"Kei erawh chuan kan Lalpa Isua Krista kraws lo chu ka chhuan loh tûrzia mai chu, chumi zârah chuan khawvêl hi ka tân khen behin a awm ta, kei pawh khawvêl tân khen behin ka awm a ni."(Galatia 6:14)
(But far be it from me to glory, save in the cross of our Lord Jesus Christ, through which the world hath been crucified unto me, and I unto the world. R.V)
'Kraws' tih hi Paula chuan a thing kawkalh chanchin leh a lem lam ni lovin, krawsa khenbeha awm Lal Isua, misual tana thi chanchin a sawina a ni.
Galatia rama ringtute hi a tam ber chu Gentail an ni a, pâwn lam lang theia inti sakhawmiten serh tantir a, Dân zawm turin an phût a, "Eng dang vang ni lovin, Krista Kraws vanga tihduhdah an pumpelh nan mai a ni a, serhtante meuh pawhin Dân thu an zawm chuang si lo va, in taksaah chhuan tur neih an duh avangin serh tantir cheu an duh mai a ni," tiin Pawla hian a hrilh a ni.
Chhuan tur dik lo:
Pawla-te hun lai hian Kristiante tiduhdah theitu chu Juda sakhaw behote emaw, Rom sorkar emaw an ni mai a, serh tan chu Juda sakhaw chhinchhiahna lar tak, Rom sawrkar pawhin a pawmpui thlap a ni.
Miin serh tan chungchânga a ṭhahnemngaihzia a tihlan theih chuan, Judate tân chuan tihduhdah chi rual a ni lo. Chutianga ringtute serh tantir a, Judate hmuhsitna leh tihduhdahna pum pelh thei nih chu an inchhuan phah hle ṭhin.
Pawn lam langthei maia intihsakhaw mi-na leh tuarna pumpelh thei nihna chhuan chu 'chhuan tur dik lo' a ni.
Pawla chuan, "Jentail-te hi Juda saphunah, Juda miah siam che u an duh a, an hotute laka tlaktlum năn maia ti an ni e," a ti a ni.
Thinlung taka Pathian thu awi chuang si lo, pâwn lam dâna fak hlawh tum te, Juda sakhaw serh leh săng zawm avanga tuarna pumpelh tum te, sakawlh tihduhdahna tuar lova mi thianghlim lawrnaa tel tum tlat mizo pa kan va tam em!
Chhuan tur dik:
Pawla chuan chutiang mi tuarna pumpelhna zawngtute karah chuan, "Kei erawh chuan kan Lalpa Isua Krista kraws lo chu ka chhuanloh tur zia mai chu," a ti.
Chhuang duh sela chuan, zirna lama Gamaliela ke bula sei lian, dăn hre mi, sakhaw lamah Farisai satliah lo, lei chawp ngai lova Rom khualehtui ni saa piang a nihna zawng zawngte hi chhuan tham a ni.
Krista Kraws avang chuan chung zawng zawng chu hnawmnĕa ngaiin, tihduhdah leh hmuhsit, mualpho pawh a huam ta zawk a.
"Mihringin an fak lo che a,
Lalpan a fak loh che ring suh," tih hla hi a nunpui ta zawk a ni.
Krista chuan krawsah kan mihrinnazia - chapona te, inchhuanna te, hlauhna zawng zawngte nen min chin ral sak a, nun nei loten nun kan neih lehna turin amah intitlawmin min tuar sak ta a. Chu chu ka chhuan tur awm chhun chu a ni tiin mihring lam ṭhat tum vena chu a hnawl ta a ni. "Kan Lalpa Isua Krista kraws lo chu Pathianin thil dang chhuan a rem ti tawh lo," a tihna a ni.
Khenbeh nun:
Kraws-a khenbeh chuan engmah a ti thei lo va, a kut leh kete chu che thei lova kilhbeh tlat a ni.
Chutiang chuan Pawla chuan, "Kraws avangin khawvel hi ka tân khenbeh a ni tawh a, keimahah engmah a tithei tawh lo va; kei pawh khawvel tân khen beh ka nih tawh avangin khawvel tân hman theih ka ni tawh lo," a ti.
Ringtute chuan kan aia krawsa khenbeh Lal Isua chanchin hi kan chhuan ber tur a ni.
He mi avang hian khawvel chu, kan tân khenbeh, a duhna leh châknaten min tihbuai theih tawh loh a ni tawh a, kraws chauh chhuang tawh tur kan ni.
Kan rawngbawlna te, kan nihna te hian min tihchapo lohna turin Krawsa khengbet i ni ve ang u.
Lalpan min hmangaihzia aw ka sawi hleithei lo,
Misual dum ber min silfai leh ta;
Min tlan chhuak ta, sual bawihah ka tâng leh tawh lo'ng,
Kraws chuan khawvel nen min tihrang ta.
(Tawntai Dan Tur)
Lalpa, nangmah chauh ka chhuan theihna turin min pui la, krossa khenbeh a, kan tana tawrhna rapthlak tak tuar kha, min chhanchhuahna tur a nih avangin, kross a khenbeh kha i huam a, mahni tih leh mahni nihna chhuangloin, krossa kan tana i tih zawka chu chhuanga nun hmang turin, min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment