Remna Siamtute Chungah Lalpa A Lawm Thin

"Sual kalsan la, thil tha ti rawh; Remna zawng la, a umin um rawh."(Sam 34:14)

Remna zawngtute hi Pathian hian a ngaihthah ngai lo a. Remna siam hi sual kalsanna pawimawh tak a ni.

Kan rawngbawlpuite nen emaw, kan chhungkaw zing amite nen emaw, kan thiante nen emaw, kan eizawn pui leh kan hnathawh puite nen emaw, intihbuaina kan nei mek em? Kan nei mek a nih chuan remna siamtu zawk ni ang u.

Tin, tunah midang nen buaina kan nei lo a nih pawhin, midang nen buaina kan neih ve leha remna siamtu zawk ni turin inbuatsaih reng ang u. Remna siamtu kan nih hian, mihring hmaah chuan kan tlawm a nga, kan lang mawi lo pawh a ni thei e, mahse  Lalpa mithmuhah kan mawi thin a ni.

Remna siamtute chu Lalpan a ngaihthah ngai loa, a malsawm thin a, a ngaihsak reng bawk thin a ni.

(Tawngtai Dan Tur)
Lalpa, nang chu lei leh van inkara remna siamtu i ni a, remna i siamna kawngah khan nasa takin i tuar a nih kha. Kei pawhin i hniak hnung ka zui ve a, remna siam tura aman pek ngaite chu ka pek ve theihna turin min tichak ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.



Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Tuna I Dinhmun Kha A Rit Tiro, Mahse Chak Lehzualna I Neihna Tur A Ni Asin

"Chakna atangin chak lehzualnaah an kal thin a, Zion-ah Pathian hmaah chuan an inlan theuh thin."(Sam 84:7)  

Gym a kal thinte hi a hma a an chawi zawh ngai lohte an chawi zo thin a, a hma aiin an tlan thei zawk thin a, a hma aiin sit-up leh push-up te pawh a thei zawk thin. A awm zia takah chuan, a hma aiin an chak zawk tihna a ni. Tin, gym a an kal hma pawhin mi pangngai,  chak tha pangngai an ni a, damlo leh hriselna a harsatna tawkte tan chuan gym a exercise lak ve chi a ni lo a, an chauh belh mai zawk dawn a ni. Mi chak pangngai leh hrisel pangngai, gym ah pawh kal lo mahsela chak thawkhat ve tawkte chauh kalna chi a ni.(chutih rual chuan gym chi hrang hrang a awm a nga.)

Hei ang chiah hian, thlarau nunah pawh hian, chakna atanga chak lehzualnaah kan kai dawn a nih chuan, gym a kal thinte angin, rit kan chawi ve a ngai thin a ni. Chu rit chu, lungaihna pawh a ni thei, ngaihzawng neih kawnga tluan lohna pawh a ni thei, eizawnna a tluan lohna pawh a ni thei, hrisel lohna pawh a ni thei bawk awm e. Chung ritte chu kan chak leh zual nan kan Pathian hian kan chawi a phal a ni, a chhanchu tuna kan dinhmun aia sang zawkah min dah a duh vang a ni thin.

Tin, gym a kalte chu mi chaksa leh chak pangngai an nia, mi chak lo tan chuan an rit lak ang te leh an insawizawi dan ang a insawizawi ve chi a ni lo ang hian. I rit chawi mek kha, mi chak tha pangaite chauh chawi theih chi a ni a, Lalpan i chak leh zualna turin a chawi tir che a, i chak loh vanga kha rit kha chawi i ni loa, i chak vang zawka chawi i ni.

Gym a kal rei tawhte chu midang zirtirtu (instructor) an ni thin a, chutiang chiah chuan thlarau kawnga rit chawi thin leh chawi thiam tawhte chu, midang hruaitu leh zirtirtu an ni thei thin a, chutiang mi ni tur pawh chuan Lalpan a duh che a ni.

Kan Pathian hian, kan awmna ngaia kan awm renga, lungawi taka kan awm hi a duh lo a, kan nih theih tha ber kan nih hi a duh a, chu vang chuan mitha atang mitha zawk mi nih tir a,  chakna atanga chak lehzualna min neih tir a duh thin a, hei vang hian rit kan chawi hi a phal thin a. Mosia pawh kha a beram vennaah khan a lungawi reng alawm, mahse Lalpa a lungawi ve lo thunga Aiguptaah a tir a. Josepha pawh a pa inah khan a lungawi reng a, mahse Lalpan a pa ina lungawi mai mai turin a duang loa, chu vang chuan, rit a chawi tir a nih kha.

Hawh u, lawm chungin kan rit chawi, kan harsatna leh manganna te hi i chawi ang u.

(Tawngtai Dan Tur)
Lalpa, tuna ka dinhmun aia sang zawk min pek i duh a, chuvang chuan ka nun hian rit a chawi i phal avangin ka lawm e, i duh ang ngei a chakna atanga chak lehzualna ka neih theihna turin, min zirtir i duhte chu ka zirthiam theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.



Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Puih I Mamawhna Zawnah Tak Khan A Pui Duh Che

"Tin, Thoma hnenah chuan, “I kutzungin han khawih la, ka kutte en rawh; i kut han ban la, ka nakah zen rawh; ring lovin awm suh la, ring rawh,” a ti a."(Johana 20:27)


Isua Krista chu kan sual tlan nan, a thia a tho leh a ni tih lai tak a hi, rin loh chuan, chhandamna a chan theih loh a ni. Chutiang khawp chuan, a thawh lehna hi a pawimawh a, mahse zirtir zinga chik ber leh fimkhur ber pawh ti ila kan sawi sual loh tur a ngaih, 'Thoma' chuan a ring hleithei ta tlat lo mai a.

Vawi tam tak Isua ngei pawhin a thia a thawh leh tur thu, entirna nen a hrilh thin sia. Chuting chung pawhin a ring thei loa, zirtir dangte pawhin an hrilha ala ringthei chuang lo, ti hian a ti zawk a "“A kuta thir khenna serte kha ka hmuh a, thir khenna serahte chuan ka kutzung ka khawih luh a, a naka ka zen meuh loh chuan ka ring lo vang,” a ti a."(Johana 20:25)

Chutianga a sawi ang tak chuan, Isuan "a nak fei chhunna kua a zen tir a, a kun thirkhen tlangna kua pawh a khawih tir a ni." Rin lohna hi, hremhum kal ngei ngeina tur khawpa sual lian a ni a, chu rinna chu a kebula a zirtir ngei Thoma'n a neih loh khan, Isuan hei leh chen hnuah pawh i ring lo a maw! i nih nih chu va ni mawlh teh. A ti lo a, a rin theihna turin, Thoma duh ang ngeiin a pui zawk a nih kha. Chutiang taka Thoma chunga Isuan a tih chhanchu, Isuan Thoma a hmangaih vang a ni.

"Rinna hi a pawimawh a, vanram chahbi pawh a nia, mahse rinna chungah hian hmangaihna a awm zel thih" ti ila kan sawi sual awm lo e. Rinna tlemte neitute hi Lalpan min hmangaih avang hian, kan rinna pawh hi tlingah min pawmsak a ni. Chu mai pawh chu ala ni lo a, rinna kan neih pawhin, a hmangaihna avangin rinnaah chuan min hruai luh bang loin a tum thin.

Thoma chunga Isuan a tih ang chiah hian, keini chungah pawh hian kan Lalpa hian a ti ve a 

1) Khawi lai nge i chak lohna lai chu, ka tichak ang che,

2) Eng sual hi nge i sim theih loh chu, sim turin ka pui ang che, 

3) Eng laiah nge hma i sawn theih loh, hma i sawn theih nan ka pui ang che, min tia.

"Ring lovin awm suh la, ring rawh"(Johana 20:27b) Thoma hnena a tih ang bawk khan keini hnenah pawh hian, i sim theih lohte, i chak lohnate, hma i sawn theih lohnate kha, keimah nen i paltlang thei tih, 'ring lovin awm suh la,' keimah nen kan hneh theia, kan paltlang thei a ni tih hi 'ring rawh,' min ti a ni.

Hawh u, Thom'n a rin theih dan tur a puan chhuah ang chiah hian, hmangaihnaa khat kan Pathian hnenah hian puih kan ngaihna zawn "kan chak lohnate, kan sual sim theih lohte, kan hmasawn theih lohnate hi" i puang chhuak ve ang u. Tichuan, a nin kan hneh theihna turin min pui dawn a ni.

Tin, Thoma atangin zirtur pakhat kan nei a, chu chu Thoma chuan a thinlung zawng zawngin Isua a ngaithla a, rin ngei a duh a, a tumna hi a ni.

(Tawngtai Dan Tur)
Lalpa, mi fel sim tur nei lote, mi chak tih chak ngai lote, mi tha hmasawnna tur nei lote ai chuan, mi sual sim tur nei sim chungahte, mi chak lo i tih chak duhtu chungahte, hmasawn hleithei lo i puihna ngentu chungahte hian, i lawm zawk a ni tih hi ka hriat renga. Bang hauh lo a, i ke bulah i puihna ngena awm tlat zel turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.


Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Lalpa Thawh Duh Dan Leh A Thawh Duh Hun Ngaichang Thinte Chu An Hlawhtling Thin

"Nimahsela keimahin ka thawk lo va, Pathian khawngaihna ka hnena awm khan a thawk zawk a ni."(I Korinth 15:10b)

"LALPAN in a sak loh chuan, A satute chuan an thawk rim thlawn mai a ni: LALPAN khawpui a vawn that loh chuan, A vengtu chu a meng thlawn mai a ni."(Sam 127:1)

Rawngbawl dan chi hrang hrang a awm a, eng kawng zawng pawh a rawng kan bawlnaah hian, keini a rawngbawltute hian tihtheih kan nei a, Pathian hi mihringte thawhpui duh thin Pathian a ni a, hei vang hian kan tihtheih tawk kan tih hi a tul thin a, mahse"chu aia pawimawh zawk chu Lalpan hna a thawh hi a ni."

A chang chuan keimahni a rawngbawltu a hi, kan chawlh a, tawngtaia kan rawngbawlna hlana, Pathian tih tura kan dah hi a pawimawh zawk hun a awm thin. 

Keimahni ai rawngbawlna hian, Pathian hnathawh a mamawh zawk tih hi kan hriat reng a pawimawh awm e.

A chang hi chuan kan bei vaka, kan thawk nasa em em a. Chutih lai chuan kan Pathian hian, "Lalpa nangin tizawk rawh kei chuan ka thei lo a ni," kan tih hun alo nghak thin tih hi hria ang u.

Pathian hnena kan hruai tumate hian, an mahni a Pathian an hmuh ve a tul thin a. An hnena Pathian thu kan hril a pawimawh a, chu aia pawimawh zawk chu, Pathian thu kan hril a chu an mahnia Lalpan a thawh tir hi a ni a, an mahnia Pathian thu a nuna hna a thawh theihna turin, tawngtaisak chunga kan thlah zalen a tul fo thin. 

Tin, kan eizawnnaah pawh hian, keimahni theihnaa kan nawr tang tang reng a pawimawh rual hian, Pathian hnathawh kan nghah thin hi a pawimawh zawk chang a awm thin.

Kan tihtheih chin ti thei tur chauhin Lalpan theihna min pe a, kan theih bak tih tum lo ila. Chu maibakah Lalpan a tawh loh chuan, a thawktute hi kan thawk rim thlawn mai thin a ni.

Pathian hmanrua mai kan nih leh Pathian tel lo chuan engmah kan nih loh zia hi, hre reng thin ang u.

(Tawngtai Dan Tur)
Lalpa, i thawh loh chuan engmah ka ni lo tih hi ka hriat renga, i thawh hun leh i thawh duh dana hi, ngaithla thin tur leh ngaichang thin turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Chawlh Thin Hi Pathian Thu Awina Pakhat A Ni

"Ani chuan hlobet hring dup hmunahte mi bawhtir thin a: Chawlhna tui kamahte mi hruai thin."(Sam 23:2)

Genesis 2:2 kan en chuan, chawl hmasa ber chu, kan Pathian hi a ni, tih kan hrethei a nga. A hun takah hna a thawka, a hun takah a chawl leh a ni.

A hun takah hna ka thawk phawt a nga, ka chawl ang, ilo ti hman tawh maithei. Mahse, a hun takah chawl phawt ila, a hun takah hna kan thawk thei zawk thin a ni.

Chawl kan tih hian, nula rim emaw, kartawpa thiante nen chaw eikhawma zu leh beer in emaw, games khelh ho emaw, mi rel tura thiante tlawhte hi a ni loa. Hei hi chawlh dan dik lo a nia, chawlh dan dik lo a kan chawl thin vang hian, hah reng angin kan inhre thina,"ka veng hawk maia" kan tih thin ang kha kan nei thei lo thin.

Chawlh dan dik chu, Pathiana chawlh a ni ti ila kan sawi sual awm lo e. Engtinnge Pathianah chuan kan chawlh ang? Pathiana chawlh dan chu, Pathian hmangaihna hre chunga, chawlhna atana kan thil tihte hi a ni. 

1) Pathian hmangaihna hre chungin, mahni inah chhungte nena hahdam taka hun hmante.

2) Pathian hmangaihna hre chunga, mut hahdamte.

3)Pathian hmangaihna hre chunga, midang tawngtai sak loin leh ka hnate pawh thlen loin, nuam ka tih dan ang bera awm chungin, muin emaw, thuin emaw, kei mahni duhna bik leh nuan kan tih ang taka tawngtaite.

4) Pathian thu ngaihthlak nuam kan tih bik ngaihthlakte.

Chawlh dan dik a ni, nula rim, inleng neih, chaw eikhawm, len, games khelhte hi chawlh dan dik a nih loh chhanchu, rilru hman a ngaih bakah, midang ngaihtuah an ngaia, nuam kan tih pawhin kan chawl tak tak chuang lo a ni.

A bik taka thlauk hman ngai lo thil, Pathian duh ang ni bawk si, kan tih hian kan lo chawl ber a ni.

Rawngbawltute hian, midang kan ngaihtuah nasaa, hei vang hian kan rilru kan chawlh tir a ngai thin a. Tu pawh hi kan ngaihtuah nasat em em vanga tha tur an awm chuang loa, an thatna tur chu Lalpa an nuna a thawh a ni, tih hi kan hriata, Lalpa kuta kan dah mai thin hi a pawimawh a ni. Chutiang bawkin kan chhungte zinga mi pawh a ni tho, kan unau, kan fa, kan nu leh pa awm tha duh lote pawh hi, Lalpa kutah dah mai tur a ni.

Tin, kan hnate hi kan thawh loh lai chuan, ngaihtuah ngut ngut reng a ngai lem lo. Inngaihtuah hlawhtling emaw, inngaihtuah hausa emaw an awm ngai loa, a hun taka chawl, a hun taka thawk zawk thinte hi an hlawhtling thin a ni.

Chawlh dan dikin, chawlh hunah tak chawlh hi, i zir fo ang u.

(Tawngtai Dan Tur)
Lalpa, nang chuan ka chawlh i phal a ni, tih hi ka hre renga. Chawlh hun dikah ka chawlh theihna turin leh i duh ang taka ka chawlh theihna turin, min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Rawngbawlna Nun Leh Thiltithei I Neihna Tur

"Hmangaihnain a itsik lo va; hmangaihna a infak lo va, a uang lo va."(I Korinth 13:4b) 

Rawngbawlna nung leh thiltithei neih hi, Pathian rawngbawltute zawng zawngin kan duh vek anga. Rawngbawlna nung leh thiltithei nei tur chuan, hmangaihnaa rawngbawl a ngai thin a ni. 

Mihring zawng zawng hi thinlung leh tih takzet chuan kan hmangaih thei lo ang, mahse Pathian erawh thinlung leh tih takzetin kan hmangaih thei a. Rawng kan bawlnaah hian mihring hmangaih lo mah ila, Pathian kan hmangaihna avangin a rawng kan bawl tur a ni. Chu chu rawngbawlna nung leh thiltithei neihna chu a nia.

Pathian kan hmangaihnaah chuan, itsik a thiang lo a, rawngbawlnaah hian sualin min beih ve reng avang hian, rawngbawl puite leh midangte pawh itsik mai a awla, mahni leh mahni hi kan in enfiah fo a tul a. "Rawngbawlnaa thiltih kan tum reng rengin, rawngbawl puite aia lansarh ka tum vang a ni em tih te," ka rawngbawl puite aia lansarh ka duhna hi itsikna vang a ni em tihte hi kan inchhut fo a pawimawh a ni.

Rawngbawlnaah hian, mahni kan infak lo tura kan fimkhur a ngai hle bawka, tin midang kan faknaah pawh hian kan fimkhur tho a tul awm e. Min duhsak deuhtu kan fak hian, lang lo a mahni leh mahni kan infakna a ni thei. Min duhsaktu leh kan duhsakate kan fak hian an ni pawhin, min fak let ve thin a, he mi kawngah pawh hian kan fimkhur a tul awm e. Kei ni leh kan rawngbawl puite hian, eng ang pawhin rawngbawlnaah hian thawk nasa mah ila, Pathian kan fak mai hi a pawimawh a, a him ber bawk a ni.

Rawngbawlnaah hian, kan uang palh em tih pawh hi kan inchhut fo a pawimawh a ni. Uan hi sual lian tak a ni theia, rawngbawlna kaltluang pangngai vawhlumtu pawh a ni thei a ni. A chhanchu, kan uan hian kan chapo vang pawh a ni daih thei a ni. Miin min lo rawn ta ang sela, kan ngaihdan a nih loh pawhin, uang chunga chhan loh a pawimawha, miin min rawn a nih chuan, "Pathian kan rawn a nga emaw, Pathian hnenah tawngtaiin kan thlen a nga emaw" tiin kan chhan a pawimawh a ni. 

Rawngbawlnaa miin rawtna an neih reng rengte hi, fimkhur tak leh tihtak zeta ngaihtuah pui fo hi a pawimawh ber a. Rawngbawltu upa zawk leh chanvo nei sang zawk kan niha miin min rawn a nih phei chuan, Pathian lung tih awi loh mai a hlauhawm a, hei vang hian 'rawnna leh rawthna thu' awm apiang tihtak zeta kan ngaihtuah thin a pawimawh a ni.

(Tawngtai Dan Tur)
Lalpa, i rawng ka bawlnaah hian i duh ang ngeia rah duhawm  ka chhuah theihna turin, nangmah ka hmangaih avang chea, i rawng ka bawl theih nan min pui la. Hmangaihnaah ka awm em tih hi engtik lai pawha inchhut nawn fo turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Pathian Rinawm Bang Lo

"Tin, azanah chuan Lalpa chu Paula kiangah a ding a, “Thlamuang takin awm rawh, Jerusalem khuaa ka thu i hriattir ang bawk hian Rom khuaah pawh i hriattir tur a ni,” a ti a."(Tirhkohte 23:11)

Jerusalem tanina a tan laiin, Pathianin Paula hnenah " ka thu... Rom khuaah pawh i hriattir tur a ni" a tia. He mi zana Pathian aw a hriat kum hi 57 (A.D 57) a ni, chu mi hnu kum hnih leh a chanve vel chu, Kaisari khaw taninah a tang leh a. Tichuan, kum 60 na (A.D 60) tir lamah velah, Rom panin lawmngin an chhuak chauh a ni. 

An zinkawngah an tluang lo hlea, kum khat vel chu lawngin an kual an kual a, thliar kar pakhat Melati an thlen dawnin, an lawng lu lamchu lungah a tanga, a mei lam chu thliin nasa takin a nuaia. Paula zin puite chu, an mangang tawh em ema, tihian Paulan a thlamuana "in zingah tumah a samzai pakhat mah a boral lo vang,” a ti a. Tin, chu thu chu a sawi zawhin chhang a la a, mi zawng zawng hmaah Pathian hnenah lawmthu a sawi ta a; tin, a phel a, a ei tan ta a"(Tirhkohte 27:34b-35). 

Midang an mangan em em laiin, Paula chu a thla a muang tlat a chhanchu, kum 4 kalta velah Pathian aw a hriaa, Pathian chuan Romah a thu a hril tur thu a hrilh a ni, Paula chuan Pathianin a thu a sut mai mai ngai lo tih a hriaa, Rom ah chuan a hruai thleng ngei dawn tih chu a ringhlel lo a ni.

Keini pawh hi, ngahnge kan mangan chiam chiam zel le, Pathian aw kan hre ve tho a ni lawm ni! Pathian atang thu tiam leh kan la nih theih turte kan dawn hian, a ni lo zawng deuhin kan nun hi a inher thin. Rawngbawltu tha tak ni tura inhre thin kha sualah kan tang tlat pawh a ni thei, kan fa Pathian tana kan hlan thin kha a rui tlat pawh a ni thei, hna tha tak Pathianin min pe dawn niin kan hriaa mahse a ni lo zawngin kan la kal a ni thei, a ni lo lamah nun a kal a nih pawhin. Tin, Lalpa aw kan hriatna pawh rei tawh viau mahsela, Lalpa aw kan hria a nih ngei chuan, a thleng ngei ngei dawn tih hria ang u. 

Keini chu, kan rinawm loh e, mahse kan Pathian hi zawng, a rinawm bang thei lo a ni. Sualah kan tang palh a nih pawhin kan Pathian hi kan phak ang tawkah thlah bik lo ang u, kan fa ruihhloa buaite pawh tawngtaisak i bang lo ang u. Dinhmun tha Pathian atanga kan beisei pawh, beisei bang lo ang u, a chhanchu kan Pathian hian ka ti ang a tih hi a ti ngei ngei sia.

(Tawngtai Dan Tur)
Lalpa, nang chu rinawm bang ngai lo Pathian i nia, ka ti ang i tih chu i ti ngei dawn a ni tih hriain nangmaha ka beiseina hi ka thlah ngai hauh lohna turin, min tichak ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.








Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A