Lalpa I Nghah Lai Khan A Siam Tha Thin Che Asin

"Ka nunna hi mi siam that thin a, Ama hming avângin felna kawngahte mi hruai thin."(Sam 23:3)

Israel fate kan en chuan, zinkawng hahthlak tak an zawh a. Kha an zin kawngah khan Lalpan tunge an Pathian an mahni hruai chhuaktu hi a nih tihte, engtia biak tur nge a nih tihte. Engtianga nung tur nge an nih tihte, engtin nge a malsawmna dawng reng thei tura an nun ang tihte kha a zirtir a ni.

Kan Pathian hian, min nghah tir lai hian, kan nun hi a siamtha thin a ni. 

Lawm takin Lalpa i nghak zel ang u.

(Tawngtai Dan Tur)
Lalpa, ram tiam pana ka zin kawngah hian nangin min awmpuia min siamtha thin tih hi hre reng chungin, lawm taka i hnathawh ka nghah tlat theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.




Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

I Dinhmun Harsatna Tak Kha, I Hamthat Bikna Tur Kawng A Ni Thei

"I ngilneihna avâng hian ka hlimin ka lawm ang: Ka manganna hi i hmu si thin a; Ka nunna hi a hrehawm laite pawhin i hre thin."(Sam 31:7)

Davida kan en chuan a chhung ten an dah hniam em em a, an chhungkaw kutnaah pawh a tel a tul an ti kher lo a, an ko haw ve lo a nih kha. 

Chu, dinhmun hniam ngei chu, Lalpa nena in pawlna tak tak a neihna a ni a. Lalpan ami duh angah a chher chhuah phah ta a. Tichuan chhungkaw kut pawha an koh haw duh loh kha, Israel lal atana hriak thih turin an koh haw ta a nih kha.

Josepha kha a u ten an huat rawn a, kha an huat rawnna tak kha, Aigupta thlen tirtu a ni a. Dawt avanga Aigupta tanin hreawm bera a tanna tak kha, Aigupta hotu lalber a nih theihna kalkawng a ni.

Keini pawh hi tiro,

1. Thawmhnaw tha leh thil dangte midang neih ang, kan neih ve phak lohna takte hi, pawisa min khawl thiam tirtu leh rilru puitling min neih tirtu a ni zawk thin.

2. Kan beisei anga kan nun a in her loh thin avangin,  fimkhur taka remruat dan leh hma thlir siam dante kan thiam phah thin.

3. Kawppui zawn khawnga kan tluan lohna takte hi, mitha zawn ngaipawimawh tur a min ti fingtu leh mitha min neih tirtu a ni zawk thin.

4. Kan lungngaihna takte hi, tawngtai dan min thiam tirtu a ni thin a, chu kan tawngtai thinna atang chuan Lalpa kan hmuh fiah phah thin.

(Tawngtai Dan Tur)
Lalpa, ka nuna thleng lo atana ka duhte hi, nang chuan min zirtirna hmanruaah i hman thin avangin, ka nuna thil pawimawh berte an ni hial zawk thin a. Nangmah nena engkim thlir thiam tur leh engkim phena min zirtir i duhte zir thiam turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.




Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Nangmah Phuar Betu Atang Khan Chhuah I Duh Em?

"Tin, Lalpa chu Thlarau chu a ni a; Lalpa Thlarau awmna apiangah chuan zalenna a awm thin."(II Korinth 3:17)  

Barabba kawl kha, Krista hmangaihnain a phelh sak a ni.

Min phuar bet tlattu kan kawl bun hi, Krista hmangaihnain min phelh sak ve em. Min phelhsak lo a nih chuan, Krista hmangaihna hi kan la hre tam tawk lo tihna a ni thei.

Krista hmangaihna chuan Barabba kawl kha a phelh mai a ni lo a, Barabba kha nun thar a pe a ni. Barabba khan amah ai Krista an khengbet kha mak a ti a, Pilata hmaa an dindun hma pawh khan, Isua chanchin kha alo hre ve tawh a, mahse Isua chanchin a hriatna ringawt chuan a chhuah zalen lo a. Hmaichhana rorelna hmaa an dindunna hmunah, Krista a hnaih chilha, fiah taka a hmel a hmuh theihnaah chauh khan Krista hmangaihna chuan a chhuah zalen a ni.

Keini pawh hi, Krista chanchin ralah ringawt kan hre mai a nih chuan, min chhuah zalen hauh lo ang, mahse hmaichhana Krista kan tawng tak taka, kross a a thihna kha kei misual vang leh ka thih ai a ni tih fiah taka kan hmuh a, a ni chu van rorelna hmuna min dinpuitu a ni tih kan hmuh fiah hunah, Krista hmangaihna hian min chhuah zalen dawn a ni. 

Thu dangah han lut zawk ila, rawngbawltu tlachhia pakhat hi a awm a, hun rei tak zu bawiah atanga. Tichuan, hun a kal zela, tlai khat chu an kawmthlanga a tei mai mai chu, a Pathian thu a hriat tawhsa in a rawn denga, a in hmuchhuak taa, chuta tang chuan zu bawi ata chhuah zalenin a awm a ni. 

Pathian thu hi a chaka, hriat tam hrim hrim hi atangkaia, he rawngbawltu pawh hi, camp-ah a lut lem loa, a inhmuh chhuah lai hi bible a chhiar lai leh a tawngtai lai pawh a ni lo a, a tei vel mai mai laiin, Pathianin a thu a hriatsa chu amahah a rawn ti nunga a chhanchhuak ta a ni.

Krista chhanchhuahna kan chan loh chhan chu a hmangaihna kan hriat tawk loh vang a ni a, a hmangaihna kan hriat loh chhan chu a thua kan inchhiah tawk loh vang a ni.

Kan tanna hmun leh kan buaina hmun hi eng pawh nisela, chung hmun atanga chhuah kan duha kan tum a nih chuan, a nasa thei ang berin Pathian thuah i inchhiah ang u.

(Tawngtai Dan Tur)
Lalpa, ka tanna hmun atanga chhuak turin, i hmangaihna ka hriat a tul a, i hmangaihna ka hriat theihna tur chuan i thu a nasa taka ka inchhiah a tul a ni tih hi ka hriat renga, theih tawpa i thua ka inchhiah theih nan, thahnem ngai sauh sauh turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.



Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Remna Siamtute Chungah Lalpa A Lawm Thin

"Sual kalsan la, thil tha ti rawh; Remna zawng la, a umin um rawh."(Sam 34:14)

Remna zawngtute hi Pathian hian a ngaihthah ngai lo a. Remna siam hi sual kalsanna pawimawh tak a ni.

Kan rawngbawlpuite nen emaw, kan chhungkaw zing amite nen emaw, kan thiante nen emaw, kan eizawn pui leh kan hnathawh puite nen emaw, intihbuaina kan nei mek em? Kan nei mek a nih chuan remna siamtu zawk ni ang u.

Tin, tunah midang nen buaina kan nei lo a nih pawhin, midang nen buaina kan neih ve leha remna siamtu zawk ni turin inbuatsaih reng ang u. Remna siamtu kan nih hian, mihring hmaah chuan kan tlawm a nga, kan lang mawi lo pawh a ni thei e, mahse  Lalpa mithmuhah kan mawi thin a ni.

Remna siamtute chu Lalpan a ngaihthah ngai loa, a malsawm thin a, a ngaihsak reng bawk thin a ni.

(Tawngtai Dan Tur)
Lalpa, nang chu lei leh van inkara remna siamtu i ni a, remna i siamna kawngah khan nasa takin i tuar a nih kha. Kei pawhin i hniak hnung ka zui ve a, remna siam tura aman pek ngaite chu ka pek ve theihna turin min tichak ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.



Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Tuna I Dinhmun Kha A Rit Tiro, Mahse Chak Lehzualna I Neihna Tur A Ni Asin

"Chakna atangin chak lehzualnaah an kal thin a, Zion-ah Pathian hmaah chuan an inlan theuh thin."(Sam 84:7)  

Gym a kal thinte hi a hma a an chawi zawh ngai lohte an chawi zo thin a, a hma aiin an tlan thei zawk thin a, a hma aiin sit-up leh push-up te pawh a thei zawk thin. A awm zia takah chuan, a hma aiin an chak zawk tihna a ni. Tin, gym a an kal hma pawhin mi pangngai,  chak tha pangngai an ni a, damlo leh hriselna a harsatna tawkte tan chuan gym a exercise lak ve chi a ni lo a, an chauh belh mai zawk dawn a ni. Mi chak pangngai leh hrisel pangngai, gym ah pawh kal lo mahsela chak thawkhat ve tawkte chauh kalna chi a ni.(chutih rual chuan gym chi hrang hrang a awm a nga.)

Hei ang chiah hian, thlarau nunah pawh hian, chakna atanga chak lehzualnaah kan kai dawn a nih chuan, gym a kal thinte angin, rit kan chawi ve a ngai thin a ni. Chu rit chu, lungaihna pawh a ni thei, ngaihzawng neih kawnga tluan lohna pawh a ni thei, eizawnna a tluan lohna pawh a ni thei, hrisel lohna pawh a ni thei bawk awm e. Chung ritte chu kan chak leh zual nan kan Pathian hian kan chawi a phal a ni, a chhanchu tuna kan dinhmun aia sang zawkah min dah a duh vang a ni thin.

Tin, gym a kalte chu mi chaksa leh chak pangngai an nia, mi chak lo tan chuan an rit lak ang te leh an insawizawi dan ang a insawizawi ve chi a ni lo ang hian. I rit chawi mek kha, mi chak tha pangaite chauh chawi theih chi a ni a, Lalpan i chak leh zualna turin a chawi tir che a, i chak loh vanga kha rit kha chawi i ni loa, i chak vang zawka chawi i ni.

Gym a kal rei tawhte chu midang zirtirtu (instructor) an ni thin a, chutiang chiah chuan thlarau kawnga rit chawi thin leh chawi thiam tawhte chu, midang hruaitu leh zirtirtu an ni thei thin a, chutiang mi ni tur pawh chuan Lalpan a duh che a ni.

Kan Pathian hian, kan awmna ngaia kan awm renga, lungawi taka kan awm hi a duh lo a, kan nih theih tha ber kan nih hi a duh a, chu vang chuan mitha atang mitha zawk mi nih tir a,  chakna atanga chak lehzualna min neih tir a duh thin a, hei vang hian rit kan chawi hi a phal thin a. Mosia pawh kha a beram vennaah khan a lungawi reng alawm, mahse Lalpa a lungawi ve lo thunga Aiguptaah a tir a. Josepha pawh a pa inah khan a lungawi reng a, mahse Lalpan a pa ina lungawi mai mai turin a duang loa, chu vang chuan, rit a chawi tir a nih kha.

Hawh u, lawm chungin kan rit chawi, kan harsatna leh manganna te hi i chawi ang u.

(Tawngtai Dan Tur)
Lalpa, tuna ka dinhmun aia sang zawk min pek i duh a, chuvang chuan ka nun hian rit a chawi i phal avangin ka lawm e, i duh ang ngei a chakna atanga chak lehzualna ka neih theihna turin, min zirtir i duhte chu ka zirthiam theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.



Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Puih I Mamawhna Zawnah Tak Khan A Pui Duh Che

"Tin, Thoma hnenah chuan, “I kutzungin han khawih la, ka kutte en rawh; i kut han ban la, ka nakah zen rawh; ring lovin awm suh la, ring rawh,” a ti a."(Johana 20:27)


Isua Krista chu kan sual tlan nan, a thia a tho leh a ni tih lai tak a hi, rin loh chuan, chhandamna a chan theih loh a ni. Chutiang khawp chuan, a thawh lehna hi a pawimawh a, mahse zirtir zinga chik ber leh fimkhur ber pawh ti ila kan sawi sual loh tur a ngaih, 'Thoma' chuan a ring hleithei ta tlat lo mai a.

Vawi tam tak Isua ngei pawhin a thia a thawh leh tur thu, entirna nen a hrilh thin sia. Chuting chung pawhin a ring thei loa, zirtir dangte pawhin an hrilha ala ringthei chuang lo, ti hian a ti zawk a "“A kuta thir khenna serte kha ka hmuh a, thir khenna serahte chuan ka kutzung ka khawih luh a, a naka ka zen meuh loh chuan ka ring lo vang,” a ti a."(Johana 20:25)

Chutianga a sawi ang tak chuan, Isuan "a nak fei chhunna kua a zen tir a, a kun thirkhen tlangna kua pawh a khawih tir a ni." Rin lohna hi, hremhum kal ngei ngeina tur khawpa sual lian a ni a, chu rinna chu a kebula a zirtir ngei Thoma'n a neih loh khan, Isuan hei leh chen hnuah pawh i ring lo a maw! i nih nih chu va ni mawlh teh. A ti lo a, a rin theihna turin, Thoma duh ang ngeiin a pui zawk a nih kha. Chutiang taka Thoma chunga Isuan a tih chhanchu, Isuan Thoma a hmangaih vang a ni.

"Rinna hi a pawimawh a, vanram chahbi pawh a nia, mahse rinna chungah hian hmangaihna a awm zel thih" ti ila kan sawi sual awm lo e. Rinna tlemte neitute hi Lalpan min hmangaih avang hian, kan rinna pawh hi tlingah min pawmsak a ni. Chu mai pawh chu ala ni lo a, rinna kan neih pawhin, a hmangaihna avangin rinnaah chuan min hruai luh bang loin a tum thin.

Thoma chunga Isuan a tih ang chiah hian, keini chungah pawh hian kan Lalpa hian a ti ve a 

1) Khawi lai nge i chak lohna lai chu, ka tichak ang che,

2) Eng sual hi nge i sim theih loh chu, sim turin ka pui ang che, 

3) Eng laiah nge hma i sawn theih loh, hma i sawn theih nan ka pui ang che, min tia.

"Ring lovin awm suh la, ring rawh"(Johana 20:27b) Thoma hnena a tih ang bawk khan keini hnenah pawh hian, i sim theih lohte, i chak lohnate, hma i sawn theih lohnate kha, keimah nen i paltlang thei tih, 'ring lovin awm suh la,' keimah nen kan hneh theia, kan paltlang thei a ni tih hi 'ring rawh,' min ti a ni.

Hawh u, Thom'n a rin theih dan tur a puan chhuah ang chiah hian, hmangaihnaa khat kan Pathian hnenah hian puih kan ngaihna zawn "kan chak lohnate, kan sual sim theih lohte, kan hmasawn theih lohnate hi" i puang chhuak ve ang u. Tichuan, a nin kan hneh theihna turin min pui dawn a ni.

Tin, Thoma atangin zirtur pakhat kan nei a, chu chu Thoma chuan a thinlung zawng zawngin Isua a ngaithla a, rin ngei a duh a, a tumna hi a ni.

(Tawngtai Dan Tur)
Lalpa, mi fel sim tur nei lote, mi chak tih chak ngai lote, mi tha hmasawnna tur nei lote ai chuan, mi sual sim tur nei sim chungahte, mi chak lo i tih chak duhtu chungahte, hmasawn hleithei lo i puihna ngentu chungahte hian, i lawm zawk a ni tih hi ka hriat renga. Bang hauh lo a, i ke bulah i puihna ngena awm tlat zel turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.


Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A

Lalpa Thawh Duh Dan Leh A Thawh Duh Hun Ngaichang Thinte Chu An Hlawhtling Thin

"Nimahsela keimahin ka thawk lo va, Pathian khawngaihna ka hnena awm khan a thawk zawk a ni."(I Korinth 15:10b)

"LALPAN in a sak loh chuan, A satute chuan an thawk rim thlawn mai a ni: LALPAN khawpui a vawn that loh chuan, A vengtu chu a meng thlawn mai a ni."(Sam 127:1)

Rawngbawl dan chi hrang hrang a awm a, eng kawng zawng pawh a rawng kan bawlnaah hian, keini a rawngbawltute hian tihtheih kan nei a, Pathian hi mihringte thawhpui duh thin Pathian a ni a, hei vang hian kan tihtheih tawk kan tih hi a tul thin a, mahse"chu aia pawimawh zawk chu Lalpan hna a thawh hi a ni."

A chang chuan keimahni a rawngbawltu a hi, kan chawlh a, tawngtaia kan rawngbawlna hlana, Pathian tih tura kan dah hi a pawimawh zawk hun a awm thin. 

Keimahni ai rawngbawlna hian, Pathian hnathawh a mamawh zawk tih hi kan hriat reng a pawimawh awm e.

A chang hi chuan kan bei vaka, kan thawk nasa em em a. Chutih lai chuan kan Pathian hian, "Lalpa nangin tizawk rawh kei chuan ka thei lo a ni," kan tih hun alo nghak thin tih hi hria ang u.

Pathian hnena kan hruai tumate hian, an mahni a Pathian an hmuh ve a tul thin a. An hnena Pathian thu kan hril a pawimawh a, chu aia pawimawh zawk chu, Pathian thu kan hril a chu an mahnia Lalpan a thawh tir hi a ni a, an mahnia Pathian thu a nuna hna a thawh theihna turin, tawngtaisak chunga kan thlah zalen a tul fo thin. 

Tin, kan eizawnnaah pawh hian, keimahni theihnaa kan nawr tang tang reng a pawimawh rual hian, Pathian hnathawh kan nghah thin hi a pawimawh zawk chang a awm thin.

Kan tihtheih chin ti thei tur chauhin Lalpan theihna min pe a, kan theih bak tih tum lo ila. Chu maibakah Lalpan a tawh loh chuan, a thawktute hi kan thawk rim thlawn mai thin a ni.

Pathian hmanrua mai kan nih leh Pathian tel lo chuan engmah kan nih loh zia hi, hre reng thin ang u.

(Tawngtai Dan Tur)
Lalpa, i thawh loh chuan engmah ka ni lo tih hi ka hriat renga, i thawh hun leh i thawh duh dana hi, ngaithla thin tur leh ngaichang thin turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.







Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A