"Lalpa Pathianin leia vaivutin mihring a siam a"(Genesis 2:7 )
Engvangin nge leia siam kher kan nih le? Thil hlu dang rangkachak, lunghlu te pawh a awm sia, enga ti nge min siam nan Pathian hian lei kher a hman le?
Thil engmah nilo atanga a ropuina puanchhuah hi kan Pathian mizia a ni tlat. "He can turn great mess into GREATNESS." - Robert Madu
A dawtah chuan Leiah chiah hian thlai chi a tuh theih a ni. Mitinah hian Lalpa'n chi(seed) a dah a, chu chu kan theihna emaw thiam bikna kan neih theuh hi a ni, a then chu zai thiamna te, a then chu rorel thiamna te, a then chu nui hmel mawi tak te, a then chu thusawi thiamna te, a then chu kut themthiam tak te pawh a ni ang. Chu chu than tir a rah tha tak min chhuah tir theuh a duh a ni.
Johana 15:1 -ah hian Pathian chu huan enkawltu(Gardener) a inti a ni. Keini hi a huan te kan ni. Huan enkawltu chhe tak a nih chu ring suh, chi tha tak tak thehtu a ni kan Pathian hi. I chhungah khan tha taka rah chhuak thei turin chi a tuh ngei a ni.
2 Korinth 4:7 "Rohlu chu Hlumbelah (lei/dirt) kan vawng a ni"
Hlumbel chu i ni a, nangmahah chi hlu tak, rohlu chu a dah a ni.
1Korinth 3:6 "Keiin ka phun a, Apollovan tuiin a chawm a; nimahsela, Pathianin a thantir"
Chu chi rohlu chu a than nan kan chawm a ngai ve a ni. Thlai reng reng tui peka, leitha vura, a dip tu kan thian fai thin ang hian. I tihtur i part i tih phawt chuan Lalpa'n a tihtur thantir hna chu a rawn thawk em em ang.
Tirhkoh Paula pawhin Timothea ti hian alo fuih a ni: 2 Timothy 1:6 Chuvangin, ka kut nghah avanga Pathian thilpek nangmaha awm kha chhem alh turin ka hriatpui che a ni.
Matthaia 13:31 "Vanram chu lova ro phum ruk ang a ni"
Leiah vanram nun chen turin nangmaha chi (seed) ro ang maia inphum ru chu han hai teh le.
(Tawngtai Dan Tur)
Lalpa, leiin min siam a, leiah chuan chi a to thin ang hian, keimah a theihna leh thatna i dah te hi, a tha thei ang berin i duh ang a ka hman chhuah theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment