"Nangnin mi thlang lo, keiman ka thlang zawk che u a, va rah tur leh in rah awm reng turin ka ruat bawk a che u; ka hminga Pa hnena in dil apiang a pekna tur che u in."(Johana 15:16)
Mi thenkhat chuan "Pathian thlan bik ka ni emaw, Pathian thlan bik a ni" an ti thina. Kan zavai mai hian ringtute hi Pathianin eng emaw tak ti tura a thlan bik vek te kan ni. Rawngbawlna hrang hrang hi a tam em em a, chhungkua, khawtlang, sorkar office leh company office ah te, huan leh lo neihnaah te etc. Rawngbawlna rilru puin mi kawngkian ringawt pawh ni ila, rawngbawltu kan ni ti ila kan saiw sual awm lo e.
Kan Pathian hian, khawiah pawh hian a hmel tilangtu tur a duha, chutianga kan awmna hmun apainga a hmel tilangtu tur leh rah chhuah turin nang leh kei hi min thlang a ni. Johana 15:16 hi zirtir 12 te hnena a thusawi niin a hriata, zirtir 12 te kha a thlan vek an ni a, chu a thlanna chu zirtirte khan an hnawl theia, mahse hnawl loin an zuia, Juda Iskariota erawhin hun rei tak a zui hnuah a phat taa, a tawp dan pawh kan hre vek awm e.
Pathianin, mizo hnama min pian tir chhante, nu leh pa kan pian chhuahna kher khera kan pian chhante, kan chenna venga kan awm chhante, kan lehkha zirna hmuna kan zir chhante, kan thian kawm mekte nena min in tawn tir chhante, tuna kan hna kher kher kan thawh chhante hi,"A tana rah kan chhuahna tur vek" a ni. He min kohna theuh hi chhang ila, kan Pathian tan hian rah i chhuah ang u, a kohna hnawltute dinhmun rapthlak zia te pawh hi kan theihnghilh loh a pawimawh awm e.
Chu a kohna chhangtute chuan, Pathian hnena an dilte chu an hmu thina, Pathianin hun a tihah, an duhnate a hnena an dil chu a tih hlawhtlin sak zel thin a ni.
(Tawngtai Dan Tur)
Lalpa, nang chuan ka pian hma daihin min thlang tawha, ka hmangaih ka fa, ka tana rah chhuak tura ka thlan tiin ka chungchang hi ilo sawi tawh avangin ka lawm e. Min koh chhan hi tih hlawhtlin ka duha, min pui ang che, Amen. Ti ang aw.
Follow tih a hnuaia inziakah khuan i click dawn nia.
No comments:
Post a Comment