THIHNA ATA NUNNA

“Tihtakmeuhvin, tihtakmeuhvin ka hrilh a che u, tu pawh ka thu hriaa mi tîrtu ring chuan chatuana nunna a nei tawh, thiam lohvin a awm lo va, thihna ata a chhuak a, nunaah a lût ta zâwk a ni."(Johana 5:24)

       Kan taksa hi a la dam chhung chuan mitthi kan ni tih pawm hi a har hle ṭhin. Pathian thu aṭang erawh chuan mi zawng zawng hi mitthi, thil tisual, Pathian ropuina chang zo tawh lo kan ni. Pathian nena inzawmna chat ta hi Pathian laka thi a ni a, chu chuan taksa thihna leh chatuana thihna a thlen ta a ni.

       Eden huana thuawih lohna chuan Pathian nena inzawmna a tichat a, huan aṭanga hnawhchhuah an ni ta a. Chuta ṭang chuan sual lamah an nung ve thung a, tun thlengin Adama anga thil tisual ve kher lo chungah pawh thihna chuan ro a rĕl ta a ni. 

       Bean hi a zamna tur ngulah a zam loh chuan, a ṭhan nasat poh leh a ngul a hlat nasa ting mai ang hian, Pathianah mi a awm tawh loh chuan a hla tawlh tawlh ṭhin.

       Pathianin amah nen kan inzawm leh a, kan nun leh theih nan Lal Isua rawn tirin, nunna thuchah a rawn puang ta a; mihringa sual hnathawh tihboral leh, natna tuarte tihdama, thihna ata chhuaka nunna an neih leh theih nan nitinin hna a rawn thawk ta a ni.

       Lal Isuan,  "....tu pawh ka thu hria a, mi tirtu ring chuan chatuana nunna a nei tawh..." a ti a. Thi tawh hnu nung leh tur chuan Pathian thu hriat a, a thu neitu Pathian rin tur a ni. Tuman thiam loh an chantir thei tawh lo. Chutih a hnekin nunnaah a lut ta zawk a ni.

      Lal Isuan dam lo a tihdamte kha an taksa a dam leh mai ni lovin, thihna ata chhuakin nunnaah an lut ta zawk ṭhin a ni. 
  
      Kan taksa hi la dam reng mahse, Pathian nena inzawmna nei lo chu thi an ni a, a vawrtawp chu taksa leh thlarau chatuana thihnaah kal a ni.

      Vawiinah hian chatuana nunna nei turin Lal Isua thu kan hriat a, amah rawn tirtu Pathian kan rin chuan chatuana nunna nei kan ni tawh dawn a ni. Bean, a zâmna tur ngula zâm lo kha, zamna tur ngula zâm leh ta kan lo  ni ang.

       Thihna leh a hnathawhin a tihnatna zawng zawng hi chhuah sanin nunna leh damnaah lut ve la, thiam chang ilo ni mai dawn a ni.

(Tawngtai Dan Tur)
Lalpa, chatuan nun neihna leh vanram luhna chu, kan Lalpa Isua Krista Lal leh Chhandamtua pawm a, i thu zawm hi a ni tih hi ka hriat reng a, hei lo chu kawng dang reng reng a awm lo a ni, tih pawh ka chian a, ka Lalpa Isua Krista chu Lal leh Chhandamtua ka pawm tlata, i thu ka zawm theih nan min pui ang che, Amen. Ti ang o.