"Chutichuan lawng hotu chu a hnênah a lo kal a, Aw nang muhîl, eng tizia nge ni? Tho la, i Pathian ko rawh, Pathian chuan, kan boral loh nân, min ngaihtuah mahna, a ti a."(Jona-1:6)
Thawk khat lai khan Pathian chu ka hlat em em a, ka nun hi ka duhdanin ka hmang a. Ka nun kaihruaitu chu Pathian ni lovin keima duhna leh chakna zawk a ni thin. Chutia hun eng emaw chen ka awm hnuah chuan Pathianah inthiam lohna ka nei a, ka rilru a nuam thei ta lova, ka nun a ruak em em a ni. Pathian chu hnaih a tha tih ka hria a, amah hnaih ka mamawh tih pawh ka inhria a ni. Mahse inthiam lohna lian tak ka nei a, Pathian hnen lam pan chu ka tim em em mai a ni. Ka tawngtai chang pawhin min ngaithla duhin ka ring ngai lova, tiang chuan tuilairapin ka awm a, hrehawm ka ti hle a ni.
Mahse Jona 1:6 thua "Tho la, i Pathian ko rawh" tih hi tlai khat chu kawngsira intar ka hmu a. Min khawih em em mai a. Ka haw veleh ka chhiar chhunzawm ta a ni.
Jona chanchin hi kan hre theuh awm e. Pathianin Ninevi khuaa kal tura a tih chu Tarsis lamah a tlan bosan a nih kha. Pathian thu a awih lova, Pathian duh loh zawngin a kal ngat a ni. Mahse chutianga Pathian thu a awih loh lai pawh chuan Pathian chuan Jona Pathian nih ka duh tawh lo ti lovin, a Pathian nih kha a lo la thulh lova. Jona chuan Pathian chu bansan mahse Pathian chuan Jona chu a lo la bansan ve hauh lo a ni. Pathian hmangaihna hi ava han ropui tak em. "Tho la, I Pathian ko rawh" tih laiah hian "I" tih lai tak hian ka rilru a khawih nasa hle a. Jona kha Pathian thuawih lo ni mahse "I Pathian" tiin lawngpu khan a sawi a. Pathian chuan a lo la ensan lova, Jona Pathian chu a lo la ni reng mai a ni.
Kan fel leh kan that lai chauh hian Pathian hian kan Pathian nih a duh lova, kan sual eng ang lai pawhin kan Pathian nih a duh a, kan sualna hmun atanga tho vat a amah ko leh turin min duh a ni.
Inthiam lohna leh insitna nasa tak awm thin mahse heng ho hi Pathian nena kan inkar tichhe tura tling tawk a awm lova. Pathian hmangaihna hliah khuh zo reng a awm lo a ni.
(Tawngtai Dan Tur)
Lalpa, keima nuam tihzawng zawngin, i hmaingaihna hnawl thin mah ila, i hmangaihna chuan min hnawl ve ngailoa, i rawngbawl leh i hnungzui bansan thin mah ila, nang chuan min hmangaih i bansan ve ngailo. I hmangaihna a awm hi ka tan a tha ber a ni tih hriain, nangmaha ka awm tlat theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment