I NIHNA ANG ANGIN

"Pain mi pek zawng zawng ka hnenah an lo kal vek ang; tupawh ka hnena lo kal chu ka hnawt chhuak tawp lo vang." (Johana 6:37)

Fapa tlanbo khan a inhriat chhuah khan neih a nei tawh lova, ka thil lo tihsual tak zawng zawng te hi kan siam tha leh phawt teh ang tiin a pa ro a deh ral tak zawng zawng te kha rulh tum phawt se chuan a tan tihngaihna a awm lovang.  Thil tam tak a lo tisual ani tih a hriat velah A NIHNA ANG ANGA a pa hnenah a inlamlet mai khan a pa'n a lo ngaidam a, amah ngeiin a deh ral a hloh tawh zawng zawng pawh a pa zawk chuan a rul leh ta a ni.

Mi tamtak chu thil kan tisual tih kan in hre chhuak a, Pathian hnena let nghal mai lova keimahniin kan tihsual tawh te lo siamthat hmasak ve phawt kan tum thinna hian min ti tangkhang ta thin a, kan thei tak tak chuang lova, tul lovah hun kan khawhrala kan, buai telh telh thin. Chutiang tur a ni lova, kan inhriatchhuah veleh kan nihna ang anga Pathian hnena kan let nghal mai hian thil tam tak a lo fel hma zawk thin a ni. 

Midang te nena inkar chhia chinfel ngai pawh kan lo ni maithei, kan tih lungawi loha te va tlawn leh va biak that viau lam ai chuan kan awmdan hian Pathian tilawm hmasa se, tichuan kan hmelma te nen lam Pathianin minlo inrem tir zawk dawn a ni. (Thufingte 16 : 7)

Chuvangin hei hi kan siamtha phawt a nge, kan chhungkaw buaina kan chingfel phawt a nge, chumi khami nena kan inkar chu kan chingfel phawt a nge kan tih hmasak hian kan chingfel tak tak ngai lova. Chu a hnekin, mihring leh mihring inkarah phei chuan a lo buai telh telh thin. Eng dinhmunah pawh ding ila engpawh ti ila, "Lalpa ka nihna ang angin ka rawn pan che kan tih mai naah hian Aman a bak chu a lo chingfel thin a ni."

(Tawngtai Dan Tur)
Lalpa, nangman engkim i siam tha thei a ni tih hriain, nangmah nena kan inpawhna hi engdang zawng aia ngaih pawimawh hmasak nachang hre turin min pui la, nangmah nena inkungkaihna tha kan neih chuan, ka buaina leh ka harsatna zawng zawng min chinfel sak dawn a ni tih hriain, nangmah nena inkungkaihna tha nei turin theihtawp ka chhuah theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Amaha Inngat Tute, Meipui Leh Tuipui Paltlang Pui Thintu Pathian.

"Pathian chu kan inhumhimna leh kan chakna, Mangan laia tanpui vartu hnai reng a ni, Chuvangin leilung hi lo danglamin Tlangte hi tuifinriat chhung daihah insawn mahsela kan hlau lo vang."(Sam 46:1-2)

Israel te khan tuipui an kan dawn khan, Lalpan Mosia hnenah tupui chungah i tiang lek la tupui alo inthen ang, a ti a. Mosian a tiang chu a lek a, tuipui sen kha Lalpan a then tir ta a. Tichuan, tupui inthen karah chuan Israel fate kha an kal taa, mahse thil buaithlak deuh mai chu, Aigupta sipai te kha, tuipui inthen karah khan an tlan luh a phal ve tlat kha a ni.

Israel fate chuan, an hlau em em mai a, mahse Lalpa chuan, Aigupta sipai ten Israel fate an umphaka, an thah a phal awzawng loa, an inkarah, meialh ding leh chhum ding atang chuan Aigupta sipaite chu a zuk en a, a tibuaia, an tawlailir kete chu a thlawnsak a ni. Aigupta sipai ho khan, Israel fate kha umin, umpha lek lekin, hnaih viau mahse, an khawih tak tak theilo a ni.

Lalpaa, kan rinna kan nghah chhungchu min beitu hian, min umpha lek lekin, min hneh lek lek thin mahse, Lalpan min umphaka min hneh tir a phal ngai lo ang.

Chumi hnu, kum sang fe ah chuan, Babulon'in Judai ram a la a, Juda fate chu salah an man a, Babulon lal Nebukadnezzara chuan a milem siam chibai buk duh lo chu, meipuia paih luh turin thu a titlu a. Mahse, Lalpa neitu Mesak, Sadrak, Abetnago te chuan, kan Pathian chauh lo chu chibai kan buk dawn lo an tih avangin, lal Nebukadnezzara chuan meipuiah a paih lut ta a.

Meipuia a paih luh rual rual chuan, vantirhkohin a rawn awmpuia, an pathum chuan mei rim pawh an nam loa, an samzai pakhat pawh a kang lo a ni.

Heng chanchin pahnih atanga Pathian zia lo lang ta chu hei hi a ni.

Pathian chuan, amite hi buaina min pumpelh tir a tum ber loa, buaina leh harsatna chhunga min rawn luhpui a, a thiltihtheih zia leh Pathian tak anih zia lantir chu a thil tum ber a ni zawk fo a ni.

Lalpan, amaha rinna nghattute chu ral atangin, i harsatna leh i buaina te kha bo rawh se, a rawn tihsak lo. Lal engkim titheia chuan, "keimah nen i harsatna leh i buaina hi bei ang hmiang" tiin, kan hrasatna leh kan buainaah hian min luhpui zawk thin a ni.

Aigupta fatir zawng zawng zankhata tihlum theitu khan, Aigupta sipai hote kha a tawngkam vawikhatin a tihlum thei, tui siamtu khan vawi lehkhatah tui zawng zawng kha a ti kangchat vek thei. Mei alh siamtu khan, Nebukadnezzara meipui siam kha, a mite paih luh an nih hma khan a timit vek thei, mahse chungte chu tih loha. A mite buaina leh harsatna ngeia luhchilha chhanchhuah chu a thlang ta zawk a ni.

Tunah khan, i mangang em, i mangang a nih chuan, Lalpa puihna dilin, Lalpa au rawh le. Tichuan, i awmna ngeiah khan, i manganna hmun ngeiah khan, Lalpan pui tur chein, a rawn luh pui ngei ang che.

Fel phawt lam a nilo, Lalpa auh phawta, a kawnga kal a ni zawk. Lalpa au la, i rilru chhungril natna hmun ngeiah te, i beidawn ngawih ngawihna hmun ngeihah te, i ruihhlo sim theih lohna hmun ngeiah te,  ler i sim theih lohna hmun ngeiah te, sum dik lo taka i lak luhna hmun ngeiah te khan, nangmah chhanchhuak tur chein a rawn luh chilh duh che a ni.

Lalpa hi, misual hremtu a ni loa, misual hmangaihtu leh an sual an sim theihna tura puitu a ni zawk asin.

(Tawngtai Dan Tur)
Lalpa, nang chu mangan laia tanpui vartu hnai reng i ni tih hi ka hriat renga, i mite an buaina leh harsatna hmun ngeiah luh puiaa tanpui thintu i ni tih hriain, engtik lai pawhin, nangmah ah rinna ka nghah tlat zel theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

HMANGAIHNA CHI HNIH

"Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va."(I Korinth 13:4-5)

"Hmangaihnain... mahni hma a sial lo va..." (1Korinth 13:5)

Hmangaihna hi chi hnih a awm a: mahni hmasial hmangaihna leh mahni hmasial lo hmangaihna an ni.

Dan-a leh Lois-i:

Dan-a chuan a unaupa hnenah, " Lois-i hi ka hmangaih a, nupuiah neih ka duh a ni" a ti a. A u chuan, " Ka hmangaih I tih awmzia chu engnge ni?" tiin a zawt leh thung a. Dan-a chuan chhan ngaihna a hre lawk lova, a tawpah chuan, "Ka bul hnaia a awm hian nuam ka ti thin a, chuvangin nupui tha tak anih ka ring. Chubakah ka harsatna min hriatthiam pui tur leh min enkawl turin ka mamawh a ni; ka nun hi a tihlim dawn em asin", a ti a.

Heta Dan-a hmangaihna hi mahni hmasial hmangaihna a ni thei ang em? A rilru hi han ngaihtuah teh: "Ka harsatnate min hriatthiam puiin min enkawl ang." Amah chauh a inngaihtuah a ni lawm ni?

Mark-a leh Gloria-i:

Mark-a chuan an pastor hnenah, "Gloria-i chu Kristian nula danglam tak mai a ni a, ka hmangaih a ni. Kan inneih hun chuan amah hi hmangaih leh zaidam taka enkawl turin ka fimkhur hle ang a, ka sum leh pai amah nen kan enkawl dun ang. Tin, amah hi thu khawchang ka sawipui thin ang a, a ngaihdan te hriatthiam pui ka tum bawk ang a, a harsatnate pawh hriatthiam puiin ka tawngtai pui thin ang. Tunah pawh hian Kohhran member te nen Krista Chanchin Tha puan darh hna thawhho hi nuam ka ti hle a, kan inneih hnuah pawh Lalpa rawng hi kan bawl chhunzawm zel dawn a ni", tiin a hrilh a.

Mark-a hmangaihna hian mahni hma a sial lo hle. Ama hlimna ngawt zawng lovin Gloria-i tan hmangaihtu pasal nih a tum hle. Tin, an pahnihin mahni hma an sial lova, an hlimna ber chu mahni tana nung lova Krista tana nun zawk hi a ni (2Korinth 5:15).

Mahni hmasial lo hmangaihna chu zawi zawiin a thanglian thin:

Hmangaihna tak tak, mahni hmasial lo hi chu vawi leh khatah lo awm thut a ni lova, zawi zawiin a thang lian zel thin. Pawnlam lan dan atang ringawt hmangaihna dik hi a piang thei lo a ni. Induhna hi chu vawikhat inhmuhnaah a piang thei a, inngainatna pawh hi vawikhat intawnnaah a piang thei a ni. Mahse hmangaihna dik tak erawh chhungril thlenga inhriatchian hnuah zawi zawiin a piang chho thin a ni. 

Chuvangin kan ngaihzawng te nena hmanhmawh taka nupaa insiam hi a tha lo fo a, kan ngainat leh kan duh deuh te nen pawh kan inkarah hmangaihna dik tak a piang chhuak kher lo thei tih hriain hemi kawngah hian fimkhur a tul hle a ni. Hun rei takin a siam hmangaihna chuan mahni hmasiallo hmangaihna dik tak a hring chhuak fo a ni.

Hmangaihna kan dawn hi a pawimawh ber loa, hmangaihna kan pek chhuah hi a pawimawh zawk chu a ni. 
A chhanchu hmangaihna hi chi (seed) ang hi a ni a, mi tamtak chuan chi, rah tui em em chauh an duha, chi an theh duh leh lo thin a, a tawpah phei chuan, hmangaihtu mumal an nei lo hial thin. Hmangaihna tamtak pechhuktu chuan, a chi theh ngei te rah chu a hmu thina, hmangaihtu tamtak a nei thin a ni.

Hmangaihna rah chauh i ei thin nge? Hmangaihna chi i theh thin? Mahni, hmasiallo hmangaihna chuan, hmangaihna chi nasa takin a hriat loh lai pawhin alo theh reng thin a, hmangaihna rah chu a dawng leh ngei thin. 

(Tawngtai Dan Tur)
Lalpa, tupawh hmangaihna dik, mahni hmasiallo hmangaihna a hmangaih thiam turin min pui la, ka kawppui tur ngat phei chu, min hmangaih em tih aiin ka hmangaih em tih leh ka tan a tha a ngem tih ai atan ka tha a ngem tih hi min ngaihtuah hmasak tir la, i hmangaihna kangchat theilo dawngtu ka nih avangin ui loin hmangaihna tam thei ang ber, ka pek chhuah theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Lalpa Nghak Rawh

"Lalpa nghaktute erawh chuan an chakna chu an siam tha leh ang a; mupuite angin thlain an thlawk chho vang a, hah lovin an tlan ang a, chau lovin kein an kal ang."(Isaia 40:31) 

Bible chuan kan thinlung hi thildang ber aia venthat a ngaih thu a sawi a (Thuf 4:23). Chuti taka ven ngai a nih chuan kan thinlung hi a no (sensitive) em em tihna a ni.

Kan ngaihtuahna chuan thil tha leh tha lo, dik leh dik lo, fel leh fel lo, tih awm leh awm lo, bansan tur leh bansan loh tur a thliar zung zung thin. Mahse kan ngaihtuahna in tha a tih te hi kan thinlungin a zui zolo fo. 

Zu ngawlvei atang tehkhin thu sawi ila: Zu nghei chu ka duh mahse ka thei lo a ni, an tih awmzia chu an ngaihtuahna emaw an rilru chuan nghei tha a ti mahse an thinlungin an ngaihtuahna a umpha lova, an thinlungin an ngaihtuahna a zui zolo thin a ni.

Kan ngaihtuahna chuan tu emaw kan chunga tisual tute ngaihdam chu a tha a, Pathian duhzawng a ni tih chu a hre nghal zung zung zel mahse kan thinlung hian a zui zo lo fo a ni.

Hetiang chiah hian thil tamtakah kan ngaihtuahna leh kan thinlung hi a insual nasa thin a ni. Paula phei chuan hei hi kan chhungrila indona a ti a, van indona aia nasa zawk a ni a ti hial.

He chhungrila indona nun avang hian Davida pawh a au chhuak a ni: "Aw ka nunna engah nge i kun reng? Engah nge ka chhungah hian i buai ni? (Sam 42:11a)" tiin.

Eng tiangin nge chutiang hunah chuan hma ka lak ang?

Pathian nghak rawh le!  

"Lalpa nghaktute erawh chuan an chakna chu an siam tha leh ang a; mupuite angin thlain an thlawk chho vang a, hah lovin an tlan ang a, chau lovin kein an kal ang."(Isaia 40:31)

I rilruin tha tih a hriat kha i thinlungin a zuina tur chuan Pathian tihchakna i mamawh. Pathianin i thinlung a thlak hun i nghak ang. Nghak awmzia chu awm heuh heuh a ni lo, nghak awmzia chu i dil a ngai, a thu i awih a, thuhnuairawlh taka i awm a ngai. Pathian duhzawng i duh a, Pathian duh loh zawng i duh loh a ngai, a ke pen ruala i pek a ngai.

"Dawr nghak" kan tih hian dawra awm mai mai a ni lo, dawrah khan a dawr neitu thu thu in a awm ang chiahin Pathian nghak awmzia chu a thuhnuaia pumhluma intuk luhna a ni. Chutianga i nghah tlat chuan i nunah sual hneh theih loh i nei lovang, a ti chak ang che. Kawng tha i zawh thei ang. Van indona aia ropui i chhungrila indona chu i hneh thei ngei ang.

(Tawngtai Dan Tur)
Lalpa, i hmangaihna chuan, ka nun buai hi a buaina ang ang hian, a hmangaih tho tho a, chu i hmangaihna nasa lutuk leh zual zel fo thin chuan, nun tha zawk ka neih i duh thu min hrilh thin a. Ka bawhchhiaa ka sual chung chung pawh hian, ka hnathawh te nghak la, ka kawng chu zir rawh, khawvel nawmna chuan a eichhia ang che a nga, nun hlimna ka pek duh em em che hi, i neih chuan, i nun a ti harh a nga, a tichak bawk thung ang che, tiin ka hlat lai che pawhin, i Thlarau chuan min hrilhruk reng thin avangin ka lawm e. He i aw, min hrilhru thin tu, thu hi ka zawm theihna turin min tichak la, min pui bawk ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Mibik, Mi Ngaihsan Rawn Kan Ni Thei, Hniam Bika Min Inngaih Tirtu Hi Sual Hna Tawh A Ni

"I thinlungin mi sual awt suh se; Nilengin LALPA tihin awm zawk rawh. Lawmman a awm ngei dawn si a, I beisei chu tih bovin a awm lovang."(Thufingte 23:17-18)

Mibik, Mi Ngaihsan Rawn Kan Ni Thei, Hniam Bika Min Inngaih Tirtu Hi Sual Hna Tawh A Ni

"Kei ni chu he ti mai hi kan ni a, anni chu Rawngbawltu, Officer, Sumdawng lian, etc, ni mahsela ka ngaisang bik lo e mai, an tuisik far khat pawh in loin ka awm thei." He tiang rilru hi mahni inhmuh hniamna atanga lo chhuak thin ani, chu inhmuh hniamna chu Lalpa atanga chhuak a nilo tawp ang.

Pathian fa ka nia "MI BIK, LALPA CHINCHIAHNA KAI KA NI A"  Lalpa ka vawn tlat chuan tupawhin ka bula awm nuam an ti a nga, Lalpa ka vawn tlat avangin midang puitu pawh ka ni ang, ka mamawhna a min pui turin Lalpa'n midangte pawh ka hnenah a rawn tir bawk ang.

Ka thiam hi a tamlo a, mahse Lalpa vangin ka thiamna hi a tangkai a, Lalpa ka dah hmasak phawt chuan thenawm tha, nupui tha emaw, pasal tha, rawngbawltu tha ka ni thei ang.

Min hriat chian loh vanga min hnawltu te, min hmusittu te, min hawtu te chu! KA TAWNGTAI SAK A NGA. Inrem takin min ngainat thu min la hrilh ang. A chhan chu "LALPA VANGA MI BIK, A CHHINCHIAHNA KAI KAN NI SI A".

Ka mamawha ka hriat te ka neih mai loh pawhin midang nei te, thik nan emaw huat nan emaw ka hmang dawn loa, midangin an mamawh leh an neih loh awlsam taka neih tam tak ka nei ve tho tih ka hre reng a nga. Lalpa'n a hun takah kan mamawh tak hi, min pe theuh dawn a ni, tiin midang te hnemtu leh puitu ka ni zawk ang.

Ka duh ka neih loh te pawh, Lalpa hnenah ka thlen a nga. Ka duh zawng zawng hi ka duh rual ruala ka neih zel chuan a tuar tur chu keimah ka ni tih hre rengin. Lalpa'n min pek hun tur a hria a, a hunah ka neih a phal bawka, mahse chu ka duh ngei chu ka neih a, min petu ka kalbo san mai loh nan, Lalpa'n min buatsaih hmasa a ni tih ka hria a nga, lawm takin Lalpa min pek hun chu ka nghak zel ang.

Ka lungngaihin, ka Lalpa Isua'n ka lungngaihna hmun ngeihah hian min awmpui tih ka hria a nga, ka lungngaihna phenah chuan malsawmna a inphum ru tih ring reng chungin, Lalpa chu ka beisei tang tang zel a nga. Midang te tan nun ei tlak nei turin ka bei zel ang.

Ka lawmni in min petu chu ka hre reng a nga, chapona hneh turin Lalpa lam ka thlir a nga. Hlawhtlinnna mawi tak ka chang a nih chuan, midang tana hmuh hreawm ka ni thei tih hriain, fimkhur zawk a nun dan ka zir a nga. 
Mihring der thawn zia leh zan khat thil thu a, vanduai ber leh vannei ber ka ni thei tih hriain inngaitlawm chungin Lalpa ka pan ang.

A chunga thu te hi duhthusam a ni, kan ti maithei e. Mahse, kan theih loh hi "Isua Nen Chuan A Tih Theih A Ni," Isua nen a theih alawm tih hi mahni leh mahni in hrilh fo thin ila. 

Tin, hei hi hre reng ang u -
"Lalpa chu amah nghaktu te tan a tha a, a tithlawn ngai lo."

(Tawngtai Dan Tur)
Lalpa, i ta ka nih avang hian ka awm ngai a ka awm mai mai pawh hi, mi vannei ber ka ni tih hi, ka hriat renga. Nangma remruatna a innghat chhunga, i tana ka nun hi ka hman tlat theih nan min pui ang che, Amen. Ti ang o.  

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Mi Rethei Leh Lungngaite Enhniam Mai Loin, Kan Theih Ang Tawkin Kan Pui Zawk Tur A Ni.

"Mi rethei chu rawk suh, a rethei si a, Kulh kawngkaah mi lungngaite hnehchhiah hek suh: LALPAN an thu a sawipui dâwn si a, Anmahni rawktute nunna chu a rawk dâwn a ni."(Thufingte 22:22-23)

Mi tin hi, tlu chhe thei leh kan neih zawng zawng chan vek thei kan ni a, tumah hi dinhmun nghial nghet nei mihring zingah hian kan awm tak tak loa. Khawvel mi hausa zinga lang thei hial khawpa hausa, mahse tlu chhiaa, tho leh thei tawh reng reng lo te pawh an awm nual a ni. Heng ho hausak dan hi a theih dawn em em a mi tih mai tur khawp hian an hausaa, kan Mizoram budget (yearly) let 10 lai te an nei hial thin a. Chung mite pawh chu an tlu chhe thei a nih chuan, mi nawlpui hi chu kan va tluchhe thei chiang tak em.

Chu bakah, dingchhuak leh hlawhtling zawng zawng te hian, retheih lai leh harsat lai an nei theuh bawk a ni.

Mihring hi kan retheih lai hian, bum kan awl em em a, a chhanchu kan thlaphan vang a ni. Ei khawp kan neilo mai anga emaw, in enkawlna tur kan nei lo mai a nga tia kan mangan avang hian kan retheih lai hian bum kan awl theuh a ni.

Hei hi kan bible hian a hriaa, "mi rethei chu rawk suh"alo ti a. Mi rethei chu a neih chhun tlemte pawh diklo taka laksak duh mai te an awm thina. Chu tianga, mi rethei te rawka an neih chhun tak ngial pawh laksak duh mi chu, Pathianin ka rawk ve ang a ti.

Tin, mihring hi hniam lai nei vek kan ni a, eizawnna ah, nupa inkarah, lusun vangin emaw, kan thil tih a tluan loh lai bik te, kan nun a hniam lai leh lungngaih lai hi nei vek kan ni. Lungngai kan hriatin emaw, kan hmuhin emaw, kan bible chuan "hnehchhiah suh, Pathianin an thu a sawipui dawn" a ti.

Hei hi kan hmuh fuh loh thin chu a ni, "mi an sual vang ngei ngeiin an tuar pawh a ni thei e, chuta an tawrhna ah chuan Lalpa a hmu thei a, Lalpa a hmu a nih chuan, Lalpan fa takah a pawm thei a ni, tih hi."Lalpan a ta a, a chhiar tawhte ti nawmnahtu chu, a thungrul ngei ngei thin. Lalpa mi vekin Lalpa mi, a harsat mangan laia puiloa kan tinawmnah a nih pawhin, Lalpan min thunun a thulh dawn chuanglo a ni.

Hei vang hian, "mi a sual vang ngei ngei a tuar te pawh hi, Lalpa neitu te chuan, a sual man a hmu a nih hi, kan ti ngai tur a ni loa , kan tawngtai sak zawk tur a ni." 

"Tha bik kan awm loa, Lalpa zahngaihna hnuaia leng vek kan ni." Tih hi, hmufiahtu te chu, Lalpan a thatna in nasa takin a vur thin a ni.

Ringtu te hian, kan chhehvela mirethei awm te leh mi lungngai te hi, harsatna kan nei ve vek alawm tiin kan kal pel mai tur a niloa. Kan phak ang tawkin kan tanpui tur a ni, kan phak ang tawka kan puihna chu, pawisa leh an mamawh pek a ni thei, an hriat laiin emaw an hriat loh laiin emaw tawngtai sak pawh a ni thei e, tawngkam thaa biak (mi rethei tamtak chuan tawngkam tha an dawng phalo thei) pawh a ni thei a. Kan puih theih reng kan puih duh loh tlatna hi sual a ni.

Ringtu te hi, Lalpan a hna thawk turin khawvelah min dah si a.

(Tawngtai Dan Tur)
Lalpa, sual bik leh tha bik kan awm loa, i zahngaihna hnuaia leng vek kan ni tih hi ka hriat reng a, mi harsa leh mi lungngai te hi, an harsat chhan leh an lungngaih chhanchu eng pawh nise, ka phak ang tawka ka puihna chang ka hriatna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

PATHIAN CHUAN HARSATNA HMANGIN KAN TANA A RUAHMANNA TIH HLAWHTLIN A TUM THIN A NI.

"Tin, chuti chauh chu ni lovin, kan hrehawmnaah pawh lawmin i awm ang u, hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam tih kan hre si a."(Rom 5:3-4)  

Harsatna kan tawh chhan hi hlawm thumin a then theih a: Setana avanga harsatna kan tawh te, keimahni sual vang emaw midang sual avanga harsatna kan tawh te, Pathian remruatna avanga harsatna kan tawh te hi a ni. Heng pathum zingah hian Pathian remruatna avanga harsatna kan tawh hi kan hrethiam lo fo thin a ni. "Engvangin nge Pathian min hmangaihtu chuan harsatna min thlen teh lul ang?" tih zawhna hi kan nei theuhin a rinawm a, hemi chungchang hi kan sawifiah dawn a ni.

Isua leh a zirtirte chuan Jerusalem an chhun pelh laiin pian tirh ata mitdel an hmu a. Hei hian zirtirte rilru rei tak lo tibuai tawh thin zawhna a chawk tho va:

"... mitdel saa a pian hi tu nge thil tisual, he mi hian nge a nu leh pain?" (Johana 9:2)

An naupan lai atangin dam lohna hi Pathian hremna a ni tia zirtir an lo ni tawh thin a; chu chuan an rilru a tibuai a ni. Chu pa mitdelna chhan chu tu emaw thil tihsual vang ni ngeiin an ring tlat a ni.

A zirtirte zawhna a  chhannaah chuan Lal Isuan a hunlaia Pathian Thu an ngaihdan dik lo tak a rawn thai lang a:

"Hemi hian a tisual hek lo, a nu leh pain an tisual hek lo; PATHIAN HNATHAWH A CHUNGA A LANNA TUR A NIH ZAWK HI." (Johana 9:3)

Isua hian a hawl zau hle mai. "A chunga a lanna tur" a tih hian chu pa mitdelnaah chuan thiltum hlen chhuah tur a awm tih a tilang. Isuan chupa mitdelna chhan chu thil kal tawh eng emaw vang ni lovin, thil tihsual vang ni hek lovin, Pathian remruatna a ni tih chiang takin a sawi a. Chu mi awmzia chu hepa mitdelna hi Pathian atanga lo awm, Pathian thlentir a ni. Isua khan, "He pa hi a sual vanga mitdel a ni na a, Pathian chuan remchangah a hmang tho tho dawn," a ti hauh lo. He pa mitdel chhan hi sual rawn thlentir a ni lova, Pathian hnathawh lanna tur a ni zawk, a ti.

Pathianin harsatna kaltlanga a remruatna chu:

Harsatna chu eng vanga lo thleng pawh nise a pawimawh ber chu I LO HMACHHAWN DAN a ni. (I hmachhawn dan a dik chuan, hlawkna ah a chang thei a ni.)

Harsatna chu eng vanga lo thleng pawh nise, i rinna leh amaha i inpekna tihngheh nan Pathian hmanraw tha tak a nih vang a ni.

Harsatna i tawhna mual kha Pathianin hna a thawhna mual a ni thin.

Harsatna i lo hmachhawn thiam tlat chuan i paltlang hnuah eng vanga hmachhawn nge I nih i la hrechhuak ngei ang.

Isua zirtirte khan Kalvari tlangah khan mangang leh rilru chiai takin 'Engvangin nge an hotupa chu misual ber anga khenbeh a nih tak?' tiin an ngaihtuah ang. Mahse ni rei lo teah a chiang ta a nih kha.

Keini pawh zirtirte ang hian mangang takin kan awm fo thin. A chang chuan kan beiseinate a bo vek a, kan ruahmannate a buai vek thin.

Harsatna kan tawh laiin Isua Krista tawrhna te, a thihna leh phuma a awma a thawhlehna te i hre reng thin ang u. Heng hmang hian Pathian chuan a hnehna ropui tak-mihring chhandamna chu a thlen a ni. PATHIAN CHUAN A THILTUM - MIHRINGTE CHHANDAMNA TIHHLAWHTLIN NAN AMA FAPA NGEI PAWH TIHHLUM A PHAL A; KEINI PAWH KAN TANA A RUAHMANNA TIHLAWHTLING TURIN KAN TAWRH A PHAL A NI.

Isua Krista kha engvanga harsatna tawk nge a nih? Sual vang nge, Setana vang nge, Pathian vang? A nihna takah chuan heng zawng zawng hi an tel vek a ni. Isua Krista chuan a chunga harsatna lo thleng a lo hmachhawn thiam avangin Pathian chuan a thiltum ropui tak a tihlawhtling thei a ni. Hetiang hi Pathian hna thawh dan a ni. Pathian chuan harsatna hmangin kan tana a ruahmanna tihhlawhtlin a tum thin a ni.

(Tawngtai Dan Tur)
Lalpa, harsatna atanga ka zirchhuah te hi, ka hlim laia ka zirchhuah te aiin, a let tamtakin an hlu zawk a ni tih hriain, harsatna ka tawh apiangin nangmah beisei a, zirchhuah nei tura ka en tlat theihna tur chein min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.