Lalpan Amite Ke Pen Tin A Remfel Sak Thin (Part 3)

"Pathian duhzawng inthawinate chu thlarau lungchhia hi a ni. Aw Pathian, thinlung lungchhia leh inchhir ngawih ngawih hi i hmusit lo vang."(Sam 51:17)

"Amaherawhchu mi sual chuan a thil sual tih zawng zawngte a hawisana, ka dan siamte a vawn a, dan chu zawma thil fel a tih chuan a nung ngei ang, a thi lo vang. Bawhchhiatna a lo tih tawh rêng rêng kha chu hriatsak reng a ni tawh lo vang; a lo tih tawh a felnaah chuan a nung ang."(Ezekiela 18:21,22)

Vawiin chu sual sim lampang han sawi ta ila.

Eng ang pawhin lo tisual tawh mah ila, chu kan sual tih chu kan sim chuan, Pathianin min ngaidam duh reng a ni. A nasa lutuk hei chu ka ngaidam theilo tiin, ngaihdam theih chin a tuk loa, sual ti thin simte chu a ngaidam zel duh a ni. 

Tihian a ti leh bawk a "Misual thihnaah hian lawmna reng ka nei êm ni? A kawngte chu a hawisana, a nunna zawk lo chu? Tih chu LALPA PATHIAN thu chhuak a ni"(Ezekiela 18:23). Misual sual vanga an thih emaw, an tihsual vanga thilthalo an tawhnaah te hian, Pathian a lawm loa, misual an simnaah hian Pathian a lawm ber zawk a ni.

Chu mai pawh ala nilo, "dan chu zawma thil fel a tih chuan a nung ngei ang, a thi lo vang (Ezekiela 18:21)," "a lo tih tawh a felnaah chuan a nung ang a ti a"(Ezekiela 18:21) ni. Sual sim chu an thih a phal loa, simna hrim hrim pawh thiltha a ni tawha, sim bakah thil tha leh a dan siam te zawm chu, an thil tih that man chu an hmuhhmaih lo ang a ti, ti ila kan sawi sual awm lo e.

Ruihhloah rei tak kan tanga, "tha chhuak leh mah ila awmzia a awm tawh chuan lo ang" mi thenkhat chuan an ti thin. Mahse, hei hi sual bumna a ni, ruihhlo sima rawngbawltu tha tak ni ta tam tak an awm, pastor hialte pawh ni leh ta te pawh an awm a. Ram hruaitu thatak ni leh ta te, sumdawng hlawhtling tak ni leh ta te pawh an awm a ni. A chhanchu an sim miau a, harsa mahse thiltha an ti tlata, harsa taka thiltha an tih hram hramna ah chuan Lalpan an ke pen tin alo remfel sak a, engahmah miin an ngaih lohna atang mi zah rawn leh mi ensan an lo ni ta a ni. Chutianga, sual simte lawmman pek chu Lalpa lawm zawng tak chu a ni zawk a ni.

Mipat hmeichhiatnaa, tisual te pawhin, insiam tha mah ila tumahin min pawm thei tawh lo ang, chuvang chuan tihian awm law law ila ka tan a tha zawk te an ti thin. Mahse, mipat hmeichhiatnaa talbuai sim a, Pathian rawngbawla khawvel deng chhuakte pawh sawi tur an awm a. K.S harsa tichung chung leh mi hmai eng zah chung chunga insiam tha, kristian chhungkua dinpui tur hmua, kristian chhungkua tha ber nei ta te pawh an awm a ni. Chu mai bakah chuan, neih inang inkawp sim a, Pathian rawngbawltu tha tak tak te pawh sawi tur an awm tam viau awm e. Hmeichhe bawlhlawha an sawi, Mari Magdalene pawh kha, kan Lalpa Isua Krista rawngbawltu tha ber a ni a, a nih theih chhan chu, a sim a, Isua a zui vang a ni.

Sum lak luh dan dik loa, sum la lut thinte pawh hi, ka sim chuan engtin nge ei ka zawn tak ang an ti thin a. A nihna takah chuan, diklo taka sum la lut tura hlau leh khur chunga beih beih ai chuan, dik taka sum lak luh hi a awlsam zawka, kan hlim zawk bawk a ni. Pawisa neih teuha, hlau dep dep a awm ai chuan, tlemte neiha thlamuang taka nun hi a hausak thlak zawk a ni. Sum diklo taka la lut thin, sual sima rawngbawltu tha tak nita te pawh an awm a, chu mai bakah Pathian duh anga sum la lut a, hausa zawk ta te pawh an awm a ni. Robert Arthington, Arthington Mission Mizoram'in chanchintha kan chan ve theih nan a, missionary rawn tirtu, pawh hi. A chhungte chuan zu an zuar thin a, chu chu duh loin eizawnna dang a dap a, zu an zawrh lai aiin an hausa zawka, rawngbawltu ropui tak a ni ta bawk a ni.

Rawngbawltu sual tiru thin te pawh hian, ka sual ka puan chuan, ka dam chhungin tumahin min ring tawh lo ang an ti thin a. Mahse, a letling zawngin an hria a ni, an sual an zep ru emaw an tih lai hian, mi zawng zawngin an hre veka, an ringlo thin zawk a ni a. An sual an puan chiah hian, mi zawng zawngin an ring ngam tawh zawk thin a ni. Sual zep ru thin rawngbawltu tluang reng reng an awm ngai loa, sual zep loa inpuanga sim ta reng reng, tluanglo leh inchhir an awm ngai lo bawk a ni. An simna ah chuan, Lalpa a lawm a, an ke pen tin alo remfel sak zel zawk thin a  ni.

Lei leh vana Lal ber leh thuruk zawng zawng hre fai vek, kan Pathian khian, sual sima, felna kawnga kalte chu, a miteah a chhiar thin a, an ke pen tin a remfel saka, nun thatak pek, a inpeih renga, engtin nge kan chhan ve dawn le?

(Tawngtai Dan Tur)
Lalpa, sual sima thatna kawng zawh te chu, i miah i chhiar thina, an ke pen tin i remfel sak thin a ni tih hi ka hriat renga, chu chu ka chan ve theih nan, ka sualte ka sim a, i tana ka nun theih nan min pui ang che, Amen. Ti ang o.

Lalpan Amite Ke Pen Tin A Remfel Sak Thin (Part 2)

"Mihring kawngte chu LALPA ruat a ni a, Engtin nge mihringin a kawng an hriat theih ang?"(Thufingte 20:24)

"Kei LALPA hi mi tin, an awm dan ang zel leh An thiltih rah ang zela pe tûra Rilru en chhuaktu, thinlung fiahtu ka ni."(Jeremia 17:10)

Vawiin ah chuan, eizawnna lam leh career lampang a Pathianin kan ke pen tin min remfel sak zia han thlir ho dawn ta ila.

Pastor ropui em em Joel Osteen chuan, cameraman nih a tum ngar ngar a, Pathianin a ke pen a tha zawngin a thlak sak a, pastor a ni taa.

Pastor ropui tak Rick Warren pawh hian, a mi entawn (influencer) zingah Peter Ducker, management lama mithiam chu a sawi tel thin bawka.

Nicky Cruz'a evangelist ropui deuh pawh hi, drug zuar thin leh misual intel khawm zinga an ho tupa ber a ni thin a. Pastor David Wilkerson'a rawngbawlna atang a piangthara tichuan, bible te zirin, evangelist ram hrang hranga an sawm thin a ni taa. Kristian chhungkaw lampangah phei chuan khawvelah amah tluka sawithiam an tam bik awm lo e.

Viola Davis tun hun (generation) a, hmeichhe lemchhan thiam bera an sawi pawh hi, a naupan laiin an retheih em avangin, eitur zawngin mi bawlhhlawhte an hai thin a, mi eitur te pawh an ru thin. A acting school kalna chu an awmna atangin a hlat avangin darkar 5 laite, bus'ah a chuang thin a. Mihang a nih avangin, a tan roles (lemchhan tur) avang em em a, Juilliard School acting zirna tha ber pawla a zir chhuah hnuah pawh, flim chan tur kum 3 lai a hmu zo loa, kum 3 hnuah chuan a flim chan hmasak ber tur chu a chang taa, dollar 528 chauh an hlawh tir nghe nghe a ni. Mahse, Pathian a vuan tlata, a bei zela, a tahtawlin Lalpan a hruai zel a, Oscar award hial a dawng ta a ni. (Viola Davis chanchin hi a kimchang zawkin kan la tichhuak turah ngai ila.)

Khing mi pali te khi, mi hran theuh an ni a, mahse thil pakhatah erawh an inang vek a, chu chu Pathian tih mi an ni vek a ni. Nicky Cruz'a phei chu, mizo'in a chanchin kan sawi nasa em em a, a sual thin zia te pawh kan hre vek awm e, mahse a nun a inthlak a, Lalpa tihtu alo ni taa, Lalpan a rawngbawltu turin alo hmang duh takzet a. Kan Pathian hian, misual inchhira alam pan te hi, a hnawl ngai loa, chan tur tha alo pe zawk thin a ni.

Pathian nena kan nun hi kan hman tlat chuan, kan Pathian hian kan ke pen tin hi min lo remfel sak thin a. A chang chuan kan kawng zawh te kan tum loh danin, a tha zawk tur a nih avangin min thlaksak thei a. A chang chuan, ka theih tawh lo ang a, kan tichung pawhin, anin min hruai zel avangin a tawp min thlen thei bawk a ni.

Civil service emaw, doctor emaw, kan nih duh dang emaw te hi, 'ka tum ngam tawh lo,' kan lo ti tawh maithei a, mahse Lalpa kan vuan tlat a nih chuan, zawi zawiin min hruai a nga, kan tum hi min hruai thleng thei a ni. Mahse, chutiang a thlen theihna tur chuan, amah ringa kan beiseina siam thaa kan beih ve a ngai a ni.

Kan naupan laia kan tum tak te hi, kan nih theihna turin kan kum te a tam tawh a ni maithei a, mahse chu kan thil tum tlukpui zeta tha chu kan neih theihna tur kawng dang ala awm a, kawng pawh ala in hawng reng a ni. Chu tiang ti thei tur chuan, Lalpa kan vawn tlat a pawimawh a nga.

Thil dang pakhat awm leh thei chu, kan rin loh daihin kan nun a kal kual daih thei a. Chutiang dinhmunah pawh chuan lo ding ta ila, Lalpaa kan awm chuan anin kan kawng min remfel sak vek a nga, kei mahni duhthusam aia tha min pe thei a ni.

Kan bible thu tarlan ang hian, mihring kawng hi Lalpan a ruat thin a (Thufingte 20:24), a tha zawnga nung duh lo chuan thil thalo an seng thin a, a tha thei ang bera nun hmang thintute chuan, thil tha an seng thin a, Lalpan kan nun dan ang zelin min pe thin a ni (Jeremia 17:10). Chutiang a nih rual chuan, tisual thin mi a inchhira, Lalpa lam a hawi anih chuan, ngaidam turin a hnai renga, a nun a thlaka, tha zawka a nun a hman chuan, thiltha a seng turin a ruat sak dawn a ni.

Lalpa kan vuan a nih chuan, tlu lek lekin kan kal hram hram a ni thei e, kan tum loh lamah kan awm daih pawh a ni thei e, chutiang pawh chu nise zamloin, Lalpa vuan tlat zawk ang u. Tichuan, a tawp kan thlen thlengin kan ke pen tin min remfel sak zel dawn a ni.

(Tawngtai Dan Tur)
Lalpa, ka awmna chin ka hriat loh pawhin, nangin ka awmna chin i hri e, ka ke pen tin min remfel sak zel theih nan, nangmah ka vawn tlat theihna tur che in, min pui ang che, Amen. Ti ang o.

Lalpan Amite Ke Pen Tin A Remfel Sak Thin

"LALPA chuan an kalna tûrah a hruai thin a, A duhzawng titute chu a veng thin."(Sam 37:23)

Sam 37:23 hi King James Version bible ah chuan,"The steps of a good man are ordered by the Lord: and he delighteth in his way." A nihna angin han letling dawn ta ila " Lalpa chuan mi fel ke pen tin chu, a remfel sak thin a, ani chu a kawngah chuan a lawm thin" ti ta ila kan sawi sual awm lo e. Kan mizo tawng bible pangngaiah pawh hian, hetiang tho hi a kawk a. A pumpui anga lakin, Mizo tawnga Sam 37 na pumpuiin a sawi chu, King James Version Sam 37 na pumpui in a sawi nen a inmil vek a nga, amaherawh chu a chang mal anga lakin, chang tin erawh a in ang loa. Sam 37:23 pawh hi, a mizo tawngah chuan chang 21 na ah mifel a kawk (address) tawh a, chang 23 na ah a rawn sawi nawn ta lem lo a ni.

Kan thupuiah lut ta ila, kan bible ah chuan (Mifel chu) "LALPA chuan an kalna turah a hruai thin" tiin a in ziaka. Mi fel chung chang Thufingte 23:16a ah ti hian a inziak a "Mi fel chu vawi sarih tlu mah sela, a tho leh zel thin" tiin. Mihringah hian, vawi khatmah tlu ngailo an awm lo, tluk apianga tho leh tuma, tho leh thinte hi Lalpa chuan, mifel a ti a. Chutiang mi te chu, Lalpan an kalna turah a hruai thin a, an ke pen tin a remfel sak thin a ni.

Pastor (Bishop) ropui deuh mai, T.D Jakes a chuan tihian an chhungkaw chanchin a sawi a, ka nupui nu a thi a, na kan ti em em a awm ngaihna kan hreloa, chu tih lai chuan ka nu khumbetin a naa, buaipui reng a ngai bawka, ka nupui nu a thi pawh chu hreawm kan tih tawh tehlul nen, ka nu chuan min kalsan leh a, awm ngaihna hi ka hre tawh lo, chutih lai chuan kan fanu kum 13 mi lek chu a rai a, awm ngaihna kan hre tawh lo pawh a ni tawhlo, nun ngaihna hi a awm lo ta hialin ka hria. Na ka ti lutuk hi, kar thum chu ka tap a ni, mahse hun a liam a, chu ka fanu rai vek Sara Jakes Robert chu, rawngbawltu a ni ta, a ti. Sara Jakes hi kohhran hrang hrang pawhin thu sawiah an sawm thin nghe nghe a ni.

Billy Graham, fapa sual leh fapa tlanbo an tih thin, Franklin Grahama pawh pastor niin, a pa aiawhtu a ni a. An ramah chuan Franklin'a hi an zah hle a, Obama'n neih inang inkawmna dan a kal vawng pui lai pawh khan, Franklin Graham hian na takin a sawisela, President nilai Obama'n a chhang let ngam lo nghe nghe a ni.

Sam 37 na phuahtu lal Davida pawh hi, mi nu a uire a, an fahrin hmasa zawk chu a thi a. Tichuan, Lalpaah Davida chu a kir leh a, tichuan amah thlaktu tur fapa tha em em, fing em em Solomona chu, a uire na hmeichhia ngei nen chuan an hring ta a nih a ni.

T.D Jakes, Billy Graham, Davida te chuan, harsatna engah pawh Lalpa beisei an bang loa, Lalpan a tawpah chuan an ke pen tin alo remfel sak zia a langa, Davida te, Sara Jakes te, Franklin'a te chu tlu mahsela an tho leh a, an thawh leh hnuah chuan, Lalpan mifelah alo pawm a, an ke pen tin chu a remfel sak leh ta a ni.

A ni lo zawngin kan nun a kal thin, kan beisei loh harsatna pawh kan tawk thin, chu mai bakah kan chhungkaw zinga mi, nun dik loh avangin, chhungkaw pumpui chu hnuhhniamin kan awm ta emaw kan ti hial thin a, mahse Lalpa Lalpa kan ti fo a nih chuan, a nin engkim min lo remfel sak leh diam thin a ni.

Kan tisual palh thei e, kan tisual tawh pawh a ni thei, Lalpan kan ke pen tin min remfel sak theih nan, hawh u i tho leh ang u. Kan ke pen tin min rem felsak duhin Lalpan nang leh kei hi min nghak reng asin.

(Tawngtai Dan Tur)
Lalpa, nang chuan tisual pawha tho leh thinte hi mifel ah i pawm a, mifel chu an ke pen tin i rem fel sak thin a, kei pawh hi mifel zingah chuan ka tel ve theih nan, ka tluk pawha ka thawh zel theihna turin min pui ang che, Amen. Ti ang o.

PIANTHARNA, RINGTU NUN BUL ȚANNA

                              
"Tin, Isuan a chhâng a, a hnênah,"Tihtak meuhvin, tihtak meuhvin ka hrilh a che, mi tupawh an pianthar loh chuan Pathian ram an hmu thei lo vang," a ti a." (John.3:3) 

Mizoram hi piangthar ram kan ni a. Kan piang thar kan piang thar a, mahse kan ram nun chu a la fuh tak tak thei si lo va. A chhan lian tak chu, Piantharna hi ringtu nuna thil zawng zawng famkimna emaw kan ti a, kan ngaih țhat pui ngawt mai hi a fuh tâwk lo a ni. Pathian thuâwihna tel lo hian piangthar țha tak a nih theih emaw kan ti a, chu mai pawh ni lovin piangthar tawh tân Pathian thuâwih chu țul ta lovah kan ngai zâwk mah a. Hetiang ngaihdân avâng hian kan kristian nun hi a fuh tak tak thei lo a ni. 

Nausên chu a lo piang a, khawvêl êngah mihring nun kawng rawn zawh ve tûrin bul a țan ve chauh a ni. A pian tirhin mihring a nih chhûnga a nihna tûr zawng zawng a famkim nghal vek lo nasa. A lo thang lian zêl ang a, a lo inzir chho zêl ang a, thuâwih taka a awm zêl chuan mi puitling țha takah a lo la chhuak chauh dâwn a ni. Kan ram kristiante hian pianna lai chauh hi kan ngaipawimawhin kan bel hlur mai a. Puitlin zêlna tûr kawng erawh kan zawh thiam mang si lo.

Nikodema hnênah Isuan a pian thar a pawimawh thu a sawi a. Nikodema, Thuthlung hluia Pathian Dân zawng zawng zâwm țha em em, nun dân țha kawng zawh sa reng kha, a nun la kim lohna lai thlarauva pian a mamawh thu Isuan a lo hrilh a ni. Amah Isua ngei khâi kâna awm tûr chu a rin chuan Pathian ramah a luh theih tûr thu a lo hrilh a ni. Tichuan, Nikodema chuan Isua chu a ring ta a, thlarauvah nun thar a lo nei a, piangthar a lo ni ta a ni ang, Isua ruang la thlaa phûmtute zingah pawh a va tel ve ta hial a ni. Ringtute nun dân tûr tha taka nung sa a ni a, thlarauvah a pian leh bawk chuan, piangthar, nun țha dâna nung mêk bawk si a ni dâwn tihna a ni a, Petera ten Isua hmel hriattu nih pawh an duh tawh loh lai khân a ni chuan a ruang a va hlawm ngat a nih kha. 

Tichuan, a lo pianthar chuan Pathian ram mite nun dân țha chu, a lo nun dân sa a nih avângin, a nung thiam nghal mai a ni. Nikodema hi chu sakhaw nun dân thiam sa a ni a, Pianthar dân hrilh a ngai a, Isuan a hrilh a. Chung lam khawih harhna a lo chang a, Thlarau thianghlim hruaiin a lo awm ve ta a ni. 

Mi țhenkhat chuan pianthar an thiam em em a, an piang thar leh țhin a. Pianthar hnua nun zui dân tûr an thiam lo thung țhin a ni. Nikodema chu pianthar dan tur hrilh a țul laiin, Mizote hi chuan Pianthar hnua nun zui dân tûr hrilh kan mamawh thung a ni. 

Piantharna hi ringtu nun famkimna ni lovin, ringtu nun bul țanna a ni a, Pathian rama luhna kawngka a ni bawk a, Pathian ram chhûngah chuan, Pathian duhzâwng ti zêl chungin kan țhang puitling tûr a ni si.

(Tawngtai Dan Tur)
Lalpa, ka Lal leh Chhandamtu a pawm tlat zel chein, i thu zawm kawngah hma ka sawna ka puitlin zel theih nan minpui ang che, Amen. Ti ang o.

Kristian Chhungkaw Nawm Bikna (Eng Chhungkua Nge I Din Dawn?)

"Tin, LALPA rawngbâwl hi a tha lo awm anga in hriat chuan vawiinah hian tu rawng nge in bawl dawn thlang mai rawh u; in thlahtuten Lui rala a rawng an bawl thin pathiante kha nge, in luah ram Amor-hote pathiante kha? Kei leh ka chhûngte erawh hi zawngin LALPA rawng ania kan bawl dawn ni," a ti a."(Josua 24:15)

Kristian chhungkua kan ti ziah a, kohhranah pawh kan sawi dum dum a, chhung inkhawm kan neiha, buh faitham kan tham a, sawma pakhat kan pek hian kristian chhungkua kan ni mai alawm, ti zawnga ngaihdan siam, mi tamtak kan awm thin a. Hengte hi chu, kristian chhungkua peng phakhat alan chhuahna tur mai chauh a nia, ngaihpawimawh tur a nia, a pawimawh ber erawh a nilo, a pawimawh ber chu Krista a ni, engkim Krista duhdan, engkim Krista lawmzawnga kan chhungkua kan nuna kan tih hian, kristian chhungkaw tha tak kan ni ti ila kan sawisual awm lo e.

Chu tiang nun chu, chhungkuain a neih theihna tura, theih tawp chhuahtu chhungkaw zinga mipakhat a awm chuan, chu chhungkua chu Krista telna, a tha zawnga kal zel Kristian chhungkua chu a ni tlat bawk a nga. Chhungkaw zinga mipakhat chu, chhungkaw pumpui nen an inzawma, chu chhungkaw zinga mipakhat chuan Pathian a zawm tlat thunga, tichuan chhungkua leh Pathian inzawmna a nia. Chhungkua zawng zawng chu Pathian lamah, chhungkaw zinga mipakhatin hruai a tum tlat chuan, a hruai thei thin a ni. 

Hei vang tak hian, Pathian nena inbe pawp inchhungkuaah an awm lo a nih chuan, nangmah kha inchhungkaw aiawh a Pathian be pawptu niturin theih tawp chhuah ang che.

Kristian chhungkua hi an hausa bik kher loa, thil tha ber ber an nei bik kher loa eng vangin nge kristian chhungkua neih kan duh ang:

1. "Kristian chhungkua chu an thla a muang thin," chhiat an tawk emaw, natna khumah an mu emaw, harsatna dang dangte pawh tawk mahsela, an thla a muang tlat thin. A chhanchhu thlamuanna Pathianin an thinlung chhungah thlamuanna a tuhsak vang a ni.

2. "An chhungkuaah remna leh inngaihdam tawnna a awm thin" chhungkaw dang ang bawkin inhauh nikhua chu an nei ve thin a, mahse ngaihdam an indil tawna, an inngaidam thin a. An chhungkuaah chuan remna Pathianin ro a rel avangin, intihthiam lohna te chuan, an chhungkua a ngam loa, inhauh vangin rilru na takin zanah an mu ngailoa, huphurh takin zing an tho ngai lo bawk a. An chhungkua an inrem avang chuan, an in luma hawn a awm an chak ngawih ngawih thin.

3. "An chawei dawhkan a eng" chawei dawhkan eng sawi fiah hmain chawei dawnkan thim han sawi ila, chawei dawhkan thimah chun, sawi tur avang a ni, avan chhanchu chhungkaw zinga pakhatin a sawi hlek chu pakhatin alo huat thin vang a ni a, chawei dawhkan thim chu a reh ngawih ngawih loh pawhin, inhauhna avangin a bengchheng hle thunga, hlimna them pawh a awm ngai lo. Chawei dawn kan engah erawh chuan, chhungkua leh chhungkua an in fiama, tunlai tawngtakin an inbawl kual a, a chang leh nu ber emaw pa ber emawin Pathian thu a sawi melh melh a, chu chawei dawhkanah chuan naupang an telve a nih chuan an zalen avangin an ri chelchul thin.

4. "An mut a tui" an mut dawnin inhau an awm ngai loh avang leh, zan rei thleng pawha haw har ngaihtuahawm an awm ngai loh avangin, thlamuang takin an mu thina. Thlamuang takin an mu mai pawh a niloa, zing khaw eng chuan an chhungkaw boruak nuam tak chu, a rawn chhun eng leh dawn tih an hriat avangin, zing thawh pawh an chak bawk thin a ni. 

5. "An inhrethiam tawn thin" an chhungkaw zinga mi lo chhesual palhin, an chhuat emaw, an darthlalang emaw lo ti balin tikeh palhse an inhrethiam thina, an chhungkaw zinga mi chu sualin lo hneh pawh nise chawikan leh tumin duat takin an inpui tawn thin a ni.

Kristian chhungkaw chungchang hi sawi tur a tam a, kan sawi seng lo vang, heti thlengah hian duh tawk ta ila. Tichuan hei hi i han inzawt theuh teh ang u,"Kristian chhungkua ka duh em?" Tih hi.

Kristian chhungkua kan duh a nih chuan, Kristian chhungkua kan dinpui theih tur kawppui kan zawn a ngai a ni. Kawppui tur kan zawnin, engin nge kan mit hip hmasa ber le, mi thenkhat chuan hmel an ti ang, mi tamtak chuan sum an ti a nga, mi thenkhat chuan nungchang niloin zia an ti ang (zei leh zei lo ang chi zia hi). Hengte hi a pawina a awm lo chuang loa, mihring nihphung pawh a ni, mahse a pawi thin chu "mi kan hriatchian tak tak hmaa, an hmelthat, an hausak, an zei vanga kan thinlung kan pe nghal mai thin hi a ni."

Kawppui tur kan zawnnaah hian, an hmelin min hip emaw, an zeina in min hip emaw, an hausakna in min hip emaw a ni thei a, min hip a nih pawhin tihian i ti ang u. Kristian chhungkua kan dinpui theih tur awm ang mi an nih leh nih loh hi, i hrechhiang phawt thin ang u, tichuan kristian chhungkua kan dinpui theih awm mi an nih chuan, kan thinlung i pe chauh thin ang u.

Hlimna tak tak chu, Krista atang chauh neihtheih a ni tih hi hria ila. Hriat ringawt duhtawk lovin, kristian chhungkua nei turin tha leh zung i seng ang u. Chhungkaw dintawh pawh kan nithei e, kristian chhungkaw dinkawngah hlawhchhamin kan inhriat chuan "kan denna ngaiah i deng nawn leh ang u" Petera pawhin Isua thuin a denna ngaiah chiah a deng nawn leh a, a man teuh a nih kha. Tha leh zung seng loin, kristian chhungkua a din theih loh tih hriain, tha leh zung nasa taka sen inhuamin kristian chhungkaw din turin theih tawp i chhuah ang u.

"Tu in pawh Nang i chenna chu, Rapin, chhawlbuk ni se, Hlimna leh remna a tel ve, Van malsawmna hlu nen." (KHB 592)

(Tawngtai Dan Tur)
Lalpa, he leia vanram nun kan hnaih ber lai chu chhungkuaa nangma thu inlungrual taka kan zawm theuh lai hi a ni tih hriain, kristian chhungkua dinturin leh neiturin theih tawp ka chhuah theih nan min pui la, kristian chhungkua neih duhna thinlung min petu chu nang i ni a, he ka duhna hi i duhna a nih hmasak zawk avangin, harsa hle mahsela a tawpthlengin min dinpui dawn a ni, tih hi ka hriat reng theih nan min pui bawk ang che, Amen. Ti ang o.                                                                                                                                                                                                                                                                                                                                                                                                                                   

A Sual Man Peksak Ka Duh Zawk

"Chutichuan, 'Inthawina duh lovin khawngaihna ka duh e,' tih hi, a awmzia va zir rawh u; mi fel takte lam tura lo kal ka ni lo va, mi sualte zawk lam tura lo kal ka ni asin," a ti a."(Matthaia 9:13)

"Tin, an zawh sek sek avangin ani chu a tho va, an hnenah, “In zinga sual nei lo apiangin amah chu lungin deng hmasa rawh se,” a ti a."(Johana 8:7)

Adeng theitu ber khan, adeng duh siloa, adeng duhlo a nimai loa, a sual tlan nan a thi duh zawk a ni, hmeichhe urenu an man sual vang khan! Tichuan, inti fel deuh deuh sual nei bawksi, pharisaite chu a mal malin an kiam zeuh zeuha, an bo ta vek a ni.

Sual nei miah lo, min deng theitu ber kan Lalpa Isua Krista chuan min deng duh loa, min den pawh a thil tum leh he khawvela a rawn kalchhan a niloa. A tum ber leh khawvela a rawn kal chhanchu misualte chhanchhuak turin a ni. Lalpa lamah chuan inchhira simduh misualte vanneihna hi a sang a ni.

Nih leh keini hian, midang kan deng em? Kan chhungte kan rawngbawl puite kan deng em le? Midang dengthei leh tha inti bik tur hi kan awm lo khawp mai, mahse kan insiam that nan kan tih dik lohte kan inhrilh tawn fo a tul awm e. (In phawrh sak niloin, fimkhur taka inhrilh tawk zawk niin.)

Ka thaa, tihsual pakhatmah ka nei loa, ka dengthei titheitu ber, kan Lalpa Isua Krista chuan, "Ka Deng Dawn Lo, A Sual Man Pek Ka Duh Zawk" tiin, krossah a nunna zawng zawng hlan ral vekin min tlan a thlang sia.

(Tawngtai Dan Tur)

Lalpa, mi tha ber engkim tithei hian, kei misual hi min hmangaih tlata ka tana i nun zawng zawng i hlan ral avangin ka lawm e, kei pawhin keimah anga tisualte dem mai loin, hmangaihna mita ka en ve theih nan min pui, i tana nun hi ka ba a ni tih hriain i tana ka nun tlat theih nan min pui turin ka ngen lehzual a che, Amen. Ti ang o.

LALPA HMAAH ZAWK

"Tin, Hani chuan,"Ka rui lo asin ka pu, hmeichhe rilru lungngai tawpkhawk ka ni a; uain pawh, zupui pawh ka in hau lo va, LALPA HMAAH KA RILRU KA PHAWRH ZAWK ANI."(Samuela 1:15) 

Elkana chuan nupui pahnih Penini leh Hani a nei a, Hani zawk chuan fa a hrinsak theih loh avangin Penini chuan a deuhsawh thin (1 Samuel 1:6), Hani rilru na leh beidawng lutuk chu chaw pawh ei thei loin a tap fo thin. 

Vawi khat chu Lalpa biakin a a tawngtai laiin Puithiam Elia'n alo hmu fuh a, hmui phun in ri mang loin a tawngtai ni ngei tur ani (1 Samuela 1 : 13). Mihring hi rilru na tawpkhawk a kan awm chuan tawngtai han chham kual duah mai te hi a lo har tawh hle thin a. Chutiang chiah chu Hani dinhmun hi ni ngeiin a lang. A tawngtai mawlh mawlh lai chuan Puithiam Elia chuan zu a rui a amaw tiin a rawn khak ta a, chuta Hani chhanna hi a van  mawi tak em!

Tin, Hani chuan,"Ka rui lo asin ka pu, hmeichhe rilru lungngai tawpkhawk ka ni a; uain pawh, zupui pawh ka in hauh lova, LALPA hmaah ka rilru ka phawrh zawk a ni.

Khang harsatna leh lungngaihna tamtak a tawrh lai khan thinrimin sualah a tlak thei a, mahse Hani erawh chuan chung zawng zawng ai chuan Lalpa Pathian hmaa thinlung leh ngaihtuahna zawng zawng te chu inbunruah a thlang ta zawk ani. A van ropui tak em! Pathianin Hani tawngtaina chu a hre reng a, Israel Lal ropui tak pahnih Lal Saula leh Lal Davida hriak thihtu puithiam ropui tak Samuela hringtu a lo ni ta ani. 

I nunah harsatna leh buaina namen loin a tlak buak mek che em? I chungah diklo takin an ti a phuba lak ve duh maina rilru emaw, thinrima a sual leh kawhmawh bawl zawnga nun ve mai duhna te i nei hial thin em? Hei hi hre reng rawh, "Pathian hi a mit a del lo" tih hi.

Thil engkim a chhia a tha a hmu vek a, eng dinhmunah pawh ding la chung thil thalo zawng zawng a tlak ral mai ai chuan, Hani ang khan Pathian hmaah thingthi a tawngtaiin lo in bunruak thin rawh. A ngaihsak che a, a hmangaih che a, i tana tha tur ang ngeiin ro a rel ang tih hi lo ring ngam ang che. 

Kan Pathian tluka harsatna ruk, hrilhna tur tha an awm lo, Hani anga Pathian hnena an harsatna leh rilrua natnate thlen thintu te chu, Lalpan an harsatna ata a chhanchhuak thin a, nun tha bik a pe bawk thin a ni.

(Tawngtai Dan Tur)
Lalpa, ka natna ruk leh langlote hi nangmah chauhin a tih damna i nei a ni tih hi ka hriat reng theih nan min pui la, i hnenah ka thuruk zawng zawng leh ka natna zawng zawng ka tlen fo theih nan che, min ti fing ang che, Amen. Ti ang o

Pathian Thutiam Ala Ding Reng (Promise Still Stands)

"Pathian chu dawt hmang mihring maia ni lo, Lamlet hmang hringfa a ni hek lo. A sawi tawh chu a ti lo vang em ni? A lo sawi tawh chu a tipuitling lo vang em ni?"(Numbers 23:19)

Kan tisual nasa tawh a ni!

Pathian atang chan nei ve tlakah pawh inngailo hialin, vawitam tak Pathian hi kan tluksan theuh tawh ang. Mahse, kan la dam a, chu chuan a entir chu "hun tha ala awm" (chance) tih hi!

Pathian mithmuh hmaah langlo a awm lo, a mithmuh hma ngeiah chuan sualah kan tlua, atana nun kan tumna te chu kan hlawhchham fo thin a. Mahse, a hmangaihna chu a hlawhchham ve ngai loa, eng ang pawhin tisual mah ila min hmangaih a bang chuang lo. "Keini chu atan kan hlawhchham tawh a, a ni erawh chu keini tan a hlawhchham ve ngai lo."

A hmangaihna ropui zia leh a hlawhchham ngai loh zia chu, kan tana a thutiamte kha ala hre renga, vawi tamtak tisual mah ila, kan tana thiltha min tiamte chu, pek kan dawlzawh huna min pek turin a la hre reng a ni. 

Kan Pathian hmangaihna hi, a ropui mai pawh a ni lo, a mak tel deuh te hian ka hria. Mak ka tih em em chu, naupan laia tawngtaia kan dil thinte kha, keini chuan kan theihnghilh daih tawh thina, a ni chuan alo la theihnghilh ngai loa, chung kan thil dilte chu, neih kan dawlzawh hunah min lo pe thin a ni.

I naupan laiin enge i dil thin le? Pastor emaw Missionary nih emaw i dil thin em? Officer niha a hming ti mawitu nih te chu i dil thin em? Sumdawng lian niha a rawngbawl nan mirethei te tanpuitu nih chu i dil thin em? Hengte hi nitur hian i kum atam tawha, kawvel nih phungah chuan a tlaizo ta i ti em?

Ni e, khawvel nih phungah chuan i tlai tawh a ni maithei mahse, ama danah chuan ila tlai chuang lo. Kohhran chawr turin Pastor leh Missionary i nih theihna tur chu a tlai a ni mahna, mahse Pastor leh Missionary tluk tluk zeta rawngbawltu thawhhlawk i nih theihna tur ala tlai chuanglo.

Chutiang bawkin, officer tluka thilthangkai i tihtheihna tur ala tlai chuanglo bawk, sumdawng lian niha midang i puih theihna turin ila tlai chuanglo. Kan Pathianin, i hnena a tiam tawh che kha, pek che ala duh renga ala tum reng a, mahse kei leh nang hian kan dawl zo a ngem, dawl zo turin hma kan la em le.

A Thutiam Ala Ding Reng Si A!

(Tawngtai Dan Tur)
Lalpa, nangin min hmangaih tlat avangin ka lawm e, i hmangaihna chuan hlawhchham lai a nei ngai loa, ka tana i thutiam pawh ala ding renga, chu i thu min tiam ngei chu ka chan theih nan leh ka dawn huna ka dawl zawh theih nan, min pui ang che, Amen. Ti ang o. 

Lalpa Kutah I Awm, Tlamuang La Inringtawk Rawh

"I thlarau hnên ata hi khawiah nge ka kal ang? I hma ata hi khawiah nge ka tlan bo vang, vanah han lawn ila, chutah chuan i awm si a: Seol-ah mutna siam ila, ngai teh, chutah chuan i awm bawk si a." (Sam 139:7-8)

Nun a thil an kal buai tak tak hi chu, Pathian hian min kalsan ta emaw tih mai tur a ni. Vanduai ta bik em em a inhriat a awl a, chu mai pawh chu a nilo, engahmah chhuak ve lo tura inpawm mai te a awl thin a ni.

Chhiatna alo thlen apiang hian, Joba nun te kan ti teivet a, a chang leh kan ta vek alawm kan ti a, a nihna tak chhut chiang loin, kan pawngtawng sawi liam ve mai mai thin a. A nihna tak leh Pathian rorel dan chhut chiang hleilo hian, midang hnem nan leh mahni inhnem nan hian kan hmang satliah ve ringawt zela, a nihna tak leh Pathian rolrelna chhui phah nan hmang ila chuan kan lawk thin ni mai tur!

Harsatna kan tawha, Joba nun kan tih thi dawn chuan, "Joba Lalpan fiahna a paltlang hnua a lawmman pek te kha chhui thleng ila." Chu bakah Joba nunah "harsatna intan hun a awm ang chiah khan, a tawp hun pawh Lalpan a harsatna a intan hma daihin a ruat tawh" tih te hi chhui thleng ila!

Chu bakah, "Joba khan harsatna a tawh khan nasa takin Lalpa a au tihte," chutah pawh chuan ala tawplo, Joba khan a zirtur a zir chhuak bawk a ni. Joba'n enge zir tur ala neih Pathianin mitha a ti tawh sia, tia ngaihtuah mai a awl thin a, mahse mihring a nih avangin zirtur alo nei a, a zir chhuah chu "Pathian hi engkima engkim a ni" tih hi, ti ila kan sawi sual awm lo e. Han sawifiah ta ila, Joba khan mi a puih zia te, a fate tan thuphachawi nan, an hming kimin intawina a siam zia te, engkim dik takin a tih zia te kha, mi chapo nilo mahse a hre ve a ni. 

Pathianin Joba a rawn biak hnuah chuan, a thiltih that zawng zawngte chu Pathianin theihna a pek vangin ti thei a ni tih leh, a thiltihthatte pawh Pathianin thaa a pawm vang chauha tha a nih zia te a hriaa. Ti tha alo intihnate leh keimah, alo intih ve na zawng zawngte chu "Vut leh vaivuta thuin ka sim ta e"(Joba 42:6b) a ti. Tichuan, Joba chuan a zirturte a zir chhuak tawh bawka, harsatna a thawh hma aia nasaa malsawm tlak a ni taa, chutiang tak chuan a hma aia nasa'in Pathianin a malsawm ta a ni.

Tawrhna phenah hian, zirtur a awm a, chu mai pawh a nilo, malsawmna pawh a awm a ni. Tawrhna phena an zirtur zir chhuak te chuan, malsawmna pawh an chang bawk thin a ni. Mahse, harsatna phenah hian zirtur leh malsawmna a awm alawm tia, Pathian telloa hel nuai chi erawh a ni hauh lo ang.

I Korinth 3:21 ah chuan "Chuvangin tuman mihringte chhuang suh se. Engkim hi in ta a ni vek si a;" I Korinth 3:22b ah "khawvel emaw, nunna emaw, thihna emaw, thil awmsa emaw, thil lo la awm tur emaw, a zavaiin in ta vek a ni," a in ti a. A awmzia takah chuan "Chhiatna leh Thatnate" a pahnih hian kan ta a ni thei tihna a ni ber a nga. Chhiatna chauh hi kan ta tur a nilo, thatna zawng zawng pawh kan ta tur a ni. (I Korinth 3 ah hian thil tamtak a inphum a, sawi kim sen a nilo ah ngai ila)

Tichuan, kan nunah hian kan thu lo a ni, kan thu nise thilthaa kan hriatte kan duh duhin kan ti a nga, engmah kan zir chhuak lo ang. Kan thu niloin Pathian thu a ni a, chhiat leh that kan tawk theia, mahse Pathian kutah englai pawhin kan awm thung a ni. Chutih ruala, kan hriat tur chu Pathian hian duhthlanna min pe a, kan duhthlanna hi tih luihna in min thlaksak ngai loa, kan dil loh chuan kan duhthlannaah a inrawlh ngailo bawk a ni. Kan duhthlanna vang chuan harsatna kan tawk thin a, kan chhungte pawhin an tawh phah thei bawk a ni.

Chutianga, keimahni thiam loh vang ngeia, kan chunga chhiatna alo thlen pawh chuan, amah ringtute chu inchhirna hun leh inlamletna hun an neihtheihna turin ro min rel sak thin a, a hnena tanpui kan dila, kan zir tur kan zir chhuah phawt chuan, min chhanchhuak duh reng a ni.

Ringlo tute leh suala awm te pawh Pathian kutah an awm veka, kan bible'in an chantura a sawi te an chang thin. Chutih rual chuan, ringlo mi amah ring duhtu te leh sual tih vang a inchhira a hnen pan te hi, a hnar ngai lo a ni.

Harsatna kan tawk emaw, kan thinlungah zawhna kan nei emaw, beidawngin kal ngaihna kan hretawhlo emaw a ni thei e, engpawh tawk ila, Lalpa neitu, Lalpaa innghat tlat kan nih chuan, Lalpan a hun a tihah engkim a sim rem dawn a, Lalpa kutah i awm avangin thlamuangla, buai chung lovin Lalpa kuta i awm avang chuan inringtawk takin nung rawh le!

(Tawngtai Dan Tur)

Lalpa, i kuta awm lo engmah, tumah an awm lo va, kei pawh i kuta awm loh lai kala nei chhinlo a, i kuta ka awm loh hun a thleng ngai dawn lo bawk a. Chutiang taka min ngaihtuahtu Pathian i nih avang chuan, i kuta innghat a, thlamuang taka nun hi, ka tih tur a ni tih hriain, nangmahah a zawng zawnga ka innghah theih nan min pui ang che, Amen. Ti ang o.

Langlo Pathian Ringtute, An Inchhir Ngailo

"Nimahsela, rinna lovin ama lawmzawng mi nih rual a ni lo; Pathian hnena lo kal chuanin, ani chu a awm tih leh zawngtute hnena lawmman pek hmang a ni tih rin tur a ni."(Hebrai 11:6)

Rinna tello chuan, Pathian lawmzawng mi nih rual a ni lo, kan bible chuan alo ti a, a buai thlak khawp mai, sual min tibuaitu lah hi, duh ai hian kan mithmuhah leh kan thinlungah hian a lan nasat mai bakah a lang fiah bawk si nen. Langlo chu rin a, a lang zawk aia thlan a ngai si a, kan Pathian pawh hian langlo zawk thlan a phut hi a ti awm lo em aw! Tih mai hi, ngaihtuah chian loh chuan a awl viau thei a.

Kan Pathian hian, amah kan beisei chhan, engtirnan miin hausak a duh taa, a hausakna chu Lalpan a pe thei a ni tih a ringa, amah malsawma tihausa tur chuan Lalpa chu a beisei tlata, he mi beisei chhan chu hausakna a ni, hetiang ang chiah hian Lalpa kan beisei chhan hi, kawppui pawh a ni thei, ruihhlo sim pawh a ni thei, lehkha thiama hna kan duhtak hmuh pawh a ni thei e. Heng Pathian kan beisei chhan te hi a lang bawk si loa, kan nei ngei dawn em tih pawh hi a hriat bawk si loh a, khawvel kawnga kal te lahin, dik chiah loin an tia, an nei hmak hmak mai thin si nen.

Kan Pathian ber lah a lang bawk silo, amah kan beisei chhana pawh kan nei dawn nge dawn lo tih pawh a chiang bawk silo a. Mahse, kan Pathian hian, hetiang dinhmuna kan awm a, amah kan la rin cheu hi a duh a, chu ngei chu a lawm zawng pawh a ni bawk a ni. Joba kha, a neih zawng zawng a chan veka, chumi hnuah pawh "ka Tlantu chu a nung tih ka hria" ala ti cheu a, a beisei thlawnlo chiang hle bawk a ni. Chutianga rin chu kan Pathian hian a phut rualin, rinna kan hlauh a nih pawhin, a khawngaihna'in min kuh thin a, kan rinna kan siam thata amah kan pan phawt chuan, kan beisei chhan te hi min pek ala duh thin a ni.

Kan Pathian hian keimahni a min phut leh a ngaihpawimawh em em chu "kan thinlung zawng zawng a, amah kan thlan hi a ni a" amah mita kan hmuh loh chung leh amah kan beisei chhan a chian loh chung pawh a, Lalpa ka ringa, a duhdan chauhin ka ti dawn, kan tih tlata ama hruaina zawk kan thlan hi a lawm zawng a ni.

Kan Pathian hmangaihna leh kawngaihna ropui em em pawh hi, mita hmuh theihin a lang loa, tumahin a khawih pawh an la khawihlo, mahse a hmangaihna leh khawngaihna hi rinnaa chan chi a ni a, rinnaa changtute nun chu a thlakdanglam thin a, mi bik an nih phah bakah, chakna leh hnehtheihna an chan phah thin a ni.

Kan Pathian hi kan tih lawm dawn chuan, hmuh theih loh ni mahsela, kan rin a ngai a, rinnaa kan thlir a kan hmuh a ngai a ni. Chutianga ti tur chuan, a beih a beih a ngai a, tum em em pawh nilo, awm vel mai mai paha Pathian, hmu fiah ta viau tumah an awm ngailo a. Theih tawp chhuah a, darkar tam tak amah zawnga tawngtai leh a thu hai thinte pawh hi, inchhir an awm ngai biklo a ni.

Rohlu ber hi chu, mita hmuh theih a niloa, rinna chauha hmuh theih leh chan theih a ni, tihna a nih chu!

(Tawngtai Dan Tur)
Lalpa, nangmah ka hmuh theihna tur che leh ka rin theihna tur che pawh hian, i puihna ka mamawh a, khawngaihin nangmah ka hmuh theihna tur chein leh ka rin takzet theihna tur chein min pui la, nangmah hmutu an inchhir loh zia hriain, nangmah hmu tur che a, theihtawp chhuahna chang ka hriat theih nan, min tanpui ang che, Amen. Ti ang o.

Thinglung Ven That A Pawimawhna Te

"Thil dang bera aiin i thinlung veng tha rawh, Nunna lo chhuahna ani si a."(Thufingte 4:23)

Thinlung ven that a pawimawhna te chu:

1. Mihring chakna awm khawmna hmun pui ber chu kan, thinlung hi a ni ti ila kan sawi sual awm lo e, a chhan chu, thinlung taka kan tum emaw, kan duh te emaw hi kan nei thei thin a.

2. Kan thinlung kan pekte chuan keimahni hi min hneh let thin a, ruihhlo emaw, sum emaw, hnena thinlung petu chu, chungte chuan a eichhe thin a ni.

Heng avang te hian, kan thinlung hi Pathian pe ila, kan rilru in thil tul dang i ngaihtuah ang u.

Pathian kan thinlung kan pek phawt chuan, kan rilru leh kan taksa min neih sak a nga, a duh zawng tihna kawngah min hruai dawn a ni. Tin, kan Pathian hi a hnena thinlung petu te, tlamuantu, awmpuitu leh lawmman pe thintu a ni.

(Tawngtai Dan Tur)
Lalpa, i hnenah ka thinlung ka hlan a, nangmah lo chu tumahin ka thinlungah hian hmun reng reng an chan lohna turin min awmpui la, ka thinlung neitu chu nangmah chauh hi Lalpa lo ni ang che, Amen. Ti ang o.

Nupaa Insiamte Hian Zia An Inkai Thin

"Tin, Saraii chuan Abrama hnênah, "Ngai teh khai, LALPAN fa mi neihtir phal loh hi; khawngaih takin ka bâwihnu pâwl rawh; ama lakah chuan fate ka nei mahna," a ti a. Tichuan Abrama chuan Saraii thu chu a zâwm ta a."(Genesis 16:2)


"Mi fing pâwl la, i lo fing ang a, Mi â pâwl erawh chu hrehawm tûra phahna a ni."(Thufingte 13:20)

Sari khan, Abrahama hnenah Hagari pawl turin a tia, tichuan Hagari'n fa a hrin chu a fa ah a pawm tur thu a hrilh a ni. Tichuan, Abrahama chuan Sari bawinu Hagari chu a pawla, fapa Ismaela an nei taa. Hagari chuan a pi Sari'n fa a neih ve loh avang chuan a pi chu a hmusit taa, Sari chu a thinrima Hagari a tirethei ta a.

Hagari chu tlanbo a tuma, a fapa hruaia a kal zet tawh hnuah, thlalerah vantirhkohin kir leh turin a tia. Tichuan, a kir leh a, Isaaka a pian hnuah khan, Sari chuan "he bâwihnu fapa hi ka fapa Isaaka ro luahpuitu tûr a ni thei lo vang," a tih avangin, Hagari chu Sari'n hnawt chhuak turin a ti leh a, a fapa Ismaela leh an bawihnu Hagari chu khawngaih em em chungin a hnawt chhuak ta a ni.

Heng atangte hian, Sari hian a pasal Abrahama chu, a manganna leh a rin tlemna leh a ngaihtuah tawina zia te chu a kai zia a hriat mai awm e.

Abrahama pawhin Sari chu a unau nu ka ni ti turin, Abimeleka Gear ram lal hnenah chuan a ti a, a chhanchu Abimeleka hian Sari a ngaizawng a nga, a pasal ani tih a hriat chuan Abrahama thatin Sari chu nupuiah a neih a hlauh vang a ni. Abrahama hian a hlauhna zia chu Sari a kai ve thung a.

Mahse, Abrahama te nupa hi, Pathian tih tu an ni ve ve thung a. Pathianin fa a tiam chu Sari hian neih theih a inring tawh loa, chutih rual chuan Pathian a tih em em tho a. Abrahama phei hi chuan, Pathianin thu a tiam chu rin harsa ti thin mahse, a ring ngar ngar tlat a ni.

Pathianin kal tura a tih angin Abrahama hian, a nupui Sari chu Ur khua atang Kanaan ram pan turin a hruai a, Sari hian Abrahama chu a zui zel a ni. An nupa hi a chhia leh a thaah an zia an inkai tawn zel a ni.

Hetiang ang chiah hian, nupaa insiam te hi, an zia zawng zawng inkai chawng vek lo mahsela, an zia tamtak an inkai thin avangin, kawppui kan zawnna ah hian kan fimkhur a tul hle a, Pathian tih mi kan zawn a, kan neih ngei hi a pawimawh a ni.

1. Pathian tih mi kawppui i neih chuan, Pathian tihna nei ngailo pawh ni la, eng emaw chen chu Pathian tihna nangmahah a tuh nghal a nga, hun a kal rei phei chuan, Pathian tih mi tak tak ila nih phah thei a ni.

2. Mi inuluk mi kawppuia i neih chuan, i bula awm hnai vai ber chu a inuluk em avangin, i inuluk lo thei lo a nga.

3. A chhe lamah pawh, ruihhlo ti mi i neih chuan, ruihhlo vawikhat mah tilo mah la, ruihhlo ti mi zia, a thinchhiatna emaw, a ngaihsamna emaw, a insumtheih lohna zia emaw a eng emaw ber chu i kai tho dawn a ni.

4. Sum ngainat hi, thil inkai chhawn awlsam ber a ni ti ila, kan sawi sual awm lo e, sum ngaina mi i neih chuan sum i ngaina ve a nga, engkim a chhe zo vek thei a ni. I Timothea 6:10 ah chuan "Tangka sum ngainat hi sual tinreng bul a ni si a" alo in ti a, sum ngaina tak tak te chuan, sum vangin hnamdangte pawh an fate nupui pasal atan a neih tir duh hial thin a, dawt an sawi hreh loa, ruihhlo timi pawh sum a neih chuan, an hnaih ngar ngar hreh ngai lo bawk a ni.

5. Hlawhtlin duh mi i neih chuan, hlawhtlin duhna chu nasa takin i nei ve a nga, hei hi sum ngainat nen a inang loa, Bill Gates te nupa chu an hlawhtling ngei a, hausak pawh an hausaa, mahse sum ngaina kan tih ang mi kha an nilo, midang puih nan an sum an sem thei a, an fate pawh an mahni angin hausa ve lo se an ti hial zawka, an fate inkhawm tura hruai chu an thil ngaihpawimawh ber pakhat a ni. Thil tha tiha, thil tha neih theihna dinhmun chuankai a, a man dik taka hlawh chhuah duhna hi, hlawhtlin duhna a ni a, phu leh phu lo dik leh dil lo pawh chhut lo a, sum duh huam huamna hi sum ngainatna chu a ni.

Kan kawppui te hian, an zia min kai theih thin avang hian, kawppui kan zawnnaah kan fimkhur a ngai a, kawppui tha kan neih theih nan, Pathian biaa kan rilru kan tih fim reng a pawimawh a ni.

Tupawh hi, kawppui tha leh chhia nei thei vek kan ni a, Pathianin tu kawppui tur mah a ruat lawk sak ngawt ngai loa, kan nun dan a zirin kan milpui kan hip zawk thin a ni. (http://nungturin.blogspot.com/2018/10/rev-shane-stanford-hiv-vei-chu-kawppui.html) 

(Tawngtai Dan Tur)
Lalpa, nangmah tih mi ngei kawppuia ka neih theih nan, nangmah ka tih tlat theihna tur chein, min pui ang che, Amen. Ti ang o.

Dawhthei Taka Nghaktu Chuan, A Rah A Hmu Thin

"LALPA chu ka nghak fan fan a; Tichuan annin mi rawn thek a, ka au chu a ngaithla ta."(Sam 40:1)

Thlai zawng zawngte hi, kan phun rual rualin thanglian a, rah nghal a awm ngai loa. Chutiang bawkin, he khawvela Pathian thil siam vawi lehkhata puitling nghal engmah a awm lo ti ila kan sawi sual awm lo e.

Keini mihringte ngei pawh hi, kan puitlin hunte kan inpeih hunte nghah kan ngai thin a. Kan Pathian pawh hian a rawngbawl tura a kohte pawh, zirtir chungin an puitlin hun a nghak thin a ni.

Kan sawi tum takah han lut ila, "kan lungaih chhan tamtak hi chu, kan nghah theih loh vang a ni thin." Thil kan han ruhmana, a rah hmuh nghal kan tum thin a, mi tamtak chuan, an thawh nasat vangin a rah hmu mai turah an inngai thin a, mahse nghah alo ngai tho thin sia, thawh rimna hi thil awmze awm loah an ngaih phah hial thin a ni.

Ni e, thil short cut dan tha ber chu, thawhrimna hi a ni a, mahse chu pawh chu kalphung pangngai ang vekin a kal phawt thin a ni. Entirnan, lehkha zir nasa te chu an hlawhtling hmain kan hre thin a, mahse khawvel kalphung pangngaia an zirchhuah phawt chu a ngai tho thin a ni. An zir nasat avang chuan, an thiam a, pawl suk nawn te an nei lo a, entrance leh exam hrang hranga an paltlang nghal theih thin bawka, hei vang hian an hlawhtling hmain kan hre thin a. Mahse, engmah an short cut loa, a kal phung pangngaiah chuan tha takin an kal vang zawkin an hlawhtling hma tihna a ni.

Rawngbawlna lama khawvel dengchhuak te pawh hi, ringtu nun kalphung pangngaia, tha taka kum tam tak lo nung thiam tawh te an ni thin a, chutianga an nun thiam theih chhan pawh, an dawhtheih vang a ni thin. Ruth  Graham'i, (Billy Graham'a) nupui kha, thu ziak lama rawngbawltu tha tak a ni a, a lehkhabu ziah eng emaw zahin khawvel a deng chhuaka, a pasal rawngbawla a chhuah avangin chhungkua a enkawl a ngaia, a dinhmun en mai chuan lehkhabu tha a ziah theih a rinawm loh thei awm e. Mahse, a nuapan tet atang sunday school a kal thaa, bible school a an kal lai pawhin zing dar 4 atangin theih tawpin a bei thin a, pasal rawngbawltu a nei a, a pasal hnungah a awm thiam leh em em mai a, ringtu nun phung pangngai chu tha takin a hman avangin a rawngbawlna pawh hlawhtling reng a ni. A lehkhabu "It's My Turn" 1982'a a ziah daih tawh kha  tunthlengin hralh ala kal em em a ni.

Sumdawnna ah pawh hetiang tho hi a ni a, kal phungpang ngai a tha taka, lo kal thinte bawk hi hlawhtling hmasa an ni leh  nge nge thin a a ni.

A rang thei ang bera, kan thlen tur kan thlen theih nan, nghak thei ila, kalphung pangngaiah chuan a tha thei ang berin i kal ang u. Chutianga, kan tih theihna tur chuan, Lalpa kaihhruaina kan mamawh a, Lalpa i hnaih bang lo bawk ang u.

(Tawngtai Dan Tur)

Lalpa, i thu zawm a, a nih dan tur taka ka nun hian, ka thlen chin tur a rang thei ang berin ka thleng dawn a ni, tih hriain, nangmaha awm tlatin, dawh theih taka engkim a tha thei ang ber a ti turin, min pui ang che, Amen. Ti ang o.

Sual Haw Ber Pathian Chuan, Misualte A Tung Tho Leh Thin Thung

Tin, Isuan, "Kei pawhin thiam loh ka chantir lo va che; kal la, tun hnuah tisual leh tawh suh," a ti a. (Johana 8:11)

Hmeichhe pakhat uire lai an man a, Mosia danah chuan den hlum tur a ni a. Mahse Isua'n, "In zinga sual nei lo apiangin amah chu lungin deng hmasa rawh se," a ti a. Mahse tuman an deng lo a ni, sualna nei theuh an nih avangin.

Hetah hian Isua hi sualna nei lo awmchhun a ni a, amah hian lungin deng sela, dan ang takin thiam a chang ngei ang. Mahse khawngaihna a lantir a ni. Misualte an sual anga thungrulh hmang tak a ni ve lo, kan zui Isua hi ngaihdamna leh lainatnaa khat a ni.

Tin, chang 11-naa Isua tawng kam hi vau lawkna (warning) emaw ka ti thin a. Mahse chiang taka kan en chuan fuihna tawngkam zawk a ni:

"Kal la" - hei hian hma sawn la (move forward) a tihna a ni. Khanu sualna zawng zawnga Juda te'n an huat ber uirenaa tlu tawh mah ni se la. Hma i ila sawn thei ania, tho leh rawh. Tiin Isua'n a fuih a ni.

"Tun hnuah tisual leh tawh suh" - i lo tisual tawh thin a, mahse i tisual lo thei a ni, i fel thei ania, i chak ania, sual i do hneh thei ania tiin a fuih zawk a ni.

Hei hi kan Pathian mizia a ni. Kan sualna te hi a palzam mai mai dawn tihna lam erawh a ni lova. Mahse kawng dik kan zawh nan min ngaidam a, min dawhthei a, min kaitho duh a, hmasawn turin min fuih tlat duh a ni.

Hmangaihnaa khat Pathian, lainatnaa khat Pathian ava han ni tehreng em.

Isaia 43:25 Kei, keimah ngei hi, keimah leh keimah avâng ngawta in bawhchhiatnate thai bo țhintu chu ka ni; in sualnate pawh ka hre reng lo vang.

(Tawngtai Dan Tur)
Lalpa, ka sualna zawng zawng nangin min ngaihdam sak thin avangin ka lawm e, ka tan nilo, ka chhungte tan pawh nilo, midang tumah tan nilo, engang pawhin suala ka tluk pawha min hmangaih tlat thin tu leh kei misual hi ka thawh leh theih nan a, min pui tlat duh tu, Lalpa nangma tan ngei a, nun dik leh thianghlim ka neih theih nan min pui ang che, Amen. Ti ang o.

Rinhlelhna Hi Sual A Ni A, Do Tak Zet A Ngai A Ni

"Tih tak meuhvin ka hrilh a che u, tupawh he tlang hnenah hian, ‘Lo insawn la, tuifinriatah lo inpaih rawh,’ tia, a rilruaa ringhlel lova a sawi chu a lo thleng ngei ang tih ring apiangin an sawi ang apiang chu an hmu ang."(Marka 11:23)

"Nimahsela, ringhlel hauh lovin rinna neiin dil rawh se, ringhleltu chu tuifinriat fawn thli chhem len leh vawrh ang a ni si a."(Jakoba 1:6)

Kan chin tha lo zawng zawng te, kan thinchhitna thlengin leh kan tawngkam tha lo zawng zawng te, kan inthlahdahna zawng zawng te kan sim vek tawh hnuah pawh, sual min tibuai thintu pakhat ala awma chu chu, rinhlelhna hi a ni.

Rinhlelhna hi, a lang zen zen loa, a lan hun chu, rinna kan mamawh lai takin a ni. A hlauhawmna mi tamtak chuan kan hre fuh lo maithei a, sual hnathawh zawng zawnga hlauhawm ber a ni ti ila, kan duh thawh mah mah maithei a, mahse hlauhawm tak a ni. 

A chhanchu, kan Pathian hi amah ringtu rin dan chian ang zela thawk thin Pathian a ni a, ringtu ten thil ropui ber kan tih theihna chu, kan rinna'in a ni a, chu kan thiltihtheih ropui ber chu, he rinhlelhna hian min dang thin a, kan intihchak reng loh phei chuan, kan damchhunga rinna atanga kan thiltihtheih tur leh kan thlentheih tur chu ti lo leh thleng phaloin a awm theih a ni.

Rom 10:17 ah chuan,"Chutichuan rinna chu hriatna avangin a lo awm thin a, tin, hriatna chu Krista thu avangin a lo awm." He ta hriatna a tih hi King James Version ah chuan, "Hearing" a in ti a, chu chu benga thu kan ngaihthlaka kan hriatna hi a ni. Chutianga, Pathian hre tura a thu kan ngaihthlak kan ngaihthlak chuan, kei mahniah hna a thawk a nga, nasa takin kan rinna a tichak thei dawn a ni. 

Chutiang ang bawkin, keimah ni a, Pathian thu thawh tir theitu chu, Bible leh rinna kawnga min pui thei lehkhabu leh thutha chhiar hi a ni a, tin nasa taka tawngtaina pawh hian, Pathian chenchilhna nunah min luh tir thei thina, chu chuan kan rinna hi nasa takin a tichak bawk thei a ni. Kan rinna tichak tura ringtu dangte nena in pawlkhawm hi a pawimawh em em bawk a ni.

Keimahni tlang theuh kan sawn theihna turin, rinna kan neih a ngai a, rinna chu kan neihtheihna tur chuan, tih hun lai te emaw, duh hun bik te chauhah emaw ni lovin, nitin Pathian thu ngaithla ila, chhiar bawk ila, engkimah tawngtai zel ila,  inkhawm thulh duh lo bawk ila, tichuan thil ropui bik kan tihtheihna turin rinna kan nei ngei ang.  Tin, hei ngei hi, rinhlelhna kan do hneh theihna tur chu a ni bawk a ni.

(Tawngati Dan Tur)
Lalpa, i hnena ka dilna te chhan a nih theihna tur leh i tana hna tha tak ka hlenchhuah theihna tur chuan, rinna ka neih a ngaia, chu rinna nei tur chuan taimak ka chhuah theihna turin min pui la, ka rinhlelhna te hi ka do hneh theihna turin min pui tlat zel ang che, Amen. Ti ang o.

Pathianin A Theihnghilh Ve Ngai Lo Che

"Hmeichhiain a fapa, a rila rah chu, khawngaih lohna tûrin a nau a hnute hne lai chu a theihnghilh thei êm ni? Thei e, chungte chuan an theihnghilh a ni thei e, nimahsela kei chuan ka theihnghilh lo vang che."(Isaia 49:15)

Mihringa inzawmna thuk ber chu nu leh fa inkar hi a ni an ti thin a, a bik takin nu'in a fa naute a pawmlai hian, an inzawmna a nasa zual ni te pawhin an sawi a, naute hnute hne lai hi, a ril atam chuan nu hnute alo tang hial thin a ni. He tiang a nih avang hian kan bible pawh hian, tehkhin nan a rawn hmang a nih a rinawm. 

Chutiang khawpin, nu leh fa hnute hne lai inzawmna chu thuk mahsela, harsatna tawp khawkah leh eng emaw thil bikah chuan, nu in fa ama hnute hne lai ngei chu a kalsan theia, khua alo reiin a theihnghilh hial thei bawk a ni. Hetiang hi mihring hmangaihna chu a ni mai a, tawp chin a nei lo emaw tih tur khawpin thuk thin mahse, tawp chin alo nei leh mai thin a ni.

Pathian hmangaihna ve thung hi chu tawp chin a nei loa, nu'in fa a hnutea a chawm lai chu theihnghilh mahse, a ni chuan amite chu a theihnghilh ve ngai loa. Khua reiah, mihring hmangaihna hi chu alo chuai thin a, Pathian hmangaihna erawh a ngai reng thung a ni. 

Hmana suala kan tluk hmaa, Pathianin ka thu anga i awm chuan, ka tihsak ang che alo tih tawh te pawh kha, kan Pathian hian a theihnghilh ve ngai loa, chu a thu min tiam chu kan hmuh leh theih nan ama hnenah kan haw a ngai a. Tho leh theilo tur khawpa tihchhiat tawh kan la ni hleinem tho leh ang u hmiang.

Eng harsatna pawh tawk mah ila, zam tur hi kan nilo a ni, a chhanchu lei leh van Lal, van Lalthutlenga thu, arsi, thla, planet valbelchhe sang tel chhiar sen loh siamtu khian min hmangaih tlat a ni.

A ni chuan min theihnghilh ngai awzawng loa, keimah ni hian ani chu kan lo theihnghilh thin zawk avang hian, kan nunah achet duh angin a che lo thin zawk a. Kan Pathian hnenah hian, inngaitlawma thingthingin, Lalpa kalo haw e, min ngaidam ang che i ti ang u. Tichuan, a chakzia a lan tir a nga, "kan sam zaikhat pawh a boral a phal dawn lo a ni."

Fapa tlanbo phawh kha, a neih zawng zawng a hmang zo tawh a, a pa hnena a kir leh hma kha chuan, a pa'n engmah a pelo a, a pa pek phakah a awm lo reng a. A pa hnena a han kir leh kha chuan, a pa'n alo theihnghilh ngai reng reng loa, alo nghak reng zawk a, sual tih nan a neih zawng zawng te kha khawhral tawh mahse, a pa'n a rohlute kha pek alo la chak reng tlata, a fapa in a phu leh a phu loh pawh kha a chhut tawh lo, a fapa a hnena a kir leh chu a lawm em em a, thuam tha ber ber a pe nghal a nih kha.

Kan Pathian hnena kan kir hian, kan phu leh kan phu loh hi a chhut hmasa kilkel kher loa, kan mamawh engkim chu min pe nghal thin a ni.

(Tawngtai Dan Tur)
Lalpa, ka lo haw e, bo leh tawh lo turin! I chunga ka tihsualnaah min ngaidam la, tha i tih angin ka nunah hian ti ang che, i kutah ka inkawl tir e, Amen. Ti ang o.

Lalpa Atang An Hlawhtlinga, An Tlachhe Ve Mai Lo

"Mi fel thil tlemte neih chu mi suaksual tam tak thil neih rei rui te ai chuan a tha zawk a ni."(Sam 37:16)

Mother Teresa home te, Billy Grahama ministry te, Bishop T.D Jakes te, Rev Paul Young Cho te, leh rawngbawltu dang dang te pawh, an sum lak luhna han thlir hian, a pan thei em em mai a, mahse mak deuh mai chu a kum a kum an kal fe hnuah pawh an tlachhe hleithei tlat loa, tlakchhiat a hnekin an lian tual tual emaw tih mai tur a ni thin. Fa an han nei a, an fa te zingah tu emaw, kawng diklo lama han kal ve zawk te chu an awm mahse, hun a han kal deuh a, an fate pawh lehkha thiam ber ber leh puitling ber ber an ni chho leh mai thin a ni.

Chutih lai chuan, millionaire mai pawh nilo million sangkhat nei Billionaire, (Billion 1.5 nei thin) Vijay Mallya te, (9.2 Billion nei thin) Ramesh Chandra te, (3.6 Billion nei thin) Adolf Meckle, (9 Billion nei thin) Elizabeth Holmes te, thawh leh ngaihna pawh hre loin an tlachhe tlat thung. Millionaire tlachhia phei chu, sawi sen loh an awm awm e, an tlakchhiat chhan hi midang aia an sual vang bik pawh a ni kher a nga, mahse an nun hi Pathian rawngbawl nan erawh an hmanglo tih a chiang a ni. 

Kan ramah pawh hian, danin a man hleihtheih si loh, mahse sum dik tawk loa, la luta hausa te, kan awm ve ta ni te pawhin a hriata, heng mite hi mi thenkhat chuan an tlachhia tiin an sawi bakah, chutianga tlachhe lo te pawh inrochhun chhawng tur awm lovin, an zuih ral ta tia, an sawi hriat tur a awm a. Tin, chutiang niloa, sum la lut dik vek mahse, Pathian lam ngaihsak duh hauh lo te pawh an awm bawk a nga, heng mite pawh hi an tluang rei hlei theilo, tiin mi thenkhat chuan an sawi thin a ni.

Christian millionaire Dave Ramsey te pawh an tlachhia a, mahse Lalpaah a chakna siamthat nachang a hriaa, a tlakchhiat hma aiin a hausa leh ta a, hetiang ang chi hi mi eng emaw zah an awm awm e. Chu bakah, ringtu ni si mahse, Pathianin an thatna tura, a zirtirna atan tlachhia te pawh an awm thei bawk awm e.

Pathianah hian, hausakna a awm a, hausak kan duh a nih chuan Pathian atang hausak tum ila kan tih fuh ber a rinawm a ni.

Pathian hi nihlawhna leh hausakna a ni tih lama sawi hi, kan mizo rilrem loh zawng tak a ni a, "Pathian neitu chu rethei bam mai, mahse Pathian vanga hlim bawk si," ang zawng hian ringtu nun hi kan mitthla tlata, hetiang ang chi rethei si, mahse Lalpan a awmpui tlat vanga lawm em em thin te chu an awm teh meuh mai, mahse khawvel hi Lalpa ta a ni a, amah ringlotu te ai, amah ringtute hi kan nihlawh zawk tur ni awm tak hi, amah ringtute hian nihlawh kan tum reng renglo thung thin hi, a buaithlak a ni. 

Abrahama te, Isaaka te, Jacoba te, Davida te, Solomona te, leh bible a kan mi hmuh tamtak te hian Lalpaah nihlawhna leh malsawmna hmuh hi, atumin an tum bur ti ila kan sawi sual lo ang. Mahse nihlawh an tum dan a hi, kan zir ve pawh a ngai awm e, kei ni chaun sum lak luh kan ngaihtuah chuan, mi thiltitheite kan rilruah an lo lang nghal thin a, contract leh supply te, politics te pawh a lang tel nghal thei awm e. Hetiang rilru kan put avang hian, hausak hi ringtu chan turah kan dah lo te pawh a ni mahna.

Abrahama te, Isaaka te, Jacoba te, Davida te, Solomona te ho hi chuan, midang zara nihlawhna hmuh an tum ngai loa, hausakna an rilrua a luh ve leh Pathian hnenah an tawngtai thin zawk a ni. Abrahama phei chu, Sodom lal in rallak sum pek a tum a, mahse Abraham'n a la duh loa, a chhanchu Pathian vanga nihlawh niloin, Sodom lal'in ka tih hausak a tih chu a duh loh vang a ni. Jacoba pawhin vantirhkoh amah buantu kha min malsawm hma loh chu, ka tlah lo ang che a ti. 

Mahni in enfiah ila, nihlawh kan tumin, mut dawnah minute 2 vel kan tawngtai a, a tukah mihring takin kan zawng leh nghal mai thin em le? Jacoba angin Lalpa hi vuan ve ngar ngai ila, Davida angin harsatna karah pawh Lalpa lam en tlat ila.  Tichuan, khawvel malsawmna anga tlachhe ve mai mai lo, van malsawmna chu kan Pathian hian, min pek a va rinawm em.

(Tawngtai Dan Tur)
Lalpa, nangmah tihtu te tan chuan, nihlawhna, van malsawmna leh hausakna te hi i ui ngai lo a ni tih hi ka hriat renga, khawvel atanga nihlawhna zawng loa, nangmahah chauh zawng zawk turin, min pui ang che, Amen. Ti ang o.