HIV POSITIVE TLANGVAL CHUAN, LALPA RING TURIN ALA TLAILO TIH A HRE TA A

"Tin, engkim ring chunga tawngtaia in dil apiang chu in hmu ang," a ti a, a chhang a."(Matthaia 21:22)

Rinna neih hi a pawimawh em em a, Pathian hian Amah rinchhan tute a ti thlawn ngai lo a ni. Tlai anga a lan chang te a awm a, mahse Pathian erawh a tlai ngai lo.

Rinna nghet tak nei Mihring chuan beiseina a nei thei thin a ni. Tum khat chu tlangval pakhat HIV+ ka kawm hlauh mai a, beiseina reng ka nei tawh lo a ti a. A nui thei lova, a mitmengah chuan lungngaihna bak hmuh tur a awm lo a, beiseina nei tawh lo Mihring kawm chu a hrehawm a, a nun chu a rapthlak em em mai a ni. Beiseina a neih tawh loh chhan chu a nun chu a tha zawngin Pathianin ala her thei tih rinna a nei tawh lova, Pathian aiin a natnain a tihnatna chu a ring zawk tlat a ni.

Hetia kan inkawm lai hian khawvelah hian nang lo mi nuaih tam fe HIV+ an awm ve mek a, a then chuan mi an tanpui a, rawng an bawl a, HIV/AIDS nen nun an hmang thiam asin tiin ka fuih a. Chung zawng zawng chu Pathiana rinna nghahna kaltlangin beiseina eng tak an neih avanga ti thei an nih thu ka hrilh chuan a hmel a eng sawt sawt mai a, chu tlangval chuan Pathian a rin thar a ngai a ni tih a inhrechhuak ta niin ka hria.

Engvangin nge harsatna kan tawh ten, kan beisei anga thil a thlen loh ten, kan kawppui ten min then ten, etc a tha lo zawnga kan lo hmachhawn thin le? Enga tinge kan beidawn avanga zu te kan in le? Enga ti nge sex te kan pawisak loh a kan beidawnna chu tha lo taka kan hmachhawn thin le? A chhan bulpui ber chu Pathian RINNA kan neih tak loh avangin a ni.

Paula chuan, "Mi tichak tuah chuan engkim ka ti thei a ni" a ti asin. Pathian a ring khawp mai.

 2 Timothy 4:7 "Intihsiakna tha chu ka bei zo tawh a, ka tlansiakna kawng ka hlen tawh a, rinna chu ka vawng reng tawh a ni". He chang atang hian Paula'n he khawvela a tihtur a hlen zawh theih chhan chu RINNA a vawn nun tlat vang tih kan hmu thei a ni.

Eng dinhmuna kan din pawhin Pathian hi a rintlak a, ring tlat ila. A che tawh dawn lo emaw kan tih hun te, a tlai kan tihte hi a huntak zawk a lo ni thei. A chhan chu Pathian chuan engkim a tha ber tur a hre zawk a ni.

Luke 1:37 Pathian thu chhuak reng reng thil tithei lovin a awm lo vang.

(Tawngtai Dan Tur)
Lalpa, he indonna ka hmachhawnah hian, i awm mai mai loa, a tih tih sawn ti rawh se min ti mai loa, min awmpui tlata, min pui tlat zel thin a ni tih hi hre tlat chungin leh, engtik lai mahin i tlai ngai loh bakah, engtik lai mahin ro ila rel sual ngailo a ni tih hi hre reng chungin, nangmahah ka rinna zawng zawng ka nghah theihna turin min pui ang che, Amen. Ti ang o.


Follow, a hnuaia in ziak khu click theihnghilh suh ang che.

NGHEH I DUH CHUAN, HENGTE HI TI ANG CHE

"LALPA chuan a kotu zawng zawngte chu a hnaih thin a. Tih tak zeta amah kotu zawng zawngte chu."(Sam 145:18)

Kan dam loh chuan kan ka te a tui lova, chaw ei te a harsa thin a ni. Mahse chumi a nih avang chuan chaw ei kan mamawh lo a ni lova, kan mamawh reng a ni. Kan dam loh lai tak chu chaw ei kan mamawh hlei hlei lai pawh a ni thei.

Tawngtai, Bible chhiar, ringtute inpawl khawmnaa tel(inkhawm etc), hengte hi ringtu nunah a pawimawh hle a, kan rinna vawn nunna banpui te pawh kan ti thei awm e. Heng hi a chakawm reng lova, tupawh Mihring kan nih chuan chauh chang kan nei a, Paula meuh pawh Korinth thawn 2 naah khan a chak loh thu te kan hmu nasa a ni. Mahse heng tawngtai, Bible chhiar, inkhawm te hi kan chak loh avangin kan mamawh lo a ni lova. A nihna takah chuan kan phur loh lai tak hi kan mamawh hun lai tak zawk a ni thei a ni.

Tawngtai a hul huk chang te, Bible chhiar a nawm loh chang te leh inkhawm a chakawm loh chang te pawhin heng hi kan thlahthlam tur a ni lova, theihtawp chhuahin kan ti lui tur zawk a ni.

Kan thlarau nun a phur a, a nun vut vut loh lai hi Pathianin min fiah hunlai pawh a ni thei a, Pathian kan duh takzet em tih te, a hrehawm pawhin Ama hmaah kan la kun tlat em tihte Pathianin a en hunlai a ni thei a ni.

I tawngtai tui hma chu tawngtai la, Pawlna i dawn hma chu Bible chhiar la, inkhawm pawh thulh lo hram ang che. Khang hul huk hunlai kha i paltlang theihna tur chuan, a beih a beih a, tawn tlang a ngai thin a ni.

1 Thessalonians 5:16-18 Lawm fo ula; bang lovin tawngtai ula; engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.

Ngheh I Duh Chuan " Tawngtai, Bible chhiar, Inkhawm" te hi bang loin ti tlat ang che.

(Tawngtai Dan Tur)
Lalpa, engtik lai pawhin bangloa i hnena ka tawngtai tlata, bang loa i thuah ka inchhiah tlata, bangloa i hming avanga inpawl khawmnaa ka tel tlat theihna turin min pui ang che, Amen. Ti ang o.

Notification i hmuh theih nan, a hnuaia, follow tih ah khuan click ang che.

Ram Hruaitute Tawngtai Sak

"Mi tam takin rorêltute duhsak hlawhna an zawng a, Mahse mihring chunga rorêlna chu LALPA hnên atanga lo chhuak a ni."(Thufingte 29:26)

Zawlnei Samuela khan Saula kha Pathian hnenah a tawngtai sak thina, a hnawl hnuah pawh khan ala tawngtai sak fo a ni. Mahse, Saula khan a rilru a thlak duh loh avangin, Pathianin Saula theihnghilha lal atana a thlan thar Davida chu hriak thih turin a ti a. Tichuan, Saula chu Davida'n a thlak ta a ni.

Davida chu Israel lal rei tak a nih hnuah, zawlnei Nathan'n a tawngtai sak thina. Tichuan, Davida pawh chuan Pathian pawi tih zawng khawihin, mi nu a uire a, Davida'n thil a tisual tih a hriat veleh Pathian hnenah nasa takin ngaihdam a dila, tichuan Pathianin a ngaidama a tarkun hnuah, Davida duh ang ngeiin a fapa in Davida chu a thlak ta a ni.

Hei hi a pawimawh ta chu a ni, tha taka kan ram hruaitute tawngtai sak hi kan tih tur a ni a, chutianga kan tawngtai chuan Pathianin kan ram hruaitute thinlung a dik zawngin a thlak theia. Chutianga, an rilru a tha zawnga an thlak duh lo a nih chuan, Saula ang hian Lalpan an ni chu a thlak thei a ni.

America president Donald Trump'a chuan, "ka kalna apianga Amerca mipuite'n min hrilh tam ber chu, ka tawngtai sak che tih hi a ni" a ti. Tawngtaina nasa tak dawngtu na na chuan, tha takin ro pawh a rel a nih a rinawm. 

Keini erawh chuan, kan ram hruaitu leh thiltithei deuhte bula kan awmin, ka tawngtai sak che tih a hnekin, an mahni hnen atang pamham takin thil dil phet kan tum thina, hei hi thil pawi tak a ni. He tianga thil dil reng lo hian, "tha taka i hna i thawh theih nan ka tawngtai sak che" lo ti zawk thin ta ila chuan, Lalpan kan hruaitute hi finna leh thinlung dik a pe a nga, kan hlawk phah vek zawk ava rinawm em.

Mipuite milin Pathianin an mahni chunga roreltu turte a ruat sak thina. Mipuite hian Lalpa mithmuha thinlung dik kan put tlat chuan, keimahni milin hruaitu tha min pe dawn a ni.

Hawh u, Lalpa laka thinlung tlawm leh thuhnuairawh neiin, Lalpa hnenah kan hruaitute tan tawngtai sak ila, tichuan rorel sual theilo kan Pathian zawkin duhawm takin ro min rel sak ngei dawn a ni.

(Tawngtai Dan Tur)
Lalpa, kan hruaitu thlan tharte hian, i duh anga tha taka ro an rela, an hnate pawh an thawh theih nan, finna leh thinlung dik pe turin ka ngen a che, Amen. Ti ang o.

Isaia Ziak Leh Mizoram Inthlan

"Chutichuan, khawngaih takin, ka pu Assuria lal hnênah chuan thu tiam rawh, tichuan keiin sakawr sânghnih ka pe ang che, nangin a chunga chuangtu tûrte i hmuh theih dawn phawt chuan."(Isaia 36:8)

 Assuria lal Senakeriba chuan, Jerusalem beih a tuma, tichuan a sipai hotu Rabsakeha chu Juda lal Hezekia han be thlem phawt turin a tir a. Tichuan, Rabsakeha chuan Hezekia hnenah chuan, Assuria lal hnenah chuan tlawm mai la tichuan sakawr sanghnih ka pe ang che, a ti a.

 Mahse, Hezekia hian "Aw emaw, Aiin emaw" a chhan hmain zawlnei Isaia kal tlangin Pathian a rawn phawt a, tisual lo tak a ni. Isaia chuan hlau suh Rabsakeha chuan engmah a tilo ang che, an ramah a haw a nga, khandaihin a thi ang (anih ang diak diakin ziak lo mai ila) a ti a. (Isaia 37:6,7) 

 A hnuah Assuria lal Senakeriba pawh chu, a fapa ten an that ta a ni. (Isaia 37:38)

 Lalpa chu ringa, a hnena ka innghahna i ni ti thin tute tan hian Lalpa hi nasa takin a thawk thin a, chu mai bakah an thlavang hauhin insum hauh lovin a che thin. Mahse, keini chuan Lalpa rawn phawt ai chuan, "Sakawr Sanghnih" min vote chuan, chu chu ka pe ang che, in fate hna kan pe ang, tia thlem tluk theih kan ni mai thin a, hei hi a pawi a ni. Kan Pathian khi lei leh van dintu leh thil engkim neitu a ni tih hi kan hre talo em ni! Van Lal thutthlenga thu khi a lungawi chuan thiltha engkim min pek a phal loh hi kan ring em ni.

 Pawi deuh mai chu, kan phun loh rah kan seng avanga kan tawrhna hi a ni, political fitness vanga hna hmu zu ngawlvei leh nun hlauhtate hi, an hna hmuh te hi thawk lo zawk ta sela, an chhungkua an hlim zawk ava rinawm em, chutiang bawkin contract tehfung pakhat maha teh pawha la teh ngai loh, party mi an nih avanga pute duhsak vanga contract hmute pawh hi, contract hmu lo zawk ta sela, an chhungkua an hlim zawk a ngem le. Mi then khat phei chu, sum leh paiah an dingchhuak ngei alawm, mi nawlpui chungah pawh an leng ngei, mahse dik loa sum an lak luh chu an faten an zo loh avangin, ro luahtu tur mumal nei lo hialin an awm thin a, chutiang a nih loh pawhin an chhungkua chuan chhuk lam an pan zel thin a ni.

 Hezekia chuan Pathian a ringa, Pathiana a innghah avangin leh a rin avang chuan Pathian chu a rawna, tichuan Lalpan a awmpuia a hmelma zawng zawng chu a hneh saka, a dinchhuah tir ta a ni.

 Keini pawhin, kan ram inthlannaa vote kan thlakna turah hian, Lalpa rawn chungin kan ram hruaitu tur i thlang ang u. Tin, chu mi kha mi an tlin avangin kan hlawk pha ve dawn emaw dawlo emaw, kan thinlunga kan ram tana mitha ber tura kan ngaih chu, i thlang ang u. Tichuan, Lalpa'n hmun kil ber leh thukru bera, thil tha kan tih hi a hmuh hmaih ngai loh avangin, a hunah chuan min dinchhuah tir ve ngei dawn a ni.

 Mizoram hi Lalpa ta a ni a, Mizoram hruaitu tur thinlung dik taka thlan hi, Pathian rawngbawlna a ni.

 (Tawngtai Dan Tur)
Lalpa, i zawn chhuah ram leh hnam hruaitu tur thinlung dik taka thlan chhuah hi, i duh zawng a nih bakah i rawngbawlna a ni tih hriain, thinlung dik takin, kan ram hruaitu tur atana tha i tih chu ka thlan theih nan min pui ang che, Amen. Ti ang o.

Pathian Thu Atanga Chakna

"Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a,thinlunga ngaihtuah leh tumte hi a hre nghal thei a ni."(Hebrai 4:12)

Michael Phelps khawvel pum huapa olimpic Gold medal leh medal la tam ber hi, intihhlum duh khawpin rilru lam natna nasa tak a vei tawh a. Tichuan, nun beidawng taka hun a hman lai chuan "Perpose Driven Life" pastor Rick Warren'a lehkhabu ziah a chhiar atangin Pathian atang theihna nasa tak a nei a ni tih a hre chhuak taa. Tichuan, nun awmze nei lo leh thih duh zawk hial nun atang, khawvela Olimpic gold medal la tam ber leh olimpic medal la tam berah a in vawrh chho ta a ni.

Michaela hi mi tam takin thusawiah te an sawma, sports thawmhnaw siamtute leh midang dangte pawhin, an thil zawrh leh an company fak turte in an sawm bawka, tichuan mi rethei ber atang multi millianare a rawn ni chho bawka, fuih ngaihna awm tawhlo khawpa beidawng a nihna atang midang fuihtu ni tura a sawma sawm a ni ta hial bawk a ni.

Chutiang zawng zawng a nih theihna bulpui chu thil pakhat chauh a awm a, chu chu Pathian thu a ni. Rick Warren'a lehkhabu ziah a Pathian thu a tar lan te chu a ni.

Kan Pathian hi a thuah a chenga, a thuah a thawk bawka, a thu ringtu chu amah ringtu an ni a, a thu a theihna hmutu chu nasa takin a awmpuia a tichak thin a ni.

Chu thu thiltithei chu, i ban phakah a awm ve a nia o! Ban ve ta che.

(Tawngtai Dan Tur)
Lalpa, i thuah hian thiltihtheihna nasa tak a awm a ni tih hre rengin, i thua inchhungkhat tura theih tawp chhuah turin min pui ang che, Amen. Ti ang o.

Beiseina Dik Neihna Kawng

"Beiseinain a ni, chhandamin kan awm ni; nimahsela hmuh theih reng beiseina hi beiseina a ni lo ve. Miin a hmuh theih reng chu engati nge a la beisei ṭhîn? Kan hmuh loh chu kan beisei erawh chuan kan nghâk fan fan ṭhîn ani." (Rom  8:24-25)

Beiseina dik neihna kawng pakhat chauh a awm a, chu chu Pathian atanga engkim beiseina hi a ni.

Beiseina dik neih kan duh chuan Pathian atang kan duh engkim, hlawhtlina te, hausakna te, kawppui te, nun zalenna te, eizawnna ngial nghet te leh thil eng pawh kan duh apiang kan beisei tur a ni. 

Mihring atanga beisei kan neih chuan, thil dik lo kan tih phaha, keimahni in thil dik lo kan tih loh pawhin, thilo dik lo a awm thin. Chutih rual chuan, Pathianin kan beiseina tih hlawhtlin nan, mihring a hmang theia chung mi a hmante chu hnawl lo tura kan fimkhur a ngai awm e.

Pathian chu kan beiseina bulpui ber nisela, kan beiseina bulpui a nih avang pawhin, nghah a tul anih chuan nghak ila, zirtir duh min nei a ni pawhin thuawi takin zir ila. Tin, kan beiseina tih hlawhtlinna atana a mihring hmante chu a tha takin kan thawhpui tur a ni a, chutianga kan beiseina kawng kan zawh chuan, a hun takah kan duhte chu kan nei thei ngei dawn a ni.

(Tawngtai Dan Dur)
Lalpa, nangmaha ka beiseina ka nghah avangin, nghah fan fan leh zir tang tang ngai thin mahsela, nangmah chauh ka beisei theihna tur chein min pui la, mihring leh thil dang reng reng a innghat ngailo turin min pui tlat bawk ang che, Amen. Ti ang o.

Thianghlimna Lovin Tuman Lalpa An Hmu Lo Vang

"Mi zawng zawng nena inremna leh thianghlimna um rawh u, chu mi thianghlimna lovin tuman Lalpa an hmu lo vang."(Hebrai 12:14)

Thianghlimna (sanctification) awmzia tak chu, "sual kan thih thinte sima, Krista anga thianghlim taka nun hman" tihna a nia. Isua Krista anga, thianghlim famkim thei tumah kan awm lo a, amah chu kan thianghlimna a nia. Kan thianghlim zo tak tak dawn loh zia leh amahah lo chuan thianghlimna kan nei thei tak tak dawn lo tih hi hre mahsela, "thianghlimna um rawh u" min ti a, "chu thianghlimna lovin tuman Lalpa an hmu lo vang" a ti leh bawk si a, a buai zo ta vek a ang hial awm e.

A chhanchu, khawngaihna chuan kan sual angin min pawm si, kan sual lai ngeiin Isua Krista chuan min chhandam turin a thisenin min tlan bawk si, kan awm ang angin kan sual ang angin min pawm bawk si, mahse "thianghlimna lovin tuman Lalpa an hmu lo vang" tih a ni leh bawk si, e nge a awmzia ni ta ang?

A awmzia tak chu " Isua Krista kan rinna leh chhandamtua kan pawmna ringawt hi Pathian hmuh nan a tawk loa, chu kan rinna leh a chhandamna kan channa chu, kan nunah kan par chhuah tir tur tihna a ni." Pianthar hmaa kan sual dan pangngai ang chiahin, pianthar hnuah pawh sual ti zel ta ila, chutiang chu ni ta ila kan piantharna pakhat mah kan hrelo ang, kan nunah kan nihna "kan piantharna" chu a lan loh avangin.

Chutiang a nih chuan, chhandamna chang turin thiltih a ngai em ni? A tih theih a nga, mahse chutiang lam niloin, thiltihin chhandamna tumahin kan hlawhchhuak zo loa, chhandamna chu khawngaihna avangin a ring apiangte tan, a thlawna pek a ni a. Mahse, chu chhandamna changte chu chhandamna chuan an nun a khawih danglam zia a pho chhuak tur a ni a, chu nun a tha zawk a rawn inthlakthleng tak chu "thianghlimna um nun" chu a ni.

Rawngbawltu leh rawngbawltu ni lem lote nunah danglamna a awm teh chiam lo thin hi thil veiawm tak a ni. Rawngbawltu tam zawk chuan, hmangaihna leh khawngaihna hi duh duh tihtheihna tura phalna (license) emaw an tih avangin, nasa takin an inthlahdaha, min huat an insum lo bawk thin a, hei hi thil pawi tak a ni. Kan Pathian hian "Thianghlimna kawng zawh turin min phut" tih hi kan hriat ava pawimawh tak em.

(Tawngtai Dan Tur)

Lalpa, min hmangaihna leh khawngaihna a nasat em avang hian, kan phak ang tawk tawka i tana kan nun ve hi i phut a ni, tih hre rengin, theih tawp chhuaha i tana ka nun theih nan min pui ang che, Amen. Ti ang o.

A Fahrah Lak Chu, A Hmangaih A Ni

"Ngai teh u, Pain min hmangaihna chu a va nasa em! “Pathian faahte” min vuah tak hi; chutiang chu kan ni reng e. He mi avang hian khawvelin min hre lo a ni, amah chu an hriat loh avangin."(I Johana 3:1)

Pa pakhat hian kawng sirah hian, naupang awm tha duhlo, bal bawk si, en reng reng pawh a invawnna chhete aih pawh nei lo, a bum theih theih bum thin mi, a chak zawng apiang ti thin leh hmasial bawk si hi a hmu a. Chu pa chuan a hmangaih tlat maia, chu naupang fahrah sual bawk si chuan, a bum dawn tih pawh chu a hmu tlangsa nghala, chupa thiantha leh a chhungte chuan, a tawp bawksi he naupang siamtha tur hian engkim a tlai vek tawha, sual a hriat tur zawng zawng a hre vek tawha, siamthat ngaihna a awm tawh lo ang an ti a, mahse chu pa chuan a tlailo, hmangaihna tak hmusela ala tha thei ang a ti a, chu naupang chu a inah a hruai lut taa.

Chu pa chuan, theih ang tawkin a zirtira, amah a biak reng theih nan, phone tha ber a pe a. School tha berah a kal tira, thawnhnaw tha ber a hak tira, a pa hmingah chuan ama hming a dahsaka. Mahsela, chu fahrah chuan a la tu a pa chu, nasa takin a bum thina, a phone amah a biakna tur ngei chuan a pa tih loh midang zawng zawng a bia a, school lah chu a kal tha peih loa, a tlan bo loh leh school ah buaina ava chawk chhuaka, a hming a pek avangin a hminga a tihtheih zawng zawng chu diklo takin a tia, a la tu a pa hming chuan, thil tam tak a ba thin a, a thawmhnawte pawh chu a hralh ru a, sual tih nan a man chu a hmang thin a ni.

Tlai khat chu, school a an zirtirtu pakhat chuan a pa hnenah chuan a fa lak chungchang chu sawi turin a pa chu a tlawha. A tihsual zawng zawng leh schoola a awm that loh zia te leh a tlanbo thin zia te chu a pa ava hrilha. A pa chuan, an zirtirtu hnenah chuan, ala tlai lo ang, theih tawp min chhuah pui ang che tiin a ngen a, pa zah kai tak a nih avangin, an zirtirtu pawh chuan a aw mai a.

An zirtirtu a haw hnu lawkah chuan, chu pa mi chhawrte chu an lo kala, a fa lak chuan a thawmhnaw a pekte leh an in bungruate chu a hralh ru thin a ni tih an rawn hrilh leha, chu pa chuan dawh hram hram ang u, ala tha thei ang alo ti leh a. A chhawrte an kal zawh hnu lawkah chuan, an khawtlang hruaitu ten chupa chu an rawn hmu leha, a fa pa chuan rui chunga buaina a siam thin zia chu an rawn hrilh leh a, chupa chuan ngaidam ang u, ala tha thei ang alo ti leh a. Chutianga a chhiatna zawng zawng, an hrilh a ni tih chu, a falak chuan alo hriaa, a pa chuan a hnawt chhuak ngei dawn a ni tih a hriaa, haw a tulna a hre tawh loa, khaw laiah chuan a awm taa, sual a hmuh phak zawng zawng chu a ti leh taa.

Chu pa chuan, a fa lak chu a koh hawng leha, chu fahrah chu a la tupa hnen ava thlen ve leh chuan, a pa chuan a lo pawm vawng vawnga. Lo haw rawh, ka ro min tawmpui turin ka duh che alawm ka fapa alo tia. Chu fahrah chuan, ka pa ka Lalpa i hmangaihna hi ka phulo, min kal tir mai zawk rawh, ka that theih ka ringlo, i hming ka tichhe mai mai zawk ang a ti a. 

Chu pa chuan a fa lak a hnenah chuan, i that dawn avangin ka hmangaih lo che a, ka hming i tih mawi dawn avangin leh eng emaw min pek dawn avangin ka hmangaih lo che. Ka hmangaihna hian, tawp chin a nei loa, hmangaih che hi ka thlan avangin ka hmangaih che a ni. Eng ang pawhin tisual leh dawn mahla, ka hmangaih chea, i tihsual lai ngei pawhin ka hmangaih che a ni tih hre reng la. Ka hnenah lo haw zel ang che a ti a, tichuan a hruai hawng leh taa.

A fahrah lak chuan, nasa takin a tisual leha, mahse a pa hnenah chuan eng ang pawhin awm khawlo mahsela, a haw zel thina. A pa chuan, fapa chu rui chungin emaw, school  tlanbonin emaw, natna hrik kaiin emaw eng ang pawhin haw sela, in a tlen ve leh chuan hmangaih takin alo kuangkuah zel  thina.

A fa lak chuan, amah latu hnenah chuan ka pa i hming ka tichhe zo dawn min kal tir mai rawh, a ti fo thin a. Mahse, a pa chuan ka fapa, sual chu ka hmangaih hauh loa, ka huaa, mahse a titu nangmah hi ka hmangaih che a, ka tlah ngailo ang che, a tawp thlengin i kiangah ka awmzel  ang a tia. Tichuan, hmangaihtuin a hmangaih tlat avangin, chu faharah chuan a sualte kalsanin a pa rawng chu a bawl ta a ni.

Kan Pathian hmangaihna hi a tawp ngailoa, kei ni fahrah te hi faah min laa, eng ang pawhin tisual mah ila min hmangaih renga a hnena haw turin min sawm reng thin a ni. Tisual thin mah ila, a hnena kan haw zel chuan, a ang chhungah chatuanin kan awm dawn a ni.

(Tawngtai Dan Tur)
Lalpa, min hmangaihna avangin ka lawm e, i hmangaihna hi phu turin eng nge ka tih le! Lalpa ka hmangaih a che, eng ang pawhin tisual leh dawn mah ila, i hmangaihna a awm tlat turin min pui ang che, Amen. Ti ang o.

Pastor'in Misual Ke A Silsak (Tlawmnaah Hian Hnehna A Awm)

"Chutichuan Simon Petera hnenah a lo kal a. Ani chuan, “Lalpa, nang emin ka ke i sil dawn em ni?” a ti a. Isuan a hnenah, “Ka thiltih hi tunah i hre lo; nimahsela nakin hnuah i la hria ang,” a ti a, a chhang a."(Johana 13:6-7)

Pastor pakhat hi a awm a, a bial chhungah chuan pa pakhat fing em em mai, tumahin Pathian lam hawi tura an hrilh hleihtheih loh hi a awm a. Chu pa chuan, hnatha tak a nei a, khawtlang zah pawh a kai a, a hna pawh a thawk thaa, engkim dik taka a tih avangin mi dik ni siin, an khawsak kawngah pawh mi bakin an lang mawi a. Sunday school erawh a thulh ngai lo thung a, Pathian a neilo tih fiah taka a lanna chu, zirtawp zanah zu a inthin a, a ruih zan erawh hi chuan thenawm kawngveng ten a rui tih an hriat turin thawm nei ngailo mahsela, a chhungte nasa takin a ti mangang thin a, chu bakah bible chhiar leh tawngtai hi a tulna a hre lo a ni.

Chu bial lo vawng tawh pastor te leh kohhran upate chuan, tih ngaihna tak pawh an hre lo a, midang a tibuai chuang hleinem tiin an en liam mai thina. Mahse, a chhungte chuan an chhungkua chu an hlim loh em avangin, an mahni tlawh turin rawngbawltute chu an sawm an sawm thin a ni.

Pastor hmasa he bial lo vawng zo chiah chuan, amah thlaktu tur pastor hnenah chuan, he mite chhungkua hian an sawm an sawm maithei che a, an sawm apiang chein, tha takin hun va hmang la, a bakah chuan i rilru tihah duh suh o! tiin a chah a. Pastor kal chhuak tur te hian, an mahni thlaktu tur te hnenah hian, an ngaihpawimawh zawng leh an ngaihmawh zawng te, tih tur leh tih loh tura tha an tihte an chah thin a, Pastor kalchhuak tur tan chuan chutiang khawpa ngaihmawh awm chu a ni.

Pastor kal chhuak tur chuan chupa chu, Pathian hmangaihna leh khawngaihna chungchang hrilfiah a tum a, chupa chuan tha takin a ngaithla maia, mahse pastor a haw dawn chuan, chupa chuan zawhna pakhat ka zawt ang che a ti a. Tihian pastor chu a zawt taa "Pathian hmangaihna leh kawngaihna ang i nei em, i nei lo a nih chuan a nei i hria em" a ti a, pastor chuan tumahin kan nei lo ang, kan neih loh avangin a neitu Pathiana kan awm a ngai a ni, tiin a chhanga. 

Chupa chuan, a nei lo theuh theuh kan in vei alo nih chu! a ti a, pastor chuan a dik chiah alawm a thawh zawh sa ring turin, kan inhrilh thin a nih hi a tia. Chupa chuan, keipawhin a thawh zawh sa chu ka ring alawm, Pathian thawh zawh sa ka rin lohna lai i hmuh hun hunah, min hrilh thin la, lo insiam that ka tum dawn nia, a ti a. Pastor pawh chuan tihngaihna tak a hre ta lo a, chu vang chuan amah thlaktu tur pastor chu lungkham lutuk lo turin a chah nghe nghe a ni.

Pastor, chu bial vawng thartu pawh chuan, tih ngaihna tak a hreloa, tih dan tur a ngaihtuah a ngaihtuah thin a, a hlauh ang ngei ngei in, kar hnih lek chu bial vawngtu ang a, a awm hnuah chuan chu mite chhungkua chuan an rawn sawm taa. Tih ngaihna vak ka hrelo bawka, ka senior min chah ang khan ka va ti mai teh ang a tia, chutia a quarter a chhuahsan dawn lai tak chuan, an kawngkhara Isuan a zirtirte ke a sil lai an tar chu a hmu fuha, chu mite in a pan lai zawng chuan a rilru a luh ta a.

An in ava thlen chuan, chu pa chuan chhungkaw pa a ni tih inhre takin, thuttlengseiah chuan a bawp thluang chungin, "ka pu Isua Krista min thawh zawh sa kan ring tlang leh dawn a ni maia tiro" alo tia. Pastor chuan ni e, kei tak phei hi chu ka fello em maia, Isua Krista min thawh zawh sa pawh hi ka hmu kim lo khawp mai, chu vang chuan thu hrilh tur che pawh ka hreloa, rem i tih chuan " i ke kalo sil sak ang che" a ti a.

Chupa chu an tang viau dawna, pastor chuan a fate chu tui leh chawhtawlh la turin a hrilha, a fate chu a khap hmain, rang takin an rawn la bawksi nen! tih ngaihna tak a awm loa, a ke chu a dawh ta a. Pastor'in a ke a sil lai chuan chupa chu a tap ta zawih zawih maia,
"Pathian hmangaihna leh khawngaihna hi kan hmuh fiah phak loh avang hian, inngaitlawm taka kan lo zawn a ngai a nih hi" a ti a. 

Pastor hnenah chuan a ke sil let a dil ve a, a ni pawh chuan a ke chu a sil tir ta a. Pastor ke a sil pah chuan, Pathian ka hnaih theihna turin min pui rawh aw! a ti mawl mawl ta a ni.

Kan Lalpa khan a zirtirte ke a sila Petera ke a sil dawn khan “Ka thiltih hi tunah i hre lo; nimahsela nakin hnuah i la hria ang,” a tia. Tharum te, finna te, theihna te a kan hneh theih loh hi, hmangaihna leh thlawnna hian alo hneh theih thin a ni tih hi, a zirtirna pakhat a nih a rinawm.

(Tawngtai Dan Tur)
Lalpa, theihtawpin inngaihtlawm tum ve thin mah ila, i inngaihtlawmna hi ka ban pha dawn chuang lo a ni tih hi ka hriat renga, i ropuina turin theih tawpa, inngaitlawm turin min pui ang che, Amen. Ti ang o. 

Follow tih a hnuaia inziakah khuam i click dawn nia.

THIL ENGKIM TAN HUNRUAT A NI

"Thil engkim tan hunruat a awm a." (Thuhriltu 3:1)

Helai changa hunruat tih hi sap tawng chuan season tih a ni. Season chu kan hre theuh awm e. Eng season mah hi a kum hlun lo a ni, kum tluanin nipui emaw, fur emaw thlasik emaw a ni ngai lova, a inthlak thin a ni.

Kan chang tarlan hian engkimin season (hunruat) a nei a tih hi vawn reng ava pawimawh tak em aw! Harsatna, beidawnna, lungngaihna kan tawk a nih pawhin chung chu season chauh a ni, a kumhlun dawn lo a ni.

Nunna nei leh nei lo te pawh hian inthlak hun an nei vek a. Chuvangin tunah hian ngaihzawng tur i hmu zo ve lo pawh a ni thei a, i hmuh ve pawn i tluang ngai lo a ni thei, emaw hna te i zawng a i hmu thei lo pawh a ni thei a, i hriselnain a kiamsan che pawh a ni thei, chhungkaw nuam takah i awm lo a ni thei a, i rethei pawh a ni mahna mahse hei hi hre tlat rawh khang kha a ni reng dawn lo, hun ruat season chauh a ni a, a liam mai hun a lo la thleng ang. Beiseina, nunna, siamtharna, hlim leh lawmna kawl eng chu i hmu veleh ngei ang. Season duhawm leh eng tak i hmaah a awm tih hre tlat ang che.

Harsatna kumhlun lo tur avangin thutlukna kumhlun tur siam suh ang che. Pathianah beiseina leh rinna nghatin, season tha ka tan a inher chhuak dawn a ni tih hre tlat ang che.

(Tawngtai Dan Tur)
Lalpa, ka hlimna emaw, harsatna emaw, he khawvela thil thleng engmah hi a kumhlun dawn lo a ni, tih hi ka hriat renga. Chatuana awm reng leh ding reng, nangmah zawk chu ka thlir zel che a, eng ang pawhin nun hi harsa mahse nangmahah chuan thiltha ka beisei tlat theih nan min pui ang che, Amen. Ti ang o.

RINNA SIAMTU LEH TIFAMKIMTU- ISUA

"Chutichuan, chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u. Ani chuan a hmaa hlimna awm avâng chuan, mualphona chu ngainêpin kraws chu a tuar a, Pathian lalṭhutphah ding lamah khian a han ṭhu ta a." (Hebrai 12:1,2)

Kan Biak In pawn lam rawng ka hnawih a, feet 60 zeta sangah chùan lawn chhan tur ruanàl pum hmangin ka dawh a. Miṭhen khat chuan min dawlh an ring zo la va, chuan pawh an rawn chuang ve ngam lo.

Min dawl zo tura ka dawh a nih avangin ka rawnghnawih tur ang chu ka hnawih zawh vek thlengin ka chuang a, chu dawhsàn chuan ka hna thawh chu a tifamkim (thawh zawhtir) thei ta a ni.

Hebrai lehkhathawn ziaktu hian, Isua hi kan rinna siamtu (author) a ni a, a tawp thlenga rin tlâk leh van ram min hruai thleng tura rin ngam a ni a ti a ni.

Rom vanglai chuan ennawm chhuahna leh intihsiakna hmunah mipui a entute ṭhutna chu dawhsan kual (semi circle gallery) pupin an siam a, chutaṭang chuan intlansiakte chu an lo thlir ṭhup a, an ṭan zawngte chu an lo au dual dual ṭhin.

Tunlaiah pawh changtlung zawkin stadium te kan nei ta a, chutiang nei pha lo pawhin playground-ah sport buatsaihin intihsiakna chi hrang hrang kan nei ṭhin. 

Intihsiakte chuan lawmman hmuh tumin a tawp hlen chhuak turin theihtawp an chhuah a, an thuamhnaw pawh a zangkhai thei ang berin an inbel ṭhin a, a ṭul lo thildang chu an dah vek ṭhin.
     
Ringtu nun hi intlansiakte lawmman dawn tuma an tlan angin Hebrai lehkha thawn ziaktu hian a tehkhin a, mithianghlim kal tate thlarau chuan kan vela chhum zing mupin min hual ang maiin min lo thlir reng a, chuvangin kan rinna kawnga kan tlan lai hian min tibuai thei khawvel thil leh keimahnia sual tih châkna awm ve reng hi dah ṭhain, chhel takin i tlan ṭâng ṭâng ang u a ti a ni.

Chutianga tlanchhuak thei turin Lal Isua, chu tlansiakna kawnga lo tlan chhuak a, lawmman lo dawng tawh chu min puitu a ni a, Isua rinawmna hian vanram min thlen turin kan rinna hi a siam a, a tawp thlengin a rinawm (tifamkim) dawn a ni.

Khawvel mawina te, nawmchenna chi hrang hrang sum leh pai leh ruih hlo leh zûk leh hmuamte hian kan rinna a tifamkim dawn lo va, min tihnawktu, min tlanchaktir thei lotu a nih zawk avangin  i dah ṭha ve daih zawk ang u. Tichuan kan rinna intlansiakna kawngah hian chak takin, atawp thlengin kan tlan (kan rawngbawlna kan hlen/thawk zo) thei dawn a ni. Intlansiakna kawng zawh chhuakte chauhin lawmman an dawng ṭhin a ni.

Tihsiakna ṭha bei fan fan la,
Krista i tha a ni zel ang;
Chatuan nunna vuan hram hram la,
I lawmna hlu a ni fo vang.

Tlansiaknaah tlân ngil zĕl la,
Krista en rawh, theihtăwp chhuahin;
Dam chhûng kawng chu zawh hrâm hrâm la,
I kawng Krista, i lawmna nen.

(Tawngtai Dan Tur)
Lalpa, vanram min buatsaih sak ram ngei chu ka thlen theih nana he ka inthlansiaknaah, Krista ka theihna leh ka chakna chauh lo chu, thildang reng reng vuan a, in tihnawk lo turin min pui ang che, Amen. Ti ang o.

A Nupui A Hmangaih Vangin, Mitdel Lem A Chan Phah Ta (Eng Hlawkna Nge I Kawppui Tur I Pek Ve Ang)

Mi tamtak chuan, kawppui an zawnin chutiang chu nise an ti zut zut thin a. Ni e, kan duh zawng pawh kan zawn a pawimawh ve alawm, kan kawppui tur chu eng anga tha pawh nisela, a kawppui tur keimahni in, kan zir si loh chuan, engang fakauha kawppui tha pawh nei mah ila, inkungkaihna hrisel kan nei chuang dawn lo a ni.

Kawppui kan zawnnaah hian hei hi kan ngaihtuah ve a ngai "enge ka kawppui hian, keimah atang hlawkna a hmuh ve ang" tih hi. Hmeichhia chuan, a thawmhnaw ka suksak a nga, eirawng ka bawl a nga, fa kan neih hunah naupang ka enkawl a nga, kan ti maithei. 

Mipa pawhin, hna ka thawk a nga, a duat theih ang angin ka duat a nga, a remchan hunah ka chhuah pui thin a nga, fa kan neih hunah kan picnic ho a nga te kan ti maithei a. Hengtiang hi kan tih ngei pawh a tha a nga, mahse hengte hi chu, kan tunlai society'in a ken tel a ni, kan society hian, nupa chu loah karkhat tal an feh ho thin tih hi keng ta sela, kan feh thup thup mai ang, ka sawi tum tak chu hengte hi thil kal pangngai a ni, tumah hi thil kal pangngaiah an hlawk ngai hran lo, chubakah thil kal pangngaiah hmangaihna an hmu hluah hluah thei lo bawk a ni.

Kan kawppui turte tana hlawkna kan nih theihna chu, Pathian kan tih hi a ni. Pathian tih mi chu, hmangaihna a ngah thina, a dawhthei thin a, a hmasa zawk nih a thiama a hnuhnung zawk nih pawh a thiam bawk thin.

Pa pakhat pawh hi, a nupui a hmangaih em em chu, vun natna chi khat a vei avangin a hmel leh a taksa mawinate alo chhe zel a, a pasal lakah pawh hreawm a tia, chu pa chuan tihian a ti taa. A zin dera, tichuan a zinnaah chuan motor accident avangin ka hmuthei tawhlo a ti a, tichuan a nupui chuan a pasal mit a del tih a hriat chuan, a pasal bulah nuam ti deuhin a awm thei taa. Kum a vei zela, a nupui hriselna chu a tlahniam zela, alo thi taa, an thenawmpa chuan chupa hnenah chuan engtin nge i awm dawn a tia, chupa chuan ka nupui nena kan sul hnu hi ka chhui reng ngam siloa, ka pem dawn a tia. An thenawm pa chuan, i mit a del sia, engtin nge nangmahin i awm theih ang a tia, chu pa chuan thilawmzia a hrilh taa. A thenawmpa chuan, a hmangaihna nasat zia a hmuh chuan, i nupui kha i hmangaih em avangin hmeichhe vannei ber a ni a ti ve thlawta. "A nupui chu, a hmangaih em avangin hmeichhe vannei ber a ni ta a nih chu, a nupui vanneihna chu a pasalin a pek a ni" hepa hian a nupui hnena a pek hi, ava namailo tam tak em.

Pastor John Gray chuan, a nupui dawhtheih zia leh a hmangaihna ngah zia tihian a sawi a "ka nupui hi min tuam tu a ni, ka fate a enkawlna aiin keimah min enkawlna ah hian tha leh zung a seng tam zawk" a ti. A nupui Aventer hian, Johna hi a thiltih engkimah a pui thina, vawikhat chu Johna hi a thau mah mah avangin, doctor ten a nunna atan a hlauhawm an ringa. Tichuan, gym kal turin a nupui hian a nawr thin a, a ei leh in a fimkhur theih nan a veng bawk thina, Johna a beidawn apiangin "Ka pasal i ni a, kan hmangaih che a, i tello chuan kan awm theiloa, khawngaih takin bei leh hram hram ta che" tiin a pasal hi a fuih thin a ni. Chu bakah, kawng dang dangah pawh a pasal hi, a tuam hlawm a, nasa takin a tichak thin a ni. Chu a dawhtheihna avang chuan, rawngbawltu pakhat ni ve mai tur Johna chu, khawvel deng chhuak thei khawp hiala rawngbawltu ropui a ni ta a ni.

Johna leh Aventeri te nupa hi, a tu emaw zawk zawk phawh a langsar zawk ni sela, a hnunga lo tang zawk chu an dah hlu thiama. A tu emaw zawk zawk pawh a hnungzawk (supporter) lo ni ta sela, theih tawpin a hnung atang chuan, an kawppui chu alo chak theih nan an bei thin a ni.

Kan kawppuite hian keimah niah hlawkna an hmuh theihna tur chuan, a kal phung pangngai pela kan dawhtheihte, hmangaihna kan ngahte, kan taimakte a tul thin a, chungte chu tithei tur chuan damdawi pakhat a awm a, chu chu Pathian tih a ni. Pathian kan tih a nih chuan, chutiang zawng zawng ti tura vitamine A to Z kan nei tihna a ni.

(Tawngtai Dan Tur)
Lalpa, ka duh ang kawppui i hnena rawn dil ringawt hi duhtawk loin, ka kawppui tur tana hlawkna pe theitu ka nihna turin min pui la, nangmah ka tih tlat che chuan, ka kawppui tur chu tupawh ni sela, keimah atang hlawkna an hmu dawn a ni tih hre rengin, i thu ka zawm theih nan min pui ang che, Amen. Ti ang o.

Amah Avanga Thi Ngam Aiin, Amah Avanga Nung Ngam A Mamawh Ta

Nu valai leh pa valai te titi reng rengah hian, mizo mi pangngai nawlpui hi ringtu pangngai kan nih avang hian, Pathian thu an sawi thina. A chang phei chuan, chanchintha avanga martarte an ngaihsan zia te leh an kohhranin chanchintha an puan dante hahipin an sawi bawk thin a ni.

Hetianga an titi ka hriat apaing hian, "O! martar, an ngaihsan tluk zet hian, chanchintha nunpui ngam, nun martar te hi ngaisang se, kan va han that pui dawn em." Chu bakah chuan, ramthar (mission field) a rawngbawlna kan dah sang ang chiah hian, mahni chhungkua leh kohhrana rawngbawlna hi dah sang ve ta ila, kan chanchintha puandarh pawh hian hna a thawk nasa zawk ang mole" tiin kalo phun kalo phun ve thin.

Martar leh ramthara rawngbawlna ngaisang em em te hian, 'dik lohna em em a awm chuang hlei nem, tumah an na dawn chuang loa, tia sum dik tawk lo a lak luh hreh leh miah lo te kan ni thin a.' An faten hna an zawn dawn pawha, Lalpa hmachhuan ai chuan, milian hmelhriat leh minister lehkha hmachhuan leh thinte kan ni leh fo thin.

Krista pasaltha kalta, martar te kha lo tho leh ta sela, engtin nge min tih ang le!

Ramthara rawngbawla chhuak kan missionary te hian, kan chhungkua leh khawtlang fel loh avangin, an rilru nasa takin a kap thina, chu chuan an theihna zawng zawng leh an rilru zawng zawnga chanchintha an hrilna tur chu a dal thin a. Chhungkua leh khawtlang a fel loh chhan chu tualchhung kohhranah kan intukluh tawk loh vang a ni, ti ila kan sawi sual awm lo e. 

Hawh u, kan Lalpa Isua Krista vanga, thia martar leh nunga martarte hi, a mithmuhah intluk an ni tih hriain, nun martar nei turin theih tawp i chhuah ang u.

(Tawngtai Dan Tur)
Lalpa, i hming avanga martar te ngaihsan ringawt hi duhtawk mai lovin, an nun anga i tana ka nun ve theih nan min pui ang che, Amen. Ti ang o.

Ka Tawk Lo (I'm not enought)

"Chutichuan a thantirtu Pathian chauh lo chu, a phuntu chu engmah a ni hek lo."(I Korinth 3:7)

Pathian hi, mitawk lote an daih zawh lohna chinchiaha an daih zawhna tura thawhsak thintu a ni a. Nang leh kei hi han inchhut chiang ila, mihring pangngai kan nih angin theihna kan nei a mahsela, kan thiltih engkimah hian kan duhthu a kan tih kual theih loh (control) chin a awm zel thin a, chung hunah chuan Pathian relfel turin a kutah kan nghat thin a ni. Hei hian keimahni mai chuan kan tawk loh zia a tilang chiang awm e. 

Nu leh paten, nau an enkawla, engting nge a seilen dawn an hreloa, an fa enkawlna turin an tih tura an hriatte chu an ti mawlh mawlh mai thin a.

Hna thawktu, a sang ber atanga a hniam ber thlengin, an hnathawhin rah a chhuah tur hre chhuak fakim vek an awm ngailo a, lehkha ziaka hna thawkte hian an lehkha dawngtuin engtin nge a rawn chhan let dawn an hreloa, in satuin engang pawhin bei nasa mahse a insak chu a darh nuai theia, mawi takin a ding thei bawka a eng zawk nge a nih tur a hrelo bawka, thlai chingtuin a thlai chinchu tui leh leithain chawm mahsela a to a, rah a rawn chhuah dan tur chu a hrelo a.

Nula leh tlangvalte pawh eng ang pawhin inhnaih mahsela, an tawp dan tur an hreloa, hmelma emaw, thiantha emaw, nupa an la nih dawn an hreloa, a thaa an hriat angin an nung ve mai a.

Pathian rawngbawltute pawh hian, kan rawngbawlna rah chhuah tur hi kan hreloa, miin kan rawngbawlna atang Pathian an hmu dawn nge dawnlo kan hre loa, a thaa kan hriat angin rawng kan bawl mai a.

Heng kan tih theih bak hi, engkim relfel thintu kan Pathian chuan, a tha a tih angin a remfel thin a ni. Hei hi ringtu ten kan pawm dan pawh a ni reng a, kan bible nen pawh inmil tak a ni.

Chutianga, kan tawk zolo a nih a, a relfeltu leh a remfeltu chu kan Pathian a nih si chuan, hawh u a kutah kan zawng zawngin i inngawt ang u. Kan Pathian hian, kan dah hmasak ber hi ava phu tak em, nula tlangval ni ila tu nen pawh lo inngaizawng ta ila awmze nei (workout) tura min relfel sak theitu chu Pathian a ni a, kan hnathawhah pawh rahtha min pe theitu chu amah chauh a ni a, kan fa enkawl pawh tha taka seilen tir thei chu amah kan Pathian chauh a ni.

Miin, rangkachak zungbun pakhat vangin, rangkachak khur pumpui kalsan ta sela, mawl tilo kan awm lo ang, chutiang ang chu keini pawh hi kan ni fo thin. Malsawmna zawng zawng neitu leh petu ai hian, a malsawmna fangkhat hi buaipui zawkin, malsawmna petu chu kan lo thlauhthla thin a ni. Lalpa zawk, amah zawk, a siam chhuaktu zawk hi, tupawh leh engpawh aiin i dah hmasa zel ang u.

(Tawngtai Dan tur)

Lalpa, nang chuan ka tawk loh zia hriain engkim min relfelsak thin avangin ka lawm e, nang chu engkim neitu leh engkim relfel thintu i ni tih hi ka hriat renga, mihring tumah aiin leh eng dang zawng aiin ka dah hmasak zel theihna tur chein, min zirtir ang che, Amen. Ti ang o.  

A Laiah Hian Zirtur A Tam Thin (Its In The Middle That We Learn)

"Mi tihlum hil mah sela, amah chu ka nghak cheu vang: Mahse, a hmaah ka kawng chu ka tan ang."(Joba 13:15)

Eng pawh ti ila, bul tan hun a awm a, a lai hawl a awm a, a tawp a awm leh a. Lehkha zirte, sumdawngte, zaithiamte pawh hi a laiah hian an beidawng thin a, an tawp san thin a. Chutiang ang bawk chuan Pathianin min hruainaah pawh hian a laia beidawnga tawp mai tamtak an awm bawk a ni. 

Bul kan tan lai chuan, beiseina hlirin kan khata, kan phur em em thin a, a lai kan han thlenga kan rin angin thil alo awlai siloa, kan hlawhtling ngei dawn em tih lah achiang bawk siloa, eng emaw chen kan hre tawha, min faktu leh sawi chhetute pawh an awm ve tawh a, kei ni lah kan puitlin tur angin kan la puitling tawk lo bawk nen. He huna mibik nilo, mi tam zawkte an lo beidawng thin pawh hi a awm hle a ni, mibikte erawh chuan an danglam bikna chu phochhuak tan nan he hun hi an hmang thin a ni.

Mosia'in Israelte Aigupta atanga a hruai chhuah khan, Aigupta rama an pen chhuah lai kha chuan, vui vai an la awm loa, kawng thui tak an thlen tawh hnu Tuipuisen bawr vel atang khan an buai tan ta a ni. Tichuan, Kanaan ram hnai taka an mita an hmuh hma kha chuan, harsa an ti em em renga, Kanaan ram an luha an khua tur te an han luah chho lai vel kha chuan lawm takin an nun an hmang a ni. An zinkawngah khan, thi pawh an tam a ni, Aigupta atang khan mipa puitling ringawt pawh nuairuk lai an chhuaka, naupang leh hmeichhe zat hi bible'in a tarlang loa, Aigupta atanga hruai chhuah ho zawng zawng Joshua leh Kaleba tih loh zawng chu, kawngah an thi vek a. A lai hawl, a kal kawng a hi, a har a ni. A kalkawng tello chuan, mahni khua tur- (Destination) ah a luh theih bawk si loh.

Chutiang chuan, mitamtak an beidawnna hmun leh an suangtuahnaa an duh ber (Dreams) te a thih hun chu a laihawl, a kalkawnga hi a ni. Chu chu a nih rual chuan, Pathian tana rinawm leh huaisen Joshua leh Kaleba te tana, inzir hun tha ber a nih ang hian, eng ang pawhin harsa mahsela Lalpaa innghat tlat chunga la beih tumte tan chuan, inzirna hun tha ber a ni thung a ni.

Tu zawk nge kan nih dawn? A lai hawl paltlang ngam loa, thi ta nge! Pathiana innghat chunga ram tiam lam pana bei fat fat tu. Beidawn chhan tur sangkhat hmu mahsela, Pathiana innghat chunga beisei chhan tur pakhat an la hmuh avanga la bei tang tang thinte hian, Pathian awmpuina an chang thin a, an tum ram chu an thleng thin a ni.

Ringtute chuan, beisei chhantur ropui ber kan nei renga, chu chu kan Pathian hi a ni! 

(Tawngtai Dan Tur)
Lalpa, tuna ka dinhmun atang hian min hruai tawhnate ka thlir leta, harsa mahsela chu chuan min kalsan loh zia min hmuh fiah tira. Nangmaha beiseina nghat chungin, heng hun harsaah hian, zir tura min tihte chu ka zir thiam theih nan min pui ang che, Amen. Ti ang o.

Thlan Ruama Ruhrote Tinung Lehtu Pathian

"Hêng ruhte hnênah LALPA PATHIAN chuan heti hian a ti a ni: Ngai rawh u, nangmahniah thaw ka luhtîr ang a, in nung ang. Tin, nangmahniah thahrui ka dah ang a, tisain ka tuam ang che u a, vunin ka khuh ang che u; tin, in chhûngah thaw ka awmtîr ang a, in nung ang; tin, kei hi LALPA ka ni tih in hria ang,' ti rawh," a ti a."(Ezekiela 37:5-6)

Bible changa tarlan a nih ang hian, kan Pathian hian a duh a nih chuan "Ruhrote pawh tisa leh thahrui leh nunna thaw pein a kai tho leh thei a ni." Kan Pathian hian engkim a tithei a, awm lo te pawh hi awmah aduh chuan a awm mai thin a ni.

Chu kan Pathian chuan a ti thei ngei a ni tih hi kan rin theuh a rinawm, mahse kan tan a tih duh rin hi a har thin em em a ni. Achhan chu, kan zawng zawng leh kan engkima kan engkimah amah kan pawm duh loh thin vang a ni. Kan felna leh thatna avangin, min thawhsak thin kan tihna lam a niloa, a nihna takah chuan Isuan a tihdam te pawh kha fel famkim tumah an awm biklo mahse a tidam a ni. Eng vangin nge a tihdam? An Zawng Zawngin Krista Kha An Pan Alawm, An Zawng Zawngin An Zawng Alawm!

Kan zawng zawng, keimahni a engkim leih buain, kan Pathian hi i pan ve ang u. Tichuan, kum tamtak thi tawh ruhro hial pawh lo ni tawh mah ila, tisa thar leh thahrui thar min pe a nga, a nunna thaw keimahniah a thaw lut a nga min ti nung leh dawn a ni. Chu min tih nunna atang chuan felna kawng leh thianghlimna kawng chu kan zawh theih zawk a rinawm a ni. 

I nunin a duh zawng zawng pawh kha, Lalpan tha a ti a nih chuan a pe thei che, min hmangaihtu anih avangin engpawh duh ila min pek a phal a rinawm, mahse chungte chu min pek ai chuan, amah nena inkungkaihna thuk tak (Relationship) kan neih hi a duh zawk a ni. Pathian nen inkungkaihna tha nei ila, chu chu thil dang zawng aiin thlahlelin ngaipawimawh ber zawk zel ila, thil dang zawng zawng chu a nih tur angin min sim remsak mai dawn a ni.

(Tawngtai Dan Tur)
Lalpa, kei misual nena inkungkaihna thuk tak i neih duh avang hian ka lawm e, chu inkhungkaihna chu nangmah nen a nei tur hian, ka nih zawng zawng nen ka rawn kal e, nangin ka nun hi i kuta a awm angin, i duh angin lo ti ang che, Amen. Ti ang o.

THLARAUVAH ȚHANG ZEL RAWH

Hmangaiha thu dik tak sawiin, engkimah amahah kan țhang lian thei zâwk ang, Amah chu Lu a ni, Krista chu (Ephe.4:14).

Piangthar tawhte hi Pathian chuan thlarau lam nuna țhang lian zêl tûrin min duh a. Thlarau lam nun puitling tak kan neih thlenga min țhantir hi a duhdân leh a thil tum a ni. 

Kristian tam tak chu kum lamah upa tak thlengin kristian țha angin kan nung a, mahse thlarau lamah kan țhang hauh si lo. A chhan chu țhan kan tum tlat loh vâng a ni ber mai. Thlarau lam nunah chuan nausên kan ni kumkhua reng mai a, diaper la inhrêng reng ang chauh kan ni. Thlarau lam nuna țhanna hi amaha lo awm ngawt a ni lo va, kei mahniin kan zir a ngai a. Țhan zêl tumna tak tak nêna Pathian hnêna intukluh tak takna (intentional commitment) neih a ngai a ni. Kan awm pangngaia awm mai mai chung hian thlarau lam nunah a țhan zel theih ngawt hauh loh a ni tih hriat a țha. Mi tam tak chu kan awm pangngai hian kan awm mai mai rei tawh hle mai. 

Kan inkhâwm ve reng a, thu kan ngai thla ve reng a, kan thinlungah tu thusawi mah a lût tak tak lem hlei lo va. Mi an lâmin kan lâm ve thei tho va, țawngțai rualin kan tiri ve thei tho va, inkhâwm bânah iptê kan bâng țha ve leh ngawt a. Inkhâwm leh dâwnah kan ak chhuak ve leh a, Biak in chhûngah kan bulah kan dah a, kan hmang țangkai chuang hlei lova, inkhâwm bânah kan ak hawng leh a, room chhûngah kan bâng țha leh a. In lamah Bible kan chhiar zui lem lo va, lehkhabu țha dang kan chhiar peih hlei lova, TV a Pathian thusawi kan ngaithla peih bawk hlei lo va. Țawngțai hunah chuan kan tih țhan tawh avângin kan ti thei reng tho bawk a. Kan nun erawh a tuihnâng lo țhin kher mai.

Kan thlarau lam nun a khawro vâwng vâwng a, khawro tih kan inhre chuang hlei lo va. Kan thlarau lam nun chu a che lova, a țhang mêk bawk hek lova, kan tuihâl hek lova, hmasâwn tumna leh țhan len tumna pawh kan nei chuang hek lo. Hetiang ringawt hi chuan Kohhranho zingah kum tam hmang liam ve ngawt mahila, thlarau lamah chuan kan țhang lian dâwn hauh lo a ni. 

Khai le, thlarau lam nunah chuan țhanlen zel i duh em le? I duh tak tak a nih chuan, a hmasa berin i rilru lo châwl rei tawh leh lo muthlu rei tawh chu tihharh/kaihthawh hmasak phawt a ngai a ni. Țhan tumin decision siam fel hmasa rawh le. Pathian nghâk mai lovin nangmah ngeiin țhang zel turin tumna tak tak insiam la (make an effort to grow), taimâk chhuah ang che. Pathian hnênah țawngțai la, Pathian thu chhiar la, i rilru khawih zâwngte ziak zel la, tichuan, i rilru rei tak lo chawl tawh leh lo muthlu tawh chu tihharhin a lo awm leh țan ang.

Tichuan, i nun a lo tuihal țan ang a, hriat belh zel i lo châk ang a, chhiar tur leh ngaihthlâk tur i dap ruai tawh mai ang. Mi thusawi i ngaihthlâkin chhinchhiah tur lai i lo châng rân tawh ang a, an thusawi laiin i muthlu reng tawh bik lo vang. Tichuan, i rilru khawih i ziah apiang chuan i nun a khawih nghâl zel ang a, a taka zawm duhnaah a hruai lût nghâl zêl ang che. Pathian thu thiltihtheihna i chhar thar ang a, i thil sim theih loh sim nân i lo hmang tawh ang a, i thil paih phal loh paih theih nân i lo hmang tawh bawk ang. 

I nun leh Pathian thu chu a lo inzawm nghet tulh tulh tawh ang a, nitinin thlarau lamah chuan i lo țhang lian zêl ang a, thuah leh thlarauvah chuan i lo hausa tulh tulh mai dâwn a ni. Tichuan, nitinin thlarau lamah chuan i lo țhang lian zel ang a, Isua duhzâwng tih puitlin chu i châk tulh tulh tawh mai ang. 

Nangmahah Krista a lo nung ang a, nangmaha nung Krista ringin i lo nung tawh zâwk ang a. Pathian thu leh i nun chu a lo inzawm tlat tawh dawn avângin Pathian thu i sawiin i chanchin ațangin i sawi fo tawh ang a, i chanchin i sawi pawhin Pathian thu i sawi tel a lo ni zel tawh mai ang. Lal Isua Krista chu lu a ni a, amah chu kan nun luahtu atâna kan hman tawh chinah chuan, amahah chuan kan țhang lian zêl thei a ni (Ephe.4:14).

(Tawngtai Dan Tur)
Lalpa, nangmaha nun tak neih khawngah hian hma ka sawn zel theih nan min pui la, hma ka sawn dawn chuan keimah ngeiin theihtawp ka chhuah a ngai a ni tih hre rengin, nangmah nena inkungkaihna tha zawk ka neih zual zel theih nan min pui ang che, Amen. Ti ang o.

Lal'in A Chhiahhlawh Chu, A Fapa Nupui Atan Pathian Neitu A Zawn Tir

"Tichuan LALPA vân Pathian leh lei Pathian chu chhâlin, ka awmna Kanaan-ho nula zînga mi hi ka fapa nupuia neihsak lo tûrin chhia ka chhamtîr dâwn che a ni: kan ram lamah, ka laichînte hnêna kalin ka fapa Isaaka hi nupui i neihsak zâwk tûr ani," a ti a."(Genesis 24:3-4)  

Nupaa insiam tawh thenkhatte hian, kei chu keimah chauhin rawngbawlna lam ka hawia an ti thin. Nu ho phei chuan, "mipa lu chu Krista a ni a, hmeichhe lu chu mipa a ni a, kan pa hian, Pathian lam a ngaihtuah siloa, pasal lubul ka nei a nih hi an ti lawng lawng thin" a ni. Chutih rual chuan, pa thenkhat pawhin, "kei zawng rawngbawlnaah hian ka maltan a, a va harsa tak em" an ti fo bawk thin. Hei hi kawppui kan zawn lai hian, ngaihtuah fimkhur ila chuan, pasal Krista lua hmang ngei kan nei a nga, kan rawngbawl pui theih tur nupui tha tak pawh kan nei ngei bawk ang.

Abrahama khan, a fapa tan khan milem bia hmeichhia kha a duh awzawng loa, a fapa nupui tur chu ramhla tak ami a chhiahhlawh zinga, fing leh hotu ber, a fapa Isaaka ai pawha a tirh hunlaia a rin zawk chu a tir a ni. Abrahama hi ava entawn tlak tak em, pa hausa tak a ni a, a fapa nupui tur hi an chehvelah hmuh mai a awlsam viau awm nen, a zawna zawn pawh a ngai lo hial zawk ang. An chehvela mithenkhat phei chuan, Abrahama hi lal pakhat ang hialin an ngai a, Gerar lal Abimeleka phei chuan indonaa pui turin Abrahama hi a ngen hial a nih kha.

Chutiang ang taka pa ropui chu a Pathian tan a inngaitlawm hle a, ram hla tak ami, a fapa nupui tur chu, a ma hminga va ngen turin a chhiahhlawh a tir a ni. Abrahama hi, lal anga ngaih a nih chuan a fapa pawh lal fapa anga ngaih a ni dawn tihna a ni a. An awmna hmunah chuan, lal fanu te nei thei an ni tihna a ni, chutih lai chuan lal tlah pawh ni hran lo, Pathian nung betu chhungkua ami, a fapa tan va ngen a duh zawk a ni. Ringtute hian, zirtur kan va ngah tak em!

He lei, lal fapa leh lal fanu emaw, he lei miropui fanu leh fapa te emaw, he leia mi hmeltha te ai hian, keini pawhin Lalpa kan Pathian tih mi chu, dil ngawih ngawih a ngaih zawk dawn pawhin thlang ila chuan, kan nihlawh zawk ava rinawm em. (Kan dilna tur chu, mihring hnenah niloin, kan Pathian hnenah a ni.)

(Tawngtai Dan Tur)

Lalpa, he lei mite mawina ai chuan, nangma hnungzuitu tlawmte te hi nang chuan theihna tha bik i pe nasa zawk a ni tih ka hriat renga, kawppui atan nangmah tih mi ka thlan theih nan min pui ang che, Amen. Ti ang o.

Kawppui tlangsuala in hria kan nih pawhin, Pathian nen engkim ala siam that theih tih hi hre reng ila, hma kan lak loh chuan, kan insiamtha ngawt lo a nga, hma kan lak erawh chuan, hmasawn zung zungin inhre lo mah ila, kan hriat lohin hma kan lo sawn viau thei thin a ni.

Nazi Concentration Camp A Beiseina Vul Chu, Khawvelah A Par Chhuak

"A ni, thihna hlim kawr ruam zawh mah ila, thil tha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan thin a ni."(Sam 23:4)

Hitlera leh Nazi (German) ten kristian hmeichhe unau Corrie'i leh Betsie'i an man hlauh mai a, Juda hnam pawh an ni loa, Dutch (Netherland me) an ni a, German (Nazi) ho chuan Netherland chu a lak tawh avangin, an ram chu German huam chhung nilo mahse, thu neihna sang zawng zawng chu an chelh a. Corrie te chhungkua chu ringtu tha tak an nih avangin Juda raltlante an puih tur niin an inhriaa, tichuan an hum ta a. Nazi ho chuan an hum thin tih an hriat chuan, Corrie ti chhungkua chu Juda ho an hremna hmun pakhat Ravensbrück concentration camp ah chuan an dah ta a ni. 

Hna rim tawngkhawng an thawh tir a, ei tur tlemte an pe a, khua a vawt em em bawka. Chutiang karah chuan Corrie leh Betsie chuan, hah taka hna an thawh hnuah an camp chhungah chuan, inkhawm an buatsaih thin a. Betsie nen chuan, an chhuah hunah, Pathian rawng an bawl dun dan tur te chu an ruahman a, an sawi dun reng thin a. Mahse, Betsie chu a hriselna a tlahniam zel a, a thi ta a, a hnuk a chah hma chuan he thu hi Corrie hnenah a sawi a "There is no pit so deep that He [God] is not deeper still" a mizo tawngin han dah dawn ta ila, "Kuarkhurum thuk ber aiin kan Pathian chu a thuk zawk cheu a ni."

Tichuan, Betsie thih hnu ni 15 lekah chuan Corrie chu camp atang chuan a chhuaka, a chhuah chan nia an sawi chu, campa thuneitu tu emawin a chungchang alo record sual vang a ni. A awmzia takah chuan, Corrie'i hi an ngaihah chuan thihthlenga tang tlak a ni a, mahse Nazi miten mitha chhuah tlak angin an lo record palh vangin a chhuak ta a nih an ringa, a chhuah chhan fak erawh hriat a nilo. Pathianin a hruai chhuah zia a lang mai awm e!

Tichuan, Corrie'i hian Pathian rawng a bawl zela, rawngbawltu ropui Billy Graham te, Benny Hinn te, Holly Furtick te, leh midang tamtak fuih tur leh tichak thei turin lehkhabu tha tak tak a ziak a, Billy Graham leh Benny Hinn phei chuan an ngaisang ngang ni tur a ni, hmaichhana hmu turin an pan nghe nghe a, a thih dawn hnaih thleng pawhin Billy Graham hian a ngaihsaka damdawiinah te pawh a tlawh a ni. A lehkhabu ziah "The Hiding Place" phei hi chu, beiseina leh ngaihdamna lehkhabu ropui ber zingah a tel hial awm e.

Corrie ten Boom i thu chhuak (Quotes) “No pit is so deep that He is not deeper still; with Jesus even in our darkest moments, the best remains and the very best is yet to be.”  
A mizo tawngin han dah ta ila "Khuarkhurum thuk ber ai pawhin a thuk sia, Isua nen chuan kan hun thim ber chhungah pawh hian thiltha alo awm tlat thina, tichuan a tha ber ala thleng dawn a ni."

Corrie'i leh Bedsie'i te uanu Pathiana an beiseina hi a ropui hle a, Nazi concentration camp rapthlak zia leh mihring an nghaisak dan a nasat zia kan hre theuh awm e. Tunthlengin Nazi pawla tel chu sawi loh a inhnamhnawihte pawh hi, khawvelin ngaihdam har ala tia, an man chhuah reng reng chu, khawi ramah pawh nise, tihhlum turin an chungthu an relsak thin a ni.

Hmun rapthlak concentration camp ah tang mahsela, Corrie'i leh Bedsie'i te chuan Pathiana an beiseina chu a daih an phal chuang loa "Kristaah chuan a tha ber ala thleng dawn" an la ticheu a ni. Keini pawh hi kan tanna hmun chu, ruihhlo a ni emaw, sum lama harsatna a ni emaw, mipathmeichhiatna a ni emaw, nupui pasal zawn chungchang a ni emaw, eng ang pawhin kan tanna khur chu thuk mahse, kan Lalpa hi a thuk zawk a ni.

Kan Pathian min chanchhuah theih lohna khawpa khuarkhurum thuk reng reng a awm loa. Hei hi Davida pawhin a hriaa "thihna hlim kawr ruam zawh mah ila, thil tha lo rêng rêng ka hlau lo vang; nang ka hnênah i awm si a" alo ti a ni. Hawh u, Lalpaah kan beiseina i siam thar leh ang u, eng kawngah pawh hian, Krista kan dah hmasa a nih phawt chuan, amah Krista atang chuan, thil tha kan beisei hi a thiang si a.

(Tawngtai Dan Tur)
Lalpa, hremhmun kotlanga mitangte chanchhuah hi, i thiltih reng thin a ni a, chungchu ti turin buina reng i nei loa, i chhanchhuahna ban hian, thlen phak loh chin a neilo tih hre reng chungin, nangmah atang thiltha ka duh tin rengte beisei tlat zel thei turin min pui ang che, Amen. Ti ang o.

HMUN MAWI ATANGA HMUN MAWI LEHZUALAH

Nimahsela Peteran, “Tangka leh rangkachak engmah ka nei lo; nimahsela ka neih chhun ka pe ang che: Nazaret Isua Krista hmingin kein kal tawh rawh,” a ti a." (Tirhkohte 3:6)

Patling piantirh ata kebai pakhat hetah hian kan hmu a. Chumi chu biakin kawtah biakina lut turte hnena kut dawh turin kawngkhar "Mawi" an tihah a lo thu thin a ni.

Hepa tan hian chu a thutna hmun kawngkhar mawi chu a tan chuan a mawi ber a ni, khawvelah hmun dang mawi tak tak leh ropui tak a awm anga, mahse chupa tan erawh a kutdawhna hmun chu a dam khawchhuahna tura a inhaikuak ve theihna hmun a nih avangin a tan chuan a mawi ber tho tho a ni.

A piah lawkah chuan biakin chhung a awm a, a luh chak ve thin viau pawh a rinawm. Mahse a kein a kal thei miau si lo a ni.

Nikhat chu Petera leh Johana an rawn kal ta hlauh mai a, a tawi zawngin sawi ta mai ila: Nazareth Isua Krista hminga kea kal tura thu an han pe chu a ke te chu tihchakin a awm a, a rawn ding ta mai. Chu kebai lawm lutuk chu khawidangah mah a kal lo: kal kal leh zuang zuang chungin Pathian fak pahin biakinah a lut ta a ni. Avan ropui tak em.

A hmaa a tana hmun mawi ber, a damkhaw chhuahna tur atanga hmun tha ber "Kawngkhar Mawi" atang khan a aia mawi zual zawk Biak In chhungah a lut ta a ni. Hei hi ka sawi tum chu a ni: i nunah Nazareth Isua Krista a lo luh chuan i tana hmun mawi ber thin nia i hriat aia mawi zawkah a hruai dawn che a ni.

( Tawngtai Dan Tur)
Lalpa, nang ang reng tumah ang awm lo, nang mahah chauh hlimna tawp thei lo a awm a ni tih hi ka hriat renga, khawvel mawinate hian i mawina them pawh an tluk phalo tih hriain, nangmah ka vawn tlat theihna tur chein min pui ang che, Amen. Ti ang o.