Tih Tur Tih Hlawkna

"Chutichuan tupawh thil tha tih tur hriaa ti si lo chu a tan sual a ni."(Jakoba 4:17)

Tih tur tha kan hriat, kan tih loh hi atam em em a, kan tih loh tur kan tih tluk zet hian, ka tih tur pawh hi kan tilo tam awm e. Chu chuan misual, chhanchhuaktu mamawh, Isua Krista tlanna vang chauha him (saved) kan nih zia a tilang chiang hle awm e.

Tih loh tur tih loh hi a har em em a, chu tihlaiin tih tur tih thlap thlap phei chu har leh zual tak a ni. A nihna takah chuan, tih loh tur ti tura thlemna kan thawh chhan tamber chu, tih tur kan tih loh vang a ni ti ila kan sawi sual awm lo e.

Kan unau ruihhloa buaite pawh hi, engtia ruihhloa buai nge i nih, tia zawh chang hian, hun awl ka ngah em vang a ni an ti thin. Mipat hmeichhiatnaa daisual palhte leh nun kawng hmangsual palhte pawh hi, an tihsual chhan bul bera an sawi thin chu hun awl ka ngah vang a ni, an ti thin. 

Hun kan ngah chhan chu, kan tih tur kan tih loh vang a ni thin, entirnan kohhran inkhawm hi tih tur tha a ni, inkhawm a tha tih pawh kan hre veka, tichuan kan inkhawm ngai loh chuan inkhawm hun kha hun awl alo ni taa, chutiang ang chiah chuan, kohhar inkalte, hnatlante, chhungkuaa tih tur hrang hrang te, chhungte nena hun hmante, damlo kan te,etc heng tih tur tha kan tih loh vang hian hun awl kan nghah taa, chung hun awlah chuan, kan lung a leng a, lungawina kan zawng taa, chu chuan sual lamah min hruai lut thin a ni.

Tunlaiah chuan, mi tamtak hi eizawnna tur mumal hmuloin kan buai a ni, hei pawh hi harsatna dang vang chu a nih theih rualin, tih tur tha kan hriat kan tih loh vangin he harsatna hi kan tawk a ni te pawhin a hriata, pakhatna ah chuan eizawn dan tur tha kan hriat theihna turin lehkhabu kan chhiar loa, mi kan rawn loa, hna tha hmu turin kan inzir lo bawk thin a ni. Hei hian, min ti tam taa, kan politics thleng pawhin a dik loh phah hial ti ila kan sawi sual tam awm lo e.

A tawp berah chuan, tinge tih tur tha kan tih peih loh chhan hi i han inzawt chhin teh ang u. A chhanna dik tak chu, "kan thatchhiat vang" a nih a rinawm. Kan bible'in "thawklo chuan ei pawh ei suh se" alo ti dimdiam tawh lehnghal bawk nen, he thu hi hna va thawh bawrh bawrh lam a ni fai vekloa, thlarau lamah nasa takin a kawk a ni. Bible kan chhiar loh miau chuan, bible chhiar thinte hamthatna ang kha kan neilo ang, chhungkua kan ngaihthah miau chuan, chhungkua ngaihsak te chhungkaw boruak nuam ang chu kan nei lo ang, lehkha kan zir peihlo a nih miau chuan, lehkha zir peihte thiamna ang chu  kan nei lo ang, kan inkhawm peih loh miau chuan inkhawm peihte nun in uluk theihna ang chu, kan nei lo ang, kan tawngtai peih loh miau chuan, tawngtai peihte chakna ang chu kan nei lo ang, a chhanchu kan thawk peihlo miau alawm!

Tih tur tih loh pawi zia leh tih tur tih mai a hlawk zia hi kan ngaihtuah thin fo a pawimawh awm e.

Tih tur tih hi, a harsa lo a ni, "tih tur tha tih atanga hlawkna rawn chhuak hi, tih tur tha kan tihna hian a man phalo zawk mah mah thin a ni." Tih tur tha tih tan dan awlsam ber chu, tih tur thaa kan hriat, harlo ber pakhat tih chhin a ni a, a  rahchhuah tha kan hmuh atang tih tur tha dangte pawh, ti turin min lo tur tawh mai thin a ni.

Rawngbawltu thawhhlawk tak Joyce Meyer pawh hian, ka bazar'in ka nawr lirh (shopping cart, airport trolly ang) hman chu a awmna hmunah Pathianin min dah kirtir thin a ti. An ni khu chu, an bazar hi a lian thei em em a, tawlailir te ang hi dawr neitu ten an lo chhawp thina, chu chu motor dahna atang Joyce Meyer hian ava dah let leh thin a ni. He tiang taka, tih tur tha tih hi hmaih an duh loh thin avang hian, Pathianin a hmang nasa reng bawk a ni. Tih tur tha hrang hrang an in ah te, an kohhranah te a ti ang, mahse tih tur tha a tih man leh Pathianin khawvel pumpui huapa a hmanna man hi buk ta ila, a tih tur tha tihna hian nasa takin a lei phak a rinawm bik loh a ni. Tih tur tha kan tih hian, a thlawn ta emaw tih tur khawpa a hlawkna a lan mai loh chang a tam zawk theia, mahse hun a kal zel a, a hlawhna kan thiltihin a phu loh khawpa tha, kan dawng leh thin a ni.

(Tawngtai Dan Tur)
Lalpa, tih tur tha hriata tih loh hi sual a ni tih leh tih tur tha tihna chuan hlawkna nasa tak a nei a ni tih hriain, ka hma zawna ka tih tur te hi, inthlahdah loin, ka tih zel theihna turin min pui ang che, Amen. Ti ang o.