Rinna Avanga Thiltih

"Chutiang bawkin rinna chu thiltih nei lovin amah chauhvin a awm chuan thi a ni."(Jakoba 2:17)

Kan thiante bulah tihian kan ti fo thin, Pathianin a pui che a nga i thei em em ang, khing arsi zawng zawngte khi Pathian virkual tir vek alawm, thli leh ruah zawng zawng hi Pathian thu a awm leh che alawm kan tia, kan fuih thin a ni.

Hei hi han in zawt chhin teh,  kha i fuih thinna thu chiah kha, nangmah han in hrilh la i awi em? Awi e a!! Pathianin min puih phawt chuan ka tum chu ka theih ka ring, i ti maithei a ni.

Nih leh, tinge kross a min chhandam tura a nun hial hlan ral vektu hian min puih duh loh ang le?

A dik alawm, mahse mo, Pathian remruat hi kan duh duh kan neih lampang a nilo a, kan ti thin a, a dik chiah bawk. Hei pawh hi kan hriat ve tho a ngai 'Pathian remruat a nih vang hian mo, kan duh ai hniam hret chauh kan nei thei tur tihna a ni chuang lo.'

Englai tak nge kan buaina chu ni ta ang le?

Hei hi kan buaina ber chu a ni.

Pathian kan ringa a hnenah kan thlena, Pathianin min pek a tum a, kan duh chu midang kut atanga min pek a tum loa, midang kut atang chuan thil te tham zawk min pe mahna, thil lian tham chu keimahni kut kawih a min thawh chhuah tir atum zawk thin a.

Kan kut tichak turin A Tah Tawlin Min Zirtir ta a, chu chu kan rin ai alo rei taa, kan peihna in a tlinlo a, Pathian remruat ni taloah kan ring ta mai thin a ni.

Entir nan, pawl 10 past Pathian hnenah kan lo dil ta a, Pathian chuan min puitu tur te, hriselna te, a zirman senso te, min pek a rinawm a. Mahse, school min kalsak lo a nga, lehkha pawh min zir sak lo ang. Chu chu kan RIN AVANGA kan tih ve tur a ni.

Dawr kan nghaka inhralh kan duh a nih chuan, mi tha taka biak kan zir thiam ve tur a ni, Pathian hnenah inhralh tam kan dil tawh avangin, tha taka mi kan biak kha a thlawn dawn lo a, Pathianin min malsawm sak zawk dawn a ni.

Engtir nan, thlaraubo chhanchhuh  tur Pathian hnenah kan dil a, Pathianin kan pawh phak mai ah thlaraubo a rawn dah taa, chu thlaraubo chu chhanchhuah tum miah loin kan awm awm a kan awm ringawt chuan engtikah mah kan chhanchhuak dawn loa, dil chu kan dil, Pathian pawhin min pe, mahse tih ve tur kan nei, kan tih tur hmasate chu, a harsatna hre tura va pawh leh Pathian thu hrilh a ni. Chu kan tih tur chu kan tih loh chuan kan rinna leh kan dilna chu keimahni vekin kan tichhiaa, midang chutiang taka thawk duh mite chuan thlaraubo an chhanchhuah theih nan dil sak zawk ila, Pathian ram kan zauh zawk a rinawm.

Davida pawh kha, Pathianin a puih a rin vangin Goliatha kha a phak ang tawkin a bei a, virvawmin a vawm a, a tih tur a tia, Pathianin a malsawm saka, Goliatha chu a hneh a ni. Kha mi ni a, sipai zawng zawng khan, Davida angin ring sela, thil tihin chhun zawm bawk sela chuan Goliatha hnehtu an ni ve vek thei awm e.

Rinna chu, kan neih ngei avangin thiltihin kan chhunzawm a nga, mahni inhneh emaw, inzir emaw a ngai a nih pawhin, chungte chu rinna avanga kan thiltihte chu a ni, tih chu pawmin, inzir duh zel ila, tichuan Pathian hnena kan duhthusam kan dil te hi, Lalpa'n min pek ava rinawm em.

(Tawngtai Dan Tur)
Lalpa, ka rin avang che hian, i duh ang a ka nun theih nan theih tawpa inzir turin min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

"KOHNA CHHAN" Pathianin Abrahama A Ko Thu (Part 3)

"Chutichuan Abrama chu LALPAN a hnêna a sawi angin a kal ta a; Lota chu a hnênah a kal ve a: tin, Abrama chu Haran khua ata a chhuah lai chuan kum 75 mi a ni a."(Genesis 12:4)  

 Abrahama Pathian thu angin a kalchhuak.

Bible-a Pathian mite hian Pathian thupekte hi 'Nakinah ka zawm ang' tiin nakin atan an dah ngai lo. Tunah an ti nghal thin. He thu hi ngun takin han chhiar teh, "Abrahama chu Lalpa'n a hnena a sawi angin a kal ta a" tih hi. Pathianin a hnena a sawi angin a kal ta! Nakinah kan la chhuak ang chu a ti lo. Nakumah a ti hek lo, Pathian thu chu awiin a kal chhuak nghal a ni.

Tunlai Kristian tam berte chuan Lalpa thu aiin kan thu kan dah lal hmasa a, Lalpa thu chu nakina tihah kan khek thin. Chu chu Setana hmun kan kian tihna a lo ni zel thin, sual kan tih chhan ber chu thil tha kan tih lohna atangin a in tan thin a ni. Lalpa thu hi tunah ti la, i tih tur chu nakinah dah zawk rawh. Chhuanlam siamin tikhawtlai thin suh ang che.

Unau duhtak, Sual kalsan duh khawpa kohna i dawng em? Kohna chuan kalsan phut tur a nei thin. Kohna hian thutiam ropui tak a keng tel a, thutiam chang turin kalsan tur chu kalsan ngam ang che. Kohna leh thupek chu nakin atan khek suh. I tih tur aiin Lalpa thu kha ti hmasa ang che. Hetiang taka kan awm chuan Lalpa hi a awm mai mai dawn lo a ni. 

Lalpa'n Abrahama a kalna apianga a ngaihtuah a, a venghim ang hian kei ni pawhin, kan Pathian thu hi kan awi a, a kohna ah kan kal phawt chuan, Lalpa'n engkimah min ngaihtuah ve dawn a ni.

(Tawngtai Dan Tur)
Lalpa, i thu zawm a, i kohna a kal apiangte hi an inchhir ngai lo a, lawmna in an khat zawk thin a, a kal duh lo te hi an hreawm zawk thin a ni tih hi ka hriat a, min kohna ah chuan ka kal theih nan min zirtir la, min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

"THU TIAM" Pathianin Abrahama A Koh Thu (Part 2)

"Tichuan chi ropui takah ka siam ang chia, mal pawh ka sâwm ang chia, i hming ka tiropui bawk ang; tin, nang malsâwmna ni ang che:
tin, malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang: nangmahah chuan leia hnam tin an la thawveng ang," a ti a."(Genesis 12:2-3)

Pathianin a kohte hnenah thutiam ropui tak a pe thin.

Pathian hian a thu min awihtir ngawr ngawr chauh a tum lo. A thu awihtute chu malsawmna thutiam ropui tak a pe. Pathian thiltiamte chu, chi ropui taka siam, a hming tih ropui, malsawmna pek, hnam tin thawvenna pek, malsawm saktu chu malsawm leh anchhe lawhtu chu anchhe lawhte chu a ni. Lalpa thupek awihtute hnena thleng tur malsawmna hi a va namai lo em! 

'Kohna anga thuawih taka pen chhuaktute hnena pek tur malsawmna thutiam hi han hrechiang ila, thupek hi zawm loh phal chi a ni lo tih kan hmu chhuak ngei ang.'

Miten he thutiam hi an hrechiang em a, Pathian thupek zawm tur an zawng a, nang erawh chuan thupek zawm loh hram dan i zawng deuh thin em? Kan dil vang niloin, Pathianin ringtute hnenah thutiam ropui tak a pe a. Chu thutiam chu thupek zawmtute hnena thleng tur a ni. Pathian malsawmna thutiam hi i dawng ve tak tak duh a nih chuan a kohna leh thupek chu zawm ang che.

Lalpa'n a thu zawm tu te chu, lawmman pek a hmaih ngainlo a ni. Kan bible ah tihian, a in ziak nghe nghe
"Pathian hnena lo kal chuanin, ani chu a awm tih leh zawngtute hnena lawmman pek hmang a ni tih rin tur a ni."(Hebrai 11:6b)

(Tawngtai Dan Tur)
Lalpa, thu thiam hlen lo thei lo khawp a, Pathian ropui i nih zia hi ka hriat reng a, i thu tiam changtu, ka nih ve theih nan i thu zawm thei turin min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Pathianin Abrahama A Koh Thu (Part 1)

"Tin, LALPAN Abrama hnênah chuan, "I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh."(Genesis 12:1) 

Kan Bible chang thlana a changtupa ber chu Abrahama hi a ni a. Pathianin a hming a thlak hma chuan Abrama a ni. A pa chu Tera a ni a, milem siamtu fapa a ni. Abrahama chu milem biakna chhungkua atanga sei lian, Pathian nung pawh hre lo a ni. Chutiang dinhmun atang chuan Pathian nung leh dik takin a ko ta a ni.

1. Pathianin mi a koh hian kalsan tur an nei thin.(Verse. 1)

Abraham chu Pathianin a koh khan a pa in te, a laichinte leh an khua chhuahsan tura koh a ni. A pianna leh sei lenna khua chu milem biakna khawpui a ni a, a chenpui laichinte leh a pa ngei pawh milem bia a ni. Hengte hi Abrahama kalsan ngei ngei tur chu a ni. Kalsan nei tur chauhvin Pathianin a ko lo, ram a pek tura kal tur leh cheng tura koh a ni.

He thu atang hian Pathianin min koh chuan khawvel sual, milem biakna khawvel kalsan turin min ko thin a, Chumai ni lovin, Lalpa min pek ram thar, Krista thuneihna lalramah cheng turin min ko a ni.

Zu rui thin chu Lalpa'n a koh chuan zu a tlansan thin. Dawt sawi thin te, mi rel thin te, Duham thin leh khawvel ngaina thinte kha Pathianin a koh chuan heng sual rapthlak tak tak, milem biakna khawvel hi an chhuahsan a, Kanan ram, Krista ramah an cheng thin. Heng thilte kalsan phal khawpa kohna dawngtu i ni ve em? Nge, kalsan chuang miah lova koh ni ngeia inhre ve tlat i ni zawk?

Pathianin nun tha zawk min pek duh avang hian, kan nun hlui chu kalsan turin min ti thin alo ni.

Nun hlui kalsan har tiin, nun hlui ngaiin lunglengin kan kun hial pawh a ni thei e, heng hunah hian Abrahama pawhin a kalsan avangin Pathianin nun tha zawk a pe ang hian, kei ni pawh kan nun hlui kan kalsan chuan, 'Kan Hmabakah Nun Tha Zawk Pathianin Min Dahsak' a ni tih hi kan hriat a, kan thlirfo a pawimawh a ni.

Kalsan duh lo te an inchhir zawk thin a sin.

(Tawngtai Dan Tur)
Lalpa, nangin nun tha zawk min pek i duh avangin, ka nun hlui kalsan turin min ti a ni tih hi ka hriat thiam a, ka kalsan theih nan chakna min pe turin ka ngen a che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Nangmah I Inhriat Hma Pawhin A Beitu Che Khan A Hre Tawh Che, I Hneh Nan Isua Hmaah Thingthi Rawh

"Nimahsela Isuan, "I inah haw la, Pathianin i tan thil a tihsak che hi a ropuizia va hrilh rawh," tiin a kaltir ta a. Tichuan a kal a, khawpui chhung zawng zawngah chuan Isuan a tan thil a tihsak ropuizia chu a tlangaupui a."(Luka 8:39)  

Nuaia man mihring hi mibik chu a ni, a chhanchu, Isua that zia leh chhanchhuaktu a nih zia tlangaupuitu hmasa ber a ni a. He pa hi, Israel mi a niloa, mahse engtin nge Isua hmaa thingthit nachang a hriat theih hi, chhut tham a ni. 

A kawchhungah ramhuai chak tak a lut a, khaidiat pawhin an thlung zo lo a nih kha. Kha ti chung khan, theih tawp a chhuah a, ramhuai laka chhuah zalen theitu, Isua hmaah ava thingthi a nih kha. Tichuan, Isua'n a chhanchhuak a, an khuaah a chhanchin hril turin a ti ta a nih kha.

Hepa hi, eng mi nge a nih? Engtin nge Isua a hriat? Thuthlunghluiah khan Jehova be duhtu hnamdangte chuan Israel ten an biak ang chiahin an be thei ang tih a ni a (Exodus 12:48). Chung thlahte zinga mi a ni nge, Babulon mi Jehova be ve tute thlahte zing ami a ni zawk tih kan bible ah kan hmusilo a.

Hei erawh a chiang a ni, Isua kha alo hre tawh a ni, tih hi. Ramhuaiin a man chungpawhin Isua hmaah  kun nachang a hriat kha. Tichuan, heihi a ni thei a ngem, chutiang ang taka Isua lo chhuitu leh lo thlirlawktu mi ropui tak kha, ramhuaiin a tihbuai loh chuan, sual hnathawh a thiat nasa dawn lutuk a, chuvangin a nih tur ang a nih hmain ramhuai chaktak Nuaia chuan engmah ti theilo turin alo man a ni thei a ngem le?

Nangpawh kha,"Lalpa'n theihna nasa tak alo pe daih tawh che a, chu i theihna chu hmang chhuak theilo turin, sualin i naupan tet ata dan chah che alo tum tawh a, in chhungkua pawh nasa takin alo bei tawh a ni thei a ngem le.'

Mihring ramhuai man kha, amah a inhriat hmain ramhuaiin enge alo la tih theih dawn tih hi a hre tawh thei a, Mosia pawhin Israel te hruai chhuaktu tur a ni tih a inhriat hmain ramhuai (sual) chuan alo hre tawh a, Lal in a, a seilen dan leh a fin zia a hmuh khan dan a tum a, Aigupta atang a chhuah theih nan thil a tihsual tir a ni, a tih theih hial awm e.

Nangpawh kha, enge i tih theih dawn tih hi, nangmah i in hriat aiin sualin a hriat hmasak zawk avangin alawm, nasa takin dan che a tum a, i tih theih renga i hriat, mahse engtin emaw tak tih fuh theih miah loh i nei em? Han inchhut chiang teh le, sualin dan beh chhe a tum vangin,  thil pangngai tithei mahla, thil tha bik tithei loin i in hria em, sual chu indan chah tir suh ang che.

Nuaia man mirhing khan, Isua hma a thingthiin a zalenna a hmu chhuak a, tichuan an khuaah Isua chanchin puangchhuaktu alo ni ta a, Jentaile zingah chuan, Isua chanchin puang chhuaktu hmasa ber a ni nghe nghe a.

Nangpawh " Isua Hma A Thingthiin Sualin A Phuarna Che Kha, Lalpa Pheilh Tir Rawh Le." Tichuan, Lalpa'n i kalna tur takah, a chanchintha puang darh turin athlang ngei ang che.

(Tawngtai Dan Tur)
Lalpa, min phuartu sual hnathawh zawng zawng hi, nangin min hlih sak vek la, min kohna hmun ngeiah chuan, I hming ropui nan, ka tih tura min pek te chu ka tih theih nan min pui ang che, Amen. Ti ang o. 

(He tawngtaina hi a pawimawh em em a, Tun Tum Chu Thingthiin Tawngtai Ang Hmiang)

Hnawl/Reject (Kawppui Tha Neih Nan Isua Nen Inpawhna Thuk Zawk Neih A Pawimawh Hmasa)

"Pathian Lehkha Thuin,“Tupawh amah ring apiang an mualpho lo vang,”a ti a ni." (Rom 10:11)

Kum 2010 hnu lama puitling chho an nih avangin Johna leh Kellyi chu social media ah an in be thin a. Johna chuan a be hmasa a, a message hmasa ber pawh ' peanut butter leh Banna Sandwich' tih mai te hi a ni a, Kellyi nuih a ti za ngang mai a ' pancake leh omlet' tiin ava chhang ve nghal a. An in pawh nghal viau a, tichuan fimkhur taka an inbiak hnu thla hnih thum velah chuan, mi tha pangngai ve ve anni tih an in hre tawn a, an inngaizawng tan ta der mai a.

Johna hi kristian chhungkaw tha tak a seilian a ni a, a nu leh pa pawh an kohhran hruaitu te zing ami an ni a. Kellyi te erawh chu, kristian ni tho mahse, mahni that that a tha, a phur chang changa inkhawm thin a ni a.

Pawi ta deuh mai chu, Johna hian Kellyi hi ringtu nun takah hruai tur zawk a nih laiin, Kellyi'n inkhawm loin movie en ila a ti emaw, kohhran'a a rawngbawlna kalsana chhuah pui tur vela a sawmin, Johna hian a sawmna chu a zawm ve mai zel chu a ni. Kellyi'n, Johna hian min ngai pawimawh bawk a, ka duh tulh tulh mai a, ti awm tak a nih laiin, thian ang chiah kan niin ka hria a ti ta daih mai a, chu vang chuan thian kan nih a tha zawkin ka hria a ti ta hmiah mia a.

Johna chu a rilru a na em em mai a, a hmelah a lang chhuak hial a, nikhat chu Kellyi hnenah chuan thian satliah nilo a, inzui puiah chuan a sawm leh a, Kellyi chuan midang a biak tawh thu alo hrilh a, Johna chu a thinrim hle a, a rilru a na bawk a. A nu chuan Bawiha i duh tak zet a nih chuan Pathian kutah nghat rawh, a ti a.

Johna chu a harh chhuak zawk a, "Isua Nen An Inkungkaihna Siam That A Ngai A Ni Tih  A Hre Chhuak A," a dah pawimawh loh tur zawk alo dah pawimawh reng a ni tih a hria a, theih tawpin Pathian hnaih a tum a, Kellyi tan pawh a tawngtai a. Tin, Johna nu hi nu ropui tak niin a hriat a, a chhanchu a fapa rilru na leh buai a en liam mai lo a, a damna hmun tur tak tak, Lalpa ke bulah hruai nachang a hria a.

Thla khat vel chu Johna leh Kellyi an in be mumal tawh lo a, Kellyi chu a thian thar nen chuan an in hau vak mai a, in biak tawh loh an tum nghe nghe a. Kellyi rilru buai chu amah chauhin a awm ngam lo a, a thiannu pakhat ava bia a, a thiannu chuan kohhran biak in pahnih tih fai kalo tum a, chu bakah inrinni zan inkhawm ka tum a sin, ilo kal ve duh chuan kan inkhawm a nga a ni mai a alawm alo ti a. Kellyi chuan a thiannu rawngbawl chu a zui ta a, an han hawn chuan, Kellyi chu mahni nuam tih ang a sunday hmang mai thin a nih avangin amah a awm a hreh hle mai a, a thiannu a tibuai tawh si, tih ngaihna awm in a hre lo a. Zanah chuan Johna a message a, naktuk in, biak in ah kalo inkhawm ve a nga, min lo kalpui a va ti rawi a, tichuan an inkhawm dun ta a.

Kellyi chuan, Johna nun hahchawl em em mai a hmuh chuan, a awt em em a, chu bakah a bula a awm in a hahdam riau'in a hria a. Johna ve thung chuan, Kellyi tih lungawi emaw, a mit lak emaw a tum tawh lo a, a awm ngaiin a awm mai a, rawngbawltu chhungkua an ni a, theih tawpin Pathian rawng a bawl mai a.

Chutia thla hnih vel an awm hnuah chuan, Kellyi pawhin inkhawm chu a ngaipawimawh ta hle a, tlaikhat an inkhawm bang chu, Johna alo nghak a, Kellyi chuan Johna a duh thu hrilh a tum vang chuan a zam hle a, minute 5 vel chu engmah a sawi hleithei lo a, Johna chuan dawhthei takin a nghak a. Kellyi i chuan 'John nun kalphung hi kalo hrethiam lo em a ni, kan inpawhna kha thil mai mai ah leh a awm reng thei turah kalo ngai a, min la pawm thei a ngem a ti a.'

Johna chuan a chhang lawk lo a, a thinrimna a pai reng vang pawh niloin, a thinlung Lalpa tan a lo hlan thuk tawh em avangin, Kellyi nen an inkar han ngaihtuah let leh mai turin, Kellyi laka a thinlung  awm dan thin chu, alo theihnghilh tawh a, a rilru natna chu a ngaihpawimawh ber, Isua'n alo tidam hneh tawh hle alo ni a.

A nu chuan a fapa leh Kellyi chungchang chu a zawt a, Johna'n thil awmzia chu a nu a hrilh a. A nu chuan, Bawiha 'Lalpa kut vawn nachang kan hriat hian, Lalpa vawnna chu a nuam lutuk a, midang kut kan lo vawn tawh zawng zawng te hi kan lo theihnghilh thin reng a sin, Kellyi chu i theihnghilh thak a nih chuan, kalsan la, mahse hmeichhia i ngaihtuah apianga Kellyi i rilru a alo lang thin a nih chuan, Lalpa'n in inkar a duh angin a siam tha zawk tihna a nih ka ring a. Pathian rawn chungin kawm (thianghlim takin) hnai leh chhin la, Lalpa'n thutlukna dik ber siam thei turin a pui ang che a ti a.'

A nu thurawn chu ala a, Pathian rawn hmasa zel chungin Kellyi chu a date (kawm) leh ta a, a hnu thla 5 vel ah chuan an innei ta nghe nghe a ni.

Inngaih zawnna ah pawh hian, Lalpa'n 'amah a rinna nghat mi chu an mualpho a phal ngai lo 'rejection (hnawl) i tawk tawh a ni maithei, kha kha Lalpa'n Johna ang hian, i man tih tona hmanruaah a hmang daih thei a sin.'

Lal Isua Krista nen inpawhna thuk nei hmasa la, kawppui tha ber i neih theih nan rem a ruat sak ang che.

(Tawngtai Dan Tur)

Lalpa, nangmah ai a dah pawimawh leh dah hmasak ka neih ngai reng reng lohna turin min pui la, kawppui zawnna ah hian nangmah ka rawn hmasak zel theihna turin chein min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Lal Isua Ngaihpawimawh Ber Chu

                           
" Chutichuan, kal ula, hnam tina mi zirtîrahte siam ula, Pa leh fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u."(Mt.28:19).

Nu leh pa, pi leh pute hian an hun tâwp dâwn tak takah hian an tu leh fate an ko khâwm a, an tâna an ngaihpawimawh ber, an kalsan hnu pawha an rawn zawm zel tûr, thuchah hnuhnung an sawi thin a. Kan Lal Isua pawh khân a hun hnuhnung tak takah khân, thihna ata a thawh leh hnu, vana zirtîrte a lawn san hma lawk khan tláng pakhatah a ko khâwm a. Chutah chuan a kalsan hnu pawha an rawn tih zui tûr atâna a ngaihpawimawh ber a hrilh a ni. Chu chu Chanchin tha hril hi a ni.

Lal Isuan, "Lei leh vana thuneihna zawng zawng ka hnênah pêk a ni tawh, chutichuan, kal ula, hnam tina mi zirtîrahte siam ula, Pa leh fapa leh Thlarau Thianghlim hmingah chuan baptis ula, thu ka pêk zawng zawng che u pawm turin zirtir rawh u," a ti a ni. He thu hi a hun tawp berah, a bik taka tlang pakhatah ko khâwmin, thudang engmah sawi lovin, Lal Isuan a zirtirte hnênah a sawi a ni a, a ngaihpawimawh ber a ni tih a chiang hle a ni.

Chuvângin, keini Mizo Kristiante pawh hian Lal Isua ngaihpawimawh ber hi ngaihpawimawh berah kan neih ve a ngai a ni. Chanchin țha hril ngaipawimawh hnam apiang, a ram leh hnam ang pawhin an ding chhuak chak thin a, ngaipawimawh lo hnam apiang an țhuanawp thin. Mimal pawh, chanchin țha hril ngaipawimawh apiang an vengvain, an kâng chak a, ngaipawimawh lo apiang erawh chu an chut tulh tulh thin. Chhungkua pawh, chanchin țha hril ngaipawimawh apiang an êng a, hma an sâwn chak a. Ngaipawimawh lo chhungkua apiang an inchhûng boruak a hahthlâk mai a ni. 

Lal Isuan, a chanchin țha hril ngaipawimawh tute hnênah chuan khawvêl tâwp thlenga an hnêna awm a tiam a, Lal Isua awmna nun leh chhûngkua te, kohhran leh ram te chu a nuamin hma a sâwn lo thei lo a ni. Chuvângin, Mizo kristiante hian kan Lal Isua ngaihpawimawh ber nun hi dah hmasa ber ila, mission rawngbâwl nân kan sum leh pai lawm takin pe zêl ila, missionary tam tak tirh belh zêl ila, kan ram chu Lalpa'n min vawrh sáng tulh tulh mai dâwn a ni. Ram tina kal a, chanchin țha hril tûrin Lalpa'n kan ram hi min ko va, min buatsaih a, min hmang țan mêk a, nasa zâwka min hman zêl a la duh a ni (Mt.28:19).

Tin, kan rawngbâwlnaa ringthar Lalpa'n min pêkte chu an sualte Lalpan a ngaihdam tawh zia kan hrilh bâkah, Lal Isua zirtîrah kan siam a pawimawh a, Lal Isua thupêkte pawma, zâwm tûra kan zirtîr a pawimawh tel a ni. Chhandam an nih tawhna hrilha, kraws lama an fel tawhnaa duh tâwk sak rikngawt hi chu, thlai kui țiak teuhva, châwm zui si loh ang an ni ang. Enkawl zui an nih loh chuan an puitling zo lo mai a nga. Lal Isua pawhin a thupêkte zâwm thei tûra zirtîra siama, baptima chantîr a, zirtîr tlat hi a ngaipawimawh a ni a. Chu chu kan mission field-ah pawh hian kan rawngbâwl mêk dan niin a lang a , a lawmawm a ni.

(Tawngtai Dan Tur)
Lalpa, i ngaihpawimawh ber i chanchintha puan darh hna hi, i duh ang thinlung nei chunga thahnemngai taka ka thawh theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Vut Aiah Pangpar Thi (Sualna Chu Thatna In Min Thungrul)

"Vut aiah pangpâr thihrui te, lungngaih aiah hlimna hriak te, nguina thlarau aiah fakna silhfente an hnêna pekah Zion-a lungngaia awmte tan ruat tûr tein mi tir a ni: ani chu chawimawia a awmna tûrin, felna thing, LALPA phunte, tih an nih theih nân."(Isaia 61:3) 

He Bible thu hi ka en hian, Isua hlut zia min hriat chhuah tir thin.

Mi sual 'vut' ang mai a hman tlak tawh loh hi, a chhandamna ka chan ve avangin, Lalpa Isua mawina chuan 'pangpar thihrui' ah min thlak (tansform) ta a. Mei vap awm khawm hi vut tih a ni thin a, mei in a kan bang kha vut ah alo chang thin a ni. Chu vut chu, a lawng chuan engah mah a hman tlak tawh loh a, tui nen a inpawl erawh chuan chingal ah leh lei tih that nan erawh a tha hle a.

Kei misual 'vut' ang mai a hman tlak tawh loh hi, ka Lalpa Isua Krista chhandamna in min pawlh chuan, 'pangpar thihrui' ah kalo chang ta a ni.

Sual a piang ka nih avangin, chhandamna dawng chung pawhin sualah ka tlu leh mai thin a. Mahsela, inchhira thupha chawichunga, ka Lalpa Isua Krista min chhandamna leh min tlanna kross chu ka thlir apaingin.

I 'VUT' zia kha, ka zia, mawina zia hian 'Pangpar Thihruiah' ka lo thlak ang che, tiin min lo pawm leh  zel thin.

Sual ka tih theih zawng zawng hi ka tih kher a tul lo a nga, mahse Isua Krista Hmangaihna Chu A Thuk Em Avangin Leh A Chhandamna Chu A Chak Em Avangin, ka sual theihna zawng zawng pawh hian sual mah ila, chu ka sual chuan kan Lal Ropui Isua Krista hi a ngam thei lo a, a hmaah hlau leh khur chungin ka sual chuan chibai a buk zawk hial ang.

I Tisual A Nih Chuan, Isua Hmaah I Sual Puangin Thupha Chawi La. Tichuan, i sualna chu hetiang hian Lalpa'n thatna in a thlak sak ang che, "Vut aiah pangpâr thihrui te, lungngaih aiah hlimna hriak te, nguina thlarau aiah fakna silhfente" (Isaia 61:3a). Tin, i mawi lohna zawng zawng leh i mualphona zawng zawng chu, Isua'n a mawina leh hmingthatna in a thlak sak thei che.

(Tawngtai Dan Tur)
Lalpa, i hmangaihna hi nasa zawka ka hriat fiah theihna turin min pui la, i hmangaihna thiltihtheihna chu keimah a sual awm zawng zawng hi khuhbo turin a nasa tawk a ni tih ka hria a, ka tihsual pawh a, i hnen a ka kir zel theihna turin min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Pathian Rawn Hmasa Thin Mi Chu, HRUAITU Tha Chungchuang A Ni Thei Thin.

"Tin, Davida chuan, "Chungho chu um ila ka la umpha ang em le?" tiin LALPA a zawt a. Ani chuan a chhâng a, "Um rawh, i umpha ngei nge ang a, i chhanchhuak vek ngei ngei ang," a ti a."(I Samuela 30:8)

"Tin, mangang apiang te, leibat nei apiang te, lungnihlohna nei apiangte a hnênah chuan an kal khawm a; tichuan an hotuah a awm ta a; tin, a hnênah chuan mi zali emaw lai an awm ta a."(I Samuela 22:2)

Davida hian engkimah Lalpa a rawn thin avangin, hruaitu tha chungchuang a ni.

Davida zawm ve tu te ho hi, mangang te, leibat nei apaing te, lungnihlohna nei apiangte an ni a, indo han thiam tur tumah an awm lo. An dinhmun atang hian, hnam khat leh an khawtlangah pawh mi chak lo zawk an ni tih a hriat theih awm e. 

Mahse, an zui Davida chuan michak, ngam loh nei lo, finna leh remhriatna dinchhuaktu, Lalpa a rawn thin a. Lalpa chu Davida chungah a lawm a, a awmpui tlat a, Davida zuitu michak lo te pawh michak berah a siam ta a ni.

Lalpa a rawn thin avangin Davida chu michak tak leh mi fing tak a ni a. Ama hnung zuitu te pawh, Lalpa'n finna a pek vangin Davida hian a enkawl thiam em em a, mi tha zawk ah leh mi chak zawk ah a chher chhuak ta a. 

Amalek hoin an nupuite leh fanau te rallak a an lo man fai vek  tum hian, Amalek hote hi an chak ngang a, khaw dang pahnih Davida te awmna Ziklag an lak baka la tel thei tur khawpin an chak a. Davida chuan, Pathian a rawn a "Lalpa'n um rawh" a ti a, Davida hian a ho te hnenah va um ang ule a tih ve leh hian, a hote hian kan "Hneh Leh Ngei Dawn A Nih Hi" an tih nghal a rinawm, Lalpa'n Davida a awmpui tlat avangin. Pathian vanga chak an ni ber a, chutih rualin chak rilru an put tel sa tlatna chuan, nasa takin a tichak nghal bawk thin a ni.

Davida bakah Mosia, Joshua, Gideona, Zeptha leh midang te pawh, bible a hruaitu tha kan hmuh te hian, engpawh an tih dawnin Pathian rawn nachang an hrethin a, tichuan Lalpa'n a awmpui tlat thin a, hnehna a chan tir zel thin a ni. 

Lalpa rawn nachang i hre ve em?

(Tawngtai Dan Tur)
Lalpa, engkimah tawngtai a nangmah rawn turin min ti a, he i thu hi ka zawm a, engkimah nangmah ka rawn hmasak zel theihna tur che in min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

I Zirtur I Zir Em (Rethei leh Pachhia chawikangtu Lalpa)

"Ani chuan rethei chu vaivut ata a kai tho thin a, Pachhia chu ekdur ata a chawi kang thin"(Sam-113:7)

He thu ziaktu hi Davida ni a ni a, Davida fakna hla te zing ami a ni a. 

Davida khan Lalpa hi fak a duh mai a ni lo, a rilru a thu awm zawng zawng a sawm khawm a, Lalpa a fak theih dan zawng zawng a fak a tum a, Lalpa nasa zawk a fak dan a ngaihtuah a, a zawn in a zawng bawk a ni.

Tah chuan a hun kal tawh te a ngaihtuah let a, he thu 'sam-113:7 na' hi a fakna tawngkam pakhat chu alo ni ta a.
Pathian chuan amah lal Davida ngei pawh ' vaivut ata a kaih thawh' a nih zia a in hria a nih a rinawm a, Beram vengtu ek rim nam an tih thin, an chhungkaw inhmuh khawmna ah pawh an koh tel ve duh loh, 'Pachhia ekdur ami, a chawi kan' chu niin a inhriat a rinawm bawk a ni.

Lalpa chuan, rethei te leh pachhia te a chawi kang thin ngei a, Davida mi hniam ber mai kha, lal ah Pathianin a hlangkai a ni. Hei hi zawhna chu a ni ta a ni, retheiin i inhria em? Lalpa hi rethei te chawi kangtu a nih si chuan tinge, Lalpa'n a chawikan ve rih loh che le? Tih lai a hi han in zawt chhin teh le.

Tuna i nun ah khan Lalpa'n zirtur a pe che a, i zir em, i nun a zir tura Lalpa'n a pek che kha i zir thiam loh chuan eng angin dinhmun sangah pawh ding la, hreawm i ti tho tho ang. Davida chuan, a beram venna ah Lalpa a, lawmna a zir chhuak a, Lalpa a fak thin a, chu chuan a beram venna ah chuan beram vengtu tha ber a nih tir a, chu mai bakah Lalpa'n chakna nasa takin a thuam a ni. 

Kan beram venna, kan nitin hna leh tih thin ah te hian, keimah ni bik ngo ngo ah a tha ber kan ni em. Kan nih loh chuan tinge kan nih loh chhan, Lalpa a lawm chhungin kan nitin hna leh nun kan hmang lo a ni thei a ngem, Lalpa a lawm turin, amah kan zawng lo em. Lalpa zawng miah lotu chu, Lalpaah a lawm ngai lo a ni.

Nih leh ka nghak rei tawh lutuk i ti em? Davida khan Lalpa zirtirna nun leh hmun ah khan kum 15 lai thuawi takin a awm a, amah thah tumtu leh mahni in lumah pawh awm tir thei lo tu, Saula kha a thah theih laiin a that duh lo a. A chhan chu Davida'n a zirtur a zir a ni, amah thah duhtu te nen pawh inbeih ai chuan remna siam a pawimawh zawk tih hi a zir a ni.

Lalpa min zirtirna hi pawmin, zir a ngaih chhung chu eng ang pawhin hautak sela, kan zir ve duh a ngem?

Min dah duhna hmun chu a san poh leh a zir hun chhung a rei a, zirlai pawh chu, a har bawk thin a ni.

Lalpa zirtirna ngaina mi chu engang pawhin retheiin harsa'in bet mahse, Lalpa'n khawvel mit hmuh hmaah, mi ropui bikah a siam thin a ni.

(Tawngtai Dan Tur)
Lalpa, min zirtirna hi ngaipawimawh thei turin leh min zirtir i duh chu, thu awi taka ka zir thiam zel theih nan min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Kristian Puitling Zia Te

"Unaute u, rilru lamah naupang suh u; amaherawhchu sual kawngah zawng nausen ula, rilru lamah erawh chuan puitling rawh u."  (1 Korinth 14:20)

Kristian puitling zia thenkhat te:

1.Thu dik chauh an sawi a, an tan bawk. 
2. Mite harsatna ngaihthlak saktu tha tak an ni. 
3.Mi rilru khei zawngin an tawng duh lo.
4. Mi ngaihdam an harsat lo. 
5. An rintlak a, innghah ngamna an ni thin. 
 6. Tawngtai leh Bible chhiar an thlahthlam ngailo, an chak em em zawk. 
7. An mihring hriatna nilo in, Pathian thu ah zawk an in nghat thin. 
8. Pathian in a chawisan pauh leh an inngaitlawm tial tial. 
9. An mahni hma an sial khat khawp. 
10. Tisual mahse Pathian lamah an in lamlet vat thin. 
11. Thenawm khawveng an hmangaih thin. 
12. Tawng hun leh ngawih hun an thliar thiam thin. 
13. An mihring puite ngaihdan an zah thiam sak thin. 
14. An dawhthei a, an thin a rim phut phut ngailo. 
15. Pathian an tih em em a, mihring aiin an hlau zawk thin. 
16. An chantawkah an lungawi thei. 
17. Zirtirna dangdai deuhin a tibuai ve ngailo. 
18. Hruaitu tha an ni a, zuitu tha an ni tel bawk thin. 
19. Rawngbawlna ah chuan in senso an inhuam hle thin. 
20. Mi rel leh hmuhsit an duh lo. 
21. Kohhran an ngai pawimawh. 
22. Midang an er ngai lo, midang aia ti tha bikah an in dah ngailo. 

Heng kan sawi bak pawh hi a la tam ang. Ringtu nun chu a thang zel tur a ni. Than kin ni a neilo, mahse puitlin hun erawh a nei a ni. 

Kum lama tam ringawt hi ringtu nun puitlinna a nilo a. Pathian in min hmuhdan atanga kan nitin nundan tur teh a, Pathian lungawi na tura kan nun hman hi ava pawimawh tak em.

(Tawngtai Dan Tur)
Lalpa, ringtu naupang ber pawh hmang duh mah la, i duh ang ringtu puitling ka nih theih na turin min zirtir zel la, i kawngah ka nun hi hruai tlat zel ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Beisei Loh Lam Atanga Beitu Che Kha, I Hneh Theih Nan Lalpaah Awm Reng Rawh.

"Tin, Paula chuan thing tel khat a fawm a, meiah a tuah a, a sat avangin rul a lo chhuak a, a kutah a chu a, a bet reng a."(Tirhkohte 28:3) 

"Nimahsela ani chuan rannung chu meiah a thing thla a, engmah a ti lo va."(Tirhkohte 28:5)

Paula te kha, tuifinriat ah lawng hun rei tak, a chhuah atang hun (season) a in thlak tawh hial a, thlipui leh tuifawn a nasat avangin an duh ai rei tuipuiah chuan hreawm ti takin an zin a. Tichuan, an lawng chu thlipui leh tuifawnin a nuai chhe vek a, mahse Pathianin a awmpui avangin engtin emaw ti ti in Meliti thliarkar kamah an in hleuh kai a. 

Chu tia an in hleuh kai a, tui vawt leh thlipui hreawm tak atang an chhuah a, an awm hahdam ve chauh tur leh vawt an ti lutuk'in an han in ai lum tur chu, an mei chhem atang rul a rawn chhuak a, Paula a chuk a, mahse Pathian mi Lalpa a awm tlat Paula chu, rul turin a ngam lo a, rul chu meiah a thing thla a, rul zawk Paula tihnat tumtu chu a thih phah zawk ta a ni.

Kan nunah pawh hian, rei tak kan han bei fat fat a tiro, mahse a tawp kan thleng dawn ta a, kan hahdam ve thei dawn ta kan tih laiin, eng emaw min ti hnual fawk thei te, min ti na sawk thei thil te emaw a rawn chhuak thin a ni tiro. Heng hunah hian Lalpaah awm tlat ila, chu min beitu chu, Paula'n amah chuktu rul mei a, a thin thlak a, rul chu a thah ang khan. Kan thing thla ve thei a nga, sual min beitu chu Lalpa chakna ringin kan that ve thei dawn a ni.

A bul atang a tawp theng, Lalpa vang chauh a ni ti zel ila, Lalpa ah awm tlat ang u.

Paula rulin a chuk khan, Meliti thliarkar a mi te khan misual a nih hi, an ti a. Mahse, Paula rul turin a ngam loh hnu kha chuan, pathian emaw an ti ta thung a, biak an tum leh ta hial  zawk a nih kha.

Hetiang chiah hian Lalpaah, a tawp thlenga kan awm chuan, Lalpa'n a hun takah ama khawngaihna avangin min la chawimawi ve dawn a ni.

(Tawngtai Dan Tur)
Lalpa, sual chuan ka rin loh lam atangin leh ka inrin loh laiin min bei thin a, keimah chuan ka hneh thei ngai lo a ni tih hi ka in man a, engtik lai pawh a, belh tlak, engkim ngamtu, Lalpa nangmah ah awm reng nachang ka hriat theih nan min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Lalpa Mit Hmuhah Chuan Tinatu Ai Tuamdamtu Chu A Mawi Zawk Thin

"Hmangaihnain a dawh thei a, ngil a nei bawk thin."(1Korinth 13:4a)

Tu emaw i hmangaih chuan tawngtai sak tlat rawh. Tu emaw i theihnghilh theihloh chuan i tawngtai sakna a mamawh vangin I thinlung ah Lalpa'n a dah tlat a ni thei asin. 

Ka thianpa hian hmeichhe duh deuh a nei a, kum 1 chuang chu an inkawm tawh a. A hmangaih thu hrilh a tum lai takin bialpa a nei tih a hmeichhia chuan a hrilh ta a. A sawi zawng ringawt pawhin, a rilru a na lutuk tih chu a hmel ah a hriat a ni. Engtin nge i tih dawn ka tih chuan, "Ka tawngtai sak tlat dawn, a chhan chu kan hmangaih te tana kan tih theih ropui ber alawm" a ti a, chutiang taka rilru dik a put avang chuan Pathianin a nat reng a phallo a, a dam tha leh thuai a. A thiannu pawh chu a ngaihzawng nen harsatna an neihin a pui let thin ta zawk a ni.

Kan bible chang tarlan ah hian Hmangaihna chuan a dawhthei a, a ngilnei tih kan hmu a. Mi then khat chu kan hmangaihna hi a dawhthei teh meuh a mahse a ngil nei tello thin a ni. 

In ngaihzawnna inkarah emaw nupa inkar ah kan duhthusam diak diakin thil a thleng ngailo ang. Kan kawppui te chu duhthusam lohna lai tamtak a awm fo ang. Chutiang hunah chuan kan dawhthei tur a ni a mahse mi thenkhat hi chuan an kawppuite an dawh tih kha an hre leh lutuk a, an dawh nasat zia hmang ten an ankhum a, chutiang chu hmangaihna tluantling a nilo. Hmangaihna dik tak chuan a dawh anga, a ngilnei bawk ang. 

"A che mawi lo lo va, mahni hma a sial lo va, a thinur duh lo va, sual lamah a ngaihtuah lo va." (1Korinth 13:5)

Tunlai in ngaihzawnnaa buaina chhuah chhan tam ber chu in ngaih pawimawhna leh inpekna (Commitment) a awm thin loh vang a ni. In hmangaih kan awlsam a, inthen kan awlsam leh em em bawk a. Ringtu chuan mi thinlung hmangin a infiam tur a nilo. Nupui leh pasal tur atana a duh loh chu a ngaizawng tur a ni lo. Hun inkhawhral sakna a ni. Kan duh loh tur hi chu a tir atangin, biak dan tawk leh chhandan tawk thiam ila, beisei ngam tur keimahni ah an hmuh loh chuan, an rilru keimahni ah a bet lo a nga, midang rilru tina tu kan ni lo mai dawn a ni.

Bible in hmangaihna dik tak a sawi anga kan hmangaih theih tur nghak tlat ila. Ngaihzawng emaw nupui/pasal kan lo nei mek a nih pawhin he Bible a hmangaihna dik a sawi hmang hian kan kawppui te kan hmangaih tur a ni.

(Tawngtai Dan Tur)
Lalpa, tu thinlung mah i ti na ngai lo a, midangin ka thinlung an tina thei e, mahse kei chuan tu thinlungmah ka tih nat loh a, nangmah neitu ka nih angin midang te tuam damtu ka nih zawk theihna turin min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Hlau Suh I Rin Ai Lalpa'n A Hnaih Che.

"Tin, ani chuan, "Hlau mata che; an lama tangai chuan kan lama tang an tam zâwk alawm," a ti a. Tin, Elisa chuan a tawngtai a, "LALPA, a hmuh theihna tûrin a mit han tihmensak teh ang che," a ti a. Tin, LALPAN chu tlangvâl mit chu a han tihmensak a; tichuan a hmu ve ta a; tin, ngai teh, Elisa vêlah chuan tlâng chu mei tawlailir leh sakawrin a khat mup mai a."(I Lalte 6:16-17)  

Pathian hnenah awmpuina emaw, tanpuina kan dil hian min beng khawn lemlo ni te hian kan hre thin a, mi tam tak chuan kan au ei zo tawh lo te kan ti thin. 

Lalpa'n min hlat emaw kan tih hian, Lalpa'n min hlat ngai lo a, keimahni zawkin Lalpa hi kan lo hlat zawk a lo ni fo thin.
Kan Pathian hian, engkim chungah ro a rel a, sual chungah pawh hian ro a rel a, mahse sual chuan min beih a phal a, a chhan chu duh thlang thei in min siam a, chu kan duhthlanna ngei chuan amah chu thlang turin min duh a ni. Sualin min bei a nih pawhin, Lalpa phal chin bakin min bei ngai lo tih hi Joba chungchangah khan a chiang hle awm e.

Lalpa ah kan innghat a nih chuan, Zam ngai reng reng lo ang u, he kan khawvel  zawng zawng hi kan Pathian Chaka hian a hmu chhuak vek a, a hre vek a sin "A lama rilru dik tak pûtute chunga a chakzia tilang tûrin khawvel zawng zawngah LALPA mit chu a leng ruai ruai thin a ni.(II Chronicles 16:9a)

Pathian hnen ah tawngtai a, a awmpuina kan dil a nih chuan, zawlnei Elisa a vantirhkohte awmpui tura a tirh ang hian, keini pawh min awmpui turin a vantirkohte kan hnenah a dah reng a ni.

Hei vang hiang, engkimah, engpawh kan tih dawnin tawngtaiin kan tih tur te hlan hmasa ila, tawngai i hlamchhiah ngai lo ang u.

Lalpa'n min thlir reng a ni tih hriain sual lakah in thiar fihlim bawk ang u.

Isaia 65:24 ah chuan "Tin, heti hi a ni ang a, annin mi koh hma pawhin ka chhâng ang a; thu an la sawi lai mek pawhin ka bengin ka hria ang." a in ti a, kan Pathian hi hetiang taka min hnaih reng a, a awm a nih chuan engpawh thleng se, hlau a mangang tur kan ni lo a ni.

(Tawngtai Dan Tur)
Lalpa, ka nu leh pa te leh ka chhungte pawhin min hnaih reng theih loh lai pawhin nang chuan, engtik lai pawhin min awmpui reng a, min hnaih reng avangin ka lawm e, ka kiangah i awm reng tih hi ka hriat reng theih nan leh, i thu ka zawm tlat theih nan min pui ang che, Amen. Ti ang o.


Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

SETANA BEIH NANA RALTHUAM THA BER

"A tawp berah chuan Lalpaah leh a chakna thahruiah chuan thiltihtheihna neiin lo awm rawh u" (Ephesi 6:10)

Paula hian Lalpa chakna rinchhana thiltihtheihna nei turin min fuih a ni. Mahse engtin nge Lalpa ah chuan ka chak ang? Lalpaa chak dan chu enge ni ta ang le? 

Chakna hnar tha ber chu Lalpa chunga lawm tlatna hi a ni. 

"Lalpa ah chuan lawm fo(sap bible ah chuan always/reng tiin a inziak) rawh u ka ti lehpek thin ang lawm rawh u"(Philippi 4:4)

He Bible chang hian Lalpa lakah lawm RENG turin min ti a ni. I nuna thlipui leh tuifawn rawn nuaitu che te, i harsatna, i natna te ah khan i lawm thei kher lovang, lawm tur pawn a ti lo che a ni. Mahse Lalpa ah zawk lawm reng turin a ti a che a ni.

A chhan chu maw:
"LALPA chunga lawmna chu in chakna a ni si a,"(Nehemia 8:10)

Chu Lalpaa i lawm tlatna chuan chakna a pe dawn che alawm. 

Pathian hian i harsatna lakkian sak che a tum lova, lak kian sak che pawh nise a dang i hmachhawn leh dawn tho. I HARSATNA KHA HNEHTIR CHE A TUM ZAWK A NI.

Ringtu Pathian chunga lawmna zawng tlat te chu setanan a ngam ngailo, Pathian in lawmna tur a pek belh zel bawk a ni. 

Chuvangin kan chakna hnar tha ber chu Lalpa chunga lawm tlatna hi a ni.

(Tawngtai Dan Tur)
Lalpa, nangmah a ka lawm tlat theih nan i hmangaihna ropui zia leh i that zia min hmuh fiah tir ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.