Chuvângin, duh takte u, chutiang thilte chu in beisei avângin bawlhhlawh kai lo leh sawisel bovin, thlamuang taka in awm a hmuh theih nân che u, taimâk chhuah rawh u (2 Peter 3:14).
Saddleback Pastor Rick Warren-a chuan, "Your Commitments shape your life." a ti a. Ka pawm zâwng tak a ni a. Pathian tana kan inpekna (commitment) azirin kan nunah hian Krista nun zia a lang fiahin, a lang fiah phâk lo thei bawk a ni.
Kan commitment chu zaa sawmli (40%) chin hnuai lam chauh a nih chuan, kan inkhâwm khât hle ang a, sâwma pakhat pêk tur kan nei lo fo ang a. Kohhranah kan țha hnem lem lo hle ang a, Bible kan chhiar khât hle ang a, kan țawngțai ngai mang lo ang, chhûng inkhâwm kan nei ngai lem lo ang, Kohhran hruaituten min rawn inkhawm chilh erawh chuan kan lo dawngsawng ve tho ang a, lo phûrpui dân erawh kan thiam lo ang. Remchang kan hmuh chuan hleprûk kan hreh lo ang a, zûk leh hmuam chu kan nunphungah a bet tlat ang a, nghei a țulna kan hre hek lo vang.
Zu leh ruihtheih thil dang pawhin min kiansan teh chiam lo vang. Kriatian chu kan inti ve tho si ang a, mahni Kohhranah chuan kan ruh ve tlat tho ang a. Biak inah thil danglam deuh a thlen țum chuan kan inkhâwm ve anga, boruak apangngai leh hunah keini pawh inkhâwm lo zâwng bawkin kan pangngai ve leh mai ang. Kohhran leh hruaitute sawi chhiat nuam kan ti viau ang a, vuina tur kan ngah țhin ngawt ang. Kan lan dân mai ațangin miin kan nihna an hai hauh lo anga, meizial țan nân meitalh min dil fo anga, kuhva min dil fo anga, zu awmna min zâwt ru fo bawk ang.
Kan commitment chu 40 - 70% vel a nih chuan, Kohhranah chuan kan tel ve nasa tawh viau anga, kan inkhâwm ve fo ang a, chanvo pawh eng eng emaw chu kan chelh ve țak țak tawh ang. Mahse, kan nun chhûngrilah Pathian a la lal tak tak lo vang a. A rûk deuh chuan hlêprûk pawh kan hreh chuang lem lo vang, zu pawh kan in ru duh zel tho ang a, sex pawh mualpho dawn loh chuan pawi ti vak lo vang. Phûr chang chuan inpe ber ang zia zangin kan ri hluai ang a, kan dâk leh erawh chu a na hle si ang. Kohhrana kan thawh țhat chhun kan chhuang fu zel ang a, midang kan hmu tling lo thuai thuai ang.
Biak inah Bible leh hlabu nen, iptê ngeiin kan ak lût ve fo ang a, in lamah erawh chuan kan chhiar khât hle si ang. Pathian thuin min ei tak tak lo anga, keini pawhin Pathian thu kan ei tak tak hek lo vang. Sual sim duhna tak tak kan nei lo vang a, zûk leh hmuamin kan rinna a khawih pawi lo tih chu kan tuipui zâwng tak a ni ang. A chang chuan zûk leh hmuam chu sim kan tum ve țhin ang a, mahse kan commitment chuan min simtir phâk si lo vang. Keimahni tih ve tur leh kan thianghlim ve tur lam kan tuipui ngai lo ang a, khawngaihna leh hmangaihna a thlâwn a nih thu kan tuipui hlur ang a. Miten kawm nuam min ti ang a, a chhan chu kan nunphung a la țawp ve vâng mai chauh a ni si ang.
Kan commitment chu 70% chin chunglam a nih erawh chuan Lalpa tan kan inpe zo hle tawh tihna a ni a. Inkhâwm nuam kan ti phâk tawh ang a. Pathian tana pêk lêt ve chu nuam kan tih zawng tak a ni ang. Kohhran thiltihnaa tel chu kan nunphung a ni ang a. Sual sim leh thil țha tih kan tuipui ang, thil țha tih leh Pathian rawngbâwl chu kan tân phurrit a ni ve lova, nuam kan tih zâwng tak a ni zâwk reng ang.
Thianghlimna kawngah pawh, Lalpa avângin kan hlêpru lo thei a, Lalpa avângin zu in te, drugs tih te, sex hman sual te chu kan harsatna a ni tawh lova, kuhva ei leh, zûk leh hmuam thlengin Lalpa avângin kan paih phal tawh a. Kan taksa leh kan chênna in leh lo thlengin Lalpa mite chênna awm rengin a fel fai phâk țhin a. Pathian rawngbâwltute inchei dân tûr âwm reng chu kan inchei dân a ni tawh a. Kan lan dân ațang rengin miin meizial țanna tur meitalh dil chiah min ngai lo vang. Zu awmna lai min zawt ngai bawk hek lo vang. Pathian thu leh kan nunphung chu a lo inzawm nghet tak tak tawh dawn a ni.
(Tawngtai Dan Tur)
Lalpa, i tan theih tawpa in pe te hi, damlai hun hmang nuam ber an ni tih hi hre chungin, ka hlawkna tur niloin, i lawm zawng a nih avangin, i tana ka zawng zawnga inpe turin min pui ang che, Amen. Ti ang o.
No comments:
Post a Comment