Thlamuanna Danglam Bik

“Thlamuanna ka hnutchhiah a che u; keima thlamuanna ka pe a che u; khawvelin a pek angin ka pek loh che u hi. In thinlung mangang suh se, hlauh pawh hlau suh se."(Johana 14:27)

Pathian atanga thlamuanna hi chu a danglam a ni.

Khawvel hian thlamuanna a nei a heng, kan pawisate, kan motorte, kan inte, kan eizawnnate pawh a nithei e, a then tan chuan kan nupui leh kan pasalte leh kan bialpa leh bialnute pawh a ni thei bawk awm e.

Khawvela kan thlamuan chhante hi an hoh zia mai chu, khawvel mihausa kan mizoram kumkhat budget let hial nei khawpa hausa, Billionaire te pawh tlachhe ve tak tak an tam mai a, kumtin thlachhe fithla thak an awm ang. Sum hi a ral vek theia, kan sum neihte hi ral lo mahsela a mihring zawka hi kan ral thei a.

Nungturin chhiartute zingah hian, Motor vanga thlamuang em chu kan awm ka ring loa, motor pheihi chu thlamuan puichi a ni lo khawp mai, kum 3 maiah hian motor hlutna hi nasa takin a tlahniam thina. Tin, kan in leh lote vanga thlamuang kan nih chuan, kan thlamuanna chu a awm ang ve viau a ni, mahse zankhat thilthua in leh lo kang ral thak ta te, leiin a chhilhbo tak daihte, chim chhe ta maite pawh hriat tur an tama, kan in leh lote pawh innghahna tlak chhiah chu a ni lo awm e.

Tin, mihring hrim hrima innghah hi a chi in a chi loh a, kan nu kan pa, kan nupui kan pasal, kan fapa fel takte, kan unau puitling takte leh kan ngaihzawngte hi, thithut thei vek an ni, chubakah natna benvawn vei thei vek an ni bawk.

Khawvelah hian, thlamuanna chhan atana innghahna tur nghet tha reng reng hi alo awm hauh lo a ni. Khawvela innghatte chu, a tawp a tawpah chuan ka lo tisual a ni tiin an inchhir leh nge nge thina, mithenkhat phei chu an beisei angin an nun a inher leh tak si loh avangin, baihvai takin an nun an hman phah thin a ni.

Pathiana innghatte chuan, an derdep zia leh khawvel a thil awm zawng zawng hi innghahna tlak a nih loh zia an hre reng thin a. Pathian enin an nun an hmang thin, Isua Krista ngei pawh khan "keima thlamuanna ka pe a che u; khawvelin a pek angin ka pek loh che u hi" a tia. Ni e, Pathian  thlamuanna hi chu a danglam a ni, Pathian thlamuanna chhangtute chu an thih a hnai tawlh tawlha an thla a muang tawlh tawlh thin. Tin, Pathian thlamuanna chhangtute chu, an hrisel that aleh thlamuang takin an nun an hmanga, a hriselna a that loh pawhin an tawpna chu van in a ni tho tho dawn tih an hriat avangin, thlamuang takin an nun an hmang tho thin.

Khawvela thlamuanna zawngtute huphurh ber, thihna pawh hi, Pathian neitu Pathian thlamuanna changtu tan chuan, thilchak awm ber a ni hial sia.

Lalpa thlamuanna chu i chang ve tawh em? I la chang lo a nih chuan theih tawpin zawng ang che.

(Tawngtai Dan Tur)
Lalpa, khawvelin a pek phak loh khawpa thuk leh nasain, i thlamuanna chu min pea, i thlamuanna'in min tuam thin a, lawmthu ka hrilh a che. Midangten he i thlamuanna hi an chan ve theihna turin, i chanchintha puangtu rinawm ka nih theih nan min pui ang che, Amen. Ti ang aw.

Follow tih a hnuai inziakah khuan i click dawn nia.