Beisei ti tih, hlauhthawng ti tih sia rilru buaina i nei ve thin em? Anxiety hmachhawnna tur Bible chang 11-te hi keimah ang bawkin i hlawkpui ngei ka beisei. Tun tumah chuan, uluk zawka kan ngaihtuah theih nan, Bible chang panga tar lang phawt ila:
1. "Chutichuan, atuk atan lungkham suh u, atuk chuan ama tan a lungkham chawp dawn si a. Ni khat atan ni khat hrehawm chu a tawk a ni." - Matthaia 6:34
He Bible chang hi ka roomah ka tar a. Vawiina ka buaina tawh hi vawiin atana Pathianin ka tawh tura a ruahman a ni a, naktuk lamah enge thleng ang? Eng buaina tak tawk leh ang maw? Vawiina ka buaina hi a zual mai anga? tih te hi ka ngaihtuah tur a ni lo tih he Bible chang hian min hriat nawn tir fo thin.
2. "Tun laia tuarnate hi nakina kan chunga ropuina tihlan tur nen chuan tehkhin thamah ka ruat si lo." - Rom 8:18
Eng anga tawrhna nasa pawh lo thleng mahse Pathian hnen ka thlen hun tur ka ngaihtuah a, ka tawrhna te chu a nep dawn hian ka hre thin. Harsatna hmunah pawh hei hian min ti chak thar thin.
3."Tuite in dai kai lai pawhin kei in hnênah ka awm ang a; luite in dai kai lai pawhin a chim pil lo vang che u: meia in kal tlâng lai pawhin in kang lo vang a; meialhin a tialh hek lo vang che u." - Isaia 43:2
Pathian chuan khawvelah hian engpawh tawk ila min kalsan dawn lo. Min hruai luh tawhna hmun chu min patlang pui ngei thin a ni.
4. "Hei hi LALPA ni ruat chu ani a; He mi-ah hian kan hlimin kan lawm ang." - Sam 118:24
Zing ka thawh veleh hian, vawiin ni Pathianin min hmuhtir leh ta, ka van lawm tak em tiin ni bul ka tan thin chuan, Pathian ropuina kan hmu a nga, lawmna nen ni chu kan hmang ngei ang.
5. "Hlim taka awm a, an nun chhûnga thil tha an tih aliama an tana tha zawk engmah ka hre lo." - Thuhriltu 3:12
Pathian hian chhan neiin min siam a, keimahni theih tawka thil tha tihtur min tuk sak vek a ni. Chumi kan tih chuan kan hlim dawn a ni.
(Tawngtai Dan Tur)
Lalpa, ka rilru buaina zawng zawng leh ka chhungrila zah ngawih ngawihna lo chhuak thinte hi, ka hneh theihna turin nangmaha ka innghah tlata, i thu ka rin tlata, i thu ka zawm bawk theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
👍👍
ReplyDelete