Thil Tha I Tihin, Midangin I Titha E, An Tih Che Mamawh Kher Suh

“Kei LALPA hi mi tin, an awm dan ang zel leh An thiltih rah ang zela pe tûra Rilru en chhuaktu, thinlung fiahtu ka ni.”( Jeremia 17:10)

“A lama rilru dik tak pûtute chunga a chakzia tilang tûrin khawvel zawng zawngah LALPA mit chu a leng ruai ruai thin a ni.”( II Chronicles 16:9a)

Khawvel awm tirh atanga tun thlenga, thil tha ber titu tunge ti ila? Isua Krista kan tih a rinawm a, adawtah zirtirte leh tirhkohte leh a rawngbawltute an ni ti ila kan sawi sual awm lo e.

Keini pawh hi, Isua ringtu kan nih bakah a rawngbawltu leh a hnung zuitute kan ni a, anin a tih ang bawkin thiltha tih hi, kan duha kan tum bawk thin a, tih pawh kan ti thin a, kan Pathian rawngbawla thiltha kan tihna kawngah hian, a tha zawka kan thil tihte kan tih theih nan, (kan Lalpa Isua Krista rawngbawl dan chu mihring tu mahin kan phak theih dawn loh avangin sawi lo law law ila) tirhkhoh ten thiltha an tiha an awm dan leh an rilru put hmangte han sawi ta ila:

1. Tirkhohte khan, thiltha an tihin, midang hnen atangin "i titha" (complement & appreciate) kher an ngai lo a, Pathian tana thiltha an ti ve thei chu, an lawm em em mai thin a ni. 

2. An thiltha tih mek leh an tih zel tur chu, a tha tih an chiang a, miin i titha e an tih kher chu an mamawh kherlo a ni mai loa, chu an thiltha tih avang chuan, an tuar ngam hial zawk a ni. 

3. Miin an thiltih chu an lawm em tihah an innghat loa, Pathian a lawm em tihah an innghah zawk thin avangin, an thiltih that chu, miin an hmuh leh hmuh loh an ngaihtuah hran lo a.

4. Midang Pathian tana thiltha ti an hria a nih chuan, an thinlung chuan, an mahni hlawkna niloin Lalpa hlawkna tur a dah hmasak thin avangin, "thikna" an nei loin, rawngbawltu dangte chu, puih a ngaihna zawnah leh fuih a ngaihna zawnah,  puih leh fuih an thulh ngailo a ni.

He mi chinah hian duh tawk ta ila, kan zirtur kan hmuchhuak tawh awm e.

Midangin "i titha e" min tih theihna tur hi kan duh thin avangin leh midangin "min hmuhdan" hi kan dah pawimawh lutuk thin avang hian, kan nih tur ang hi kan ni phalo thin em le? 

Pathian rawngbawl kan ni tih hi kan chiang em? Kan thil tih mek hi Pathian rawngbawlna a ni tih chiang lo a, kan tih thin avang hian kal zel a har kan ti thin a, midang tawngkam thlumin, min tih phur loh chuan kan chakna te kan hlauh hial thin a ni. Hei vang hian, "Pathian rawngbawlna avangin ka thiltih hi ka ti a ni," tih hi  kan chian hmasak ber a pawimawh a ni.

Pathian rawng kan bawl a ni tih kan chian chuan mi fak kal kan ngailo a nga, kan chan ngam hial zawk ang. Mi dang tih lawm kan tumlo a nga, Lalpa alawm chuan a tawk tiin kan Pathian ngaihdan kan dah pawimawh hmasa ber ang.

Chutianga midang mit hmuhah thiltha tih kher kan tum tawh loh chuan, nasa takin Pathian lung ti awi turin kan zalen a nga, kan rawngbawlna a hlawk phah ngei ang.

Chu mai bakah, midang mit hmuha thiltha ti leh rawngbawl kan nih loh avangin, midang kan er lo a nga, rawngbawltu dang te kan hlut thiam a nga, kan fuih thiam bawk a nga, puih an ngaih hunah thinlung diktak puin kan pui thiam bawk dawn a ni.

Pathian rawngbawla thil tha kan tih hian, midangin i titha e, min tih hi kan mamawh kher loa, kan Lalpan i ti tha e, min tih zawk hi kan mamawh a ni. 

Hawh u, Lalpan min thlir reng a ni tih hi i hria ang u hmiang!

(Tawngtai Dan Tur)

Lalpa, i mithmuhah i rawngbawlin thiltha ka ti a ni tih hi in hre reng chunga, midangin i titha e min tih hi ka hlawh ngai dawnlo a nih pawhin, i rawngbawlna hi ka bansan chuan loh a, i lung ti awi tura theih tawp ka chhuah zel theih nan min pui ang che, Amen. Ti ang o.