"Thinrim ula, sual erawh chu sual suh u; in thinur chu niin tlakpui suh se."(Ephesi 4:26)
Thinrim hi a pawi thei em em a, thinrimna pai reng phei chu, sual a ni. Kan Pathian thu chuan, mihring mai kan nih avangin, kan thinrim thei a ni tih a hria a, kan thinrim pawhin kan thinrim rimna chu niin a tlak pui khawpa, pai rei min phal lo a ni. Keini ngaihah chuan a tawi hle mai thei a, mahse hei aia rei thinrimna kan pai a nih chuan nghawng thalo tak a nei thei a ni.
Ti hian thinrim pawi zia, han sawi ta ila :
1. Thinrimna chuan, chhungkua, thian, nupa, inngaizawng, nu leh pa leh fa inkar te min tih chhiatsak thin a. Chhungkua min ti kehdarh thei thin hial a ni.
2. Thinrimna chuan, thawhhona a tichhe thin a, rawngbawlna a thawhhona tih chhiat hi, kan hmelma pa duhthusam a ni a, chu hna thawk tur chuan thinrimna hi hmanruaah a hmang thin a ni. Eeizawnna lamah pawh, thawhhona a chhiat chuan, thawkho zinga a tu a pawhin, an tuar a sum tamtak an chan thin a ni.
3. Thinrimna chuan, hriselna a khawih chhe thin a, lung thalo tan phei chuan, hmelma hauhawm tak a ni a, hrisel pangngai tan pawh thinrimna hian kan thisen luang (pump) hi a tihsan thin avangin, kan thinrim reng mai chuan lu na leh luak chhuak te, a thlen thei thin a, chawiei te pawh zawi zawiin a ti harsaa, chu thinrimna chu miin a pai rei chuan, mi bawrhsawm takah a siam thei hial thin a ni.
4. Thinrimna chuan, mi pangngai hi mi angloah min siam thei a, a chhan chu tupawh kan thinrim lai hian kan ngaihtuahna a tawi thin a, thutlukna thalo leh awmze nei lo te min siam tirtu a ni thin, hei vang hian thutlukna kan siam dawn phei chuan, kan rilru kan dah fima kan thinrim loh hi a pawimawh a ni.
5. Thinrimna chuan, kan hna thawhnaah min ti hniam thin, sumdawng tan phei chuan, thinrim chunga thil zawrh hi a chi in a chi loh a ni, chu bakah zirtirtu tan hian thinrim sa chunga midang zirtir hian nghawng thalo a neih theih avangin tih loh tawp tur a ni a, office a hnathawkte tan pawh chhawr tlak loa min siamtu a ni a, chhawr tlak loh leh hnathawk thalo chu tumahin an ring ngai lo a, zah pawh an zah ngai lo bawk a ni.
Sawi tur tamtak a awm thei awm e, heng bakah hian, mipakhat chunga kan thinrimna chu kan pai rei lutuk chuan, midangte nen a kan inkarah pawh nghawng a nei thei thin a ni. Chu vang chuan, thinrim loh tawp chu mihring tan chuan a har theia, kan thinrim a nih pawhin, kan thinrimna hmun leh kan thinrimna mihring chungah chuan, kan thinrimna chu luan ral tir vek a tha awm e.
Kan thinrim ai, thinrim duh loa kan insum hian, kan hlawk zawk daih zel a ni.
Mithiamte chuan, miin kan huat zawng taka min tih hian, second 10 lek kan tawng hmain la ngawi rih ila, tawngkam zahawm zawk leh mawi zawk kan phuh chhuak thei thin an ti a. A takah ti dawn ta ila, a har loh viau a rinawm, second 10 hi a rei lo bawk nen. Chu mai bakah, thil thalo ai thil tha zel hi a Pathian thu avangin, a Pathian thu pawh a tih theih bawk awm e.
Til tha emaw, a chhia emaw kan tih dawn chuan tha leh zung seng a ngai ngei ngei a, thinrimna pawh hi kan hneh dawn chuan, kan tha leh zung kan sen loh chuan kan tithei dawn lo a ni.
Kan hun kal tawh a kan thinrimna kan pai rengte hian, min ti hreawm mai mai zawk a, thil tha kan tih theihna tur leh mi tha zawk kan tawnna tur te pawh min bahlah tir thei a, hei vang hian hun kal tawh a kan thinrimna theihnghilh turin tan la ila. Tuna kan hunhman mekah, thinrim lo turin i in veng tha bawk ang u.
(Tawngtai Dan Tur)
Lalpa, thil tha ti tute chu an thil tha tih man i hmuh tir thin a ni tih hre rengin, ka hun kal tawh a ka thinrimna te ka theihnghilh theihna tur leh, ka hun hman leh zel tura thinrimna ka sim theih nan min pui la, chu chu thil tha a nih avangin, i hnen atang lawmman dawn tur a awm a ni tih hre rengin, theih tawp ka chhuah theih nan minpui ang che, Amen. Ti ang o.
No comments:
Post a Comment