"Tin, Marin buk zatve spiknard hriak rimtui to tak a rawn keng a, Isua kete a chulh a, a samin a kete chu a hru a; tichuan chu hriak rim chuan in chu a khat ta rum rum a."(Johana 12:3)
I neih that ber kha Lalpa Isua Krista hnena i hla khan, a ni chuan rimtui a ti a, hlu ti takin a pawm thin a ni.
Hman lai chuan, hriak leh rimtuite hi an hlut em em maia, rangkachak tluk hialin an ngai ti ila kan sawi sual thui awm lo e. Mari chuan a neih ang angin hriak manto leh hlu em em spiknard a lei a ni ngei tur a ni, chu chuan Isua a chulha, midangin an han sawisel pawh khan, Isuan Mari thlavang a hauh tlat a ni. Mari hian a theih tawp a chhuah a ni tih a hriaa, Isuan a hlut lo phal lo a ni.
Hetiang ang chiah hian i neih hlut ber, i hunte, i pawisate, i thate, i thiamnate, i faknate, i awkate.etc, kan Lalpa hnena i hlan chuan, ani chu van Lal thutlenga thua engkim neitu nimahsela, a tana i neih hlut ber i hlan chu a hlut em em ang tih hi kan hriat reng a pawimawh a. Tin, chung kan thiltih a hnena kan neih that ber kan hlan chu lo ngaitheilo an awm a nih chuan anin kan thlavang min hauh sak dawn a ni.
Hawh u, kan neih that ber hi, Lalpa hnenah i hlan zel ang u, anin min lo pawmsak dawn sia.
(Tawngtai Dan Tur)
Lalpa, nang chu van Lal thutlengah i thua engkim i neia, i thu hnuaiah engkim a awm bawka, ka neih engmah hi mamawh lo mahla, ka neih hlu ber i hnena ka rawn hlan chuan nangin min lo ngaihhlut sak duh thina, rimtuiah min lo pawmsak duh thin a ni, tih hi ka hriat renga, i hnenah phur takin ka neih hlu ber ka hlan zel theihna turin min tanpui ang che, Amen. Ti ang aw.
Follow tih a hnuaia inziakah khuan i click dawn nia.
No comments:
Post a Comment