"Chhel tak leh huai takin awm ula, tih suh ula, anni chu hlau hek suh u; in hnena kala chu LALPA in Pathian a ni si a; a tithlawh lo vang che u a, kal pawh a kalsan tawp lo vang che u," a ti a."(Deuteronomy 31:6 )
Kan Pathian hi malsawmtu chauh leh humhimtu mai chauh a ni loa, hmangaihtu Pathian a ni zawka.
A hmangaihna avang hian, a hmangaihate chuan amah an hmangaih leta an hnaih tlat theih nan harsatna an tawh a phal thin a ni.
Israel fate, Kanaan ram an luh dawn chho khan an hmaah hmelma lian pui pui leh hnam chak tak tak an awma, chung hnamte chu Pathianin Israel hnam tichhe tura a dah an ni loa, a hmangaih Israelte khan amah an tih phawt chuan engkim an hneh thei tih an hriat theih nana an hneh zawk tura adahte an ni.
Pathianin Israelte hmaah khan hmelma beih tur chi hrang hrang a daha, a changin mihring a daha, a changin tuipui, ei tur neih lohte, tui in tur neih lohte leh thil dang dang pawh amah nena an hneh turin a dah a ni.
Chung zawng zawngte chu a hmangaihna an hmuh fiah theihna turin leh amah chu an hmangaih ve theihna turin a hneh tir vek a ni.
Israelte hmabak en hi chuan, Pathianin a hmangaih loa tih chhiat a tum emaw tih mai theih a ni a, chutiang a nih loh zia kan hre vek tawh awm e.
Keini pawh hi kan hmabak ko tak leh kan harsatna kan tana beih ngaihna awm lo khawpa liante han en mai hi chuan, Pathianin min hmangaih loa, min tihchhiat vek a tum ta emaw tih maitheih a nia.
Mahse, chutiang a ni loa, a hmangaihna kan hmuh fiah theihna turin hengte hi kan hmachhawn a phala, chu mai bakah kan hmabak ko takte hi min tichhetu tura kan hmaa awm a phal ni loin, min awmpui zia kan hriat theihna turin, amah nena kan hneh vek atan zawk kan hmaah a dah a ni.
Lalpan min hmangaiha, min kalsan dawn lo tih hi inhrilh nawn fo ang u.
Lalpan a kalsan ngai lo chea, a kalsan reng reng lo ang che.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A
No comments:
Post a Comment