I Tlukna Hmun Atang Ngei Khan Lalpa Au Rawh

"I chungah, i chung chauhvah thil ka tisual a."(Sam - 51:4a)


Husop-in mi tifai la, tichuan ka fai ang: Mi silfai la, tichuan vur aiin ka var ang.(Sam 51:7)

Tlukna hmun leh tihsualna hmun ngeia Lalpa autute chu ding chungin an kal nge nge thin.

Jona pawh kha, Pathian tlan bo san a tumna hmunah ngei khan Lalpa a au a, Lalpa a au ei a nih kha.

Davida pawh kha, minu a uirena nun atang khan inchhir takin Lalpa a au a, Lalpan a khawngaihna a lantira a aiawhtu tur Solomona a uire hmeichhia nena an inkarah ngei khan a pian tir a nih kha.

Tunlai kan khawvela Pathian fakna hla ropui kan tih heng, Healer te, Glorious Ruins te etc. pawh hi chak lohna hmun a Pathian auhna leh fakna a ni, a tih thei awm e.

Healer phuahtu hi Michael Guglielmucci a ni a, porn edict a ni a, fak hla saa rawngbawltu hriak thih a ni si, a nun hah lutuk chuan :- Ka nun zawng vuantu i ni, ka nun tuifawn damtu.. Ka ring e, ka damna i ni.. (You hold my every moment, you calm my raging sea... I belive your my healer) tiin Pathian alo au a ni. 

Michael Guglielmucci hi a tawp a tawpah chuan a in thup thei ta loa, a mualpho taa, chutia miin an dem huai huai lai ngei chuan, American worshiper ropui Kari Jobe chuan, album a siam dawn a, Healer tih hla chu dah a duh ta tlat mai a, miin tinge he hla hi dah i duha tia an zawh chuan, Michael'a hi Pathian hriak thih a nia, (lemchangin, dawt sawi) tisual mahsela hriak thihna hi kan inzah sak tur a ni, he hla ka albuma a tel tur hi ka lawm a ti nghe nghe. Kari Jobe chuan Healer chu an tichuak ve taa, Pathianin amaka makin a hmanga, dam lo eng emaw zahin damna an chan phah hial a ni. (Healer-Kari Jobe https://www.youtube.com/watch?v=Yzejd6r9DwE) He hla hi a mizo a, Moody Hmingsangzeli'n a sak, kan youtube channelah a awm nghe nghe, i en duh chuan tawngtai dan tur tih hnuaiah khuan, kan Y.T link kan dah e.

Glorious Ruins hi, Hillsong hla a nia Matt Crocker leh Joel Houston'a te phuah a ni. Mi chaklo thi thawh hial pawh hi, "Krista hmingah Krista avang chuan, tih nun leh kan ni" (let the ruins come alive in the beauty of your name) tihin, Pathian fakna atana an phuah a ni. Glorious Ruins hi an album hmingah pawh an vuah a, he album hian sawi neuh neuh leh duh khawp loh a hlawh hle a, achhan chu hun rei tak Hillsong worship leader lo ni tawh Darlene Zschech'i a chawlh hnua an album tihchhuah hmasak ber a ni. Insit ngawih ngawihin he album hi an puitlin pawh a rinawm a ni. (Glorious Ruins - https://www.youtube.com/watch?v=qgMV3_Md8MU)

Mi chuan, chak lo chung chungin, chak loh em avanga mual phona hung chhungah pawh, "Lalpa ka damna i ni" tiin an la au cheu a, mi chuan insit em emin, "chhe tawh hi Lalpa min siam thar leh thei" tiin Pathian auh an la bang duh lo a. 
Chu an chak lohna hmun ngeia Pathian an auhna hlaa chu, khawvelin mawi ala ti bang thei lo a nih hi.

Keini pawh hi, kan tlukna hmun ngei:
aw! ka rui palh leh ta,
aw! inneihna pawnah mipat hmeichhiatna ka hmang leh ta,
aw! ka eiru leh ta,
aw! ka thinrim leh ta,
aw! dawt ka sawi leh ta,

kan tihna hmun ngeiah hian, Lalpa i au ang u. Lalpa ka ngai che, min chhanchhuak rawh aw, tih hi i thlang ang u. Chutiang chuan kan tia, mahse kan tlu leh zel a nih pawhin, kan Pathian auh chu i bang chuang lo ang u i ti zel ang u. Pathian ngilneih bang ngai loa chuan min chhanchhuak duh si a.

(Tawngtai Dan Tur)
Lalpa, suala ka tluk lai reng pawh hian, i hmangaihna mit chuan min thlir renga, min chhanchhuak tura ka auh hun che nghakin min ngaithla reng a ni tih hi ka hriat renga, ka tluk lai ngei hian nangmah auh nachang che ka hriat theih nan min pui ang che, Amen. Ti ang aw.


Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.




Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Khawvel Perfume To "Greylocke Phlur" Siamna Hmanrua (Nun Rimtui Ber Lo Chhuah Dan)

"Inveng ula, rinnaah chuan ding nghet ula, intihuai ula, chak takin awm rawh u."(I Korinth 16:13)


Far thing chi khat Genus Pinus an tihte chu, tlang sang leh khawkrawk takah an to thin a, Meter 1800 - 3800 velah an to tlangpui a, chu chu Reiek tlang let hnih aia sang mah leh Phawngpui tlang aia nasa taka la sang a ni. An tona hmun chu tlangsang a nih avangin, tui tlingkhawm leh lui a tam lo hle a. Chu vang chuan, Genus Pinus farte chuan nasa takin an zung chu an hreuh chekchuk thin a, chu mai bakah an zung hi an kaih thuk em em bawk thin a ni.


Chu thing, hmun khawkrawk taka to chhuak chuan "hriak rimtui ber mai" a chhuah thin a. Khawvel perfume to leh lar tak 'Greylocke Phlur' pawh hi Genus Pinus far atanga siam a ni nghe nghe a ni.


He tiang ang chiah hian, "ringtute hi nun rimtui leh man tam em em mai" kan chhuah dawn a nih chuan, hmun khawkrawk tui tlemna hmunah ngei hian, than tuma zung kan lo kaih tang tang a ngai a nih hi. Kan zungin tui a chawina chu a thuk poh aleh kan nun rim chu alo tui mai dawn a ni.


Pangpar leh thei atanga perfume siam Victoria Secret perfume te chu Rs 800 - 4000 a nih laiin, Genus Pinus far atanga perfume siam Fille En Aiguilles leh Greylocke Phlur perfume tlawm ber pawl pawh Rs 6700 - 7300 vel a ni thin a.


Hetiang ang chiah hian, hmun khawkrawk leh chhingchhia a kan nunin zirtur leh eitur a chhar chhuahte hi, hmun zawla eitur a hmuhte lakah chuan a to lawr lak bakah, a hlu zual a, a tangkai bik bawk thin a ni. 


Hei vang tak hian, beih leh fat fat a ngai emaw, thlantui leh mittui nena kal a ngai emaw, rimtui bik chhuahna tur a ni tih hriain Lalpa chelh tlat chungin huaisen takin i kal ang u.


Inveng reng chungin, rinnaa awm tlatin, intihuai sauh sauh chungin, mahni leh mahni Lalpaa intichak chungin i kal zel ang u, kan kal zel miau chuan hma kan sawn zel tihna a nia. Kan kal ngam tawh lo a nih chuan kan hnungtawlh tihna alo ni thin.


(Tawngtai Dan Tur)
Lalpa, nun rintui ber ka neih theihna tur atan nangin hmun khawkrawka zung kai turin min hruai avangin ka lawm e, heng hunah hian i duh ang ngeia ka than theih nan min awmpui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

I Pil A Phal Lo

"Ngawi la, awm hle hle rawh!" a ti a. Tin, thli chu a bang a, a lo reh ta thup mai a."(Marka 4:39b)

I tih tur tak Pathianin ti rawh a tih ngei i tih kha, thlipui leh tui fawn in a nuai loh phah dawn lo che a, a nuai dawn che. Mahse, ti tlang tho rawh, thlipui leh tui fawn te, ngam loh Pathianin a awmpui dawn che alawm, i pil a phal lo ang.

Mahse, chutiang ni loa, a pum pelh zawnga i chet vaih chuan, kawng mam em em, thlipui leh tuifawn awm lohna hmunah ngei khan, i inchhuih palh a nga, thawh leh theih a nih rualin thawh a har khawp ang.

Thlipui leh tuifawn kara Lalpa min pui rawh aw, tia kan au kan au thinna kawng zawk a hi, Lalpa kawng min lo thlan sak chu a ni thin a. Chung thlipui leh tuifawnte chunga len min lo zirtir hi alo ni thin.

Noa kha tuk rawh a tih ngei lawngah khan, a chuanga mahse tuifawnin a nuai ngei a rinawm (bible ah ziak lo mahse, tui a len chuan chutiang chu a ni thin a) mahse, a pil hauh lo. Zirtirte pawh kha, Isuan i chuang ang u a tihna ngei lawngah khan an chuanga tuifawnin a nuai nek a an zam a, an lawnga chuang ve Isua kha an han kaitho a tuifawn leh thlipui kha a hau reh a nih kha.

Isua chuan thlipui leh tuifawn kal hmang kha a hre em em a, a chhanchu ama siam a nia, hlauh tur a ni tih pawh a ngaihtuah lo hial ang.

Kan Pathian hian, kan nuna kan harsatna tuifawn leh thlipui hi a kal hmang a hre em em a, a chhanchu he khawvel hi a siam a ni a, harsatna te hi siam lo mahse la, khawvela  harsatna awm thei hi a hre em em a ni. Chu vang tak chuan a hnung zuitute tuifawn leh thlipuiin a nuai hian, a rawn che thin a, a hnung zuitute chu an pil a phal ngai lo a ni.

A hnung i zui chuan, kan Pathian hian i pil a phal ngai lo ang, a hnung zui ang aw.

(Tawngtai Dan Tur)
Lalpa, i hnungzuitute kawng tura i buatsaih chu tuifawn leh thlipui ten a nuai thin kawng a ni a, mahse an pil i phal ngai loa, he kawngah hian min awmpui reng dawna ka pil dawn lo a ni tih hi hre rengin ka kal zel theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Nangmah Hualtu Che Kha, Pathianin A Hual Zawk

"LALPAN Suria sipaihote chu tawlailir thâwm te, sakawr thâwm te, sipai tam tak thâwm te a hriattir a ni a; tichuan, "Ngai teh u, Israel lal hian Hit lalhote, Aigupta lalhote hi min rawn bei tûrin a ruai anih hi," tiin an inbia a. Chutichuan an tho va, thimhmulah chuan an tlanche ta a, an puan in te, an sakawr te, an sabengtungte leh an riahhmun chu a awm ngai ngaiin an tlansan a, an tlanche ta chiam a."(II Lalte 7:6-7)

Suria hoten Israel khawpui Samari chu hun rei tak an hual tawh avangin, tam nasa tak a tlaa, thuro ek pawh ei atan an hralh hial tawh a. ("sabengtung lu hi tangka sawmriatah an hralh a, tin, thuro ek hi kab hmun lia thena hmun khat tangka ngaah an hralh hial a." Lalte 6:25 )

Israel lal Jehorama pawh chu a manganga, a puan a pawtthler a, saiip asin a. Chumi hnu hun rei lote ah chuan, Elisan Pathianin Israelte tan thiltha a thlen tir tur thu a puanga, mahse sipai ho zinga awi lotu erawh kha chuan engmah thiltha a chan loh tur thu a sawi bawka.

Tichuan, phar hoin  Suria sipaite an thlan chhiat thu lal an rawn hrilh a. Suria sipai ho chu Pathianin thawm hlauhawm tak a hriattira chu chu hlauin, an thil neihte pawh la loin an tlan chhia a ni.

Suria sipaite khan, Israelte kan hual an ti a, dik pawh an ti dik a, an hual ngei reng a ni. Mahse, Suria sipaihote kha, Israelte hmangaihtu Lalpan a hual ve thung a, a hun takah a Pathian zia leh Israelte hmangaihtu a nih zia a rawn lan tir ta a ni.

Hetiang chiah hian, khawvel buainaten min hual a, nasa takin min ti tam zoa, min ti mangang bawk thin. Mahse, heng buaina zawng zawng hi kan Lalpan a hual ve thunga, a duh duhin a khawih kawi thei thung a. Amah ringtute tan chuan a hmangaihna leh a rinawmzia a hun takah a ti tlang thin a. 

Chutih lai chuan, Israel sipai zinga ring ve lotu khan, Lalpa ringtuten thiltha an chan lai chu a hmu a mahse a chang ve loa, chu mai pawh ni loin a nunna a chan hial ta a ni.

Hei tak hi a pawimawh lai chu a ni, Lalpa rin bansantute hi inchhir lo an awm ngai loa, beisei awm pakhatmah a awm loh lai pawh a, Lalpa rin thlang tlattute hi nihlawh lo an awm ngai lo bawk a.

Lalpa rin i tlang zel ang u, kan thinlung a na mek emaw, tlachham khawpin kan dinhmun a harsa emaw, eng dinhmunah pawh ding mah ila, a hun takah a rinawm zia alan tir dawn tih hre tlat ang u. A ni chuan min hual vel reng si a.

(Tawngtai Dan Tur)
Lalpa, min hual veltu buaina zawng zawngte hi nangin i hual zawk a, zam tur kava ni lo em, i rinawm zia a hun taka ka hmuh theih nan nangmaha ka rinna hi ka thlah lohna turin min pui ang che. Amen. Ti ang aw.

Mihring Hmel Leh Neihte Ni Loin, Mihring Personality (Zia) Kan Nei Zawk Thin

"Tin,rinna hi thil beiseite awm ngeia hriatna,thil hmuh lohte hriatfiahna a ni."(Hebrai 11:1)

Ringtu tha nih tumin i theih tawp i chhuah a, i kawppui zawnnaah "Min tichaktu (Krista) ah chuan engkim ka ti thei" tih kha a lang si lo tiro. A reh rawih rawih mai a, tumahin an ngaihsak lo che a, tumah han ngaihsak dan hran pawh i hre bik lo a tiro!

Khang hunah tak khan han in uluk zual la, Lalpa han auh belh chhah leh teh. He tiang hunah ngei hian mi then khat chuan, mihrin ve deuh a ngai a nih hi, in lak zei (jei) ve deuh a ngai a nih hi an ti a, an tisual thin. 

Tin, Pathian a innghahna nei lutuk lem lo pawhin biak in hawngin, thianghlim takin nupui pasal a neih theih a, chutih rual chiah chuan biak in hawnga inneih pawhin a inthen theih a, Pathian Lalna ni lem lo, nupa nun a pian tir theih a, hei tak hi kristian nula leh tlangval tan a hlauhawm a ni. A langah chuan he nun hi a mawi a, a langah chuan he nun hi a duhawm viauin alang thei. Mahse, lang loah chuan a rapthlaka, a na a ni. 

Chu nuna chu kan pum pelh theih nan lang lo Pathianah hian kan innghah tang tang a ngai a ni.

Lang lo Pathiana innghat Josepha kha, nupui pek a nia, Pathian mihriat Manasea leh Ephriama a hring a nih kha. He nun hi Lalpan keini tan pawh a buatsaih a, a hun ruata min pek tura chu min peka, a hriat chhungkua kan din theihna nun hi kan neih a duh a ni.

Chu chhungkua din tur chuan, engmah lang lo mahsela, engmah hriat tur awm loh mahsela, Lalpaah kan thinlung lang lo hi nghat ila, kan Pathian Langloa thu i zawm ang u.

Mihring hian hmel leh landanin kawppui atan mi tha kan zawng thin a, mahse a tawpah chuan mi-a lang lo kan nei thin, chungte chu: che ziate, rilru put hmangte, nachang hria leh hre lote, fing leh mawlte, etc. Hmel emaw, sum emaw kan kawppuiah kan nei loa, personality (zia) kan nei zawk thin alo ni. 

Hei vang tak hian, thinlung tha kan ngaihven a pawimawh ber a nga, tin mi-ah thinlung tha kan hmuh dawn chuan, thinlung zawng zawng hmu tlangtu kan Pathian hi, ka belh tlat a pawimawh a ni.

(Tawngtai Dan Tur)
Lalpa, kawppui ka neih hunah hmel leh hausakna ka nei dawn loa, personality ka nei dawn a ni tih hi ka hriat renga, thinlung tha zawn nachang ka hriat theih nan min pui la, mi-a lang lo lai an thinlung ka thlir thiam theih nan, nangmah lang lo Pathiana ka awm tlat theih nan min hruai ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

A Chak Zia Ka Hriat Theih Nan, Ka Chak Loh Alo Ngai A Nih Hi

"Ka thiltihtheihna hi chak lohnaah asin tihfamkimin a awm ni" (II Korinth 12: 9b)

"Ka chak loh apiangin ni ka chak thin ni." (II Korinth 12: 10b)

Kan Pathian hmangaihna thuk
 zia hi, ngaihdam ngai ngawih ngawih nia inhriatna atang lo hi chuan a fiah mawh hle a.

Kan Pathian chakna pawh hi, kal ngaihna hre tawh lo khawpa, dinhmun harsaa din loh chuan a fiah tak tak thei lo bawk a ni.

Hei vang hian, Lalpa nena kan chak lohna kan hma chhawn a nih phawt chuan, kan chak lohna te hi, chak lohna nihlawh thlakah alo ni zawk thin a ni.

Ni e, ringtu nun ngil lutuk chuan thiltihtheihna a tlachham thin a, ringtu nun chhuk chho leh tap chunga kal zawk hian, rimtui ber leh par mawi ber a chhuah fo thin.


Paula pawh khan, chak lo a in tia, mahse kan Lalpa chuan chaknaah ni lo, tawngtai tamah pawh ni lo, ka thu hriat tamah pawh ni lo, insum theihah pawh ni lo "chak lohnaah" zawk ka thiltihtheihna chu tih famkimin a awm a ti. 

A chak lo zawk hi, alo phet alo phet ve theih chhung chu, a chak zawk alang thei si lo a nih hi.

Paula ngei chuan, a chak loh apiangin nasa zawkin Pathian lam a hawia, a insiam thaa, Lalpan a hmangaih bang lo tih a hriaa, tichuan "Ka chak loh apiangin ni ka chak thin ni" a ti ta a ni.

Hawh u, kan chak loh apianga kan chak sawt theihna tur khawpin, kan chak loa kan tihsual veleh Lalpaah insiam tha turin nasa takin i bei ang u.

(Tawngtai Dan Tur)
Lalpa, nangin michaklo leh tisual thinte i haw loa, nangmah hawi sana i lama kir duh lote zawk a ni i huat thin tih hi hriaa, chak leh zualna ka chan theih nan, ka chak loh leh ka tihsual nasat ber lai a insiam tha tura, i lam ka hawi tlat theih nan min kai hruai ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

I Confi (Inrintawk) Theihna Tur

"Ka riruang la famkim lo chu i mitin a hmu a, I lehkhabuah chuan ka pengte zawng zawng hi ziak vek a ni a, A ni tela siamin a awm zel a, A pakhat mah la awm hmain."(Sam 139:16)

Tu pawh hmachhawn dawn la,

Eng thil pawh tawn tlang ngai sela,

I star pawh hmachhawn dawn la,

I confi theihna turin hei hi lo hria ang che, "Pathian fa i ni" tih hi.

Hmeltha i in ti lo emaw, i hausa lo emaw, lehkha i zir sang lo emaw a ni thei e, Pathian fa i nih avangin midang neih loh thatna bik riau i nei tih hre tlat ang che, Pathianin a kut ngeia a siam i nih kha, Pathianin siam sual a nei ngai si lo a.

Tu pawh hmachhawn dawn la, eng dinhmunah pawh din la, hei hi nangmah leh nangmah in hrilh thin ang che, "Pathian fa ka ni" tih hi.

Pathian chu tunge? Pathian chu, van Lal a ni a, van Lal thutthlengah a thu a, lei leh van leh thil awm zawng zawng chungah ro a rel a ni, chu Lal fa chu i nia zam hlek suh ang che. Khawvel lalte leh ram hruaitute fa, an zam ngai ami? An ni an zam lo a nih chuan, keini Pathian fate hi zam tur kan va ni lo, nasa zual tak em. 

(Tawngtai Dan Tur)
Lalpa, i kuta i siam ngei ka nia min siam dan chiah hian ka tha ber a. Tin, Krista thisen chuan min tlan avangin i fa ka ni a, tu pawh eng pawh hmachhawn dawn ila, i fa ka ni tih hi ka hriat reng theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)