Covid- 19 Vanga Kan Pawn Chhuah Theih Lohna Hi, Chhungkuaa Rawngbawlnan I Hmanga Tangkai Ang U

"Tin, LALPA rawngbâwl hi a tha lo awm anga in hriat chuan vawiinah hian tu rawng nge in bawl dawn thlang mai rawh u; in thlahtuten Lui rala a rawng an bawl thin pathiante kha nge, in luah ram Amor-hote pathiante kha? Kei leh ka chhûngte erawh hi zawngin LALPA rawng ania kan bawl dawn ni," a ti a."(Josua 24:15)


Coronavirus len vangin, inhumhimnan kan chhuak thei lo ta sa sa, haw u he kan chhuah theih lohna hi, kan bula awm reng leh kan hmangaih ber kan chhungte tana thiltha tihna hunah hmang ila. Kan chhungte chhungah hmangaihna lan chhuah tir ang u.

Chutianga kan tih chuan, hna kan thawh theih laia kan hmuh hman mang thin loh kan chhungte hian Lalpa neitu kan nih zia an hria a nga. Kan Pathian a rawng kan bawl sak a hi Pathian tak a nih zia pawh an hriat phah a nga, a rawng pawh an bawl chak ve thei hial a ni.

Mahni in theuhah awm tur an ti bawka, inkhawm pawh kan thei lo bawk a, hawh u kan chhungkua'in inkhawm ang u.

Hawh u, hun ren lek loin kan chhungte nen Pathian thu sawina remchangah i hmang ang u.

Chhungkua a Pathian thu puang chhuak tur hian bul tantu an awm a ngai thin a, chu bul tantu a chu nang leh kei hi nih i tum ang u. Ka pain, ka nuin, ka unautein ka pasal ka nupuiin tan rawhse ti mai loin keimah, Lalpa hmangaih fa ngei hian, kan chhungkuaah Pathian Lal zia ka puang chhuak dawn tiin bul tantu ni ang u.

Joshua khan, kei leh ka chhungte a ti, first person ah, amah kha hmasaah a indah a ni, keiman bul ka tan a nga tichuan, ka chhungte pawhin min zawm ve a nga tichuan, "kei leh ka chhungte zawngin Lalpa rawng ania kan bawl dawn ni" a ti, ti ila kan sawisual awm lo e.

Tin, Lalpa hian amah biak kawngah emaw, amah tih kawngah emaw, bul tan hmasatu hi a malsawm thin bawk a ni. Joshua leh a chhungte pawh kha Israel fate zingah "kei leh ka chhungte zawngin Lalpa rawng ania kan bawl dawn ni" ti hmasatu chhungkua an bawk a, Israel hnamte ram insemnaah khan ram tha bik Lalpan a pe a, midang chu a hnam angin Lalpan ram a pe a, Joshua te chhungkua erawh kha chu a chhungkaw bil bikin ram a pe a nih kha, Lalpan a dah pawimawh (special) khawp mai.

A mimal zawng pawhin, chhungkaw zinga Pathian biak leh tih kawnga hma la hmasatu, Abrahama te, Mosia te, Josepha te etc, heng mite hi an chhungkaw zingah upa ber an ni lo, mahse Lalpa tih kawngah hma la hmasatu an nih avangin chhungkaw roreltu leh chhungkaw zinga Lalpa khawngaihna leh malsawmna dawng nasa bikte an ni.

Keini pawh hi, Lalpa dah pawimawh bik mi kan nih duh chuan, kan chhungkaw zingah Lalpa biak kawnga hma la hmasatu i ni ve ang u.

He hun hi, a tamthei ang ber chhungkuaa Pathian biak ho nan hmang ang u, tin a bul tantu nih i tum bawk ang u. 


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.








Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Pathian Kan Auh A, A Ngawih Tlat Chhan Chu Min Sawizawi A Duh Vang Alo Ni Thin

"LALPA-ah chuan chawl la, amah chu nghak fan fan rawh."(Sam 37:7a)

Pathian i au a, engtin mah a chhanna i hre lo em?

Hengtiang dinhmunah hian i ding a nih chuan, Lalpan amah la nghak turin a ti che tihna a ni thei.

Kan thianpa lehkha thiam em em mai hi, a hna zawn kawngah a tluang loa, vawikhat phei chu MPSC combine exam a pe a, a rilru buai lutuk chuan a paper te chu alo submit theihnghilh a. Pathian a beisei si, rawngbawlin hun eng emaw chen kal tawh hialte a lo ni bawk nen, "ka beidawng tawh Pathian hian tih tur tal hi min hrilh se, ar vulh mai rawh min ti a nih pawhin ka ti ang" tiin beidawng takin min hrilh a.

Chutiang ang deuh chuan, kan nun hrang hrang kan eizawnnaah te, fa kan enkawlnaah te, hna kan zawnnaah te, kawppui kan zawnnaah te mangangin kan awm em? Hetiang hi kan dinhmun a nih chuan, huaisen takin Lalpa i nghak ang u.

Min pek tur a that viau chuan Lalpa hian, a dawngtu turte hi min sawizawi nasa thin a ni.

Josepha nunte kha han en ta ila, Aigupta hotu lu ber nihna atanga a chhungkuate leh Aigupta leh khawvel hmun hrang hrang mite chhan chhuaktu nih tir a tumna kal kawng kha.

Bible ah inziak chiah lo mahse, a chhang chuan Josepha khan Lalpa Potiphara chhiahhlawh hi ka ni hlen tawh mai ang emaw, tanin enkawltu chhiahhlawh lu ber hi ka ni tawh mai ang emaw, rama ran vulhtu pangngai hi ka ni tawh mai ang emaw a tih ve ka ring thin. Mahse Lalpa chuan a tana dinhmun tha zawk a buatsaih sak tawh avangin, a dilna chu a chhansak loa, a hma hun tur pawh a hriat lawk tir duh loa, Josepha chu a innghah tir zela, a sawizawi zui zel a ni.

Tichuan Lalpan hun a tihah leh Josepha'n a uanute chunga phuba la lo tur khawpa, a zirthiam hnuah, finna bik Josepha a pe taa, chu a finna chu a hun tak leh a hmun taka a hman theih nan engkim a remfel sak bawka, zankhat thilthu lekah mumang hrilhfiah theihna a pe a, economic strategist ropui a nih tir a, chu chuan hotu lu ber a nih tir ta a ni.

Lalpa kan nghah laia, kan beidawn tawh vanga a hnena dinhmun pangngai kan dil kan dil lai hian, Lalpa chuan kan nunah thil lian tak tih alo tum ngar ngar thunga, min zirtir duhte chu kan zir zawh hunah mi pangngai chanvo ni lo, mibikte chanvo chu min pek mai turin a peih sa diam a ni.

Pa fing chuan an fate hi, kum 15 lek an nih laiin lirthei a lei sak ngai lo pawh ni mai loin a khalh dan zir pawh an phal ngai lo. Pa chuan an fate an hmangaih zia kan hre vek ang, ka fa nat ai hian na zawk ila te an ti hial thin a nih kha maw. Tichuan, pa chuan a fa chu a zirtir a zirtir a, inngaitlawm turte leh hawihhawm turte in a zirtir thin a. A fa chu mipangai tak leh nun hmang thiam tak a ni tih a pain a hriat chian hnuah chuan, a fa hnenah chuan lirthei chauh pawh ni loin, a dam chhunga a thawhchhuah zawng zawng a pe thin a ni.

Mahse, a fa chu kumah leh hriatnaah ala naupan chuan a pain a fa dilna zawng zawng a pe lo a nga, a zawhna zawng zawng pawh a chhang kher lo ang, a chhan chuan a fa ngaihtuahna no leh mawl chuan a hrethiam lo a nga, a nih tur ang a nih loh phah thei tih a hriat vang a ni. Chu ai chuan pa chuan, nakina a fa ala pek turin mawhphurna a ken telte chu, a fa in a hlenchhuah theihna turin a fa sawizawia zirtir chu a ngaipawimawh ber ang.

Pathian pawh hian, hetiang ang chiah hian, kan zawhna zawng zawngte min chhang kher lo thin.

Mi thenkhat chu hetiang dinhmun a an din avang hian, Pathiana an rinna te an hlauh hial thin a. Pathian hi a awm chiang em em a, min vuan renga, min pek tur hlu em em chuan mawhphurna sang tak a ken tel dawn avangin, min sawizawi a duh a, chu vang chuan kan zawhna zawng zawng hi min chhang loa, "ka fa min en tlat rawh, ka awmpui che" tiin min chhang zawk thin a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.








Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

I Mangang A, Kal Ngaihna I Hre Lo A Nih Chuan, Lalpa Aw Ngaithla Rawh

"LALPA thuhriattir chu a rinawm a, mi mawl a tifing thin."(Sam 19:7b)

Kan mangang lutuk kal ngaihna kan hriat tawh loh tak hian, thil tha ber alo in herchuk duh chawk asin.

I eizawnnaah emaw, i kawppui zawnnaah emaw, in nupa inkarah emaw, i fa chungchangah emaw, i mangang a kal ngaihna ilo hre tawh lo a nih chuan, thil tha deuh a ruk tein kalo hrilh ang che"Lalpa aw ngaithla rawh" tih hi.

Lalpa hnenah chuan, Lalpa ka mawl a, keimah mai chuan ka ngaihtuah chhuak zo lo ti la. A aw i hriat hma chu zing chhun zanin han ngaithla teh le, a aw hre tura a duh hunah che chuan a hriattir em em ang che.

Mihring hi mak deuh mai chu kan lo chapo khawpa, tih dan tur kan hre tawh lo na na na, kal ngaihna kan hre tawh lo na na na, kan la in tifing cheu thin a, chu chuan Lalpa hmaa inngaihtlawm har min tih tir thin a, hei vang hian kan buaina ata kan tal chhuahna tur atana thu fing ber, Lalpa aw a, a thu  awm hi kan hriat loh phah thin a ni.

Kal ngaihna kan hriat lohna tak hi, Lalpa aw dawnna atana hun tha, apportunity tha leh chu a aw atanga a thu fing lo chhuak kan zawmna atanga kan nun a tha zawka, inthlakna hun tha a ni tih hi hria ila, Lalpa aw ngaithlain i nghak ang u.

Hei hi kan in pawm a ngai, mi mawl ka ni tih hi, nang leh kei hi mimawl ni loin mi thil hria ni ila chuan, kal ngaihna kan hria ang, kan buaina chin fel dan kan hria ang. Chutiang khawpa kan fing a nih chuan, khawvela mifing ber leh vantirhkohte ai pawhin kan fing tihna pawh alo ni bawk ang. Vantirhkohhote he khawvel din hmaa awm tawhte pawh khian, an fing tawk lo, an chak tawk lo tih an hriaa Lalpa thu leh a aw an nghak thin asin. Chu tak chu an finna a ni thin.

Lal Davida a fin bikna leh a tluan biknate, Paula a rawngbawl kawnga a that bikna te leh rawngbawltu ropui kan hmuh ve phak, Billy Graham te, Joyce Meyer te an lo fin bikna leh an lo tluan bikna chu, Lalpa aw hre turin an lo ngaihthlak vang leh a thu an lo zawm thin vang a ni.

Hawh u, kan buai lai chauh pawh ni loin nitin Lalpa aw hi i ngaihthla ang u. Tichuan, mifing bik leh mitluang bik kan lo ni dawn a ni.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A