kal tlatte tan a rinawmzia nasa zawkin a lan tir thin tih hi a nih a rinawm.

Kan zin kawngah zawk hian zir tur alo dah thin a, chu zin kawng chu zawh hlei thei lo khawpin chau thin mah ila, anin min kai chungin kan zin kawng min zawh puia, kan thlenna hmun tur tak chu min thlen tir a tum thin.

Kan Pathian hi ava rinawm tak em. I ring ngam ang u, min awmpui lohna hmunah min dah dawn si loa.

Hawh U, Lalpa I Nghak Ang U

"Tichuan chu mi zan chuan heti hi a ni a, LALPA vantirhkoh chu a thawk chhuak a, Assuria-ho riahhmunah chuan mi nuai khat leh singriat leh sangnga a tihlum a, tin, zing taka an han thawh chuan, ngai teh, mitthi ruang hlir a lo ni ta mai a."(II LALTE 19:35)

Lalpaah i beiseina ila nghat em?

Kum thar kan chuangkai leh taa, beisei ai kum tir atang i tal buai nghal em le, kumin febuary chu kum dang zawng ai V.day ka huphurh te ilo  ti em? Chutiang a nih loh pawhin, thil dangah harsatna nasa tak ilo tawk zawk!

Ka hrilh duh che chu, kan Pathian hian a thei, a nei a, a thawk tin bawk a, a hmangaih che tih hi a ni. 

Assuria hovin Juda ho run an tuma, Jerusalem a Juda lal Hezekia chu, Assuria lal Senakeriba hoten an rawn vaua, la Hezekia chu a hlau thawng em em a, Lalpa inah kalin theih tawpin Lalpa a au a, tichuan Lalpan a chhanchhuak taa. Zan khat thilthuah Assuria sipai ho mi nuai khat leh singriat leh sangnga (185000) lai Lalpa vantirhkoh chuan a tihhlum sak ta a ni.

Kan sawi duh lai tak chu, mangang ngawih ngawiha, Lalpa au vawn vawn a, i tel lo chuan Lalpa ka thei lo tia, amah autute tithlawn duh ngai lotu kan Pathian hi ala ngai reng a ni. Lalpa au leh ang u.

Tin, Lalpa kan au a nih chuan thil dangah beiseina nghat lo ang u, Hezekia pawh khan amah pui turin lal dang a sawm thei, an hun lai phei chuan Juda leh Israel lalte khan ram dang lal an mahni pui duhtu an neih nual a rinawm a, mahse chung lalte puihna chu beisei duh loin, lal Hezekia chuan Lalpaah chuah a beiseina a nghat a, ti fuh chaih chaih tak a ni.

Kei ni pawh hi "tih fuh ve chaih chaih" kan duh a nih chuan, thil danga kan beiseina, keimahni remhriatna leh thiamna ngeite, kan chhungte leh kan thiante leh kan hmelhriat thiltithei nia kan hriatte laka kan beiseinate hi dah bo ila Lalpaah chauh kan beiseina i nghat ang u.

Amah chuaha beiseina nghata, a thu zawmtute tan chuan a thawk nasa thin teh asin, Judate tan pawh khan Lalpa kha an che nasa mai mai khawpa, Assuria mite hneh tur khan Juda mi pakhat mahin, an fei emaw an chem emaw an lek pawh a ngai lo, chu mai pawh chu ni nang tuisik no khat pawh an seng loa, an thlantui farkhat pawh a far lo, Lalpan a do saka a hneh sak mai a ni.

Lalpaah chauh kan beiseina kan nghah a, amah chauh kan en a, a thu kan zawm chuan, Lalpan Juda ho a thawhsak ang chiah hian, keini tan pawh a thawh ve ngei hi i ring ang u. Chutih rual chuan, kan thu mai mai tur a ni lo, Lalpan tih tur min hrilh anih chuan kan ti tur a ni, mahse tih tur min hrilh lem lo a nih chuan, tawngtai leh a rawngbawl thulh loin amah nghah mai a pawimawh ber a ni. A chhanchu tirawh min ti tih pawh kan hriat loha a rem chang ang ang kan lo tih ve hian, kan khawih chhingpen tam mai mai thin.

Hawh u, Lalpa i nghak ang u.