THIL CHÎN ȚHA LO (BAD HABITS) SALA TÂNG

"Țhatna tih ka duh hi ka ti lo va, sualna tih ka duh loh hi ka ti zâwk si țhin a (Rom.7:9)."

Rev VL Nithanga.

Helai thuah hian Tirhkoh Paula chuan, thil țha tih a duh a ti lo va, sual tih a duh loh a tih hlauh thu a sawi a. Helaiah hian Paula chuan, a thil chîn țha lo (bad habits) chu thil chîn țha (good habits) a thlâk a tum mêk a ni ang. Helai thuah hian ama chaklohna tak tak a sawi nge ni ang a, midang zirtir nân ama thil tawn angin a sawi mai zâwk tih pawh ngaihtuah tham tak a tling.  Amah a insawina a ni emaw, midang tâna a sawi a ni emaw, a engapawh chu nise, a zirtirna zâwk hi ngai pawimawh zâwk phawt ila. Paula chuan Ringtute hian kan tih zâwk tûr kan la tih tâwk loh zia leh, kan tih loh zâwk tûr kan la tih tam zâwk si zia hi a sawi chiang thiam hle a ni.

Ringtuten kan tih loh tûr, thil țha lo kan chîn dawk lak (bad habits) chu bansan kan tum zêl a țul tawh tak zet a ni. Kan thil chîn țha lo, ( bad habits) te chu; zû in te, drugs tih te, zûk leh hmuam chîn te, kuhva ei nasat te, Sex hman sual dawk lak te, dawt sawi chîn te, rûk rûk chîn te, corruption chîn te, mi bum chîn te, that chhiat te, men rei te, thawh tlâi te, mi dawra bat te, thil țha ni si lo, kan chîn dawk lak tawh, kan sim mai theih si lohte  chu kan bad habits chu a ni mai. Chûng chu Paulan, "Sualna tih ka duh loh hi ka ti si țhin," a tih ang khân, keini pawh hian țha kan tih hauh loh hi kan la sim hlei thei lo chu a ni a. Țhenkhat phei chuan sim tumna reng reng pawh kan la nei si lo va. Sualna tih kan duh loh chu kan la ti zel mai zawng a nih hi. 

Țhatna tih kan duh chu kan ti hlei thei lo thung a. Zû in loh te, drugs tih loh te, mei zûk loh te, kuhva ei loh te, mut hma te, thawh hma te, leiba insiam loh te, taimak te, regular taka bible chhiar te, nitina țawngțai te, inkhâwm mi nih te. Heng thil țha te hi ti theitu nih chu kan duh vek, mahse kan ti hlei theilo tlat si. Chuvângin, țhatna tih kan duh ti hlei thei si lo kan nih chu.

Țhatna tih kan duh ti si lo va, sualna tih kan duh loh ti leh tlat si țhin kan la nih chhûng chuan, ringtu puitling țha tak chu kan la ni lo tihna a ni a, bad habit salah kan la tâng tihna a ni. Țhatna tih kan duh kan tih theih a, sualna tih kan duh loh kan tih loh theih hunah ringtu puitling țha tak chu kan la ni chauh dawn ani. Bad habit sal ata kan chhuak tawh tihna a ni ang.

Kan han belh duh chu, eng thil thalo pawh kan sim theina tur atana kan hriat tur pawimawh em em pakhat chu:

Isua hian, kan sim theih loh vanga min hrem tum ranin min changlo a, nun tha zawk kan neihna tura kan sim theih nana min pui turin, a in peih reng zawk a ni.
Kan Lalpa Isua Krista chuan, "Ka fa nangmah maia i hneh theih loh avangin, he indona hi i beidun ang hmiang" tiin, min pui turin a hnai reng a ni.

             Ngaihtuah zui atan
* Hnam dang Kristiante hian a chunga kan sawi bad habits te khi an sim thei mai zel a. Mizo Kristiante hian kan bad habits te hi sim kan tum ve em em si lo va, Piantharnaah kan chian viau vang nge, kan chian loh vang zâwk aw?



(Tawngtai Dan Tur)
Lalpa, misualte simtir tura lo kal i ni tih hi ka hriat renga, ka sualte ka sim theih nana nangmah ka vawn tlat theina tur che in min pui ang che, Amen. Ti ang o.