"Tichuan LALPA Pathian chuan Adama chu tui takin a muthilhtîr a, tichuan a muhîl ta a; tin, a nâkruh pakhat a la a, chu mi ai chu tisain a awh phuitîr ta a; tin, LALPA Pathian chuan Adama laka a lâk nâkruh chu hmeichhiaah a siam a, Adama hnênah a hruai ta a."(Genesis 2:21-22)
Pathianin, Adama nupui a pek dawn hian, a muthilhtir phawt a, tichuan a nakruh ala chhuaka, a nakruh atang chuan, a nupui chu a siamsak a ni. Keini chu, min siamsak chawp a ngai tawhloa, Adama leh Evi te erawh hi chu thilsiam intan hunlaia mi an nih avangin, siam ve ve an ni thunga. Kan sawi duhlai tak chu, Adama a muthiltir laia tak hi a ni a, keini pawh hian kawppui kan zawnna ah hian, Adama kawppui a pek dawna Pathianin a muthilhtir hi, kan chhut chian a ngai awm e.
Mihring kan muthilh hian, kan chawl a ni, Adama muthilhtir tu kha Pathian a ni. Keini hi, Lalpa muthilhtir phakah hian kan awm ve em, chutiang tak chuan Lalpa hi kan pawh ve em?
Kawppui tur tha, Lalpan min pek theihna tur hian, Adama ang hian. Lalpaah kan chawlha, a muthilhtir phaka awm ve turin amah kan hnaih a ngai a ni.
Keimahni hian, kan kawppui tur hi, zawn hmuh tak kan tuma, hei vang hian kan chawl hlei theiloa, a nihna takah chuan social media kan hman nasat chhan pawh hi, kawppui tur kan zawn vang a ni pakhat a ni. Nalh taka ka in post chuan, miin min follow tam a nga emaw, miin ka pic an comment/like tam a nga, min friendtu pawh an tam a nga, mi hriat kan hlawh a nga, awlsam takin kawppui tur tha, hausa bawksi, fel bawksi ka hmu ang, te kan ti maithei. Chutianglo zawng pawhin, pa takin ka in pho lang a nga, thiltihtheih hmel deuhin ka in post a nga, chu chuan kawppui tur hmeltha deuh min hmuh tir ang, ti reng reng hian kan buai em?
Kan Pathian hausaknaa innghat theilo tur khawpin, mihring hausa kan zawng em? Kan Pathian mawina hmu theilo tur khawpin hmelhtha leh nalh kan zawng em? Kan zawng a nih chuan kan la inchhir ve khawp ang! Khawvel chu sawi loh, kan mizo zingah pawh, kawppui an zawn laia, mahni duhna dah pawimawha, Lalpa lam ngaihthahin, mahni duh ngei nei mahse a hnua na leh ngawih ngawih an va tam em!
Hmeichhia hi chu sawilo ta law law ila, a chhanchu Pathian thu chu sawi loh, an mahni hmangaihtu leh a chheber pawh lo tawkse, an mahni tuamhlawmtu tur an chhungte leh an thianthate thu pawh hi, an duhzawng hmu tawha an inhriat chuan, an awi theiloa. Chuvang chuan, mipa lam hi han sawi ta ila, "kan thianpa fel em em mai, kan Rev zinga hriat hlawh tak fapa ni nghe nghe leh India rama zirna tha pawla zir chhuak lehkha thiamah pawh thiambik hian, nupui a thlangsual hlauh maia, hreawm a ti ngang a niang, a rilruna chu zan engemaw zah a mutheilo nghe nghe a ni. A tihsual lian bera a sawi chu, kan hmanhmawh lutuka, duh aiin kan inhre chiang hmanlo a ti. Chutiang taka, a hmanhmawh a nih chuan, Pathian a rawn mumal biklo tih a hriat mai awm e."
Mipa tana hriat tura tha mai mai chu, hmanlai leh tunlai a inang tawhlo tih hi a ni. Hmanlai chuan, mipa te hi an pathlawi a nih pawhin an hming a chhe mai mai loa, tunah chuan a dang ta khawp mai, theih loh chu a nilo a nga, mahse pathlawi tan chuan hmeichhe tha neih a har tawh a ni. A chhanchu, tunlaia hmeichhe tha kan tihte hi, an fing tawh em em a, hmahun (future) an thlir thiam tawha, thenkhat phei chuan an mahni chunga thatna chhuahtu ai mahin, fate tana pa tha ni theitur an thlir thiam tawh thin a ni.
Kawppui thlangsual ve ngailo, mi chikhat an awma, chutiang mi chu "Lalpan a muthilhtir theih khawp tura, Lalpa hnaih thintu te an ni."
Lalpa, i duh duh chu min pe la, chhungkua kan din huna kan nun tur pawh i kutah awm nghal vek rawhse, tiin Lalpaah chawl ngat ila chuan, kan beisei aia tha zawk mah hi, van Lal thutthlenga thua engkim chunga roreltu kan Pathian hian min pek a rinawm a ni.
(Tawngtai Dan Tur)
Lalpa, nangmaha chawl chunga ka nun ka hman theih nan min pui la, chutianga nangmaha chawlte chu kawppui tur an tana tha ber i pe thin a ni tih hre rengin, keimaha kawppui tur zawnga buai buai lo hian, nangmaha chawl chunga, kawppui tur ka zawn theih nan min pui ang che, Amen. Ti ang o.
No comments:
Post a Comment