“Khawvelin a huat che u chuan, a huat hma che u pawhin keimah mi hua tih in hria e."(Johana 15:18)
Khawvel hian a siamtu Isua Krista ngei kha a doa, a khengbet a nih kha! Hei hian, khawvel hi tu tan pawha chawlhna hmun tur a nih loh zia a tilang chiang awm e.
Khawvelah hian, tumah nuamsa taka nun hmang tluanchhuak zak an awm loa. Pathian ngaihsak loa nun hmang thin tamtak chu, an vanglai nuam takin an hmanga rapthlak takin an nun an hmang ral thunga. Pathian neitute lah an rinna avangin nasa takin an tuar thin a, mahse an tawrhna chhungah chuan Pathianin a Thlarauin a chenchilha chawl chungin an kal thei thin a ni. Khawvel hian, amah (khawvel) ngainatute ngei ngei pawh a tawihral tir thin a, Krista hnungzuitute phei chu a huatin a hua a ni.
Isua Krista duhzawng tih tumin eng emaw tih i tum apiangin, nangmahah khan eng emawin a bei nghal ang che. Hei vang hian lawm tawngtai leh bible chhiar mai pawh hi har kan tih thin em em ni. Mahni inhnehin, a takin thiltha ti ta la, haw ringawttu che emaw, ngaithei lo ringawttu che i nei nghal ang.
Hei hi khawvel nih phung a ni, mahse Krista avang chuan bei zel ang che. Krista ngei pawh khan, min chhandamna turin krossah khan a nun zawng zawng a hlan rala, muapho taka khai kan a nih kha. Chungte chu, a tawrh zawh hnuah chuan, a thia a tho leha, vanah Pa dinglamah a han thu a, chhunzan zawmin angil chhiar sen loh ten an fak taa. Chu mai chu ala ni lo, thuneihna zawng zawng a kutah a awma, amah avanga tuarte chu lawmman a pe thin a ni.
Petera ngei pawh kha, Krista hnungzuiin khenbeh a ni a, mahse kalsan a ni lo, Krista chu khenbeh a nih lai khan kalsan a nia. Mahse, amah avanga tuarte chu van Lal thutthlenga thu khian a kalsan ngai lo a ni, Petera kha khenbeh a nih lai khan thlamuannain a khat a ni tiin zirmite chuan an sawia. Stephana pawh kha lunga an den lai khan, a thla a muang hle ni tur a ni, amah dengtute tan a tawngtai saka, van Lal thutthlenga Isua Krista thu chu a han hmu a ni. Ni e, Stephana khan a han hmu reng ang chu! Amah avanga tuarte hi kan Pathian hian a ngaihthah ngai si loa.
Harsa mahse, Krista avangin thiltha tizel ang u, khawvelin min do mahse, Krista tana nun hi i sim lo ang u. Anin min ngaihsak reng a, kan tawrh laiin malin min kalsan ngai loa. Tin, kan khawvel ni a kin hunah vanah, kan tana lawmman min buatsaihsak chu min hlan dawn a ni.
(Tawngtai Dan Tur)
Lalpa, khawvel hian i hnung zuitute hi min huat hma pawhin nang chu a haw tawh chea, a do tawh che a. Chuvang chuan i hnung ka zui avanga harsatna ka tawhte hian, ka chunga thleng chu i hrethiama, min kalsan ngai loa, malin min awm tir ngai lo a ni tih hi hre rengin, i tana tuar ngam zel turin min pui ang che, Amen. Ti ang aw.
Follow tih a hnuaia inziakah khuan i click dawn nia.
No comments:
Post a Comment