Insiamthate Tan Thiltha Reng A Ui Lo

"Mi tinin an awm dan sual kalsanin an ngaithla mial mahna, an thiltih sual avanga an chunga thil tha lo tih ka tum chu ka lamlet theih nan."(Jeremia 26:3)

Pathianin, Jeremia hnenah Juda mite hnenah thu sawi tura ka tih che hi, va sawi la, tichuan an zawm chuan ka hrem lo thei a nga a tia.

Kan Pathian hi ngilneihnaa khat ava ni teh lul em! Kan tunlai khawvel hi Jeremia te hun lai nen khan a inan chiah lohna a awm a nga, a chhanchu Isua Krista'n min chhandam vang a ni. Mahse, chhandamna kan chanhnuah pawh hian sualah a tluk theiha, chutianga sual kan tluk chuan Pathianin min hrem pawh nikher loin, sual hian natna ken tel hi a nei ngei ngei thina, "sual hi a lang mawi ringawta hnaih chilh erawh chuan natna hlir a ni"ti ila kan sawi sual lo ang.

Chutih lai chuan, "Pathian duh ang a nun hman hi nuam awm angin a lang loa, mahse belhchian tak tak chuan hlimna leh lawmna hlir a ni thung." Kan sawi ngaiah han let leh ta ila, Pathian chuan "kan sual tih thinte, kan sual tih laite kan sim pawt chuan, sualin natna leh hreawmna a kentel thinte lakah, min chhanchhuak duh a, min chhanchhuak turin a inpeih reng bawk a ni."

Rawngbawltu then khat tisual ve te pawh an awm a, tunlai kan khawvela rawngbawltu ropui tak pakhat Benny Hinn pawh hian talbuai lai a nei a ni. A faten khawvel lam kawng an zawha, an nupa an inthena, an inthen hnu reiloteah chuan, a ni pawhin ngaihzawng a nei a. Mahse, hun engemaw hnuah a insiam thaa, nasa zawkin a fate a ngaihsaka, a nupui nen an innei tha leh bawka, a hma zawng aiin a rawngbawlna pawhin hna a thawk nasa zawk a ni.

Benny Hinn hi, insiam tha lo sela chuan, fa sual a nei a nga, nupui dang a nei bawk a nga, a rawngbawlna pawh a tlachhe maithei a ni. Mahse a insiam thaa, fa Krista hmu thartu a neia, nupa kar hrisel khawvelin a awh hial an nei a, tin rawngbawlna nung zawk pawh an neih phah ta a ni.

Hawh u, insiam that i hreh lo ang u, kan insiam that chuan kan hmaah thil tha hlirin min hmuak asin.

(Tawngtai Dan Tur)
Lalpa, ka chungah i zahngaihna engtik lai pawha i lan tir avangin ka lawm e, sual hawisana i tana nun siamtha lehtute tan chuan thiltha i ui ngai lo tih hre rengin, ka tluk dawn pawha i lam enchunga ka insiamthat zel theihna turin min pui ang che, Amen. Ti ang aw.

Follow tih a hnuaia inziakah khuan i click dawn nia.