Isua Nena Inkungkaihna

"Tin, mi zawng ang a, in thinlung zawng zawnga mi zanw hunah chuan mi hmu ang."(Jeremia 29:13)

Mi tam takin Pathian hnaih kan tum dan hi fuh si fuh chiah si lo, tih tur hi a ni a. A chhanchu Pathian hnaih kan tum dan ber chu, thil tih that atangin a nih vang a ni.

Muslim, Hindu, Buddhist leh sakhaw dangte pawhin Orphanage Home te an siam ve a, Sikh ho phei chuan fanghmir pawh an that duh lo a. Atheist tamtakin tanpui ngai te an tanpui bawk thin a ni. Hindu tha chuan in tihbuai ai inrem a tha zawk tiin, remna a awm theihna turin chan leh tuar pawh pawi an ti ngailo a ni. Mahse, Isua nen chuan inkungkaihna an nei chuangloa, thiltih that ringawt hi a nilo, tih chu kan hrethiam mai awm e.

Isua Krista vanga thiltha tih a nih loh chuan eng ang pawhin tha mahse, awmzia awmlo a, thiltih thi a ni. A sawi uar deuh chuan Isua nena inpawhna atanga thiltih a nih loh chuan awmzia a awmlo te pawh an ti mahna. Mahse, Isua Krista nei tura thil kan tih a awm theia chungte chu kan Pathian hian a pawm a ni.

Entirnan Isua nena inpawh turin, inkhawm te, camping luhte, midang puihte, kohhran belhte, mahni nun ven fimkhur te hi a pawimawh banglo awm e.

Isua Krista nena inpawh tura pawimawh ber chu, amah kan thinlung zawng zawnga kan zawnna hi a ni. Tawngtaina in kan zawng theia, a thu ngaihthlakna atang kan zawng theia, rawngbawlna hmunah kan zawng theia, bible chhiarin kan zawng thei bawka, chutih rual chuan hengte hi ti mah ila, Isua Krista kan zawnna a nih si loh chuan amah nen inpawhna kan nei hleithei chuanglo ang.

Kan Pathian hi kan thinlung zawng zawnga kan zawn hunah kan hmu dawn a ni. Mahse, amah hmuh ringawt chu inkungkaihna ala niloa, Pathian kan hmuh hian eng ang Pathian nge a ni tih kan hria a nga, kan sual avanga min chhandamtu a nih zia te, hmangaihna Pathian a nih zia te, a ngilneih zia te, amah tihtute enkawl thintu a nih zia te kan hmu ang.

A nihna kan hriat hnuah chuan kan nun zawng zawng hruaitu atan kan thlan a ngai a. Nun zawng zawng hruaitu atan thlang tih awmzia chu, eng dang zawng ai amah dah hmasakna nun a ni. Kan nun hruaitu atan kan thlanga kan dah hmasa ber a nih chuan, eng pawh tidawn ila Lalpa engtin nge ni ang? Tih thinna nunah kan lut tawh tihna a ni a, hei tak hi Isua nena inkungkaihna intanna chu a ni ta a ni.

Amaherawh chu, mihring takin Pathian hi a rawn theih tho a, mihring taka kan rawn a nih chuan, a aw kan hre ngailo ang. Amah kan dah hmasa tak tak a nih erawh chuan a aw kan hria ang, a aw kan hrelo a nih pawhin kan hriatnaah Thlarau'in a rawn thawk ang. Thil kan ti dawna, mahse engtin emaw takin nuamlo kan ti riau ang chi kha a rawn awm ang, chutih rual chuan mihring pawh hian hetiang hriatna hi kan nei sa a, mahse Pathian Thlarau atanga chhuak erawh a dang thung a ni.

Entirnan, tumah hriat loh leh man chhuah theih loh tura thil diklo tih zauha hlawkna hmuh tur lo awm ta se, mihring hriatna (instinct & sense) chuan ti rawh ti rawh a ti maithei a ni. Mahse, Pathian atanga hriatna chhuak chuan tih a duhlo a nga, chutih rual chuan thil tha ti turin min hrilh thin zawk a ni.

Engkima Pathian dah hmasin, kan rawn thin a, a aw kan hre thin a nih chuan, Isua nen inkungkaihna kan nei tihna a ni a nga, chutiang a nih loh chaun Isua nena inkungkaihna nei tura theihtawp kan chhuah a pawimawh awm e. A chhanchu, rawngbawlna thiltithei nei tur chuan Isua nena inkungkaihna nun hi kan neih ngei ngei a ngaih vang a ni.

Isua nena inkungkaihna nei kan tih hian, zaah zaa mifel niha, sual engmah neih loh lam a niloa, chutiang taka thain kan nung theilo tih a hriat vanga min chhandam tura rawn kal a ni. Isua nena inkungkaihna chhungah chuan, kan tisual a nih pawhin thupha kan chawi a nga, a nin kan sim theihna turin minlo pui thin a ni.

II Korinth 12:9 ah khan Paula hnenah Pathianin "ka thiltihtheihna hi chak lohnaah asin tihfamkimin a awm ni" alo ti a, mihring zawng zawngin chak lohna kan nei a, Paula meuh pawhin a nei a, heng kan chak lohna tak hi amah nena inkungkaihna chhungah chuan, a rawng kan bawlna a kan tangkai bikna tur atan min thlaksak zawk thin a ni.

(a sei lutuk kan hlau avangin, bible chang reference kan dah loa, Pathian leh Paula inkungkaihna kan chhui tel a tha awm e.)

(Tawngtai Dan Tur)

Lalpa, nangmah nena inkungkaihna ka neih theihna turin, ka thinlung zawng zawnga nangmah ka zawn theihna tur chein leh eng dang zawng aia ka dah hmasak ber theihna tur chein min pui ang che, Amen. Ti ang o.