Nangmah Kha Lalpaah Inhneh hmasa ang che.

"Lawm fo ula; bang lovin tawngtai ula; engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a."(I-Thessalonika 5:16-18)

Lalpa kan neih avangin kan lawm em?

Bang loin Lalpa hnenah kan tawngtai em?

Engkimah Lalpa hnenah lawmthu kan sawi em?

He mi pathum hi Pathian duh zawng ani tlat bawk si a, thil awlsam chu ani lo a, tih reng pawh a har ang, mahse theih chu a theih ani. Nang leh kei hian kan tum thei a, kan tum thin chuan kan ti fo thin ngei ang.

Lalpa neih avanga lawm nachang hi hriat loh a awl hle a, Lalpa nei lo a nun pum hman chu a rapthlak tur zia ngaihtuah hian, Lalpa kan neih hi a lawmawm zia a lang thin. Lalpa nei lo ta ila, sual tih chakna kan neih apiang a, Lalpa'n min chenchilh vanga tilo tura a aw kan thinlunga min be thintu hi awm lo se, sual kan hmuh phak apiang ti thin ta ila, kan chan ava chhe dawn em. 

Thinrim huna insum tura min hrilh a min awmpui thin tu Lalpa hi awm lo se, tual te hi kan that remrum lo ang maw! Mangan niah tanpuitu hnai reng ala ni leh zel nen, Lalpa kan nei hi ava lawmawm tak em.

Bang lo a tawngtai mite chan that thin zia hi ngaihtuah thin ila, an nun ngheh thin zia te, Lalpa a chakna an neih tlat zia te, an nun a tluan tlat thin zia te hi ngaihtuah thin ila, tawngtai nunah min hruai lut ang. Tawngtai hi hun serh emaw, hun zahawm bik kan hmang tihna ani ber lo a, Lalpa nen a INKUNGKAIHNA kan neihna tur zawk ani. Lalpa nen Inkungkaihna siam dan chu "Bang lo a Tawngtai hi ani."

Engkima lawmthu sawi hi, a theih a, mahse a awl lo thung a. Mahse, tihian ngaihtuah ang o, hmana kan thil duh deuh kan neih theih loh avang khan kan nun hian hma a sawn zawk em? Harsatna kan duh ngai reng reng loh kan tawn avangin, mi Fing zawk leh Fel zawkah kan chhuak ta thin ani tiro. Lalpa min hruaina anih phawt chuan, kan hun tawn engkim hi Lawmthu sawina vek tur alo ni.

Heng pathum te hi mahni leh mahni kan in hneh theih nan kan tih thin a tul ani.

Mahni In Hnehtu Chuan Midang Pawh A Hneh Thei Thin.

Petera khan amah leh amah a in henh hnuah khan, mihring a man thei ta ani.

Kawng dika hruai turin, I Kawppui emaw, I Chhungkua emaw, I Hna thawhpui emaw, I Rawngbawl pui te emaw i hneh duh chuan, Nangmah Kha Lalpaah Inhneh hmasa ang che.

Lalpa'n a Pui Duh Che

"Pathian chu kan inhumhimhna leh kan chakna, Mangan laia tanpui vartu hnai reng a ni."(Sam 46:1)

Kan mangan lai a kan tih sual lian ber chu, keimahniin kan harsatna te chu, kan siamtha thei emaw kan inti tlat thin hi ani.

Kan chetsualna emaw, kan buaina emaw siamthat kan tum a, kan han che tak tak thin hi chu, a tir a kan chetsualna leh kan buaina kha kan ti buaichuar zo vek thin a, kan tizual zawk mah thin anih hi maw!

Buaina kan tawh ve leh hian, Lei leh Van siamtu, kan lei ai a let maktaduai tela lian arsi chhiarsen loh siamtu, LALPA hi min pui turin ngen vat thin ila chuan, engkim hi min chinfel sak vat mai tur ani a. Khawvel mi zawng zawng buaina belh khawm pawh hi Lalpa tan chuan, chin fel awl tak ani a, kan Lal Ropui ber Lalpa hian second khat pawh tlingloah a ching fel vek thei ani.

Kan innghahna thu ziaktu phei hi chuan, Lalpa chakna a hre chiang em em a, Lalpa chakna ah a innghah em avangin "Tlangte hi tuifinriat chhûng daihah insawn mah sela kan hlau lo vang."(Sam 46:2b) ala ti deuh deuh a.

I Buaina Leh Ka Buaina hi, Lalpa hian a siam tha hnehsawh rep rep em.

"Mahse, buaithlak ber chu, Lalpa Hmaah Hian A Puihna Dawng Thei Turin, INNGAITLAWM TAK LEH THINLUNG IN HAWNG TAKA, tluk luh hi har kan ti thin hi ani."

Harsatna leh Buaina kan tawh apiangin.

Lalpa Min Pui Rawh I Tel Lo Chuan Ka Ti Theilo Ani.

Ti thuai thin ang O!

(Sam 46 na hi lo chhiar chhuak hram la, maimit chhing chungin lo ngaihtuah ang che.)

Mahni chauh pawha him taka mi awmtir thin hi ni.

"Thlamuang takin ka mu ang a, ka muhil bawk ang: LALPA, nangmah ngei hi a ni, mahni chauh pawha him taka mi awmtir thin hi ni."(Sam 4:8)

Mihring hian mahni chauhva awm a, ngaihtuahna sawr bing vak chang kan nei a, chu kan ngaihtuahna kan sawr bingna ah chuan "Kan Vanduai Zia te, Kan Phur a Rit Zia te, Miten Min Eilo/Ngaitheilo a Inhriatna ah te kan lut a. A chang chuan duhthusam thleng lo tur, a ruai khawpin kan sam bawk a." 

Chu bakah mahni Inngaihpawimawhna ah min luhtir thin a, Tiang khan ka awm a min en sang ve deuh tawh ka ring tih ten kan ngaihtuah a, Anni ai ka thiam zawk a mi fak hlawh ka phu tih te, Hetianga ka awm chuan miin min en sang ngei ngei ang tih te. Mahni Inngaihpawimawhna hi ze tha lo ani a, mi zahawm lo berah min siamtu ani thei a, a nasat phei chuan Depression hial pawh a thlen thei ani.

Mahni a, kan awm chuan Kan ngaihtuahna a kal dik lo duh a, kan chhehvelah thil che miah lo che tlat te in kan hria a, Kan taksa tha pangngai vek kha thaw kan a ipik tlat ten kan in hria a, Hlauhawn a awm tlat ten kan in hria a. Keimah ni chauh a awm hi a buaithlak thei viau ani.

Mahni chauha kan awm hian kan rilru kan sawr bing a, kan ngaihtuahna kan kawm thin a, chutiang mi kan nih tawh phei chuan, zan mutthilh a har em em a, kan za huai huai bawk a.

Sam 4:8 ziaktu Davida hi mahni a awm that lohna hri chi hrang hrangin a bei ve pawh animahna, tin an hun lai lal te kha, an dinhmun a san em avang khan an kiangah thinlung taka pawh ngamtu an awm loh vangin mal takin an awm ve thei ani, an fate leh an nupui te thlengin lal hi an hnaih mai mai lo bawk nen.

Mahse, Davida hi chuan mahni a awm hi, Lalpa vangin a hneh ani. Mahni a, a awm chu Lalpa'n a awmpui tlat vangin a him ani.

I rilru hah benvawn(buai reng), Hlauh i neih tlatna te, Mal tlata i inhriatna te, midang pha theilo leh phak theilo tlat a i inhriatna te, I nun buai tlat a i in hriatna te.

Mahni chauha i awm a Tibuai thintu zawng zawng che khan. ISUA AN NGAM LO.

I hlauhna te, i rilru hahna te, hniam riau a in hritna te khan, an rawn biak leh hun ah che chuan, Isua Chanchin Lo Hrilh Vak la, an biak rei peih che ka ring lo. Isua hi an hlau lutuk, an rawn lan hun ah, Isua hming vawi 10 vel lo sawi ziah la an kal bo daih zel ang.

Lal Isua nen Inkungkaihna tak tak i neih theih nan Tawngtai tlat la, Bible chhiar leh Inkhawm thlahdah lo bawk la!

Mahni chauh pawhin i Thla a Muang a nga, chu mai bakah, mahni chauh a i awm laiin Lalpa'n A Rawn Be Thin Ang che

Pathian Thu I Zawm Theih Nan

"I thu hi ka ke atânte hian khawnvar a ni a, Ka kawng atân eng a ni." (Sam 119:105)

Pathian tih hi finna bul ani, kan Bible chuan a ti a, a dik lo tu mahin kan tih ka ring lo.

Pathian chu kan tih dawn chuan a THU kan hriat a ngai ani, a thu kan hriat loh chuan tih dan kan hre tam lo khawp ang.

Entirnan, Naupangin a pa thu zawm a duh a, mahse a pa thu a pa thusawi engmah a hrelo a, a hriat loh miau avangin a pa thu zawm duh mahse zawm ngaihna a tan a awm lo ani.

Keini pawh Pathian thu kan zawm dawn chuan a thu kan hriat a ngai ani. Tunlai a kan thu sawi duh dan pawi deuh chu, "ka Pathian thu hriat sa pawh ka zawm theilo a, hriat belh ai chuan zawm a pawimawh" ti zawng hian thu hi hriat tur a awm thin a, a atthlak ani.

Pathian thu tum ber hi, Thusawm pek (Dan) min zawm tir lam ani ber lo a, a tum ber zawk chu "Kan Lalpa Isua Krista Thisena Min Tlanna Zara Khawngaihna Vanga Chhandam Kan Nih Na" min hriattir a min kawh hmuh a tum ber ani. 

Isua chuan, Dan i zawm theih loh ang ang leh I tisual thin ang ang khan rawn kal rawh ka lo pawm ang che min ti zawk ani.

Sual mah ila, kan sual ang ang a, Isua kan zui tlat chuan, kan felna ah khawngiahna avangin pawmsak kan ni zawk ngei ang.

Pathian thu hi kan nun kawng engkim kan hmuh fiah theih nan a kan Khawnvar leh Eng pawimawh ber a ni a. Nun dan engkim a thiam taka kan nun theih nan a min hruaitu tha tak ani, Harstana tawpah leh Hlimna ah pawh nun dan kan thiam theih nan, chung hun a nun dan tur min kawhhmuh a. Sual kalsan dan tur leh Thil tha tih dan tur min zirtir bawk ani.

Lalpa kan hmuh fiah nan pawh, Pathian thu lo chu hmanrua a awm lo ani.







    

Lalpa Thlan te

"Nangnin mi thlang lo, keiman ka thlang zawk che u a, va rah tur leh in rah awm reng turin ka ruat bawk a che u; ka hminga Pa hnena in dil apiang a pekna tur che u in."(Johana 15:16)

Pathian ring em em tu, an nun zawng zawng a, Lalpa tih tute chawimawina leh dinhmun tha an chang hian, Lalpa a thlang bawk a Lalpa'n a malsawm anih hi, a chawimawi anih hi te kan ti thin a. Dik pawh a dik alawm, sual kawng thlan tur leh awlsam zawk, nawm hmel zawk thlang loin Lalpa leh a kawng an thlang ve bawk a.

Mahse, chutianga Lalpa an thlan theihna tur chuan Lalpa'n alo thlang hmasa fel der tawh zawk alo ni. Lalpa hian min Hmangaih hmasa a, min thlang hmasa ani, chu min lo thlan hmasak avang chuan, min thlanna chu kan phak tawk a ama thu zawmin kan thlang let ve mai zawk ani a.

Mihring hi kan chak lohna a thuk em avangin, chu kan thlan let ve na pawh chu, tawp chin nei lo a hmangaihna vangin min pawm sak a, chu a hmangaihna vang chuan kan thlanna beitham tak chu amah kan thlanna tlingah min pawm sak ani. 

Kan thlan let ve na beitham tak a kan thlang let ve anih chuan, anin kan tan "THIL THA A UI LO" leh zel bawk a. "Pathian thatna a khat, hmangaihna leh khawngaihna ngah chu ava ni tak em."

Ti hian zawhna i nei em? Mi chu Lalpa'n a thlang a, Lalpa an thlang let bawk a, kei chu Lalpa lam kala hawi ngai lo a, min thlang lo ang a i ti em?

Anih loh pawhin, ka thlanga mahse kasual lo tih tawh mi pawhin an hriat loh hian min hliam tlat a, Lalpa thlan duhmah ila, ka ngam lo ani i ti em?

Hei hi hria ang O! "KAN AWM ANG ANG A, KAN THLANNA HI TLINGAH MIN PAWM SAK THIN ANI."

Thlan ve loh emaw i in ti mo! "THLAN LOH A NEI LO, MIN THLANG VEK ASIN."

He min thlan hmasakna a tawp thleng a chhang let lo a, hnawl tute chauh chu, hremhmunah an tawp ang.

Lalpa thlang turin hun tha kan neih hi tiro! Tuna Kan Awm Ang Ang Hian Lalpa Thlang Ang o. Min hnawl dawn silo a.

A Dinglama Misual an khen beh, Sualna tinreng ti thin kha, Vawikhat a hun tawpah  Lalpa a thlang a, Isua'n ala pawm duh anih kha. 

Kha misual kha ala pawm duh anih chuan "Kei Leh Nang A Tan A Nun Theina Hun Nei Te Hi Min Pawm Duh Reng" ngei ani.

ISUA HLOH HI A HLAUH AWM ZAWK

"Sakhi, luite tui chaka a thaw huam huam ang hian, Aw Pathian, ka nunna hi nangmah chakin a thaw huam huam a ni."(Sam 42:1)

Lalpa chaka tuihal te hi an hlawhchham ngailo, Lalpa kal phungah chu chu ani tlat. Amah hnaih tura hmala chu a hawisan ngailo ani, Tihtakzet erawh a ngai ngei a. Kross a, a ding lama an khenbeh kha, a dam chhungin vawikhat chiah Isua a thlang a, chu chu van ram a thlen phah a, amah thlangtu hnawl hi kan Pathian kalphung ani lo ani.

Mi hlawhchham, a tum ngai vawi eng emawh zah a beihnawn hnu ah pawh hlawhchham zel pakhat chuan " Ka Hlawhchham a, na ka ti, awm ngaihna ka hrelo, mi ka hmu ngam bawk silo. Ka mangang chu ka tawngtai ka tawngtai a, Lalpa ka ngai ngawih ngawih a, Lalpa nen inpawhna tak tak ka neih phah ta a, chu ka hlawhchhamna chu Lalpa nen inpawhna min neih tirtu anih vangin, KA HLAWHTLINNA ROPUI BER ANI," a ti.

Lalpa min CHAK tirtu leh min NGAIH tirtu anih chuan, kan rilru pawh na se, kan tum pawh hlawhchham ila, chhungkuaah rui buai pawh awm se, mi duh loh leh hnawl pawh ni ila, ei zawnna ah pawh harsain talbuai ila, hriselna pawh chan ila, a pawi chhe te aih lo! ROHLU BER ISUA MIN NEIH TIR TAK TAK TU ANI CHUAN.

Khawvel leh van thil zawngte hlutna let tamtak a hlu, "ISUA HLOH HI A HLAUH AWM ZAWK" si a.

"ROHLU BER ISUA NEN INPAWHNA TAK MIN NEIH TIRTU ANIH CHUAN" a pawi kan ti phal dawn em ni? 

Tawngtai tlat ang che.

"LALPA chuan a kotu zawng zawngte chu a hnaih thin a. Tih tak zeta amah kotu zawng zawngte chu."(Sam 145:18)

Lalpa kotu, a hnen a tawngtai tlattu, amah ngaitu, i ni em? 

Lalpa, engkim siamtu, arisi kan lei ai a let maktaduai fe a lian chhiar sen loh siamtu, Lalpa'n kan lei a thil a dah zo zai te hi, mihring hian kan la chhui chhuak phalo nasa em em a, chung arsi pakhat ringawt chhungah pawh chuan thil engzat tak awm ang maw! Chung arsi lian em em te chu an tam em em a mihring te hian kan chhiar seng lo hial a, chung zawng zawng te leh engkim siamtu chuan, ka "KO A" min hnaih duh anih chuan ka "KO KHAWP ANG."

Lalpa ko tih hian, Lalpa ka ko a che, Lalpa tih tih lam ani lo a, kan nitin nun a kan huntawn zela amah TAWNGTAIA  kan rawn thin hi ani a. 

Tin, kan Ko na ah chuan kan "Mamawh leh Duhte" kan la thlen thei bawk ani. Mi vannei kan va ni em, chutiang a mamawh leh duh thlen thintu min hnaih duh chu!

Tichuan, a hnena dilna thlen thintu chu ala pe thin bawk ani. He ham thatna hi bawhpelh phal chi ani lo ani.

I TAWNGTAI KHAN LALPA'N A HNAIH CHE.

Tawngtai tlat ang che.

Rohlu ber Isua

"Chuvangin, Pathian Lehkha Thuah chuan, “Ngai teh u,Zionah chuan a kila lung pawimawh ber, thlan, hlu tak ka rem a ni; Amah ringtu chu a mualpho lo vang,” tih a chuang a ni."(I-Petera 2:6)

Isua hi a hlu ani, entawn tura min hnutchhiah a nun te hi kan phak ang tawk tawk tam lo tak pawh hi entawn ta ila, kan entawnna hmun bik ah chuan kan chak phah bakah kan hlawhtlin phah ang.

Tin, a zirtirna ropui em em chu zawm ta ila, mihring chak lo hian zawm tam theilo mah ila kan zawm phak ang tawk tawk chu zawng ta ila kan zawmna hmunah chuan kan dinchhuah phah hial ang. A zirtirna pakhat "Remna siamtute chu an eng a thawl e; Pathian faa vuahin an la awm dawn si a."(Mat 5:9), te hi zawm ta ila, kan chhungkuaah emaw, nupa karah pawh, thianho karah pawh, thenawm khawvengah pawh Isua zirtirna anih vangin, remna kan phak ang tawk tawkin siam ta ila. Mi zahawm leh pa rawn kan nih phah thei ang, mi rem tlat emaw, min rem tlattu te hi chu kan haw thei lo a, kan hnawl hleithei lo anih hi!

Kila lung pawimawh hi, lung riang tak, midang duh miah loh mahse a ruka tangkai tlat sawi na ani ber lo a, a awmzai tak chu in sak anih dawn in, lung nghet takin an phun a tah chuan ban zawng zawng a innghat thin, chutiang taka nget leh chang ani thin. A sap tawng chuan Corner Stone an ti a, tunlai mithiamte pawhin in an sakna ah hmun eng emaw lai takah, ban zawng zawng innghahna lai tur, hmun sakhat deuh chu an la siam thin awm e.

Chutiang ang taka pawimawh leh kan Bible in a tir atang, a thlir leh phawk chhuah a tum ngar ngar, a innghahna lungpui, "Isua Krista a innghat chu an Mualpho lo vang," 

Kan hnathawhna ah te, kan zirna hmunah te, kan chhungkua kan engkawlna ah te, kohhran leh khawtlang a kan telna ah pawh, kan "INNGHAHNA Isua Krista anih chuan kan mualpho lo vang."

Mi Huaisen ISUA KRISTA Hmanrua

"Tin, Isuan, "Ka Pa, anni hi ngaidam rawh; an thiltih hi an hre lo a nih hi," a ti a. Tin, a silhfente chu an insemin thum an vawr a."(Luka 23:34)

Kan Lalpa Isua ralthuam kha, Hmangaihna leh Ngaihdamna ani a, chu ralthuam tluka chak reng reng a awm lo ani.

Isua kha an sawisa nasa em em a, Vuakna hliamin a khat a, a lu ah Hlinglukhum an khum tir bawk a, kross ah saruakin an Khengbet a mipui hma a khaikan han nih ngawt te kha a zah thlak ngawt ang. Tunlai thleng pawhin mi kan ngaihnep tawpkhawk lo chu khawlaiah kan phuar ngai lo, tunah tak phei chuan an ti tawh ngai lo nge nge.

Chutiang ang a, na em em leh mualpho thlak, zahthlak chuan, an sawisa a, a sawisatu te ngei kha! Ngaihdam a dilsak anih chu!

Kan Lalpa chuan "A Hmanrua hi A Chak ber tih hi a hre chiang em em ani." Isua hnung zuitu kan nih chuan a hmanrua Hmangaihna leh Ngilneihna hi kan hmang tur ani dawn lawm ni.
I Hmanrua i Thlang sual a nge o!

Hmanrua chak hmel chak hlek silo a awm chu chu mihring hmanrua ani. Hmanrua chak loh hmel em em mahse chak ber ni si a awm, chu chu Isua Hmangrua ani.

In chhungkua ah emaw, in nupa kar ah emaw, rawngbawl ho na ah emaw, harsatna i tawng anih chuan Hmangaihna leh Ngilneihna hi hmanro chak ber ani tih hria la hmang ang che. He hmanrua ah hian Ngaihdamna leh Remna a tel tlat bawk ani. 

Josepha flim ah, Potiphara'n hlauthawng taka zahngaihna a dilin, he thu mawi em em hian Josepha'n chhang a, ka theihnghilh phallo nghe nghe.

"Ngaihdamna chu Phuba lakna ai chuan a ropui zawk a. Ngilneihna lan chhuah tir chu, Thinurna ai chuan a chak zawk ani." 

Hmangaihna leh Ngilneihna hi i hman loh chuan, tu nun mah i thlak tak tak lo ang.

Mahse, i Huaisen a ngai Mi huaisen ber ISUA KRISTA hmanrua ani tlat!

Lalpa nghaktu nih hi ava hlu em

"Kei erawh chuan LALPA lam ka en ang a; ka chhandamna Pahian chu ka nghâk ang: ka Pathian chuan mi ngaithla dâwn a ni."(Mika 7:7)

Pathian NGHAH hi kan ti teivet a a muang tihna mi le? Tih te hi zawhna awm ve thei ani. Ni e, Lalpa chu a muang lo tak zet a, mahse nghah a ngai tlat si! Mihring te hian kan duh engkim hi kan duh rual rualin nei ta ila a buai tur zawk chu keimah ni kan ni, Lalpa chuan kan duh emaw, kan mamawh te pawh nise, kan la enkawl theih dawn loh chuan min pe mai lo thin ani.

Mihringah pawh mahni fa kum 5 mi vel chu, chem duh hle mahse tunge pe ang, chem chu a tha lo emni? Tha e, a tangkai alawm mahse kum 5 mi tan chuan thil "HLAUHAWM" tak ani. He tiang ang chiah hian, a "Hunhma A Kan Duh" te kan neih hi thil hauh awm tak ani. Chu naupang kum 5 mi chu, kum 20 mi lo ni ta ang sela, a nu leh pa pawhin kha chem la la, saw saw va chan rawh an ti an ti tawh ang.

Kan neih ngei ngei tur pawh, a hun dik lo a kan neih chuan thil tha lo tak a thlen thei ani. He tah tak hian, "LALPA CHUAN MIN NGHAK A." Kan duh te, kan nih chak te pawh a niang, nei turin kan nghet tawk em, kan chak tawk em, a duh hi neise rawng ala bawl a ngem, tihin Lalpa zawk hian min nghak reng thin ani.

Lalpa nghaktu chu, Lalpa'n a nun a siam that sak thin a, a thinlung duh zawng te a pe bawk thin ani.

"Lalpa beisei a thlir tlattu leh Lalpa thu zawm a nghak tlattu" kan ni thei ani.

Lalpa'n Thiltihtheihna a pe duh che a, a Tichak duh bawk a che

"Chau hnênahte chuan thiltihtheihna a pe thin a; chakna reng nei lote chu a tichak thin." (Isaia 40:29)

I Chau em? I chau anih chuan Lalpa'n "THILTIHTHEIHNA" a pe duh che anih kha.

Chakna reng neilo khawpin i Chaklo em? Lalpa'n a "TICHAK"  duh che ani tih ring rawh.

Mahse, chu THILTIHTHEIHNA leh chu TIHCHAK'na Lalpa'n a pek dawn che chuan, hei hi i tih ve a ngai ani, "AMAH BEISEI TLATA NGHAKTU" i nih a ngai ani.

I dinhmun chhiaah emaw, i dinhmun mualpho thlakah emaw, i dinhmun hniamah te khan, tuna i dinhmun leh i awmna apiangah khan "LALPA BEISEI TLATA NGHAKTU" ni ang che.

Lalpa beiseitu chuan Lalpa "LAWM ZAWNG, A ZAWNG THIN."

Lalpa chu, BEISEI tlat ang AW

"Aw ka nunna, engah nge i kun reng? Engah nge ka chhûngah hian i buai ni? Pathian beisei rawh: a hmêla damna avângin Amah chu ka la fak dawn si a."(Sam 42:5)

A ngaihna ka hre thlawt tawh lo, tiin kan in dawm kun hlawm anih hi tiro! Ni e, a har bawk em ani harsat nak lai a chhungte an awm tha duh lo te, beihnatsat vanga hah tawh nak laia a engmah a chhuak hlei thei lo te, chau chung chungin - beidawng chung chungin theih ang ang a kawppui zawn tawh hnuah pawh engmah a chhuak hleithei lo te, rilru buai rukna reh hlei thei lo te, eizawnna ah hma sawnna a awm hleithei lo te, taksa dam hlei thei lo te emaw, eng vang emaw berin kan nun a kun reng anih hi tiro.

Ava har dawn tak em, i dinhmun kha! Mahse kan kal thui tawh tiro, min hruaitu Lalpa ala nih tlat vang pawh ani ang.

He harsatna hi tawp ve tawh se chuan aw! He harsatna hi tawp lul tawh se chuan aw! Kan ti thin tiro.
Karkhat chiah thawvengin rilru/taksa na leh buai loin awm tal ila! I tih changte pawh a awm tiro!
Tiang hian, mahni in en chungin sawi chhuak dun ang aw!  Aw ka nunna, engah nge i kun reng? Engah nge ka chhûngah hian i buai ni? Pathian beisei rawh! Pathian beisei rawh! Pathian beisei rawh!

Lalpa hi kan beisei kan beisei chuan, amah beisei tu te, beisei zawk tu nilo, beisei zuaitu nilo, "BEISEI TLATTU" Mualpho a phallo.

Lalpa kan beisei tlat chuan kan "MUALPHO LO ANG."

Beidawnna khur thuk atanga Lalpa hmu tawhtu te chuan, "Lalpa Hmela Damna MAWI ZIA chu" an hre tlat tawh thin a, Lalpa an tlah phal tawh ngai lo a. Keini pawhin, "Lalpa hmel mawi hmu khawpin LALPA THLAH LOIN BEISEI TLAT" ang aw!

He thu ziaktu "DAVIDA" beram vengtu kha, kum 15 vel chhung pukah leh ramdanga a tlan chhiat hnu a, Lalpa'n Israel lalthutleng a, a thut tir khan. Lawm avangin  a tah zawih zawih ka ring a, Tap Zawih Zawih Chungin "LALPA CHU FAKIN AWM RAWH SE" a tih ka ring.

Chu tiang ang hun chu, i tan leh ka tan hian he LEIAH hian a tleng ngei thei a, lo thleng lo pawh nise VANAH chuan a thleng tawh ngei ang.

Pathian hnaih hi hmasawnna rahbi pawimawh tak ani.

"Kei atân erawh zawng Pathian hnaih hi a tha a ni: Lalpa PATHIAN chu ka inhumhinaah ka hmang a, A hnathawh zawng zawng thu chu ka hrilh theih nân."(Sam 73:28)

Pathian hnaih hi mitin tan ava tha tak em, Lalpa chu kan kiangah awm reng mahse kei mahni hian kan hlat thin a, biak in chhunga kan awm lai ngei pawhin kan rilru chu hmun dangah a awmn daih thei. Chutiang ang chuan Lalpa chu kan hnaih ah awm mahse la, keimahni hian kan hlat tlat thei ani.

Kan thinlungin Lalpa hi hnaih tlat ila, kan nun hi a fel duak ang. Tawngtai a Pathian kan biak tam chuan, rilru a fim thin a, zaidamna engtin emaw kan nei a, kan nun hi a chawl a, midang pawh kan be thiam thin ani. Heng thil 4 rilru fim, zaidamna, hahchawlna. mi biak thiamna hi kan nun ah engtik lai pawhin nei ta ila, eng kawngah pawh kan filawr theih ka ring.

Pathian kan hnaih hian, kei mahni nihna(personality) ai a tha zawk Pathianin min pe thin ani. Chu kan nihna(personality) a that chuan eng kawngah pawh kan that phah thei ani.

Pathian kan hnaih chuan, sual do kawngah min tichak thin a, thlemna pawh kan hneh phah thei thin ani.

Pathian hnaih a pawimawhna ber chu, kan Pathian hi! Vanram min thlen thei tu, anih avangin theih tawp in kan Pathian hi hnaih theuh ang u.

Lal Isua kan hnaih reng a tul ani

"Tin, ani chuan ka hnenah, “Ka khawngaihna i tan a tawk e; ka thiltihtheihna hi chak lohnaah asin tihfamkimin a awm ni,” a ti ta a. Chutichuan Krista thiltihtheihna chu ka chunga a awm theih nan lawm em emin ka chak lohnate hi ka chhuang tawh zawk ang." (2 Korinth 12:9)

Mahni dinhmuna lungawilohna, hreawm ngawih ngawiha inhriatna, chakloh riau nia inhriatna, thiltithei riau nia inhriatna te, eng dinhmunah pawh awmin tawk țhin mah ila, Pathian ah chuan tumah mi chak reng reng kan lo awm lo, kan chakna Isua Krista ah kan innghah tlat zel loh chuan kan chak thei ngai lo vang; 

Amaherawhchu, kan nihna ang anga min pawmtu kan Pathian hi a zahawm em em a, zah phu Pathian awmchhun a ni miau a, chutichung chuan nang leh kei hi chhandam ngai, nitin a thara chhandamna mamawh, inhlan thar reng ngai kan ni si a, keimahni chuan kan chak ngai dawn lo a ni tih hrereng chungin ani (Lal Isua) chuan kan chaklohna kan inhriatna chu chaknaah min chantir a, ropui ber zinga mi *"KHAWNGAIHNA* chu kan tan a lo dah ta, chu Khawngaihna chuan nang leh kei mi chaklo chu mi chakah min siam a, thiltithei ve nia kan inhriatna pawh chu min hrethiam em em chungin tihfamkima kan awm theih nan engemaw harsatna kan chunga a lo thleng a, kan chakloh zia min hriattir a, mi chak Isua chuan amah ang maia awm turin min siamthar leh țhin.

Krista thiltihtheihna chu kan chungah daih a awm emaw kan ti țhin, mahse tunah i bul maiah khan hman theihin a awm reng a, mahse a chahbi kan mamawh miau a, a chahbi ber Lal Isua hi kan kawl reng a ngai a ni. Chu chahbi nen chuan khawi hmunah pawh awm ila, harsatna hmunah pawh awm ila thiltitheiin min siam țhin, mi famkimah min lo ruat phah bawk țhin.

Lalpan malsawm che rawh se.

Lalpa min awmpuina hi engtin emaw tak hian a lang leh mai thin

"Nangin ka hnung lam leh ka hma lamah min hual a, Ka chungah i kut i nghat bawk a."(Sam 139:5)

Pathian chenchilh veng veng na hi, a chhang chuan kan tawng thin a. A chang chuan hla takah a awm emaw tih mai tur hian, Bible chang pakhat pawh kan rilruah a awm hlawl loh chang leh, tawngtai tura min nawrtu eng mah, a awm loh chang te pawh a awm thin.

Mak deuh chu, eng ang pawhin Lalpa chu, rehin hre mah ila min lo hnaih tlat thin hi!

Tin, eng tin emaw ni tak! Eng emaw lai tak hian, min awmpui zia hi a rawn lantir leh hlawl thin. Bus tawt takah chau takin i chuang a thutna i chang fuh tlat te, hmun fianrilah i motor laklawh takin a chhia a puitu an awm nawlh te, mi pawisa i puk a rulhna i nei lo a i pukna ten thin che an theihnghilh tlat che emaw an hrethiam tlat che ang chi te, mi i biak hrehdeuh i bia a i beisei ai alo ngaina ringawt che ang chi te, a tam awm e.

Chhiat tawhna chhungah pawh hian min awmpui tlat thin a, harsatna tawp khawkah puitu engtin emaw rawn kal tlat te, chetsualna hmunah hmelhriat pawh nilo min bawisawmtu tur lo awm tlat te, chhungkua a chhiat tawhin anmahni in theihnghilh khawpa min ngaihsaktu an awm tlat te, chuan thil thleng chhe rau rau ah engtin emaw thil tha awm tlat thin te hi ava mak tak em. Lalpa'n engtik lai pawhin lusunna hmunah emaw, chetsualna leh harsatna hmunah engkimah min awmpui thin ani tih hi a lang thin ani.

Lalpa chuan kan hma lamah leh kan hnung lamah min hual reng ani. I lawm ang u!

Lalpa Khawngaihna changtu i nih avangin, mi vannei bik i nih kha

"Ani chuan kan thiltih angte ni lovin, ama ruat leh khawngaihna ang zawkin min chhandam a, kohna thianghlimin min ko bawk a; chu khawngaihna chu leilung pian hmain Krista Isuaah chuan min pek a ni tawh."(2 II-Timothea 1:9)

Voin chu Cancer Hospital ah ka thianpa nen kan kal a, tiang ang taka mihring na tuar kha, kalo hmu lo rei ta hle mai, "Lalpa hi kan chungah hian ava tha tak em."

Ka thianpa te student, naupang kum 7 hi Thisen Cancer vangin amu bam mai a, mama pack khat voin chuan a ei zo ve a, anu in alo ti a, a thil eitheih pawh a tlem ta hle mai, anu lawmna pawh ava te tawh tak em. Tichuan, a bul lawk ah, Chemo nghawng nge, Cancer nghawng zawk pawh ka hre lo patling kum 50 vel hi a kut a khur zawih zawih ka hmu a, ka dinhmun ka ngaihtuah a, zan 2 ka tlaivar pawhin ka tha chu a khur ve deuh in hre thin mah ila, lang khawpin ala khur ngai lo, kalo va han vannei tak em.

Pitar kan veng ami kan tlawh leh a, ka thianpa in Pathian thu a sawi pui a, "Isua chhungkuain kan hmuh phah a, thlarau a kan dam kim phahna anih chuan na mah ila, a hlawk tho tiro, na em em mahla Pathian in a awmpui tlat che" tiin a titi pui a, a thlamuan a, a mittui a tla zawih zawih a, a fanu kum 40 bawrvel pawh a sir ah, a hnuk ulh hliah tumin bang lam a lo hawi bawk a.

Kan thlang lamah, kan veng ami an awm ve an tia, kan zuk dak a, ka hmelhriat nilo mahse, ka pawisa ah chhun chu ah let ka tum tawh lo, Lalpa'n a khawngaihna vangin malsawmna in min vur nasa tih ka ngaihtuah a, ka pe ta ringawt a. Tichuan, chu mite sir ah chuan, nutling kum 60 vel awm hi Cancer-in a pum alo ti puar a, a mit bawr a duk ruak bawk a, a tawrh ana lutuk a, mu leh mal a nei lo tih hriat reng in, a meng a ruai a,"Hmuh ava han hreawm tak em."

Kan han haw chu pawisa kan lo pai tlem ani ka ti a, ka pek theih tawk chu a tam lo'ng, an chaw vawikaht ei a tum ve pawhin a hlu alawm! Kan tih theih tawk kan tih mai thin hi a tha ber ani, kan tih theih bak chu kan ti thei chuang lo ang. Chuvang chuan kan tih theih tawk hi tih tum ang O!

Hetiang ang taka natna tawk hi kan chhungkuaah pawh kan la awm ngai lo a, kan fel vang bik ani hauh lo a, Lalpa KHAWINGAIHNA leh ZAHNGAIHNA vang chauh ani. Vawin a ka damlo hmuh te pawh hi, an sual vang bik pawh ani lo, Lalpa'n an natna phena MALSAWMNA leh A THATNA a lan tirna hun leh hmun pawh ani ang. Lalpa remruat dan chhui chhuak zo reng kan awm silo a, mahse Lalpa chuan amah RINGTU te tan chuan, thil chhe ber a mihringin kan ngaih pawh hi A THATNA pho chhuaktu tur atan a hmang thin ani.

Damlo te leh an chhungkua theuh theuh ah pawh, Lalpa a innghat te chu hmuh an nuam tak zet ani, he leiah an nun hial a tawp anih pawhin "Vanah Chawl Turin An Haw Dawn" tih chu an ngaihtuah thleng pha tlat si a. Thihna kotlangah leh harsatna vawr tawpah hian, "LAL ISUA hi alo HLU TUAL TUAL" anih dawn hi!

Ka va zir chhuah ve chu, Lalpa"Khawngiahna" nasa tak ka la chang bawk a,
*Rawngbawlnaah ka hah bik anih pawhin lawm takin ka hah bik mai tur ani rawngbawl chak em em thei lo an awm, ka ti a.
*Eizawnna ah ka hniamin ka hria a, hma bak ka nghah hle in ka hria a, duh ang a hma ka sawn chak loh avangin ka phurna pawh a tlahniam thi. Mahse hna, thawk chak em em thawk thei lo an awm lai in, kei chu "Lalpa'n min khawngaih a, hna thawhtheihna min pe a, phur takin ka thawk mai tur ani."

Lalpa KHAWNGIAHNA leh MALSAWMNA hi kan va han chang nasa tam tak em,

Chu mai chu ala ni lo, Khawngiahna avanga CHHANDAMNA kan chan tawh phei chuan, hremhmun ban phak engtikah mah kan ni ngai lo vang. Vanram chu Lalpa khawngaihna vanga kan ta chiang sa ani, LALPA Khawngaihna avang chuan kan tawpna tur pawh chu ava thlamuan thlak tak em.

Mahse, hei hi ka zawt duh che

KHAWNGAIHNA AVANGA CHHANDAMNA CHU,  i chang ve tawh em?






Chhandamna chu ila chang lo anih chuan, nungturin@gmail.com ah min rawn mail dawn nia. 

Isu, Aw ropui ber

"Tin, “Keimah hi ka ni,” a tih veleh an hnungtawlh a, leiah an tlu hlawm a. Tin, ani chuan an hnenah, “Tunge in zawn?” a ti a, a zawt leh a. Tin, anni chuan, “Nazaret Isua,” an ti a."(Johana 18:6-7)

Gethsemane ah amah rawn man tumtu te hnenah khan tunge in zawn? alo ti a, Isua an ti a. Ani chuan kei mah hi ka ni ati a, amah man tumtu te chu an tlu ringawt ani.

Isua tawngkam vawikhatah khan, pa rorum tak tak 30 bawr vel kha an let anih kha. Mahse, chutiang ang a thil ti thei chu, ka tan leh i tan nawmnah taka "Man Turin A in pe a" nasa takin an sawisa a, Kross ah an khengbet a, thih thlengin engmah ti thei loin a tuar ani. Engmah a tih theih loh chhan chu, nang leh kei hi kan ni. 

Kan tana a tawrh lai khan, a duh chuan amah sawisatu te kha a hau hlum hmiah hmiah thei ang, chu ai nasa pawh a ti thei ang. Mahse, kan tan engmawh tithei loin a tuar ani.

Kan nun ah hian, chhungkua a thinrimna a lo thleng a, rawngbawlna a sak a sawisel dawn chang te alo awm a, dawt a puhna dawn hun te a awm hial thin. Chung hun zawng zawng ah chuan, mihring taka ka beih let chuan ka hneh ang tih in hre reng chungin"Isua Krista vangin engmah kan ti thei lo ve thei a ngem" kan tan engmawh a ti thei lo tawh asin.

Hmangaihna leh Ngilneihna a khawvel Ngamtu ISU i ropui ani! AW Ropui ber Lalpa kan fak a che.

Nghing mahla, Lalpa nghing ngai lo chuan, a ti nghet ang che.

"LALPA ringtute chu Zion tlâng, tihnghin rual loh, kumkhuaa awm reng tûr ang chu an ni. Tlângte chu Jerusalem vêla a awm angin LALPA chu a mite vêlah a awm thin, Tun atanga, kumkhuain."(Sam 125:1-2)

Lalpa ringtute hi kan nghing thin, Bible ah pawh Isua lo chu nghin lo an awm pawhin ka hre lo. Mahse, amah ringtute chak lohna a pui thintu Lalpa hi a nghin ngai lo a, amah ringtute chu lo nghing mahse, a chakna in an chak lohna chu a hliahkhuh a, nghing lo turin a pui thin ani. "Lalpa ringtu mihring chu a nghing thin a, chu mihring nghing chu Lalpa'n a pui a, a nghing lo thin."

Lalpa hi ami te, amah ringtute velah a awm thin, an chak emaw chak lo emaw, an nghing emaw nghing lo emaw, an manganna a an auh phei chuan a thlahthlam ngai lo ani.

Lalpa i kiangah a awm, a nghing ve lo a, nghing mah la nghing lo turin a pui ang che. Lalpa-ah i inghat ani tih puang thin ang che.

Chak tak leh Huai takin awm rawh, LALPA'N a ti che.

"Thu ka pe che a ni lawm ni? Chak tak leh huai takin awm rawh; hlau suh la zam hek suh: LALPA i Pathian chu i kalna apiangan i hnenah a awm zel dawn alawm,"tiin a sawi a."(Joshua - 1:9)

Khawvel hi kan duh angin a kal lo tiro, kan duh anga a kal lohna takah hian, Chak tak leh Huai takin awm rawh Lalpa'n min ti! I nih duh ang i ni lo emaw, i rilru a na emaw, I taksa ah natna i tawk mek emaw, eizawnna mumal nei lo mek i ni emaw, kawppui lamah harsatna i tawk emaw, zirna ah harsatna i tawk emaw, kha hmun ah khan Lalpa'n" Chak tak leh Huai takin awm rawh" a ti che.

Mahse, mahni thu thu a, lo in lak chak emaw, lo in lak huai vak, a tih chi chuang loh ang. Lalpa'ah zawk Chak tak leh Huai tak a awm a ngai ang, engtin nge Lalpa'ah chuan kan chak a nga kan huai ang le? A Thu kan zawm ang, tichuan kan hnenah a awm zel bawk ang.

Lalpa chet tir kan duh chuan kan RIN a ngai, Lalpa'n kawng tha zawk a nei tih kan RIN tak zet chuan, kan nun a in thlak ngei thin ani.

Khawvel vir pangngai a thleng thei lo hi, Lalpa nen chuan "THLENG THIN RENG leh THLENG PANGNGAI RENG ANI" a THELNG zel bawk ang.

"Lalpa kan Rin chuan, a Hun RUAT kan Nghak thleng ngei ang."

I Tan A Hnai Reng

"Vanah han lawn ila, chutah chuan i awm si a: Seol-ah mutna siam ila, ngai teh, chutah chuan i awm bawk si a."(Sam 139:8)

Kan Lalpa hi Seol(Mithi khua)-ah pawh a awm chuan khawiah pawh a awm vek ani. Seol-ah em em hi chuan awm tawh loh awm tak ania. Mahse, Seol kotlang ami te pawh chhanchhuah ala duh cheu ani. Kan Lalpa hi chance pe tlat tu ani, "God of Chances" ani.

Kan harsatna zawng zawng hi a hre vek a, engkim kan tawh laiin kan kiangah a awm reng a, A thlang lo tu chu a ti lui ngai lo a, kan auh chuan kan thlang tihna ani a, kan auh veleh a nasa taka min pui turin a hnai reng ani.

Kan kiangah hian a awm reng a, eng ang a sual khur thuk a lut tawh pawh ni mah ila, a hnai reng a, inngaitlawm a kan auh chuan "Min Pawm Turin, A Hnai Reng Ani."

Ti hian tawngtai ang O! 
Isu Lalpa, min khawngaih ang che, i ta ka ni ka thinlungah lo cheng ang che, ka engkim hi rawn nei ang che. Ka harsatna hi i hneh tawh tih ka hria e, min hnehsak zel ang che. Amen

I Tawngtaina A Chhang Ngei Dawn

"Chu veleh Isua chuan a hnenah, "Hmeichhia, i rin a nasa em mai; i duh ang takin i chungah awm rawh se," a ti a, a chhang a. Tichuan, a fanu chu, chu mi achinah chuan a lo dam ta mai a." (Mathaia 15:28)

Isua hian va fel phawt rawh a ti lo, " i rin a nasa em mai" a ti zawk ani. Misual tak an tih emaw, mi thatchhe tak emaw, khawsakna harsa tak emaw, rilru buai tak emaw, kawppui nen a buai mek emaw zawng mek emaw, zirna bei tang tang mek emaw, tu pawh kan ni thei e, Pathian hnen a kan Tawngtai phawt chuan min chhang ang. Lalpa'n min chhan ngei dawn avangin tawngtai tlat ang O!

Mahse, hei hi kan hriat a ngai "A DUH DANIN MIN CHHANG DAWN" tih hi, chu a duh dan chu kan duh dan ai a tha zawk tih pawh kan hriat a ngai ani. Ava khirh leh si ve! kan ti maithei a, hei hi kan hriat leh a ngai, a duh dan ah chuan "KAN RIN PHAK BAK A THA A, CHHANNA" pawh a awm tih hi. 

Bible changa hmeichhia khi, mi fel tak ani lo maithei, an hunlai khan aien te an la ti thin a, chu mai bakah thlarau hrang hrang biak te pawh an ching ani. He nu hian aien a ti ve emaw, thlarau a biak thu emaw chu a in ziak lo a, mithiam zawk te chuan Juda te awmna hmunah tiang ang taka ramhuai khawihbuai hriat btur a tam lo hle tiin an sawi a. He nu pawh hi ringlo mi ni tura ngaih ani a, Kanaan mi Israel te hnawhchhuah bang thlah zel a nih a rinawm.

He hmeichhia hi Isua'n "I rin a nasa em mai, i duh ang takin i chungah awm rawh se," a ti a. Kei ni hi" I ring emai, i dil chu ka tihhlawhtlin sak ang che'' min ti a ngem le." Hriat tur pakhat chu" Tawngtai ngai lo chuan, Pathian a rin loh vek pawhin, Lalpa ah a beiseina a nghat lo" tih a lan tir ani.

Hei Hmeichhia hi chuan "Isua a um in a um" . A dilna kha Isua'n a chhang lo mai pawh ani lo, hmeichhia khan a auh khan a ngaihsak lawk duh lo anih kha, mahse a AU tlat a, a UM bawk a, a au ei TA! A dilna pawh a chhan sak bawk ani.

Keini pawh hian, kan dilna chhan anih mai loh pawhin, AU lawm lawm ang u, kan Lalpa hi UM tlat ang u. Tichuan, kan beiseina leh kan dilna te hi min la tihhlawhtlin sak ngei ang.

Chaklo te Pathian

"Chau hnênahte chuan thiltihtheihna a pe thin a; chakna reng nei lote chu a tichak thin." (Isaia 40:29)

Kan Pathian hi a danglamna em em chu, mi chaklo leh misual te Pathian a ni duh tlat hi!

Kan chak loh lai hian, Lalpa lam kan en tlat chuan, chakna min pe duh tlat ani.

Kan awm ang angin Lalpa i pan tlat  ang o

Thil tha tih i duhna kha ngainep suh

“Ama lawmzawng atana tih tum tur leh bei tura nangmahnia thawktu chu Pathian a ni si a.”
(Philippi – 2:13)
I thinlung kha i en chian chuan, Lalpa thlang tlattu eng emaw a awm tlat ang. Dik lo i tih dawn pawh in, tih loh tur ani engtin emaw tak hriat tirtu che i nei ang.

Kha nangmah a engtin emaw tak thawktu kha, Lalpa ani thei ani.

Lalpa lam kawng zawh tura, nangmah a thawktu leh tur thintu i thinlungah a awm thin anih chuan,

Lalpa ani tih hria la. Chu thawktu thu chu awi la, NGAI NEP NGAI SUH ANG CHE.