Lalpa Dana Lawmte Chu, Chhungkaw Tha Ber Dinpui Tur An Hmu Thin

"I dan chu ka lawmna ni suh sela chuan, ka hrehawmnaah khan ka boral tawh tûr a ni."(Sam 119:92)  

Pathian duh dan tluantling taka nupui pasal neih hi, mihring tan beih ve viau a ngai thina. Mahse, Pathian nen erawh a theih hle thunga.

Pathian duh dan puitling kan tih hian, thianghlim taka nupui pasal neih a ni satliah loa. Inngaihzawn laia, rawngbawlna pakhat mah kalsan loa, inneih thlenga inkawp chhohna a ni zawka.

Chutianga inneihthlenga rawngbawlna tlanbo san hauh loa inkawp chhoh chu har pawh a hara. Mahse, chutiang mi inneite chu, an buai ve mai mai ngai lo a, kum sawmhnih sawmthum lai an inneihhnuah pawh hlim takin an awm thei thina. Pathian rawng an bawl chhunzawm zela, tin chu mai pawh chu ni loin rawngbawltu fa an nei thina, rawngbawltu chhungkua, Kristian chhungkaw dik tak chu an din chhuak thin a ni.

Chutianga, nupui pasal neih dawn chuan Lalpa dana lawm a ngai a. Lalpa dana lawmte chu, Lalpa thu an zawm avangin chan mahsela, Lalpa dan, a thu an zawm avangin an lawm zawk em em thina. Chu chuan midang baka vanneihna dinhmunah chuan a hlangkai thin a ni.

An inneih hnuah inhauh pawh an nei ve ang, mahse an inngaidam tawn leh thei thin a. Eizawnnaah pawh buaina an tawk ve thin a, mahse chung an harsatnate chu Lalpa chaknain a uap tlat tawh avangin an paltlang leh zel thei thin a ni.

Keini pawh, kan ngaihzawngte nena, a nuam suah suah ringawt thlahlel loin, Lalpa dan hi kan lawmna zawk leh kan duh ber zawk ni rawhse, tichuan chhungkaw hlawhtling kan din ngei ang. Tin, chhungkua bul kan lo tan dik lo a nih pawhin, bul tan thatna hun ala tlai lo. Kan pasalte leh kan nupuite duatna leh ngaihsakna ai hian, Lalpa dan zawk hi kan nupa tum ber a nih chuan, kan nupa kar chu a fel sa a ni. I nupui emaw i pasalin emaw Lalpa dana lawm nachang a hriat loh pawhin, nangmah khan bul han tan teh leh. I bialnu emaw i bial pa in emaw, Lalpa dana lawm nachang ala hre lo a nih pawhin nangmah khan bul tan rawh le.

Lalpa dan zawk hi, i ngaihpawimawh tlat chuan, Lalpan a dana lawm thin mi i kawppui atan a pe ve ang che. Tichuan, kristian chhungkua, chhungkua zawng zawng zinga ropui bik chu, i ta a ni dawn a ni.

(Tawngtai Dan Tur)
Lalpa, thil dang zawng aiin i dan zawm hi ka chak ber leh ka duh ber leh ka lawmna ber a nih theihna turin min pui la, chu nun chu nei chungin i duh ang chhungkua chu ka din theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.