I Chak leh I Chauh Kha, I Awmna Hmunin A Hril Ang

"Tui kianga thingphun, lui kama zungkai, khaw lum lo thleng pawh hlau lo, a hnahte hring reng si, khawkhen kum pawisa lo. Rah chhuah thulh chuang si lo ang hi a ni ang."(Jeremia 17:8)

He thu hian ringtu chakber nun a rawn pho chhuaka, a entirnan thingphun a rawn hmang a. Chik deuha kan chhiar chuan, "thingphun awmna hmun tha leh dika awm" a rawn pho lang a, thing chi (offspring/species) a ngai pawimawh loa, khawi atanga rawn phun chhawn nge a nih pawh a ngai pawimawh lemloa, "a phunna hmun" a ngai pawimawh ber a ni. 

Hei ang chiah hian, min thlahtute leh eng hnam nge kan nih hi a pawimawh loa, chu bakah khawi atanga lo kal nge kan nih leh eng nun hlui nge kan neih hi a pawimawh lo. A pawimawh chu, "Tunah Hian Khawiah Nge Phun Kan Nih" tih hi a pawimawh a ni.

Pathian chu kan ring, mahse khawiah kan awm? tih hi han inzawt chhin teh ang u, hmiang.

1. Sumah kan awm em? 
2. Ngaihzawng chak huam huamnaah kan awm em?
3. Hmingthat zawnna hmunah kan awm em?
4. Lar zawnna hmunah kan awm em?

Zing thawh atanga zan mutthleng sum sum kan ti em? Ngaihzawng ngaihzawng kan ti em? Hmingthatna zawng reng rengin kan buai em? Mi hriat hlawha lar hlir kan ngaihtuah em?

I awmna chu, i taksa awmna kha a ni berloa, i rilru awmna zawk kha nasa takin a ni thei a ni. Biak in a awm reng chungin, ngaihzawng leh sum hlir kan ngaihtuah thei a, Pathian biak ai mahin lan mawi pawh kan lungkham zawk thei a ni. 

Kan awmna hmun a diklo a nih chuan, hnim hring angin kan la vuai a nga.

Tui nunglui Kristaa kan awm chuan "chakna atanga chak leh zualnaah" Pathianin min hlangkai thung ang.

Isua Krista kan thinlunga kan dah hmasak tlatna hi, amaha kan awm rengna chu a nia. Kan thinglunga Isua Krista kan dah hmasak chuan, kan taksa pawhin kan thinlung chu a zui ve a nga, a hming avanga thilthatihna hmunah leh a rawngbawlna hmunah kan taksa pawh alo awm mai dawn a ni.

(Tawngtai Dan Tur)
Lalpa, i lamah min hip ang che, kei mi chaklo hi khawvel hian min hip buai thin sia, Isu ka thlang chea, nangmaha awmte chu chakna i pek thin avangin, eng dinhmunah pawh nghet takin an ding thei thin a ni tih hriain, nangmahah ka awm reng theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.