Pathian Rinawm Zia

"Pathian, a Fapa Isua Krista kan Lalpa pawlnaa ko luttu che u kha a rinawm a ni."(I Korinth 1:9)

Kan Pathian hi a rinawm em ema, kalbosan thin mah ila kan auh hre phak turin min hnaih reng tlat tho thina. Joba, pawh kha Pathian kohna atang tlanbo a tuma, a tlanna lamah chuan a tluang lo hlea, a tawpah phei chuan nghapuiin a dawlh a nih kha, nghapui kawchhung atang Lalpa a au taa, Lalpan a rawn chhang nghal a nih kha.

Petera khan, kan Lalpa Isua Krista hnenah khan, ka zui zel ang che, i thihnaah ka thi ve ang, a tia. Mahse, Isua thihna kotlanga an din tak tak chuan, Petera chuan a zui ngam tak tak loa, a him chin velah Isua hnungah a kala, vawi thum lai a phatsan bawk a ni. Chu Petera ngei chu, a hnungzuitute leh a rawngbawltute hotuah ala hmang duha, Thlarau Thianghlim chenchilhna nena thusawi hmasa ber a nih ala phala, a hminga thiltihtheihna zawng zawng a hman ala phalsak bawk a ni.

Kan Pathian hi a rinawm a ni! Tlang rawta sawi chuan, he article ziaktu hian kan Lalpa rinawm zia hi, a ziak chhuak zo lo a, a hre zo lo bawka. Bible chang khi daha, "I Rinawm A Ni, Lalpa" tih mai hi ka duh hial a.

Pathian pawh hi amak kher kher tih hial hi ava awl em, misual kher kher, tisual thin kher kher, phatsan thintu kher kher, tlanbo san thintu kher kherte hi, ka rawngbawltu tiin min la koh duha. Nasa taka kan han tihsual hnua, a hnena thupha kan han chawi changte hian, ngaihdam kan dil min chhan letna aw chu kan hre kher lo pawh a ni thei e, min chhan letna aw chu hre thin ila, hei hi a hnen atanga kan aw hriat chu a nih ka ring "Ka ngaidam che, i tisual thei tih ka hria alawm, ka hmangaih che, tho la ka tan i nun hmang leh ta che" tih hi.

Kan Pathian hi, harsatna kan tawhin min hnem tur leh min pui turin kan kiangah a awm tlat thina, kan lawm ber lai pawhin min lawmpui turin kan kiangah a awm bawka, nitin nun pangngai kan hmannah pawh nun min hmanpui turin min hnaih reng thoa, a duh loh zawng tiin nasa takin kan tlanbo san pawhin alama kan hawi kir hun nghakin min la hnaih thin cheu bawk a ni.

Ngaihzawnga kan buai changte hian "keimah nen kal la chuan i tluang ang mawle" tiin ama thua kan kal duh hun min nghaka, eizawnna leh hnaa kan tluan lohte hian "ka thu dawng hmasain, deng la chuan (ti la chuan) i hlawhtling ang" tiin a hnena kan intukluh hun min nghaka. Nupa kar leh chhungkua kan buaite hian "ka hmangaihna thiltihtheihna hi i ban phakah ka dah asin" tiin amah atanga chhungkua siamthat kan tum hun min nghak reng thin a ni.

(Tawngtai Dan Tur)
Lalpa, englai pawhin, eng pawh ti ila, khawiah pawh awm ila, eng ang miah pawh inthlak thin mah ila, ka tan i ringawm i tlan tlat zel avang hian ka lawm e, i tana mi rinawm ka nih ve theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.


Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Pathiana Awm Pawimawhna

"Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang."(Johana 15:4)

Kan Lalpa Isua Krista chuan, amahah awm reng turin min ti a. Amaha kan awm reng chuan a ni pawh keimahniah awm reng min tiam bawka.

Rawngbawltu experience nei tha berte pawh hi Pathiana an awm lo a nih chuan, rah an chhuah thei ngai chuang lo. "Keimaha in awm loh chuan rah in chhuah thei lo ang" tiin alo sawi reng a.

Rah chhuah chu enge kan tih chuan, sawtna (effectiveness) a ni ti ila kan sawi sual awm lo e. Kan thinlung hi Pathiana a awm loh chuan, thusawi mah ila thusawi thlawn kan ni ang, mi pui mah ila mi pui tlawn kan ni ang, chhungkaw thatna atan bei thin mah ila bei tlawn kan ni ang, chanchintha puangin ti vak vak mah ila kan thil tih chu a thlawn mai a ni ang.

Mahse, kan thinlung hi, Pathianah, Kristaah kan dah tlata, kan thinlung hi amahah a awm tlat chuan, atan thil hote chauh pawh timah ila, awmze nei loa, a chhuah Pathianin a phal ngai lo a ni. Chhangper panga leh sangha pahnih chauh neitu naupang khan, Isua zuitu nih a duha, thlaler thleng thleng Isua a zuia, Isuan a ei tur neih chhunte kha a mamawh a ni tih a hriatin, phal takin a pe a ni.

Naupang thil neihte kha a tlem a ni, mahse kha naupang kha Isuaah a awma, a neih chhun tlemte chu Isua hnenah a hlana, Isuan alo tipung mai a ni. Keini pawh hi, amahah, Isuaah kan awm a nih chuan, kan neih chhun tlemte pawh hi aman alo tipung mai thin a ni. 

Hei vang hian, Pathianah i awm tlat ang u, Pathiana kan awm theih nan, tawngtai leh bible chhiar bang lo ila, engpawh kan  tih dawmin leh khawiah pawh kan kal dawnin Pathian hnenah tawngtaiin hlan hmasa phawt thin ang u. Pathiana awm nun chu "Krista hmasak zelna nun" hi a ni, ti ila kan sawi sual awm lo e.

(Tawngtai Dan Tur)
Lalpa, nangmaha awm tluka hlu leh him hi a awm lo tih hi ka theihnghilh lohna turin min pui la, i tana rah duhawm leh nun thiltithei ka neih theih nan nangmahah ka awm tlat theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.


Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

A Tana Mahni Nun Leihbuate Lawmman

"Tupawh a nun thlahlel chuan a hloh thin; tupawh he khawvelah hian a nun ngaitlawm chuan chatuana nunna tur a vawng reng ang."(Johana 12:25)

Tupawh mahni hmasiala mahni duh ang anga, nun tum tlatte hian an tisual tlangpui thina. Mahni ngaihdana nun an tum tlat thin avangin, a tawpah phei chuan ngainatu pawh an nei mang lo hial thin.

Rawngbawl tura inpe, mahni nunin a chak zawk leh a thlakhleh zawk pawh kalsan thin mite hi, khawvela an dam chung ngei pawh hian "Lalpan nangmah i inngaihtuah hman lo bawka, keimah zawkin, ka han ngaihtuah ang che" a ti awm ang mai hian, ngainatu leh an tana that chhuah duhtu tamtak a pe thin a.

Rawngbawl tura Lalpa tana nun hlante hi, an ro a rel saknaah hian, Lalpan khawvela ngainatu a pekna chauhah chuan, an ro rel saktu Lalpa chu a la lungawi thei lo cheu thina. Chuvang chuan, chatuan nunna a pe tlata, chatuana an nunna tur chu Lalpan a vawn thatsak bang ngai loa.Tin, vanah ngainatu tam tak a pe tel bawk thin.

Kan nun hi kan duh ang anga hmang turin kan thlahlel lui tlat dawn nge, Lalpan a duh ang anga, a hman atan kan nun hi Lalpa tan kan leih baw zawk dawn le?

(Tawngtai Dan Tur)
Lalpa, i tana mahni nun ui lo tute chu, nangmah zawkin i ngaihtuaha, i ngaihsak thiana, an tan chatuan nun leh vana an lawmman chu i dahthat sak thin a ni, tih hi ka hriat renga, i tana ka nun zawng zawng hi leihbuak nachang ka hriat theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Keimahah Hian A Nunna Thaw A Thawk Luh Avangin Ka Zam Lo Ang (Craige & Michelle)

"Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a."(Genesis 2:7)

Michelle-i chu ka kiangah a awm tlat thina, mahse a nun tibuaitu mai ka nih ka rin avang chuan, hmaingaih mah ila kalsan ka tum zawka. Michellei kut chu ka vawn tawp berna tur a ni tih hre chungin, ka vuan a, ka fawp a, a bianga mittui luang chu ka thlir reng ngam bik loa, "ka hmangaih i ni" (your the love of my life) tiin a car atang chuan ka chhuak taa.

Ka hming chu Craig Robinson a nia, ka nuna ka thil tawnte ka lo hrilh ang che.

Druge addict ka nia, Business school ka kal lai atanga ti tan ka ni. Ka chhungte tan harsatna ka thlen nasat em avangin, ka nih nih ka ni zawk ang, tiin kan in ka chhuahsana. Crack house (ruihhlo ti leh zuar ho awm khawmna) ah ka awma, ruihhlo ka zuara, ka rui thin bawka. Kan ruihhlo zawrh dan tur duangtu ber ka nia, ka strategy avang chuan kei leh ka chen puite chu kum 5 lai police in min man thei tawh lo nghe nghe a ni. Kan crack house awmnaah hian a naupang lam ka nia, mahse thluak bur bera min hman avangin room hran thlap ka nei vea, ei tur pangngai takin ka ei thei a, ka ruihhlo tih chu midang tih angin uchuak takin ka ti ngai loa, chu bakah kan crack house a awm zawng zawngte hian, ruihhlo tha chauh kan khawih thina, midangte ai kan ti nasa lo bawka. Hei vang hian, kan hmel a pangngaia ruihhlo khawiah pawh min ngai lem lo thin a ni.

Tin, ruihhlo kan zawrh pawhin biak in atanga fit 30 aia hlaah zawrh loh tur kan tia, chubakah a hlawma kan zawrh chhawn tur kan lakin, kristian conference a awmnaah kan la thin. Hei tak hi Michelle-i nena kan in thawn phahna pakhat a ni ta a ni.

Voikhat chu, Latino ho atang a hlawmin lak kan tuma, kristian conference pakhat hi kan khaw Towm house ah a awm dawna, tah chuan a hlawmin lak kan tum taa. Kawtah chuan kan nghak vang vanga, chutia kan nghah lai chuan tu tih ka hriat loh hian, unuapa he C.D hi copy dang ka nei tawh sia, i tana Pathianin a malsawmna hmanruah a hman takin, lo nei ta che min tia. Casting Crows - The Very Next Thing album chu min pe a, kristian lemchang kan ni bawka, lawm hmel theih ang berin ka dawnga, min petu hnenah chuan "Pathianin a let tam takin malsawm che rawh" te kan ti vela. Chutia ka tih hnu chuan, chu pa chuan a card min pe a, Dr Mark Jonea (a chanchin nungturinah pawh kan chhuah tawh i chhiar duh chuan linkah hian click rawh http://nungturin.blogspot.com/2019/02/tawngtaia-dil-thinte-chuan-dil.html) tih hi alo inziaka, kan in chibaia a kal taa.

Ni thum hnuah chuan, ni ngani a ni a, kar khatah ni khat tal hi, rui lo thei ang bera awma lehkhabu chhiar ka tum thin a, chutiang ni chu a ni. Tichuan, lehkhabu chu ka chhiar ka chhiar a sumdawnna lampangte ka chhiara, tlai khaw thim dawnah chuan ruih ka tuma, ka thil zawng vel chuan C.D min pek chu ka hai chhuaka, ka play chhin a ka hmet kual deuh zung zunga, "God of all my days" tih hla chu ka ngaithla fuh taa. Ka thinlungah hian na lutukin min khawiha, "eng lai pawhin Kristiante Pathian hian min hmangaih maw? Ka ti a, ka play nawn ka play nawna, Dr Marka card chu ka zawnga, hla chuan min khawih em avangin zah pawh ka sawi thei lo, ka va phone hmiaha. A ni chuan, tha takin min lo chhanga, zan lamah an inah an thiante nen shareing an nei dawna, kal ve turin min sawma, awle ka ti ve ta ngawta. Pathian thu han chak zia chu, hla a Pathian thu avang chuan, ka drug chakna a bo deuh hawk theia, mahse Pu Marka te inah ka tal buai ka hlauh avangin, tlemte chu ka tia, tu mahin ka rui tih pawh an hre kher lo ang. Tichuan, ka va kal taa, an chanchin ngaihnawm tak tak an sawi liam liama, Pathian that ziate an sawi nasa maia, "he Pathian hi ka duh ve" ka ti taa.

Ka haw dawn chuan, pu Marka chuan min thlaha, ka kohhran lawina te min zawta, kei chuan Sir ka chanchin ka hrilh ang che, i rin loh ang a nih pawhin min ngaidam dawn nia ka tia. A ni chuan sawi ta che a tia, ka chanchin zawng zawng chu ka hrilh taa. A ni chuan, uluk takin a ngaithlaa, a thinrim loa, min kuah a, Craig hlau miah suh kan pui ang che, thil tha zawk a theng em em ang (the best is yet to come) a tia. Chu tia kan inbiak lai chuan, nula a hmel en reng reng  pawha ngilneihnaa khat tih hriat reng hian, BMW M4 Convertible a rawn khalh luta, Dr Marka nau Michelle-i chu a nia. Michelle-i chuan ka u ph.d ka hmu ve ta asin a tia, Marka chuan "ava lawmawm ve, mahse tinge car manto i neih taka a tia" Michelle-i chuan u Raj'n (Marka best friend) min leisak alawm a tia. Marka chuan Raja thin hi chu aw! hei kan unaupa hi Craige-a a nia a tia Michelle-i nen chuan kan in chibaia, Michelle-i chuan u Katy-i (Marka nupui) a awm em a tia, Maka chuan awm e lo va lut rawh a tia. Tichuan, Marka chuan sermon ngaihthlak turte min hrilh a, ka haw taa.

Sermon ngaihthlak tur min hrilhte chu nikhatah darkar thum tal ka ngaithla ziaha, ka ruihhlo khawih pawh chu ka thlah tial tiala, chutih rual chuan thil ei har ka ti chhoa, ka cher ta hle maia. Chhungkua min enkawltu tur ka nei bawk si loa, ka buai ru khawp maia, mahse Marka nen kan inhmuh changin eitur thate min hrilha, damdawite min chawh bawk thina. Ka zia cho ve telh telha, mahse kar khatte drug ti loin awm thin mah ila, ka ti leh thina, chung hunah chuan inthiam loh avangin inkhawm thlah mai ka chinga, Marka'n inkhawm ka thlah tih a hriat ve leh min ngaihven thuai thina.

Kum khat dawn chu, ka ruihhlo ka tlah ve thei taa, kan kohhranah chuan zaipawlahte ka tel chho ve a. Tlaikhat kan biak in leh a vel kan tifai chu, hmeichhe pakhat tre tuar hi ka hriaa, a lamah chuan a rang thei ang berin ka va tlan nghala. Michellei'n ventilation alo nawt faia, chuan a leihlawn chu alo tawlh sawna, ventilation-ah chuan alo in uai tang hram hram hi alo nia. Tichuan, a rang thei ang berin leihlawn chu ka dawh hnaih saka, a rawn chhuk hnu chuan a kut leh a bante chu a in ham tanna lamah a pilh pheng phunga, ka rawmawl chu tuiah ka chiaha, ka deh saka. A u nen kan inkawm dante min zawta, ka chanchin engkim chu ka hrilha, kan titi tui ta phiana, haw pahin pizza kan ei duna, ventilationa a uai tan dante chu ka zir saka, kan nui nasa maia.

Tichuan, inkhawm apiangin kan inhmu thina, a tam zawkah chuan kan haw duna. Nikhat chu, Michellei chuan a thian thenkhatte chuan movie an en tur thu min hrilha, a sawi awmzia kalo hre thiam loa, movie enpuia ka sawm alo nghak chu niin. A thusawi chu ka hriatthiam ve leh ka sawm nghala, tichuan movie chu kan va en duna, kan hlim dun khawp mai. Kan inngaizawng tih pawh ka hriat hma chuan kan lo inngaizawng nasa tawh hle chu alo nia. Chu chu ka hriatthiam  veleh Michelle hnenah chuan, "drug kawih tawh lo mah ila kala zawrh thin thu leh, crack house a kala awm thu chu ka hrilha, chu vang chun atan kan inhnaih loh a that zawk thu ka hrilha." A ni chuan, puitling i nia, i thu thu alawm, kalo tawngtai pui reng ang che ati sam et a, a chhanchu min ngainat leh ngainat loh ala inhrethiam lo a ni.

Tichuan, nithum vel chu kan inhmu tawh loa, kan in be lo bawka, Michellei tan ka tha lo miaua, ka hum theih dan tha ber chu ka hlatsan hi alawm ka tia, rilru na em em chung chuan lawm ka tum tlata. Mahse, zan laiah chuan ka phone a rawn ri a, ka hlauh ang ngei ngeiin min lo ngaina ve chu alo nia, phone ah chuan tah aw tiau hian, "Craige i chungah enge ka tihsuala min hlat san tlat hi," a rawn tia. Kei chuan, drug addict ka nih hi, i tan ka tha lo, ka tina mai mai ang che ka tia, Michellei chuan kum khat ai tam i kalsan tawh kha, min kalsan duh chuan dawt sawi loin, a chhan diktak min hrilh ta che a tia. Kum khat khawih tawh lo mah ila, relapse ka nei leh thei  alawm, bakah drug zawrh loh chu thawh tur dang ka nei lo, ka tia. A ni chuan, dawt min hrilh suh, mi tha i ni, midang vangin min kalsan a nih kha, a tia. Phone atang chuan kan inrilhfiah zawh tak tak dawn loa, ka hriat avangin, a tuka inhmu turin thu kan rel tlu taa.

Zankhuain ka mu thei loa, Lalpa kei hi Michellei te ang nei chi ka ni lo, drug hi min puihna avangin ka kalsan ngei ang, mahse tluk leh neithei reng ka ni. Chu bakah kei pawhin ka tihduh loh chu midang hnenah ka zuar reng bawk si. Nupui nei tlak pawh ka ni lo, khawngaih takin he hmeichhia hi, mi tha tak pe la kei chu min theihnghilh tir rawh tiin ka tawngtai mawlh mawlh a.

Zingah chuan, dar 8 velah hian, kan crack hosue kawtah chuan, car man to lutuk lo hi alo dinga, Michellei a nih ka ring loa, a chhanchu a car kha BMW M4 Convertible a ni sia. Mahse, a u in thil man to hian, midang kan puihna tur a dal thei a tih avangin car dang khalh turin alo hrilha, Marka leh Michellei te hi Jones chhungkua an nia, a pa atang millionaire anni a, mahse an inte an incheinate an car te chu, mipangngai neih phak ang vek an hmanga. Kan inkawta car chu, minute 15 vel a dinhnuah chuan, chu car atang chuan horn a rawn ri tuar tuara Michellei a nih ka ringa, car chu ka pan taa.

Michellei chuan, dawt i sawi crack hosue ah ka awm i tia, in in hi mi pangngai awmna hmunah a awma, mi pangngai in ang chiah a ni bawka, a tia. Sawifiah ngaihna ka hriat loh avangin, crack house a ka chen puite chu dak turin ka tia, mi 20 vel an rawn dah hnuah chuan, a awi ve taa. 

Tichuan, a car'ah chuan thil awmzia chu ka hrilha, kan inhnaih loh hi atan a that zawk thu chu ka hrilh leha, a ni chuan i tan enge ka niha min tia. Kei chuan, "ka hre lo" ka tih vang chuan, a mittui aluang zawih zawiha, kan ngawi deuh vang vanga, a kut chu ka laa, a kut chu ka vuan leh tawh dawn ngai lo a ni tih hre chungin, a kut chu ka fawp vang vanga, ka hmangaih i ni (love of my life) ka tia. Car atang chuan ka chhuak a, ka nun ka hman sual avangin ka nuna ka hmangaih ber chu ka thlir liam taa.

Ka room ah chuan ka luta, ka khumah chuan ka let hnawka, ka biangah ka mittui a far zung zunga, ruihhlo ka khawih avang hian thinlung chhung atanga hlimna tak tak te  hi ka hmelhriat ve ngai loa, chu hlimna min hmelhriat tirtu ber chu, ka kal tir a tha zawkin ka hre bawk si. Awm ngaihna hre lo chuan ka let ka leta, rui dawn ila nasa takin ka hnung tawlh zual dawn tih ka hre bawk si, drug zuarin chhuak dawn ila ka rilru a fim bawk si lo, ka let ka let a ka tawngtai thin, ka tihleithei ngang si lo. 

Tichuan, ka phone ka hmet kual ka hmet kuala, Marka'n C.D min pek ami Casting Crows hla "Halleluiah" tih chu ka hmet chhuak hlauh maia, a chang hnihnaah chuan "mihringah chuan Pathian thaw a cham reng avangin Pathianin mihringte a hmangaih bang thei lova" tih thu chuan min khawih khawp maia. E he! keimahah hian Pathian thaw a awm alawm le ngah nge ka zam mai le, ka tia. Pathian thaw keimahah a awm chuan Michellei pawh, ngah nge ka neih theih loh ang ka tia. Ka thingthia ka tawngtaia "Lalpa keimahah i thaw ngei chu ilo thawk luh avangin ka lawm e, Michellei tan mitha ka nih chuan a hun takah miin tawn tir leh ang che, vawiin ni hi i tan ka hlan a, i tan thil tha ber min tih tir ang che amen" ka tia.

Ka tawngtai zawh chuan MacDonald's ah hna va zawn a lang tlat maia. Tawngtai mawlh mawlh chung chuan kan khuaa MacD branch lian ber South Zone lam chu ka pana. Ka va thlen chuan, branch manager hmuh ka dila, mak deuh maiin kava hmu ve thei maia. Tichuan, ka nihna dik tak, drug addict dam leh ka nih thu leh, drug zawrh sim ka duh avangin hna ka mamawh thu ka hrilha, tun maia hna an neih loh pawhin hna an neih veleh a min biak theih nan, ka phone number hi min lo chhinchhiah sak turin ka ngena, a ni pawh chuan alo ziak ve maia. Engmah min zawt lem lo a, thilpakhat min zawh chu "police in min man tawh leh man loh chungchang a ni." Rang takin, Sir min la man lo ka ti a, a ni chuan kum engzat nge drug i zawrh tawh min tia, kum 7 ka tia, police'in an la man lo che maw! a ti leh a, kei chuan aw man lo ka tia, ka kal chhuak taa.


A tukthum hnu velah chuan MacD ho chuan min rawn call a, ka va kala, sales ah ka that an rin avang chuan, door to door sales man-ah ka tan duh leh duh loh thu chu min zawta, kei chuan hna min pek ang ang chu ka thawh duh thu ka hrilh a. Mahse, drug zuar thin ka nih avangin car'a kal an phal loa, bus a vei vak tur chuan min ti taa, hahthlak dawn hle mahse, lawm takin ka pawma. Tichuan, hna chu ka thawk ve tana, ka hna thawh tan niah chuan mi 30 hnenah Macd chu ka zuara mi panga laiin min lo dawra. Nitin hian, ka kalna tur chu ka hlana, thlakhat vel ka thawh hnuah chuan, Rose Street mihang ho awmnaah hian ka kala, in lian em em compound lian pui nei hi alo awma, chu inah chuan zawrh loh zet ka tuma, mahse tawngtainaa ka hlan tawh avangin, zawrh tho chu ka tum taa.

An gate pawnah chuan, dawr bell a awma, chubakah inbiak theihna pawh a awm nghal bawka. Door bell chu ka hmeta, speaker ah chuan, in neitupa chuan tunge aw! a rawn tia. Kei chuan Craige Robinsona ka nia, biak che ka duha ka tia, rawn lut rawh, kan in i rawn pan mai dawn nia a tia. Tichuan gate chu a in hawnga, in awmna lam chu gate atang pawh chuan feet 300 vel a nia. In lam chu ka va pan vang vanga, a nei tupa chu, an kawngkhar bulah chuan alo dinga, min hmuh veleh chuan MacD form ka ha a hmuh avang chuan, sales-man maw i nih a min lo tia. Ka zam khawp maia, mahse keimahah hian Pathian thaw a awm tih chu ka rilruah a rawn ri nawn leha, tihian ka chhang taa. Ka pu, Craigea ka nia sales man ka nia, min dawr duh dawn lo a nih pawhin ka hna ka thawk tha a ni tih, keimah leh keimah ka inhrilh theih nan, minute hnih chiah i hun min lo pe ta che ka tia. 

Tichuan, MacD chu ka zuar taa, innei tupa chuan, i tumruh hle mai, engin nge tiang taka minimum wage chauh hlawh chhuak tura tan tirtu che, min tia. Kei chuan, drug addict ka nih thin thu leh drug ka zawrh thin chu sim ka duh em vang a ni, ka tia. Chutia ka tih veleh chuan, inneitupa chuan min rawn kuaha, bawiha i hlawhtling ang, min tia. Inneitupa hi Pu Dericka alo nia, a ni pawh hi drug zuar thin alo nia, drug zuar pahin lehkha a zira tichuan wallstreet lamah hlawhtlinna a chhar a.

Mahse, a fapa erawh drug addict a ni ve ta thunga, a chanchinte leh an chhungkaw chanchinte min hrilha, a fapa chu kawm ve turin min duh thute min hrilha. Kei chuan, ka pu i fapa chu ka rawn la kawm dawn nia, hna thawk lai ka ni sia, ka kal mai a nge, ka tia. A ni chuan, i thil zawrh chu kalo lei ve ang chu, a tia, kan leaflet chu a en vang vanga, naktuahah burger 200 leh french fries basket 30 dar 12:30 velah min rawn pe ta che a tia. Kei chuan, ka pu min khawngaih vangin chutiangin tisuh ka tia. A ni chuan, chutiang a ni lo, naktuakah stock broker meeting kan nei dawna, catering kan order thina, mahse tun tum chu MacD kan order dawn, a tia. Kei chuan, ka pu ka lawm lutuka mahse i order hi a tam avangin, i phone number emaw, min pe thei a ngem ka tia, a ni chuan hei ka card hi la rawh, a tia. Tichuan, a tukah chuan van'in kan va pe taa.

Kei mahah hian Pathian thaw a awm tih ka rin tlat avang chuan, Drug zuar loin ka awm theia, chu mai bakah Pu Dericka'n min puihna leh ka inhralh that avang chuan appartment luah hawh mai pawh ni loin, a leiin ka lei ve ta nghe nghe a ni. Kan Macd branch chuan, sales manager ah min dah taa, mi ka biak dan thinte chu branch dangin an hriat ve duh avangin, branch dangte pawh training kava pe ve thina.

Mahse, ka rilru buaina thin chu, Michellei ka hnaih ngam leh a ngem tih hi a ni. Dr ropui tak Mark Jones'a nau a ni mai loa, a pa chu pu Jones'a sumdawng lian lutuk a ni, chutih rual chuan kan khua Georgia University-ah Michelle'i chu a thawk tawh a, chutiang ang mi hnaih ngam chu kei atan chuan a har thawkhat viau tawha, chu mai pawh chu ala ni lo Michellei rilru ka tina tawh lehzel nen. Tihngaihna a awm ngang loa, Pathian hnenah "Lalpa Michellei nen kan inzawm leh tha i ti a nih chuan, i thu a ni a, tih dan tur vak ka hre loa, i kutah ka nghat e" tiin ka tawngtaia. Tuk khat chu chutia ka tawngtai lai chuan Pathian aw ka hre taa, tihian min rawn biaa "Ka fapa, hmanah kha chuan Craige'a a chhungah ka nunna thaw a awm tih hre Loa nen Michellei hi an inngaizawnga, tunah chuan Craige'a amahah ka nunna thaw a awm tih hria i ni tawha, zam duh suh ka awmpui ang che," tiin min rawn biaa.

Chu mi ni chuan, hun awl ka nei theia, kan biak in tih fai a ngaih chuan ka va tifai ang tiin ka rilru ka siama, biak in enkawltu kava zawh chuan nimin lawkah midangin an tifai tawh a ti bawk si, tih tur ka hrelo chuan Georgia University website chu ka en kual mai maia, Asst Professor thlalak honaah Michellei a tel leh tel loh vel chu en mai mai ka tuma, dik tak chuan a hmel ka hmu chak a ni. Chutia, website ka en lai chuan, notice pakhat hi ka hmua, tah chuan tihian alo inziaka "Ni 29 April ah Sales clinic neih tur a nia, chu clinic neihna tur atan chuan, professional sawm tur an mamawha, chutiang hria an awm chuan, university board hriattir tur" an tih chu ka va hmua. Sales professional chu ka ni ve tlat bawk sia, Michelle hmel hmuh ka chak bawka, ka hmuh mial takin ka tia, university chu kava mail a, an ni pawh chuan ka experice te an lo hre ve a, min lo pawm a.

Tichuan, sales clinic ah chuan presentation chu kava pe ta a, mahse Michellei chu ka hmu awzawng loa, an subject (department) pawh a ni lo hrim hrim bawka. Thu chu theih tawpin ka sawia, ka sawi zawhah chuan kut an beng dur dura, chutia sales clinic kan neihna hmun ka chhuah dawnah chuan, Pu Dericka fapa Mike'a chu kava hmua, a ni chuan min lo be vata. A ni hi, Universityah hian a lut vea, drug pawh eng tin tin emaw a kalsan ve taa, Pathian biak hi nuam a ti em em a, chu mi niah pawh chuan campus ministry hoin, fellowship an neihnaah chuan telve turin min lo sawm a. Kei chuan, ka tum ber Michelle hmuh chu, ka thei siloa, a pawimawh ber Pathian rawngbawl chu kan ti thung a nge, ka tia kava kal ve taa. Beisei loh deuh maiin fellowship ah chuan Michellei chu kava hmu a,  banah chuan biak ka tum a, mahse tlangval fing leh fel tih hriat reng reng nen hian an inzuia, ka bing mup maia, be lo chuan ka kal taa.

Michellei hian, a u Marka te bula chawlh a rawn hman lai chauhin, kan biak inah a inkhawm ve a, tunah phei chuan university hnaihah a awm tawha, chu vang chuan ka hmu lo rei ta khawp mai. Ka hmuh ve chhunah lah, kei mah aia mi tha zawk nen  ka hmu bawk si, ka tawngtai saknaah khan mitha tak pe turin ka dil sak kha a nia, Pathianin ka tawngtaina chu a chhang a ni mahna, ka ti hnuhnawh leha. Awm ngaihna ka hre lo chu, ka office-ah chuan ka tai ka tai a, hna atang ka ban hnuah chuan ka rilru a hnual em avangin tih tur ka hre loa, crack house a ka awmpuite ka be khat bawka tiin kava biaa. An ni chuan, Michellei nen kan chungchangte min lo zawta, kan chanchinte chu ka hrilh hlawma, an ni chuan chutiang a nihte chuan nangmah chauhin awm mah ta che, rawn phei rawh poker te kan khel a nga an tia. Tichuan, ka crack house awmna thinah chuan kava lenga, ka haw dawn chuan ka thiantha ber Big Franka chuan min thlaha, mut har i tih takin a tia, drug vawikhat tih vel chu min pea. Nidang chu nise ka hnar ang, mahse ka rilru a mang deuh tlata, ka ti dawn kher hleinem tiin ka la ve maia.

Kan mut dawn chuan, mut chu ka muhil theia, mahse drug chu ka ti chak ta tlat maia, tichuan ka ti ta nge ngea. Ka tih ve leh chuan ruih chu ka rui ngeia, mahse nidanga a nuam ka tih angin nuam ka tithei loa, Pathian ka hlat sanin ka hriaa, ka mangang khawp maia, rui chungchuan ka tawngtaia Pathian hnenah ngaihdam ka dila, chutia ka tawngtai chu ka lo muhila, zing ka thawh chuan, tihian ka rilru ka siama"nimin lamah hmelmapa'in min hneh bawka, vawiin chu Pathian pawl nan ni leng hun kan hmang teh ang" ka tia. Rawngbawltu pakhat thu sawi "suala kan tluk palh chuan, nasa thei ang berin Pathian be leh nghal ila, kan tho leh thei thin" a tihte chu ka hre bawka. Tichuan, ka hna atang chawlh ka laa, ka inah chuan ka in kalhkhuma, Pathian pawl ka tuma, chutia ka tawngtai hnu rei lote ah chuan Pathian aw ka hre taa "ka fapa, sualin drug khurah hnuh luh che a tum avangin i rilru a tibuai a nih kha, vawikhat i tih leh avang khan ka hmangaihna che hi a kiam phah loa, i sim theihna turin ka kaihhruaina zawng thin ang che" tiin min biaa.

Ka ngaihtuaha, a pawng a taka Michellei ka ngaih vak kha sual hnathawh a lo ni tih hi ka hmuchhuaka, ka ngaih em em avangin eng thilah mah kawngro a su dawn chuang lo, sual min bumna a nih zia chu ka man chiang taa. Ka lunglen avang chuan keimah leh keimah in tih lungawi nan Michellei hmuh ka tum ve ringawt a ni tih ka hriaa. Michellei neih ka duh a nih chuan, Pathianin ti tura min tihte chu ka tihin ka neih theih phah zawk dawn a ni tih chu ka hre thiam taa. Pathianin enge titura min tih ber ka hre leh loa, bible ka keu ka keu a, tah chuan I Korinth 6:20 "in taksaah chuan Pathian chawimawi rawh u" tih chuan min khawih taa, Pathian ka chawimawi ve theihna chu a hnena midang hruai a nih ka ring taa. Ka thian tha a ni bawka, Big Franka atang kan tan a nge ka tia, Pathian hnenah chuan ka thil tum chu a rem tih zawng a nih leh nih loh chu ka zawta, Pathian chuan kan crack house a awm zawng zawng te chuan ka nun an awta, ka Pathian (amah) neih ve an duh thu min hrilha. Tichuan, kan crack house a awm te zawng zawng chu Pathian hnenah hruai ka tum taa, Dr Marka nen kan thawk duna, an inah chuan sharing neih pahin chaw kan ei khawm thin a.

Zan khat Dr Marka te ina, sharing kan neih lai hian, Michellei chu a rawn lang hlawl maia, tih dan tur ka hriat loh bakah Pathian ka chet khalh leh ka hlauh avangin, ka rilru'in ka tawngtaia, "Lalpa, i thu leh dan zawm tluka, ka tana, tha leh hlu a awm lo, i thu zawm turin min pui ang che ka tia." Pathianin a aw min hriat tira,"ka fapa, va be rawh" tih hi ka hriaa. Michellei chu biak ka tum taa, sawi tur pawh ka hre loa, mahse ka rilruah "keimahah hian Pathian thaw a awm tih chu ka hre chhuak leh taa." Michellei hnenah chuan, i dam em ka tia, a ni chuan ka tha e i dam zawk maw tiin min chhanga, kei chuan ka tha e university ah Asst professor hna i thawk tihte ka lo hriaa ka lawmpui khawp mai che ka tia. Michellei chu a ngawi ta vung vung maia, ka ngaih a tha lo rum rum tawha, ti nge ka tia, ala ngawi vung vunga, ka chungah ila thinrim ami ka tia, a ni chuan (ka hming pumin) Craige Robinson hmanni Universitya thu i rawn sawi khan, tinge min biak duh loh a tia. Sawifiah ka tuma, midang nen in ni bawk sia ka tibuai ang che u tih ka hlau alawm ka tia, a awi thei chuang lo, tunah pawh hian ka ute in ni lo sela min be duh chuang lo ang a ti ta tun tun a. A thinrim poh leh a hmeltha tual tual emaw tih mai tur a ni, ka en vung vunga, engmah ka sawi loh avang chuan ka kal dawn a tia, kei chuan ngawi lawk kal suh ka tia, kal luih a tum tlat bawk sia.

Tihian ka ti taa, thu dik i hre duh em ka ti a, a ni chuan eng thu dik maw a tia. Thu dik chu ka ngai che Michelle Jones, ka theihnghilh ngai lo che, hmanniah pawh khan, hmuh che ka chak vangin sales clinic ah khan ka in volunteer alawm, mahse ka biak loh chhan che chu, kei mah ai mitha zawk drug addict dam leh ni ve lo, a tir atanga kristian tha pangngai nun tha tak nei nen ka hmu dun che u a, mitha i tawn hi ka tawngtaina a nia, chuvang chuan ka be lo che alawm ka tia. James a kha maw a tia, a niang fellowship zawhah i kalpui kha ka tia, Michellei chuan kha kha Jamesa a nia campus crusade leader a nih kha, a tia. A ni maw! ka ti ringawt a, Michellei chuan, Craige tumah kala date leh lo a tia, chutah chuan he hmeichhia hian min hmangaih tak tak a ni tih ka hrethiam taa, keimah leh keimah ka inhmuh hniam avangin min hmangaihtu ka nawr sawn a, ka tina a ni tih chu ka hrethiam taa.

A hnenah chuan, i chunga ka thil tih kha ka thiam loh liau liau a ni, min ngaidam thei a ngem ka tia. A ni chuan, awle mahse duh min thlansak thawh suh ang che, a tia, kei chuan chu chu e nge a awm zia ka tia. A ni chuan, engang mi pawh ni mah la, i kianga awm ka thlang anih chuan min nawrsawn suh a tia. Awle ka tia, Michellei chu ka kuaha, ka kuah pah chuan "Lalpa ka lawm e" ka tia, a ni pawh chu mittui tla teuh chung chuan a nui ver vera, ava hmeltha tak em! Tichuan, Michellei kut pahnih chu ka vuana kan tawngtai dun a. 

Tichuan, kan in zui ve zela, harsatna em em pawh a awm lem loa, mahse kan inhmu tam theih loh avang hian, kan thu inhmuh loh chang a tam thin khawp maia, chung hunah chuan "Pathian thaw keimahniah a awm a ni" tih hre ve ve tu kan nih avangin, ngaihdam kan indil tawna kan inngaidam leh thina. A hnu kum khat hnuah chuan, kan innei ve taa, kan nupa leh crack house a ka awmpui thinte nen chuan, rawng kan bawl ho taa, kan lei phak tawka lian in kan leia, tah chuan ruihhlo ngaite leh hnuchhamte enkawlin Pathian rawng kan bawl chho ta a ni.

(Tawngtai Dan Tur)

Lalpa, keimahah hian i nunna thaw chu i thawk luh avangin, nangmah atang thiltha ber ka beisei theia, nangmahah chuan thiltha ber ka tithei bawk a ni tih hi hre reng chungin, i kawng zawk chauh chu zawhin kawppui ka zawn theih nan leh midangte i lama hruaitu ka nih theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.

(https://www.youtube.com/channel/UCWqdTfBg5jSoeR-nmX3UI3A)

A Damna Turin, Vawi Sangkhat A Sawi Nawn (Brian Wills)

"Ka thi lo vang, ka dam ang a, LALPA thiltihte chu ka hriattir zawk ang."(Sam 118:17)

Brian Wills "10 Hours To Live" tih ziak tupa hi, cancer hlauhawm ber chi Burkitt's Lymphoma a veia. An hun lai khan hetiang natna vei hi karkhat pawh an nunna an chelh hleithei thin loa, chutiang khawpa natna rang leh hlauhawm chu a ni.

Mahse, Brian Wills a dam chhuak tlat, eng vang nge?

A dam chhan chu "Pathianin a tidam" a ni mai a lawm, ti ila kan ti dik ang, mahse amah ang chiaha Kristian ve tho, amah ang chiaha rawngbawltu ni ve thote kha an thih si, Pathianin a duh duh a tidam theia a duh duh nunna ala thei kan thu a ni lo, tiin kan sawi thina, dik pawh a dik a ni.

Kan bible ah hian, dam lo thih ngam leh thi tawh dam leh te leh zeng leh phar damte kan hmua, mahse "dam tum ngai miah lo" dam kan hmu lo. Hei vang tak hian, Pathian hmingin dam kan tum tur a nia, Pathian hmingin kan eizawnnaahte kan lehkha zirnaahte pawh hian hmasawn kan tum tur a ni.

Brian Wills, a dam chhan ber chu Pathian a nia, a dawttuah chuan Brian Wills'a tumna a ni. Kan bible chang tarlan Sam 118:17 "Ka thi lo vang, ka dam ang a, LALPA thiltihte chu ka hriattir zawk ang." tih leh bible thu dang damna lam hawite chu, Brian Wills'a chuan dam a tum em avangin, vawi 1000 te a sawi chhuak thina, a damdawiin awmna room zawng zawngah chuan Pathian thu a tar khat veka, engtik lai pawha a ngaihthlak theih tur sermon leh Pathian fakna hlate chu tape-ah dahin, a bul hnaiah tape chu a dah reng bawk a. Nasa takin, Pathian thuin a inthun khata, chu chuan beiseina nasa tak a pe renga, a rilru a ti hlim reng bawka. Chutiang taka, Pathian thu, thu nung leh thiltitheia chu, natna dona atan Briana hian a hman avangin, a natna hrikte chuan Briana chu an ngam ta lo a ni.

Lalpa thiltihtheihna chu kan nuna a lan vena turin, Lalpa hmingin ka dam leh ang, Lalpa vangin ka sumdawnna hi a kang dawn, Lalpa vangin kristian chhungkua ka din dawn, Lalpa hmingin ka zirna ka zo dawn, Lalpa vangin hna tha ber ka hmu dawn, tiin kan hlawhtlin hma chu au au ve ang u. Chu mai bakah, kan beiseina a chak zel theih nan, Pathian thu leh Pathian fakna hla te hi a nasa thei ang berin ngaithla ila chhiar ila, inhual tir tlat ang u. 

Brian Wills a Pathian kha kan Pathian tho a ni sia.

(Tawngtai Dan Tur)
Lalpa, nangmah au tam tu na na te aw chuan i beng a thleng zing thina, nangmah beisei thulh duh ngai lotute beiseina chu tihhlawhtlin i thlang thin a ni tih hi ka hriat renga, eng dinhmunah pawh ding ila nangmah auh nachang ka hriat reng theihna turin leh nangmah beisei ka ban ngai lohna turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.

(https://www.youtube.com/channel/UCWqdTfBg5jSoeR-nmX3UI3A)

Nunna Kawng

"In hmaah nunna leh thihna, malsawmna leh ânchhia ka dah tih tunah hian in chungchang thua hretu atan lei leh van ka ko a ni; chutichuan nunna chu thlang rawh u, in nun theih nan, nangni leh inthlahte nen."(Deuteronomy 30:19)

Pathian rorel dan hi a fare lo tite kan awm thin, ni e mi thenkhat dinhmun atang chuan, hriatthiam pawh a har ngawt ang. Kan bible kan en chuan, Isua Kriata zui reng sia, thi ta te, harsatna tawkte, in chenna mumal nei lote, dam lote an awm a. Mahse, nunna Pathian chu an chelh tlat avangin, an lungngaihnate chuan a hneh ngai lo a ni.

Pathian hi hlawhtlinna a ni a, mahse Paula erawh a nun thenkhatah a rethei hlea, retheihna hi Pathianin min hmangaih loh vang chu ni ta sela, Paula hi Pathianin a huatin a hua ang. Mahse, chutiang chu alo ni awzawng loa, Paula chuan retheiha awm dante, hausaa awm dante, tlachhama awm dante, natna leh mi kut a tawrh pawhin, Krista avangin nun dan a thiam a, chu ngei chu Lalpa avanga hausakna nun kan tih chu a ni, ti ila kan sawi sual awm lo e.

Chu nunna, chatuan nunna ni bawka chu, Pathian hian kan hmaah a dah a, tlang tur pawhin min tia. Chutih rual chuan, chu nunna chu hnawla thihna thlang duh tan pawh an hmaah thihna chu a dah bawk a ni. Pathian chuan, kan zavai mai hian "nunna" thlang turin min ngen lawm lawm vek a ni.

Chutiang ang bawk chuan, kan nitin nunah hian, Pathian hian kawng tha leh kawng chhia a daha, kawngtha thlanga chu kawngtha thlangtu ten thiltha an chan thin chu kan chan a duha. Chu mai bakah, kan nun zawng zawng kan eizawnna, kan lehkha zirna, kan hna zawnna, kawppui kan zawnna, etc ah hian kawng pahnih a awm zela, pakhat chu Pathian duh dan kawng a nia, chuta kalte chu mit hmuhah hian hlawhtling leh nuamsa angin lang vek lo mahsela an inchhir ngai loa. Kawng danga sualna lampang kawng thlang tute chu, mit hmuhah hian hlawhtling leh nuamsa angin an lang foa, mahse a tawpah inchhir lo tak tak an awm ngai lo a ni.

Kan nun kawng engkimah hian, Pathian kawngah i kal theuh ang u.

(Tawngtai Dan Tur)
Lalpa, ka hmaa nunna kawng min dahsak chu thlan ngei ka duha, ka nun zawng zawngah leh ka nun kawng engkimah hian, i kawng nunna kawng chu ka thlan zel theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)

Mi Au La, Ka Chhang Ang Che

"Mi au la, ka chhâng ang che, thil ropui leh inthup i hriat ngai loh chu ka entir ang che."(Jeremia 33:3)

Pathian "au" awmzia chu, Pathian hnena kan tawngtaina hi a nia, ringtute chu kan tawngtai vek thin. Pathian auh chu kan zavaiin kan ti meka, tih dan pawh kan thiam a ni. Mahse, Pathianin kan "auh" min chhanna, kan tawngtai min chhanna hi hre tur leh hrethiam turin, Pathian aw kan ngaithla thin loa, chuvang chuan thil ropui leh inthup Pathianin hmuh tir min tum reng pawh hi kan hmu lo thin a ni, ti ila kan sawi sual awm lo e.

Pathian min chhanna chu kan hriat theihna turin, Pathian aw kan ngaihthlak thin a ngaia. Pathian aw ngaithla tur chuan, Pathian nghah a ngai thin, a chang chuan darkar 2 te dar 3 te pawh nghah a ngai ang, a chang chuan kan auh rual rualin min chhang thei bawka, chutih rual chuan a hnena kan thlen hnu thla 2 ah te min chhang chauh thei a ni. Tha kan tih hunah hian, kan Pathian hian a aw min hriat tir ngai loa, amahin tha a tih hunah min hriattir thin. Chu vang chuan, Pathian aw leh min chhanna kan hriat theihna tur chuan, Pathian chhanna nghakin a lamah kan thinlung kan dah reng a pawimawh a ni.

Lalpa ka auh tlata, min chhanna nghaka kan nun hi kan hman thin chuan, Lalpan kan nunah thil ropui leh inthupte chu min hmuh tir a nga, min pe dawn bawk a ni.

(Tawngtai Dan Tur)
Lalpa, i fapa Isua Krista min chhandamnaah chuan, i aw hriatte, i malsawmna dawnte, i kaihhruaina chante hi ka ta tur a nia. Mahse, i lam ka en reng thin loh avang hian, ka neih tur ngei ngei te chu, ka hmuh hmaiha, la turin ban nachang ka hre lo thina, chuvang chuan ka chan thina. Nangin min pek i duh engkimte hi ka chan ngei theih nan nangmah nghak chein i lam ka entlat zel theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.

(https://www.youtube.com/channel/UCWqdTfBg5jSoeR-nmX3UI3A)

Hei Hi A Pawimawh Ber (Pathian Hmangaihna)

"Hmangaihna hi engtikah mah a reh lo vang; amaherawhchu thu hrilhnate hi awm mah sela tihban a la ni ang a, tawng hriat lohte hi awm mah sela a la bang ang a, hriatna hi awm mah sela tihban a la ni ang."(I Korinth 13:8)

Tunlai contemporary (tunlai hun sawina) Kristian hoah chuan, "Pathian hmangaihna a tawp ngai lo" tih leh "Pathian hmangaihna a hlawhchham ngai lo" tih hi a lar em em maia. 
Tunlaia ruihhlo ngawlvei tam tak an that chhuah theih chhan te, mi luhlul tam tak thinglung a keh sawm chhante, ka kalna apiangah Lalpa hmel ka tilang ang titu an pun chhante, leh Pathian ngaihsak ngai lo chhungkaw eng emaw zat ten Pathian lam an hawi chhan hi, he tiang ang thu "Pathian hmangaihna a hlawhchham ngai lo" tih ang chi hi, tun laia kan rawngbawltu chhuak thar hoten an kalpui vang a nih ka ringa. 

Mahse, tu pawhin engtin pawhin Pathian thu sawi sela, Lalpa a thawh loh chuan awmzia a awm chuang loa, chuvang chuan Lalpan kan tunlai hunah hian nasa takin a khawngaihna a leihbua ti ila kan sawisual awm lo e.

Kan Pathian hian rinna hi a dah pawimawh hlea, Hebrai 11:6 ah "rinna lovin ama lawmzawng mi nih rual a ni lo" tiin alo sawi hiala. Mahse, I Korinth 13:2 ah "Tlang sawn theihna khawp hial rinna famkim nei mah ila, hmangaihna ka neih si loh chuan engmah ka ni lo vang" tiin a inziak a. Hei hian kan Pathianin eng dang zawng aiin hmangaina hi a dah chungnun zawk zia leh a ngaih pawimawh zawk zia a tilang chiang hle a ni. Chutih rual chuan, rinna tel loin, Pathian a hmangaih theih loh tih erawh kan hriat tel a pawimawh awm e.

Thlarau thipek hrang hrang leh rawngbawlna hrang hrang thusawite, thilpekte, tawng hranga tawng theihnate, tihdam theihnate hian tih theih loh chin a nei thina, chu a tih theih loh chin tithei leh thintu chu, hmangaihna hi a ni. Thlarau thilpek dang leh rawngbawlna dangte hian, thinlung hi thlak theih chang nei thin mahsela, hmangaihna lo hi chuan mihring thinlung hi a hneh tak tak thei lo a, a thlak tak tak thei lo a ni.

Chuvang chuan, nangma nun kha i siam that duha i thlak duh a nih chuan, Pathian hmangaihna hi nasa takin a tam thei ang ber hriat belh tum ang che, Pathian hmangaihna hi hre seng an awm ngai lo tih hre chungin kan in tih hriatnate hi paih thlain, Pathian hmangaihna hi zawng ila, zir zel bawk ang u.

I fa emaw, i nu emaw, i pa emaw, i unau emaw, i thian emaw, an nun i thlaksak duh a nih chuan hmangaih rawh! "Pathian hnenah dil la, an nun i thlaksak duh a chuan, Lalpa i hmangaihna a hmuh fiah theihna turin, a hnenah i hmangaihna ka lantir theihna turin min pui ang che" ti ang che. Tichuan, eng sual mahin Pathian hmangaihna a hneh ngai loa, a nun i thlaksak duha chu a tha chhuak ngei ang.

Tin, inchhungkua a nawm loh chuan, Pathian hmangaihna zawn nachang hria ang che u, in tisual lo ang. 

(Tawngtai Dan Tur)
Lalpa, min hmangaih vangin ka lawm e, i hmangaihna tluka hlu a awm lo a ni tih hi ka hriat renga, ka dam chhung zawng  hian i hmangaihna zawn leh i hmangaihna zir chian hi, ka bansan ngai lohna turin, ka thinlungah thawk ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.

(https://www.youtube.com/channel/UCWqdTfBg5jSoeR-nmX3UI3A)

Malsawmna Tamtak A Awm, Unaute Nena Inngeih Taka Nun Honaah Hian

"Ngai teh, unaute inngeih dial diala awm khâwm hi A va thain, a va nuam êm! Lûa hriak hlu tak, Khabe hmula luang thla, Arona khabe hmul ngeia luang thla a, A kawrfual hmawra luang thla ang kha a ni; Hermon daifim Zion tlangtea tla thin ang hi a ni: Chutah chuan LALPAN malsawmna thu a pe a, Kumkhuaa nuna tûr chu."(Sam 133:1-3)

Bible-ah hian, thu tiam nei a awm tam viau niin an sawia, "Thu Tiam Nei" awmzia chu, thua a awma, chu thu chu kan zawm chuan malsawmna nasa tak emaw, chhiatna nasa tak emaw  chan theihna a ni, ti ila kan sawi sual awm lo e.

Unau inngaih taka awm, that zia leh hlut zia hi kan hre theuh tawh a nga, mahse kan rilruah kan hriat reng erawh a rinawm loh thung a ni.

Sam chuan, hriak hlu em em, tam bawk si, Arona hriak thih a nih tuma, a lu hriak an thiha a khabe hmula luang thlaa, a kawrfual hmawr thleng pawha luang thla ang chu a ni, a tia. An hun lai khan, puithiam lal ber leh Israel lal ni turte chauh Pathianin hriak a thih tir thina, chutiang hriak thih mi chu a to em ema, midangin an hmang ve thiang lo ni ten an sawi hiala. Tin, khual tha an thlenin puithiam lal leh lal hriak an tih aia hlu lo zawk, hriak man to an lo thih thin a ni. Puithiam lal thlan leh lal atana an thlante hi chu sawi loh, khual tha thlan bik, hriak man to thih tlaka an ngaih ringawtte pawh hi an dah sang em em thin a ni.

Sam chuan, unau inngaih taka awm hi, thlan bikte hriak an thih thin tluka hlu leh ropui a ni, a tia.

Chu mai pawh chu la ni loin, Hermon Daifim angin a teh khin leh a, Hermon tlang hi Jordan lui chhak lamah a awma, Hermon tlangah chuan ruah leh vur nasa takin a sur thina, khua a khen nasat ber lai pawhin Hermon tlanga, daifim tla chu Jordan luiah a luang thlaa Jordan lui chu a kang loh phah thina. Tichuan, Israel rama mipuite chuan engtik lai pawhin tui tlan tur an neih phah reng thin a ni. Israel ram chhungah Galili dil, dil lian takte leh dil dang leh lui dangte chu awm mahse, Jordan lui hian Israel ram a luan tlang avangin Israelte chuan an hmang tangkai ber a, malsawmna hnarah an ngai hial a ni. 

Chutiang ang chuan, kan uanute hi kan bula awm hnai ber leh nu leh pa leh in leh lo kan intawm puite an nia. Kan thian neih hmasak ber leh kan awm hran hma chuan, engtik lai pawha kan chaw kil puite an nih avangin, unau inngaih taka awm hi, Hermon daifim'in Jordan lui, malsawmna lui a chawm angin, malsawmna awm tirtu a ni, a ti.

I uanute kha, chapo zet biak hleihtheih loh an ni em? Nge ruihhloa nasa taka buaite an ni zawk. Nge i uanute'n i chan ngei ngei tur in leh lo leh thildangte pawh an chuh tlat che em? Chutiang pawh chu nisela, i uanu chu nang chuan rem tum tlat rawh, in inremna tur atana chan ngaite chu chan mai rawh. Nat a ngaih leh na mai rawh, i tawrh hun chhung a rei lo ang.

Chutianga i unaute rem i tum tlata, an thatna tur i zawn tlat chuan "Pathian thu i awi" tihna alo ni a nga. Josepha, a unaute chunga phuba la duh Loa chanvo ang, i unaute chanvo let hnih chu i chan phah zawk ang. Mahse, i unau i rem duh loa, in inbei reng a nih chuan, a thiam zawk ni mahla chhiatna chuan a kalsan chuang lo ang che a nga, in chhungkaw kalzel pawh chu chhungkaw tlachhe tate an sawi thin zingah intel ve hial ang.

Hawh u, unaute nen a inrem taka awm hi, Pathian thu zawmna a ni tih hi kan hriat mai bakah, malsawmna tam tak dawn theihna a ni tih hriain, unaute rem tlat zeltu i ni ang u.

(Tawngtai Dan Tur)
Lalpa, unaute inngaih taka an awmnaah hian nang chuan malsawmna nasa tak i phum a ni tih hi ka hriat renga, ka unauten ka chungah engpawh tisela, kei chuan ka rem tlat theihna turin min pui ang che, Amen. Ti ang aw. 

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.

(https://www.youtube.com/channel/UCWqdTfBg5jSoeR-nmX3UI3A)

Michaklo Chanvo Pe Duhtu Isua (Easter Pual)

"Tin, tukthuan an ei zawhin, Isuan Simon Petera hnenah chuan, “Simon, Johana fapa, hengte ai hian nangin kei mi hmangaih zawk em?” a ti a. Ani chuan a hnenah,“Aw, Lalpa; ka ngaina che tih i hria e,” a ti a. Ani chuan a hnenah, “Ka beram note chawm rawh,” a ti a."(Johana 21:15)

Isua a thia a thawh leh hnua, Petera a biak na hmasa ber chu, "hengte ai hian kei mi hmangaih em" tih a ni. Hengte a tih tak kha enge ni ang aw! kan tih a rinawm, Isuan hengte a tih kha, zirtir dangte kha a ni. (source: John Gill's leh Ellicott's commentry)

A chhanchu Petera khan, midangin phatsan vek mahsela a phat loh tur thu a hrilha, mahse vawithum a phat thunga. Isuan ama chaknaa innghat chi a ni lo tih hi hriattir a tum a nih a rinawm.

Petera ang hian, rawngbawltu tamtak hian midang aiin Isua hnaih ber leh hmangaih berin kan inhre thina, vaukama ding chu Isua a ni tih an hriat veleh pawh khan, zirtir dangte lawnga an la awm laiin, Petera chu lawng atang a zuang thlaa Isua awmna lam chu midangin an pan hmain alo pan hmasa leh a. Petera hian Isua hi a inti hmangaih em em a ni, mahse Petera hmangaihna kha a chak tawk lo, chu chu Petera pawhin a hriaa, ka ngaina a che a ti a nih kha.

Ka ngaina che Petern a ti ngam tawka, mahse kan Lalpa chuan inzir tha rawh emaw, min zui tlak i ni lo emaw a ti loa, Petera rawngbawlna tur a hrilha "ka beramte chawm rawh" a ti a nih kha.

Voinah hian, kan Lalpa chuan nang leh kei hi, "min hmangaih em" tiin min zawh theuh rualin, amah kan hmangaihnaah innghat turin min tiber loa, a nin keini min hmangaihna zawka innghat turin min duh zawka.

Tin, kan phak ang tawk tawka kan hmangaiha, a hmangaihnaa kan innghat a nih chuan, a hming avanga kan hma zawna tih tur awm apiangte chu titurin min duh a. Petera mi chak lo kha, chak lo mahsela a aiawhtua a hman duh ang chiahin, keini pawh kan awmna hmunah theuh hian chak lo mah ila, a aiawhtuah min hmang duh a ni.

(Tawngtai Dan Tur)
Lalpa, ka hmangaihna mai hi chuan a man nghet zo lo che a, chu vang chuan ka hmangaih che tih ka hriat aiin, nangin min hmangaih a ni tih hi ka hriatfiah chian zual fo theih nan min pui la. Tichuan, min hmangaih avangin, i hna thawktuah min duh a ni tih hriain, theih tawpa i rawng ka bawl theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.

(https://www.youtube.com/channel/UCWqdTfBg5jSoeR-nmX3UI3A)

Sacrament Thianghlim Hlutna (Good Friday Pual)

"Tin, an ei laiin Isuan chhang a la a, mal a sawmsak a, a phel a; tin, zirtirte hnenah chuan a pe a, "La ula, ei rawh u; hei hi ka taksa a ni," a ti a. Tin, no a la a, lawm thu a sawi a, an hnenah a pe a, "In zain in rawh u; hei hi ka thisen, sualte ngaihdam nana mi tam tak tana chhuak tur, thuthlunna chu a ni."(Matthaia 26:26-28)

Sacrament kan hriaa, sacrament a, chhang hian Isua taksa kan tana hlan leh wine hian a thisen min tlanna atana chhuak chu a entir a ni, tih hi kan hre vek tawh awm e.

Mahse, sacrament ropuina tizual bertu hi kan la hre lo maithei. Chu chu, Isua tih ang chiah chiah kan tihtheihthil tlemte te zinga mi a nihna hi a ni. 

Isua tih ang chiah chiah a bo a bang awm miah loa inang chiaha kan tih theih thil pakhat erawh a awma chu chu "tawngtai" hi a ni. Mahse, tawngtai hi chu Pathian nen a kan inkungkaina thil a ni a. Lawmthu kan sawi emaw, kan dil emaw Pathian kan bia a ni, tu nen pawh inbe tam ila inkungkaihna tha kan neih phah thin a ni. Chutiang ang chiah chuan Pathian kan biak tam, kan tawngtai tam chuan Pathian nen inkungkaihna tha kan neithei dawn a ni.

Chutih rual chuan, sacrament hi chu "thiltih phung leh tih thin (culture)" a ni thung a ni. Hei tak hi a nia, sacrament ropuina chu, Isuan culture (tihphung) alo siam kan zawm lehna a nihna tak hi.

Tunge Isua chu?

Isua chu min chhandamtu a nia, tunah chuan van Lal thuthlengah a thu a, van Lal  ram leh universe chhiar sen loh chungah leh engkim chungah ro a rel a ni. Chuan, sacrament kan theh ve hian, chu Isua van leh engkim chunga Lal culture siam chu a chhunzawm vetute kan ni tihna a ni.

A culture siam kan chhunzawm chuan, a zuitute zinga mi kan ni tihna a nih mai bakah amah nen inkungkaihna kan nei tihna a ni.

Aw! Isu nangma thu dah ngaipawimawhtute i hlamchhiah reng an awm ngai loa, i ngaihsak rengte an ni tlat zawk thin.

(Tawngtai Dan Tur)
Lalpa, sacrament thianghlim min pek avangin ka lawm e, sacrament hi i culture siam a nia, chu i culture siam zawmtu leh chhunzawmtu ka nih ve avang hian lawmthu ka hrilh a che, voin ni kan tana krossa i nun i hlanral champha Good Fridayah hian ka fak mawlh mawlh a che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.

(https://www.youtube.com/channel/UCWqdTfBg5jSoeR-nmX3UI3A)

Isua Tana Nun

"Boralte chhandam turin Mihring fapa hi a lo kal a ni reng a ni"(Matthaia 18:11)  

Kan Lalpa Isua Krista hi boralte chhandam turin alo kal a ni. Mifelte, mithianghlimte chhandam tur ni lo, misualte chhandam turin zawkin alo kal a ni.

Misual boral turte chhandam tura alo kal vang alawm misual anga kross a khaikan a nih, mifelte chhandam tura lo kal nisela chuan temple chheh velah a hun a hman zawh a rinawm. Mahse, misualte Jerusalem khawchhung pawha thi tlak ve loa an ngaihte chhandam turin alo kala, Jerusalem pawnah khenbehin a awm a nih kha.

Nang leh kei, misual boral tur a chhanchhuahte hian, kan Lalpa Isua Krista tana nun hi nge kan thlan dawn. Kan chak dan leh kan duh ang zel a nun hi?

Good Friday, Isua kan tana a thih ni champha kan thleng leh taa. Thawmhnaw dum haka in lak lunghnurte hi, kan Lalpa Isua Krista tana thinlung leh tih takzeta kan ti a nih chuan a pawi lo e. Mahse, kan Lalpa Isua Krista hian, kan hnen atanga a duh ber chu, ni khat atana thawmhnaw dum hak lam a ni lo. Thawmhnaw rawngah a buai lo, kum sang kaltaah khan a thia a tho leh tih kan hre vek. Van Lal thutthlengah tunah a thu a ni, Isua Krista hi sun ngai lo ber a ni hial awm e, a chhanchu khawvel pumpui chakna inbelh khawm ai leh khawvel pumpui hausakna inbelh khawm ai pawhin, a chaka a hauhsa bawka, chatuanin a thi dawn loa, a nung reng dawn a ni.

Chu kan Pathian, keini misual boral turte tana mualpho taka krossa khaikana nun hlan raltu chuan, engkim min thawhsak hnuah hian, amah thlang turin min la ngen ngawih ngawih a. A tan kan nitin nun leh kan hun zawng zawng hi i hlan ang u.

(Tawngtai Dan Tur)
Lalpa, kei misual boral tur hi i nun hlan ralin min chhandam avangin ka lawm e, nangmah vang chauha nung ka ni tih hi hriain, i tana ka nun zawng zawng hi a bo a bang awm loa ka hman theihna turin min pui ang che, Amen. Ti ang aw.


Midang share ve rawh le!

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)

A Tidam Duh Che a, A Chhanchhuak Duh Bawk Che

"Tin, ngai teh, a hnenah phar a lo kal a, "Lalpa, i duh chuan mi tithianghlim thei e," tiin, chibai a buk a. Tin, Isuan a han ban a, a dek a,  "Ka duh e, lo thianghlim tawh ang che,"  a ti a. Tin, chawplehchilhin a phar chu a lo thianghlim ta nghal a."(Matthaia 8:2-3)

Isuan phar a tidam duh ang chiah khan, a tidam duh che. Tin, midang pawh a tidam duh bawk a ni.

Kan tawngtaia kan damna tur emaw, kan chhungkaw zinga mi damna tur emaw, kan thiante damna tur emaw kan dil thina, "Lalpa i duh chuan i thei, i duh chuan min tidam thei" kan han tia, mahse kan dam mai si loa, khatia i duh chuan min ti damthei tia, na chunga alawm kan hawi kan hawi lai hian kan Pathian chuan, min tidam duh ngawih ngawih a ni.

Taksa damna ringawt pawh ni loin, kan rilru nate, kan eizawnna tlabalte, kan hmingchhia leh kan dinhmun tleute  zawng zawng te hi, Lalpa hian a tha zawkin a thlak duh a ni. Kan han tawngtaia, Lalpa tlem talin kan dinhmun hi ti danglam ta che, kan han ti fat fat a. Kan Pathian hian, tlem tal pawh ni loin, nasa mangkhengin kan dinhmun hi a siamtha duh asin.

Min tidam duha, dinhmun tha zawk min pe duh renga, ti nge a tih si loh? Tih hi i zawhna anih chuan, Phar natna vei pa, tihdan ang hian tih han tum ve chhin ta che.

Mosia danah chuan, Pharte hi mi awm lohna hmuna awm tur an ni, khawpawnah an awm a nga, khawpawnah pawh chuan mi bul hnaiah an awm tur a ni lo a ni. Isua hun lai pawh khan he dan hi an la hmang reng a. Tin, Isuan kha phar kha a tihdam ve leh khan, tumah hrilh lo turin a hrilh a nih kha. Tumah hrilh lo tura a tih chuan, midangin an hre ve loa, an bul hnaiah midang an awm ve lo tihna a ni. 

Mak deuh chu, phar pa hian Isua a tawng fuh thei hi a ni, phar pa hian Isua hi a zawn nasat hle a rinawm. A chhanchu mipui awmna zingah phar an awm thei si lo, tlanga mipui sangnga a hrai laite khan an tam teh lul nen phar pakhat mah an tel lo ang, a chhanchu khatiang ang punkhawmnaah khan phar an tel ve thei lo a ni. Chutiang a nih si chuan, engtin nge he phar hian Isua a hmuh fuh theih le? Ele, theih tawpin a zawng mawle!

A chang chuan, Isua khuaah alut tih thawmte a hre thin a nga, a changchuan mipuiin Isua an bawrh hut hut laite ral hla tak atangin a hmu a nga, an zinga a tel thei loh avangin lungchhe takin a thlir thin a rinawm. Mahse, damna zawng zawng neitu Krista chu a zawng zela, chutia a zawnnaah chuan Messia a nih zia pawh a chhar chhuah hial a rinawm a ni.

Phar pa in Krista a zawn ang hian zawng ila, taksa tidamtu a nihna ringawt hre loin, Messia chantuan nunna petu a nih zia pawh hi kan hmu chhuak chiang ang mawle, chu chu kan Lalpa duh ber pawh a ni.

Tin, Isua thawm leh a chanchin kan hriatna ringawtahte, rala kan hmuhna ringawtahte hian lungawi mai lo ang u, hnaih taka hmaichhana nangmah leh keimah ngei min biak hma loh chuan, Isua hi i zawng zel ang u. Tichuan damna Pathian ngei chuan, min hnaih a ni tih hi kan thinlungin a hriat hunah "Lalpa i duh chuan min ti dam thei" tia kan tawngtaina chu, chawp leh chilhin alo thawk tawh a nga. Thinlunga Krista awm chuan, "ka duh e lo dam tawh rawh" tiin min chhang a nga kan dam tawh ngei ang.

Kan thinlunga Isua kan khawih theih hma chu, damna tak tak a neih theih tak tak loh asin. Pakhtah dam mah ila a dangah kan na leh zel thin.

Damna Pathian, Krista kan thinlung chhungah a awm a ni tih chiang tur khawpin, zawng ngar ngar ila, i hnaih tal tal ang u.

(Tawngtai Dan Tur)
Lalpa, ka thinglunga ka khawih phak hial hma che chuan, damna famkim tak tak hi ka nei thei dawn lo a ni tih hi hriain, ka zawn zel theihna tur chein leh i lam ka hnaih zel teihna turin min pui la, ka thinlung hi i ta a ni, lo cheng ang che, Amen. Ti ang aw.

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)

Chakna Leh Thiltha Thlentir Theihna (Petera Leh Johana)

"Keini zawng thil kan hmuh leh kan hriatte kha sawi lovin kan awm thei lo,” an ti a."(Tirhkohte 4:20)

Petera leh Johana kha, Isua chanchin sawi tawh lo turin an hrilh a, mahse Krista hmangaihna leh thatnate, leh a hming avanga thiltihtheihna te chuan Petera leh Johana kha a chiah hneh em avangin sawi loin an awm thei lo mai pawh a ni lo ang, "an nunah pawh khan, an ti lang lo thei lo bawk ang."

Krista hmangaihna leh zirtirnate hian, Petera leh Johana a chiah hneh ang chiah hian kei ni pawh hi min chiah hnehin, min luah khat ve sela chuan, keini pawhin damlote kan tidam ve thei ang, ramhuaite hlauh kan ni ve ang, ringtute hi ramhuai zawkte hlauh ni tura thuneihna pek kan nih lai hian, a ramhuai zawkte hi kan hlau a. Krista hmangaihnaah hian kan in hnimpil lo chu a ni e!

Krista hmangaihnaa inhnimpilte chu, tlawm pawh an tum em em a ni hran lo mahse an tlawm tlat zel, Pathian thu sawi sawi an tum pawh a ni bik lo mahse sawi tur dang an hre thawh hleinem, inkhawm zanahte chaw eikhawma, khawlaia tlanchhuah vel zek zekte an chak lo a ni bik lo, mahse biak in dar ri chuan an thinlung a nghawr nghin thin tlat si. Engtin tin emaw hausak thut an chak lo a ni bik lo, mahse Krista chenchilhna nun tluka hausakna duhawm a awm lo tih an hriaa, chu nun chu hausakna dang nen an thleng phal nang lo a ni. 

Krista hmangaihnate, a zirtina leh a chanchinte hi, inchiah hneh tir ang u, zing kan tawh phat atanga kan mut thleng hian, kan hla play te, kan thu ngaihthlakte, kan flim ente, kan lehkhabu chhiarte hi, Krista lam hawi vek a nih chuan, thinlung chak leh huaisen beiseinaa khat Lalpan min pe a nga, thiltha zawk kan ti thei dawn a ni. 

Tunlaiah chuan, Krista zirtirna lam hawi flim hmuhnawm tak takte, hla nalh tak takte, sermon ngaihnawm tunlai bawk site, lehkhabu ngaihnawm tak takte a tam a, youtube a hmeh chhuah thei maite an ni awm e. Bible chhiar leh tawngtai hlam chhiah loin hengte hian i inhual ang u.

Mi thenkhat chuan, thiltha tih tur an hriaa, tihdan pawh an hria, mahse an tithei lo tlat thin, an chak tawk loh thin vang a ni. An chak tawk loh chhan chu, Krista hmangaihnaah an inchiah hneh tawk loh vang a ni fo thin. Kristaa inhnimpilte hi, an thinlung chhungah chakna nasa tak Lalpan a pe thin a ni.

Chakna leh thiltha thlentir theihna chu Kristaa nun a ni, Kristaa nung tur chuan amaha kan inchiah hneh a ngai a ni.

Tin, nungturin blog a kan thu chhiar tha kan tihte pawh hi, Krista lam hawi vek a ni, he blog awm chhan hi Krista vang a ni tih hriain, thawn dar loin i awm thei lo ve ang u, Krista chanchin tha puan darhna a ni si a.

(Tawngtai Dan Tur)
Lalpa, i thute, i chanchinte, i thatna te hi, ngawihbo pui atan chuan a ui awm a,mahse hun kha leh chen kha ka lo ngawih bo pui tawh avangin min ngaidam la, tun atang chuan i thute, i chanchinte, i hmangaihna leh thatnate hi puangchhuaktu leh nunpuitu rinawm ka nih theihna turin, nangmahah nasa taka inchhiah reng thei turin min pui ang che, Amen. Ti ang aw.

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)

A Hnena Diltute Chu Thil Tha A Pe Thin

"Chutichuan, nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo vem ni?"(Matthaia 7:11)

Pathianin thil tha min pe duh a ni, tih hi kan hriat reng a pawimawh a. 

Rawngbawltu pakhat chuan, tihian a sawia "Pathian hian thiltha min pe duha, min pe ngei thin bawka, chuvang chuan thiltha ka duh ber Pathian hnenah dil dawn ta ila, nasa taka ka dil duh reng tur leh ka dil reng ni mek chu, Min Hmangaih Zia Hriat Chian Leh Zual hi a ni" a ti.

He rawngbawltu rilru put hmang hi en ta ila, Pathian ni ta ang ila, ka hmangaihna hriat chian leh zual min dil fotu hnenah chuan, ka hmangaih zia chu ka hriat tir fo duh ang a. Tin, thil dang min dil a nih pawhin, a tana a that hun berah ka pek hmaih ngai lo ang. A rilru put hmang atang fa tha tak, rilru dik pu a ni tih hi a chian avangin.

Pathian hnena kan rilru put hi han inchhut teh ang u, amah nge thil dang kan duh? Amah nge thil dang kan ngai pawimawh tih hi, inchhut ang u.

Amah zawk kan hmangaih hmasaa, kan dah hmasa a nih phawt chuan, thil dang chu min pe sa. Tha a tih hunah, kan dawn zawh hunah min pe ang.

Amah kan dah hmasak hi chuan, a hnena kan dilte hi min pek hun tur nghah pawh hi a awl mai ni loin, a nuam hial zawk thei a ni. Kan dilte hi neithei turin, min siamtha phawt thina, chu min siamthatna process chu, nuam a tih theih (enjoyable) a ni. 

Isuan, "nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo vem ni?"a ti a. Kan Pathian engkim neitu leh dintu hnenah hian kan duhte chu i han dil teh ang u, i fa a thatna tur te, inchhungkuain Pathian lam in hawina tur te, i motor duh zawngte, i nupui pasal duh zawngte, i hna duh zawngte kha Pathian hnenah dil rawh.

Midang pan loa, Pathian hnena i dil hmasak khan Pathian i dah hmasa tihna a ni, Pathian hnenah khan beidawng loin, bang loin i duh chu dil phawt mai rawh, i dil chu nei turin i thinlung a dik tawk lo a nih pawhin amahin a siam tha thei che. Chuvang chuan, Pathian hnena kan duh leh mamawhte dil hi, kan tih ngei ngei tur a ni.

(Tawngtai Dan Tur)
Lalpa, i hnenah engkim ka dil i phal avangin ka lawm a, ka dinna min chhan thin avang pawhin ka lawm e, engkim neitu i ni tih hi ka hriat renga, ka duh leh ka mamawhte hi mihring hnena dil hmasa loin, i hnenah ka dil hmasak zel theihna turin min pui ang che, Amen. Ti ang aw.

Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che.
(https://www.youtube.com/channel/UCWqdTfBg5jSoeR-nmX3UI3A)