Hming Chungnung Ber Isua Krista Hming

"Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a."(Philipi 2:11)

Hming zawng zawnga hming chungnung ber awmzia hi sawifiah phawt ila. A awmzia chu mihring zawng zawng leh vana awm zawng zawng zinga hming chungngung ber tihna a ni a.

Hmanlai chuan, lal ten an hmingin mi an tir thina, an tirhna hmun ram emaw, mite chuan tu hmingin nge ilo kal an ti thina, lal hminga an kal a nih chuan an zah thei hle a, an thu ken pawh chu an ngaihpawimawh sak thin a ni. Tunlaiah pawh, milian deuhte leh hnasang deuh chelhte hming hi mi nawlpui te hming ai a chungnunga miin an dahsang thin a ni.

Tin, van lamah pawh vantirhkohte zingah khian, hotute leh hruaitute an awm thin a, mithianghlimte pawhin dinhmun sang tak an chelh bawkin a hriat a.

Leia mi leh vana mi eng ang dinhmuna ding emaw, khawi ram lal emaw, eng officer lian leh minister zawng zawng te aia hming chungnung leh nihna sang, van Lal thutthlenga thua rorelna zawng zawng neitu a ni tihna a ni.

Chutiang taka chungnung leh Lal ropui Isua Krista chuan, ka hming hi hmang ta che, i hna zawnna ah te minister hming hmang loin ka hming zawk hi hmang ta che, i nula rimna ah leh rual i pawlna ah te pawh milian leh thiltitheite hming dah tha in, lei leh van zawng zawng Lal hming, ka hming hi hmang zawk ta che min ti.

Inhauna leh innghirnghona karah pawh, ka hmingin remna zawng rawh i hmu ang, tin lawmman ka pek phah bawk ang che min ti theuh a ni.

Hawh u, natna leh ramhuai pawhin an hlauh leh tih, kan Lalpa Isua Krista hming hi, hming dang zawng zawng aiin i chhuang ang u.

(Tawngtai Dan tur)
Lalpa, ka hriat loh leh ka at vangin, i hming aia hming dang kalo chhuanna ah min ngaidam la, i hming chauh ka chhuan theihna turin min pui ang che, Amen. Ti ang o.

Kawppui Atana Lalpa Tih Mi Neih I Duh Chuan, Lalpa Tih Rawh

"Chu mi avang chuan tupawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta."(II Korinth 5:17)

Ka nupui nen nilai zan kan inkhawm bang chu, kan thian pakhat Chhuana kan tlawha. Kan thianpa te ina kan thlenhnu rei vaklo ah chuan, kan tleirawl laia ka kawm thin kan thian pakhat chu a rawn kal ve a.

Kan inkhawm hnu rei vak loah chuan, kan thingpui inna chu, kan nu'in a seng puia, kan nu a kalbo hlan chuan, chu kan thianpa pakhat rawn kal ve chuan, Rinna i va in thlak ta ve, Mawii kha i duh thei em em a, tunah lah Mawii zia leh hmel nena in anna pakhat mah neilo, nupuiah i nei leh ta bawk sia, a ti a. Kei chuan, Mawii khan min duh loh tih i hriat vek kha, kan phu tawk kan neih mai lohah, ka ti a, kan nui dar dar a.

Kan thianpa chuan, Mawii khan a duh reng che alawm, inkhawm thulh hlek kha i duhlo tlata, i ngaihtuah tawk loin a inhriat vang alawm a ti a. Chutiang a ni a mawini le? Mawii khan chhuahvahte a duh thin a, ka pa motor ka duh ang angin ka hmang thei siloa, chhuahvah pui thei zawk an tam si a, min duh talo niin ka lo hre mai a sin, ka ti a.

Chhuana, chuan Rinna hi chu Pathianin a awmpuia, chhungkaw tha tak a pe a, inkhawm a peih loh pawhin a nu leh pa ten inkhawm loh an phallo a. A chhungten Pathian lamah an hruai tlata, chu chuan a thinlung a thlak hret hreta, Pathian a tih hle in ka hria a ti a. Kei chuan, a awi awm loh e mai, Chhuana thin hi a, ka tluk loh zia che hi ka ti a.

Chhuana chuan, a nia lawm Rin, Pathian i tih tlat chuan, Pathian hlattu chu, chhanchhuak turin, i sum leh i thisen hial pawh i pe duh maithei, mahse thinlung inpawh taka kawppui tur atan chuan, i mil theilo ang, a ti a. Kan nu no seng zo chu a rawn pheia, haw mai kan rawt taa.

Kan haw kawngah chuan, Chhuana leh kan thianpa pakhat tawngkam chu ka ngaihtuah rauh rauha, Mawii leh kan nu chu an in anglo khawp mai a, Mawii chu sap flim star hmeltha tak hi a anga, kan nu chu hmelfai tak leh engtin emaw taka zahawmna nei riau hmel a pu a. Tichuan, kan nu chu kan en vang vanga, ka hmuhhmasak ber chu ngilneihna a ni, , a ngilneih tih chu a hmel atang pawhin a hriat maitheih in ka hriaa. Chu ngilneihna chu, Pathian nen an inhnaih em avangin a nei a ni tih chu, a pasal ka nih avangin ka pawh thiam nghal bawka.

A hmel a tha pangngaia, mahse model te anga inkhaithli zaih ang chu a ni loa. Chutih rual chuan, a buala minute 5 lek ka awm pawhin ka hahdam sawng sawng thinin ka hriaa, a chhanchu minute 5 lek chhung pawhin, ka hah leh hah loh te, bible ka chhiar lai te, ka thil tih mek te dam dapin min sawipui thin a. Chutia ka chhut neuh neuh lai chuan, dawr bul kan thlenga, kan nu chhang duh zawng chu lei ka rawta kan lei zawh hnuah chuan, hei hi ka hre chhuaktaa, kan nu'in ka chunga a tih ang chiah chu a chungah pawh kalo ti ve reng a ni tih hi.

Chhuana sawi kha a dik ka ti ta hle maia "kawppui tur atan Pathian tih mi kan duh chuan, keini hian Pathian lo tih phawt ila, tichuan Pathian tih mi hi kan lo hip mai dawn a ni" ka ti ta a. Chu tia ka ngaihtuah lai chuan "Lalpan, a khawngaihna avang chauhin, ka nun chu a thlaka, a khawngaihna avanga nun a thlaksak vek, nupui min pe a ni" tih chu ka ngaihtuah chhuaka. Mihring hi, inchhuang thei kan awm loh zia leh Lalpa vang chauh a ni, tiin Lalpa chu nasa zawka vawn lehzual ka tum ta a ni.

(Tawngtai Dan Tur)
Lalpa, i khawngaihna avangin mi tha zawkah min siam reng duha, mi tha zawka min siam theihna turin nangmah ka hnaih tlat theihna tur che in min pui la, chutianga nangmah ka hnaih tlat che chuan, a hun i tih takah, ka tana kawppui tur atana tha i tih chu, min pe ang tih hi hre reng chungin i lam ka hawi tlat theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Isua Ringtute Ai, Big Bang Theory Ringtute Hian Rinna An Mamawh Tam Zawk

“I kain Isua chu Lalpa a ni tih i tan a, Mitthi zing ata Pathianin a kai tho tih i thinlunga i rin chuan chhandamin i awm ang,” tih hi."(Rom 10:9)  

Big Bang Theory thlir thuak thuak ang o!

Kum vaibelchhe 13.8 (Billion 13.8) kaltaah khan, thil pakhat a puak keha chu chuan, energy hrang hrang  nasa takin a rawn hring chhuaka, chung energy (atoms, protons, neutrons, electrons) leng vak te chu an kal an kala, arsi tamtak a siam a, chung arsi te chu an keh darh leha energy nasa tak an theh darh leh a, tichuan chung energy leng vak te chuan arsi hrang hrang a siama, kan ni pawh khi a rawn hring chhuakta a, kan niin energy a hman bangte chu a vir a vir a, planet te a siam taa, tichuan kan lei earth pawh hi a rawn insiam chhuaka. Chutih hunlaia kan lei chu, a ro hle a, tlangkang nasa lutuk a awma, uranium te, iron te, sulphur te a awm ta nuai a, mahse tui ala awm loa.

Tichuan, asteroid lian tak Mars tiat velin, kan lei chu a rawn denga, chu kan lei a rawn denna atang chuan, thil hlawmlian tak pakhat hi a chhuaka, chu chu kan thla (moon) khi a ni taa, kan thla chuan kan lei vir chak lutuk chu a vir muan tira, darkar 6 leka ni kalhual thin kha, darkar 24 chhungin ni a kalhual taa, chu chuan kan lei a ti daia, kan lei chunga tuihute chu ruahah a chantir taa. Tichuan, ruah nasa takin a rawn sur  taa, kan lei chu tuiin a khuh leh ta vek maia, chung tuiah te chuan, iron a tam em em a, boruakah lah oxygen atam bawk nen, oxygen leh iron insu chuan kan lei ang hi a siama, tupui chhuatah chuan a awm khawma, kum maktaduai fe a liam hnuah chuan, a rawn pawng chhuak ta a, tuna thlai to theihna lei hi a rawn awm ta a ni. 

Chutih rual chuan, tui chhunga hydrogen, carbon, nitrogen, oxygen insu khawm atang chuan bacteria tamtak a rawn insiama, a hnuah phei chuan D.N.A a rawn insiam taa, chung D.N.A te chu a inzawm khawma, thil sakhat nei a rawn siam chhuak taa, a hnuahah chuan sanga ang pangparh neilo mei ringawt nei, hnuzang ruh nei hi a rawn siam chhuak ta a ni. Chuta tang chuan, kum maktaduai fe a kal leha, chumi hnuah chuan, tui leh leia awm khawp thei rannun (amphibian) a rawn insiama, chungte chu tui pawna an chhuah an chhuah hnuah chuan, reptile ah an inthlak chho ta a ni, heng raptile te hi an lian em em a Dinosaur kan tihte hi an ni.

Chung, dinosaur lian deuh deuh karah chuan, rannung lian lo te te, tlema danglam deuh sazu pian ang nei, kut zungtang 5 leh ke zungtang 5 nei an rawn chhuaka, chung rannung te chuan an fate chu an hringta thung a (mammals). Kum maktaduai fe a liam leh hnu chuan, asteroid (lung male 6 bial vel) in kan khawvel a rawn deng leh a chu chuan leia thil nung kg 23 chin vela lian zawng zawngte chu a tihlum ta veka, tichuan rangnung te ho, mammal te chuan khawvel an luah ta a ni.

Chung mammal sazu ang maia bawk vaka kalte chu, an rawn inthlak hret hreta, an lian telh telh bawka, zawng a rawn chhuaka, thingah an lawna, an ban tha an hman nasat avangin an ban pawh a sei zawka, an ke ai an ban pawh a lian zawk a. Mahse, thing leh hnimte (competition) chuan tona an indaih loh avangin, hnim ten thing an luah lana, thing tam tak an thia, chung zawngte chu kea, an kala eitur an zawn a ngai taa. Chutia kea an kal tam tak hnuah chuan, an ketha a rawnin siama, an lo ding ngil taa, tichuan mirhing kan lo chhuak ta a ni.

Kan awi em? 

Big Bang theory hi ringtur chuan, rinna neih that a ngai a sin o! A chhan chu maw:

1. Thil lian pui puak Big Bang kha, khawi atang lo awm nge a nih? He zawhna hi tuman an la chhang theiloa, thil puak lian deuha chu a awm tih rin ringawt dawn chuan rinna neih san a ngai khawp mai. Scientist thenkhat chuan, kan universe a fan zel danah hian, force (nawrtu) a awm a, chu chuan a tirah thil puak pakhat atang kan universe hi a intan a ni tih ngaihdan chu a neih tir ta a ni.

A nihna takah chuan, kan universe hre tak tak tur hian mihring te hi kan la hniam em em a, kan planet hnaih ber Mars ah khian mihring tumah an la kal loa, drones an dah dawn pawhin, ni 200 (thla 7) vel zin nan an hmang thin a ni. Chutiang vela, kan lei pawn kan la hriat chian loh laia, thih ngama big bang lo rin ve ringawt hi, atna chikhat a ni thei hial awm e. Big Bang hmuchhuaktu Georges Lemaître'a hnenah, hian big bang a awm ngei a ni tih finfiahna min han hmuh teh ti ta ila, a nei bik lo a nga, cosmic microwave background leh universe fan dan vel a sawi chiam mai thei a ni.

2. Charles Darwin evolution theory hi, Big Bang nen hian a kal kawp deuh a, hengte hi awi tur chuan rinna neih that ve viau a ngai ang.

Bacteria tuichhung a mi kha, kum maktaduai hnuah, zawngah alo chang chhoa, zawng atang mihring kan rawn chhuakta a ni, an ti a. Zawng leh mihring kan in hlat zia mai chu, kum sing chuang fe mihring kan awm tawha, mihring leh zawng inthlah pawlh kan la awm miah loa. Sakawr leh sabengtung te erawh an in thlahpawlh a, sihal leh ui te pawh, mihring leh zawng hi chu kan inhlat deuh a ni.

Chu bakah bacteria hi, thilnung hrim hrimah hian, chhiar sen loh a awm a nga, mahse backteria in thil nung a siam chhuah hi ring tur chuan, rinna ngah a ngai leh khawp ang. Tuiah te, thingah te, hmun tinah bacteria chu tun thlengin chhiarsen loh ala awm a, thilnung tinge an siam chhuah tak loh le?

3. Amphibian (tui leh lei awm khawp thei rannung) atang thil dang apiang chhuak thei a nih chuan science a mihringte kan san tawh hnu kum 100 chung hian, rannung pakhat tal inthlak tawh emaw, inthlak mek emaw tinge an hmuhchhuah loh, amphibian atang thildanga inthlakna pawh hi ring tur chuan, rinna neihsan a ngai khawp mai.

4. Mammals (fa hringchi rannung) te hi, kan awmna leh kan nundanin thildangah min thlak thei a nih chuan, kum singkhat chhung hian tinge mihring pakhat mah, eng emaw thildangah kan la chhuah si loh, mammals thil dangah an chang chho lai tak pawh hi, ring tur chuan rinna neih san a ngai khawp ang le.

Pathian awm ringloa Big Bang leh Evolution pawm zawk te hian, sakhua chu mihring thinlung siam chawp a ni an tia. Big Bang pawh hi mihring thinlung siam chawp leh hmuh theih loh leh khawih theih loh rinna a nih avangin, sakhua inti duhlo mahse sakhuana pakhat a ni thei awm e.

Kristian te chuan:

Evidence kan nei tha asin,  Aigupta ho puk thenkhatah chuan, Juda tawng ngeiin "Lalpa min pui rawh" tih in ziak te hmuh tur ala awm a. Red Sea (tuipui sen) hnuaiah pawh Aigupta ho sakawr tawlailir ke, spoke (a dona) paruk nei leh 18th dynasty Exodus hun lai chauha an hman thin spoke pariat nei te hmuh tur a awm a.  

Isua zirtir 11 te thlan pawh tun thlengin kan hmuh theihin a awm a, Thoma thlan phei chu India ah "Thomas Cathedral Basilica" Chennai ah a awm nghe nghe a ni.

Kan Pathian rin hi, kan Pathian rin loh ai pawh hian a awl zawk awm e. A chhanchu, kan Pathian hi rinna turin finfiahna kan nei tha zawk a ni.

Kan Pathian hi a awm ngei a "I Tana A Thu Thiam  Kha A Hlawhtlin Tir Ngei Ang," kan Lalpa Awma chu vuan tlat ang che.

(Tawngtai Dan Tur)
Lalpa, khawvel hian a hrelo che a ni, hria che sela chuan a thlah phal tawh ngai lo ang che. Ka Pathian i nih avang hian ka lawm e, ka zawn loh lai che pawhin nangin min zawng chhuak sia, i duh anga ka nun theih nan min pui ang che, Amen. Ti ang o!

Harsatna Dawt Chiah

"Tin, thununna reng reng hi tuar lai chuan lawmawmin a lang lo va, lungchhiatthlakin a lang zawk thin, tuar hnuah erawh chuan chu mia sawizawia awmte tan chuan rah thlamuanawm tak felna chu a chhuahsak thin."(Hebrai 12:11)

Isuan a zirtir te hnenah khenbeh a nih tur thu a sawi khan an pawm theilo a ni. Petera phei chuan an man dawn thleng pawhin tharum hmangin Isua kha ala chhan ngar ngar a ni. Isua kha kross a thlen kha an phal lova, an ngai ngam mawlhlo a ni. Mahse Isua chu khenbehin a awm ta a, phumin a awm a, a rawn tho leh a, a zirtirte hnenah a rawn inlar ta a. Chutah zet chuan kross kha Isua thlen tum ber, a goal tih an hre ta a, khata lungngaihna an tawh kha khawvel chhandam a alo awm theihna tur a nih vang a ni, tih chu an hrethiam ta a ni.

I harsatna te, nghaisak i tawhna te, i nuna eng thil pawh i buan mek te kha Pathianin i nuna thil ropui tak alo thlen tirna tur kawnga a dah a ni thei asin.

Hei hi ringtu ten man ila chuan harsatna hmunah pawh Pathian hnena lawmthu sawi theih dan kan thiam ang. A chhan chu dinhmun ralmuanga kan awm lai aiin thlaler hmuna kan awm lai hian kan chak zawk a, zirlai kan zir chhuak tam zawk bawka, Pathian kan hnaih zawk bawk thin a ni.

I harsatna kha Lalpa nen han hmachhawn teh le! Kha i harsatna dawt chiahah khan, i beisei ngam tawh loh thil tha Lalpan alo dah reng thei asin. Lalpa chelh tlatin, heng pahnihte hi hre reng ang che :

1. Khua a var dawn tawh chuan, zan a thim zual thin a, hun tha i tan a inher chhuah tawh dawn avangin, a harsa zual a ni thei, bei zel rawh.

2. Sipai indona paltlang te chauhin, lawmman tha bik an dawng thin a, chutiang ang chiah chuan kha indona (harsatna) dawtah khan, lawmman a awm dawn a ni.

Kha Harsatna Dawt Chiahah Khan, Lalpan Hun Tha Leh Lawmawm, I Tan Chauha A Ruat Chu A Dahsak Tawh Che,  Beidawn suh!

(Tawngtai Dan Tur)
Lalpa, harsatna dawt chiahah hahchawlhna leh lawmman, i mite tana i dahsak thin chu ka chanve theih nan, nangmah vuantlat chungin, ka harsatna te hi ka paltlang theih nan min pui ang che, Amen. Ti ang o.  

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Hun Tawna Zira Nun Thiam Zel (Going with the flow)

"Tichuan Josefa chuan a pu mit a tlung a, a rawng a bâwl thîn a: tin, ani chuan a chhûngte chungah chuan hotuah a siam a, a neih zawng zawng a kutah a dah ta vek a."(Genesis 39:4)

"Tichuan tân in vêngtu chuan tân ina tângho awm zawng zawng chu Josefa kutah a kawltîr ta vek a; tichuan chuta an tih apiang chu Josefa chu a titu a ni zêl thîn a."(Genesis 39:22)

"Hun tawn zira nun thiam zel" tih lampang hi bible changah han tar lanna fak a awm pawhin a hriat loh a, amaherawhchu Josepha nun ah leh Isaaka nunah hian chiang takin a lang a. Chutih rual chuan, sual lakah nasa takin an invena, sual chu an do bawk thin a ni. 

Hun tawna zira nun thiam a ngaih thin laiin, engkimah chuan hun tawna zira nun leh ringawt thinna chuan, mi phaklo ah min siam thei a ni. Chaw eikhawmna ah thian ten zu an ina in ve ringawt emaw, zirlai kan nia kan thian ten lehkha an zir loh avanga zir loh ve ngawt emaw, kan office a kan thawhpui ten hlawkna an insiama lo insiam ve ringawt emaw lampangah chuan, hun tawna zira nun thiam ai chuan, sual do ngam a pawimawh zawk awm e.

Tihian han sawi teh ang, Pathianin ringtute hi tum bik (target&aim) kan neih a phala nei tur pawhin min duh zawk a rinawm a, Thufinte 29: 18 kha KJV ah chuan "Where there is no vision, the people perish: but he that keepeth the law, happy is he." a nihna ngau ngau a sawi chuan " Hmathlirna a awm loh chuan mipui an ral thin" a ti. Tum neilo chuan, hmathlir an nei thei ngai loa, miin a tum chu chiang takin a chhuta a thlir lawk thin zawk a ni. Josepha te, Abrahama te pawh Pathianin hmathlir duhawm tak a pe a tih theih bawk awm e.

Hma thlir nei miahloa kual kual mai, sumdawng pakhat an sawi chu, zingkarah behlawi a zuara, chhunah rangkachak a zuara, tlai lamah secondhand a zuara, rilru nghet a neih loh avang chuan thawk nasa hle mahse, a ei tawk tawk a ni an ti. Hengtiang anga rilru bubal neih loh hi a ringtu zia lo em em a, ringtu chuan a tir atang tum felfai tak kan nei a nga, chu kan tuma chu theihtawpin kan um tur zawk a ni. Chutih rual chuan, inngaihzawnna lamah chuan a ni ber awm lo e.

Amaherawhchu, tum bik nei mah ila, vawikhat tumnaa hlawhtling nghal hi an vang em em a, kan bible ah pawh hmuh tur an awm meuhlo, chu mai bakah tunlai kan khawvelah pawh hmuh tur an vang hle awm e. Chutiang a nih avang chuan, kan thil tum kan neihna tur leh kan nih duh kan nih theihna tur kalkawngah chuan, harsatna tawh chang leh hnungtawlh chang a awm ngei ngei dawn a, chung hunah chuan "Hun Tawna Zira Nun Thiam Zel (going with the flow)" a pawimawh ta a ni.

Entirnan, missionary nih tumin, training school ah kal ta ila, mahse inenkawlna nei loin inhlawh chawp ngai ta sela, missionary nihna tur dal thei engmah a awm chuangloa, tlemin a harsa deuh tihna mai a ni, mi tamtak pawh kuthnathawkin ei an zawnga, kei pawh theih ang angin ka thawk a nga, Pathianin ahun a tihah chuan a duhna ah min dah ang, tia rilru kan siam mawi hi a tha awm e. 

Chutiang ang bawk chuan, thildang kan tumna ah pawh harsatna kan tawk thei a ni, kan thiante motor a an kal thin laiin ke in kan kal thinte pawh a ngai maithei, miin lehkhabu an duh duh an leitheih laiin keini chuan kan hawh tau tau a ngai maithei, hriat tur a tha chu lehkhabu leina man tur neih loh vanga fail an awm ngailoa, lehkha zirpeih loh vanga a fail an awm thin zawk a ni. 

Mi neih ang kan neih phak lohna hi chhuanlam tling a nih theih rualin, chhuanlam tling a ni mang ngailoa, mi tamtak chuan "kan dinhmun a chhe em alawm, kan ti thina, midang dinhmun atanga hlawhtlin kan tum em mawni thin le! Mahni dinhmun atangin hlawhtlin kan tum zawk tur a ni." Chu tia theihtawp kan chhuaha, kan hlawhtlin mai loh hun alo thlen chuan, "tun tumchu hetiang zawng hian kan ti teh ang, a hma khan hetiang hian ka tia, a fuh ta siloa" tia kan insiamrem thuai thuai theina chu, kan hlawhtlinna tur tak a ni thei a ni.

Helho bei thei khawpa fit tha sipai officer pakhat nen vawkhat chu kan inkawm a, sipai dangin training a hautak thin an tia, engtin nge in train a ka ti a, a ni chuan "hautak nang, vawikhat pawh, under pant nen chauh ramah helicopter'in min daha, kar khat vel min kalsana, mahse a hautak chuanglo engmah kan rilruah kan dahloa, kan awm awm in kan awm hmiaha" a ti a. Hepa hian tum a neia, a tumah a chianga, eng ang pawhin hautak mahsela, a hel kual loa, a inkhawngaih kual loa, a hun tawn ang ang chuan a awm zela, tunah phei chuan captain te hial pawhin sir tia an koh tham alo nih phah ta a ni.

Kan nuna kan thlak theih loh thil kan hmachhawn hian, a nih  ang anga hmachhawn mai a, hunin min nandan a zira nun thiam mai hi a that ber chang a tam awm e."

He nun zalen hi, min pek tum rengtu mipakhat a awma, chu chu kan Lalpa Isua Krista a ni. Paula nun te, Petera nun te, Johana nun te ngun taka kan en chuan, an hun tawna zirin an lo nung thiam em em thin a ni.

(Tawngtai Dan Tur)

Lalpa, nangin min hruai avangin, ka nunah hian engmah a kalsual tak tak dawnlo a ni tih hriain, nangmaha chawl chunga engkim hahdam taka hmachhawn thiam zel thei turin min pui ang che, Amen Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Chhungkua Leh Hriselna

"Ngai rawh, damna leh hriselna ka rawn thlen ang a, ka tidam ang: muanna leh himna nghet tak ka hmuhtir ang."(Jeremia 33:6)

"Mahni ngaihin intifing suh la; LALPA chu tih la, sual kalsan rawh. I lai atân hriselna a ni ang a, I ruh atân thling a ni ang."(Thufingte 3:7-8)

"Mahni chhûngkua tibuaitu chuan thli a rochung ang a, Mi â chu mi thinlung fing chhiahhlawhah a awm ang."(Thufingte 11:29)

Bible ah hian, hriselna kaihhnawih damreina, chakna, thling leh ruh, mitvar, thahrui tih te a tam em em a ni. Chutiang ang bawk chuan, chhungkua lam kaihhnawih fate, nu leh pa, nupui leh pasal, unau, farnu, thisen zawmpui tih ang chi hi a tam em em bawk a. Kan Pathian pawh hian hriselna leh chhungkua hi a ngai pawimawh a ni tih a hriattheih mai awm e.

Pastor Joel Osteen'a chuan "Billionaire pakhat ka hriaa, hausa mahse a hrisello em em a, theih tawpin hrisel turin a bei thin a, hei hi ka hrilh duh che, chu Billionaire ai chuan i hausa a ni, a ni chuan i hriselna neih ang kha a nei pha velo a" a ti.  

Pastor John Hagee'a pawhin "Chhungkua i neih phawt chuang, kawngkhatah i hausa phawt a ni, mi hausa tawntaw pakhat hian pawisa tamtak sengin chhungkua a neih leh a neih loh a zawng thin a, chhungkua a neih loh avang chuan a mal em em thin a ni" a ti bawk.

Zing leh tlaia chaw kilpui tur chhungkua kan neite hi, kan hausa tak zet a ni. Kum 5 vel lai chu, lehkha zirin hmun dangah ka awma, ei rawngbawl kan peih loh changin kan thian tha hnathawk tawh ten hotel changkang tak tak ah te chaw min eipui thina, hotel ngai hi nin alo awl a niang chaw eitur ringawtin China Town'ah te kan kala, tichuan kan awm rei hnuah deuh phei chuan I.A.S, I.R.S leh kan mizo officer lian in ah te chaw kan ei bawk thina, mahse chung zawng zawng pawh chu ei thin mah ila, "Mamas Cook" ka nu eirawngbawl tluka ei chak leh ngaih ka nei ngailo. 

Kan thian sipai officer (Captain) te in a chaw kan ei chang phei chuan, sipai thenkhatin chaw min rawn pek pahin chibai min buk zak zak thin nghe nghe a, chu tiang pawh chu nise! Tin, mi thiam ber ber te, leh mipawimawh ber ber te  nen inkawm chungin chaw ei thin mah ila, "kan chhungkaw chaw ei dawhkan tluka thlakhlel ka nei chuanglo." Chhungkua hi chu a hlu a ni, mihring hian kan mamawh hmasa a ni tih kan Pathian hian a hriat avangin, hausakna leh nihhlawhna dang mihring a pek hmain chhungkua hi mihring a pe hmasa a ni. 

Hei hi hre reng ila, kan chhungkaw tan theih tawp i chhuah ang u, chhungkaw tha famkim a awm theih loha, chhungkua in Lalpa kan hnaih ber lai hi kan famkim lai ber a ni tih hria ila, Lalpa hnenah kan chhungkua hi hruai i tum theuh ang u. Pathian lama chhungkaw hruai hi, tu tih tur bik mah a niloa, chhungkaw zing ami (member) zawng zawng tih tur a ni vek a ni.

Hrisel loh chuan engmah hi a nuam hlei theilo bawka, khawvela kan chak ber emaw, khawvela kan kal chakna berah hian damlo chungin kal ta ila a nuam chuanglo ang. Vawikhat chu cancer ka ni dawn emaw ka in ti a, thih chu ka hlau hranpa loa, Isua min chhandamna avangin a hnenah ka haw dawn tih hi ka chianga, mahse cancer ni tura kan indah chhin chuan, nun ka phurna zawng zawng hi a ral vek a ni. Chuta tang chuan hriselna hlut zia hi Lalpan min hmuhfiah tira, ka duh loh thil alo thleng emaw, alo thlawna ka hah em em changte pawh hian "ka hrisel tho alawm ka ti a, ka lawm leh viau mai thin a ni."

Kan hrisela, chhungkua kan nei bawk a nih chuan, kan vannei hle a ni tih hi inhria ang u. Thildangah mi neih ang nei phaklo mah ila hriselna leh chhungkua kan neih chuan, miin kan neih ang an nei phak biklo tih hi i hre reng ang u.

"Lalpa ka va lawm tak em, Hriselna leh Chhungkaw duhawm tak min pek avang hian!"

(Tawngtai Dan Tur)
Lalpa, hriselna leh chhungkua min pek avang hian ka lawm e, hriselna leh chhungkua min pek vang ringawt pawh hian, i hming faka zai zai mai tur ka ni tih inhriain, engpawh thleng sela i lam ka hawi zel theih nan min pui ang che, Amen. Ti ang o.

Suangtuahna Lian Tak Nei Turin Lalpa'n A Duh Che A Ni.

"Tin, ani chu pâwnah a hruai chhuak a, "Vân lam khi en la, arsite khi i chhiar theih chuan chhiar teh khai," a ti a. Tin, amah vêkin a hnênah, "I thlahte chu khiti zât khi an la ni ang," a ti a."(Genesis 15:5)

Ringtute hi he khawvela kan awm chhung hian harsatna tawk fovin, channa ruam zawh fo mah ila, Pathian chuan nun bet tlawk tlawk leh a chhia zawng zawng dawng reng bik turin min ti lova, hlawhtlinna leh malsawmna kan dawn tur hi tamtak a dah a ni.

Pathian chuan suangtuahna lian tak nei turin min duh a ni. Abrahama kha sungtuahna a neih tet vang a ni chek ang, vana arsi zawng zawng a en tir a, khang zat kha a thlahte anla ni dawn tih chu a hmuh tir a, a suangtuahna ti lian turin Pathianin a duh a ni. A hming Abrama atang Abrahama(mi tamtak pa)  tiin a thlak sak a ni. Pathian chuan a nunah thil ropui tak a thlen tir dawn avangin suangtuahna lian tak chu a neih theih nan heng zawng zawng hi a ti a ni.

Josefa pawh kha mumang atang Pathianin suangtuahna lian tak a neih tir phawt a ni.

Chuvangin, Pathian hian amah tihtute hi suangtuahna lian tak nei turin min duh a, a chhan chu kan tana a ruahmanna hi a lian em a, suangtuahna te reuh te nen min ruahmansak te chu  a inmil theilo a ni.

Mahse kan hriat reng tur chu suangtuahna lian tak neih leh chu suangtuahna hlawhtlin karah chuan harsatna tamtak paltlang tur a awm a ni. Rinna chak tak neih a ngai a, beiseina nung reng neih a ngai a ni. Chu kan suangtuahna chu kan thleng thei tawh dawn lo emaw kan tih tur khawpin harsatna leh buainain min nangching maithei a, mahse heng Abrahama te leh Josefa te ang hian Pathian beisei tlat a pawimawh em em a ni.

I suangtuahna ti hlawhtling tur chuan Pathian thuawih a pawimawh a, a thuawih tur chuan Pathian tihna a pawimawh a ni. Pathian vanga hlawhtling chauh tur a ni tih kan hriat reng a pawimawh a ni, chuvangin Pathian bel tlat hi a tha a ni.

(Tawngtai Dan Tur)
Lalpa, ka Pathian i nih vangin leh nangin ka tana ruahmanna lian tak i neih vangin, suangtuahna lian ka neih a tula, i hming avanga suangtuahna lian ka neih theih nan min pui ang che, Amen. Ti ang o.

I Natna Tak Kha I Hriat A Pawimawh Asin

"Tupawh an hnena ka pek tur tui in apiang erawh chu kumkhuain an tuihal lo vang, keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho vang,” a ti a."(Johana 4:14)

Damdawi lamah chuan, mi a natna fak an hmuhchhuah chian (diagnose) phawt loh chuan, damdawi an hmang ngailo a, damdawi an hmang a nih pawhin nachhawkna emaw, taksa in a mamawh ngei ngei vitamin te emaw chauh an hmang lailawk rih thin. Tichuan, natna tak tak an hmuh chhuah hunah chuan, natna do turin, chu natna donna tur bika siam damdawi ngei chu an hmang thin a ni.

Hetiang ang chiah hian, thlarau lamah pawh hian kan dam dawn chuan kan natna fak hi kan hriat chian (diagnose) a ngai a ni. Natna hre chiangloa nachhawkna chauh kan hman thin avang hian, eng emaw chen chu kan han zia viau a, kan na leh thin a ni thei a ngemle.

A nih loh pawhin damdawi vitamin pangngai heng inkhawm te, chhungin khawmte, leh a dang dang te hi hmang reng siin, kan natna damna tur tak kan hman fuh loh avangin kan tha thei chuanglo a ni a ngem. Mahse, medical a vitamin a pawimawh ang hian, hengte hi a pawimawh bang chuangloa a chhanchu, taksa a chak loh chuan damdawi tha pawh a thawk tak tak theilo ang chiah hian, thlarau lamah pawh damdawi fak hmang mah ila, vitamin kan hman that loh avangin a thawk tha leh chuanglo theia, chu vang chuan kan la na reng thei tho bawk a ni.

A pawimawh ta chu, kan natna (harsatna) tak kan hriat chhuaha, chu mi damna tura kan in enkawl chu a ngai a, chu bakah chu kan damna tur damdawi tak chuan hna a nihna ang taka a thawh theih nan, thlarau vitamin chhung inkhawmte, kohhran inkhawmte, tawngtai thatte hi kan tih reng a ngai bawk a ni.

Kan natna tak chu e nge ni ta angle, kan thinrim reh theilote, kan lungawi duh lohna te, midang kan dawhtheih lohna te, kan inngaithlawm duh lohna te, Pathian kan rin ngam lohna te hi a ni em. Heng kan natna fakte hi alo dam theina tur chuan, kan natna damna tur tak damdawite chu tha taka kan hmana,  ringtu nun tha pangngai tak kan neih tlat a pawimawh bawk a ni.

Samari hmeichhia kha a nun a ruak a ni, a nun ruak hnawhkhah nan pasal panga a lo nei tawh a, Isuan chu chu a hriaa a mamawh tak pawh amah a ni tih a hrilha. "Keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho vang" a ti a. He tui nunglui hi hmeichhia hian a neih chuan, a nun a ruak tawh ngai dawn loa, amaha a awm pawhin hlim veng vengna chu a thinlung atang a rawn chik chho dawn a ni. Tin, Isuan "Jerusalem khuaah kher lo pawh Pa chibai inbuk hun a thleng dawn ta"(Joh 4:21b) a ti a, ringtu nun phung tha chu a dah tha chuang lo bawk a ni. (Tin, Johana 4:21 hi dan hlui a thiahna hun a thleng dawn a tihna pawh a ni thei awm e.)

(Tawngtai Dan Tur)

Lalpa, ka natna zawng zawng hi i tihdam theih avangin, i hnenah engmah ka zep a tullo a, ka natna min tihdam theih nan i hnenah ka natna chu ka rawn thlena, i duh anga rinawm taka ka nun bawk theihna turin min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

I Kawppui Tur I Hriat Theihna Tur Pakhat

"Engah mah mangang suh u; engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se."(Philipi 4:6)

I kawppui tur chuan, Pathianin i tana a buatsaih, rawng ila bawl dan tur emaw, ila nih tur emaw chu a hmuh lawk pui thiam ang che. Tihian, han sawi nawn leh ila "i kawppui tur chuan ila thlenna tur destination chu, a hmu pha ve ang, chu ila thlenna tur hmun chu hlatin a nilo zawngin kal rih mahla, ila thleng dawn tih engtin emaw tak a hria ang, he thu hi bible nen a inmil em tih hi, i han chhutho ang u hmiang.

Abigaili'n Davida kha, lal ala ni dawn tih hi engtin nge a hriat theih atang hian, i han chhut chhin ang u.

Saula thah a hlauh avangin, Samuela'n Davida kha a rukin hriak a thih a ni. Davida te chhungkua bakin, Samuela'n Davida kha hriak a thih tih an hreloa, amaherawchu Samuela'n Saula hnenah Pathianin a kalsan tawh tih leh Israel chu midang a pek tawh thu alo hrilh tawha. Kum a ka a kala, Davida chu Pathianin a awmpui em em a, Goliatha pawh a hneha, a thiltih apianga a tluan zel danah hian, Saula hian Davida hi lal tur a ni tih a hrethiam niin mithiam te chuan an ring a. A lal zawk Saula'n a chhiahhlawh zawk Davida a thik ta tlat mai a nih kha!

Chutiang pawh chu lo nita reng reng se, Abigaili leh Saula te chu an in hlat hle a, Abigaili'n Davida hi lal ala nih tur hi, Saula chhungkua leh sipai ho te atang chuan, hriat ngaihna atan a awm lo a ni. Chu mai pawh chu ala nilo a, Abigaili hi hmeichhia a ni, an hunlaiah chuan, hmeichhiate hi an dah hniam a ni tih kan hre vek ang. Tin, chu mai pawh chu ala nilo, Davida kha, Abigaili nen an intawn lai khan, Davida kha kum 10 chuang fe Saula hlauin a tlanbo tawha, khuaah pawh awm ngamloin ramah a awm a ni.

Chu mai pawh chu ala nilo leh zel, Davida leh a hote hi, eitur an nei em em lo te pawh a nih a rinawm, Abigaili pasal Nabala  hnenah kut an va dawh a ni. Nabala'n Davida te dilna chu alo hnawla, Davida thinrim chuan, Nabala thah a tum a nih kha. Chutah chuan, Abigaili chuan Davida leh a hote eitur ken sakin ava tawka, Davida chu chibai a buka "Israelte lala a siam hun che chuan"(1 Sam 25:30b) "Lalpan ka pu chunga thil tha a tih hunah chuan i chhiahhlawhnu hi hre reng ang che" (1 Sam 25:31) tiin Davida chu a ngen a, Davida'n a ngenna chu alo pawm a ni. Engtin nge, hetiang hian Davida hi lal a nih a rin theih? Kan ina kut dawhte hi, Minister emaw, Mihlawhtling emaw i nih hunah min hre reng rawh o, ti kan awm ngai ami?

Abigaili hi, thil hre pangngai tak a nih chu a rinawm, 1 Samuela 25:3 ah chuan "Abigaili a ni a chu hmeichhia chu bengvar tak hmel tha tak a ni a" tiin a in ziaka. A bengvar chuan, Davida chanchin zawng zawng leh Pathianin Davida a awmpui thin zia chu a hria a nga, miten Davida khan Goliatha that mahse engmah alo nilo a nih hi, hei khuaa a awm tawh lohna pawh kum 10 chuang a ni tawh tia an sawi ve te pawh a rinawm tawha, chung zawng zawng karah chuan Davida chu lal ala nih ngei Abigaili hian a ring a ni. Tichuan, a pasal a thih hnuah Davida nen an innei ta a nih kha.

Isaaka leh Rebeki te inneih chungchangah pawh khan, Abrahama khan a chhiahhlawh pakhat hnenah a fapa Isaaka nupui zawng turin a tira. Chu chhiahhlawh chu, a tawngtaia a dilna ang chuan Pathianin engkim a remsak a ni, chhiahhlawh chuan Rebeki chu rangkachak hnarvuah a pe a ni. Chhiahhlawh chuan, Rebeki chhungte hnenah an pu nupui turin Rebeki chu a dila, a chhungte chuan Rebeki duh leh duh loh chu an zawta, Rebeki chuan a duh a, tichuan Isaaka nupui chu a ni ta a ni. Engtin nge Rebeki hian a hriat ngai loh nupui nih chu a duh theih? Mipakhat tir ila, nula pakhat hnenah eng emaw va pe se, tichuan he thil min pek tirtu che nupui i ni duh em ti ta sela, tumahin an duh a rinawm loh a ni? Mahse, Rebeki chuan a duh tlat, a chhanchu Pathianin hna a thawka, Rebeki chuan mitha tak a nei dawn tih hi engtin emaw a hre tlat a nih a rinawm.

Davida leh Isaaka te hi Pathian tih mi an ni, Davida chuan Lalpa a tih avangin Lalpan awmpuia, hmeichhe bengvar takin hma hun duhawmtak a nei tih alo hrethiam a. Isaaka chu a naupan tet atang Pathian a tiha, apa'in halral thilhlana hlan a tum pawhin apa thu a awi zel a nih kha, tichuan amamawh hunah Pathianin a thawhsak vetaa, ral hla tak ami nula hmeltha em em thinlungah Lalpan a thawhsaka, a hmel la hmu miahlo, hmeichhia chu a nupui niturin a rawn zin vang vang a ni.

Davida leh Isaaka hi Pathian tih bik leh thlan bik an ni a, Abigaili leh Rebeki te pawh hi hmeichhe tha bik an ni. Lalpa tih mi i nih chuan, "mi nazawngin, i hma hun tur kha an hrethiam lo ang, mi bik chauhin an hrethiam ang" hei hi kan hriat theuh a ngai awm e.

Davida, Isaaka leh Chhiahhlawh nunah hian tawngtai kan hmua, tawngtai hi kawppui zawnna ah hian a pawimawh bang lo a ni.

(Kan thu ziah hi, kawppui kan tawn theih dan chi khat chauh a ni tih hi kan hriat a pawimawh awm e, Josepha leh Mari chungchangah khan Josepha khan Mari hma hun tur kha a hre chuang miahloa, mahse Pathianin a suih zawm tho a ni. Pawimawh ber chu bible chang kan tarlan ang khian, "engkimah tawngtai leh dil" hi a ni.)

(Tawngtai Dan Tur)
Lalpa, mibik ka nih theihna tur leh mibik kawppuia ka neih theihna tur chu, nangmah ka tih tlat che hi a ni tih hriain, nangmah tih tlat chung leh i hmaa kuna tawngtai tlat chunga nun ka hman theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

I Tih I Tih Chuan, Ngah Nge I Hlawhtlin Loh Ang?

"Tichuan thil tha tih i ning suh ang u; kan inthlahdah loh zawngin a hun takah chuan kan seng dawn si a."(Galatia 6:9)  

Thu pakhat chuan "Lumehna hmuna i awm i awm chuan, i lu i met ngei ngei ang" a ti a. He thu hi thu fing anga sawi pawh a ni hran loa, mahse awmzia a nei thuk takzet a ni. Lumehna hmuna i awm i awm chuan i lu i met ang tih anih ang chiah hian:

1. I inkhawmni inkhawm chuan, Pathian nen in intawng ang.

2. I tawngtai i tawngtai chuan, i tawngtai hlawhtling ang.

3. Hlawhchham thin mahla, hlawhtling tura i beih i beih chuan i hlawhtling ang. Pathian nena hlawhtling tura beihnachang i hriat phei chuan, mi nihlawh tak ila ni ang.

4. In chhungkua chu, Kristian chhungkuaa thlak i tum i tum chuan, Kristian chhungkua in la nei ang.

5. Pathian tana mi tangkai nih i tum i tum chuan ila ni ang. Thlaraubo Lalpa hnena hruai thlengtu ila ni hial ang.

Hetiang ang chiah hian, sual lamah pawh a ni tho awm e, thilsual eng pawh kan tih kan tih chuan a tawpah chhiatna rapthlak tak kan la tawk ngei ngei ang.

(Tawngtai Dan Tur)
Lalpa, i hming avanga thil tha tih hi a harsa a nih pawhin bangloa ti turin min pui la, chutianga i hming avanga thiltha ka tih chuan alo thlawnin ka ti dawn lo a ni tih hriain nasa zawka thiltha tih kawngah ka tan zel theih nan min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Tawngtai Hlawkna

"Ka ti a che u, a thian a nih avangin thovin a va pe lo na a, a dil ngut ngut avangin thovin a duh zat apiang a va pe ang. Chutichuan ka ti a che u, dil rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u. Tupawh a dil apiang chuan an hmu thin a, tupawh a zawng chuan an hmu thin a, tupawh a kik chu an hawnsak dawn a ni. (Luka 11:8-10) 

Tawngtai hi a hlawk a, a hlawk lo ber zawngin han sawi tan phawt ta ila, tihian han sawi teh ang.

I.A.S nih duh lo nita ang ila,  ni tinin vawihnih vel tleirawl lai atang I.A.S ka ni dawn ti ziah ta ila, chu chuan I.A.S nih tum turin nasa takin min nawr a nga, min ngaihpawimawh tir bawk a nga, I.A.S ni tura zirthiam turte leh paltlang ngaite, zirthiam tur leh paltlang turin theih tawp min chhuah tir a nga, a tawpah phei chuan I.A.S ka nih phah hial thei a ni. Ni tina "I.A.S ka ni dawn" ka tih thinna chuan, keimahah I.A.S nih chu nasa takin a tuh ngheh avangin.

Chutiang ang chuan, ni tina kan duhna Pathian hnena kan thlena kan sawi chhuah hrim hrim pawh hian, keimahni leh keimahni pawh kan thil duh chu kan inhrilh nawn thin tihna a ni a, chu chuan kan duh chu enge a ni tih min hriat chian tira, kan duh chu nei thei turin min beihtir bawk thin a ni. Kan tawngtai hian keimahni leh keimahni pawh kan lo inpui reng a ni.

A hlawkna lam han sawi dawn ila, chutih rual chuan kan sawi chhuak seng dawnlo tih hi a hriatsa bawk awm e, chu vangin tunlai nuna kan hriattheih (feel theih) awm lam sawi mai ila.

1. Pathian hnena kan duhna te kan dil hian, Pathian kan beisei tihna a ni a, kan duhna chu kan thlen apiangin Pathiana kan beiseina chu tihzual a ni zel  bawka, chu chuan a thu zawm turin nasa takin min pui thin a ni.

2. Kan tawngtai hian van Lal thutthlenga thu, engkim chunga roreltu Pathian kan bia a ni. Min be thintu te kan ngaihsak ang bawk hian, Pathianin amah be tlat thintute chu a ngaihsak em em thina, an duhna leh dilnate chu a tihhlawhtlin sak thin a ni. Thu hril, zai, thu ziak leh rawngbawlna hrang hranga Pathianin a hman te hi tawngtai tlem an awm ngai loa, tawngtai damthei tawngtai tlem an awm lo tih pawh kan hre theuh awm e.

3. Kan tawngtaia kan duhna Pathian hnena kan thlen hian, Pathianin alo hriaa kan duh ang niloin a duh angin min chhang thina, a duh anga min chhanna chu a tha em em a, entirnan naupangin a pa hnenah sweet kawr sen vat mai hi a dila, a pa chuan chaw an ei ahun avangin sweet chu a leisak rih duhloa, chaw a eikham hnuah chuan sweet kawr sen aia tha zawk chu a lei sak ta zawk a. Hetiang ang chiah hian, kan Pathianin a duh anga kan tawngtaina min chhansak hi, kan duh ang thlapa min chhansak ai a tha zawk reng thin a ni. Mahse, kan tawngtai loh chuan Pathian tan kawng kan hawnglo tihna a ni a, kan nunah a che lo thin a ni. Kan Pathian hi sawmtute hnar ngailo a ni a, chutih rual chuan sawmlo tute nawr lui ngailo a ni bawk a ni.

4. Pathian hnena tawngtai fo thin kan nih chuan, kan thinlung chu Pathian duh ang duh turin alo inthlak ta thina, Pathian duhna leh kan duhna a in an chuan, a duh anga tawngtaina chhang thin Pathian a nih avangin kan tawngtaina chu a chhang thin a ni.

5. Kan bible ah chuan bangloa tawngtai turin min tia, kan bang tur a nilo renga, bangloa kan tawngtai hian kan dila chu nei tlak ni turin Pathianin kan nun chu min siamsak thin a, chu mi hnuah chuan kan dil chu min pe thin a ni. Nupui leh pasal (Kawppui) tur Pathian hnena dil ngar ngar thinte hi Kristian chhungkaw din theite an ni leh nge nge thin a. Tawngtaia hna dil ngar ngar te hi, an hna thawhna lama sual laka in vawng thei takte an ni leh nge nge thin bawk a ni.

(Tawngtai Dan Tur)
Lalpa, i hnena ka tawngtai min phalsak avangin ka lawm e. Van Lal ber chuan ka biak i duh ve hi amaka a lawmawm ropui a ni, i hnena lawmthu sawia tawngtai leh dilna thlena tawngtai thinte chu, i ngaihsak thin a ni tih hriain, tha hnem ngai taka banglo a i hnena ka tawngtai thin theihna turin min zirtir ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Mitha Chuan Misual Aia Thih A Thlang Ta "Isua Leh Barabba"

"Mi dang tuma hnenah chhandamna a awm lo; van 

hnuaia mihring sak zingah, min chhandam tur hming dang reng a awm lo,” a ti a."(Tirhkohte 4:12)  

"Isuan a hnenah, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo."(Johana 14:6)  

Tinge Isua chhuah loin, buaina chawkchhuaktu hel leh tualthattu Barabba kha chhuah a nih. Isua khan sualna a nei ami? Sualna a nei hleinem, Barabba erawh chuan thihna khawp sual a ti asin. Midang tidamtu, midang chhanchhuaktu, naupangte kuangkuahtu, eitur neilote eitur petu a ni asin Isua chu!

Engtin nge misual zawkin damna a chana, mifel thiltha zawng zawng titu khan thihna a phu theih? 

Achhanna - Pa Pathianin misual chhanchhuah a duh vang a ni.

Ni e, misual ngei, a sual tih lai ngei an man Barabba kha chhanchhuaha, a fapa engmah tisuallo kha, misual aia a thih zawk chu tha a ti a ni. 

Nih leh, Pa Pathian a fapa petu thinlung chu, a fapa misual ai a thih dawn avangin a na ve dawn lawmni?

Achhanna - Na tak a ni, na tak! Chutiang takin a thinlung chu na mahse, misualte chhanchhuah theihna kawng awm chhun a ni a, a fapa Isua Krista chu thihna in a ngam dawnlo tih a hriaa, mahse misualte chuan thihna an ngam ve dawn silo.

Pa Pathian thinlung a na tih kan hriat theihna chu, a fapa misualte chhanchhuahna tura, a tawrhna leh a fapa hnawltute  chu, ngaihdam ngaihna Pa Pathian hian a hre tawhlo a, ngaidam pawh a tum tawhlo a ni. 

Nih leh Isua leh a chhandamna pawmtu te chu, engtin nge Pa Pathian chuan a tih?

Achhanna - A fapa tawrhna chuan a thinlung a tihnat ang bawkin, a fapa inpekna chu a ngai hlua. A fapa chu Lal leh Chhandamtua pawma, a fapa tawrhna chu chhandamnaa pawmtu te chu, Pa Pathian chuan faah ala a, fa tak angin a hmangaiha a ni.

Barabba tluka misualte, sual tihlai ngei an man te chuan, heng thu hi kan ziaka, kan chhiar bawk a nih hi! Barabba aia tuar a nih ang chiah khan, kan sual aia tuar a ni. 

Kan Lalpa Isua Krista chuan, i sualna nen khan min rawn pan rawh kalo ngaidam ang che, fa tak nihna kalo pe ang che tiin min sawm renga. 

Lalpa i hnena rawn kal chu ka duha, mahse ka sual palh leh thei asin, kan ti em? Isua chuan, i sual tawh dawn loh avangin min pan rawh ka tiloa, i sual chung chung pawh khan ka hmangaih chea, min pan la, i sual i sim theih nan ka pui ang che min ti zawk a ni.

Kan Awm Angin Lalpa Isua Krista I Pan Ang U.

 (reference Judah Smith sermon , a sermon jam hi ilo enchhin ve dawn nia https://www.youtube.com/watch?v=RwX_EpNR4CA) 

(Tawngtai Dan Tur)

Lalpa, nang ang reng hi an awm loa, nang ang renga hahdamna leh chawlhna min pe theitu hi an awm lo, nang chuan ka sual ang angin min hmangaih cheu a, nun tha zawk nangmah nen kan nei dawn a ni tih hriain, ka pan chea, thlah loin ka vawntlat theina tur chein min pui ang che, Amen. Ti ang o.

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.

Anxiety Hmachhawnna Tur Bible Chang 11-Te (Part 2)

Beisei ti tih, hlauhthawng ti tih sia rilru buaina i nei ve thin em? Anxiety hmachhawnna tur Bible chang 11-te kan tarlang meka, nimin lama chhuakah khan Bible chang 5 kan tarlanga, kan la chhiarlo a nih chuan kan chhiar dawn nia(http://nungturin.blogspot.com/2018/09/anxiety-hmachhawnna-tur-bible-chang-11.html).Vawinah chuan Bible chang 11 zinga 6 kan la tarlan loha te kan tarlang dawn a ni. 

6. "Ka hlauh chang apiangin, Nangmah ka ring ang che." - Sam. 56:3

Ringtu te kan vanneihna chu kan nun a buai ve ngai lo ni lovin, buaina karah leh harsatna karah pawh rinchhan tur Pathian kan nei hi a ni. 

7. "Ani erawh chuan, 'Mihring tih rual loh hi Pathian tih theih a ni,' a ti a." - Luka 18:27

Kan tih theih piah lam thil hmachhawn pawh ni ila, Vana Lal thutthlenga thu khian min tihsak thei a ni. Ava thlamuan thlak tak em. 

8. "Isua'n a hnenah, 'Ka thiltih hi tunah i hre lo; nimahsela nakin hnuah i la hria ang,' a ti a, a chhang a." - Johana 13:7

A chang chuan kan nunah hian fair lo tak tak leh beisei loh thil a thleng fo, hriatthiam a har a ni. Mahse engkim hi chhan neiin a thleng thin. Pathian remruatna fel lutuk hi hmuh fiah mai a harsat chang a awm a, tunah hrethiam rih lo mah ila, chhan tha tak a awm a ni tih hi ala fiah ngei dawn a ni. 

9. "I thinlung zawng zawngin LALPA ring la, Nangma hriatnaah innghat suh" - Thufingte 3:5

Pathian hian keimahni kan inhriat aiin min hrechiang zawk. Tumah inang lovin : hmel, mizia leh talent hrang theuh neia ama siam kan ni. I rinna chu amah pe la, a kaihhruaina a pe ve thung ang che. 

10. "Hmu theia kal lovin, rinnain kan kal zawk si a." - 2Korinth 5:7

Kan hma hun zawng zawng hmu thei ila, Pathian kan ring thei nang. Naktuk maia thil thleng tur pawh kan hriat loh vang a ni Pathian kan rin a tul em em. Chuvangin, Pathian ring a, chhungrila chawl chunga hun hman a pawimawh em em ni. 

11. "Kei beram vengtu tha ka ni; beram vengtu thain beramte tan a nun a pe thin." - Johana 10:11

Beram vengtu chuan a beram vente chu a nunna chan huamin ramsa lakah a hum thin a ni. Chutiang bawkin Isua chuan keini a beram te tan hian a nun hial Kross-ah a rawn hlan a. Min hmangaih em em a ni. A ngaihsakna, a venhimna, a malsawmna kan dawng ngei ngei ang.

(Tawngtai Dan Tur)
Lalpa, kan tan kross ah khan i nun i hlan ral veka, tunah erawh chuan van Lal thutthlengah i thua engkim chungah ro i rela, sualin khawvelah hian thilthalo te thlen tir thin mahse, ka tana nun hlan ral duh hial tu chuan, ka tana thalo turin ro i rel ngailo ang tih hriain, nangmahah ka innghah tlat theih nan min pui ang che, Amen. Ti ang o. 

Instagram: https://www.instagram.com/nungturin/

Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIAIN LO FORWARD VE ZEL ANG CHE.