Sum Tam Tak Aiin Hming That (Thufingte 22:1 Commentry)

"Sum tam tak aiin hming tha hi thlan zawk tûr a ni a, Tangka leh rangkachak aiin duhsakna a ngainatawm."(Thufingte 22:1)

Thufing hi Solomona ziah a ni a, a fin zia leh a hausak zia kan hriat theuh a rinawm, a hunlai a lal ropui ber leh mihring hausa ber leh fing ber ni bawk chuan "Sum tam tak aiin hming tha hi thlan zawk tûr a ni a" a tih chhan hi Bible zir mi tam takin an hrilh fiah a, Benson te, Matthew Henry te, Barnes te, Gill te hrilh fiah dan a in ang tlangpui nge nge bawk.

Benson Commentry chuan ti hian a sawi a, " Mihring hi alo hausak hian, ngaihtuah tur leh enkawl tur a nghah phah a, mi pangngaiin an mamawh loh tam tak a mamawh bawk a, hausakna hi mihring zawng zawng duh anih vangin, mi hausa chu dinhmun hlauhawm ah a dah thin a, ama hlutna chu a hausa emaw a rethei emaw a ngai reng si a, a ti. 

Tin, hmingthatna a thlan awm zawk chhanchu," mi hmingtha chu mi Fing ah leh mi Dika ah leh Pathian tih mi a ngaih a ni thin a (he ngaihdan hi dik pawh a dik tlangpui a) chu chuan nasa takin mihring hi Tha Tihna Kawngah A Hruai Thei Thin" a ni a ti.

Gill's commentry chuan,"Tangka leh rangkachak aiin duhsakna a ngainatawm," tih hi ti hian a sawifiah a," Pathian chu a duhsaka te chunga ngilneih thin Pathian a ni a, a duhsaka te chungah a hmangaihna a lan tir bawk thin, he Pathian duhsakna hi nun ai pawhin a hlu zawk a ni," a ti.

Keini pawhin han chhut ve ta mai mai ila, Pathian atang Tanka leh Rangkachak nge kan dawn duha, a Duhsakna ti ta ila, a Duhsakna kan ti theuh awm e.

Lalpa mithmuh hmaa mi Hmingtha chu Isua Krista chhandamna changtu te an ni a, chung mite chu Lalpa'n a Duhsak thin a, Lalpa'n a duhsaka te chu a Ngaihsak bawk thin a ni. An tihsual palh pawhin ka fapa Isua Krista'n a thisenin a tlan tawh kha, ka hmangaih ka bang dawn lo a tih ngei a rinawm.

Chuvang chuan, chhamdam fate hi " Lalpa Duhsakna changtu te kan nih avangin, tho ila Lalpa tan i bei zel ang u." Amen.

(Tawngtai Dan Tur)
Lalpa, i duhsakna ka chan theih nan, nang chu insengsoin i fapa Isua Krista chu min pe a, Krista zarah chuan i duhsak fa ka ni a, i ngaihsakna changtu ka ni bawk a, hei vang hian i hming ti mawi tur ka ni a, ka phak ang tawkin i hming ka tih mawi theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Rinna Nen Kan Tawngtai Em? (Pathian Aw Leh A Chenchilhna)

"Tin, engkim ring chunga tawngtaia in dil apiang chu in hmu ang," a ti a, a chhang a."(Matthaia 21:22)  

I tawngtai hrim hrim khan eng emaw chenchu i ring tawh a ni. Ringlo ni la chuan i tawngtai kher lo ang.

Rinna hi neih thut theih a ni lo a, rinna hi Pathian hnena kal dil fo a tul a, kan tawngtai hian a rei ve deuh te hi a ngai a, a chhanchu,  Pathian chenchilhna (presence) a kan luh loh chuan rinna tak tak hi a neih theih loh a ni, a chenchilhna a lut tur chuan tawngtai rei hi a tul thin a ni (engtik lai pawha tawngtai rei kher tur kan tihna a ni lo). Rawngbawltu ropui thenkhat te chuan Pathian chenchilhna a luh hnuah, dilna thlen chauh tur te an ti thin a, Pathian chenchilhna hi an ngai pawimawh takzet a ni.

Pathian chenchilhna a lut tur chuan kan rilru zawng zawngin Pathian lam chauh a hawi a ngai thin a, thil tamtak kan rilrua a awm thin avangin, kan rilru dah ruah chhung hi a rei thin a ni.

Sam a fakna hla ziaktu lal Davida chuan, a tawngtai hmain Pathian thatna te theih tawpin a puangchhuak thin a, chu chuan Pathian chenchilhna ah chuan a hruai lut thin a ni.

Pathian chenchilhna atang chuan miin, Pathian Aw emaw, Pathian Tlamuanna leh Hriat theihna a nei thin a, chuta tang chuan, rinna tak tak chu alo nei theih thin a ni. 

"Tin, azanah chuan Lalpa chu Paula kiangah a ding a, “Thlamuang takin awm rawh, Jerusalem khuaa ka thu i hriattir ang bawk hian Rom khuaah pawh i hriattir tur a ni,” a ti a"(Tirhkohte 23:11). He thu atang pawh hian a chiang awm e, Paula khan Pathian aw a hre tawh a, chuvang chuan Jerusalema an man khan a zam eih lo a, lawngin Rom an pan a chhiatna nasa tak an lawngin a tawka a zam eih chuang lo a, thliarkar Meliti ah rulin a chuka Rul Tur Khan Tinge A NGAM Ang Pathian Aw A Hre Tlat Alawm. Hei vang tak hian Pathian aw hriat hi a pawimawh a ni.

Thlarau Thianghlim chenchilhna tello  chuan, rinna kawngah hian a kal tak tak theih loh tih hi kan hriat reng a pawimawh hle a. Thlarau Thianghlim chenchilhna leh ring tura Thlarau Thianghlim puihna changa, Pathian hnena kan dil chu, Lalpa'n min chansak ang.

Pathian chenchilhna Thlarau Thianghlim chenchilhna ni tho bawk hi, kan ngaihpawimawh a ngai a, chu mi neitur chuan Pathian thuah awm ila, Pathian tan invawng thinghlim bawk ila. Tichuan, Lalpa chenchilhna atang chuan, a aw kan hrethei a nga, chu chuan rinna tak min pe a nga, kan dilna te hi min chhansak ngei ngei dawn a ni.

(Tawngtai Dan Tur)
Lalpa, nangmaha rinna tak tak nei turin theihtawp chhuahna chang ka hriat theih nan min pui la.  I chenchilhna changturin thahnemngai taka ka tawngtai tlat a, i aw hreturin i aw ka ngaihthlak tlat theih nan min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

I Hre Chiang Em Isua Hi?

"Isuan an hnenah, “Ka hrilh tawh che u kha, in awih si lo; ka Pa hminga thil ka tih hi, heng hian ka chanchin a hriattir a nih hi."(Johana 10:25)

Juda ho khan Isua hi, chhandamtu an nghah kha a ni tih an hai a, an lo hnar a, an khengbet a ni. Isua kha Krista lei leh van dintu, tumahin an ngam loh, malsawmtu leh thlamuantu a ni tih kha hria se an khengbet lo ang. An hrelo, an hriat loh chhanchu an HRIAT Duh Tlat Loh Vang A Ni.

Zeng a ti dama an do tlat tho, ramhuai a hnawt chhuaka ramhuai lal zawlah an la ngai lui tlat, kebai pawh a ti dam, Lazara pawh a thia Isuan a kaitho leha an awi duhlo a Lazara kha an chhui vel a ni, chhangper panga leh sangha pahnihin mi sanga a hrai a, a hnu ah chhangper pasarihin mi sangli a hrai leh bawka, aw! Amah an rinna athu an Awina tur khawp chuan thilmak leh thil ropui, zawlnei zawng zawng la tih ngai loh a ti tawh a sin, mahse awi loh chu an thlang zawk si.

Tichuan, an do tlata an khengbet ta a, a thi a, ni a thim a, lir a nghinga, puan zara thlera, a nakah pawh feiin an chhuna, a thi tih an chian thlapa. 

Thlanah an zalh a, miin a ruang chu an rukbova a tho leh an tih loh nan sipai pawh an ventir thlap a, ti chuan kan Lalpa chu a tho leh a, a tho leh tih an hriat reng hnuah pawh an la ring duh chuang lo a, sipai a thlan vengtu te khan a tho leh tih chu an sawi pun loh nan pawisa an la pe cheu a nih kha.

Keini pawh hian, kan Lalpa Isua Krista hi Hlimna a nih te, lawmna a nih zia te, amah chauh chu vanrama min luh tir theitu chu a awm tih te, malsawmna tamtak min pe theitu a nih zia te, lei leh van chungah a ro a rel tih te, kan hmu alawm, a hmingin a rawngbawltu ten thil ropui tak tak an tih chanchin te leh ama hnungzuitu te thlah te chu a ngaihsak thin zia leh a dinchhuah tir thin zia te kan hmu a kan hria a, Isua hi kan pawm lo ve cheu dawn em ni le?

He blog chhiar thintu te chu, Pathian neitu kan nih theuh a rinawm a, Isua neitu kan nih avang chuan mawhphurhna kan nei ta a, kan chheh vela kan unaute Isua Krista lo chu engmah himna leh hlimna tluantling a awmlo tih hre reng a, a kawng la thlang lo cheu te hi kan hrilh fiah fo a tul awm e.

Kawngaihna Avanga Chhandamna Kan Channa Phenah Hian, Nang Leh Kei Hi, Mawhphurna Pawimawh Tak Pek Kan Ni.

(Tawngtai Dan Tur)
Lalpa, nanglo chu damlai nun thlamuanna tluangtling leh thihhnu nun chawlhna min pethei reng, tumah an awm lo tih hi, hretu a min thlan ve avang hian ka lawm e. Nang chu, kawng leh thutak leh nunna i nih zia hi, midangte hnenah ka hril theih nan min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

THEIHNA I NEI A NI

"Tih tak meuhvin ka hrilh a che u, tupawh he tlang hnenah hian, ‘Lo insawn la, tuifinriatah! lo inpaih rawh,’ tia, a rilruaa ringhlel lova a sawi chu a lo thleng ngei ang tih ring apiangin an sawi ang apiang chu an hmu ang."(Marka 11:23) 

"Nimahsela ringhlel hauh lovin rinna neiin dil rawh se,ringhlel tu chu tuifinriat fâwn thli chhem len leh vawrh ang ani sia."(Jakoba 1:6) 

A hmasaa kan hriat tur chu Bible a TLANG a sawi hian harsatna (difficulties or problems) chi hrang hrang a entir thin a ni.

Kan nun ah hian harsatna te leh thlemna te hi tawk lo tur kan ni lova, harsatna pakhat kan hneh hnûah pawh harsatna dang hi chu a lo thleng veleh zel thin a ni tih kan hriat a ngai.
Mahse heng zawng zawng hi zirlai tha tak an ni thin.

Eng vanga harsatna hi tawk reng bik nge ka nih tia zawhna tamtak neiha, beidawn mai hi a awl duh em em a.

Heng zawng zawng kara kan hriat hmaih palh thin chu Setana hna thawh ber chu mi te tih tluk, tih beidawn leh tih buai hi a ni. A thanga min tal awh tirin beidawng taka min siam a min tih chhiat vek hi a duh thin a,tichuan, a phena thil inphumru hmu fiah thei lo tur khawpa kan mit leh beng khup hi a tum reng bawk a.

Mahse, a aia ropui leh chak zawk heihi kan hriat leh a ngai a. DODAL THEIHNA THÛ PEK I NI, (Jakoba 4:7b)
"Diabola dodal rawh u tichuan a tlan bosan ang che u."
Thu petu che chu engkim chunga thu neitu Pathian a ni tih hre reng rawh.

A tha ber, a chak ber ni tur hian intlansiaknaa a tlan chak ber nih kher a ngai lova, Indonaa hnehna chang tur pawhin, indo mi a chak ber leh tihrawl tha ber leh tha ngah ber nih kher angailo,(Davida & Goliatha)
Mi fingtak, thluak tha leh rem hre ber ber te hi mi hausa ber leh hlawhtlinna, duhsakna tinreng dawngtu te an ni vek kher lo.

Chuvang chuan hnehna changtu te chu, Pathian, hun leh nite hian an tan hun an lo ruat ve thin a, a nghak peih leh beidawng lo a bei fan fan tu te leh Pathian aw ngaichanga dawh thei tak a nghak tute hian hnehna chu an chang thin zawk a ni.

Nghahchhung a rei, ka nghakchhuak zo tawh lovang, tiin i vui thin tiraw? 
A malsawmna leh hnehna chang pha chiah lo hian kan lo beidawnsan thin a. 
I lo ringhlel a,chuvang alawm a lo thlen loh!!!

Nupa inkar ah leh in ngaihzawnna ah pawh in rinhlehna a awm tawh chuan abuai nuai thin a, thil a nih tur ang a nih loh phah thin."Ringhleltu nihna chu i hriat kha, rinhlehna chuan a ti chhe thin a nia." (Jakoba 1:6)


Lei thiltihtheihnaah chuan thihna leh nunna a awm a,
A ngaina tute chuan chu mia rah chu an ei ang. (Thufingte 18:21) 

I ngaihtuahna ah chuan thil thalo leh athim zawng hlirin alo lang thin em?
Mahse,heihi kan hrilh leh zeuh ang che, i ngaihtuahna kha Setana'n a hre theilo.!

Amah erawh chu, I lei (tongue) rah chu i seng dawn a ti anih chu.

Ka tan dam hian awmzia a nei ve tawh lo! ti reng reng suh.

Damchu ka chak lova,mahse ka dam anga ka hneh ngei ang tiin infuih zawk rawh.

I beidawng viau anih pawhin, engtikah emaw chuan ka hneh ngei ang tiin in fuih sauh sauh rawh.

Theihna i nei a ni tih pawh inhrilhnawn fo rawh.

I inchhungkhurah buaina nasa tak intawk a, sum leh pai ah inhmuingil lova, i nun chu harsatna hlirin a khata, i nun chu athim mup thin em? 

Tihian lo sawi rawh. Hnehna chu Lalpa ta a ni a, Krawsah khan engkim a hneh tawh a, thuneihna zawng zawng pawh laklet a ni tawh, natna zawng zawng pawh hneh a ni a, ka sualna zawng zawng pawh. Isua Krista thawhlehnaa hnehna
avangin Theihna chu ka nei a, ka kut ah leh ka kâ ah ngei hian a awm a, sual phuarna zawng zawng ka phelha, Isua thisen avanga venhimna leh hnehna chu ka chang zel ang. Thil thalo reng reng ka inhneh tir lovang a, Setana bumin ka awm lovang, tiin.

(Tawngtai Dan Tur)

Lalpa, kross a nangin min hnehsak tawh avangin, ropuia ngamtu ka ni a, theihna min pek avangin ka thei tih hi hria a, nangmah hmachhuana bei zel turin min pui ang che, Amen. Ti ang o.

Kan Inthenna Hliam Atanga, Ka Thawhchhuah Leh Theihna Chhanchu Tawngtai Puitu Ka Neih Vang A Ni

" Chutichuan, tihdama in awm theih nan in sualte thupha chawi tawn ula, intawngtaisak tawn thin rawh u. Mi fel tawngtaina chuan thil nasa tak a ti thin." (Jakoba 5:16 )

Ka kalsan chhan che chu, nangmah nen mipat hmeichhiatna kan hmang emaw, ruihhlo ka tih phah lam emaw a nilo a. Mahse, Pathian hi a hmaa ka hnaih angin nang nen kan in zui lai khan ka hnaih theih loh vang a ni. Ka thiam loh zawk te pawh a ni ang, kan inhmuh dawn chuan inkhawm loh maite ka hreh lo a, nangmah ka vei tut tut che a, tawngtai pawh ka tawngtai hleih theih loh phah a ni. 

Ka la be reng duh che a, mahse biak loh zawk che ka thlanna chhan chu, ka rilruah i thar zual zel vang a ni. Hei hi ka hrilh ngai miah lo che a, ka la ngai thin khawp mai che tih hi, inneihnaa ka kal changte leh ka chhuah vah changte hian i kal ve lo tih hre reng chung pawh hian ka zawng rilru thin che asin.

Ka duhsak ber che chu, Pathian nen intawnna tak tak i neih hi a ni a, chu nun chu nang nen kan in zui lai khan kan pahnihin lo nei ni ila chuan, biak in maicham hmaah i kut vuanin ka tiam tlat e tih chu ka duhthusam ber leh ka tawngtai chhanna chu a ni ang. Hui Haaa!!! Hmangaihna kalsan tul, dawn kira, duhthusam kir leh hi, e nge a sawtna awm chuang le? Mahse, ka kir leh lo thei lo chu a nih hi.

Hetiang taka, duh si che hi, tinge engpawh thleng dawn se naktuk hre pha tumah kan awm hleinem, hmahun chu hmahunin a rel ang tiin ka thap (risk) loh le, te ka la ti hial a. Mahse, kan inkarah khan a pawimawh ber Isua a leng lo tial tial a, in nei pawh ni ila, kan inngaihzawn laimah a Isua hnawk kan tih chuan, kan inneihhnuah kan ngaihpawimawh thar thut theihna tur ka hre lo a ni. Chutianga, Isua ngaipawimawh lo a, innei ta te ka en hian, sual vanga an tawrhna nasa lutuk chu, nang nen hian tawng ve lo ila ka duh a, chutiang ang harsatna nasa tak atanga chuan, ka chhanchhuah theihna tur che chu, nangmah kalsan che hi a ni.

Ila hria em, bike a kan chhuah dun tum kha, bike break a chhiat vang khan thui deuh kan nawr a nih kha, kha mi ni a, i fiamthu thawh te kha ka bengah ala cham reng. Hah pawh hre lek loin kan nui a nih kha, i chhungte lahin an lo ngaihtuah lutuk che a, i bum kual dan vel te kha, la hre ve tak ang che maw.

Keimahni ang a, Pathian tello a, inngaizawng hlim em em te hi chu, an inneihhnuah an hlim thei tawh ngailo thin a. Nupa hlim te hi chu, Pathian dah lal tlat a, inhmuh ai pawha rawngbawlna thlang thin zawk te hi an ni a. Inngaihzawn laiin harsa an ti a, inneih hnuah an hlim leh thung a, keini te ang erawh inngaihzawn laiin kan hlima, inneihhnuah kan lungngai leh thung thin a. Chutiang, nun hlawhchham chu, kan neih dun loh nan ka kalsan ta che a ni.

Ka kalsan che khan, a harsa ka ti, vanduai bik ka inti, duh tak tawn a har teh lul nen a, ka tawn ve chhun a kalsan a ngai bik hi ka ti a, zan mut loh te hi ka ngaineih hial a, mi min biak te pawh ka hre mai theilo thin bawk a, chaw awm dan pawh hi ka theihnghil zoin ka hre hial a, Pathian hnenah pawh ka vui a ni. Mahse, Lalpa chuan "Kei Pawhin Tawrhna Nasa Tak Tuarin I Man Ka Pe A, I Duh Em Em Kristian Chhungkua Pawh Hian Man A Nei Ve A Nih Hi" a ti a.

Keimah chuan ka tho zo lo a ni, mahse Lalpa chuan ka natna min tuamdamsak hi a duh zawng tak a nih avangin, min tawngtai puitu tur leh thlamuanna tak tak Isua chanchin min sawi puitu tur min pe a, chung vang chuan ka tho leh ta a ni.

Lalpa'n Tawngtai puitu tur a pe che a nih chuan, nangpawhin ngaipawimawh ang che. An rawn bia che emaw, an rawn tlawh che a nih chuan, i harsatna zawng zawng hrilh hreh suh ang che, Lalpa hmaah i mamawhna zawn takah an dinpui theihna tur chein, i harsatna te hrilh zel ang che.

(Tawngtai Dan Tur)
Lalpa, min tawngtai saktu tur min pek avangin ka lawm e, tawngtaina chuan thinlung natna leh taksa natna te a ti dam thei si a, keipawh i hnena midang hruaitu ka nih theih nan, midang tawngtai sak kawngah thahnem ngai turin min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Hlauh I Nei Em? (Part 2)

"Hlauva awm leh turin bawih nihna thlarau inhmu a ni si lo va; fa nihna thlarau inhmu a ni zawk e, chu thlarau avang chuan “Abba!(Ka pa!)” tiin kan au thin hi."(Rom 8:15)  

Hlauhna hi eng vangin nge alo thlen? Ti ta ila, a chhanna tam ber chu, Pathian kan rin tawk loh vang a ni fo ang.

Paula kha an man a, an phuara Pathian a rin em avangin a hlau eih lo a, a zam eih ngai lo a ni. Ti hian, Galatia khua a mite hnenah lehkha a thawn nghe nghe  "Krista Isua rin avangin Pathian fate in ni vek si a."(Galatia 3:26) 

Isua ringtu te kan nih chuan, Pathian fate kan ni a, lei a roreltu te fa mahin, police man te an hlau lo a, khawiah pawh midang biak leh dawrh an zam ngai lo a, a chhanchu an pa chuan thil a titheih tih an hriat vang a ni.

Kan pa chu, Pathian a nih chuan hlauh tur kan nei dawn em ni?

Amaherawh chu, Pathian kan ring a nih pawhin Pathian duh loh zawng tihna lama lo huai chiam chu awmzia a awm lo tih erawh kan hriat a ngai a ni. Pathian atanga huaina leh a chhanchhuahna chu, a rawngbawlna leh a thuzawm thlatna atanga rawn kal chauh thin a ni.

Kan Lalpa Isua Krista pawh kha, Getsemani huana a tawngtai khan a zam em em a, mahse an rawn man atang kha chuan a zam tawh lo a ni, a tawrhna hmun tak tak ah chuan Pathianin a awmpuia a huaisen em em a, Pilata pawh kha huaisen takin a chhang nghe nghe a ni.

Pathian rawngbawlna ah chuan kan huaithei tlangpui a, kan dik lohna ah pawh kan insiam tha duh tlangpuiin a hriat a. Kan buaina ber chu kan nitin nuna Pathianin min awmpui dawn a ni tih rina huisen ngam hi a ni thin a. 

Hei hi kan hriat a pawimawh a ni, kan nitin nuna Pathian kan tih avanga kan tih te leh kan tih loh te hi kan Lalpa hian a thlir reng a. Amah, tih avanga harsatna hmachhawn te leh dikna thlan zawk  avanga, hun leh hmun hlauhawma awm te chu, Lalpa'n an hlauhna ata chhanchhuak turin, a rinawm zia a lan tir ngei thin a ni.

(Tawngtai Dan Tur)
Lalpa, i fapa min tlanna avangin, i faa vuah ka ni a, pain fa hlaua a awmin, a en liam mai thei ngailoa, a thlamuana a chhan thin a, chung ai mah chuan nangin i mite i ngaihsakna a nasa zawk a ni tih hriain, nangmaha ka awm tlat chuan, hlauh tur ka nei lo tih hriain, nangmahah ka awm tlat theih nan min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.

Hlauh I Nei Em?

"Hlau suh u, kei in hnenah ka awm si a; mangang suh u, kei in Pathian ka ni si a: ka tichak ang che u a; a ni, ka tanpui ang che u; a ni, ka felna kut ding lamin ka chelh reng ang che u."(Isaia 41:10)  

In hnehah ka awm avangin Hlauh Suh U Lalpa'n min ti a.

Hlauh I Nei Em?

Mipa intipa tak chuan hlauh ka nei lo a tih a rinawm a. Mahse, hlau tih hian in sualpui ngam leh ngam loh lampang ringawt kha a ni lo a.

Nula senior leh tlangval senior chuan len tar an hlau a, nupui pasal nei tawh ten chhungkaw in enkawlna tur neih phak loh an hlau a, lehkha thiam ten hna hmuh loh an hlau a, hna hmu tawh ten pute leh thawhpui te duhsakna hlawh loh an hlau a,  zirlai ten zir chhuah loh an hlau a, nu leh pa kum chhiar tham ni tawh ten an fate an puitlin loh an hlau a, rawngbawltu ten thlaraubo an chhanchhuah loh an hlau a, hlauh nei vek kan lo ni.

Mihring zawng zawngin, mualpho te, retheih te, ramtui lei lo a awm te, natna tawrh te kan hlau theuh awm e.

Eng emaw ber hi chu kan hlau a ni tiro!

Eng pawh hlau ila, chu kan hlauh ngei chu Lalpa'n min hnehsak thei a, kan hlauh lakah chuan min chhanchhuak thei bawk a ni.

Kan hlauh zawng zawng te hian Ngam Loh An Nei A, Chu An Ngam Loh Chu, Lalpa In Hnenah Ka Awm Titu hi a ni.

"Lalpa'n ka felna kut ding lamin ka chelh reng ang che u," a ti. I fel vang emaw, in thlahtute fel vang emaw lam a ti lo, amah Lalpa ngei chu a that em avangin, ngaihsak tlak loh leh misual te hi, min ngaihsak duh a, min chelh reng duh a, kan hlauhna ata min chhanchhuak duh a ni.

Engpawh hlau ila, Lalpaa innghatin, chung kan hlauhte chu hmachhawn ang u. Tichuan, Lalpa chhanchhuahna kut chhak chuan, min tanpui a nga, kan hlauhte chu, min hneh sak dawn a ni.

Lalpa'n, amah ringtu te chu a chhanchhuah zel thin avangin, ringtu tan chuan khawvela hlauhawm reng reng te hi, a hlauh awm ve lo a.

Mahse, ringtu tan hlauh tur pakhat a awm tlat reng a, chu chu Lalpa duh loh zawng a nun hi a ni.

(Tawngtai Dan Tur)
Lalpa, i that em avangin, ka hlauh apiang te lakah nangin min chhanchhuak thin a ka lawm e, i duh loh zawnga nun mawlh hi hlauh nachang ka hriata, i duh ang chauh a ka nun theih nan min pui ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.