Thawhrim Leh Inkhawl (Bible Economic)

"Nang, thatchhepa, fanghmir tih dante chhut la, fing rawh; Anni chuan lal te, hotute, rorêltute nei lovin, Nipuiah chaw an chhek khâwm a, A seng hunin an ei tûrte an seng khâwm thin."(Thufingte -  6:6-8)

Bible hian economic hi a sawi nuala, harsat hun atana inrinlawk hi a ngai pawimawh hle a ni.

Fanghmir hian hotu an nei loa, chuti chung pawh chuan thahnem ngai taka hnathawh nachang an hria a, chu mai pawh chu niloin, hun harsa alo thleng thei tih hriain inchhek khawl nachang an hria a ni.

Fanghmir chuan, turtu leh hruaitu neilo mahse, an mahniin thahnemngaihna leh inchhekkhawl nachang an hriaa, heng pahnih te hi, kan dinchhuah theihna turin mihringte pawh hian kan mamawh a ni.

Thahnem ngai taka, thawk tura min turtu leh min hruaitu an awm loh pawhin, thahnem ngai taka kan thawha, hun harsa emaw, beisei loh harsatna alo thleng thei a ni tih hriaa kan inkhawl thin chuan, kan dinchhuah a beisei awm a ni.

Tunlaiah chuan, thawhrimna hi kan ngaisang thar em em a, hma kan sawn tlang ni te pawhin a hriata, mahse kan thawk nasa sia, kan dingchhuak hleitheilo tih thawm hi hriat tur a awm nawk thina, a chhan chu kan inkhawl loh vang a ni thin.

Mi tamtak chuan inkhawl ringawt pawh a nilo, a lut a tam si loh chuan awm zia a awm chuanglo an ti fo thin a. Mahse, tuna kan dinhmun atanga kan than theihna tur chuan kan inkhawla, hun harsa atana kan inven nana kan inrin a pawimawh a ni. Entir nan, thla tin hlawh la kan ni emaw, sumdawng kan ni emaw, damlo thei kan ni a, sokar hnathawk kan nih pawhin eng emaw rokhawlhna avangin hlawhte a tang theia, sumdawng tan pawh beisei loh takin inhralh a har viau thei bawka. 

Heng hun harsa ah hian, kan mamawhte a ngai reng thin sia, chutia kan mamawh a ngai reng avang chuan, mi ta kan puk hawh te alo ngai thina, chutia mi ta kan puk chuan, rulh leh alo ngaia, a hnua dinhmun a rawn pangngai leh hnu pawhin, ba chu rulh a ngaih zel avangin, harsatna kan tawh hmaa kan dinhmun kha kan luah pha mai mai tawh thinlo a ni. 

He harsatna hi kan pumpelh theih nan, lo inkhawlsa ila, hun harsaah kan dinhmun a pangngai pat a nga, tichuan hun tha a rawn in her chhuah leh hunah chuan, hma kan sawn a nga, a hmaa kan dinhmun aia sang zawkah kan hlangkai thei dawn alo ni.

(Tawngtai Dan Tur)
Lalpa, i thu chuan, thawkrim tur leh harsat hun atana inring lawka inkhawl turin min tia, heng hi i thu a ni tih hriain, ka thawhrima, inkhawl nachang ka hriat theih bawkna turin min pui ang che, Amen. Ti ang o.