Isua Hmaah Kun La, I Sualna A Thiahsak Ang Che

"Tin, hla tak atangin Isua chu a hmuh veleh a tlan a, chibai a va buk a."(Marka 5:6)

Gerasin khuaa Ramhuai tamtak pai (nuaiha) khan Isua a hmuhin a pan a, chibai a buk a ni (marka5:6). Hepa hian ramhuai tamtak a ni a pai, a chetdan a rapthlak hle mai a, khaidiat pawha phuar theih loh a ni. A tal chat zel a, lung hriamin a inzai thin bawk a ni.

A ramhuai pai chu an tamin, an rapthlak zia a hriat a ni. A chhan chu vawk kawchhunga an luh chiah khan khang vawk rual singhnih zet kha khamah an tlan liam a, chutiang zat zat tihlum thei tur ramhuai chu rapthlak eltiang tak an ni tih a hriat a ni. 

Mahse Isua a hmuh chuan chibai a buk ta tho a ni. Isua hmaah chuan chupa chu a bawkkhup lo thei lova, a ding zo lova. A khupin lei chu a si ta a ni.

Pathian chibai i buk duh tlat chuan engmahin an dal thei lo che. Pathian hmaah hian eng sualna mah hi ding zo a awm lo. A kehchhe zawk thin, sual tih boralin a awm ta zawk thin a ni. Pathian hmaah hian kan nihna ang anga kan kun a, chibai kan buk hian kan chhunga sual hnathawh a ti chhe thei teh meuh mai. 

Eng ang addiction ah nge i tan? Eng anga thukin nge sual rawng i lo bawl tawh? Mite mithmuhah tha anga lang mahse a ruka sualna pai nei reng pawh ni ila, chung sual hnathawh zawng zawng chuan Pathian chibai i bukna tur lakah a dang thei lo che a ni. 

Ramhuai nuaih chuangin an ngam loh Isua kha. I fak duh tlat chuan eng thil mahin a dal thei lo che a ni. Kan sualna te, Lalpan min thiahsakna turin, a hmaah kunin chibai i buk ang u.

(Tawngtai Dan Tur)
Lalpa, ka sualte hi hneh a thiah a nih theih nan, sual mah ila i hnena kun a tawngtai nachang hre reng turin min pui la, au a sawmtu che tumah i hnar ngailo tih hi hre reng turin min pui bawk ang che, Amen. Ti ang o.